Inisitituti
Mataupu 25: Alema 8–12

Mataupu 25

Alema 8–12

Folasaga

O le talaiga a Alema i le aai o Amonaea ua faailoa mai ai le auala e lagolagoina ai e le Atua ana auauna o e usiusitai ma le faamaoni ia te Ia, e oo lava i taimi e silisili ona faigata po o osigataulaga patino (tagai1 Nifae 1:20 ). Ina ua maea se taumafaiga muamua e talai atu i se nuu amioleaga, sa faamanuiaina Alema i se asiasiga mai se agelu, lea na faamautinoa atu ia te ia lona tulaga i luma o le Atua ma faatonuina o ia e toe foi atu i Amonaea. O iina, sa i ai se tagata e igoa ia Amoleka lea na mauaina ia faatonuga mai se agelu lea na tau atu ia te ia e talia Alema. Mulimuli ane, na musuia uma i laua e iloa le auala e finau ai ma loia atamamai ia na faamoemoe e faia se feeseeseaiga mo lo latou lava lelei. O aafiaga o Alema ma Amoleka ua avea ma se faataitaiga mo tatou i nei aso. E ui ina iai lava o outou luitau e feagai ai, o le a faamanuiaina lava outou e le Tama Faalelagi i le faamautinoaga, musumusuga, ma fesoasoaniga a o outou saili atu e usitai ia te Ia.

I le faaopoopoga, o nei mataupu ua faailoa mai ai le mana o le “aoai atu i le molimau paia” (Alema 4:19) e faasaga ia i latou o e e tetee i le galuega a le Alii. Ia matauina le aafiaga o mataupu faavae o le Toetu ma le Faamasinoga Mulimuli na i ai i luga o Seseroma. Ia manatu i auala e mafai ai ona aafia lou loto ma le molimau i nei mataupu faavae, faapea ai ma i latou e siosiomia oe.

Faamatalaga

Alema 8:10“Tatalo Faatauanau”

  • O le fuaitau “tatalo faatauanau” ua faailoa ai le fesootaiga mamana ma le faatumulia i le faatuatua ma le Atua. Sa fautuaina mai e Elder Joseph B. Wirthlin (1917–2008) o le Korama a Aposetolo e Toasefululua ia ni auala e mafai ona tatou iloiloina ma sailia e faaleleia ai le malosiaga o a tatou tatalo:

    Ata
    O se tamaitai o loo tatalo

    “E mafai ona ou fai atu ia te outou i le asō e manatunatu i le taua o a outou tatalo? O le a le latalata o o outou lagona i lo outou Tama Faalelagi? Pe tou te lagonaina o taimi tou te faaaluina i tatalo e faamauoaina ma siitia ai lou agaga? O i ai se avanoa mo le faaleleia?

    “E tele mafuaaga e leai ai se mana i a tatou tatalo. O nisi taimi ua avea ma faiga masani. E oo lava ina leai se uiga i a tatou tatalo pe afai tatou te faia pea lava pea upu lava e tasi i auala lava e tasi ma avea ai upu e pei o se tauloto nai lo o se talanoaga [e fesootai ai lagona]. O le mea lea na faamatalaina e le Faaola o le ‘tautu i upu’( Mataio 6:7). O ia tatalo faapea, na Ia fetalai ai, o le a le faafofogaina. …

    “Pe i ai ea ni taimi e te lagonaina ai e tutusa lava au tatalo? Pe ua e tatalo ea e aunoa ma le mafaufau i ai, e solo mai lava upu e pei o faasolo mai e se masini? Pe i ai ni taimi e te augata ai a o e tatalo?

    “O tatalo e le o tuu atoa i ai lou mafaufau o le a faigata lava ona gauai mai i ai lo tatou Tama Faalelagi. Afai ua e oo i se tulaga ua fai ai au tatalo ona o se masani, tuu loa lau mea na e fai ae mafaufau. Ia mafaufau loloto mo sina taimi i mea e te matuai faafetai ai lava” (“Improving Our Prayers,” in Brigham Young University 2002–2003 Speeches [2003], 160).

