Pagpangita sa Akong Bili

Pahibalo: Kini usa ka tinuod nga kasinatian nga gipakigbahin sa usa nga naluwas gikan sa pang-abuso. Mga ngalan ug impormasyon nga mailhan giusab.

Kini nga sulat orihinal nga gisulat alang sa usa ka pagbansay sa stake aron pagtabang sa mga bishop sa pagtrabaho diha sa mga nabuhi sa sekswal nga pang-abuso. Kini gipakigbahin dinhi nga adunay pagtugot.

Minahal nga mga Bishop,

Gusto kong motabang kaninyo sa pagsabut kon sama kini sa unsa sa usa ka tawo kinsa nagpas-an ug ngil-ad nga sekreto—usa ka sekreto nga nagpabilin sukad sa pagkabata.

Matag usa kaninyo nakakita kanako, ug daghan kaninyo ang nakaila kon kinsa ako. Daghan kaninyo nakatrabaho uban kanako. Gisultihan ako nga sa inyong mga panghunahuna ako usa ka maayo nga pagkapahimutang nga batan-ong babaye. Nakaserbisyo ako og misyon ug nakahupot og mahinungdanong mga calling sa pagpangulo. Bisan pa niana, adunay kabahin kanako, nigamut gikan sa akong kagahapon, nga dili makita sa gawas nga mga panagway—bisan og usahay gibati ko nga ang mga tawo nahibalo sa akong kagahapon. Ang mga tawo sama kanako kasagaran mobati nga sa bisan unsa nga higayon kami “madiskobrehan,”ug niana ang resulta mahimong usa ka ngil-ad nga dungog ug sinalikway.

Wala ako kahibalo pilay akong edad nga kini misugod—ug tingali dili gayud ako makahibalo—apan ako sekswal nga giabuso isip usa ka bata, una sa pipila ka mga lalaki sa kasilinganan ug sa wala madugay sa usa ka magulang nga ig-agaw. Sa matag higayon gibati ko ang pagkawalay bili ug naningkamut sa paghikalimot. Maingon og nagmalampuson ako sa pagtago niadtong mga panumduman ngadto sa mangitngit nga suok sa akong hunahuna hangtud sa akong senyor nga tuig sa high school nga diha ako sa sitwasyon nga nakapahinumdom kanako sa pang-abuso.

Human niana, nahinumduman nako ang pipila ka mga butang gikan sa kagahapon ug gipakigbahin kon unsa ang nahitabo kanako ngadto sa akong labing suod nga higala. Siya ang una ug mao lamang nga tawo nga akong gisaligan sa akong sekreto sa mga katuigan, tungod kay kon ikaw sekswal nga giabuso, sa kanunay imong gihunahuna ang imong kaugalingon nga ngil-ad, hugaw, og may sala. Bation nimo ang lawom nga pagdumot sa kaugalingon. Nagtuo ka nga kon ang mga tawo mahibalo mahitungod niini, makita nila ang kangil-ad ug lahi ang pagtan-aw kanimo.

Sa high school, ug sa daghang mga higayon sukad, miagi ako og mga panahon nga dili ganahan mokaon [anorexia]—usa ka kahimtang nga, akong nahibaloan, sagad sa mga biktima sa sekswal nga abuso. Ang sekswal nga pang-abuso nagrepresentar og pagkawagtang sa kontrol sa usa ka butang nga sagrado ug personal. Gibati ko ang usa ka lawom nga panginahanglan sa pagkontrol sa usa ka butang. Ang pagkontrol sa akong gana sa pagkaon, ako naghunahuna, motabang kanako sa pagbuntog sa akong pagdumot sa kaugalingon. Sa tinuod, kana wala mo-epekto, ug ang sitwasyon nahimo lamang nga mas migrabe tungod kay ang sundanan sa pagpagutom mibuhagay nga dili kapugngan. Ako dihay lain nga mga katarungan sa pagsagop niini nga dili matarung nga kinaiya sa pagkaon. Atol sa ikaduhang panahon sa pang-abuso, ang akong tig-abuso misulti og mga butang mahitungod sa akong lawas nga dili mao ang iyang gusto. Kini nakapaanad kanako sa pagbati og kangil-ad mahitungod sa akong hitsura.

Nahadlok usab ako nga ang mga tawo makaila kon unsa ang nahitabo kanako. Busa ang pakig-date malisud alang kanako. Sa mga relasyon ako adunay kalagmitan nga mahimong sama sa usa ka tinggalong [chameleon] ug mipahiangay ngadto sa mga gusto ug dili gusto ni bisan kinsa nga akong gika-date. Ang positibo nga paglaban malisud alang kanako sa paghimo. Kini sagad sa mga biktima.

Sa akong tibuok nga kinabuhi ako nakigbisog sa akong ngil-ad nga sekreto. Kini malisud ang pag-ila sa akong pagkawalay sala diha sa atubangan sa Dios ug sa pagbulag niana gikan sa unsa gyud ang sayop—ang panglugos kanako sa akong tig-abuso. Kini mihimo sa tanan nga mas malisud tungod sa kamatuoran nga ako gihilabtan, inosente ako nga bata ug wala makasabut nga ako dili makahimo sa pagtugot sa gibuhat. Nganong wala nako hunonga ang pang-abuso? Nganong akong gitugutan kini sa pagpadayon? Nganong kini kinahanglan nga mahitabo? Samtang ako nagkadako, akong gihulagway ang ang-ang sa pagtubo sa akong pagsabut sa akong kaugalingon isip usa ka gamay nga batang babaye. Gibati ko ang nagkadugang nga sala samtang masalaypon kong gihulagway ang akong kapasidad sa pagpili sa nanglabay nga panahon og mas maayo sa matag nanglabay nga tuig. Ang ingon nga paghunahuna sagad. Kini wala gayud makatabang nga kadaghanan kanamo, tungod kay among gibati ang ka ngil-ad mahitungod sa among mga kaugalingon, nadani ngadto sa mga lalaki kinsa milig-on sa among negatibo nga mga paghulagway pinaagi sa pagtagad kanamo isip mga butang ug dili isip mga anak nga babaye sa Dios. Kadaghanan sa among pagdumot sa kaugalingon nagagikan niini nga sundanan sa panghunahuna ug panglihok.

