Inisitituti
Mataupu 20: Mosaea 9–17

Mataupu 20

Mosaea 9–17

Folasaga

O le Mosaea 9–24 ua toe faamatalaina ai le talafaasolopito o se vaega na taitaia e Senifa mai le nuu o Saraemila e agai atu i le nuu o Liae-Nifae. E aofia i lenei faamaumauga se vaitaimi pe tusa ma le 80 tausaga, mai le tusa o le 200 TLM. seia latou toe foi atu i le nuu o Saraemila i le tusa ma le 121 TLM. E tusa o le vaitaimi tonu lea na fai ai Tupu o Mosaea1, Peniamina, ma Mosaea2 ma tupu o le nuu o Saraemila; O Senifa, Noa, ma Limae na pulea le nuu o Liae-Nifae.

I le nofoaiga a le Tupu o Noa, na lapatai atu le perofeta o Apinati i tagata ia salamo. Na ia vavalo foi i le faatafunaga e oo mai ona o le fulitua i le Atua. O aoaoga foi a Apinati na faaalia ai le paia o le Faaola, o Lona finagalo tasi ma le Tama, ma le ositaulaga maoae o le a faia e le Faaola i le faagasologa o le Togiola. O le suesue i upu a Apinati, e mafai ona e faafouina ai lagona o le faafetai mo le taulaga a le Faaola ma maua le agaga talisapaia loloto atu mo le Togiola.

O le maliufasia o Apinati ua faaalia ai le maoae o lona lototoa. O le molimau a Apinati na taitai atu ai i le liuaina o Alema ae na maumau ai le ola o Apinati. A o e manatunatu loloto i mea na tutupu i le auaunaga a Apinati, ia mafaufau i aafiaga a se tagata amiotonu e toatasi i tupulaga o le lumanai. E auala mai i lana tagata liliu mai lauiloa e toatasi o—Alema—na sosoo mai ai isi tupulaga o perofeta o e na saunia tagata mo le afio mai o Iesu Keriso. E pei o Apinati, e mafai foi e oe ona i ai se aafiaga maoae i lou aiga ma isi e te iloa e ala i le molimau atu i le mea moni ma ola ai i le amiotonu.

Faamatalaga

Faamatalaga faaopoopo i luma mai o le Mosaea 9

Mosaea 9.O Le Famaumauga a Senifa

  • O le Mosaea 9:1–4 ma le Ominae 1:27–29 o loo faamatala ai le tala i le uluai malaga a Senifa e nofoia le nuu o Nifae-Liae; peitai, o le Mosaea 9:1–2 o loo faailoa mai ai le mafuaaga na tupu ai se taua i le lotoifale o le au malaga muamua ma faamalosia ai e toe foi atu i le nuu o Saraemila. Sa lei fiafia Senifa i taua ae sa manao e ola i le filemu i sa Lamana. O le Mosaea 9–10 na tusia e Senifa e aunoa ma le otootoina po o se faamatalaga mai ia Mamona. Ia matau o le aso o le Mosaea 8 o le 121 TLM. O le aso o le Mosaea 9 o le 200 TLM. Na toe tuu i tua le taimi e faamaumauga i le 80 tausaga e ta’u mai ai mea na tutupu i le nuu o Liae-Nifae i le vaitaimi o nofoaiga a Peniamina ma Mosaea i Saraemila.

Mosaea 9:16–18; 10:10–11, 19. “I le Malosi o le Alii:”

  • Na tusia e Senifa e faapea na latou tau “i le malosi o le Alii” pe a tau ma sa Lamana (tagai i le Mosaea 9:16–18; 10:10–11, 19). E ui lava ina sa sili atu ona toatele [sa Lamana] nai lo tagata o Senifa, ae sa latou faatoilaloina au a sa Lamana na sii taua atu ma na toalaiti foi tagata o le latou au na maliliu ai. Na latou manumalo ona o lo latou faatuatua i le Atua. Na faafofogaina e le Alii a latou tagi ma faamanuia i latou i le malosi. I le Tusi a Mamona atoa tatou te iloa ai o le tuuina atu o le malosi i Ona tagata o se tasi lea o alofa mutimutivale o le Atua. Na manumalo le nuu o Peniamina i Saraemila i le au sa Lamana aua sa latou tau “i le malosi o le Alii” (Upu a Mamona 1:14).

