Phyllis Clark, Tumau ma Faamaoni mo le 100 Tausaga

Potu o Talafou

E oo lava a o lei maua e ia se nofoa faataavalevale, e lei avea lava Katrina ma se tasi e nofonofo i le fale …

Sa lei manao Phyllis Clark i se gaua’iga po o se faafiafiaga manaia mo lona aso fanau lona 100.

Peitai, sa ese lagona o aiga ma uo. Sa latou faafiafiaina Phyllis i se tietiega pasi togipau e ui atu i le eria o Northland, fish and chips - meaai e fiafia iai tagata Niu Sila - i luga o le matafaga o Paihia ma se taumafataga e faamanatu ai lenei tulaga taua faatasi ma le 200 uo o tagata o le nuu ma le ekalesia na auai.

Na faamatala e lona atalii o Perry ia Phyllis o “Se tasi e tumau; e le’i i ai lava se taimi na le fiafia ai ae sa faamaoni i lona tuuto atu i le aiga, ekalesia ma le nuu.”

Ua faauigaina e Phyllis lona olaga matagofie i le ola ai i le talalelei a Iesu Keriso. Ua ia tomanatu, “O aoaoga musuia i Le Ekalesia a Iesu Keriso ua faatonutonuina ai lo‘u olaga, ua tuuina mai ai ia te a’u taiala i mea e fai ma mea e le faia pe a faia ni faaiuga.”

Sa faamatala e Perry, “A o matou laiti, i taeao uma a o lei amataina le aoga, e faasoa mai e lo‘u tina ni tala mai le Tusi a Mamona. Sa matou tatalo faatasi o se aiga ma tatalo faatasi i taimi o taumafataga.

“Sa ia ola i le talalelei i aso uma. E lei popole lava o ia,“ o le tala lea a Perry.

I le 70 o ona tausaga, sa taliaina ai e Phyllis se valaauga e taitai le faalapotopotoga a Tamaitai Talavou a le Ekalesia i le lotoifale, lea e fesoasoani i teineiti i le 11-18 tausaga e aoao ai ma ola i le talalelei a Iesu Keriso ma faateleina lo latou faatuatua ia te Ia.

I le 100 o ona tausaga, o loo faaauau pea ona auauna atu Phyllis i tamaitai o lana aulotu i le alofa, tuuto, ma le lagolago. E alofagia ma faapelepeleina o ia e tagata uma.

Ua uunaia e Phyllis tagata ina ia malolosi i le ola ai e tusa ai ma aoaoga a Iesu Keriso. Fai mai o ia, “E tusa lava pe e te manatu e faigata ona ola i le talalelei, ia faia pea. Faaauau pea.”

Sa soifua mai Phyllis ma ola ae i Maromaku, Northland Niu Sila. O Colin Clark, le toalua ua maliu o Phyllis, sa nofo latalata ane. Sa faaipoipoina i la’ua e Peresitene Matthew Cowley i le Falesa o Maromaku i le aso 4 Ianuari 1945.

Sa tatala e Colin se fale enisinia taavale sa faaigoa o le Fale Enisinia a Clark ma sa ia aveina le pasi a le aoga i le lotoifale. Ina ua amata ona pisi le Faletaavale a Clark, sa le mafai e Colin ona faaavanoaina le taimi e ave ai le pasi a le aoga, o lea na aapa atu ai Phyllis e fesoasoani. Sa faaauau pea ona ia aveina le pasi a le aoga mo le isi 40 tausaga.

Fai mai Phyllis, “Ua avea tamaiti ma se faaopoopoga i lo‘u lava aiga. O le a ou vaai ia i latou i aso uma, seia maea le vasega ono ma o atu i le aoga maualuga. Latou te valaau a’u o ‘Auntie Phyl’. O loo ou fesootai pea ma nisi o i latou i le asō.

E tele augatupulaga ua faamanuiaina i le alofa o Phyllis Clark ma lana faataitaiga o le faatuatua ma le galue malosi.