Akong Panaw

Pahibalo: Kini usa ka tinuod nga kasinatian nga gipakigbahin sa usa nga naluwas gikan sa pang-abuso. Ang mga ngalan ug mailhan nga mga impormasyon giilisan.

Gibalik-balikan ako og sekswal nga pang-abuso sugod sa dihang ako 6 hangtud tingali ako 14 sa usa ka ig-agaw kinsa napulo ka tuig ang pagkamagulang kanako. Suod ako kaayo niini nga ig-agaw ug sa iyang pamilya. Kanunay akong anaa sa ilang panimalay. Gihigugma ko sila labaw sa mga pulong nga akong masulti. Ingon nga sagad sa mga hitabo sa sekswal nga pang-abuso sa usa ka bata, ang akong batan-ong hunahuna wala kaayo makasabut sa epekto sa pang-abuso hangtud ako miabut og edad nga makasabut—sa akong sitwasyon, kini mga 16 anyos ang panuigon. Kay sa makasabut nga ang pang-abuso dili akong sayop (unsaon niini paghimo … usa ka 6 anyos ang panuigon nga batang lalaki dili gyud makahibalo o makasinati sa mga butang nga ako gitudloan ug kanang gibuhat ngari kanako), akong gisilsil og maayo sa akong hunahuna ang pang-abuso ug gibasol ko ang akong kaugalingon. Ang akong mga pagbati sa sala ug kalagot sa akong kaugalingon hilabihan kaayo! Ang bugtong paagi nga ako maka-eskapo sa kasilag sa kaugalingon mao ang pagpangita og paagi nga mitugot kanako sa pagbati nga mas makapugong sa akong kinabuhi (bisan tuod og ako dili makahimo). Isip usa ka tin-edyer, kini nga “pagpugong” nagpakita og matang sa mga abnormal nga pagkaon—anorexia nervosa ug bulimia.

Nag-anam ako og kadaot sa pisikal ug emosyonal nga paagi. Ako miabut sa “labing ubos” nga mga 100 ka libra ang timbang ug diha na sa ngilit sa panginahanglan nga ma-ospital—ang akong kasingkasing ug ang mga sulod nga bahin sa lawas nagsugod sa pagkaluya. Agi og resulta, diha ako sa panimalay pa-eskwelaha sa tabang sa matinabangong mga magtutudlo. Ang akong medikal nga doktor naninguha sa pagtabang nga moabut ako sa mas mahimsog nga timbang ug usab gipatan-aw ako sa usa ka sikolohista [psychologist]. Maayo siya nga tawo kinsa mitabang kanako og dako kaayo! Sa panahon sa among mga sesyon sa pagtambag, misugod ako sa pagbatok sa pang-abuso nga nahitabo ug sa mga pagbati sa kalibug ug sakit nga nagpabilin sulod kanako. Ang akong taas nga dalan sa pagkaayo misugod.

Human sa pipila ka bulan, sa katapusan mihimo ako og desisyon nga ang mga butang dili na mahimong “itago” sulod sa among pamilya—usa ka butang nga sama niini kinahanglan nga dili itago, ibalewala, o ihilum imbis hatagan og pagtagad. Nahadlok ako nga buhaton sa akong ig-agaw ang sama nga butang ngadto sa gagmay nga mga batang lalaki ug ako usab nahibalo nga siya nalunod sa pornograpiya sa bata. Nahibalo ako sa lawom nga uwat nga nahimo sa pang-abuso kanako, ug dili ako gusto nga ang ubang gagmay nga batang mga lalaki mag-antus tungod kay ako walay kaisug sa pagsulti kon unsa ang nahitabo. Busa akong gi-report ang pang-abuso.