    I le tusi a Alema, o le manumalo o au a sa Nifae e mafai ona mafaufau i ai na mafua ona o lo latou gafatia ona faatuatua i le Atua e fesoasoani ia i latou i a latou taua ae le o le toatele o le autau (tagai i le Alema 2:27–31; 43:49–51; 56:56). E ui lava o a tatou taua e le o ni taua faaletino, o le fuaitau “i le malosi o le Alii” ua aoao ai i tatou e mafai foi ona tatou ole atu mo se fesoasoani mai le Atua e tuuina mai ia i tatou le malosi e manumalo ai i o tatou fili.

Mosaea 9–22. O Le Talafaasolopito o Senifa ma Lona Nuu

  • O le tusi a Mosaea e masani lava ona faigata ona malamalama i ai ona o tala eseese ma talafaasolopito e fefoifoiai o loo avea ma vaega o le tusi (tagai i le siata “Toe tepa i mea na tutupu mai le Ominae e oo atu i le Mosaea” i le faaopoopoga, itulau e 437). O le talafaasolopito o loo i le Mosaea mataupu e 9–22 o le toe foi i tua e tusa ma le 80 tausaga i le taimi na tuua ai e Senifa ma ni nai tagata na mulimuli atu ia te ia le nuu o Saraemila ae foi atu i le nuu o Nifae. O le faamaumauga o loo i ai le talafaasolopito o le Tupu o Senifa, Noa, ma Limae. O le faamatalaga toe foi i tua e aveina ai le tagata faitau i tua i le talafaasolopito o le Tusi a Mamona ina ua toe faatasia le vaega a Senifa ma tagata o Saraemila i le Mosaea 25.

Mosaea 10:11–17. Uputu’u Sese

  • Na oo ina talia e sa Lamana e fai ma mea moni se vaega le manino o mea na tutupu e uiga i la latou uluai malaga mai Ierusalema. O nei uputuu sese na tuufaasolo mai i lea tupulaga i lea tupulaga, na fausia ai ni faailoga lanu na sili ona leaga po o se “ita tele e faavavau” o le au sa Lamana i sa Nifae (Mosaea 10:17). I faaaliga o nei aso na lapatai mai ai le Alii ua faaaogaina e Satani uputuu sese e “aveesea ai le malamalama ma le upu moni” (MFF 93:39; tagai foi MFF 123:7–8). Ona o nei uputuu na manatu ai sa Lamana ua alagatatau lo latou fasiotia, gaoi, ma taumafai e faaleaga pe faapologa sa Nifae (tagai Mosaea 10:17).

  • Na aoao mai e Elder Richard G. Scott o le Korama a Aposetolo e Toasefululua le mea e tatau ona tatou faia pe a feteenai ni tu ma aga faaleaiga pe faaleaganuu ma fuafuaga po o tulaga faatonuina a le Atua. Na ia fautuaina i tatou ina ia iloilo ma le totoa o tatou olaga e iloa ai tu ma aga e le ogatasi ma aoaoga a le Faaola:

    “Na tofia oe e le Tama Faalelagi e te fanau mai i se gafa patino e te maua ai lou tupuaga o le lanu, aganuu, ma tu masani. O lena gafa e mafai ona maua mai ai se talatuu faatamaoaigaina ma ni mafuaaga maoae e olioli ai. Peitai ua ia te oe le matafaioi e iloilo ai pe i ai se vaega o lena talatuu e tatau ona lafoai ona e le ogatasi ma le fuafuaga a le Alii mo le fiafia.

    “Atonu e te fesili pe mafai faapefea e se tasi ona iloa pe o feteenai se tu masani ma aoaoga a le Alii ma tatau ai ona lafoai? E le faigofie ona fai lena mea. Ua ou iloaina le faigata a o ou galue e faatoilalo nisi o au lava tu masani sese. … O tu ma aga-i-fanua e avea ma se vaega tatou te tutupu ae ma i tatou. O ia mea e le faigofie ona iloiloina ma le atoatoa. Ia suesue ma le totoa i tusitusiga paia ma fautuaga a perofeta ina ia malamalama ai i le ala e finagalo le Alii e te ola ai. Ona iloilo lea o vaega taitasi o lou olaga, ma fai soo se suiga e manaomia. Ia saili atu se fesoasoani mai se isi e te faaaloalogia ma na mafai ona ia faataatia ese ni tautinoga loloto po o ni tu masani e le ogatasi ma le fuafuaga a le Alii. …

    “Pe o lau aganuu ea e pule malosi ai, pe pulea toatasi e le tane le aiga ma faia uma tonu taua? O lena mamanu e tatau ona fetuunai ina ia galulue ai le tane ma le ava o se paaga tutusa i le faiga o tonu i le lotogatasi mo i laua lava ma lo latou aiga. …

    “O nisi nei o tu masani e tatau ona faataatia ese—soo se vaega lava o talatuu:

    “E solia ai le Upu o le Poto.

