Savali Faaleautaitai i le Eria
Mauaina o le Olioli a o Tatou Taulai Atu i le Faaola
“’Oi, le olioli e … sa faatumulia lo‘u agaga i le olioli sa sili atu ona tele e pei o lo’u tiga!”1
Ua finagalo le Faaola mo i tatou ia olioli: “Ua ou fai atu nei mea ia te outou, ina ia tumau ai lo‘u olioli ia te outou, ia atoatoa foi lo outou olioli.”2
O se mea masani le manao e faasoa atu ni taimi fiafia ia i latou tatou te alolofa i ai … o le fanau mai o se tamaitiiti, o se vaaiga matagofie a o faimalaga, o tatou manuia, malamalamaaga faaleagaga, ma taimi faapitoa.
Ina ua maua e Liae le fua “ua sili ona suamalie, nai lo o mea uma sa [ia] tofo muamua i ai … sa faatumulia [lona] agaga i le olioli tele; o le mea lea, sa amata ai ona [ia] manao ia aai ai foi [lona] aiga.”3 Na tautino mulimuli ane e Liae i lona aiga, “Ua i ai tagata, ina ia latou maua le olioli.”4
I le avea ai ma se Epikopo talavou, i se taimi o le to’afilemu, sa ou siakiina lemu le potopotoga ma tomanatu i luitau na feagai ma aiga o loo alaala i le sauniga faamanatuga. O aiga taitasi, e aunoa ma se tuusaunoaga, na feagai ma luitau na aofia ai le maliu o e pele, tauiviga faalesoifua maloloina, o taunuuga o solitulafono, vaisu ma vaivaiga faaletino, o le lototiga i le vaavaai atu i e pele o tauivi, mafutaga ua faaleagaina, o uunaiga lautele o le olaga ma lagona o le leai o se faamoemoe ma le tuuatoatasi. Sa ou mafaufau, o fea o i ai le olioli?
A o ou onosaia vanu i le gasologa o lo‘u olaga, sa ou mafaufau mai lea taimi i lea taimi, o fea o i ai lenei olioli ma aisea e lagona ai i nisi taimi le le faigofie? Sa ma talanoaina i le tele o taimi ma lou toalua o Alithea ia le tautinoga a Liae: “Ua i ai tagata, ina ia latou maua le olioli”4 a o ma mafaufau i o ma tulaga patino ma tulaga o isi o siomia i ma‘ua. Ua ou iloa o nei luitau o se vaega taua o le fuafuaga o le olaga, atonu ua mamanuina ma le faaeteete ma patino mo oe ma au, e aoao, ia faaleleia ma faamalosia ai i tatou. Latou te aoaoina i tatou i le alofa mama ma le agaalofa mo isi ma taitai atu i tatou i le Faaola o Iesu Keriso.
O tulaga faigata e oo mai i nisi taimi e ala i a tatou lava mea e fai, o nisi taimi e ala mai i isi ma e foliga mai e tele lava ina aumaia faamalosi e tulaga. E ui ina faaosoosoina e alaga atu “oi talofa ia te au” po o le “faiga le fetaui”, ae ua ou iloa o tumutumuga taitasi o le olaga e faamamafaina e le “talaaga pogisa o le vanu lea na ou sau ai. … O eseesega maai o nisi taimi e sili ona faaalia mai” (Brown, 1946, e pei ona ta‘ua i le Densley, 2015).5
Sa matauina e Peresitene Russell M. Nelson, “O le olioli tatou te lagonaina e itiiti lava se mea e faatatau i tulaga o o tatou olaga ma mea uma e faatatau i le taulaiga o o tatou olaga.”6 Ona ia otooto mai lea e faapea o le olioli e maua pe a tatou taulai atu i le fuafuaga o le faaolataga a le Atua, ia Iesu Keriso ma i Lana talalelei.
