Itulau i le Lotoifale
Ua Aumaia Faatasi e le Faapaiaga o le Falesa ia Tagata AtuMotu o Marshall i le Olioli
Ua Aumaia Faatasi e le Faapaiaga o le Falesa ia Tagata AtuMotu o Marshall i le Olioli
O le faapaiaga o se falelotu fou i le Motu o Ebeye o le Motu amu o Kwajalein, na aumaia faatasi ai tagata o lena eria tele o le Pasefika i se faamanatuga fiafia i le Atu Maresala, Aso Gafua 16 Oketopa, 2023.
O le faapaiaga o le Nofoaga Autu fou a le Siteki a Motu Amu o Kwajalenin Maresala i Ebeye o Le Ekalesia a Iesu Keriso o le Au Paia o Aso e Gata Ai, na tuufaatasia ai le silia ma le 500 tagata o le Ekalesia ma uo, o e sa auai ma le fiafia i lenei gaoioiga ua leva ona faatalitali i ai.
O Elder Jeremy R. Jaggi, Fitugafulu o le Pulega Aoao ma le Fesoasoani Lua i le Au Peresitene o le Eria o le Pasefika, sa pulefaamalumalu i le sauniga ma tuuina atu le tatalo o le faapaiaga.
O lenei falelotu fou o le a avea o se nofoaga autu faalelotu ma faalenuu mo le Motu Amu o Kwajalein, o se li‘o faaofuofu o aau amu o loo aofia faatasi i se eria e 1,125 maila faatafafa. O se tasi o ogasami tele i le lalolagi, o le motu amu e aofia ai pe tusa ma le 100 motu laiti e aofia ai se eria o le laueleele e na o le 5.6 maila faatafafa.
Faatasi ai ma Elder Jaggi, sa auai faatasi ai le Peresitene o le Siteki a Kwajalein o James Jelke i le sauniga faapitoa, faatasi ai ma taitai o le Ekalesia ma malo i le lotoifale e aofia ai le Matai silisili o le Laueleele, “Irojlaplap” o Michael Kabua.
Sa saunoa Elder Jaggi e faapea, o le agaga o le lotogatasi ma le faatuatua ia Iesu Keriso sa “mafai ona lagonaina” a o ia taunuu atu i le sauniga o le faapaiaga faatasi ma Matai Kabua. I le mae’a ai o se pese faa-Maresala masani a se aufaipese a tamaitai i le lotoifale, sa ofoina atu ai e Peresitene Jelke se saunoaga faafeiloai amata. Ona saunoa lea o le Matai Sili o Kabua e uiga i lona alofa i le Tama Faalelagi, “ma le olioli e lagonaina e tagata uma pe a faapotopoto faatasi Ana fanau uma.”
I lana saunoaga, na molimau mai ai Elder Jaggi e uiga i “le mana ma le olioli lea e oo mai pe a tatou tapuai faatasi i o tatou falesa.”
“O le laulau o le faamanatuga o le taulaiga autu lea o la tatou tapuaiga, o Iesu Keriso lea,” na saunoa ai Elder Jaggi. “Ou te molimau atu o i latou uma e o mai i lena laulau o le faamanatuga, salamo ma le fiafia, e mafai ona saunia ma maua se pepa faataga o le malumalu e o atu ai i le Maota o le Alii.”
O le malumalu aupito lata ane mo tagata o le Ekalesia i le Atu Maresala e auai ai o loo i ai nei i Laie, Hawaii, ISA. Ua fofogaina mai se malumalu ina ia fausia i se aso i le lumanai i Tarawa, Kiripati, lea o le a avea ma se malaga e sili atu ona latalata mo nei tagata tuuto o le ekalesia, na saunoa ai Elder Jaggi.
O le tatalo o le faapaiaga sa taulai atu ia Iesu Keriso o le faavae o le Talalelei, “O Ia, o le maatulimanu autu o mea uma ua tatou i ai ma faia,” na saunoa ai Elder Jaggi. “Sa faamanuiaina fausaga uma i totonu o le fale ia galulue lelei, ma o tagata e o atu iina o le a fesoasoani e faatumauina ma lagonaina le Agaga o le Alii, o se fuataga faaopoopo o le filemu ma le fiafia.
“Sa faamanuiaina foi tagata, ina ia maua se puipuiga faaopoopo mai mailei a le fili,” sa ia faaauau ai. “Sa faamanuiaina foi i latou ina ia faaauau pea ona avea i latou ma se nuu e lotogatasi i la latou tapuaiga i le Tama Faalelagi ma le Faaola, o Iesu Keriso.”