Faasaoina o lo Tatou Sootaga ma le Tama Faalelagi ma Iesu Keriso

Saunia e Tracy Y. Browning

Fesoasoani Lua i le Au Peresitene Aoao o le Peraimeri

Ata

Sister Tracy Y. Browning

E mafai ona tatou galulue e faasaoina la tatou sootaga ma i La’ua ina ia tutu malolosi i lenei lalolagi.

Ata

se tamaitai talavou o loo tatalo

E lei leva atu, a o faitauina tusitusiga paia, sa ou tau atu ai i le upu faasao, ma na taia ai au i se auala ou te lei iloaina muamua. Sa totoina ai se fatu itiiti i lo’u mafaufau. Mulimuli ane, sa ou lagonaina e pei sa ou fetaiai pea ma lenei upu i soo se mea.

Sa ou lagonaina ua valaaulia a’u e le Agaga e mafaufau i ni fesili se tolu:

O le a le uiga o le faasao o se mea?
O le a le mea o loo o’u taumafai e faasaoina i lo’u olaga?
O a laasaga mataituina o loo o’u faasavalia e agai atu i lena faasaoina?

O le fesili 1 na taitai atu ai a’u, ma le iloa, i le lolomifefiloi e saili ai le faasaoina. Sa ou fiafia i le gagana na ou mauaina iina. Sa fesoasoani ia te a’u ou te vaai faalemafaufau ai i le faamoemoega o le faasaoina. Sa ou aoaoina, mo se faataitaiga, o le faasaoina o lona uiga:

Ina ia tausisia ia saogalemu mai le manu’a po o le faaleagaina
Ina ia puipuia, ina ia ola pea pe i ai pea i lona tulaga maopopo
Ina ia malupuipuia, saogalemu, puipuia, malutia, talipupuni, ma tuuina atu le malutaga

Mulimuli ane, o lenei gaoioiga na faamamafa manino mai ai ni nai vaega mo a’u:

O lo tatou manao e faasaoina se mea e ta’u mai ai lona tāua i o tatou olaga.
Tatou te mananao e faasaoina nei mea tāua auā ua tatou iloa o nei mea e faigofie ona afaina, faaleagaina, tafia, po o le faatafunaina foi.
O le tau lava ina manao e faasao se mea e lē lava lea. E tatau ona tatou faia ni laasaga mataituina e puipuia ai mea tatou te faatāuaina ma taofia ai soo se amioga leaga lamatia.

Faatasi ai ma lenei malamalamaaga, sa mafai ai ona ou iloatino le mea sa taumafai le Agaga o le Alii e ta’u mai ia te a’u. Sa manao o Ia ou te iloiloina, ae lei o’o atu i isi mea uma, pe mafai faapefea ona ou faasaoina lo’u faatuatua i le Tama Faalelagi ma Lona Alo o Iesu Keriso ma lo’u sootaga ma i Laua.

O lenei fesili patino e tasi na valaauina a’u ina ia faaaoga mea uma lea na ou aoaoina e uiga i le faasaoina o la’u sootaga ma le Tama Faalelagi ma Iesu Keriso ma feagaiga na ou osia ma i La’ua. O lenei mea na taitaiina ai a’u e fua faalemafaufau pe ua ou tuuina i La’ua i le tulaga maualuga i la’u lisi patino o tulaga faatāuaina, ma faatagaina ai isi mea uma i lo’u olaga e afua uma mai i lena sootaga sili ona tāua.

O lo La’ua tulaga i o tatou olaga e fesoasoani ia i tatou e malupuipuia ai isi a tatou sootaga uma. O le faasaoina o la tatou sootaga ma Iesu Keriso e fesoasoani tatou te iloa ai le ala e faaaoga ai uiga mama amiotonu, i la tatou sailiga o sootaga paia ma fanau uma a le Atua, ma avea ai na tulaga faatāuaina ma mea e sili atu ona totonugalemu ia Keriso.

Ua ou iloa foi e pei lava ona talosagaina i tatou e le Atua e faamuamua o Ia i o tatou olaga, e faapena foi Ona Ia faia mo a’u, o oe, ma Ana fanau uma lava. I Lona lava siufofoga, na fetalai mai ai le Atua, “Aua faauta, o la’u galuega ma lo’u mamalu lenei—ia aumaia le tino ola pea ma le ola faavavau o le tagata” (Mose 1:39).”

I lenei mau ma isi tusitusiga paia (tagai i le 2 Nifae 29:9), ua ta’u mai ai e le Atua ia i tatou o Lana faamuamua maualuga o i tatou, o Ana fanau. E finagalo o Ia ia tatou faasoa i Lona mamalu, ia maua le olioli na foafoaina ai i tatou ia mauaina (tagai i le 2 Nifae 2:25), ma ia maua le “ola e faavavau, … o le meaalofa silisili o meaalofa uma a le Atua” (Mataupu Faavae ma Feagaiga 14:7). I Lana Tatalo o le Faatoga, na saunoa ai faapea Iesu, “O le ola e faavavau foi lenei, ia latou iloa oe le Atua moni e toatasi, atoa ma Le ua E auina mai, o Iesu Keriso lea” (Ioane 17:3).

