Na Faapefea Ona Ou Ola e aunoa ma le Tusi a Mamona?

Saunia e Romeu Flávio Balanga, Luanda, Angola

O a’u suesuega faaletagata lava ia ma faaleaiga o le Tusi a Mamona ua fesoasoani ou te lagona ai le toafimalie, faamalosiauina, ma le faamoemoe.

Ata

aiga o loo faitauina faatasi ia tusitusiga paia

Ata pu’e mai faaaloaloga a le tusitala

I se taimi ua mavae, sa ma talosaga ai ma se uo mo se polokalama faaleaoaoga. Sa ou mautinoa o le a filifilia a’u. Ina ua maua mai faaiuga, sa ou le fiafia ona sa filifilia la’u uo ae sa lei filifilia a’u. Sa le lelei o’u lagona ona sa ou manatu sa tatau ona filifilia a’u e sili atu nai lo la’u uo.

I lena taimi, sa ou vaai ai i la’u uo o se tagata faafeagai po o se tasi na aveina se mea na a a’u. I ni nai aso mulimuli ane, a o suesueina le Iakopo 2 i le Tusi a Mamona, sa ou faitau ai i le ala na aoai ai e Iakopo lona nuu ona o a latou agasala. O se tasi o na agasala o le faamaualuga.

O aoaoga a Iakopo na ou iloa ai sa ou solia le agasala o le faamaualuga i la’u uo e ala i le mafaufau sa tatau ona ou maua le mea na tuuina atu ia te ia. O upu a Iakopo o se faaaliga ia te au:

“Aua le tuua lenei faamaualuga o o outou loto e faaumatia ai o outou agaga!

“Manatu i o outou uso e pei o outou lava” (Iakopo 2:16–17).

Sa ou tatalo i le Tama Faalelagi e faamagalo au ma fesoasoani mai ia ou aloese mai le agasala o le faamaualuga i le lumanai. Ona ou talanoa atu lea i la’u uo e uiga i o’u lagona ma talosagaina o ia e faamagalo a’u. Sa ou lagonaina le filemu ma le olioli i le faia o lena mea ma i le mauaina o le faamagaloga mai ia te ia ma mai le Tama Faalelagi.

O au suesuega faaletagata lava ia ma faaleaiga o le Tusi a Mamona ua tuuina mai ai ia te au se lagona o le taitaiga ma fesoasoani ia te au ia lagona le toafimalie, faamalosiauina, ma le faamoemoe. O nisi taimi ou te mafaufau ai pe na mafai faapefea ona ou ola mo le tele o tausaga e aunoa ma le Tusi a Mamona!

Ana le seanoa le Tusi a Mamona, semanu ou te le maua le faamoemoe e mafai ona avea au ma se tagata e sili atu ona lelei. O le a gaogao lo’u olaga ma e aunoa ma se faamoemoega manino. Semanu ou te le iloa o loo i ai i le Atua se fuafuaga o le faaolataga mo Ana fanau. Semanu ou te le maua se malamalama manino o le Togiola a Iesu Keriso. Semanu ou te le maua le faamoemoe mo se lalolagi e sili atu ona lelei. Semanu ou te le talitonu i mea ua ou talitonu i ai, fai mea ua ou faia, mafaufau i le ala ua ou mafaufau ai, ma avea ai ma tagata ua ou i ai.

E ala mai i le Tusi a Mamona, ua ou maua ai le faamautinoaga e alofa ma popole le Atua mo Ana fanau uma i vaega uma o le lalolagi. Ou te iloa o le Tusi a Mamona o se tasi o molimau moni ia Iesu Keriso.