May Paglaum Ako

Pahibalo: Usa kini ka tinuod nga kasinatian nga gipaambit sa tawo nga naluwas gikan sa pang-abuso. Ang mga ngalan ug timailhang impormasyon giilisan.

Sa batan-on pa ko, pisikal ko nga giamong-amongan ug giabuso sa usa ka higala sa pamilya. Tawo siya nga kaniadto akong girespeto ug gisaligan. Tanan nga akong gituohan nga nahibaloan nako kabahin sa kinabuhi nausab.

Nagtubo ko nga gitudloang magmalipayon kon kauban ko sa ubang mga tawo. Kadto ang paagi kon giunsa nako pagsagubang ang matag pagsulay sa akong kinabuhi, ug human niana nga pagpang-among-among padayon kong nagpakaaron ingnong malipayon kon kauban ko sa ubang mga tawo. Para sa mga tawo sa akong palibut, malampuson ko nga tan-awon. Padayon nga dagko ang akong mga grado ug miapil sa usa ka koponan sa isports [sports team] matag human sa klase, ug sa uban usab nga extracurricular nga mga kalihokan. Aktibo ko sa akong ward ug mga kalihokan sa kabatan-onan. Dili ko gusto nga naay bisan usa nga mahibalo unsay nahitabo, mao nga gibuhat nako ang tanan aron normal ko nga tan-awon.

Apan bisan giunsa nako sa pagpaningkamot, dili nako matago kon unsay nahitabo. Bisan pa sa akong panagway, nagsagubang ko og depresyon, kabalaka, ug truma [post-traumatic stress disorder]. Pugngan nako ang si bisan kinsa nga mohikap nako—bisan ang akong mga ginikanan, mga igsoong lalaki, ug mga igsoong babaye. Sa adlaw, mosantop sa akong panumduman ang pagpang-among-among; sa gabii, mobalik-balik kini diha sa akong mga damgo. Gani ang kaniadto nga makahupay nga buhat sa pag-ampo daw huyang na kaayo ug kasagaran mosangput sa pagkataranta.

Ang tig-among-among mihulga nga iya kong patyon, ug adunay daghang higayon nga maghunahuna ko nga mas maayo pa kon gituman na lang niya ang iyang mga pulong.

Sa paningkamot nga makakontrol ug makakuha og temporaryo nga kahupayan sa emosyonal nga sakit, pasakitan nako og tuyo ang akong kaugalingon isip usa ka paagi nga makapahungaw sa akong gibati. Napuno ko sa grabe nga kaulaw ug pagtamay sa kaugalingon kabahin sa unsay gibuhat sa akong lawas nga daw dili na igsapayan kon unsa ang mahitabo niini. Nanlimbasug ko sa pagtuo nga naa pa koy bili. Kay lisud man ipahimulag ang unsay gihimo diri kanako gikan sa kon kinsa ako, mibati ko nga hugaw kaayo. Unsaon man sa Dios sa paghigugma nako sa tinud-anay? Wala ko makasabut kon unsay kahulugan sa sakripisyo sa Manluluwas alang kanako, ug mibati ko nga dili na gayud maulian. Kining sayop, dili maayo nga pagtuo misangput sa akong kakulang og pagsalig sa Langitnong Amahan ug mipugong nako sa tinud-anay nga pagpakig-istorya Kaniya.

Atol niini nga higayon, nangita ko og tabang sa usa ka lisensyado nga therapist ug psychiatrist. Nasayud ko nga nanginahanglan ko og tabang ug napanalanginan ko og mga ginikanan kinsa midala nako aron makigkita sa usa ka therapist. Ang proseso sa pagkaayo gikan sa truma taas ug sakit kaayo, apan samtang ako siyang gitugutan, gitabangan ko niya nga makat-on unsaon sa pag-atubang sa akong truma sa usa ka maayo nga paagi, gipulihan ang makadaut nga mga pamaagi nga akong gigamit. Pinaagi sa therapy nakaamgo ko kon sa unsang paagi nga ang dili maayo nga mga sundanan sa panghunahuna nga akong napalambo human sa pagpang-among-among nakaapekto sa akong kinabuhi.

Nakaamgo ko nga gipalayo usab nako ang akong kaugalingon sa Dios. Oo, mihimo ko sa kaugalingong pagpili nga mopadayon sa pag-adto sa simbahan. Oo, nakahibalo ko nga ganahan ko—ug nagkinahanglan—sa ebanghelyo sa akong kinabuhi, apan ang akong pagpamatuod dili kaayo lig-on aron mabatukan ang akong pagduhaduha sa kaugalingon. Kini nga mga pagtuo maoy pinakalisud nga butang nga akong giatubang ug sa pagkab-ot og kalampusan atol sa pagpa-therapy.

Pipila ka tuig human ko gilugos, nagsugod ko sa pag-eskwela sa kolehiyo. Kining bag-o nga yugto sa akong kinabuhi miabut uban ang hagit gikan sa akong bishop nga mas palamboon pa gayud ang akong relasyon sa Langitnong Amahan. Dili pa kaayo ko sigurado kon mahimo ba nako kini, o kon angayan ba kaha ko sa unsay gisulti kanako nga Iyang gitanyag, apan determinado ko nga mosulay.

Ang kasulatan diha sa Alma 32:27 nahimong suporta kanako: “Apan tan-awa, kon kamo mopukaw ug modasig sa inyong mga galamhan, bisan ngadto sa pagsulay sa akong mga pulong, ug pagbansay sa usa ka tipik sa hugot nga pagtuo, oo, bisan kamo kutob ra sa pagtinguha sa pagtuo, tugoti kini nga tinguha nga molihok diha kaninyo, gani hangtud kamo motuo sa paagi nga kamo makahatag og luna alang sa usa ka bahin sa akong mga pulong.” Ug nakabaton ko og tinguha nga mas mopaduol sa akong Langitnong Amahan.

