Pe Sa O’u Soona Faafaigatāina ea le Talalelei?

Saunia e Ana Beatriz S. Pinto

Sa ou le malamalama pe aisea na ou lagona ai le vaivai tele.

o se laina o matauila ua amata ona mātalatala

I lo’u olaga atoa sa ou taumafai e avea ma tagata sa ou manatu na faamoemoe le Tama Faalelagi ou te avea ai. Ae sa i ai se faafitauli: Ou te le’i iloaina lava pe o lava lo’u lelei.

Sa ou taulai atu i o’u lē atoatoa, aemaise lava pe a uma ona suesue i tusitusiga paia po o le faalogologo i lauga o konafesi aoao. Pe a faitauina nei mea lea sa tatau ona faamalosiauina ai a’u, sa na ona ou taulai atu lava i le mea sese sa ou faia.

Sa ou ola i lenei ala mo se taimi umi—sa faanoanoa ma lagona le vaivai i lo’u tulaga o le avea ai ma soo.

Ae ou te lei iloaina o le mea moni sa ou le faia o le talitonu moni lea i le Faaola ma upumoni mama, ma faigofie o Lana talalelei.

Faagaloina o le Mafuaaga Ua Ou Ola ai i le Talalelei

Na suia la’u vaaiga a o o’u faalogologo atu i se faigalotu talu ai nei ma Sister Patricia T. Holland. Na ia faapea mai, “O le mea e sili ona ou faanoanoa ai i lo’u talavou o lo’u lē vaaia lea o le matagofie faigofie o le talalelei; sa ou faia foi ia faigata tele le talalelei.”¹

O lana sāvali na taia ai a’u.

Sa ou iloaina sa ou faafaigataina pea lava pea le talalelei! E toatele i tatou e faia lena mea. Tatou te faamoemoe ia tatou atoatoa, ma talitonu e leai se avanoa mo mea sese ma le alualu i luma. Ma afai e le o i ai mea i le ala ua tatou faamoemoe e tatau ona i ai, ona tatou popole lea i le lumanai, faatusatusa i tatou lava i isi, lē maua le sootaga ma le Tama Faalelagi, ma oo ai lava i le amata ona taumanatunatu pe o se vaega aoga ea le ola ai i le talalelei.

Sa ou iloaina o lo’u popole e lei mafua mai i le ola ai i le talalelei. Sa ou popole auā sa ou lē toe taulai atu i le mafuaaga ua ou ola ai i le talalelei: o Iesu Keriso.

Ua galo ia te a’u e alofa o Ia ma le Tama Faalelagi ia te a’u i le alofa atoatoa (tagai i le Ioane 15:9; 2 Nifae 1:15).

Ua galo ia te a’u e tatau ona ou maua le olioli i le faigamalaga (tagai i le 2 Nifae 2:25).

Ua galo ia te a’u o le olaga faaletino e aofia ai le i ai o le lē atoatoa ma le faalagolago i le Faaola e faatoilalo ai (tagai i le Eteru 12:27).

Ua galo ia te a’u o loo iinei le Faaola e fesoasoani ia te a’u e aoao ma tuputupu a’e ma alualu i luma ma Na te faapaiaina a’u taumafaiga ao i ai i le ala (tagai i le 2 Nifae 2:1–2; 32:9).

Faafaigofieina

Tatou te oo i faafitauli pe a tatou liliuina le talalelei i se lisi o tulafono ma galo ai upumoni mama a Iesu Keriso. A tatou taumafai e tausi a tatou feagaiga ma poloaiga ma le faamoemoe ia avea atili e faapei o Ia, ona tatou ola moni lea i le talalelei.

E pei ona aoao mai Peresitene Russell M. Nelson, o le taimi lenei, o le talalelei a Iesu Keriso e “suia ai le olaga o tagata uma o e malamalama i ai ma saili e faatino i lona olaga. E fesoasoani le aoaoga faavae a Keriso ia i tatou e saili atu ma tumau ai i luga o le ala o feagaiga.”²

E finagalo le Tama Faalelagi ia tatou manatua pea e mafai e le Faaola ona fesoasoani ia i tatou ia ausia lo tatou gafatia paia. Ae e faapefea ona lē galo ia i tatou lenei upumoni taua?

O ni nai faatinoga nei na fesoasoani ia te a’u:

Ou te tatalo mo le Tama Faalelagi e fesoasoani mai ia ou lagona e alofa o Ia ia te a’u ma talia a’u taumafaiga sili ona lelei.
Ou te ai ma inu i le faamanatuga, ma taulai atu i le Togiola a Iesu Keriso. Ou te faamanatu ia te a’u lava o Lona alofa tunoa e mafai ona fesoasoani ia te a’u i le lumanai ma o loo galue i lo’u olaga a o o’u taumafai e mulimuli ia te Ia.
Ou te liliu atu i tusitusiga paia mo le faamafanafanaga. Sa ou faitau e uiga ia i latou sa lagonaina foi le lē agavaa ma sa faamalosia e le Alii.
Ou te alu soo i le malumalu. O mea uma i le maota o le Alii e faamanatu mai ai ia te a’u Lona alofa mutimutivale ma e ou te gafatia ona ou alualu i luma. O iina, e mafai ai ona ou lagonaina le filemu i le lotolotoi o le tele o popolega.

O nei faiga ua ou talisapaia ai mea e sili ona taua i le talalelei. Latou te faamanatu mai ia te a’u e aua nei faafaigataina lona tulaga faigofie.

E Aogā le Talalelei

Afai e te tauivi ma lagona o le faafiaatoatoa po o le lē atoatoa po o le lagona e pei o le talalelei ua avea ma se avega, ia manatua upu a Elder Dieter F. Uchtdorf o le Korama a Aposetolo e Toasefululua:

“[O le talalelei] e matagofie lona faigofie, ma e maeu lona aoga.

“… Uso e ma tuafafine, afai o loo e manatu e le o matuā aoga tele le talalelei ia te oe, ou te valaaulia oe ia taofi teisi lava, toe tagai i lou olaga mai se mea maualuga, ma faafaigofie lou auala i le avea ai ma soo. Taulai atu i aoaoga faavae autu, mataupu faavae, ma faaaogaaga o le talalelei. Ou te folafola atu o le a taiala ma faamanuia outou e le Atua i o outou ala i se olaga faamalieina, ma o le a mautinoa lava le aoga atili o le talalelei mo outou.”³

E ala i le taulai atu i upumoni mama a’ia’i o le talalelei a Iesu Keriso, ua ou vaaia ai le faafaigofieina faavavega o lo’u olaga ma lo’u faatuatua. Ou te iloa o le a tupu foi i lou olaga.