Ua Na’o Tusiga Faaeletonika
O le Filemu ma le Olioli, Ae Le o le Faavauvau, na Puleaina Lo’u Loto. Aisea?
I toe aso o lo’u toalua ma le mavae ai o lona maliu, sa ou mauaina le filemu e ala ia Iesu Keriso.
Faalologo Ia, Ina Malū Ia, saunia e Yonsung Kim
Ou te lei malamalama i le tiga o le a ou lagonaina i le lima vaiaso na ou vaaia ai lo’u toalua, o Ioane, a o faasolosolo lemu lava lona matelaina agai i le oti ona o le tulaga o le faaitiitia o lona gafatia e tausami. Ou te lei malamalama foi pe faapefea ona faamalūlūina lo’u tiga e le filemu ma le olioli lea na faatumulia ai lo matou aiga a o latalata mai lona maliu.
Tauiviga o le Soifua Maloloina ma se Faauau Pea ona Vaivai
Mo le silia ma le sefulu tausaga, na faasolosolo mālie ai lava ona aveesea e le ma’i o le Parkinson le malosi o Ioane e fealuai ai, le manino ai o lana tautala, ma lona ola tutoatasi. Sa ou matamata ma le faanoanoa a o ia puapuagatia e le gata i tulaga fou ua le mafai ona ia faia e afua mai i le ma’i o le Parkinson, ae faapea foi i le oso faalua o lona ma’i fatu, o taotoga e lua i maso o lona tau’au (rotator cuff), ma tiga faifai pea mai isi lava ma’i faaletino. Na i’u lava ina faalagolago Ioane ia te a’u pe a manaomia ona minoi, fafaga, fai ona ofu, ma faataele o ia. Mulimuli ane, sa lē toe ola maso i lona gutu ma le faa’i, ma sa lē mafai ona ia foloina meaai po o vai e aunoa ma le tau manavanava i totonu.
Ia Mati, sa ta’u mai ai e lana fomai ia i matou e lua filifiliga a Ioane e faia: (1) o se faagaau e fafagaina ai e tatau ona tuu i totonu, atonu e mafai ona faatumauina ai le ola o Ioane mo ni nai masina ae o le a manaomia ai o ia ina ia taoto lava i le moega; po o le (2) e faaauau pea Ioane e aunoa ma le faagaau e fafagaina ai, ma onosaia faigata lea e oo mai i lona lē mafai ai lea ona ai. Sa fai mai le fomai, “O lou olaga. E tatau ona e faia le faaiuga. O lea le mea e te manao e fai?” I se tulaga toafilemu ma matua’i manino lava, sa tali atu Ioane, “Aua nei faia se faagaau.”
Sa maligi o’u loimata a o ma tuua le ofisa o le fomai. O le manatuaina o le saunoaga ma faatinoga talu ai nei a Ioane na oo mai i lo’u mafaufau, ma faamanino mai ai na ia iloaina lava o le a oo mai lenei mea ma ua uma ona ia taliaina. O lo’u alofa mo Ioane na taitai atu ai a’u e lagolago lana filifiliga.
Sa ou talitonu sa ou iloa le uiga o lena mea. O le mea moni, ou te le’i iloaina. Sa faapena foi ona ou lē iloaina le auala o le a tuumāmāina ai e le loto faafetai o’u tiga.
O Le Mana o le Tuuina Atu o le Faafetai
I lona soifuaga atoa, sa fiafia Ioane i upu o le 1 Tesalonia 5:18: “Ia avatu le faafetai i mea uma lava.” A o lei faia tatalo i le taimi o taumafataga, mo se faataitaiga, e le’i fai atu lava Ioane i se tasi e “fai le faamanuia.” Nai loo lena, e masani lava ona ia fai mai, “Tatou avatu le faafetai.” Na iloa e Ioane o le lotofaafetai e tāua tele i le fiafia. Sa ia iloa foi, e pei ona faaauau pea le vaega o totoe o lena fuaiupu mai le Tesalonia e uiga i le lotofaafetai, “aua o le finagalo lea o le Atua ia Keriso Iesu e faatatau ia te outou.”
Na iloa e Ioane o le oti o se vaega o le fuafuaga a le Atua (tagai i le Alema 42:8–9) ma mo ia, ua lata mai le oti. Ae sa ia faaauau pea ona faamaoni ia Keriso ma le lotofaafetai.
Ina ua tuua le ofisa o le fomai, sa ma valaauina ma Ioane se aufono faaleaiga. O lo matou aiga sa nonofo mamao na auai faatasi ma i matou e ala i fonotaga faavitiō. Sa matou amata i le tatalo. Ma, a o o’u uuina le lima o Ioane, sa ou faasoa atu lana faaiuga ma le mea na fai mai le fomai ia i matou e ono o’o i ai. Sa ou talanoa atu e uiga i le filemu sa ma lagonaina uma ma faamanatu atu i lo matou aiga lagona faamafanafana na oo i ai tagata uma mo ni masina. O i matou uma, e aofia ai ma fanau a fanau, na iloaina o Papa (e pei ona latou ta’uaina ai Ioane) sa lei umi se taimi e ola ai.