Ang akong sekswal nga pang-abuso nakahimo usab og makalilisang nga mga damgo. Sulod sa mga katuigan dihay mga yugto sa panahon nga kining ngil-ad nga mga damgo misamok kanako. Nakakat-on ako sa pagmatngon mahitungod sa unsay isulod nako sa akong hunahuna aron si Satanas walay daghang materyal nga makuha sa pagmugna niining ngil-ad nga mga damgo.

Kining ngil-ad nga mga damgo migiya kanako sa pakighisgot sa akong sekswal nga pang-abuso ngadto sa akong bishop. Ang mga paghisgot nakatabang. Kini migiya sa akong bishop sa pagdapit kanako sa pag-apil sa usa ka grupo sa LDS Family Services. Ang untop nga panahon ug palibut mao gayud ang unsay akong gikinahanglan.

Mapasalamaton ako nga ang akong Langitnong Amahan mitudlo kanako sa akong bili ug mapailubon kanako sa mga panahon nga ako wala mohilak ngadto Kaniya sa akong labing mamingaw nga mga adlaw. Ang pag-ampo sa kasagaran malisud alang sa mga biktima sa sekswal nga pang-abuso. Ang pagsalig makuha sa dakong kalisud—bisan ang pagsaslig diha sa Dios, ug usahay ilabi na ang pagsalig diha sa Dios.

Sa panahon nga ako gihilabtan isip usa ka bata, kini mipasipala sa akong dala sa pagkatawo nga pagbati og kahilwasan ug sa akong pagtuo diha sa mapanalipdanong kamot sa Dios. Kini nga paagi sa pag-ampo uban sa paningkamot ug katuyoan gidasig sa usa ka desisyon sa pamasin ug pagsalig, usa ka paningkamot sa pag-ugmad og pagpaubos, ug nagtubo nga pagsabut nga ang Dios nahigugma kanako ug gusto kanako nga malipay. Mga panglantaw nga akong naangkon gikan sa akong misyon, diin nakakat-on ako sa pag-ampo uban sa hugot nga pagtuo, mga importante sa akong pagkaayo. Ang pag-apil sa grupo sa LDS Family Services nga magtambag importante usab sa akong proseso sa pagkaayo.

Ako kinahanglan nga makakat-on nga ang Ginoo makatabang kanako nga mamaayo. Ang mga samad sa sekswal nga abuso lawom. Ang pagtrabaho uban sa akong bishop ug sa grupo sa LDS Family Services nakatabang kanako sa pag-abli, paglimpyo, ug sa pagtambal sa akong mga samad. Ako nagkaayo. Ako nagduda nga adunay magpadayon nga mga higayon nga ang akong mga samad mosakit, apan adunay mas maayo pa kay sa naandan. Mapasalamaton ako.

Mga bishop, hibaloi nga kamo mga ehemplo kon giunsa ninyo pagtagad niadtong naglibut kaninyo ug ang matang sa respeto nga inyong gipakita sa mga babaye. Ang pagkakita og matarung nga mga lalaki diha sa ebanghelyo naghatag kanato og paglaum nga adunay mga lalaki niini nga kalibutan kinsa masaligan. Usa sa labing dako nga mga tabang alang kanato mao ang pagdasig sa pagpangita sa atong indibidwal nga bili. Tanan kita adunay gasa sa pagkaanak sa Dios ug mga indibidwal nga may kaugalingon nga bili. Kini usa ka bahandi kon atong mahibaloan nga kita adunay bili ug kon atong madumduman ang dalan ngadto sa Manluluwas, kinsa nanghimatuod sa atong bili pinaagi sa Iyang sakripisyo. Magsugod kita sa pagsabut kon giunsa Niya pagdala ang atong mga kagul-anan ug mga kasakit.

Nakakaplag ako og dakong kalig-on diha sa Manluluwas. Nahibalo ako nga Siya nahigugma kanako ug nagpakabana kanako. Nahibaloan ko usab kon sa unsa nga paagi ako Iyang matabangan kon dawaton ko Siya sulod sa akong kasingkasing. Mas lig-on ako nga tawo tungod niini nga kahibalo. Ako aduna pay daghan nga mga pagabuhaton.

Uban kaninyo ang akong mga pag-ampo buotan nga mga bishop. Nagpas-an kamo og bug-at nga dala, apan nahibalo ako nga ang Ginoo nagauban kaninyo ug naglig-on kaninyo. Salamat sa pagkaana sa kahimtang diin ang Ginoo makapangayo sa inyong panabang. Hinaut nga ang Ginoo mopanalangin kaninyo sa tanan ninyong gibuhat.

Kanimo matinud-anon,

Imong sister

Kon ikaw o usa ka tawo nga imong nailhan nga giabuso, pangayo dayon og tabang gikan sa sibil nga mga awtoridad, mga serbisyo sa pagpanalipod sa bata, o serbisyo sa pagpanalipod sa hamtong. Mahimo usab ikaw nga mangayo og tabang gikan sa usa ka tigtabang og biktima o magpakitambag o sa medikal nga propesyonal. Kini nga mga serbisyo makatabang og panalipod kanimo ug makapugong og dugang nga abuso. Tan-awa ang “In Crisis” nga pahina alang sa dugang nga impormasyon.