Nagkat-on Matag Adlaw

Pahibalo: Kini usa ka tinuod nga kasinatian nga gipakigbahin sa usa nga naluwas gikan sa pang-abuso. Mga ngalan ug impormasyon nga mailhan giusab.

33 anyos ang akong panuigon, bag-ohay nga nagdiborsyo, ug mihukom sa pakig-date og balik. Sa duha ka lain nga mga okasyon, gilugos ako og mga lalaki nga akong nahimamat sa sosyal nga mga kalihokan. Ang pagkaamgo sa unsay nahitabo kanako hilabihan sa kalisud. Mikabat og dugay nga panahon alang kanako sa pagdawat sa unsay nahitabo. Ang akong lawas hilabihan sa pagpangurog sa kakuyaw ug gibati ko ang paminhod; miagi ako og mga panahon nga gibati ko nga ako wala nay kapuslanan, walay bili, ug naulaw.

Dihay mga panahon nga mura og nawad-an ko og paglaum tungod kay ang pagsulay makaugtas. Ako nahibalo nga dili ako makabuntog niini nga gubat nga ako ra. Nangayo ako og tabang gikan sa usa ka propesyonal nga tigtambag, ug mitabang ug migiya siya kanako sa tibuok proseso sa pagbangutan.

Nagpakitambag usab ako sa akong bishop sa kanunay. Nag-uban, migiya ug miawhag sila kanako sa pagpadayon, ug miawhag sila kanako sa pagtukod sa akong relasyon ngadto sa Langitnong Amahan ug ni Jesukristo. Nahibalo ako nga diha sa mga higayon nga ako miluhod nangamuyo alang sa tabang ang Langitnong Amahan naghashas kanako, naghatag kanako og kalig-on, sa hinay hinay, sa pagbuntog niini. Ang paglaum ug pagkaayo posible. Daghan ako og nakat-unan mahitungod sa akong kaugalingon, sa akong Langitnong Amahan, ug sa akong Manluluwas, sa tibuok niini nga panaw.

Nakat-unan ko ang pagsalig diha sa Langitnong Amahan. Nahibalo siya unsa ang labing maayo. Nakakat-on ako sa pagluhod kon nagkinahanglan ako og tabang, tambag, o direksyon.

Nakakat-on ako kon kinsa ang akong mga higala, ug nakakat-on ako kon unsa ang tinuod nga higala. Nakakat-on usab ako kon unsaon pagbutang og mga utlanan.

Nakakat-on ako og mas daghang gugma, kalooy, ug pailub.

Nakakat-on ako nga mahimong mas maloloy-on sa akong kaugalingon, sa dili pagbasol sa akong kaugalingon, ilabi na kon ang usa ka butang dili akong sayop. Nakakat-on ako sa dili paghukom o sa pagkawalay kalooy sa kaugalingon. Nagkat-on ako sa paghigugma pa sa akong kaugalingon sa matag adlaw nga molabay.

Mapasalamaton ako sa hilum nga kaisug nga nagtabang kanako nga mahimong kinsa ako. Nagtubo pa ako ug nagkat-on matag adlaw, apan mapasalamaton kaayo ako alang sa dalan nga akong gisubay ug sa tanan nga akong nabuntog.

Tingali kini usa ka mahilum nga panaw—dili daghan ang nahibalo kon unsa ang akong giagian—apan akong nahunahuna nga kasagaran ang labing mahilum nga mga lihok sa kaisug mahimong mao ang kinakusgan.

Nakasabut ako sa gahum sa pagkaayo nga nakahimo si Kristo sa paglugway tungod sa Iyang Pag-ula. Nakasabut ako og gamay pa kon giunsa Niya sa paglahutay ang akong sakit ug panghingutas didto sa tanaman ug didto sa krus. Nagtuo ako diha sa gahum sa mga anghel ug sa panalipod nga ilang gihatag. Nahibalo ko nga ako wala mag-inusara atol niini nga panaw, ug kini nakapalig-on sa akong pagpamatuod nga ang pagkaila sa Dios tinoud naglangkobl sa matag aspeto sa atong mga kinabuhi. Wala lamang Siya nagtan-aw matag karon ug unya; kanunay Siya nga nag-uban kanato, ug nagbantay Siya kanato.

Ang akong pagpamatuod nagtubo nga mas malig-on. Nakat-unan ko kon unsa ka tinuod ang kalibutan sa espiritu. Nahibaloan ko nga ako nakiggubat sa kaaway sa matag adlaw. Usahay gihunahuna ko ang akong kaugalingon nga nagsul-ob og espiritwal nga taming; kini nagtabang kanako sa paghatag og kalig-on. Nahibalo ako nga kinahanglang panalipdan ko ang akong kaugalingon sa espiritwal nga paagi gikan sa kabug-at ug kahanap nga kinahanglan akong agian aron maila ug madawat ang akong mga kasinatian. Ang akong sakit lawom kaayo ug tinuod nga kini mihimo sa akong kasingkasing ug tibuok lawas sa tinuoray nga pagsakit. Usahay, bation sa akong lawas ingon og nagdaut.

Bisan pa niini, kini nga kasinatian nagdala usab og kalig-on sa sulod—usa ka kalig-on nga wala gyud ako mahibalo nga anaa diha. Usa ka kalig-on nga maloloy-on, nag-awhag, ug makapabayaw. Usa ka kalig-on nga nagsulti kanako nga ako makahimo og lisud nga mga butang. Usa ka kalig-on nga ako nahibalo nga moduso kanako lagbas sa malisud ug mahagiton nga mga panahon. Usa ka kalig-on nga nakaila kanako labaw kay sa ako nakaila sa akong kaugalingon. Gibati ko ang pagkapukaw sa akong espiritu, sa akong kalag, sa akong mahangturon nga pagkatawo kinsa kaniadto mipuyo uban sa Langitnong Amahan, ang akong espiritu kinsa nahibalo unsa ang akong sarang nga mahimo.

Ang atong mga kalag dako kaayo og bili labaw kay sa atong mahunahuna! Samtang kita nagsalig diha sa tabang ug gahum ni Jesukristo, kita sa katapusan makalupig, makabuntog, makadaug ug makalampos! Kita mga anak nga babaye ug lalaki sa usa ka Langitnong Hari, ug kana usa ka butang nga ikalipay! Gihimo kita alang sa mahinungdanon ug nindot nga mga butang—mga butang nga dili nato mahunahuna o mabati. Maglipay kita kon kinsa kita, matahum ug halangdon kita diha sa mga mata sa atong Langitnong Amahan. Dako kaayo kita og bili! Nagtuo ako nga ang atong mga kalag nangandoy nga mopauli sa panimalay uban sa atong Langitnong Amahan ug maanaa pag-usab sa Iyang presensya. Naghatag ako Kaniya sa akong mga pagdayeg, akong Amahan, akong Hari.

Kon ikaw o usa ka tawo nga imong nailhan nga giabuso, pangayo dayon og tabang gikan sa sibil nga mga awtoridad, mga serbisyo sa pagpanalipod sa bata, o mga serbisyo sa pagpanalipod sa hamtong. Mahimo usab ikaw nga mangayo og tabang gikan sa usa ka tigtambag og biktima o magpakitambag o sa medikal nga propesyonal. Kini nga mga serbisyo makatabang og panalipod kanimo ug makapugong og dugang nga abuso. Tan-awa ang “In Crisis” nga pahina alang sa dugang nga impormasyon.