“O Le Olioli Tumau o le Ola i le Talalelei,” Liahona, Fepuari 2024.
O Le Olioli Tumau o le Ola i le Talalelei
O le olioli tumau e oo mai e ala i le tumau i le talalelei a Iesu Keriso ma fesoasoani i isi ia faia foi faapea.
O Le Faatoaga o Etena, saunia e Grant Romney Clawson; Tuua o le Faatoaga o Etena, saunia e Joseph Brickey
O se faaaliga manino o le faamoemoega o o tatou olaga e mafai ona maua i aoaoga faaperofeta a Liae e uiga i le amataga o le ola o le tagata i le lalolagi. I le Faatoaga o Etena, sa nonofo ai Atamu ma Eva i se tulaga o le lē sala. Ana faapea la te tumau ai pea i lena tulaga, semanu e “aunoa [i la’ua] ma se olioli, ona sa la lē iloa se pagatia; la te lē faia se mea lelei, ona sa la lē iloa le agasala“ (2 Nifae 2:23). O lea, e pei ona faamalamalama mai e Liae, “Na pa’ū Atamu ina ia i ai tagata; ma ua i ai tagata, ina ia latou maua le olioli” (2 Nifae 2:25; tagai foi i le Mose 5:10–11).
A o tatou tuputupu a’e i se lalolagi pa’ū, tatou te aoaoina le eseesega i le va o le lelei ma le leaga e ala i mea ua aoaoina ai i tatou ma mea tatou te oo i ai. Tatou te “tofo i le oona, ina ia [tatou] iloa ai ona faataua le lelei” (Mose 6:55). E oo mai le olioli pe a tatou teenaina le oona ma faateleina le faapelepele ma pipiimau i le lelei.
Mauaina o le Olioli
Ona o Lona alofa atoatoa mo i tatou, ua naunau ai lo tatou Tama Faalelagi e faasoa mai Lona olioli atoatoa ia i tatou, i le taimi nei ma i le faavavau. O Lana uunaiga lena i mea uma mai le amataga, e aofia ai Lana fuafuaga mamalu o le fiafia ma le taulaga a Lona Alo e Toatasi na Fanaua e togiola ai i tatou.
E lē taumafai le Atua e faamalosia le olioli po o le fiafia i o tatou luga, ae Na te aoaoina i tatou i le auala e maua ai. Ua Ia ta’u mai foi ia i tatou le mea e lē mafai ona maua ai le olioli—“e le’i [ma e lē] avea lava le amioleaga ma fiafia” (Alema 41:10). E ala i Ana poloaiga e faaali mai ai e lo tatou Tama Faalelagi ia i tatou le ala i le olioli.
Na faamatala mai e Peresitene Russel M. Nelson i le ala lenei:
“O le upumoni silisili lenei: e ui e manatu pea le lalolagi o le pule, o meatotino, lauiloa, ma mea faafiafia o le tino e aumaia ai le fiafia, ia e leai! Latou te lē mafaia! E leai se mea latou te fofoaina ae ua na o se suitulaga gaogao mo ‘tulaga manuia ma le fiafia o i latou o e e tausi i poloaiga a le Atua’ [Mosaea 2:41]
“O le upumoni lava, e matuā sili ona vaivai le saili o le fiafia i nofoaga e lē mafai ona e maua ai! Peitai, pe a e mulimuli oe lava ia ia Iesu Keriso ma faia le galuega faaleagaga e manaomia e manumalo ai i le lalolagi, o Ia, ma e na’o Ia lava, o loo i ai le mana e siitia ai oe i luga a’e o faaosoosoga o lenei lalolagi.”1
O lea la, o le olioli tumau e maua i le tausiga o poloaiga a le Atua, ma o poloaiga a le Atua o loo maua i le talalelei a Iesu Keriso. Peitai o la tatou lava filifiliga. Afai tatou te toilalo i o tatou vaivaiga mo se taimi e tausi ai poloaiga, e mafai lava ona tatou toe liliu, teena le oona, ma toe tulitulimatagauina le lelei. O le alofa o le Atua e le tuusaunoaina ai le agasala—o le alofa mutimutivale lena e faoa ai le faamasinotonu—ae e ala i Lana Togiola, ua ofoina mai ai e Iesu Keriso le togiolaina mai le agasala:
“Ma sa fai atu Amuleka … e moni o le a afio mai le Alii e togiola lona nuu, ae o le a lē afio mai o ia e togiola i latou i a latou agasala, ae e togiola i latou mai i a latou agasala.