A o o’u mafaufau i laasaga mataituina e faia e le Atua e faasaoina ai Lana sootaga ma a’u, e mafai ona ou iloatino se mamanu lea e aoaoina ai a’u i le ala e mafai ona ou faasaoina ai la’u sootaga, i se tulaga tutusa, ma Ia.

O Auala e Fa e Galue ai le Atua e Faasao Lana Sootaga ma i Tatou

Na Auina mai ia i tatou e le Atua Lona Alo, o Iesu Keriso, e Togiola ia i Tatou.

Na auina mai e se Tama alofa ma le atamai ia i tatou Iesu Keriso, e togiola i tatou mai aafiaga o le agasala, ma faamautinoa o le a lē tuua i tatou i se tulaga faifai pea o le faate’aina ese mai le Atua. Nai loo lena, e ala i le meaalofa a lo tatou Faaola o le alofa mutimutivale paia, ua to mai ai ia i tatou uma, le tino ola pea ma se toe foi atu i le afioaga o le Atua ina ia faamasinoina (tagai i le 2 Nifae 2:5–10; Helamana 14:15–17). I le Faatoaga o Ketesemane ma i Kalevaria, sa Ia faaaoga ai Lona mana, na tuuina atu ia te Ia e le Tama (tagai i le Helamana 5:11), e puapuagatia ai “mo tagata uma, ina ia [tatou] le mafatia pe afai [tatou] te salamo” (Mataupu Faavae ma Feagaiga 19:16). Ona Ia tautau lea i luga o lena laau ma tuuina ifo Lona soifua—mo i tatou (tagai i le 1 Peteru 2:24).

O le a la se mea, o le a tatou faia e faasaoina ai se sootaga ma Ia, o lē sa faaalia ma le mamana le mea sa Ia naunau e fai mo i tatou?

Pe o le a avea atili ea i tatou ma Ona so’o tuuto?
Pe o le a tatou tauaveina atoatoa ea Lona suafa i o tatou luga?
Pe o le a sili atu ea ona tatou tali atu mo i tatou lava ma salamo pe a tatou lē atoatoa?
Pe o le a tatou faafaileleina ea a tatou molimau?

Ua Auina Mai e le Atua Lana Afioga e ala i Tusitusiga Paia ma Perofeta ma Aposetolo o Aso Nei

O le isi faailoga manino o le tele o le faatāuaina e le Atua o i tatou O Lona tuuina mai lea ia i tatou o le mana o Ana afioga e faasao ma puipuia ai i tatou. E pei ona folafola mai e Nifae:

“Ma ai se e faalogo i le afioga a le Atua, ma pipiimau i ai, e lē fano lava i latou; pe mafai foi e faaosoosoga ma ufanafana mu a le fili ona faatoilaloina i latou i le faatauasoina, e taitai ese atu ai i latou i le faafanoga” (1 Nifae 15:24).

E tuuina mai e le Atua Ana afioga ola ia i tatou e ala mai i molimau faatusi paia ae faapea foi i fofoga o perofeta ma aposetolo soifua. O le Ekalesia a Iesu Keriso ua i ai taitai ua Ia filifilia ma tuuina atu i ai le mana ma le pule e folafola atu ai Lona finagalo i Ona tagata.

O afioga a le Atua e mafai ona o’oo’o i soo se faamoemoega faalenatura e agai atu i “aganuu, mausa, faaituau, manatu, ma masalosaloga faalelalolagi.”¹ O Ana afioga e mafai ona tautala sa’o “i le totonugalemu” o o tatou loto, e tusa lava po o le a lo tatou tulaga o le amiotonu.² “O le afioga a le Atua e mafai ona tuueseese ai le upumoni mai mea sese” ma fesoasoani ia i tatou ia iloa ma aveesea mai o tatou mafaufauga mai soo se aoaoga sese lea e mafai ona faapuaoa ai o tatou manatu ma le malamalamaaga “e ala i le faatulagaina e tetee atu i upumoni manino ma pele a le Atua.”³

O le a la le mea, e mafai ona tatou faia e faasaoina ai lo tatou faatuatua i afioga a le Atua, e pei ona maua e ala i tusitusiga paia ma Ana perofeta ma aposetolo filifilia?

Pe o le a sili atu ea ona tatou “faalogo” ma le loto i ai i a latou aoaoga?
Pe o le a tatou “taofi mau” ea i afioga a le Atua pe a oo mai faaosoosoga, tofotofoga, po o luitau, ina ia aua nei faatoilaloina ai i tatou?