    “E faavae i le faamalosia o isi e usitai atu ona o le pule tuufaasolo e masani ona iloiloina i tulaga o tofi.

    “E faamalosia ai le faatuina o faiga e faavasega ai tagata.

    “E afua ai ni feteenaiga ma isi aganuu” (i le Conference Report, Ape. 1998, 112–13; po o le Liahona, Iulai 1998, 97).

Mosaea 11:2–19, 27. Na Savali Noa “e tusa ma le Manao o Lona Lava Loto”

  • Mo le talanoaina o palake, tagai i le faamatalaga o le Iakopo 1:15 i le itulau 115.

  • Sa faamatala manino mai e Mamona le amioleaga o le Tupu o Noa (tagai Mosaea 11:2–19, 27). Mulimuli ane, na faaaogaina e Mosaea le faataitaiga i le Tupu o Noa o se mafuaaga tatau e tuuesea ai faigamalo a tupu: “Ua matua tele le amioletonu ua faia talu le tupu amioletonu e toatasi, ioe, ua matua tele foi le malaia! Ioe, ia manatua le tupu o Noa” (Mosaea 29:17–18). O le malosi o le manatu faapito o le Tupu o Noa i le sailia o manaoga o le tino, ua avea o se lapataiga i le au faitau i aso nei i le malaia o na ituaiga tagata.

Mosaea 11:20. O Le Perofeta o Apinati

  • Na faapupulaina mai e Elder M. Russell Ballard o le Korama a Aposetolo e Toasefululua le lototoa ma le naunautai o Apinati e usitai i le Alii: “Sa matuai faaita e Apinati le Tupu amioleaga o Noa, i lana molimau lototele e uiga i le Alii o Iesu Keriso. Na iu lava ina ofoina atu e lenei faifeautalai maoae lana taulaga faaiu mo lana molimau ma le faatuatua, ae ina ua mavae lena ona pa’i atu o lana molimau mama atoatoa i se loto e toatasi na talitonu. O Alema, o se tasi o faitaulaga a le Tupu o Noa, ua ‘salamo i ana agasala … , [ma talia Iesu o le Keriso,] ma ua fealuai faalilolilo i le nuu, ua amata foi ona aoao atu ai upu a Apinati’ (Mosaea 18:1). E toatele sa liua i le talalelei a Iesu Keriso, ona o se taunuuga tonu o le molimau mamana a Apinati e uiga i le Faaola, lea sa talitonuina e se agaga e toatasi—Alema” (i le Conference Report, Oke. 2004, 43; po o le Liahona, Nov. 2004, 41).

    O Apinati i le maota o le Tupu o Noa

  • A o avea ma Fitugafulu, na talanoaina ai e Elder Cree-L Kofford faatosinaga ma faataitaiga a Apinati: “O le a se mea ua faapitoa tele ai Apinati? Atonu o lona usiusitai atoa a o alu atu, masalo na o ia lava, ia i latou o e atonu sa ia iloaina o le a faaumatiaina lona ola, e momoli atu le afioga a le Alii ma alaga atu le salamo i tagata. Atonu foi o le mea moni lava e matuai itiiti mea tatou te iloa ia te ia, pe atonu foi o le auala na ia feagai ai ma faigata na oo i lona olaga i se auala tuusao, ma ‘fana tonu le malama i le lalolagi’. Pe o le a lava le mafuaaga, o Apinati lava o se tagata faapitoa. O lona olaga, na soifua ai i le tele o tausaga ua leva, o loo i ai lava le mana e faafiafia ai le mafaufau ma mafua ai le ta ta pea [o le fatu]” (“Abinadi,” i le Heroes from the Book of Mormon [1995], 69–70). Ua tatou iloa o Apinati o se alii na sau mai ia tagata, ae e le o fafo atu o le nuu. E moni lava o ia o se tagata amiotonu na valaauina e lapatai atu i ona lava tagata afai latou te le salamo, o le a mulimuli mai le nofopologa ma le faaumatiaga.

