“Fesoasoani i le Autalavou ia Saunia e Maua se Faamanuiaga Faapeteriaka,” Liahona, Fep. 2024.
Fesoasoani i le Autalavou ia Saunia e Maua se Faamanuiaga Faapeteriaka
O faamanuiaga faapeteriaka e mafai ona fesoasoani i le autalavou ia malamalama i lo latou faasinomaga e faavavau ma tumau ai i luga o le ala o feagaiga.
E toalua uso o le Au Fitugafulu—o Elder Randall K. Bennett ma Elder Kazuhiko Yamashita—sa musuia e saunoa e uiga i faamanuiaga faapeteriaka i le konafesi aoao ia Aperila 2023. Sa maua e Elder Bennett se faamanuiaga faapeteriaka i le 12 o ona tausaga, ma fai mai “sa matua taua tele” ia te ia a o laitiiti o ia. Sa fesoasoani ia te ia e malamalama ai i lona faasinomaga e faavavau ma iloa ai sa “alofagia o ia e lo’u Tama Faalelagi ma lo’u Faaola ma sa aafia patino i laua i lo’u olaga.”
A o ia suesueina, sa fesoasoani ia te ia e lagona ai le Agaga Paia ma musuia ai o ia e suesue i tusitusiga paia, tatalo i aso taitasi, ma mulimuli i aoaoga a perofeta. “Sa taua ia te a’u le maua o lo’u faamanuiaga faapeteriaka a o o’u laitiiti ma a o tuputupu a’e pea la’u molimau.”1
Na maua e Elder Yamashita lona faamanuiaga faapeteriaka i le 19 o ona tausaga, i le lua tausaga talu ona papatiso o ia. Na aoao mai Elder Yamashita o faamanuiaga faapeteriaka e faaalia ai lo tatou gafa i le aiga o Isaraelu, e faamanatu mai ai ia i tatou “o i tatou o fanau o le feagaiga. Tatou te maua faamanuiaga o le feagaiga faaAperaamo pe a tatou usiusitai i tulafono ma sauniga o le talalelei.” Sa ia aoao mai foi o le saunia e maua se faamanuiaga faapeteriaka o le a fesoasoani i le autalavou e faateleina ai lo latou faatuatua i le Tama Faalelagi ma Iesu Keriso.2
Talu ai o faamanuiaga faapeteriaka e mafai ona avea ma se malosiaga i olaga o tagata laiti o le Ekalesia, e mafai e matua ma taitai ona talanoaina nisi o nei fesili ma le autalavou a o latou sauniuni e maua se faamanuiaga faapeteriaka.
O Fesili ma Tali
O le a le faamanuiaga faapeteriaka?
O se faamanuiaga faapeteriaka o se faamanuiaga faapitoa e tuuina atu i se tagata agavaa o le Ekalesia e se peteriaka faauuina. E aofia ai fautuaga mai le Tama Faalelagi e taiala ai le tagata i lona olaga atoa. E ta’u atu ai i le tagata o le ekalesia po o le a le ituaiga o Isaraelu e tupuga mai ai. “O lou ituaiga e le faatatau i le ituaiga po o le atunuu. Nai lo lena, e faatatau i se seti o tiutetauave faaleagaga ma faamanuiaga folafolaina.”3 E faamanatu atu ai i le tagata e faapea, e pei ona aoao mai le Faaola, “o outou o fanau o le feagaiga” (3 Nifae 20:26).
“O se faamanuiaga faapeteriaka mai se peteriaka faauuina, e mafai ona tuu mai ai ia i tatou se fetu e mulimuli ai, o se faaaliga patino lea mai le Atua i tagata taitoatasi. Afai tatou te mulimuli i lenei fetu, o le a tatou lē tautevateva ma lē taitaiseseina. …
“… O o tatou faamanuiaga faapeteriaka ua faailoa mai ai mea ua faamoemoeina e le [Atua] mai ia i tatou ma po o a foi o tatou gafatia e mafai ona i ai.”4
Pe manaomia ea ona avea tagata o le ekalesia i se matua faapitoa e maua ai se faamanuiaga faapeteriaka?
O le tagata o loo mauaina le faamanuiaga e tatau ona “lava lona matua e malamalama ai i le taua ma le natura paia o le faamanuiaga. O le mea sili, ia lava le talavou o le tagata aua o le tele o faaiuga taua i le olaga o loo i luma atu pea.”5
E leai se tausaga aupito maualalo e manaomia nai lo o le faamautinoa ua malamalama le autalavou i le natura paia o le faamanuiaga, ma o tagata fou “e tatau ona malamalama i le aoaoga faavae autu o le talalelei.”6 O le mauaina o se faamanuiaga a o talavou lava e mafai ona fesoasoani ia i latou e faia ni faaiuga taua o le olaga i o latou tausaga talavou ma talavou matutua.
O le a le fautuaga o le a tuuina mai i le faamanuiaga faapeteriaka?