Alema 8:10–16. O Le A Fesoasoani Mai Le Alii Ia I Tatou Pe Afai Tatou Te Faatuatua

  • Ina ua maea se talaiga manuia ma le lauiloa o le talalelei i isi aai, sa upuvaleina Alema, tuufeanu i ai, ma tuliesea mai Amonaea. Ona oo mai ai lea o le faamautinoaga a le agelu e faapea ua taliaina e le Alii ia taumafaiga ma e ao ona toe foi atu Alema ma toe talai atu i le nuu (tagai Alema 8:15–16). Sa saunoa mai Peresitene Thomas S. Monson ia i latou o ē lagona i nisi taimi e le o lava a latou taumafaiga silisili pe ua latou toilalo foi:

    “‘Fai lou tiute; o le mea sili lena. Tuu i le Alii mea uma o totoe’ [‘The Legend Beautiful’ by Henry Wadsworth Longfellow].

    “A faapea e tatau ona i ai se tasi ua lagonaina le vaivai e suia ai le alu i luma ma le alu i tua o lona olaga, pe o i ai foi i latou ua le mafai ona faia ni faaiuga ia sili atu mea e fai ona o lena fefe matautia—o le fefe i le faatoilaloina—e leai lava se isi faamafanafanaga mautinoa o i ai nai lo nei afioga a le Alii: ‘Ma ua lava lo’u alofa tunoa i tagata uma o e faamaualaloina i latou lava i ou luma; aua afai latou te faamaualaloina i latou lava i ou luma, ma faatuatua ia te au, ona ou faia lea o mea vaivai ma mea malolosi ia te i latou’ [Eteru 12:27].

    “O vavega o loo maua i soo se mea pe afai e faalauteleina ia valaauga o le perisitua. Pe a suitulaga le faatuatua i le masalosalo, pe a tafiesea e le auauna atu ma le lē manatu faapito ia le tauivi ma le faaloloto o le a faataunuuina e le mana o le Atua Ona faamoemoega” (i le Conference Report, Oke. 1999, 64–65; po o leLiahona, Ian. 2000, 59).

Alema 8:18. Sa “Toe Faataalise Atu” Alema

  • Ina ua maea ona faalogo atu i le savali a le agelu, sa “toe foi atu faanatinati” Alema i Amonaea. Sa aoao mai e Peresitene Henry B. Eyring o le Au Peresitene Sili e faapea o le usitai vave atu i le Alii e tatau ai mo lo tatou manuia faaleagaga:

    “E tusa lava pe o le a le tele o lo tatou faatuatua i le taimi nei e usitai ai i le Atua, e manaomia pea ona tatou faamalolosia atili ma faafouina pea e le aunoa. E mafai ona tatou faia lena mea e ala i le filifili nei e tali vave atu e usitai ma naunau atili e tumau. O le aoao ina ia vave amata ma ia tutumau ai, o ki ia i sauniuniga faaleagaga. …

    “Ua tuuina mai e se Tama Faalelagi alofa ma Lona Alo Pele ia i tatou uma le fesoasoani e mafai ona La’ua tuuina mai tatou te manumalo ai i tofotofoga o le olaga ua i o tatou luma. Ma e tatau ona tatou filifili e usitai ona faia ai lea. O aluga o taimi, faapea ma a tatou filifiliga i aso taitasi, [tatou] te atiina ae ai le faatuatua tatou te manumalo ai i tofotofoga o le usiusitai. E tatau ona tatou filifili e vave faataunuu soo se mea e finagalo ai le Atua ia i tatou” (i le Conference Report, Oke. 2005, 39, 41; po o le Liahona, Nov. 2005, 38, 40).

