O Vaega Ofoofogia e 15 o le Polokalama o le Tusi a Mamona

Saunia e Mike Judson

Matagaluega o Talafaasolopito o Aiga

Faaaoga se polokalama e faafaigofie ai le faasoaina atu o le talalelei nai loo se isi lava taimi! O manatu e 15 ua faamatamata tetele atu i lalo atonu e mafai ona faapitoa le aoga.

Ata

tamaitai e toalua o loo taliē ma talanoa

Pe na i ai se taimi na e i ai i se talanoaga e faatatau i le talalelei ma se tagata ese? Atonu o luga o se pasi, i se paka, po o se laina mo meaai. O le mataupu a Iesu Keriso ma Ana aoaoga e mafai ona oo mai toetoe lava i soo se nofoaga, i soo se taimi.

Afai sa e i ai i se tulaga faapenei, pe na e moomoo maimau pe ana i ai se se mea anoa e mafai ona e tuua i lau uo fou—se mea lea e ono uunaia ai lenei tagata e faaauau pea ona aoao e uiga i le Faaola ma Lana talalelei? Atonu na e iloaina sa latou manaomia le mana o le Tusi a Mamona, e pei ona aoao mai Peresitene Russell M. Nelson, e “faamalolo, faamafanafana, toefuatai, fesoasoani, faamalosi, faatoafimalie, ma faafiafia o [latou] agaga.”¹

E le o tagata uma e feavea’i se Tusi a Mamona i totonu o se atotupe po o se taga, ae o le toatele o i tatou e tauaveina se telefoni feaveai ma maua ai se fesootaiga i se polokalame lea e faigofie ona feaveai ma faasoa atu! O nisi taimi o lenei lomiga faaeletonika e mafai foi ona sili atu ona aoga lona i ai i ou lima, nai loo se tusi ua lolomiina.

E ta’ua o le polokalama o le Tusi a Mamona. Afai e te lei iloaina lava, sauni ia maofa!

O le a e fiafia faapitoa i le auala e mafai ai e lenei polokalama ona fesoasoani ia i tatou e faatino le fautuaga a Elder Ronald A. Rasband o le Korama a Aposetolo e Toasefululua e “mulimuli i lo tatou perofeta pele, o Peresitene Nelson, i le faalilofiaina o le lalolagi i le Tusi a Mamona. O le manaoga ua tele naua; ua manaomia lo tatou gaoioi nei loa.”²

E mafai e Lau Tusi ona Faia Lena Mea?

E leai se mea e ono suia ai le lagona o le faamafanafanaina e se tusi lelei, ma o le Tusi a Mamona o se tusi sili ona lelei e maua ai le toafimalie! Ae e mafai e lau kopi pepa ona faitau atu ia te oe lava? Faamata e susulu atu ona upu ia te oe i le pogisa pe faateleina le tētelē o ona mataitusi ina ia faafaigofie ai ona faitau? O le polokalama o le Tusi a Mamona e mafai ona faia na mea! Ma e mafai ona faia i le silia ma le 100 gagana! O nisi nei o mea o loo faaalia i le polokalama o le Tusi a Mamona:

O le seti atoa o Vitiō o le Tusi a Mamona, e aofia ai ata o loo faaalia ai asiasiga a Iesu Keriso i Amerika anamua.
O vitiō o loo muai faailoa mai ai le Tusi a Mamona ma le mea e faatatau i ai.
O vitiō o lea faasoa mai ai aafiaga o isi o e na maua le malosi ma tali i luitau o le olaga i le Tusi a Mamona.
O le tomai e amata ai se talanoaga moni ma se faifeautalai pe a oo mai se fesili i lou mafaufau.
Faamatalaga mo le faafesootaia o faifeautalai i le lotoifale ma sailia se faapotopotoga e tapuai faatasi ai.

Ua ofoina mai e le polokalama o le Tusi a Mamona nei mea uma ma isi mea e sili atu!

O Se Valaaulia Faaperofeta e Faasoa Atu le Tusi a Mamona

“Ou te valaaulia outou, i le asō, e tuu atu se Tusi a Mamona i au uo ma aiga, o au uo mamae i le galuega, o lou faiaoga soka, po o le tamaloa o faatau fua o faatoaga i le tou maketi. Latou te manaomia afioga a le Alii o loo maua i lenei tusi. Latou te manaomia tali i fesili o le olaga i aso faisoo ma le ola e faavavau a sau. Latou te manaomia ona iloa le ala o feagaiga ua faataatia i o latou luma ma le alofa tumau o le Alii mo i latou. O loo i ai uma i le Tusi a Mamona.

“Pe a e tuu atu ia i latou se Tusi a Mamona, ua e tatalaina o latou mafaufau ma loto i le afioga a le Atua. E le tau manaomia ona e feaveaʼia ni kopi lolomi o le tusi. E faigofie lava lou faasoa atu mai lau telefoni feaveaʼi mai le vaega o tusitusiga paia i le polokalama o le Potutusi o le Talalelei.

“Mafaufau ia i latou uma e mafai ona faamanuiaina e ala i le talalelei i o latou olaga, ona auina atu lea ia i latou se kopi o le Tusi a Mamona mai lau telefoni. Manatua ia faaaofia ai lau molimau ma le auala ua faamanuia ai e lenei tusi lou olaga.”

Elder Ronald A. Rasband o le Korama a Aposetolo e Toasefululua, “I le Asō,” Liahona, Nov. 2022, 27.

Fausia ina ia Faasoa Atu

Atonu o se tasi o vaaiga sili ona lelei o le polokalama o le Tusi a Mamona o ona gafatia ua mae’a fausia ma i ai i totonu, e fefaasoaai ai. I le na o se oomi e tasi, e mafai ona e faaali atu se numera faalilolilo e mafai e isi tagata e faaaogaina le telefoni feaveai ona kopi e aga’i sa’o ai i le polokalama i se faleoloa o polokalama i luga o le initoneti. Pe a sii mai le polokalama o le Tusi a Mamona, e otomeki lava ona iloa le gagana o le masini a le tagata e anaina ma sii mai le polokalama o le Tusi a Mamona i la latou gagana. Vaai faalemafaufau i le faigofie o lena mea i se malaga i atunuu mamao, i luga o se nofoaafi, po o lou nuu foi!

O isi filifiliga e fefaasoaai ai e aofia ai le tomai e auina atu ai se sootaga e sii mai ai, e ala i tesi , imeli, ma isi.

Sii mai le Polokalama i le Asō!

Ina ia sii mai le polokalama maua-fua o le Tusi a Mamona ma iloa ai le mana o le Tusi a Mamona mo oe lava ia ma isi, tau lava o le sailia o le “polokalama o le Tusi a Mamona” i lau faleoloa o polokalama i luga o le initoneti.