“Na Suia i le Filemu o Matou Tiga,” Liahona, Fepuari 2024.
O Leo o le Au Paia o Aso e Gata Ai
Na Suia i le Filemu o Matou Tiga
Ou te lei saunia i le toesea o lo’u tamā, ae o le fuafuaga a le Atua na aumaia ia te au le filemu.
Ata na tusia e Ellen Marello
Sa foliga mai e leai se mea na faigata mo lo’u tamā. E ui i le gau o lona vae, ae sa ia fausia se fale simā, fogafale lua mo lo matou aiga a o savali o ia i tootoo. O se vae gau e lei taofia ai o ia mai le auai atu i ona tiutetauave faaleperisitua pe mai le auauna atu i isi.
Ina ua fofogaina mai e Peresitene Russell M. Nelson i le 2020 e faapea o le a faia le sauniga faamanatuga i o tatou aiga, o lo’u tamā, o lē sa tumu i le amiosa’o ma le alofa mo le Alii, sa tootuli i Aso Sa uma i luga o le fola simā ma lona vae gau e faamanuia le faamanatuga. Sa ia fai mai e taua le tootuli e faaali atu le faaaloalo mo lenei sauniga paia.
I le aso 18 o Me, 2020, na maliu ai lo’u tamā pele, o la’u toa, i le KOVITI-19. Na faafuasei lava ona oo mai lona maliu ma sa lei saunia i matou. Sa na o le 61 ona tausaga. Sa ou aoaoina e pei lava ona faaaloalo le Atua i le faitalia, e tatau foi ona tatou faaaloalo i le taimi a le Atua. O le mafuaaga lena ou te faafetai ai mo Lana folafolaga na a’oa’o mai e le perofeta o Alema e faapea, “o agaga o tagata uma, o le taimi lava latou te tuua ai mai lenei tino faaletino, ioe, ia agaga o tagata uma, pe sa latou lelei pe sa leaga, e auina atu i lena Atua o le na tuuina ia te i latou le ola” (Alema 40:11). Alii ma tamaitai uma!
O le falelauasiga o lo’u tamā sa laitiiti ma paia. Sa usuina e le toasefululua o i matou ni viiga fiafia o le lotofaafetai i le Atua mo le olaga faaletino o lo’u tamā. Ina ua amata ona matou usuina le “Ua Susulu Mai Nei o le La,”1 o le aiga na i o matou talane, sa fetagisi muamua ona o se tasi o le aiga na maliu, sa faapea ona fifilemu. Sa foliga mai sa latou ofo ona sa lei nutimomoia i matou i le toesea o lo matou tamā, ae sa matou lagonaina le filemu i le iloaina o loo i ai se fuafuaga mo i tatou. Ou te talitonu sa latou lagonaina foi le filemu ua tuuina mai e Iesu.
E le faigofie le olaga e aunoa ma lo’u tamā, ae o loo i ai le filemu ia Keriso. Sa ma vavalalata tele ma lo’u tamā, ae e mafai ona ou lagonaina lona latalata mai ia te a’u i le taimi nei nai lo se isi lava taimi muamua. Ua faamauina a’u ia te ia ma lo’u tina mo le faavavau, ma ou te iloa o loo soifua lo’u tamā. Ua ou matua misia lava o ia, ae o lenei ua i ai ni o’u tamā se toalua i le isi itu o le veli—o lo’u Tama Faalelagi ma lo’u tama faalelalolagi. Ou te iloa o le a taialaina au e le Tama Faalelagi seia matou toe feiloai uma.