Alema 8:26. Anapogi

  • Sa anapogi Alema e saunia ai lona mafaufau ma lona agaga e talai atu i tagata o Amonaea. O le anapogi e masani lava ona faailoa atu ai i le Alii le mamafa o la tatou talosaga. Sa aoao mai Peresitene James E. Faust (1920–2007) o le Au Peresitene Sili e faapea: “E i ai taimi e talafeagai ai le anapogi o se faamaoniga malosi o lo tatou loto faamaoni. … Pe a tatou anapopogi, tatou te faamaualaloina i tatou lava, ma o le ala lea e atili ai ona tatou iloa le Atua ma Ona faamoemoega paia” (i le Conference Report, Ape. 2002, 68; po o le Liahona, Iul. 2002, 67).

  • Sa faamalau mai e Elder Joseph B. Wirthlin nisi o faamanuiaga ia e tafe mai i o tatou olaga pe a faaopoopo atu le tatalo i se anapogi talafeagai:

    “O le anapogi, e o lua ma le tatalo malosi, e mamana. E mafai ona faatumuina ai o tatou mafaufau i faaaliga a le Agaga. E mafai ona faamalolosia i tatou i taimi o tofotofoga.

    … O le anapogi ma le tatalo e mafai ona fesoasoani e atiina ae ai i totonu o i tatou le lototoa ma le mautinoa. E mafai ona faamalolosia ai o tatou tagata ma fausia le pulea e le tagata o ia lava ma le amio pulea. O le tele lava o taimi pe a tatou anapopogi, e tele atu le mana o a tatou tatalo amiotonu ma olega. E tuputupu ae ai molimau. Tatou te matutua faaleagaga ai ma faalelagona ma faapaiaina ai o tatou agaga. O taimi uma lava tatou te anapopogi ai, tatou te maua ai sina faaopoopoga teisi o lo tatou puleaina o manaoga ma faanaunauga faalelalolagi. …

    Ata
    Tagata ua le tagofia ia meaai

    © 1994 Steve Bunderson

    “O le anapogi i le agaga sao ma le ala a le Alii o le a faamalolosia ai i tatou faaleagaga. O le a faamalolosia ai lo tatou loto pulea, faatumuina ai o tatou fale i le filemu, faamalamalamaina ai o tatou loto i le olioli, faamalosia ai i tatou e tetee atu i faaosoosoga, saunia ai i tatou mo taimi o faigata, ma talaia ai pupuni o le lagi” (i le Conference Report, Ape. 2001, 95, 97–98; po o le Liahona, Iul. 2001, 89, 91).

Alema 9:14–23. O Faamanuiaga Maoae E Aumaia Ai Tiutetauave Maoae

  • Sa lapatai mai Alema e faapea e ui lava o sa Lamana o ni tagata amioleaga i lena taimi, o le a sili atu ona alofagia e le Alii nai lo tagata Amonaea i le aso o le faamasinoga (tagai Alema 9:14). Sa mulimulitaia e sa Lamana uputuu ia sa tuufaasolo atu ia i latou, ae o sa Nifae i le aotelega ma le nuu o Amonaea i tulaga patino sa avea ma “se nuu e sili ona alofagia e le Alii; … e sili i atunuu ese uma, ituaiga, gagana, po o nuu” (Alema 9:20). O faamanuiaga maoae e oo mai ai ia tiutetauave maoae.

