Ua Na’o Tusiga Faatekinolosi: Talavou Matutua
O Lau Taiala mo le Ola Ai o Se Talavou Matutua: Upusii Faagaeetia mai o Tatou Taitai mo Taimi e Sili Ona E Manaomia ai
O nisi taimi tatou te manaomia ai upumoni faamafanafana pe a faigata le olaga.
O le taimi o le talavou matua e mafai ona avea o se taimi matagofie e tumu i aafiaga fou ma avanoa e faafiafiaina ai. Ae e mafai foi ona faigata. O nisi taimi e mafai ona foliga faigata le lumanai a o tatou faatalitali mo faamanuiaga folafolaina po o le taimi foi e lē agai ai le olaga i le ala na tatou mafaufauina o le a oo i ai.
I nei taimi, e mafai ona tatou vaai atu i upu musuia a o tatou perofeta, aposetolo, ma isi taitai o le Ekalesia. Ua latou silafia atoatoa i le tulaga faavalevalea e mafai ona o’o i ai lenei taimi o le olaga ma ua faasoa mai ai ni fautuaga e suia ai le olaga, e patino lava mo i tatou.
O nisi nei o a latou sāvali faamalosiau ua tuuina faapitoa atu i talavou matutua e fesoasoani ai ia i tatou uma i le malaga o le olaga:
Pe a E Popole e uiga i le Lumanai
“I se lagona, o au osigataulaga itiiti ma faatauvaa o togitogi ia o le olaga o aso taitasi lea e maua ai le atavali silisili o lou olaga. Atonu e te le vaaia le auala e fesootai ai togitogi i le taimi nei, ma e te le manaomia ona vaai i ai i le taimi nei. Tau lava ina ia i ai le faatuatua ia lava mo le taimi patino o loo e ola ai i le taimi nei. Faalagolago i le Atua, ma “o mea iti [o le a] tutupu mai ai mea tetele.’[Mataupu Faavae ma Feagaiga 64:33]. …
“Ona ua foai atu e le Atua ia te oe lou faitalia, e tele itu e mafai ona e filifili e te alu i ai ae o loo maua ai pea se olaga faamalieina. O le olaga faaletino o se malaga faifai pea, filifili sau oe lava ia tala o le malaga. Ua ia te oe poloaiga, ua ia te oe feagaiga, ua ia te oe fautuaga musuia faaperofeta, ma ua ia te oe le meaalofa o le Agaga Paia. Ua matuā lava lea e taitai atu ai oe i le fiafia faaletino ma le olioli e faavavau.”
Elder Dieter F. Uchtdorf o le Korama a Aposetolo e Toasefululua, “The Adventure of Mortality” (faigalotu i le lalolagi atoa mo le autalavou matutua, 14 Ian., 2018), Potutusi o le Talalelei.
Pe A E Lē Lagonaina ua lava Lou Lelei Atoatoa
“Atonu tatou te vaai uma ia i tatou lava e itiiti ifo nai lo i tatou. Lē agavaa. E le talenia. E leai se mea faapitoa. O le leai o se loto, mafaufau, punaoa, uiga, po o se tino tele e aoga i le Atua.
“E te fai mai e te lē atoatoa? E le o lava lou lelei? Susu maia i le kalapu!
“Atonu o oe tonu le tagata o loo sailia e le Atua.
“E le manaomia oe e le Atua ina ia tulagaese, pe atoatoa fo’i.
“O le a Ia ave au taleni ma tomai ma faateleina—e ui atonu e foliga mai e lē lava, e pei o ni nai potoi areto ma i’a itiiti. Afai e te faalagolago ia te Ia ma faamaoni, o le a Ia faalauteleina au upu ma faatinoga ma faaaoga e faamanuiaina ma auauna atu ai i motu o tagata!”
Elder Dieter F. Uchtdorf o le Korama a Aposetolo e Toasefululua, Facebook, 15 Oke., 2021, facebook.com/dieterf.uchtdorf.
Pe a E Lagonaina le Lofituina e le Lalolagi
“Uo talavou pele, ia manatua: Ua—e pei o Eseta—fanauina oe mo taimi faapenei. Aua le fefe, ma aua le lotovaivai. O le a faatasi pea le Atua ma oe i lau malaga. Tau lava o le mautinoa e te ave o Ia ma Lana afioga faatasi ma oe, ma manatua, tatalo e le aunoa ina ia lagona Lona siufofoga i tusitusiga paia.”
Elder Jeffrey R. Holland o le Korama a Aposetolo e Toasefululua, Facebook, 9 Mat., 2021, facebook.com/jeffreyr.holland.
Pe a E Lagona Le Loto Nutimomoia
“Pe a faalataina lou faatuatuaina o isi, ua le ausia miti, o loto ua nutimomoia pea lava pea, pe a tatou mananao i le faamasinoga tonu ma manaomia le alofa mutimutivale, pe a tatou feita ma maligi loimata, pe a tatou manaomia le iloa o le mea e faaauau ona taofimau i ai ma mea e lafoai, e mafai pea ona tatou manatua pea o Ia. E lē agaleaga le olaga e pei ona foliga mai ai i nisi taimi. O Lona agaalofa e lē i’u e mafai ona fesoasoani ia i tatou ia maua lo tatou ala, upumoni, ma le ola [tagai i le Ioane 14:6].”
