Aisea e Taua ai le Manatuaina Po o Ai Oe

Saunia e Elder S. Gifford Nielsen

O Le Au Fitugafulu

Na auina mai oe iinei, i le taimi nei, e fesoasoani e saunia le lalolagi mo le toe foi mai ma le mamalu o le Alii.

O le perofeta a le Alii, o Russell M. Nelson, na saunoa mai i nisi o mea faagaeetia e uiga i le lumanai. Mafaufau i lenei saunoaga malosi faaperofeta:

“O’u uso e ma tuafafine pele, e anoanoa’i mea matagofie o loo i luma atu. I aso a sau, o le a tatou vaai ai i le faailoaga silisili o le mana o le Faaola e le’i vaai muamua lava i ai le lalolagi. I le va o le taimi nei ma le taimi e toe fo’i mai ai o Ia ‘faatasi ma le mana ma le mamalu silisili’ [Iosefa Samita—Mataio 1:36], O le a ia faae’e mai avanoa e le mafaitaulia, faamanuiaga, ma vavega i luga o e faamaoni.”¹

Ou te gauai faapitoa atu pe a fai mai e Peresitene Nelson ni mea faapena. A o ou mafaufau i mea o loo tutupu i le lalolagi i aso nei, e liliu atu o’u mafaufauga ia te outou o ni taitai o le Ekalesia i le taimi nei ma le lumanai. O le a e maua se nofoa pito i luma i le tele o faaaliga sili a le Alii o le mana. O le mea moni, ou te talitonu o le a sili atu outou nai lo molimau—o le a avea outou ma tagata auai. O le a faaaoga oe e le Alii e fai ma Ana meafaigaluega i le faia o vavega o aso e gata ai ina ia tutupu.

E Faatuatuaina Oe e le Alii

Aisea ua ou manatu ai faapea? Ona o le saunoaga a Peresitene Nelson e uiga ia te oe. Ao saunoa faapitoa atu i talavou matutua, na ia folafola atu ai e faapea“… O outou ‘o se tupulaga filifilia’ (1 Peteru 2:9), na muaifaauuina e le Atua e faia se galuega ofoofogia—e fesoasoani ai e saunia tagata o lenei lalolagi mo le Afio Mai Faalua o le Alii!”²

O oe o se tasi o “e tamalii ma ta’uta’ua” (Aperaamo 3:22). E faatuatuaina oe e le Alii, ma Na te silafia e mafai ona e faataunuuina mea maoae i taleni ma meaalofa na Ia tuuina atu ia te oe.

Pe a maualuluga faamoemoega, o se mea masani lava le popole o le a lē mafai ona tatou ausia. “Ae faapefea pe afai ou te toilalo ma lē fiafia ai le Alii?” O le fefe i le toilalo e mafai ona oo ai i ni tulaga lē lelei. Ae ou te iloa e mafai ona faamanuiaina oe mo ni mafuaaga se lua: (1) o mea ua ou iloa e uiga ia te oe ma le (2) o mea ua ou iloa e uiga i le Faaola o Iesu Keriso.

Manatua Pe O Ai Oe

O loo faia e Satani mea uma na te mafaia e faafenumiai ai ma taitaiseseina ai oe e uiga i lou tagata moni lava. O le auala lena o loo ia fuafua e taofia ai oe mai lou lumanai fiafia. Ina ia faafetaiaia lenei mea, ua aoaoina i tatou e Peresitene Nelson ma le manino e uiga i lo tatou faasinomaga moni. “O le mea muamua lava ma le sili, o oe o se atalii ma se afafine o le Atua,” o lana saunoaga lea. “Lua, i le avea ai ma se tagata o le Ekalesia, o oe o se afafine/atalii o le feagaiga. Ma le tolu, o oe o se so’o o Iesu Keriso.”³

Aisea e taua ai lena mea? Mafaufau po o le a le uiga moni lava o le avea ma se afafine/atalii o le Atua. O lona uiga e i ai lou paia i totonu ia te oe. O lona uiga ua ia te oe le taua e faavavau—taua tutotonu, tutoatasi mai ou tulaga faalelalolagi. O lou gafatia e lē faatapulaaina!

I le pito i luga o lena mea, o oe o se atalii/afafine o le feagaiga. E avatu e lena mea ia te oe se sootaga faapitoa ma le Tama Faalelagi ma Iesu Keriso.⁴ E pei lava ona fusia faatasi e le faaipoipoga se ulugalii ma faailoa mai ai se sootaga sili atu ona tuuto nai lo le na o le tafafao faamasani, e siitia e au feagaiga la oulua sootaga ma le Atua i se tulaga maualuga atu o le tautinoga ma le mana.

Ma le isi, o oe o se so’o o Iesu Keriso. O lona uiga e te taumafai e alofa e pei ona Ia alofa mai, faamagalo atu e pei ona Ia faamagalo mai, ma tu atu mo le upumoni e pei ona Ia faia i Lona soifuaga atoa i le olaga nei.