    Sa aoao mai e Sister Sheri L. Dew, a o avea ai o ia ma fesoasoani i le au peresitene aoao o le Aualofa e faapea: “‘O le ua foaiina atu i ai mea e tele e sueina mai ia te ia mea e tele’(MFF 82:3), ma e i ai taimi e mamafatu mea ua poloaiina ai i le avea ma soo. Ae pe tatou te le faamoemoeina ea le faigamalaga agai atu i le mamalu e faavavau e faaalualuina ai i luma i tatou? O nisi taimi tatou te fetuunai ai pe tau faamaoniaina ai lo tatou tulimatai atu i mea o le lalolagi ma lo tatou le manatu i lo tatou alualu i luma faaleagaga e ala lea i lo tatou tauina ia i tatou lava faapea ma isi o le ola ai i le talalelei e le tele se taimi po o ni taumafaiga mai ia i tatou e moomia ai. O le faatulagaga a le Alii i amioga o le a maualuga pea ma manaomia pea nai lo le lalolagi, aua o taui a le Alii e faavavau ma sili atu ona mamalu —e aofia ai le fiafia moni, filemu, ma le faaolataga” (“O i Tatou o Tamaitai o le Atua,” Liahona, Ian. 2000, 118 119).

Alema 10:2–3. Liae—“o se Suli o Manase”

  • O le gafa o Liae i le avea ai o se suli o Manase o se vaega o le faataunuuga o se folafolaga ia Iosefa o anamua. I sina taimi puupuu a o lei maliu o ia, sa tuuina atu ai e Iosefa o Aikupito ia faamautinoaga na faia e le Alii ia te ia e faatatau i ana fanau:

    “Sa ou maua se folafolaga mai le Alii, e faapea … o le a faatuina e le Alii le Atua se lala amiotonu ai o’u sulugatiti. …

    “Ma ua oo foi ina ua toe faataapeapeina i latou; ma se lala e mafaiesea, ma auina atu i se nuu mamao; ae ui i lea e manatulia [i latou i]f eagaiga a le Atua, pe a afio mai le Mesia. …

    “O loo faapea ona fetalai mai le Alii le Atua o ou tama ia te au. …

    Ata
    Ua talai atu Liae

    “O lea e tusitusi ai le fua o ou sulugatiti, e tusitusi foi le fua o sulugatiti o Iuta. O mea foi e tusia e le fua o ou sulugatiti, atoa ma mea e tusia e le fua o sulugatiti o Iuta, e tutupu faatasi e faatoilaloina ai mataupu pepelo, e faaiuina foi finauga, ma faatuina le filemu i le fua o ou sulugatiti, e aumaia ai foi i latou i le iloa lelei o latou tama i aso e gata ai, atoa foi ma le iloa lelei o au feagaiga, o loo fetalai mai ai le Atua” (JST, Genesis 50:24–25, 27, 31; tagai foi 2 Nifae 3:5, 12).

  • A o lei oo i le latou malaga i le vao, o Liae ma Isamaeli, o suli uma o Iosefa, sa nonofo ma o la aiga i Ierusalema, o se vaega o le malo o Iuta. Sa fautua mai e se tasi o tusitala se faamalamalamaga mo le pogai o le tupuaga o Liae, e ui lava sa tupuga mai ia Iosefa, sa soifua i Ierusalema, lea mo le tele o vaega o ni suli o Iuta: “O nisi tamaiti o le Tusi a Mamona o loo tau manatunatu pe faapefea e suli o Iosefa ona nonofo ai pea i Ierusalema i le 600 T.L.M. ae o le toatele o tagata o ituaiga o Efaraima ma Manase sa ave faatagataotaua e tagata Asuria pe tusa ma le 721 T.L.M. O se mau i le 2 Nofoaiga a Tupu e ono maua ai se tali i lenei faafitauli. O loo taua i lenei faamaumauga e faapea pe tusa ma le 941 T.L.M. o Asa, le tupu o le laueleele, sa ia toe faapotopotoina i Ierusalema tagata uma o Iuta ma Peniamina ‘ma isi tagata ese faatasi ma i latou mai Efaraima ma Manase.’ (2 Nofoaiga a Tupu 15:9 .) O nei ‘tagata ese … mai Efaraima ma Manase’ ia na faapotopotoina i Ierusalema pe tusa o le 941 T.L.M. atonu o loo aofia ai ma augatama o Liae ma Isamaeli” (Daniel H. Ludlow, A Companion to Your Study of the Book of Mormon [1976], 199).