Mosaea 11:21; 12:1–2, 8. Lapataiga a Apinati

  • O le le faalogo o le nuu o Noa i muai lapataiga a Apinati (tagai i le Mosaea 11:21) na taitai atu ai i se lapataiga na sili atu ona ogaoga ina ua toe foi ane o ia i le lua tausaga mulimuli ane. O taunuuga o le a latou nofopologa, ma afai latou te le salamo o le a faaumatia i latou (tagai i le Mosaea 12:1–2, 8). O le mea masani lava lea i le olaga—pe a tatou tolopo le usiusitai pe faatuai le mulimuli atu i perofeta, tatou te aumaia taunuuga e sili ona ogaoga ia i tatou lava.

Mosaea 12:15–24. “O Ia O Le Na te Aumaia Le Manuia”

  • Alii faifeautalaiNa luiina e se tasi o faitaulaga amioleaga o le Tupu o Noa ia Apinati: “Po o le a le uiga o ia upu … : E matua matagofie i luga o mauga vae o lē aumai le tala lelei; o le talai mai le filemu, e aumai le tala lelei i le manuia”? (Mosaea 12:20–21). Ao e faitau i le Mosaea 12–15, matau le ala na tali maeaea atu ai Apinati i lenei fesili.

Mosaea 12:34–36; 13:11–26. O Tulafono e Sefulu

  • Na folafola mai Peresitene Gordon B. Hinckley (1910–2008) o Tulafono e Sefulu (tagai i le Esoto 20:3–17mau tauloto) o se vaega taua i le talalelei a Iesu Keriso i tupulaga uma: “[O] Tulafono e Sefulu [na] tusia e le tamatamai aao o Ieova i papa ma’a mo le faaolataga ma le saogalemu, mo le malutiaga ma le fiafia o le fanauga a Isaraelu ma tupulaga uma o le a o’o mai pe a mavae atu i latou” (i le Conference Report, Oke. 1991, 71; po o le Liahona, Ian. 1992, 58).

Mosaea 13:28. “E Le O’o Mai Le Olataga i le Tulafono Pe A Na o Lea”

  • Na molimau mai Elder Dallin H. Oaks o le Korama a Aposetolo e Toasefululua i le matuai manaomia o Iesu Keriso, e tusa lava pe o tatou ola amiotonu: “E le fesiligia le maoae o mana o loo i alii ma tamaitai e mafai ai ona faatinoina mea sili. Ae a maea lo tatou usiusitai ma galuega lelei uma, e le mafai ona faasaoina i tatou mai le oti po o aafiaga o a tatou agasala patino e aunoa ma le alofa tunoa na tuuina mai e ala i le togiola a Iesu Keriso. O loo faamanino mai i le Tusi a Mamona lenei mea. O loo aoao mai ‘e le oo mai le olataga i le tulafono pe a na o lea’ (Mosaea 13:28). I nisi faaupuga, e le oo mai le faaolataga i le na o le tausia o poloaiga. ‘E le tauamiotonuina foi le tino i le tulafono’ (2 Nifae 2:5). E oo lava ia i latou o e taumafai e usitai ma auauna atu i le Atua ma o latou loto, mafaufau, manatu, ma le malosi atoa o i [latou] o ni ‘auauna le aoga’ (Mosaea 2:21). E le mafai e le tagata ona maua lona lava faaolataga” (“Another Testament of Jesus Christ,” Ensign, Mat. 1994, 67).

Mosaea 13:34. “E Afio Ifo Le Atua Lava”

