“O Le Saolotoga e Filifili ai Keriso,” Liahona, Tes. 2024.
Autalavou Matutua
O Le Saolotoga e Filifili ai Keriso
Sa masani ona pei le lotu o se mea na taofia a’u mai le faia o a’u lava filifiliga.
Faamatalaga mai le O Nisi Taimi Latou te O Mai Ai, saunia e Brian Kershisnik, e le mafai ona kopiina
A o ou pepe, sa papatisoina ai au i le Ekalesia Orthodox a Iukureini. A o ou tuputupu ae, o le mea moni e faapea, ou te lei faia lava se filifiliga e papatiso, sa ou le mautonu ai. Sa amata ona ou manatu e le faatagaina e lotu a’u e faaaoga la’u saolotoga e filifili ai mo a’u lava.
O lea na iu ai ina ou le toe talitonu i le Atua po o soo se mea faaleagaga.
I se tasi aso, sa ou talanoa ai i la’u uo o lē sa i Czechia o loo faia se polokalama suesue e fesootai ma Le Ekalesia a Iesu Keriso o le Au Paia o Aso e Gata Ai. Sa ia valaaulia foi a’u e fai le polokalama. Ou te lei fiafia iai i le taimi muamua, ae ina ua mavae sina taimi, sa ou filifili e siaki.
Sa ou fiafia i le savali atoa a le aoga o le lelei, o lea sa ou gauai atu ai ma apalai.
Ae sa leai so’u fiafia i le taulaiga o le polokalama ia Iesu Keriso.
Pe o so’u manatu lea.
Lagonaina o Feeseesea’iga
O lenei aoga na ese ai lo’u ola nai lo le mea sa ou masani ai. Muamua, sa ou iloa ai e le faatagaina au e inu kofe i le lotoa!
Ua uma ona see ese atu lo’u saolotoga i o’u tamatamailima.
Faatasi ai ma lena, o taeao uma lava e amata i se faigalotu e tatau lava ona fai. E tele lava ina ou moe i na mea aua sa ou le fiafia i ai. Sa na ona ou i ai iina e aoao ai ona ou ola ai lea i lo’u olaga i le ala sa ou manao ai.
Ae ina ua mavae sina taimi, sa ou matauina tagata na siomia au o e sa manatu mamafa i aoaoga a Iesu Keriso. I Iukureini, e toatele tagata e na o ni nai taimi i le tausaga e o ai i le lotu, ae o iinei, e talanoa uma lava tagata e uiga ia Keriso. Sa agalelei, lelei, ma i ai lagona lelei i le olaga.
Sa amata ona ou mafaufau pe faape’i lo’u olaga pe afai ou te talitonu foi ia te Ia. O nisi taimi ou te mafaufau ai lava, “Mata o le a se vaaiga a Iesu?”
Pe Moni ea Lenei mea?
Sa ou lagona le le mautonu. Sa ou ta’u atu i se tasi o a’u uo i le aoga o’u lagona le mautonu. Sa ia valaaulia au e taumafai e tatalo e uiga i o’u lagona.
I se tasi taeao puaoa, sa ou filifili ai e saili se nofoaga filemu i fafo e mafaufau loloto ai. Ou te le iloa le mea na oo mai ia te au, ae nai lo le mafaufau loloto, sa ou tuuina atu i le Atua le talitonuga e ui i o’u masalosaloga. Sa ou fai atu, “Ia, ta talanoa.”
Ma sa ou faia le tatalo aupito sili ona umi o lo’u olaga.
Sa na ona ou fia iloa lava pe moni le Atua ma Iesu Keriso.
A o ou tatalo, na susulu mai le la i le puao. Sa ou lagonaina lona mafanafana i lo’u pau ma le mafanafana i lo’u loto. Sa ou lagonaina e pei o loo i ai le lima o se tasi i lo’u tauau, ma fai mai sa Laua i ai moni lava iina faatasi ma au.
Sa manino le savali: E moni i La’ua. Sa La’ua silafiaina a’u.
Sa ou iloaina foi se isi mea.
O le vaai atu ia i latou o e sa ola i le talalelei a Iesu Keriso, ou te lei vaaia ai se tasi o faamalosia e faia mea latou te le mananao e fai pe lagona foi le faatapulaaina e lo latou faatuatua. Sa ou vaai ia i latou o filifili e ola e faapei o Iesu Keriso ona sa latou mananao ai.
I le Tusi a Mamona, ua tuuina mai ai e le perofeta o Moronae lana folafolaga e ala i se valaaulia, ae le o se poloaiga: “Afai tou te ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia” (Moronae 10:4).
Sa ou iloaina sa ou manao e filifili foi o Ia.
Avea ma Soo Lē Atoatoa
Mai lava i lena taimi, sa ou manatu mamafa ai i le aoao e uiga ia Iesu Keriso. Sa ou taliaina lesona faafaifeautalai. Sa ou suesueina le Tusi a Mamona. Sa ou tatalo i aso uma. Na oo lava ina ou papatiso! (O la’u filifiliga la lea i le taimi lenei!) Sa matuai fou lava nei mea ia te au, ae sa ou lagonaina le suia o lo’u loto.
E tele lava mea e tatau ona ou aoaoina, ma ou te matua le atoatoa lava, ae ou te fai ifo ia te au lava, “Sei ta taumafai e faapei o Keriso i le asō. Ia taumafai pea.”
Na aoao mai ma le matagofie Elder Joaquin E. Costa o le Fitugafulu: “E i ai taimi, o le i ai o le faatuatua ia Iesu Keriso e ono foliga mai o se mea e le mafai, toetoe lava a le mafai ona ausia. Atonu tatou te mafaufau faapea o le o mai ia Keriso e manaomia ai se malosi, mana, ma le atoatoa tatou te le o maua, ma ua tatou le mafai lava ona maua le malosi e faia ai. Ae … o le faatuatua ia Iesu Keriso o le mea lea e aumaia ai ia i tatou le malosi e amata ai le malaga.”
E mafai e Iesu Keriso ona suia i tatou pe afai tatou te tuuina atu ia te Ia le avanoa ma taumafai pea. Na te le faatapulaaina lo tatou saolotoga. Nai lo lena, ua Ia ofoina mai ia i tatou nisi mea e ala i Lana Togiola: olioli, faamalologa, ma le faamoemoe.
Ua ia i tatou le saolotoga e filifili ai o Ia i aso uma, ma ou te faafetai mo vavega ua aumaia e la’u filifiliga e mulimuli ia te Ia i lo’u olaga.
O le tusitala e mai Kyiv, Iukureini.