“O le Ala na Fesoasoani ai le Salamo ia te A’u e Alualu i Luma,” Liahona, Fep. 2024.
Autalavou Matutua
O le Ala na Fesoasoani ai le Salamo ia te A’u e Alualu i Luma
Afai e lava le talitonu o le Tama Faalelagi ma Iesu Keriso ia te au e tuuina mai ai pea ia te au nisi avanoa, aisea e le tatau ai foi ona ou talitonu ia te au?
Ata na tusia e Joshua Dennis
A o fou pea lo’u avea ai ma se faifeautalai, sa talosaga au e lo’u peresitene o le misiona ia avea ma se soa taitai.
Sa ou lgonaina le matua lē agavaa. E faapefea ona ou aoaoina se uso faifeautalai fou i le auala e avea ai ma se faifeautalai ofoofogia pe afai ou te le o mautinoa pe na ou iloaina e au lava ia?
I lo’u faamaoni, sa ou faia le tele o mea sese i le avea ai ma se soa taitai, ma sa ou faanoanoa tele e uiga i na mea sese mo sina taimi. Ae ina ua amata ona ou iloiloina o’u vaivaiga ma faaletonu ma taumafai ia lelei atili, sa ou maua se molimau faapea, e tuuina mai e le Alii ia i tatou “vaivaiga ina ia faalotomaualalalo ai i [tatou]” aua e mafai e Ia ona faia “mea vaivai ia avea ma mea malolosi” (Eteru 12:27). Sa amata ona ou aoaoina ni mea se tele e uiga i le salamo, lea e le mo na o le taimi tatou te sese ai—e mo soo se taimi lava tatou te mananao ai ia avea atili e faapei o le Tama Faalelagi ma Iesu Keriso.
Talu ona ou toe foi mai i le fale mai la’u misiona, sa manaomia ona ou malamalama i lena mea e sili atu nai lo se isi lava taimi muamua.
Le Atoatoa.
E ui lava sa ou fiafia i la’u misiona, sa ou tauivi e faaaoga lesona sa ou aoaoina a o auauna atu i lo’u olaga mulimuli ane. Sa iu ina vave ona ou toe foi i le fale nai lo le mea sa ou faamoemoeina ona o tauiviga o le soifua maloloina faalemafaufau ona siitia atu ai lea mai lo’u aiga i Filipaina i le Iunaite Arab Emirates e amata ona faigaluega.
Talu ona ou siitia mai iinei, sa faigata ia te au ona lagona po o o’u alualu i luma ma agai i luma i le ala o feagaiga. I la’u misiona, sa mafai ona ou tuuto atu lo’u taimi ma le malosi atoa i le talalelei. Sa itiiti lo’u popole e uiga i o’u manaoga faaletino po o mea o le a ou faia i lo’u olaga pe a uma la’u misiona. Ae o lea la o loo ou taumafai i le taimi nei e faapaleni isi manaoga o le olaga, ae ou te lagona e pei ou te le o atoatoa lava.
Ma talu ai ou te le o maua uma le nuu lagolagosua ma faamaoni lea sa ou maua i lo’u aiga i Filipaina ma le fuafuaga faatulagaina a se faifeautalai lea e mafai ai ona faigofie ma manino atili le alualu i luma, o nisi taimi ou te lagona ai e pei ou te le o alualu i luma.
Mausa Fou ma le Faamoemoe Fou
A o faaauau pea ona ou tauivi ma nei lagona, sa malosi o’u lagona e tatau ona ou faatinoina se mausa sa ia te a’u i la’u misiona. I le avea ai ma se faifeautalai, sa ou aoaoina ai le taua tele o le fesootai atu i le Tama Faalelagi i po uma e ala i le tatalo ma iloilo ma le faamaoni a’u faatinoga i aso taitasi. Ou te ole atu i le Tama Faalelagi po o le a le mea na lelei ona ou faia, ole atu mo le faamagaloga o a’u agasala ma mo le malosi e faatoilalo ai ou le atoatoa, ona fesili atu lea ia te Ia pe mafai faapefea ona ou faia ia sili atu i le aso e sosoo ai.
I le taimi muamua sa ou fefe e amata ona faia lenei mea ina ua maea la’u misiona, ae maise lava ona sa ou lagonaina e pei ua ou toilalo ia te a’u lava ma le Tama Faalelagi. Ou te lei manao foi e i ai ni faalagona leaga e uiga i ou faaletonu. Ae sa ou manatuaina mea sa ou aoaoina i lau misiona: o le salamo e aumaia ai le olioli. E pei ona faamalamalama mai e Elder Craig C. Christensen o le Au Fitugafulu: “O le salamo i aso uma ma le o mai ia Iesu Keriso o le ala lea e lagona ai le olioli—o le olioli e sili atu i lo tatou mafaufau [tagai i le 1 Korinito 2:9]. O le mafuaaga lena ua tatou i ai iinei i le lalolagi. O le mafuaaga lena na saunia ai e le Atua Lana fuafuaga sili o le fiafia mo i tatou.”1
Ou te matua faafetai lava mo lena uunaiga—o le saili atu i le Tama Faalelagi i aso taitasi ua suia ai le tele o mea mo au. O le iloaina e tuuina mai e le Tama Faalelagi ma Iesu Keriso ia te au le avanoa e lelei atili ai i aso uma e fesoasoani ou te maua ai le agaalofa sili atu mo a’u —pe afai e lava lo La talitonu ia te a’u e tuuina mai ai pea ia te a’u nisi avanoa, aisea e le tatau ai foi ona ou talitonu ia te a’u?
E pei ona a’oa’o mai Peresitene Russell M. Nelson: “E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani i aso taitasi i le salamo. O le ki lea i le fiafia ma le filemu o le mafaufau.”2
O le Salamo o le Alualu i luma
O upumoni ua ou aoaoina e uiga i le salamo ua fesoasoani ia te au e fuafua ai pe faapefea ona alualu pea i luma. E pei ona faamalamalama mai e Peresitene Nelson: “O le salamo o lekilea i le alualu i luma. O le faatuatua mama e faatumauina ai lo tatou agai i luma i luga o le ala o feagaiga.”3 Pe a ou salamo, ou te maua le taitaiga ma le faamautinoaga mai le Alii. Pe a ou salamo, ou te latalata atu ia te Ia.
Ma o le agaalofa mo a’u lava ia ma a’u taumafaiga ua tuuina mai ai ia te a’u le uunaiga e faaauau pea ona alualu i luma. Ou te lagona le faaosofia e salamo pe a ou talitonu e tauia a’u taumafaiga. Ou te fia latalata atili i le Tama Faalelagi ma Iesu Keriso pe a ou talitonu ou te agavaa mo lo La’ua alofa.
Ou te talitonu moni lava e tele naua le olioli, filemu, ma le toomaga e maua i le salamo, e tusa lava po o a mea o loo tatou feagai. Liliu atu i le Tama Faalelagi ma Iesu Keriso. Tatalo i le Tama Faalelagi ia iloa le mea e mafai ona e faia ia latalata atili atu ai ia te Ia ma Iesu Keriso ma avea atili ai e faapei o i La’ua.
Ou te iloa o le a e lagonaina lo La alolofa ma le lagolago—ma faateleina le agaalofa mo oe lava—e pei ona e lagonaina.
O le tusitala e sau mai le Atu Filipaina