  • O le upu Atua i lona uiga faalauaitele ua faatatau i lo tatou Tama Faalelagi, ma o le faaiuga o Ia lea o loo tatou tapuai i ai. E moni foi o Iesu Keriso o le Atua. Na ta’ua o Ia e le Au Paia o le Fegaiga Tuai o Ieova, o le Atua o Aperaamo, Isaako, ma Iakopo. Na aoao mai e Elder James E. Talmage (1862–1933) o le Korama a Aposetolo e Toasefululua e faapea, e fesoasoani tusitusiga paia ia i tatou e malamalama ai i le paia faalelagi o Iesu Keriso ma Lana matafaioi o se Atua: “Tatou te tautino atu le pule faatusitusiga paia mo le folafolaga o Iesu Keriso na avea ma o Ia o le Atua le Foafoa, o le Atua na faaalia o Ia lava ia Atamu, Enoka, ma peteriaka ma perofeta uma a’o lumanai le lolo seia oo ia Noa; o le Atua o Aperaamo, Isaako ma Iakopo; o le Atua o Isaraelu o se nuu ua tuufaatasia, ma le Atua o Efaraima ma Iuta ina ua mavae faafitauli o le malo o Eperu; o le Atua na faaalia mai o Ia lava i perofeta mai ia Mose e oo atu ia Malaki; o le Atua o faamaumauga o le Feagaiga Tuai; ma le Atua o sa Nifae. Tatou te tautino atu o Iesu Keriso na avea ma o ia o Ieova, o Ia lava e Faavavau” (Jesus the Christ, 3rd ed. [1916], 32).

Mosaea 13:27–35. O Le Tulafono a Mose ma Iesu Keriso

  • Na aoao mai e Elder Jeffrey R. Holland o le Korama a Aposetolo e Toasefululua le ala e fesootai ai le tulafono a Mose i le talalelei a Iesu Keriso:

    “O le tagata faitau o nei aso e le tatau ona ia vaai i faailoga faa-Mose—anamua po o le vaitaimi lenei—e faapea o se vaega faaivaivā o sauniga faalelotu e usitai a’ia’i i ai (ma o nisi taimi e faafitafita) ona mulimuli ai ni tagata ūa malolō o e lei talia Keriso ma lana talalelei. O lenei feagaiga lauiloa, na tuuina mai e le aao o le Atua lava ia … na avea … o se taiala i le faaleagaga, o se faitotoa ia Keriso. …

    O le tamai mamoe ua avea o se taulaga osia“… E taua le malamalama o le tulafono a Mose sa laualuga i lena vaitau, ma o lea na aofia ai, le tele o vaega taua o le talalelei a Iesu Keriso, lea sa i ai muamua. Sa lei fuafuaina e avea o se mea e ese mai pe tuuesea mai, ma e moni foi e le o se mea e feteenai ma le, talalelei a Iesu Keriso. … O lona faamoemoega sa le faapea lava e ese mai le tulafono maualuga. O ia tulafono uma sa mo le aumaia o tagata ia Keriso” (Christ and the New Covenant [1997], 136–37, 147).

Mosaea 14:1–12. O Le Valoaga Faa-Mesia a Isaia

  • Ina ia malosi le aoao atu o le taua o le Togiola, na siiina mai ai e Apinati tusitusiga a Isaia. Na faamalamalama mai e Elder Jeffrey R. Holland le taua o le Isaia 53 (Mosaea 14) o se molimau i le matafaioi a le Faaola: “E moni lava o le folafolaga aupito musuia, aupito umi ma le aupito faagaeetia i le soifuaga, maliu, ma le taulaga togiola a le Alii o Iesu Keriso, o le tautinoga lea o loo maua i le mataupu e 53 o le Isaia, na siiina atoa atu i le Tusi a Mamona e Apinati a o saisaitia o ia i filifili i luma o le Tupu o Noa” (Christ and the New Covenant, 89).

Mosaea 14:5. “O Ona Faalavalava E Malolo Ai I Tatou”

  • E faatatau i puapuaga o Iesu Keriso i le taimi o le Togiola ma lona mana faamalolo, na faasoa mai ai e Elder M. Russell Ballard le manatu lenei:

    “E maeu le filemu, e maeu le mafanafana lea e oo mai ia i tatou mai lenei meaalofa silisili e ala mai i le alofa tunoa o Iesu Keriso, le Faaola ma le Togiola o tagata uma. …

    “… E ui lava sa mama Lona soifuaga ma saoloto mai agasala, na Ia totogia le tau atoa mo agasala—a oe, ma au, ma tagata uma o e ua soifua mai. O lona tiga faalemafaufau, faalelagona ma faaleagaga sa matuai matautia, o lea na mafua ai ona tafe mai le toto i pu ninii o Lona tino (tagai i le Luka 22:44; MFF 19:18). Ae peitai sa puapuagatia Iesu ma le loto i ai ina ia mafai ona maua e i tatou uma le avanoa e toe faamamaina ai—e ala i lo tatou faatuatua ia te Ia. … A aunoa ma le Togiola a le Alii, e leai ma se tasi o nei faamanuiaga e avanoa mo i tatou, ma e le mafai ona tatou agavaa ma saunia e toe foi atu e nonofo i le afioaga o le Atua” (i le Conference Report, Ape. 2004, 86–87; po o le Liahona, Me 2004, 84–85).

