“Sa Faia ai e Ia Ala mo i Matou”

1 Nifae 17:3

Saunia e Becca Aylworth Wright

Mekasini a le Ekalesia

Ata

O Liae o loo uuina i luga le Liahona

Liae ma le Liahona, saunia e Ronald L. Bergen

Sa onosa’ia e Nifae ma lona aiga ia tofotofoga faigata a o latou tuua Ierusalema ma sailia le nuu folafolaina. E pei foi o i tatou, sa lei faasaoina i latou e le Alii i taimi uma mai le onosa’ia o tofotofoga. Ae, e pei o i tatou, ina ua i ai so latou manaoga moni, sa i ai iina le Tama Faalelagi e tuuina mai.

Ina ua uma ni taumafaiga le faamanuiaina a Nifae ma ona uso ina ia maua mai ai papatusi apamemea, sa leai se isi a latou filifiliga, ma sa manaomia ai loa le faalavefau faalelagi, sa “taitaiina [Nifae] e le Agaga” (1 Nifae 4:6) ma maua mai ai papatusi.

Ina ua manaomia ona o atu le aiga i le vao ae sa lei iloa po o fea e o i ai, sa tuuina mai e le Alii se tapasa (tagai i le 1 Nifae 16:10).

Ina ua latou o atu ma le fiaaai mo se taimi ona o le leai o le aufana a Nifae, sa faia e Nifae lana lava aufana ma le ufanafana ma sa tuuina atu i ai le taitaiga mai le Alii e iloa ai le mea e maua ai meaai (tagai i le 1 Nifae 16:18–24).

Ina ua latou taunuu i le sami, sa faaali atu e le Alii ia Nifae le auala e fau ai se vaa (tagai i le 1 Nifae 17:8).

Sa faaaoga sese e Lamana ma Lemuelu lo la faitalia e sasa ai Nifae ma Sama (tagai i le 1 Nifae 3:28), ae ina ua la saili e aveese le ola o Nifae, sa lei maea lana misiona o le olaga, o lea na lapataia ai e le Alii ia Nifae e alu ese atu i le vao. Ina ua i ai so latou manaoga, sa faasaoina Nifae ma lona aiga. (Tagai i le 2 Nifae 5:4-5.)

Mai le taimi na tuua ai e Nifae Ierusalema seia oo i le taimi na manaomia ai ona ia aluese mai ia Lamana ma Lemuelu, sa mamao lana malaga atu, sa sasaina o ia i se tootoo, ’ai mata aano o manu, sa noatia mo aso e tolu i luga o se vaa, ma mafatia ai i le maliu o lona tamā faaletulafono ma lona tamā. E pei o i tatou, o lana amiotonu sa lei faasaoina ai o ia mai puapuaga. E faapei o i tatou, sa ia onosa’ia tofotofoga o le olaga faaletino. Ae ina ua manaomia e Nifae le Alii—ina ua oo mai le taimi o le manaoga moni—sa i ai pea le Alii iina.

Tatou te onosa’ia faigata—o nisi taimi ona o o tatou tulaga po o filifiliga ma o nisi taimi e mai lima o isi. Tatou te feagai ma faanoanoaga, puapuaga, e oo lava i le oti. Ae e pei o Nifae, afai tatou te faalogo ma faalagolago i le Agaga Paia, o le a tuuina mai e le Tama Faalelagi, e tusa ai ma Lona finagalo ma Lana taimi, mea tatou te manaomia moni lava.