Sa matou faailoa atu le lotofaafetai i le Atua mo le faailoa mai ia i matou uma o lo matou taimi faatasi ma Ioane sa puupuu ma mo le tuuina mai ia i matou o le avanoa e saunia ai faalelagona. I ni nai vaiaso a o le’i oo mai i lenei aso, sa fesili atu ai le ma atalii o Spencer ia Ioane pe o le a sona lagona e uiga i le oti. Sa tali atu Ioane, “Sa ou ola i se olaga lelei, ma o loo o’u taumafai pea e faia. Ou te faafetai mo lo’u olaga! O le umi lava e i ai Carma Lee i o’u autafa, ou te lē naunau e oti, ae ou te lē fefe foi.” Sa saunia Ioane ma, ona o lena mea, sa ia lagona ai le filemu (tagai i le Mataupu Faavae ma Feagaiga 38:30).
Sauniaina mo le Toesea
Sa ma saofafai i fonotaga faaleaiga, ma o matou loto tiga ma loimata maligi, ae sa matou lagonaina foi le filemu. Sa matou fesili atu ia Ioane pe i ai ni ona moomooga mulimuli. Sa tilotilo mai o ia ia i matou ma le alofa ma le faanaunau i ona mata; ona, e ui lava mo le tele o vaiaso na ia tautala ai i se musumusu, ae sa ia tautala mai ma le manino i se upu se tasi: “Malumalu.” Sa vave ona tali atu ona atalii, “O le a matou faia lena mea, Tama!”
Sa faaiuina le matou aufono faaleaiga i le tuuina mai e o ma atalii sa matou i ai faatasi, ia i ma’ua ma Ioane se faamanuiaga faaleperisitua. A o faaee o latou lima i luga o lo’u ulu, sa faatumulia a’u i le lotofaafetai. Sa ou lagonaina le mafanafana, e pei o le mafanafana o se opo alofa. Sa ou iloa o le a fesoasoani mai le Atua ia i matou e sopoia luitau o i luma atu. O le a Ia faamaluluina le faavauvau ma fesoasoani ia i matou ia maua le olioli.
O le mea tonu lava lena na tupu! E lei umi ae matou toe auai i le malumalu, faatasi ma la ma fanau tama lea na fesoasoani ia Ioane i le sauniga o le faaeega paia. Sa matuai o’u maua le loto faafetai! Sa faatumulia o matou loto i le Agaga.
A o faasolo atu i se tulaga faaletonu le ma’i o Ioane, sa faaauau pea e ia ma a’u a ma faiga masani o le amata ma faaiu aso taitasi i tatalo o le lotofaafetai. A o ma faia lea mea, sa ma iloa ai o le faavauvau sa le’i lofituina ai i ma’ua po o a ma fanau. Sa tofu maua e i latou taitoatasi avanoa e fusi ai Papa ma faailoa atu lo latou alolofa ma le lotofaafetai mo ia. Sa matou maua ni taimi o le olioli. Sa o’oo’o le filemu i loto o a ma fanau ma isi o e na asiasi mai, na faamalosia ai i latou ma faamalūina foi lo latou faavauvau.
Peitai, e ui lava i le filemu sa i ai i lo matou fale, o le vaavaai atu pea i lo’u toalua o se tagata sa olaola lelei, ma matuā malosi lava, ua fai atu lava lona malosi ma lusi ni pauna e 50 i lena masina, o se tulaga sa matuā faamomoi loto lava. I le leva o le po i le aso 21 o Aperila, na taoto ai Ioane i lona moega. Sa siomia o ia e lana fanau ma a’u. Sa matou lagonaina o le a tuua e lona agaga lona tino i se taimi lata mai lava. Sa ou taoto i ona autafa, ma uu lona lima ma musumusu upu o le alofa ma le lotofaafetai mo o ma olaga. Sa ou faafetai atu ia te ia mo le faataitaiga musuia sa ia faia a o ia tali atu i ona puapuaga e ala i le liliu atu i le Alii i le faatuatua ma le lotofaafetai. Sa ou sogi atu ia te ia. I ni sekone, sa maliu ai o ia.