Mosaea 15:1–7. O Le Ala e Avea Ai Keriso ma Tama ma le Alo

  • O nisi taimi e faatatau ai tusitusiga paia ia Iesu Keriso i le faaaogaina lea o le suafa “Tama.” Na faamatala mai e Elder M. Russell Ballard le mafuaaga e ta’ua ai i nisi taimi Iesu Keriso o le Tama ma le Alo:

    “E faapefea ona avea Iesu Keriso ma Tama ma le Alo? O le mea moni e le faigata e pei ona faalogo atu i ai. E ui o Ia o le Alo o le Atua, ae o Ia o le faaao o le Ekalesia, o le aiga lea o e ua talitonu. Pe a toe fanauina i tatou i le faaleagaga, ua vaetamaina i tatou i Lona aiga. Ua avea o Ia ma o tatou Tama ma taitai. …

    “E leai se auala e ta’ufaatauvaaina ai e lenei aoaoga faavae le matafaioi a le Atua le Tama. Nai lo lena, tatou te talitonu e faalauteleina ai lo tatou malamalama i le matafaioi o le Atua le Alo, lo tatou Faaola, o Iesu Keriso. O le Atua lo tatou Tama Faalelagi o le Tama o o tatou agaga; tatou te talanoa i le Atua le Alo o le Tama o e amiotonu. Ua tauina o Ia o le ‘Tama’ ona o le sootaga i le va o Ia ma i latou ua talia Lana talalelei, o lea e avea ai ma suli o le ola e faavavau. Ma o le tagata lona tolu o le Aigaatua, o le Atua le Agaga Paia, ua i ai le misiona patino e aoao atu ma molimau atu i le mea moni e faatatau i le paia uma o le Atua le Tama ma le Atua le Alo” (“Building Bridges of Understanding,” Ensign, Iuni 1998, 66–67).

  • I le aso 30 o Iuni, 1916, i lalo o le taitaiga o le Peresitene Iosefa F. Samita, na tuuina atu ai e le Usoga se faamatalaga manino i le Tama ma le Alo na faaautuina e faapea “The Father and the Son: A Doctrinal Exposition by the First Presidency and the Quorum of the Twelve Apostles.” “[O Le Tama ma le Alo: O se Folafolaga o Aoaoga Faavae na saunia e le Au Persitene Sili ma le Korama a Aposetolo e Toasefululua]” O se vaega o lenei folafolaga o loo faamatala mai ai le ala ua faailoa mai ai Iesu Keriso i tusitusiga paia o le “Alo” ma o isi taimi o le “Tama”:

    “‘Tama’ i le avea ai ma Foafoa. … O mau e faatatau i le Atua i soo se auala lava e faapea o le Tama o le lagi ma le lalolagi, e tatau ona malamalama i lona faauigaga o le Atua o le na Faia, o le e Faatulaga, o le Foafoa o le lagi ma le lalolagi.

    “Faatasi ai ma lenei faauigaga, e pei ona faaali mai i anotusi i tulaga uma, o Ieova, o Iesu Keriso lea le Alo o Elohima, ua faasuafaina ‘o le Tama,’ e oo lava ‘o le Tama Faavavau lava o le lagi ma le lalolagi’ [tagai i le Eteru 4:7; Alema 11:38–39; Mosaea 15:4; 16:15]. …

    “O Iesu Keriso o le ‘Tama’ o i Latou o E i ai i Lana Talalelei. [Ma le isi] manatu i le avea ai o Iesu Keriso o le ‘Tama’ e faatatau i le sootaga i le va o Ia ma i latou e talia Lana talalelei ma faapea ai ona avea ma suli i le ola e faavavau. …

    “I Ana auauna faamaoni i lenei tisipenisione na faapea mai le Alii, ‘Aua le matata’u, fanau iti e, aua e a a’u lava outou, ua ou manumalo foi i le lalolagi, o outou foi o nisi o e ua foai mai e lo’u Tama ia te a’u’ (MFF 50:41). …

    “O Iesu Keriso le ‘Tama’ e ala i le Mana Paia na Tuuina i ai. … O Iesu le Alo na fai ma sui ma faapea ona suitulaga ia Elohima Lona Tama i le mana ma le pule. … O le ala lea na faaee atu ai e le Tama Lona suafa i luga o lona Alo; ma na fetalai atu Iesu Keriso ma auauna atu e ala i le suafa o le Tama; ma e tusa ai ma le mana, pule, ma le faaleatua, o Ana afioga ma faatinoga sa fai ma o loo fai ma afioga ma faatinoga a le Tama” (“The Father and The Son,” Ensign, Ape. 2002, 14–15, 17).