Sa kaalaot, ang pagreport mihimo og mga problema sa akong pamilya, nga nakahimo gani og mas bug-at nga mga pagbati sa sala alang kanako. Sa dihang ang balita unang mikaylap nga ang akong ig-agaw sekswal nga miabuso kanako, mga sakop sa pamilya mipakigbahin nga sila dili buot nga “mopakita og pagdapig.” Bisan pa niana, wala gayud ako maghunahuna nga adunay “pagdapig” nga himoon. Dili ako gusto ni bisan kinsa nga mosalikway sa akong ig-agaw o dili moangkon kaniya. Ang mao lamang butang nga akong gusto mao ang pag-ila sa unsay nahitabo, nga kini makalilisang nga butang nga giagian alang kanako isip usa ka bata, ug nga ang akong ig-agaw kinahanglan nga moatubang sa mga sangputanan ug sa pagkamay tulubagon alang sa mga pagpili nga iyang gihimo—ug diha sa proseso makadawat og tabang ug suporta nga iyang gikinahanglan. Sa katapusan alang kanako, pinaagi sa pagtambag ug sa suporta sa akong bishop, akong napasaylo ang akong ig-agaw ug kadtong sa akong pamilya kinsa wala mosuporta kanako—dili na kini akong palas-anon nga pagapas-anon. Adunay Usa nga mas dako kay kanako kinsa mibayad sa presyo nga aron ako dili kinahanglan nga mopas-an niana nga palas-anon; unsa ka mapasalamaton ako alang sa akong Manluluwas.

Alang ni bisan kinsa nga nasamdan, naghangyo ako kaninyo palihug ayaw pagbiya. Ayaw pagpakawala og paglaum. Ayaw paghunong sa pagpadayon. Ang pagkaayo dili mahitabo og usa ka gabii. Usahay ang hingpit nga pagkaayo mahimong dili gani moabut niini nga kinabuhi, apan ang agianan nga atong gilaktan wala gayud nagpasabut nga hingpit pagkatul-id ug pagkahapsay. Kanunay adunay mga problema ug mga aksidente, mga kalipay ug mga kaguol, mga kausaban sa direksyon ug mga kahimtang. Ato ang oportunidad sa pagpunting sa atong mga panan-aw ngadto sa umaabut ug sa pagpadayon sa paglakaw, bisan og usa lamang ka lakang matag higayon (bisan og adunay mga lakang nga paatras karon ug unya). Bisan og ang akong sekswal nga pang-abuso natapos na sa daghang mga tuig nga milabay, ug dugay kaayo akong naningkamot sa pagkaayo, sa gihapon ako usahay mahigmata sa nagbalik-balik nga ngil-ad nga damgo sa akong pagkanaabuso.

Kini ba naghimo kanako nga malaglag sa hangtud? Dili gayud. Mga uwat mahimong sa kanunay magpabilin gikan sa mga samad sa kaghapon, apan wala kini maghulagway kanako. Nasamdan? Oo. Nalaglag? Wala. Isip usa ka hamtong kinsa sa dakong bahin naayo, nakat-unan ko ang paghupay nianang nasamdan nga bata nga sa gihapon buhi sulod kanako. Nagpadulong balik sa pagkatulog human sa usa niadtong ngil-ad nga mga damgo uban sa mga pulong nga makahupay nga mituhop lapas sa panimuot sa usa ka nahadlok nga gamay nga batang lalaki: “Kini dili imong sayop. Dili ikaw ang mabasol. Ayaw dad-a ang gibug-aton niini nga sakit diha sa imong kaugalingon.” Nagtuo ako niadto nga mga pulong ug nag-awhag ni bisan kinsa nga nasamdam sa paghinumdom, kini dili imong sayop! Ikaw gihigugma. Wala ka malaglag. Uban sa panahon, ang tanan nga mga samad maayo ug ang tanang mga sayop mahimong matarung tungod “kaniya kinsa gamhanan sa pagluwas” (2 Nephi 31:19).

Kon ikaw o usa ka tawo nga imong nailhan giabuso, pangayo dayon og tabang gikan sa sibil nga mga awtoridad , mga serbisyo sa pagpanalipod og bata, o mga serbisyo sa pagpanalipod sa hamtong. Mahimo usab ikaw nga mangayo og tabang gikan sa usa ka tigtabang og biktima o magpakitambag o sa medikal nga propesyonal. Kini nga mga serbisyo makatabang sa pagpanalipod kanimo ug makapugong og dugang nga pang-abuso. Tan-awa ang “In Crisis” nga pahina alang sa dugang nga impormasyon.