Alema 10:22–23. “Tatalo a e Amiotonu”

  • Ia matau le aafiaga o se nuu ona o tatalo a e amiotonu. O tatalo a e amiotonu sa puipuia ai sa Nifae mai le faaumatiaina mulimuli ane ai i aso o le Taitaiau o Moronae ma Samuelu le sa Lamana (tagai Alema 62:40; Helamana 13:12–14).

    Sa saunoa mai Peresitene Spencer W. Kimball (1895–1985) e uiga i tatalo o loo faia i o tatou aso: “E toatele naua e amiotonu ma faatuatua ua ola i poloaiga uma, ma o a latou talosaga ma olaga ua faasaoina mai ai le lalolagi mai le faafanoga” (mai le Conference Report, Ape. 1971, 7; po o leLiahona, Oke. 1971, 15). O le taimi lava na faaumatia ai pe na aveeseina ai tagata amiotonu mai Amonaea, na muta ai foi loa ma tatalo a ē amiotonu e puipuia ai le nuu ma “o tagata ola uma o sa Amonaea sa faaumatiaina” (Alema 16:9).

Alema 11:22. “O Oneti Ario e Ono”

  • O se oneti o le tupe e aupito sili ona taugata lea i le nuu o sa Nifae. E tasi se faamoemoega faigofie mo le faaaofia ai o le tupe siliva a sa Nifae i le Alema 11 ina ia faailoa mai ai le taufaalataina e Seseroma o Amoleka pe ana faapea e “faafiti [Amoleka] ua i ai Lē Soifua e Pule Aoao”(Alema 11:22). Ua iloa ai e tutusa lelei le ono oneti siliva ma le totogi 42 aso mo se faamasino i le nuu o tagata o Amonaea (tagai Alema 11:3, 11–13).

Alema 11:40. O Ai e Aofia ai i le Togiola?

  • O loo i ai lava se fenumiai i le Alema 11:40—e i ai nisi tagata o loo manatu sa aoao mai Amoleka e faapea sa puapuagatia Keriso mo na o i latou o e talitonu ma salamo. E le sao lenei mea. Ua tau mai ia i tatou e tusitusiga paia, o le Faaola sa “onosai i tiga o tagata uma, e moni, o tiga o tagata ola uma, o tane ma fafine, ma fanau” (2 Nifae 9:21; tagai foi i le Mosaea 4:7). Ae peitai, afai o le a le salamo ia tagata, ua faailoa mai e le Faaola e faapea “e le mafai ona faamamaina i latou i lo’u toto” (MFF 29:17). E manino lava, o le mea na manao ia Amoleka e faailoa atu o le mea moni e faapea o se vaega o le Togiola e ono le faaaogaina pe afai e filifili e amioleaga e le salamo—e le o le Faaola na puapuaga mo na o i latou o le a salamo.

Alema 11:41–45. Toetu

  • Ua faamatalaina e le Lomifefiloi o le Tusi Paia le uiga o le Toetu “o le tuufaatasia o se tino agaga ma se tino o aano ma ivi, e le toe tuueseeseina lava” (“Toetu,” 761; tagai foi Guide to the Scriptures, “Resurrection”). O le malamalama i le Toetu e faaopoopo ai uiga sili atu i le olaga faaletino.