Mosaea 15:10–13. O Fanau a Keriso

  • Na faamatalaina e Elder Dallin H. Oaks le ala e avea ai se tasi ma se atalii po o se afafine o Iesu Keriso: “Ua tatou aoao mai nei mau maoae mai le Tusi a Mamona, o i latou ua agavaa e ala i le faatuatua ma le salamo ma ola e tusa ai ma tulafono ma sauniga o le talalelei, o le a tauaveina a latou agasala e le Alii o Iesu Keriso. I le itu faaleagaga ma i se manatu faafaatusa, o le a avea i latou ma atalii ma afafine o Keriso, o ni suli i lona malo. O i latou ia o le a valaauina i lona suafa i le aso gataaga” (i le Conference Report, Ape. 1985, 104; po o le Liahona, Iulai 1985, 78).

  • A o avea ai o se Epikopo Pulefaamalumalu, na faamatalaina e Elder Merrill J. Bateman le ala e silafia ai e Iesu Lana fanau: “E silafia e le Faaola i tatou uma taitoatasi e ala i lona tulaga o se tasi o le Aigaatua. Na saunoa mai Isaia ma le perofeta o Apinati, pe a faia e Keriso ‘se taulaga mo agasala, ona iloa lea e ia o lana fanau’ (Isaia 53:10; faatusatusa ma le Mosaea 15:10). Fai mai Apinati o ‘ana fanau’ o e amiotonu, o e mulimuli i perofeta (tagai i le Mosaea 15:11). I le faatoaga ma luga o le satauro, na silasila ai Iesu ia i tatou uma taitoatasi ma sa le gata i le tauaveina o a tatou agasala, ae na ia silafia foi o tatou lagona loloto, ina ia ona silafia ai le ala e faamafanafana ai ma faamalosia ai i tatou” (i le Conference Report, Ape. 1995, 15–16; po o le Liahona, Iulai 1995, 15).

Mosaea 15:13–20. E Maeu Le Matagofie O Ona Aao

  • I le toe faaupuina o tusi a Isaia, na toe tusia ai e Apinati faamanuiaga silisili ua oo mai ma o le a oo mai i perofeta paia uma o e aumaia le filemu (tagai i le Mosaea 15:15–17) ma i le Faaola, o le “na faavaeina le filemu” (tagai i le Mosaea 15:18). O lena savali filemu e faapea, o le a afio mai ma e moni lava ua afio mai le Togiola e togiolaina lona nuu mai le agasala ma ua faataunuuina ai le toetu mai o e ua oti (tagai i le Mosaea 15:18, 20).

  • A o avea ma Fitugafulu, na faasoa mai e Elder Carlos E. Asay (1926–99) se manatu i faaataataga o lenei faamatalaga mai ia Isaia:

    “E leai se tasi e sili atu ona matagofie pe faamanuiaina nai lo i latou o e auauna i le Atua e ala i le talaiina ma avea ma faataitaiga o le upumoni. O le galuega aupito faapaiaina ma matagofie lea o galuega uma! …

    “O vae, o leo, o foliga, ma le tino atoa o na tagata talai o e faasoa atu upu moni o le faaolataga o le a pele ma matagofie i taimi uma i tagata fou liliu mai, aemaise lava o i latou o e na mafatia i a latou agasala. I le vaai a i latou o e ua iloa Keriso ma lona mana e laveai ai, e itiiti pe a i ai ni pona i faifeautalai o e na savalia auala mamao e tuuina atu le savali o le talalelei” (The Seven M’s of Missionary Service [1996], 135–36).