Ua Ofoina Mai e le Atua se Sootaga Loloto ma le Faaolataga e ala i Feagaiga ma Ia

O folafolaga sili ona tāua tatou te osia ma le Atua o folafolaga ia tatou te osia e ala i feagaiga. O nei maliliega paia o le ala lea na galue ai le Atua ma Ana fanau talu mai le amataga o taimi. Ua tatou vaaia le faaalia e le Atua o Lana tautinoga i Ana fanau o le feagaiga i le popofou o tusitusiga paia—e amata i le tusi o Kenese (tagai i le Kenese 6:18)—ma faaauau ai lava i le talafaasolopito atoa o tusitusiga paia. O le osia ma le tausia o feagaiga e mafai ona avea ma se taiala mamana i filifiliga tatou te faia.

O nei “folafolaina mai ai o mea e silisili ese lava ma le aoga” (2 Peteru 1:4) e o faatasi ma sauniga ma feagaiga tatou te osia ma le Atua le Tama e ala i Lona Alo, o Iesu Keriso. Ma ua poloaiina i tatou e le Atua ina ia aai ma feinu i ai ina ia mafai ona Ia faasaoina i tatou mai mea piopio i le lalolagi.

O le a nei la le mea, e mafai ona tatou faia e faasaoina ai lo tatou sootaga ma le Tama Faalelagi ma Iesu Keriso a o tatou saili e faamamalu a tatou feagaiga ma i La’ua?

Pe o le a tatou sailia ea le olioli sili atu i le lotogatasi ai ma le Tama Faalelagi ma Iesu Keriso e ala i feagaiga?
Pe o le a tatou aai ma feinu i le faamanatuga a le Alii ina ia manatuaina ma faafouina a tatou feagaiga?
Pe o le a tatou saunia ea i tatou lava e ulu atu i le maota o le Alii ma olioli i feagaiga o loo ofoina mai ai iina?
Pe o le a tatou toe foi atu ea e lē aunoa i le malumalu?

Ua Tuuina ma e le Atua le Agaga Paia ina ia Faatasi ma i Tatou.

O le Agaga Paia o le puna o le molimau patino ma faaaliga faaletagata lava ia. E mafai ona ia taialaina i tatou i a tatou filifliga ma puipuia i tatou mai le tulaga e ono aafia ai faaletino ma faaleagaga. E ala i Lona mana e faapaiaina ai i tatou—pe vaetofia, pe faapaiaina—pe a tatou salamo (tagai i le 3 Nifae 27:20), maua sauniga faaola, ma tausia a tatou feagaiga.

I le taimi o le Tausamaaga Mulimuli a le Faaola faatasi ma Ana Aposetolo, a o latou lagonaina le popole e uiga i lo latou ala agai i luma (tagai i le Ioane 14:5), na tuu atu ai e Iesu ia i latou lenei folafolaga:

“A o le Fesoasoani, o le Agaga Paia lea, e auina mai e le Tama i lo’u igoa, o ia lava na te a’oa’o ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou” (Ioane 14: 26).

O lena folafolaga ua tuuina mai foi ia te oe ma a’u.

O le a nei la le mea, e mafai ona tatou faia e faasaoina ai le mafutaga faifai pea ma le Agaga Paia, o le sui lona tolu o le Aiga Atua, ina ia mafai ai ona tatou maua le puipuiga faaletino ma le faaleagaga ua folafolaina mai?

Pe o le a tatou tatalo ea mo musumusuga ina ia iloa le mea e finagalo le Atua tatou te faia, ma mo le mana ma le gafatia e faia ai?
Pe o le a sili atu ea ona tatou mulimuli i uunaiga faaleagaga tatou te maua i se auala lea o le a mafai ai ona manumalo le siufofoga o le Atua i o tatou olaga?
Pe o le a tatou sailia ea, faatasi ai ma le faateleina o le faamaoni ma le faamoemoe, le molimau faamauaaina a le Agaga i le Atua le Tama ma Lona Alo, o Iesu Keriso, e uiga i upumoni o le talalelei, ma sauniga faaola e na o le Ekalesia a le Faaola e maua ai?

A’u uo e, ou te molimau atu ia te outou o loo taumafai pea le Atua e talanoa atu ia te outou—e tusa lava pe lē mafai ona outou iloaina. O le tele lava o taimi o loo Ia taumafai e ta’u atu ia te oe e alofa o Ia ia te oe ma o oe o Lana faamuamua. Ua Ia saunia ma o le a faaauau pea ona saunia le tele o auala e lē mafaitaulia e faaalia ai lo tatou tāua ma le faamuamuaina. Ia tatou toe faafoi atu ma le olioli Lona alofa e ala i le faia o Ia ma faamuamua maualuga i o tatou olaga. Ona tatou faasaoina lea o lena sootaga e ala i le mulimuli ma le faatuatua ia te Ia o ni Ona soo: taofi mau i Lana afioga, osia ma tausia feagaiga ma Ia, ma saili le mafutaga faifai pea ma le Agaga Paia.

Ou te molimau atu o Iesu Keriso o le Alo soifua o le Atua ma sa Ia tuuina mai ma le loto i ai Lona soifua e laveai ai o tatou ola ma ofoina mai ia i tatou le meaalofa silisili a le Atua: o le ola e faavavau. O Oe o Lana galuega ma Lona mamalu.