Gibati Ko ang Kalinaw Pag-usab

Pahibalo: Kini usa ka tinuod nga kasinatian gikan sa usa ka nabuhi sa pang-abuso. Ang mga ngalan ug impormasyon nga mailhan giilisan.

Ang akong mga igsoon ug ako natawo sa usa ka gubot nga pamilya. Sukad sa panahon nga ako gamay pa nga batang lalaki, nahinundom ko nga ang akong mga ginikanan kanunay nga mag-away. Gidisiplina nila kami sa mga paagi nga akong gituohan nga normal apan sa karon nahibaloan ingon og madagmalon: mga suntok, mga sagpa, mga latus, mga kaligo sa bugnaw nga tubig, mga insulto, mga panghadlok, ug labnot sa buhok ug inat sa dunggan. Usahay labayon mi nila og mga butang. Kasagaran wala sila sa panimalay ug ang akong magulang nga lalaki ang tigbantay. Gisunod niya ang mga panig-ingnan sa akong mga ginikanan sa iyang pagtagad kanamo.

Dili gyud ako makalimot sa dihang si Luis misugod sa pag-abuso kanako sa sekswal nga paagi sa dihang ako sais anyos ang panuigon. Kini kasagaran nga mahitabo kon kami lamang duha sa balay. Ako nagtuo nga ako lamang ang sekswal niyang giabuso hangtud nga akong nakita siya uban sa akong igsoong babaye sa dihang ako nag-otso.

Ang pang-abuso ni Luis nagkagrabe sa nanglabay nga katuigan. Miingon siya kanako nga kon ako dili mosugot, patyon ko niya. Mituo ako niya. Daghang mga higayon sa akong kabatan-on nga nawad-an ako sa tanang paglaum ug mibati og hingpit nga kahadlok, nanghinaut nga ako mawala o mamatay. Mibati akong nakasala ug naghunahuna kon unsang ngil-ad nga mga butang ang akong nahimo nga gisilutan sa kabangis nga paagi. Kanunay akong nahadlok. Nag-ampo ako og kadaghan sa Dios; apan, nagtuo ako nga Siya wala gayud maminaw kanako. Mibati ako nga wala panalipdi ug biniyaan.

Nahadlok kong mosulti sa akong mga ginikanan mahitungod sa mga lihok ni Luis. Ug si Luis kanunay nga mabinantayon. Kon anaa ang akong mga ginikanan, mogamit siya og mga sinyas aron sa paghadlok kanako ug sa pagpakita kanako kon unsa ang mahitabo kon ako mosulti. Kanunay akong naninguha sa pagtago gikan sa akong igsoong lalaki ug wala mobati og ka luwas diha sa akong kaugalingon nga panimalay. Gusto akong moundang sa pag-eskwela ug motrabaho aron panagsa ra ako nga anaa sa panimalay. Apan, wala ako tuguti sa paghimo sa mao.

Usa ka adlaw sa dihang ako 11, gihatagan ako sa akong amahan og kwarta aron sa pagpalit og mga ilimnon alang sa pamilya. Samtang ako naglakaw paingon sa tindahan, miduol kanako si Luis gikan sa luyo ug namugos nga akong ihatag kaniya ang kwarta. Miingon siya, “Kon si Papa mangutana kanimo hain ang mga ilimnon, sultihi siya nga gikawat sa usa ka tawo ang kwarta gikan kanimo.”

Gikapoy ako niini nga sitwasyon sa akong kinabuhi ug midumili sa pagsunod kaniya. Nasuko siya ug ako gisukmag hangtud nga nalup-og ako sa yuta. Mibarug ako ug nagsarasay nga mibalik ngadto sa akong amahan. Uban sa mga luha nga nangagas sa akong nawong, akong gisultihan siya kon unsa ang nabuhat ni Luis. Nasuko ang akong amahan kaniya.

Human niana, gibati nako ang kahupay. Hinoon wala nako sultihi ang akong amahan mahitungod sa sekswal nga pang-abuso; naulaw ako ug hapit gibati nga maoy nasayop sa ngil-ad nga sekswal nga mga butang nga gipahimo ni Luis kanako. Human ako misulti ngadto sa akong amahan, mihunong si Luis sa sekswal nga pang-abuso kanako, apan mipadayon siya sa pagbun-og ug pagpasakit kanako. Nakat-unan ko ang pagpuyo uban sa sakit. Kana balewala kon itandi ngadto sa unsay iyang gibuhat kaniadto.

