Ua Na’o Tusiga Faaeletonika: Autalavou Matutua
O E Manatu E Lē Silafia Oe e le Atua? Talitonu mai ia te A’u, Na te Silafia oe
E tasi le aafiaga na mamanuina ai lo’u olaga atoa ma aoaoina ai a’u e faapea e silafia pea i tatou i taimi uma e le Tama Faalelagi.
Talu ai nei lava na ou foi mai ai mai la’u misiona ma ua ou lagonaina le lē mautinoa po o fea ou te alu i ai i lo’u olaga. O nisi taimi ou te mafaufau ai pe faamata o silafia moni lava a’u e le Tama Faalelagi, o o’u tulaga, ma o’u lagona o le lē mautonu.
Ae na ou manatua, e Na te silafia lava. Na te silafia mea o loo o’u o’o i ai.
Ma e faapefea ona ou iloa lenei mea?
Muamua, ona o loo faaauau pea ona faamautinoa mai e o tatou taitai o le Ekalesia ia i tatou nei upumoni. O Peresitene Russell M. Nelson, mo se faataitaiga, na saunoa talu ai nei: “Ou te faamautinoa atu ia te outou o lo tatou Tama Faalelagi ma Lona Alo Pele, o Iesu Keriso, e alolofa ia te oe. La te silafia patino ou tulaga, o lou lelei, o ou manaoga, ma āu tatalo mo se fesoasoani.”1
Ma le lona lua, ou te talitonu e silafia a’u e le Tama Faalelagi ma Iesu Keriso auā e tele ni o’u aafiaga i lo’u olaga na La fesoasoani mai ai ia te a’u ma faaali mai ia te a’u lo La’ua alolofa.
Ae o le aafiaga ou te mafaufau soo lava i ai o lo’u vaetamaina mai lea.
Vavega
Ina ua tolu o’u tausaga, sa ou nofo i se nofoaga o tamaiti mātuaoti i Kemupotia. Sa ou ma’i tigaina i le nimonia, ma sa lē gafatia e le nofoaga o tamaiti mātuaoti lo’u tausiga faafomai.
I le taimi lava lea, sa asiasi atu ai lo’u tinā lea ua i ai nei, i Kemupotia mai Finelani mo se malaga faalegaluega. Sa i ai sona aafiaga faaleagaga lea na taialaina ai o ia e asiasi i lo’u nofoaga patino lea sa ou i ai.
Ina ua ma feiloai, sa ia lagonaina vave se fesootaiga faaleagaga ia te a’u.
Sa ia ave a’u i le falemai ma totogi mo a’u tupe faaalu i le falema’i. Sa ia lagonaina sa taialaina o ia i Kemupotia e fesoasoani ia te a’u ia ou lelei atili—e leai se isi mea e sili atu. Ae i luga o le telefoni i se tasi po, sa fai atu ai lona tamā ia te ia, “Atonu e tatau ona i ai lenei teineitiiti i lou olaga.”
Sa ia tatalo ma lagonaina lana lava faamautinoaga faaleagaga e faapea, e tatau ona avea a’u ma ana tama. O lea sa ia amataina ai le faagasologa o le vaetamaina ma toe foi mai ai i lona aiga i Finelani faatasi ma a’u.
Soo se taimi lava ou te lagona ai le lē mautinoa pe o silafia a’u e le Tama Faalelagi, o le mafaufau loloto i la’u tala tulaga ese o le tupuaga ma vavega e aofia ai, e faamanatu mai ai pea lava pea ia te a’u lenei upumoni: E silafia lelei e Ia ma aofia ai i lo’u olaga.
O Le Mana o le Manatuaina
O le manatuaina o lenei aafiaga o se malosiaga e uunai ai, mo a’u i taimi sa ou tauivi ai a o o’u auauna atu i la’u misiona i Lonetona, Egelani. Ina ua tuuina mai ia te a’u le filifiliga e toe faaauau atu la’u misiona mo ni nai vaiaso, sa ou matua’i manao lava e alu i le fale!
Ae sa ou manatuaina na tuuina mai e le Tama Faalelagi ia te a’u ni vavega ina ia mafai ai ona avea a’u ma se meafaigaluega i Ona aao. O lenei malamalama na ou maua ai le malosi e auauna atu ai mo na vaiaso faaopoopo ma faasoa atu le alofa o le Tama Faalelagi ma Iesu Keriso i isi.
Ou te iloa e le o tagata uma o loo i ai i tulaga faigata atonu o le a tutusa o latou aafiaga faaleagaga ma vaega na ou maua. Ae ou te iloa tino lava e lei faagaloina e le Tama Faalelagi soo se tasi o i tatou. A o tatou aapa atu mo Ia, o le a Ia tuuina mai pea ia i tatou le malosi ma le taitaiga tatou te manaomia.
Na te Silafia i Tatou.
O lo’u aafiaga a o o’u laitiiti ua faamautinoa mai ai ia te a’u e oo lava i le faitau piliona o Ana fanau, sa silafia a’u e le Tama Faalelagi—o se tamaitiiti laitiiti, e foliga mai na galo i se nofoaga o tamaiti ua matuaoti—ma tuuina mai ai le musumusuga lea na fesootai atu ai a’u i le talalelei ma lo’u aiga.
Ma Na te silafia lelei oe.
Pe a ou lagona le tausalaina i au mea sese, ina ua lofituina a’u a o auauna atu i la’u misiona, ma a o o’u taumafai nei e filifili po o a mea e suesue ai i le iunivesite, ou te maua le malologa i le malamalama o loo faatasi mai lo’u Tama Faalelagi ma le Faaola ia te a’u.
E pei ona aoao mai talu ai nei Peresitene Susan H. Porter, o le Peresitene Aoao o le Peraimeri: “E le maua le alofa o le Atua i tulaga o o tatou olaga ae e maua i Lona i ai i o tatou olaga. Tatou te iloa Lona alofa pe a tatou mauaina le malosi e sili atu nai lo o tatou lava malosi ma pe a aumaia e Lona Agaga le filemu, mafanafana, ma le taitaiga. … E mafai ona tatou tatalo ina ia pupula o tatou mata e vaai i Lona aao i o tatou olaga ma vaai i Lona alofa i le matagofie o Ana foafoaga.”2
Ou te molimau atu e mafai e le Tama Faalelagi ma Iesu Keriso ona tuuina mai ia i tatou le mana ma le alofa tatou te manaomia e faia ai mea uma La te poloai mai ai ia i tatou. Ou te valaaulia outou ia saili ma le naunautai lena upumoni mo oe lava ia, ma ou te folafola atu o le a La faamanatu atu ia te oe lo La alofa i auala e sili ona e manaomia.