“Ma ua ia te ia le mana na tuuina mai ia te ia mai le Tamā e togiola ai i latou mai ia latou agasala ona o le salamo; o lea na ia auina mai ai ana agelu e talai mai tala o tuutuuga o le salamo, lea e aumai ai i latou i le mana o le Togiola, mo le faaolataga o o latou agaga” (Helamana 5:10–11; ua faaopoopo le faamamafa).
Sa fetalai mai Iesu:
“Afai tou te tausia a’u poloaiga, ona tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa.
“Ua ou fai atu nei mea ia te outou, ina ia tumau ai loʼu olioli ia te outou, ma ia atoatoa foi lo outou olioli” (Ioane 15:10-11).
O le mea lea na lagonaina e Liae i lana miti a o ia tofo i le fua o le laau o le ola—lea e faatusa i le alofa o le Atua. Sa ia fai mai, “Aʼo ou ʼai le fua o le laau, sa faatumulia loʼu agaga i le olioli tele” (1 Nifae 8:12; tagai foi i le 11:21–23).
Sa faaali mai foi e Liae se auala lona lua e mafai ai ona tatou aumaia le olioli i o tatou olaga ina ua ia fai mai, “O le mea lea, sa amata ai ona ou manao ia aai foi loʼu aiga i [le fua]” (1 Nifae 8:12).
Pito i tua: Laau o le Ola,, saunia e Kazuto Uota
Fesoasoani i Isi ia Maua le Olioli
E pei o le nuu o le Tupu o Peniamina, ua “faatumuina i [matou] i le olioli” pe a tatou maua se faamagaloga o a tatou agasala ma maua le “filemu o le mafaufau” (Mosaea 4:3). Tatou te toe lagonaina pe a tatou vaavaai atu i fafo ma saili e fesoasoani i tagata o le aiga ma isi ia maua lena lava olioli ma le filemu.
A o avea ma se alii talavou, sa sailia e Alema le fiafia i mea uma e tetee i le talalelei a Iesu Keriso. Ina ua uma ona aoaiina o ia e se agelu, sa umi se taimi na sau ai o ia mai “le oona” i “le lelei” e ala i le salamo “toetoe a ou oti” (Mosaea 27:28) ma le alofa tunoa tele o le Faaola. I ni tausaga mulimuli ane, sa tautino atu ai ma le malosi e Alema i lona atalii o Helamana:
“Ma ʼoi, le olioli e, ma le malamalama ofoofogia tele na ou vaaia; ioe, sa faatumulia loʼu agaga i le olioli sa sili atu ona tele e pei o loʼu tiga!
“Ioe, ma mai i lena taimi e oo mai i le taimi nei, o loo o’u galue e aunoa ma se malolo, ina ia mafai ona ou aumai o agaga i le salamo; ina ia mafai ona ou aumai i latou e tofo i le olioli tele lea sa ou tofo i ai. …
“Ioe, ma o lenei faauta, loʼu atalii e, ua tuuina mai e le Alii ia te au le olioli e silisili ona tele i le fua o a’u galuega;
“Aua ona o le upu [le talalelei a Iesu Keriso] lea na ia tuuina mai ia te a’u, faauta, e toatele ua fanauina i la le Atua, ma tofo e pei ona ou tofo“ (Alema 36:20, 24–26).
