“Toe Fai! Toe Fai! O Se Olaga Atoa o le Aoaoina,” Liahona, Fep. 2024.
Matutua ma le Faatuatua
Toe Fai! Toe Fai! O Se Olaga Atoa o le Aoaoina
O le aoaoina i le olaga atoa e faifai pea ma faamalieina. Tatou te le o matutua tele e aoaoina ni tomai fou, atiina ae a tatou taleni, po o le tuliloa o mea fou e fiafia i ai. Ma o mea tatou te maua i lenei olaga o le a faamanuiaina ai i tatou e faavavau (tagai i le Mataupu Faavae ma Feagaiga 130:18–19).
Ina ua uma ona tausia lana fanau, sa ave e Martha Paewai ni vasega i le BYU–Pathway Worldwide ona amata ai lea o se pisinisi i luga o le initoneti.
Ata pu’e mai faaaloaloga a Martha Paewai
“O nisi tagata sa tetei i le iloaina sa ou amataina se pisinisi i luga o le initoneti mulimuli ane i le olaga,” o le faamatalaga lea a Martha Paewai. “Sa fai mai nisi o uo ia te a’u ina ua ou faato’ā amata, ’O le a se mea e iloa e se fafine Samoa e na o le tomai i galuega faasamasamanoa o loo i ai e uiga i fefaataua’iga?’”
E leai se tapulaa o tausaga i le aoaoina, o se faamatalaga e fiafia Sister Paewai e fai. E lē gata i lea, o le galue mai le aiga ua maua ai nei e ia le tele o tupe maua ma tulaga lelei atu e faigaluega ai nai lo le mea sa ia galue ai o se teufale i Niu Sila. Sa faigata ona amata se pisinisi fou, ae sa ia aoao pea a o ia faaauau pea ma sa naunau e fesili atu i isi mo se fesoasoani pe a manaomia. “O le BYU–Pathway Worldwide na tuuina mai ai ia te au le talitonuga e faataitai foi se mea fou,” o lana tala lea.
Sa amata e Jim Ivins se mea fou ina ua litaea o ia o se loia. Sa amata ona ia teuteuina e le gata i lona lava fanua ae o le tele foi o fanua o lana fanau. Na ia manatuaina: “Sa ou mafaufau e uiga i le mea sa ou manao e tuua mo i latou o se talatuu. Ina ua maliu lo’u toalua, sa tupu mai i lo’u manatu o se mea lenei e mafai ona ou faia mo i latou. Sa le na o le sii ese o maa, ae nai lo lena sa ou suesue i mamanu o le teuina o laufanua ma faataitai i faiga eseese. Pe a asiasi mai fanau a la’u fanau pe ou te alu e vaai i latou, e le na o le matou talatalanoa; matou te suesue i mamanu eseese ma galulue faatasi i ai.”
Sa manao lava Laurie Terry e ta le piano a o laitiiti o ia, ae i se aula na te le iloaina sa maua e lona uso ni lesona ta piano ae na te le’i mauaina. Ina ua litaea la o ia, sa amata ana lesona. “E pei lava o se isi lava mea, e manaomia ai le faataitai ma se naunautaiga e aoao,” o lana tala lea. I le taimi nei, i le mavae ai o ni nai tausaga, e tātā e ia le piano mo tagata pepese toatasi i le lotu ma tātā mo lona lava fiafia. “E le o mea uma e tatau ona avea ma se faafiafiaga,” o lana tala lea. “O nisi taimi o le au matamata sili ona lelei o oe lava ia.”
