Sa Faatasi Pea o Ia ma A’u

Saunia e Becca Aylworth Wright, Mekasini a le Ekalesia

O le faamaoni i le Alii na iu lava ina faamanuiaina ai a’u e sili atu nai lo se isi lava taimi na matua tauia ai a’u.

I le tolu masina talu ona fanau mai le ma pepe lona lima, sa suia ai i se totogi maualalo lo’u toalua e amata ai se galuega fou ma amata ai le aoga mo se faailoga. O lena mea na manaomia ai lo matou siitia ese atu i se nofoaga e lua setete e mamao ese ai. O le lagonaina o le lofituina i mea tautupe ma le vaivai faaletino, ma le nonofo ese i se nofoaga fou, sa ou matua ou le fiafia ai lava.

Sa faigata le alu i le lotu. Ma se lagona musuā, sa ou alu ai, ae sa vave ona ou alu ese mai talanoaga ina ia aloese ai mai fesili sagisagi fiafia a tagata e uiga i le pe na a mai lo’u fesuiaiga. Sa latou faamoemoeina ni tali fiafia tutusa, ae sa leai sa’u tali. E masani ona talanoa tagata o le uarota e uiga i le faamanuiaina ma le fiafia o i latou i le mauaina o le talalelei a Iesu Keriso. O le a se mea na sese ia te a’u?

Sa ou auauna atu i lo’u valaauga, ma sa ou faalotolotolua i a’u tatalo ma le faitauina o tusitusiga paia. Ae o a’u taumafaiga sa le’i foliga mai sa “aogā lelei” mo a’u.¹

Toeitiiti atoa le tausaga mulimuli ane, ae amata ona matafi ese le puaoa. E ala i se faasologa o suiga laiti faalemafaufau, faaletino, faaleagafesootai, ma faaleagaga, sa faasolosolo malie lava ona faaleleia a’u.

I ni masina mulimuli ane, faatasi ai ma lo’u le fiafia na tuuese i o’u tua, sa ou tatalo ai ina ua lofituina a’u i le maofa ma le lotofaafetai mo faamanuiaga o le ola ai i le talalelei. Sa ou lagonaina sa le talafeagai mo au le matuā faamanuiaina. O le Atua na tuuina mai ia te au le meaalofa faaleagaga o le faatuatua ma se manao ia iloa o Ia. Sa na o lo’u galue lava i le manao na Ia tuuina mai ia te a’u.

“Aisea e tatau ai ona ou maua faamanuiaga,” sa ou tatalo ai, “i le faia na o le mea na e totoina i lo’u loto e manao e fai i le taimi muamua?”

I lo’u te’i, sa Ia tali vave mai i la’u tatalo i manatuaga mai lo’u olaga ua tuanai.

“Ae faapefea taimi ia na e sailia ai au e tusa lava pe sa tiga ma faigata? Ina ua gauai mai lou loto i lo’u loto, ma sau pea i le lotu, ma auauna atu pea i la’u fanau? Lo’u afafine,” sa ou iloa e ala i le Agaga, “ua faamanuiaina tele oe mo lou faamaoni—mo le filifilia o a’u e tusa lava pe e te le’i manao i ai.”

Sa ou manatu o le faamaoni o lona uiga o le selesele i taimi uma i fua o Lona Agaga. O lenei ua ou iloa o le faamaoni o lona uiga o le tuuto ma le faamaoni ia te Ia—e tusa lava po o le a. O le moni o le Atua e le suia e tusa pe mafai ona ou faalogo ia te Ia pe lagonaina o Ia. I taimi o le olioli po o le faanoanoa, afai ou te nofo faatasi ma Ia, e faatasi pea o Ia ma a’u.