Ua ou matauina le toatele, i totonu ma fafo atu o le Ekalesia, saili mo le olioli e ala i le faamalieina faaletagata lava ia, mauaina o mea faaletino (aemaise lava pe a taumafai ia sili atu i le au Jones), aloaia faalelalolagi, manuia faalegaluega, ausiaga faaletino ma e oo lava i ala pogisa. O taunuuga ia e masani ona aofia ai le le fiafia, faanoanoa, aiga ma sootaga malepelepe, tuuatoatasi, ma le mamao mai le Atua. O le mea e mataina ai, o tagata e sili ona fiafia ou te iloa, i totonu ma aunoa ma le Ekalesia, e matele lava ina avea ma i latou o e fausia ni sootaga lelei e ala i le auauna atu ma le siitiaina o isi. Manatua, e le mafai ona tatou siitia i tatou lava i luga e ala i le tosoina i lalo o isi.
Mo i latou o e ua taumamao mai lo tatou Tama i le Lagi ona o filifiliga ma mea sese le lelei faaletagata lava ia, e maua le lototele ia Alema le Itiiti, Enosa, Korianetona ma isi. Ia iloa o loo naunau lo tatou Tama oi le Lagi e faamagalo ma finagalo ia, “na’o [tatou] agasala ia [tatou] popole i ai, le popole lena e aumai ai [i tatou] i lalo i le salamo.”7
O Alema o le sa “tigaina ma le mafatia faavavau”8 ma moomoo maimau “pe ana mafai ona faaaunuua o [ia] ma tineia”9 ma liliu atu ia Iesu Keriso mo le faamagaloga ma mulimuli ane tautino mai, “Sa ou le toe manatuaina o’u tiga; ioe, sa ou le toe faanoanoa i le manatuaina o a‘u agasala. Ma ʼoi, le olioli e, ma le malamalama ofoofogia tele na ou vaaia;; ioe, sa faatumulia lo‘u agaga i le olioli sa sili atu ona tele e pei o lo’u tiga! … e leai se mea e faapea ona silisili ona logolelei ma suamalie e pei o lo‘u olioli.10
O le mea e faafetai ai, ua faamanuiaina a‘u i le matauina o le olioli, filemu ma le mautinoa o tagata e sili ona gafatia ma lotomaualalo, pele ia te a’u, o e sa filifili e le fuaina mea maualuga faalelalolagi ae ia faaogatusa le taulaiga o o latou olaga i le Faaola, o latou aiga ma i sailiga faaleagaga i luga o le ala o feagaiga.
O la‘u molimau ma lo’u aafiaga e faapea o le Faaola, o lē na “afio ifo i lalo o i latou uma”11 ma o lē na mafatia i “tiga ma puapuaga ma faaosoosoga [ma ma’i] o ituaiga eseese uma”12 ua atoatoa ona tuuina mai e fesoasoani, faamafanafana, siitia, faamalolo ma faamalosia i tatou i o tatou tofotofoga ma vaivaiga.
Na aoao mai Elder Jeffrey R. Holland, “e te lei malaga i talaatu o le aapa atu o le alofa paia. E le mafai e oe ona magoto maualalo ifo nai lo le malamalama e le iu o le [taulaga togiola] a Keriso.”13
O le Togiola a Iesu Keriso ua faamamaina, faapaiaina, faamaloloina, ma faamanaina fanau a le Atua mai lava i le amataga, o i latou ua uai atu i Lana valaaulia ia “O mai ia te au … ma o le a Ou tuu atu ia te outou le malologa.“14 Ma aisea e le malolo ai ma olioli mo oe ma au i lena taimi.
Ou te faafetai mo le olioli, mautinoa, vaaiga e faavavau ma le faamautinoaga filemu lea e oo mai ia te au mai le faaogatusa ma lo tatou Tama oi le Lagi e ala i le Togiola a Lona alo, o Iesu Keriso. Tau ina ia tatou maua taitoatasi le olioli ma le malologa a o tatou o mai ia te Ia.