“[O se faamanuiaga faapeteriaka] o se taiala paia o fautuaga, folafolaga, ma faamatalaga mai le Alii; peitai, e lē tatau i se tagata ona faamoemoe i le faamanuiaga e auiliili mai mea uma o le a tutupu ia te ia pe tali ai fesili uma.”7
E ono talanoaina ai nisi ae le o vaega taua uma o le olaga o le tagata. Afai e lē o ta’ua ai se mea (e pei o le faaipoipoga po o se misiona talai, mo se faataitaiga), e lē faapea ai la e lē mafai e le tagata ona faia na mea.
Ae o se faamanuiaga faapeteriaka o se taitaiga patino lea mo le tagata mai le Tama Faalelagi. Na saunoa mai Peresitene Thomas S. Monson (1927–2018) e faapea, o se faamanuiaga faapeteriaka “o loo i ai mataupu mai lau tusi o avanoa e faavavau” ma o se “Liahona patino e fuafua ai lou ala ma taiala ai lou ala.”8
Faamata o le a faataunuuina faamanuiaga uma i le faamanuiaga faapeteriaka i lenei olaga?
Na folafola mai Peresitene James E. Faust: “O lo tatou faamanuiaga faapeteriaka o le a avea ma taula i o tatou agaga, ma afai tatou te agavaa, e le mafai e le oti po o le tiapolo ona aveesea ia i tatou le faamanuiaga ua ta’uina mai. O ni faamanuiaga e mafai ona tatou olioli ai nei ma le faavavau.”9
O le mauaina o faamanuiaga folafolaina e faalagolago lea i a tatou taumafaiga ma le ola amiotonu. Afai tatou te taumafai e filifili le mea sa’o, o faamanuiaga uma ua folafola mai o le a fai mo tatou. Ae o nisi faamanuiaga e mafai ona oo mai i le faavavau.
E faapefea ona maua e le autalavou se faamanuiaga faapeteriaka?
E latou te faatulagaina muamua se taimi e feiloai ai ma le epikopo po o le peresitene o le paranesi. O le a ia faia se faatalanoaga ma tuuina atu se Pepa Faataga mo Faamanuiaga Faapeteriaka. Ona latou faia lea o se taimi faatulagaina ma le peteriaka. O tagata vavalalata o le aiga e mafai ona auai i le faamanuiaga.
I se aso i le lumanai pe a uma ona tuuina mai le faamanuiaga, o le a tuuina atu i le tagata se kopi o le faamanuiaga. E mafai foi ona maua i le ChurchofJesusChrist.org i lalo o “Tools.”
Mo i latou i tulaga patino, e pei o le auauna atu i le militeli po o se misiona, o le Tusitaulima Aoao o loo aumaia ai nisi faamatalaga auiliili e uiga i le auala e maua ai se faamanuiaga.10
E mafai e mātua ona faasoa atu vaega o o latou lava faamanuiaga faapeteriaka ia latou fanau?
Fai mai le Tusitaulima Aoao : “O tagata o le Ekalesia … e le tatau ona faasoaina atu sei vagana ai tagata vavalalata o le aiga. E lē tatau ona faitau atu i sauniga faale-Ekalesia po o isi faatasiga faitele ia faamanuiaga faapeteriaka.”11
E mafai e mātua ma mātua matutua ona fesoasoani i a latou fanau ma fanau a fanau ia saunia e maua se faamanuiaga faapeteriaka e ala i le faasoa atu o auala ua musuia ma taialaina ai i latou e o latou lava faamanuiaga faapeteriaka.
O Faamanuiaga o se Faamanuiaga Faapeteriaka
O se faamanuiaga faapeteriaka e mafai ona avea o se punaoa matagofie i olaga o a tatou talavou. E mafai ona fesoasoani ia i latou e faatautaia ai luitau o le olaga. I taimi o tofotofoga, e mafai ona tuuina atu ia i latou le faamoemoe ma fesoasoani ia i latou ia maua le malosi i le Faaola. Ma e mafai ona fesoasoani ia i latou i o latou olaga atoa ia malamalama ai i le upumoni e uiga i le tagata e i ai i latou ma pe o ai e mafai ona avea ai i latou.
Na aoao mai Elder Bennett: “O le suesue so’o i lo’u faamanuiaga faapeteriaka na faateleina ai lo’u manao ia tetee atu i faaosoosoga. Na fesoasoani ou te maua ai le manao ma le lototele e salamo, ma o le salamo sa avea atili o se faagasologa fiafia.”12
Na fautua mai Peresitene Monson: “O lou faamanuiaga e le tatau ona gaugau ma teu lelei. E le tatau ona faavaa pe faalauaiteleina. Ae, e tatau ona faitauina. E tatau ona e fiafia i ai. E tatau ona mulimulitaia.”13
A o amata ona mafaufau lau fanau e uiga i le mauaina o o latou faamanuiaga faapeteriaka, fesoasoani ia latou malamalama i le natura paia ma le faamoemoega o le faamanuiaga. Fautuaina i latou e filifili ma le agaga tatalo mo i latou lava po o afea e maua ai. Aua le manatu faatauvaa i lo latou gafatia e aoao ai ma tuputupu ae mai o latou faamanuiaga faapeteriaka e oo lava i le laiti, aemaise lava ma lau fesoasoani.