Sa faamatala e Sister Barbara B. Smith, a o saunoa ai o se Peresitene Aoao o le Aualofa i le konafesi aoao ia Aperila 1978, e uiga i se alii na litaea i le 63 o ona tausaga ma sa le mautinoa po o le a se mea e mafai ona ia ofoina atu e aunoa ma se galuega tumau. I lena taimi, sa ia fai mai, “sa leai sana galuega, leai ni mea e fiafia i ai, leai ni mea faapitoa e fiafia i ai, ma leai ni fuafuaga mo le lumanai.” Sa ia faaauau, “Sa tuua o ia e taumafai e saili se olaga fou mo ia lava po o le tau lava ina ola ma faatali e oti. O le mea e faanoanoa ai, ou te faaopoopo atu, i totonu o sina taimi puupuu sa maliu ai o ia.”1
I se isi itu, sa saunoa Elder Robert L. Backman e uiga i lona tulaga fou o se Pulega Aoao ua malolo faamamaluina i lana saunoaga mulimuli o le konafesi aoao. Sa ia fai mai na te le’i manao e avea e pei o tagata litaea lea e masani ona faapea le tala, “Na maliu o ia i le fitugafulu ae sa faatalitali ina ia falelauasi pe a valusefulu-lima ona tausaga.” Nai lo lena, sa ia manao e faaauau pea ona tuputupu ae ma aoao ma atiina ae nisi tomai ma mea e fiafia i ai.
Ona fesili lea o Elder Backman, “O le a le mea e fai?” ma tali mai i lena fesili taua i le ala lenei:
“E i ai se fuaitau se tasi i le Feagaiga Fou atoa lea e faamatala ai le soifuaga o le Faaola i le va o le sefululua tausaga ma ina ua ia amataina lana galuega. E tele taimi ou te sii maia ai lena fuaitau i le talanoa atu i le autalavou. Ou te mafaufau pe le tutusa le faatatauga mo i tatou uma, aemaise lava i latou ua litaea. Na tusia e Luka: ‘Ua tupu le poto ma le tino o Iesu, ua alofagia o ia e le Atua atoa ma tagata.’ (Luka 2:52.)”2
Sa uuna’ia e Peresitene Ezra Taft Benson (1899–1994) lenei lava ituaiga o aoaoina ma le tuputupu a’e, e tusa lava po o le a le matua o se tagata. I lana saunoaga i tagata matutua atu, na ia saunoa ai: “Matou te faamoemoe ua faatumulia o outou aso i mea e fai ma auala e mafai ona e tuuina atu ai le auaunaga i isi. … O le matua atu e toetoe lava o taimi uma e faauigaina ai o le lelei atu, aua o le tamaoaiga o lo outou atamai ma le potomasani e mafai ona faaauau pea ona faalauteleina ma faateleina ao outou aapa atu i isi. Na faaauau ona sii mai e Peresitene Benson mai le Tusi a Mamona, “Ia outou ola i le faafetai i aso uma, mo le alofa mutimutivale ma faamanuiaga e tele ua ia [Atua] to mai i o outou luga” (Alema 34:38).3
O na alofa mutimutivale ma faamanuiaga e oo mai e ala i le tulimatai atu i luma ma faamoemoega ma miti ma fuafuaga. I le avea ai ma ni Au Paia o Aso e Gata Ai, tatou te talitonu i le alualu i luma e faavavau, lea e aofia ai le mauaina o tomai fou ma le atiina a’e o taleni fou i lenei olaga, ae le na o le isi olaga. O le mea moni, o lena atina’ega patino ma le tulimatai atu i luma atonu o se ki lea i le ola umi.4
Ina ua litaea, sa toe foi Uso ma Sister Patterson i le aoga e aoao ni tomai fou: tomai lipea laaumalosi ma le fauina o meafale.
Ata pu’e mai faaaloaloga a le au Patterson
Ina ua mavae le 40 tausaga o avea ma se fomai ma se ofisa o le militeli, sa manu’a Kerry Patterson a o i ai i se misiona masani i Afghnistan. I le faamalosia ai e litaea se tagata e le atoatoa le malosi o le militeli, sa ia saili ai mo ni mea e fai. I le le faamalieina ai i le na ona faaalu o ona aso e fagota ai, na toe foi ai ma lona faletua, o Linda, i le aoga i se kolisi a le nuu i le lotoifale.
