“Sefuluai: O Lo Tatou Faailoaga o le Faatuatua,” Liahona, Fep. 2024.
Sefuluai: O Lo Tatou Faailoaga o le Faatuatua
Sa lofituina a’u ina ua le mafai ona faafouina la’u pepa faataga o le malumalu, ae o lo’u faatuatua e amata ola ai i le tulafono o le sefuluai na toe aumaia ai faamanuiaga ma le filemu sili.
O loo fiafia le aiga o Datiles i se gaoioiga faataavale polo. A o laiti tamaiti, sa tauivi Uso Datiles e totogi le sefuluai ona o le faaletonu o lana pisinisi. Sa la faatutuina ma lona toalua se sini e avea ma tagata e totogi atoa le sefuluai.
Ata pu’e mai faaaloaloga a le tusitala
I tausaga ua mavae, a o laiti la’u fanau, sa ou alu ai e vaai lo’u taitai perisitua ina ia faafouina la’u pepa faataga o le malumalu. Ae ina ua ia fesili mai pe o au o se tagata e totogi atoa le sefuluai, sa tatau ona ou ta’u atu ia te ia e leai. Sa ou manao ai, ae sa ou tauivi e totogi le sefuluai ona o se faaiuga sese sa ou faia i se pisinisi sa lē faamanuiaina.
Ina ua uma ona faalogo i o’u tauiviga ma fesili mai e uiga i o’u manaoga tautupe, sa ia faamanatu mai ma le agalelei ma le agaalofa ia te a’u e uiga i le taua o le tuu o lo’u faatuatua i le Alii ma le avea ma se tagata e totogi atoa le sefuluai. Sa matou toe iloiloina loa faatasi le mea o loo tusia i le Malaki 3:10: “Ma ia outou tofotofo mai ai ia te au i lenei mea, ua fetalai mai ai Ieova o Au, pe ou te le toina pupuni o le lagi mo outou, ma sasaa atu le manuia mo outou ina seia silisili ona tele.”
“Ou te malamalama e tiga mo oe le le faafouina o lau pepa faataga o le malumalu i lenei taimi,” o lana tala lea. “Ae o le olioli o le a e lagonaina ma faamanuiaga o le a e maua o le a sili atu pe a uma ona e totogiina ma le faamaoni lau sefuluai. E mafai ona ta toe feiloai mo se faafouga o se pepa faataga o le malumalu i le tolu i le ono masina.”
Ina ua uma lena faatalanoaga, sa ma talanoa ma lou toalua ma tatalo e uiga i ai. Sa ma mautinoa na silafia e le Tama Faalelagi le tele o lo ma’ua mananao e toe foi atu i le malumalu e auai i sauniga paia. O le alu i le malumalu e taua tele ia i ma’ua. I totonu o le maota o le Alii, e le gata e mafai ona tatou tuuina atu le fesoasoani i e pele ua o ese atu, ae tatou te lagonaina foi le olioli tele, filemu, ma le toafimalie. O faamanuiaga uma nei e le mafaatauina e mafai ona tatou maua mai le osia ma le tausia o feagaiga o le malumalu ma le faatinoina o sauniga paia iina. Sa ma iloaina o le sefuluai e itiiti lona faatatauga i tupe ae sili atu e uiga i le tuuina o lo tatou faatuatua i le Tama Faalelagi ma Iesu Keriso. Ma sa ma faatuina se sini ia avea ma tagata e totogi atoa le sefuluai ma toe foi atu i le malumalu.
O le i ai o nei sini i le mafaufau, sa ma lagona ai le uunaiga e faatau atu le ma taavale. Sa na o le pau lea o le auala o le feaveaiina lelei o lo matou aiga, ae sa matou faatuatua o le a faamanuiaina i matou e le Alii pe afai matou te faia lenei osigataulaga. Sa ma iloa o le a faigata mo i ma’ua ona feoai atu i se tama’i sipi la’upasese o loo taofiofia ni teineiti laiti se toatolu a o vaai e lo’u toalua a matou ato, ae sa ma iloaina o le mea sa’o lea e fai e ausia ai a ma sini. Sa amata ona totogi atoa le ma sefuluai.
Ina ua mavae le tolu masina, sa ou toe feiloai ma lo’u taitai perisitua mo se faatalanoaga tulitatao. Sa ia fesili mai ia te au e uiga i la’u molimau i le sefuluai, ma sa mafai ona ou ta’u atu ia te ia o a’u o se tagata e totogi atoa le sefuluai.
Na iu lava ina faafouina a ma’ua pepa faataga o le malumalu ma lo’u toalua, ma sa vave ona ma toe foi atu i le malumalu. Sa ma ausia la ma sini o le toe foi atu i le malumalu e osia feagaiga ma maua sauniga e fai ma sui o o ma’ua tuaa. Sa amata ona tatala mai pupuni o le lagi. Na amata ona liligi mai faamanuiaga. O o’u lagona o le fiafia ma le filemu i totonu sa le mafai ona faamatalaina.
Sa matou faaauau pea ona faaaoga tamai sipi la’upasese ma o nisi taimi e misia ai o matou taofiga ona sa matou momoe i nisi taimi, ae o le olioli o le avea ma tagata e totogi atoa le sefuluai ma faamanuiaga o le tapuai i le malumalu e sili atu nai lo soo se faigata faaletino.
Sa faaauau pea faamanuiaga. Ina ua mavae le ono masina, sa siitia lo’u tulaga i le galuega, lea sa le gata ina ou maua ai se totogi maualuga atu ae sa agavaa foi mo faamanuiaga tau taavale. Ina ua mavae le ono masina, sa tuuina mai e le Alii ia i matou se taavale fou—sa toe i ai foi se taavale a lo matou aiga, ua sili atu nei le lelei nai lo le taavale na matou faatauina atu.
Sa tausia e le Alii Ana folafolaga ia te a’u, ma e ala i le tausia o Ana poloaiga, ou te tausia foi au folafolaga ia te Ia.
E alaala le tusitala i Laguna, Filipaina.