Sa wala madugay, mihukom si Luis nga mosulod sa pagkasundalo. Alang kanamo, kana mao ang labing ngil-ad nga desisyon nga iyang nahimo. Nahupay ang akong inahan ug amahan nga si Luis malayo gikan sa among panimalay og kadiyut, apan si Luis naglisud sa pagkasundalo. Mas misamot siya og kabuang. Bisan unsa ang iyang nasinati sa pagkasundalo midugang sa iyang mapintas nang daan nga kinaiyahan. Sa dihang mipauli siya gikan sa serbisyo, mas migrabe siya kay sa kaniadto.

Sa kadugayan si Luis may pamilya. Gilauman namo nga tingali kini motabang kaniya sa pag-usab. Apan dili kana mao ang nahitabo. Nadaghan ang iyang mga biktima. Ang iyang asawa og mga anak kanunay nga naghilak. Ug mipadayon siya sa pagpakig-away kanamo ug gani bisan sa among mga silingan.

Sa edad nga 18, sa katapusan mihukom ako sa pagbiya sa akong panimalay. Gikapoy na kaayo ko sa akong kinabuhi. Ako may mga uwat ug bali nga mga bukog nga nagpahinumdom kanako sa kapintas nga gihimo ni Luis kanako.

Human sa daghang mga tuig nakahimamat ako og batan-ong babaye ug nagminyo, nanghinaut nga makabaton og nindot nga pamilya nga mas maayo kay sa akong gidak-an. Apan, kana wala mahitabo, ug ang akong kaminyoon natapos. Naguol ako. Nawad-an ako og trabaho. Dili na ako maka-eskwela. Gilapas ko ang balaod sa kaputli ug mihunong sa pagsimba. May bahin kanako nga mibati nga nahibulag gikan sa tinuod nga kalibutan. Wala akoy paglaum ni kadasig sa paglihok.

Sa katapusan misugod ako sa pag-ampo og maayo nga tabangan ako sa Dios. Giaghat ko ang akong kaisug ug gikumpisal ang akong mga sala ngadto sa bishop. Gipadala ako sa akong bishop ngadto sa LDS Family Services aron makadawat og therapy. Sa una nagtuo ako nga ang akong mga problema dili kaayo dako. Hinoon, misugod ako sa pagpakigbahin sa akong kaagi ug giatubang ang makalilisang nga mga problema. Nakakat-on ako sa pagpalambo sa akong relasyon ngadto sa akong mga igsoong babaye. Nakaamgo usab ako nga ako dili makapugong sa tinguha sa pakighilawas [sex addiction] ug misugod sa pagtambong og mga miting sa LDS Addiction Recovery Program. Nakadiskobre ako og daghang mga butang mahitungod sa akong kaugalingon diha niana nga proseso.

Malisud kini nga dalan, apan human sa pila ka panahon, uban sa pag-awhag gikan sa akong mga higala gikan sa programa sa pagpaayo, mihukom ako sa pagbalik og hingpit sa Simbahan. Misugod ako sa pagpaningkamot og maayo nga mapasaylo sa mga pagpili nga akong gihimo isip resulta sa sakit ug mahimong takus sa pagsulod og balik sa templo.

Nakakaplag ako og mga tubag diha sa mga miting sa pagpaayo. Didto gawasnon akong nakigbahin sa akong mga hunahuna ug mga pagbati. Ang akong mga higala diha sa programa misabut sa akong mga problema ug wala maghukom kanako. Gidawat nila ako sa akong pagkaako ug nakita ang kahayag sa akong umaabut.

Ang akong panaw nagpadayon sa pagkinahanglan og panahon, pailub, gugma, serbisyo dayag nga pakigsultihanay, ug mapainubsanong kasingkasing. Naghimo akog hinayhinay nga mga lakang, nag-angkon og kaharuhay gikan sa kabug-at nga akong gipas-an. Pinaagi sa gahum ni Kristo ug sa Iyang Pag-ula, naangkon ko ang pagpugong pa sa akong kinabuhi. Nausab sa Dios ang akong kalag, ug gibati ko ang kalinaw pag-usab. Karon ako adunay paglaum sa umaabut.

Kon ikaw o usa ka tawo nga imong nailhan nga giabuso, pangayo dayon og tabang gikan sa sibil nga mga awtoridad, mga serbisyo sa pagpanalipod sa bata, o mga serbisyo sa pagpanalipod sa hamtong. Mahimo usab ikaw nga mangayo og tabang gikan sa usa ka tigtambag og biktima o magpakitambag o sa medikal nga propesyonal. Kini nga mga serbisyo makatabang og panalipod kanimo ug makapugong og dugang nga abuso. Tan-awa ang “In Crisis” nga pahina alang sa dugang nga impormasyon.