Mosaea 15:20–31. O Le Uluai Toetu

  • O Iesu Keriso o le uluai tagata i lenei lalolagi ua toetu mai. O lea la, o le piriota o taimi o loo faatatau i ai i tusitusiga paia o le Uluai Toetu na amataina i Lona manumalo i le tuugamau ma faaauau atu ai i le Meleniuma. Na aoao mai Apinati o i latou o e toetutu i le Uluai Toetu e aofia ai “o perofeta, ma i latou uma na talitonu i a latou afioga” (Mosaea 15:22), o i latou na maliliu i le valea e aunoa ma le “talaiina atu [o] le olataga ia te i latou” (Mosaea 15:24; tagai foi i le MFF45:54), ma tamaiti laiti o e maliliu a o le i oo i le matutua e tali atu ai le tagata mo ia lava (tagai i le Mosaea 15:25; Moronae 8:1–24).

    Chart of Order of the Resurrection

    Faatulagaga o le Toetu

    Kata o le Faatulagaga o le Toetu

    Toetu o tagata selesitila

    Toetu o Keriso

    Toetu o tagata teresitila

    Amataga o le Meleniuma

    Toetu o tagata telesitila

    Toetu o atalii o le malaia

    Faaiuga o le toetu o e amiotonu

    Faaiuga o le Meleniuma

    Amataga o le toetu o e le faamaoni

    Brian D. Garner, Suesue Nei Mea ma le Filiga (2003), 151.

Mosaea 15:25. Ua I Ai Le Ola e Faavavau i Tamaiti Laiti

  • E uiga i le faaolataga o fanau iti, na aoao mai ai le Perofeta o Iosefa Samita (1805–44) “O le a faapaleina tamaiti i le afioaga o le Atua ma le Tamai Mamoe … ; o iina o le a latou olioli ai i le atoatoa o lena malamalama, mamalu ma le atamai, o loo faapea ona saunia i le malo selesitila” (History of the Church, 4:555–56).

Mosaea 17:6–20. O Le Faataitaiga a Apinati

  • Na faamamafaina mai e Elder Robert D. Hales o le Korama a Aposetolo e Toasefululua le tatau ona tatou mulimuli i le faataitaiga lototoa a Apinati i le tausia lea o poloaiga:

    “E maeu le mamana e tatau ona i ai le faataitaiga a Apinati mo i tatou uma lava! Sa ia usitaia ma le lototoa poloaiga a le Atua—e ui lava ina aveesea ai lona ola!

    “O Perofeta o tisipenisione uma ua tuuina atu ma le naunautai o latou soifua e lutia i puava ma le lototele, ua latou faia le finagalo ma folafola atu le afioga a le Atua.

    “O le Perofeta o Iosefa Samita na alu atu ‘e pei o le tamai mamoe a fasia’ (MFF 135:4), ma le le maluelue lava a o ia faataunuuina poloaiga a le Alii.

    “Ma mafaufau i le faataitaiga a lo tatou Faaola. … Sa ia tumau e oo i le uiga, ma faataunuu Lana misiona paia o le faamaeaina lea o le taulaga togiola mo tagata uma.

    “… Ia tatou mulimuli i faataitaiga a le Alii o Iesu Keriso ma Ana perofeta o aso ua mavae ma aso nei. Atonu e le o manaomia lo tatou tuuina atu o o tatou ola e faamaturo e pei o le tele o perofeta. O le mea o loo manaomia o lo tatou usiusitai lea i poloaiga a le Atua ma lo tatou faamaoni i feagaiga ua tatou osia ma Ia” (i le Conference Report, Ape. 1996, 49; po o le Liahona, Iulai 1996, 42).

Manatu e Mafaufau Loloto i ai

  • O le a lou manatu i le uiga o le avea o poloaiga a le Alii ma mea e “tusia i o outou loto”? (Mosaea 13:11).

  • Aisea e taua ai le iloa na avea ma o loo avea nei le Faaola ma se Atua? E faapefea ona avea lenei malamalama e aafia ai lo tatou faatuatua i Lona gafatia ona faaolaina i tatou?

  • E mafai faapefea ona e ola i se olaga amiotonu e tusa lava po o le a le amioleaga o loo siomia ai?

Galuega Fautuaina

  • A o e faitau i le Mosaea 12:34–13:24, sue ma faailoga Tulafono e Sefulu. Filifili se tasi o nei tulafono e te usiusitai atoa i ai. Tusi i lau api o talaaga le auala o le a e ausia ai lenei mea.

  • Faitau le Mosaea 14 ma faatusatusa i le Mosaea 3:7–8. Tusi se aotelega e tasi le itulau o le Mosaea 14 i au lava upu, pe tusi sau molimau e tasi se itulau i le uiga o le Faaola ia te oe.