Afai e te vaai i se atalii/afafine o le Atua, o se atalii/afafine o le feagaiga, ma se soo o Iesu Keriso pe a e tilotilo i le faaata, ona ou mautinoa lea e mafai ona e ausia faamoemoega maualuluga o le Alii mai ia te oe e pei lava o isi ae e te le’i faia.

Sa malamalama Eseta i lona faasinomaga moni a o ia faafetauia lona fefe, faasaoina lona nuu, ma aumaia le mamalu i le Atua. E pei o Eseta, sa e saunia “mo se aso faapenei” (Eseta 4:14).

Sa le’i manatu Ieremia e mafai ona ia tali atu i le valaau a le Atua mo ia. Sa faamanatu atu e le Alii ia Ieremia lona faasinomaga e faavavau: “Ae ou te lei faia oe … sa Ou faauuina oe o se perofeta i atunuu” (Ieremia 1:5). Sa Ia folafola atu foi e tuu Ana upu i le fofoga o Ieremia (tagai i le Ieremia 1:9). O faamanuiaga faapena e mafai ona avea ma ou faamanuiaga pe a e manatuaina po o ai moni lava oe ma pe aisea ua e i ai iinei.

Manatua Po o Ai o Ia

Ae, e tusa lava pe e te taumafai e vaai ia te oe lava e pei ona silasila mai le Alii ia te oe, e i ai taimi o le a e lagona ai le mamafatū o ou lava vaivaiga. E tupu lena mea ia i tatou uma. Na tupu foi ia Nifae—o le tagata lava lea e tasi na tuua ma le lototoa Ierusalema, mauaina papatusi apamemea, faasaoina lona aiga mai le matelaina i le vao, fauina se vaa, sopoia le vasa, ma faatuina se olaga fou i se laueleele e le mailoa. I le mavae ai o na mea uma, i se taimi o le sailiga o le agaga, na alaga atu ai Nifae:

“Aue, le tagata noa e ua i ai a’u! Ioe, ua faanoanoa loʼu loto ona o loʼu tino; ua momomo loʼu agaga ona o aʼu amioletonu” (2 Nifae 4:17).

Ae, i se suiga taua, sa ia fai mai: “Ae ui i lea, ua ou iloa lē ua ou faalagolago i ai. Sa avea lo’u Atua ma o’u toomaga” (2 Nifae 4:19–20). Na iloa e Nifae o le Alii, lē sa avea ma ona malosiaga i le taimi atoa, o le a faaauau pea ona faamalosia o ia. Sa ia tautino mai, “Ala mai ia, lo’u agaga e! Aua le toe faanoanoa ona o le agasala” (2 Nifae 4:28) ma le “Olioli ia, lo’u loto e …; ioe, o le a olioli lo’u agaga ia te oe, lo’u Atua e, ma le papa o lo’u olataga” (2 Nifae 4:30).

Soo se taimi lava e te masalosalo ai ia te oe lava, e mafai ona e fai atu e pei ona faia e Nifae, “Le Alii e, ua ou faalagolago ia te oe, ma o le a ou faalagolago pea ia te oe e faavavau” (2 Nifae 4:34). Pe a e lagonaina le fefe poo le faavaivai, manatua afioga nei a le Alii: “Aua le matatau le lafu itiiti e; fai mea lelei; ia tuu le lalolagi ma seoli e aufaatasi faasaga mai ia te oulua, auā afai ua lua atia’e i luga o la’u papa, e lē mafai ona latou manumalo” (Mataupu Faavae ma Feagaiga 6:34). E mafai ona e malosi aua e malosi o Ia.

Faatasi ai ma Lona Malosi, e Mafai Ona e Faia Lenei Mea!

E i ai taimi, o le a tofotofoina ai oe e vaai po o le a le mausali o lou fausiaina o lou olaga i luga o le faavae o Iesu Keriso. I na taimi, “pe a auina mai e le tiapolo ana matagi malolosi … [ma] pe a pesi mai ia te oulua ana uato’a uma ma lana afā malosi,” e le na o le malosi o le fale e taua. O le malosiaga o le sootaga o le fale i le “faavae mautinoa,” “o le papa o lo tatou Togiola, o lē o Keriso lea” (Helamana 5:12).

Ou te molimau atu ua tofia oe o se tagata taalo autu i le sauniaina o le lalolagi mo le Afio Mai Faalua o le Faaola. O mea ofoofogia, faavavega e manaomia ona tutupu i le va o le taimi nei ma lena taimi. O le a suia loto, o le a malepe i lalo puipui o le lē talitonu, o tuaoi o le faleie o Siona o le a faalauteleina, o le a faapotopoto faatasi le aiga o le Atua. Ma o le a avea oe ma se vaega o lena mea. E tofu uma i tatou ma luitau i lenei lalolagi telesitila ma feagai ma tapulaa i mea e mafai ona tatou ausia na o i tatou, ae e mafai ona tatou filifili e toe foi atu i le saogalemu ma le filemu i totonu o le lafu a lo tatou Faaola. E moni lava, tatou te “mafaia mea uma lava i le faamalosi mai o Keriso ia [i tatou]” (Filipi 4:13).