Nakakaplag og mga Gagmay nga Kahayag

Pahibalo: Kini usa ka tinuod nga kasinatian nga gipakigbahin sa usa nga naluwas gikan sa pang-abuso. Ang mga ngalan ug mailhan nga impormasyon giusab.

Ang akong kaminyoon ingon og misugod nga maayo. Nahigugma ako ug malipayon ako. Apan human sa mubo nga panahon, ang pisikal, emosyonal, ug sinultihan nga pang-abuso misugod. Nagkinahanglan ako nga maka-eskapo aron ang akong kaugalingon ug mga anak luwas. Ang akong kakulang og kahibalo kon unsaon pagmugna og bag-ong kaugmaon alang sa akong pamilya ug ang akong kahadlok nagpalayo kanako gikan sa pagkuha og tabang. Apan human sa siyam ka tuig, nakahunahuna ako kon unsaon sa paggawas.

Giunsa nako pagbiya human sa siyam ka tuig nga pagpuyo niana nga pang-abuso? Unsa ang akong gihimo? Sa katapusan mihunong ako sa pagpaminaw ngadto sa tingog sa kaaway nga nagsulti kanako nga walay paagi sa pag-eskapo. Hinoon, nangita ako og mga gagmay nga kahayag nga gibutang sa akong Langitnong Amahan isip giya sa pagbiya sa madagmalon nga kaminyoon. Kini ang pagkat-on kon unsaon pag-ampo ug pagsunod sa Iyang direksyon sa pagpangita niadtong mga gagmay nga kahayag:

1. Misunod ako sa akong mga pakigsaad, mibayad sa akong ikapulo, ug mikat-on kon unsaon sa pagsunod sa mga pag-aghat sa Espiritu—kadto nga mga lihok mipabilin kanako nga nakaangkla sa hugot nga pagtuo diha sa akong Langitnong Amahan.

2. Nakigtambayayong ako sa akong bishop ug nakaangkon og kalig-on sa pagdawat og personal nga pagpadayag. Pinaagi niana nga kalig-on nahibalo ako sa untop nga panahon kon kanus-a mobiya.

3. Naangkon nako ang panan-aw ug tubag nga ako dili makatabang, makaayo, o makagiya sa akong bana ngadto sa kahayag. Anaa siya sa mga kamot sa Langitnong Amahan—kinahanglan nakong buhian!

4. Naangkon ko ang pinansyal nga kagawasan pinaagi sa pagkuha og pagbansay ug pagkamagtutudlo (apan mikabat kini og lima ka tuig sa akong kaminyoon nga makab-ut kana nga dapit).

5. Mga sitwasyon migiya kanako ngadto sa pulis kinsa mihatag kanako og impormasyon sa sentro sa kapiut [crisis center].

6. Ang sentro sa kapiut mitabang kanako sa pagkuha og temporaryong mando sa panalipod.

7. Gihatagan ako sa korte og permanenting mando sa panalipod, dayon diborsyo og hingpit nga pagbaton sa among mga anak.

Dihay mental ug emosyonal nga mga problema samtang ako nagpaayo; kini nahitabo atol sa akong makahahadlok nga mga damgo. Ang kaaway mosulti kanako og mga bakak, sama sa, “Nasobrahan ka ra: nasobrahan og trabaho, daghan kaayo og mga anak, daghan kaayo og mga problema. Kinsa ang magkagusto kanimo kon ikaw mobiya? Daghan kaayo ka og atubangon. Luya kaayo ka nga motabang sa imong bana.” Mipukpok ang kaaway og ngil-ad nga mga hunahuna sa bili sa akong kaugalingon, naninguha sa pagpatuo kanako nga ako walay bili. Ang mga butang nga nagsigi og balik-balik sa akong ulo maayo kay wala magpabilin og dugay.

Ngano? Tungod sa tumang gidaghanon sa trabaho nga akong gibuhat: inahan ako sa lima ka bata, tulo kinsa adunay autism. Ako misunod sa akong mga pakigsaad. Nagtudlo ako sa ikalimang ang-ang sa mga bata nga adunay autism, nagkuha ko sa akong sertipiko sa pagtudlo, ug nagtuon ako sa akong master’s degree sa pagtudlo og mga bata nga adunay linain nga panginahanglan [special education] tanan kini gidungan. Samtang ako nagtutok sa akong trabaho sa akong pagpamatuod, ug sa akong kinabuhi, nakaangkon ako og panan-aw ug ebidensya sa akong mga panalangin. Kana nga ebidensya mipahilum sa tingog sa kaaway.

Nakaangkon usab ako og panan-aw ug paglaum nga ang komunikasyon, mga pakighigalaay, ug gugma mahimong mapalambo. Ako nag-obserbar, nagrekord sa akong journal, ug unya gibasa ug gibasa og balik-balik aron sa pagpangita og mga sundanan, mga suporta, mga han-ay, mga pakighigalaay, ug mga kalisud nga mahimong mahitabo ni bisan kinsa kanato.

Samtang ako nagkat-on sa pagbati og gugma pag-usab, nakakat-on ako og duha ka gamhanan nga mga punto: (1) ang gugma sa Langitnong Amahan alang sa tanan Niyang mga anak hingpit ug (2) tungod niana nga gugma, ang Langitnong Amahan dili manghilabut sa kabubut-on sa Iyang mga anak. Pinaagi sa atong kabubut-on makapili kita og kahayag o kangitngit, gugma o gubat. Kita makapamati sa mga pag-aghat sa Espiritu. Kita makabaton og paglaum! Ug sa katapusan, atong makaplagan ang mga gagmay nga kahayag aron sa paggiya kanato sa paggawas sa kahiladman sa pang-abuso.

Kon ikaw o usa ka tawo nga imong nailhan nga giabuso, pangayo dayon og tabang gikan sa sibil nga mga awtoridad, mga serbisyo sa pagpanalipod sa bata, o mga serbisyo sa pagpanalipod sa mga hamtong. Mahimo usab ikaw mangayo og tabang gikan sa usa ka tigtambag og biktima o magpakitambag o sa medikal nga propesyonal. Kini nga mga serbisyo makatabang og panalipod kanimo ug makapugong og dugang nga pang-abuso. Tan-awa ang “In Crisis” nga pahina alang sa dugang nga impormasyon.