    Sa faamatalaina e Elder Dallin H. Oaks o le Korama a Apoestolo e Toasefululua le “faamoemoe ola” lea e oo mai i tagata taitoatasi o e mauaina le faatuatua ma le faamoemoe i lenei upumoni paia ma le aafiaga e mafai ona maua i le ola ai i lea aso ma lea aso:

    “O le ‘faamoemoe ola’ lea ua tatou maua i le toetu, o lo tatou talitonuga maumaututu lea o le oti e le o le mutaaga lea o lo tatou faasinomaga ae ua na o se laasaga e tatau ai i le suiga o le faagasologa mai le olaga faaletino i le tino ola pea. O lenei faamoemoe ua suia ai le vaaiga atoa lava i le olaga i la le tino. … …

    “O le mautinoa o le toetu tatou te maua ai le malosi ma le faamoemoe e onosaia ai luitau o le olaga o loo feagai ma i tatou taitoatasi, ma i latou tatou te alolofa i ai, o mea e pei o tulaga le atoatoa faaletino, mafaufau, po o lagona, e tatou te o mai ma i tatou ina ua fananau mai pe oo mai foi i le gasologa o le olaga. Ona o le toetu, ua tatou iloa ai o nei faaletonu faaletino, ua na o se taimi le tumau!

    “O le mautinoa o le toetu e aumaia ai foi ia i tatou se lagona malosi e tausia ai poloaiga a le Atua i o tatou olaga faaletino. …

    “… E le gata i lea, vagana ua faamamaina a tatou agasala o le olaga nei ma soloiesea i le salamo ma le faamagaloga (tagai Alema 5:21; 2 Nifae 9:45–46; MFF 58:42), ona tatou toetutu mai ai lea ma se ‘manatu pupula’ (Alema 11:43) ma se ‘malamalama atoatoa i a tatou agasala, ma lo tatou eleelea’ (2 Nifae 9:14; tagai foi Alema 5:18). O le matuia o lena mea moni o loo faamamafaina mai i le tele o mau, o loo tau mai ai o le a sosoo le Toetu ma le Faamasinoga Mulimuli (tagai 2 Nifae 9:15, 22; Mosaea 26:25; Alema 11:43–44; 42:23; Mamona 7:6; 9:13–14). E moni, ‘e tatau i tagata ona sauniuni i lenei olaga e fetaiai ma le Atua’ (Alema 34:32 ). …

    “O lo tatou malamalama mautinoa foi o le toetu mai i se tino ola pea, ua tatou maua ai foi le lototetele e fetaiai ai ma le oti—e oo lava i se oti ua tatou ta’ua o le oti ae le i oo i le taimi. …

    “O le mautinoa o le toetu ua fesoasoani foi ia i tatou e onosaia ai le tete’a ma e pele ia i tatou ona o le oti. … E ao ona tatou taufai vivii i le Atua mo le toetu ua mautinoa lea tatou te valavala ai faaletino mo se taimi le tumau ma aumaia ai ia i tatou le faamoemoe ma le malosi e faaauau ai pea” (i le Conference Report, Ape. 2000, 17–18; po o le Liahona, Me 2000, 15–16).

  • A o avea o se tasi o Fitugafulu, sa faamatalaina e Elder Sterling W. Sill (1903–94) nisi o faamanuiaga o le Toetu ina ua ia aoao atu e faapea o se tino toetu “e matagofie e sili atu i mea uma e mafai ona malamalama i ai, o lagona ua lelei atili, ua faateleina mana o le faautagaoo, ma le faateleina naua o le loloto o le alofa, malamalama, ma le fiafia” (i le Conference Report, Oke. 1976, 67; po o le Liahona, Fep. 1977, 48 ).

  • Sa faamalamalamaina foi e Peresitene Iosefa Filitia Samita (1876–1972) le mea o le a fai e le toetu i o tatou tino faaletino: “E leai se mafuaaga mo soo se tagata e popole ai i foliga vaaia o tagata taitoatasi i le toetutu. O le oti o le faagasologa o le faamamaina o le tino i tulaga faaletino. E i ai mafuaaga tatou te talitonu ai o foliga vaaia o [tausaga matua] le matua o le a mou atu ma o le tino o le a toefuataiina i le malosi atoa o le tino ma le mafaufau o le tane ma tamaitai. O tamaiti o le a toetutu mai lava o ni tamaiti, aua e leai se tuputupu a’e i le tuugamau. O le a faaauau pea ona tuputupu a’e tamaiti seia latou ausia le tulaga atoa o o latou agaga” (Answers to Gospel Questions, comp. Joseph Fielding Smith Jr., 5 vols. [1957–66], 4:185).