“Sa ave la’u vasega faakamuta ma faieletise i le aoga maualuga ae sa leai lava se isi aoaoga matataeseese talu mai lena taimi,” sa ia faamatala mai ai. “Ae ui i lea, sa ou filifili e aoao le lipeaina o laaumalosi. Sa ou fiafia e faaleleia tagata i le avea ai o se fomai ma mafaufau faapea o le aoaoina o le auala e faaleleia ai mea e manaomia ai le masini faatonutonu o le a ola ai pea lo’u mafaufau. Sa sili atu ona faigata nai lo le mea sa ou mafaufau e alu i ai i se mea e fou ma ese.” Ae i le taimi nei i le 71 o ona tausaga, i le maea ai o le faamaeaina o kosi uma e manaomia ma le mauaina o laisene talafeagai, ua tele atu ana pisinisi nai lo le mea e mafai ona ia taulimaina. Ua ia faafaigaluegaina foi se tagata faataitai e faasoa atu i ai le telē o le galuega ma aoao le tomai.
Ata pu’e mai faaaloaloga a le au Patterson
Sa ave e Linda isi vasega i le kolisi a le nuu i le taimi lava e tasi ma lona toalua. Faatasi ai ma le la fanau e toaono ua matutua, ua i ai nei sona taimi e tuliloa ai lona fiafia i le mamanuina o galuega kamuta ma meaafale. “Sa na o a’u le tamaitai ma tulaga ese le matua mai isi tagata o le vasega, ae ou te le’i faatagaina lena mea e tosinaeseina a’u,” o lana tala lea. “O nisi o galuega faatino na umi atu se taimi na ou faamaeaina ai nai lo isi tamaiti aoga, ae sa ou tumau ai pea.” I le mavae ai o le lua tausaga o aoaoga faamasani, ua ia fausia nei ni kapeneta mo tagata o le aiga ma isi. “O lea la ua mafai ona ou fesoasoani i le fanau e toe faafou a latou umukuka ma fesoasoani i tagata o le nuu o e manaomia sina fesoasoani laitiiti i a latou lava galuega faatino toefaaleleia.”
E le’i faatagaina foi e Pat Morrell lona matua e taofia o ia mai le amataina o se mea fou. O le manaomia ona faaopoopo atu i le tupe maua a le aiga, sa ia toe foi ai i le aoga ina ua matutua lana fanau ma suesue ina ia avea ma se tausi soifua. I ni nai tausaga mulimuli ane, sa faauu o ia mai le aoga tausisoifua ma o loo ia faia galuega sa ia manao lava e fai i taimi uma. “Sa le o au o se tagata aoga lelei i le aoga maualuga, o lea sa ou le mautinoa ai pe mafai ona ou faamaeaina tulaga manaomia mo le tausisoifua,” o lana tala lea. “Na alu ai le ono tausaga o le tele o vasega sa feoma’i i le va o se galuega faamama fale ma le tausiga o isi e faauma ai lo’u tikeri. E le gata i le taimi, ae sa manaomia ai foi le finafinau, onosai, ma le lagolago mai isi—ma le tele o faamanuiaga.
E ui atonu tatou te le amataina uma ni pisinisi fou pe aoao e ta le piano pe faia ni mamanu o laufanua, ae e leai se tapulaa i mea e mafai ona tatou aoaoina po o le auala e mafai ona tatou faalauteleina ai i tatou lava i le taimi lea e masani ona avanoa i se taimi mulimuli ane o le olaga.
Tatou te aoaoina ni mea moni fou i taimi uma ae atonu e le o ni tomai fou. A o tatou faasolo matutua, atonu tatou te le lagonaina e mafai ona tatou toe avea ma se tagata amata, ma le mafaufau atonu o lena taimi ma le avanoa ua pasia i tatou. Latou te le’i pasia. O loo faatalitali mai se lalolagi fou o le aoaoina ma le iloa o mea fou ma le ausiaga pe afai tatou te naunau e taumafai.
O i latou o e vaai atu i le matutua ua na o se fuainumera ae le o se papupuni e mauaina le fiafia sili atu, e fesootai lelei ma fanau a fanau ma tuaoi, ma fiafia ai i le avanoa e avea ai e faapei o le Faaola, “o ia sa femaliuai ma agalelei” (Galuega 10:38) i Lona soifuaga atoa.
O le tusitala o se polofesa lagolago galulue faatasi i le Ballard Center for Social Impact i le Iunivesite a Polika Iaga.