Nakahibalo ko nga aduna akoy daghang buluhaton, ug gusto ko nga masayud kon asa magsugod. Nianang higayona, ang pinakalig-on nga bahin sa akong pagpamatuod nakasentro sa Pagpahiuli. Nakahibalo ko nga si Joseph Smith nakadawat og tubag sa iyang pangutana, mao nga nakadesisyon ko nga mangutana sa Langitnong Amahan unsaon nako nga mas mapaduol ngadto Niya.

Ang tubag miabut diha sa hilum nga hunahuna, “Pagkat-on kon kinsa Ako.”

Misunod ko niini nga direksyon pinaagi sa pagbutang sa akong kaugalingon sa mga sitwasyon diin makakat-on ko sa ebanghelyo. Nagsugod ko sa pagkaamgo nga ang Langitnong Amahan kanunay nga naa diha naghulat nako nga maandam ang akong kaugalingon sa emosyonal ug espirituhanong paagi aron sa pagdawat Kaniya. Ang pagtangtang sa emosyonal ug espirituhanong mga babag nga akong gihimo sa milabay nga pipila ka tuig usa ka hinay, apan kanunay, nga proseso. Atol niini nga mga higayon, ang akong mga pag-ampo kanunay nga parehas sa pangamuyo sa usa ka amahan ngadto sa Manluluwas alang sa iyang anak, “[Ginoo], nagatoo ako; tabangi ang pagtoo ko nga nakulangan” (Marcos 9:24). Samtang nakat-on ko og dugang sa ebanghelyo, milambo ang akong pagpamatuod ug dili na kaayo kulang ang akong paghangop sa gugma sa Langitnong Amahan.

Kaniadto malingaw ko kanunay nga magkat-on, apan sa unang higayon sa akong kinabuhi nahigugma ko sa pagtuon sa ebanghelyo. Samtang nadugangan ang akong pagkat-on, mas mituo na ko ug mas nadugangan ang akong tinguha nga makahibalo. Nagsugod ko og kakita og mga kausaban sa akong kinabuhi, ug ang epekto sa pag-among-among nagkakunhod.

Padayon kong nakigkita sa therapist kon gikinahanglan. Kana nga propesyonal nga tabang nahimong importante nga bahin sa pagkaayo gikan sa akong sekswal nga truma. Nakat-on ko unsaon sa pag-ila sa akong mga emosyon ug sa pagdumala sa akong mga hunahuna ug mga linihokan. Ang mga kahanas sa pagsagubang nga akong nakat-unan sa therapy nakaluwas sa akong kinabuhi sobra sa usa ka higayon. Ang pag-focus sa akong espirituhanon nga paglambo ug sikolohikal nga kahimsog [psychological health] mao gayud ang akong gikinahanglan aron matabangan ako nga molambo.

Sa kanunay babaye ako nga nalugos, apan kana nga panghitabo wala makaapekto kon kinsa ako isip anak nga babaye sa Dios. Ang mga pagbati sa pagkaguba, kahugaw, o kadili maayo mosantop gihapon sa akong hunahuna, apan karon makahinumdom na ko sa mahangturong mga kamatuoran aron sa pagpakigbatok niini. Sa matag lakang nga akong gihimo, mas mituo na ako niana nga mga kamatuoran.

Nakat-unan nako ang kabahin sa kamahinungdanon sa Pag-ula ni Kristo ug sa Iyang gahum, dili lamang sa pagtubos nato gikan sa atong mga sala, apan sa pagbalaan nato ug sa paghatag nato og katakus aron makab-ot ang atong balaanong potensyal. Mituo ako sa gahum sa pag-usab nga moabut pinaagi sa Manluluwas ug sa Iyang Pag-ula. Karon mituo ako sa akong bili isip usa ka anak nga babaye sa Langitnong Amahan, ug nakahibalo na ko karon nga ang akong Amahan ug ang akong Manluluwas nahigugma gayud diay kanako labaw pa kay sa akong masabtan.

Labaw sa tanan, nakat-on ko kabahin sa kinaiyahan sa Langitnong Amahan ug ni Jesukristo. Pinaagi sa pagsunod sa pag-aghat nga magkat-on og dugang kabahin sa kon si kinsa gayud Sila, napakitaan ko nga ako makasalig Nila sa hingpit ug kon sa unsang paagi kana nga pagsalig ug pagtuo mapakita ngadto sa buhat.

Kaniadto mobati ko og tumang kangitngit. Apan ang pagpili aron sa pagsunod sa ebanghelyo ni Jesukristo nagdala sa Iyang walay ikatandi nga kahayag sa akong kinabuhi. Karon, samtang naglantaw ko sa unahan, naa koy paglaum.

Kon ikaw o ang usa ka tawo nga imong nailhan giabuso, pangayo dayon og tabang gikan sa sibil nga mga awtoridad, mga serbisyo sa pagpanalipod sa bata, o mga serbisyo sa pagpanalipod sa hamtong. Mahimo usab ka nga mangayo og tabang gikan sa usa ka tigtambag og biktima o magpakitambag o sa medikal nga propesyonal. Kini nga mga serbisyo makatabang sa pagpanalipod kanimo ug pagpugong sa dugang nga pag-abuso. Tan-awa ang “In Crisis” nga page alang sa dugang nga impormasyon.