I se isi taimi, na molimau Alema e faapea:
“O lo’u mitamitaga lenei, atonu ia mafai ona avea a’u o se meafaigaluega i aao o le Atua e aumai ai se agaga i le salamo; ma o lo’u olioli lea.
“Ma faauta, a ou vaai atu i le toatele o ou uso ua salamo faamaoni, ma ua o mai i le Alii lo latou Atua, ona faatumulia ai lea o lo’u agaga i le olioli” (Alema 29:9–10).
Sa faaauau pea ona folafola atu e Alema le olioli lofituina na ia lagonaina ina ua faamanuiaina isi i le aumaia o agaga ia Keriso:
“Peitai ua le na o lo’u lava manuia ua ou olioli ai, ae ua sili atu le atoatoa o lou olioli ona o le manuia o ou uso, o e na o ae i le laueleele o Nifae.
“Faauta, sa latou galulue malolosi, ma ua latou aumai fua e tele; ma o le a tele lava lo latou taui!
“O lenei, pe a ou mafaufau i le manuia o ou uso nei e segia ese atu lou agaga, ua oo lava e peiseai ua vavae ese atu ai mai le tino, e pei o lea, i le tele naua o lo’u olioli” (Alema 29:14–16).
E mafai ona tatou maua le olioli lava e tasi ao tatou alolofa atu i isi i “le alofa le pona o Keriso” (Moronae 7:47; tagai foi i le fuaiupu 48), faasoa atu le upumoni toefuataiina ia i latou, ma valaaulia i latou e faapotopoto faatasi ma tagata o le feagaiga.
Lo’u Tama e, saunia e Simon Dewey
Olioli i le Lotolotoi o Puapuaga
E lē tatau ona tatou fefefe e faapea o tofotofoga ma luitau tatou te feagai e mautinoa lava o le a taofia pe faatama’ia ai lo tatou olioli. O Alema o se tasi o ana auaunaga lē manatu faapito mo isi lea na matua’i tigaina ai lava o ia. Sa mafatia o ia i le faafalepuipuiina, vaitau faaumiumi o le fiaai ma le fia inu, sasaina, taufaamatau i lona olaga, ma tauemuga ma le teenaina faifai pea. Ae peitai, sa “faatumuina [uma] i le olioli ia Keriso” (Alema 31:38). Atonu o puapuaga o Alema na sili atu ai le olioli na mulimuli mai ai.
Ua faamanatu mai e Peresitene Nelson ia i tatou o le olioli na i ai se matafaioi i le puapuagatia o le Faaola—“ona o le olioli sa tuu i ona luma sa [Ia] onosaia ai le satauro” (Eperu 12:2).
“Mafaufau i lena mea! Ina ia mafai ona Ia onosaia aafiaga aupito i sili ona tiga e le’i onosaia muamua i le lalolagi, na taulai atu ai lo tatou Faaola i le olioli!
“Ma o le a le olioli lea sa tuu i Ona luma? E mautinoa lava na aofia ai le olioli i le faamamaina, faamaloloina, ma le faamalosia o i tatou; o le olioli i le togisalaina o agasala a tagata uma o le a salamo; o le olioli o le a mafai ai e oe ma a’u ona toe foi atu i le aiga—i le mama ma le agavaa—e nonofo ma o tatou Matua Faalelagi ma aiga.
“A tatou taulai i le olioli lea o le a oo mai ia i tatou, po o i latou tatou te alolofa i ai, o le a le mea e mafai ona tatou onosaia lea e foliga lofituina, tiga, taufaafefe, le talafeagai, pe foliga e le mafai?”2
O le olioli tumau e oo mai e ala i le tumau i le talalelei a Iesu Keriso ma fesoasoani i isi ia faia foi faapea. E oo mai le olioli tumau pe a tatou tumau i le alofa o le Atua, usitai i Ana poloaiga ma maua le alofa tunoa o le Faaola. I le ala o le talalelei, o loo i ai le olioli i le faigamalaga faapea foi ma le olioli i le iuga. O le talalelei a Iesu Keriso o le ala i le olioli i aso uma.