O Le Lu’i o le Tusi a Mamona a Lo’u Epikopo

Saunia e Travis Howell

O lea fuaitau i luga o lea fuaitau, ma lea mataupu i luga o lea mataupu, na avea ai le Tusi a Mamona ma se vaega o le tagata sa ou i ai ma le mea sa ou talitonu i ai.

Ata na tusia e David Miles

Ina ua 11 o’u tausaga, sa valaaulia a’u e lo’u epikopo ma nai isi alii talavou o la’u tupulaga e feiloai ma ia e talanoaina o matou tiutetauave i le taimi lava na matou mauaina ai le perisitua. Sa ia faasoa mai foi ia i matou lana molimau e uiga i le Tusi a Mamona ma faia se talosaga. Sa ou le iloa ple telē o se faatosinaga o le a i ai i ana upu i lo’u olaga.

Sa valaaulia i matou e lo matou epikopo e faitau faalima le Tusi a Mamona atoa ae matou te lei auauna atu i a matou misiona. Pe a ma le valu tausaga matou te faaumaina ai le galuega. Sa foliga taufaafefe, aemaise lava ou te lei fiafia tele e faitau tusi, ae maise lava e le o tusi e faigata e pei o tusitusiga paia. Ae, mo mafuaaga e le mafai ona ou manatuaina pe faamatalaina atoatoa, sa tonu ai i lo’u mafaufau e 11 tausaga le matua e manatu mamafa i lenei luitau. Sa ou amata i lena po i le faitauina o le mataupu 1 o le 1 Nifae.

Ou te lei malamalama tele i le mataupu, ae sa ou lagonaina sa ou faia le mea sao. O le aso na sosoo ai sa ou faitauina ai se isi mataupu, ma e ui lava ou te lei malamalama lava i upu uma a Nifae, ae sa ou maua foi lena lava lagona e tasi.

A o faagasolo pea le taimi, sa ou faitauina sina vaega itiiti o le Tusi a Mamona i aso uma. Mulimuli ane i lena tausaga, sa ou tapunia ai le tusi ina ua uma ona ou faitauina le Moronae 10 ma sagisagi fiafia ma se lagona o le ausiaga. O le isi taimi na ou vaai ai i lo’u epikopo, sa ou fai atu ia te ia ma le fiafia ua uma ona ou faitauina atoa le Tusi a Mamona. Sa ataata o ia ma faamalo mai i a’u taumafaiga ona fai mai lea, “Aua nei galo—e manaomia pea ona e toe faitauina faafa ae e te lei alu i lau misiona!”

Mulimuli ane i lena po, sa ou toe aumaia le Tusi a Mamona ma su’esu’e i itulau. Sa umi se taimi na ou faitauina ai. Pe o le a umi se taimi e alu ai i la”u faitauga faalua? Pe na aoga? A o ou mafaufau loloto, sa ou liliu atu i le 1 Nifae mataupu 1. Sa amata ona ou faitauina nai fuaiupu muamua, ma sa toe faamautu mai e le Agaga ia te au o le mea sao lenei e fai. O lea, sa faaauau ai ona ou faitau. O le taimi lea na suia ai mo au, lea na avea ai le suesueina o tusitusiga paia o se masani nai lo o se sini mo se taimi e tasi.

I le aluga o nai masina na sosoo ai, sa foliga ua masani ma malamalama lelei i tala. Sa ou iloaina ni fuaiupu anoa mai le taimi muamua sa ou faitauina ai, ma sa ou faailogaina i latou. Ina ua aoao mai se tasi mai le Tusi a Mamona i le lotu, sa amata ona ou iloaina nisi o tala ma aoaoga.

A o ou faitau, na suia lemu a’u e le tusi. O lea fuaitau i luga o lea fuaitau, ma lea mataupu i luga o lea mataupu, sa amata ai ona ou malamalama ma faalatalata atili atu i le Faaola. O aoaoga mai le Tusi a Mamona na avea ma se vaega o le tagata sa ou i ai ma le mea sa ou talitonu i ai. Sa faaauau pea ona ou faitauina le Tusi a Mamona i le aluga o nai tausaga na sosoo ai, ma o taimi taitasi ou te faamaeaina ai le faitauina o le Moronae 10, ou te tuuina ai se pepa o faasologa i totonu o le faavaa o la’u tusi.

Mulimuli ane, na oo mai le taimi na ou maua ai lo’u valaauga o le misiona. Ina ua uma ona faamanatuina ma aiga ma uo, sa ou maua sina taimi na o a’u ma tatala ai le faavaa i totonu o la’u Tusi a Mamona. Sa ou ausia la’u sini. Ae peitai, o le mea e sili ona taua, sa oo ina ou iloa lo’u Faaola.

Lesona na Aoaoina

Talu ona toe foi mai mai la’u misiona, ua ou tomanatu ai i le lu’i o le Tusi a Mamona a lo’u epikopo. Ua aoaoina ai a’u i ni lesona taua se tolu.

Muamua, sa ou aoaoina o nisi taimi e sili atu ma le tasi le faitauga e maua ai se molimau e moni le Tusi a Mamona. Ua ou faalogo i le tele o tala e uiga i tagata o e na faitauina le Tusi a Mamona mo le taimi muamua ma maua se aafiaga faaleagaga lofituina e faamautu ai e moni le tusi. Mo a’u, sa ese lava. Sa alu ai tausaga o faitauga maelegā. O la’u molimau i le Faaola e lei oo mai i se faitauga e tasi o le Tusi a Mamona; ae, sa oo mai i lea fuaitau i luga o lea fuaitau, ma lea mataupu i luga o lea mataupu i le aluga o taimi.

Lona lua, sa ou aoaoina e tatau ona tatou ofoina atu pea ni valaaulia i isi, e tusa lava pe foliga mai e leai se tasi o faalogo mai. I le avea ai ma se talavou, ou te mautinoa sa ou mauaina le faitau selau o valaaulia mai taitai o le autalavou, epikopo, matua, faiaoga seminare, ma isi. O le toatele na tele ina o atu i le tasi taliga ma alu atu i fafo o le isi. Ae po o le a lava le mafuaaga, sa ou filifili ai e talia ma le manatu mamafa lenei valaaulia e tasi mai lo’u epikopo, ma o lena valaaulia e tasi o le ki lea i lo’u mauaina o se molimau patino. E taua tele lo tatou faaauau pea ona valaaulia (o ni taitai, matua, uo). O le isi valaaulia tatou te tuuina atu atonu o le valaaulia lea o le a faia ai le eseesega atoa mo se tasi tatou te aoaoina.

Tolu, ou te mautinoa e tusa lava po o le a le matutua o a tatou fanau, e mafai ona latou lagonaina le Agaga Paia a o latou faitau pe faalogo i le Tusi a Mamona, e tusa lava pe latou te le malamalama i ana upu. O se tasi o o’u manaoga sili mo la’u fanau o le faitau lea o le Tusi a Mamona ma aoao i ona aoaoga i le Faaola. Pe a ou fefe mo le lumanai o la’u fanau, ou te maua le lototele i le iloaina o le Tusi a Mamona o se ai uamea o le a taialaina ai i latou i luga o le ala i le ola e faavavau.

O lo’u aafiaga i le Tusi a Mamona e ogatusa ma le folafolaga a Iosefa Samita o loo maua i le faatomuaga o le tusi. Sa ou “latalata atili atu i le Atua e ala i le ola ai i ona mataupu, nai lo se isi lava tusi.” Ua molimau mai le Agaga ia te a’u e moni lenei folafolaga.

E alala le tusitala i Arisona, ISA.