Elder Gerrit W. Gong o le Korama a Aposetolo e Toasefululua, “Ia Manatua Pea o Ia,” Liahona,, Me. 2016, 109.
Pe a E Lagona Le Tuuatoatasi
“A o tatou iloa le Atua, o nisi taimi o tali e le’i mafaufauina o tatalo e ave atu ai i tatou mai le auala, aumai i tatou i afioaga, tuli ese le pogisa mai o tatou loto, ma taiala i tatou ia maua le sulufaiga faaleagaga ma faaaofia ai i le agalelei o Ana feagaiga ma le alofa tumau.”
Elder Gerrit W. Gong o le Korama a Aposetolo e Toasefululua, “O Atunuu Uma, Ituaiga, ma Gagana,” Liahona,Nov. 2020, 41.
Pe a E Lagona Le Tausalaina
“A’u uo talavou pele, e i ai lava i taimi uma se ala e toe foi mai ai. O Iesu Keriso (ma Lana talalelei) o le ala lea. E te le’i faia se agasala matuiā tele lea e te lē oo ai i le alofa ma le alofa mutimutivale togiola o le Faaola. A o e faia laasaga e salamo ai ma mulimuli i tulafono a le Atua, o le a amata ona e lagonaina le tele o le finagalo o le Tama Faalelagi ma Lona Alo Pele e te toe foi atu i le aiga faatasi ma i La’ua! E finagalo i La’ua ia e fiafia. O le a La faia soo se mea i lo La’ua mana lea e lē solia ai lou faitalia po o a La tulafono e fesoasoani ai ia te oe e toe foi mai.”
Peresitene Russell M. Nelson, “The Love and Laws of God” (Faigalotu a le Iunivesite o Polika Iaga, 17 Set., 2019), 3, speeches.byu.edu.
Pe a E Manaomia le Faamoemoe
“O le a … outou faafofoga foi o ma tautino atu faatasi ma Moronae e faapea e tatau ona i ai le faamoemoe, pe afai o le a tatou “maua [se] tofi i le nofoaga ua saunia [e le Atua] [mo i tatou]’ [Eteru 12:32]. Matou te mananao ia te outou ia mauaina lena tofi o ni atalii ma afafine o se tupu. Ina ia faia lena mea, e tatau ona tatou iloa o le faamoemoe ua le na o le fe’au ma le tulaga o le faamoemoe masani; o le faamanuiaga o tagata uma o e talitonu.”
Elder Jeffrey R. Holland o le Korama a Aposetolo e Toasefululua, “A Future Filled with Hope” (faigalotu i le lalolagi atoa mo le autalavou matutua, 8 Ian., 2023), Potutusi o le Talalelei.
Pe a E Lagona Le Lēlavā
“A uma ona e tilotilo i totonu, ou te aioi atu ia te outou ia tepa i luga. O fofoga e silasila ifo i o outou mata, o fofoga ia o lo outou Tama oi le Lagi alofa o le e mafai, ma o le a, liligi ifo i o outou luga na mea uma tou te faamoemoe i ai i le amiotonu. E le mafai ona outou maua na faamanuiaga i lo outou tulitulia. Faamolemole soia le soona taufetuli ne’i outou vaivai. Ia filemu; legaoia. Faafaigofie. Ia agamalu ma lotomaualalo, ma tatalo. Ou te molimau atu ia te outou o le a oo mai vavega pe a tatou faateletelegese, pe a tatou to’a, ma pe a tatou tootutuli i lalo. O mea uma ua i ai i le Tama e mafai ona fai ma a outou i se aso [tagai i le Mataupu Faavae ma Feagaiga 84:33–38].”
Sister Patricia T. Holland, “O Se Lumanai e Faatumulia i le Faamoemoe” (faigalotu i le lalolagi atoa mo le autalavou matutua, 8 Ian., 2023), Potutusi o le Talalelei.
Pe a E Manaomia se Faamautinoaga
“O le Atua e silafia mea uma ma silasila i mea uma. I le faavavau atoa, e leai se tasi o le a sili atu ona iloaina oe pe popole ia te oe nai lo Ia. E leai se tasi o le a sili ona latalata ia te oe nai lo Ia. E mafai ona sasaa atu lou loto ia te Ia ma faatuatuaina o Ia e auina mai le Agaga Paia ma agelu e tausi oe. Na ia faaalia Lona alofa silisili ina ua Ia auina mai Lona Alo e Toatasi na Fanaua e maliu mo oe—e avea ma ou Faaola ma Togiola!”
Peresitene Russell M. Nelson, “Choices for Eternity” (faigalotu i le lalolagi atoa mo le autalavou matutua, 15 Me, 2022), Potutusi o le Talalelei.