Lagona o le Filemu ma le Olioli
Ina ua aveese atu le tino o Ioane, sa nonofo faatasi lo matou aiga i lo matou fale. Sa maligi o matou loimata a o matou faailoa atu le lotofaafetai ua faamutaina le puapuaga o Ioane i le olaga nei. O upu o le lotofaafetai na masaa mai lo’u gutu a o o’u mafaufau i le tele o le alofa mutimutivale agamalu na tuuina mai e le Tama Faalelagi ia i matou (tagai i le 1 Nifae 1:20). Na aumaia e le Atua ia te a’u le gafatia ou te tausia ai Ioane i lo matou fale, e ui lava i le i ai o ni faafitauli faaletino ia te a’u lava ia (lea sa manaomia moni ai ni taotoga se tele ae le’i leva ona maliu Ioane).
A o matou talatalanoa, sa faamafanafanaina a’u a o o’u faailoa atu le faafetai mo folafolaga e faavavau o a matou feagaiga o le malumalu (tagai i le Mataupu Faavae ma Feagaiga 132:19–20). Sa ou fai atu i la’u fanau sa ou lagonaina e pei o loo fusi a’u e Ioane, ma faamautu mai mea sa ou fai atu ai a o o’u faaalia le lotofaafetai. Oka se lagona fiafia! Sa ou faamanatu atu i lo’u aiga upu a Peresitene Russell M. Nelson ia Novema 2020: “O le faatinoina o le lotofaafetai atonu e le taofia ai i tatou mai le oo i le faanoanoa, ita, po o le tiga, ae e mafai ona fesoasoani ia i tatou e tulimatai atu ai i luma ma le faamoemoe.”1
Na faafuasei lava, sa ou lagonaina se opo faalelagi matua’i malosi lava lea na faatumulia ai a’u i le maofa. Sa ou lagonaina foi sa manuia ma fiafia Ioane ma e tatau foi ona ou fiafia. I lena lava taimi, sa ou fai ai se folafolaga ia te a’u lava—ma la’u manamea—o le a ou fiafia.
A o mavae atu vaiaso, sa ou maofa ona o le tele o taimi, o le filemu ma le olioli, ae le o le faavauvau, na faatumuina ai lo’u loto. Sa ou manatunatu pe aisea. I se tasi aso, sa ou filifili ai e sailiili i upu a o tatou perofeta ma aposetolo e faatatau i le faavauvau ma le lotofaafetai. Sa latou faamautuina le mea ua uma ona ou iloaina: ma lenei sa faamalosia a’u e le mana faamafanafana o Iesu Keriso ma Lana Togiola, faatasi ai ma lo’u lotofaafetai.
O le ulutala o se tusiga oi le Ensign i le 2005 na saunia e Peresitene Thomas S. Monson (1927–2018) na matuā taia ai a’u. Sa faaigoaina “O le Mana Loloto o le Lotofaafetai.” I lena tusiga, na saunoa ai Peresitene Monson:
“O le Atua i Lona alofa mutimutivale e le iu, Na te le tuua e pele o faavauvau ia tau manatunatu. Ua Ia saunia le upumoni. O le a Ia musuia se aapa atu i luga, ma o Ona aao faaloaloa o le a opoina ai oe. Ua folafola atu e Iesu i se tasi ma i latou uma o e faavauvau, ‘Ou te le tuua outou o na o outou: ou te toe sau ia te outou’ [Ioane 14:18].”2
Sa ou iloaina sa ou lagonaina le mafanafana ma le opo mai o le Atua. Sa loloto ma mamana i latou! O ia vaega na mafai ai ona ou tilotilo i le ata o Ioane i taeao taitasi ma ataata a o o’u fai atu, “Faafetai lava!” ia te ia ma le Atua!
Na faamatalaina atoatoa e Elder Dieter F. Uchtdorf o le Korama a Aposetolo e Toasefululua le mea na ou oo i ai: ‘Pe a tatou faafetai i le Atua i o tatou tulaga, e mafai ona tatou lagonaina le filemu agamalu i le lotolotoi o puapuaga. I taimi o faanoanoaga, e mafai lava ona sii ae o tatou loto i viiga. I o tatou tiga, e mafai lava ona tatou viia le Togiola a Keriso. I le maatiati o le oona o tiga, e mafai lava ona tatou lagonaina le latalata ma le mafanafana o le pa’i mai o le lagi.”3
O nei faamanuiaga o mea ia sa ou lagonaina i totonu o minute o le maliu o Ioane ma i aso talu mai lena taimi! Ou te faafetai mo le filemu i lo’u loto ma le auala ou te lagonaina ai pea le opo mai o le Atua. Ou te lē manao lava e aveese na lagona! Ma o lea, ou te faaauau pea ona faailoa atu le lotofaafetai i aso taitasi mo o’u aafiaga paia, mo le malamalama o le talalelei lea e aumaia ai a’u ia latalata atili atu ia Iesu Keriso, mo le faamafanafanaga e faamalosi ai ua mafai ona o Ia ma Lana Togiola, ma mo se vaaiga e faavavau ma le faamoemoe o le a mafuta ai i le faavavau faatasi ma la’u Ioane.