Usa ka Adlaw Matag Higayon

Pahibalo: Kini usa ka tinuod nga kasinatian nga gipakigbahin sa usa nga naluwas gikan sa pang-abuso. Mga ngalan ug mailhan nga impormasyon giilisan.

Dili ako makahinumdom sa eksakto nga edad sa dihang ang pang-abuso misugod sa pagkahitabo. Ang akong igsoong lalaki, kinsa mga nwebe anyos ang pagkamagulang kanako, misugod sa paghilabut kanako. Usahay ang pang-abuso nahitabo sa panahon sa adlaw nga wala ang akong mga ginikanan ug siya nagbantay sa bata. Usa ka higayon gipatingog niya ang iyang radyo—mahinumdom pa ako sa awit nga gitukar. Maglagot ako niana nga awit.

Sa dihang ako otso anyos na ang panuigon, ang akong papa unta mobunyag kanako. Nahitabo nga siya dili makaanha sa gi-iskedyul nga petsa ug ang akong mama dili gusto nga usbon ang petsa sa akong bunyag, busa siya misugyot nga ang akong magulang nga lalaki ang mobunyag kanako. Wala ako mahibalo kon unsa ang akong isulti, busa mitugot ako kaniya. Human niana, nagduhaduha ako sa akong bunyag sa dugay nga panahon.

Ang akong laing tig-abuso mao ang akong ig-agaw. Misugod siya sa pag-abuso kanako sa dihang ang iyang pamilya mibisita kanamo sulod sa duha ka semana. Pito o otso anyos ako. Gikasilagan ko kining tanan.

Mga duha ka tuig human niana, ang pamilya sa akong ig-agaw mipuyo duol sa akong pamilya. Mobisita kami nila kada katapusan sa semana ug atol sa ting-init mopabilin kami usahay og mga semana. Mipadayon ang pagpang-abuso. Maninguha siya sa pagkuha kanako nga mag-inusara. Gibati ko ang kalagot ug kahugaw ug kawalay mahimo.

Sa edad nga 12 nakigsulti ako sa akong bishop mahitungod sa pagkuha og temple recommend aron sa paghimo og mga bunyag sa patay. Sa dihang ang bishop nangutana og usa sa mga pangutana sa rekomen interbyu, misugod ako sa paghilak. Nahibalo siya kon unsay gipasabut niana. Ang napangutana ra niya mao ang, “Kinsa?” Gi-report ko ra ang akong ig-agaw. Ang akong igsoong lalaki hapit na mopauli gikan sa iyang misyon, busa ako walay gisulti bisan unsa mahitungod kaniya. Nakigbisog ako niana nga desisyon kadaghanan sa akong kinabuhi.

Misugod ako sa pag-inom og bino sa ikawalo o ikasiyam nga grado. Sa mga tuig sa akong pagkatin-edyer nagpagamit ako sa sekswal nga paagi sa daghang mga boyfriend. Diha akoy “bahala na” nga kinaiya ug gihimo ang bisan unsa nga gipabuhat kanako. Human sa high school nakigpuyo ako sa akong boyfriend sulod sa mga hapit usa ka tuig hangtud nagbulag kami.

Usa ka maayong higala mitabang kanako sa paghunahuna mahitungod sa unsay gusto kong buhaton sa akong kinabuhi. Misugod ako sa pagbalik og simba ug giayo ang akong kinabuhi. Sa kadugayan naminyo ako sa usa ka buotan kaayo nga lalaki. Sa dihang naminyo na kami sulod sa 13 ka tuig, gisultihan ko siya mahitungod sa pang-abuso. Gigakos lamang niya ako ug wala buhii. Gitabangan niya ako ngadto sa pagpakitambag, ug dayon misugod ako sa pagtambong og grupo nga therapy. Gibati ko ang kasubo sulod sa mga bulan human masultihan ang akong bana mahitungod sa pang-abuso, apan human sa pag-apil sa indibidwal ug grupo nga pagpakitambag, mas maayo kaayo ang akong gibati.

Nasinati ko ang daghang epekto gikan sa pang-abuso. Hilabihan nako ka mapanalipdanon nga inahan. Dili ako dali nga mosalig og tawo. Maglisud ako paghimo og mga desisyon sa akong kaugalingon.

Sa pipila ka mga paagi nagamit nako unsa ang akong nakat-unan nga mahimong usa ka mas maayo nga ginikanan. Ang akong bana ug ako nagtudlo sa among mga anak mahitungod sa hustong pagpahikap. Kami adunay prangka nga panagsultihay sa mga butang nga importante kaayo ug gisultihan namo ang among mga anak nga sila makasulti kanamo mahitungod sa bisan unsa.

Sa gihapon ako adunay bati nga mga adlaw, apan nakakat-on ako sa pagdawat sa mga butang usa ka adlaw matag higayon. Ang bati nga mga adlaw dili na kaayo mahitabo karon. Ako adunay paglaum alang sa umaabut.

Kon ikaw o usa ka tawo nga imong nailhan nga giabuso, pangayo dayon og tabang gikan sa sibil nga mga awtoridad, mga serbisyo sa pagpanalipod sa bata, o mga serbisyo sa pagpanalipod sa hamtong. Mahimo usab ikaw mga mangayo og tabang gikan sa usa ka tigtambag og biktima o magpakitambag o sa medikal nga propesyonal. Kini nga mga serbisyo makatabang og panalipod kanimo ug makapugong og dugang nga abuso. Tan-awa ang “In Crisis” nga pahina alang sa dugang nga impormasyon.