Alema 12:9. O A “Mealilo a le Atua”?

  • Sa faamalamalama mai e Peresitene Iosefa Filitia Samita e faapea o mealilo a le Atua o aoaoga faavae paia na o le talalelei e tatau mo lo tatou faaolataga lea e le o malamalama i ai le lalolagi: “Ua folafola mai e le Alii e faaalia Ana mealilo ia i latou o e e auauna ia te Ia ma le faamaoni. … E faigofie tele le talalelei, ina ia mafai ai, e oo lava i tamaiti ua i ai i tausaga o le tali atu mo ia lava ona malamalama i ai. E aunoa ma le fesiligia, o loo i ai lava aoaoga faavae i lenei olaga e le mafai ona tatou malamalama i ai, ae pe a oo mai le atoaga o le a tatou vaai i ai i ia mea uma e faigofie ma talafeagai ma e tusa ai ma lo tatou malamalamaaga. O aoaoga faavae ‘faigofie’o le Talalelei, e pei o le papatisoga, o le togiola, o mealilo na ia i latou o ē le mauaina le taitaiga a le Agaga o le Alii” (Church History and Modern Revelation, 2 vols. [1953], 1:43).

    O mealilo a le Atua e le tatau ona fenumia’ia ma galuega eleelea o “mealilo,” po o mea foi e le i faaalia mai e le Atua. A o saunoa ai i le faaaogaina lata mai o le upu mealilo, sa faamalamalama mai ai e Elder Bruce R. McConkie (1915–85) o le Korama a Aposetolo e Toasefululua e faapea: “E iai foi le mea e puipuia ma gata mai ai le faaaogaina o le faaupuga mealilo; e sili atu lona faaaogaina i talanoaga o aso uma nai lo le faaaogaina faatusitusiga paia, ma e i ai lona faasinoga i lena tino o aoaoga i le tulaga o le faatatauga o manatu po o taumatematega, o mea na e le i faaalia manino mai e le Alii i nei aso. O mea la nei e fai i ai faasinoga pe a fautuaina toeaiina ina ia aua le talanoaina mealilo.” (Mormon Doctrine, 2nd ed. [1966], 524).

Alema 12:10–12. Tatou Te Maua “le Tufaaga Itiiti o le Upu” Pe Afai e Faamaaaina o Tatou Loto

  • Sa faamalamalama mai e Elder Dallin H. Oaks afai tatou te teenaina ia faaaliga mai le Agaga Paia, ua tatou faatapulaaina le tele o mea e mafai ona tatou aoaoina: “E mafai ona tatou aoao atu ma aoaoina ia mealilo a le Atua e ala mai i lona Agaga Paia. Afai tatou te faamaaaina o tatou loto i faaaliga ma faatapulaaina lo tatou malamalama i mea e mafai ona tatou maua e ala i le suesue ma faatatau i ai, ua faatapulaaina i tatou i le mea na saunoa ai Alema ‘o le tufaaga itiiti o le upu’” (The Lord’s Way [1991], 42).

Alema 12:12–14. Faamasinoina e Tusa ma a Tatou Upu, Galuega, ma Mafaufauga

  • Sa aoao mai e Elder Dallin H. Oaks e faapea o le Faamasinoga ua le na o se toe suesueina o faatinoga sa faia i le olaga faaletino, ae peitai o se iloiloga po o ai ma po o le a foi le ituaiga o tagata ua avea ai i tatou ona o se taunuuga o a tatou galuega:

    “O loo faamatala mai e le perofeta o Nifae le Faamasinoga Mulimuli i le tulaga ua avea ai i tatou: ‘Afai foi ua eleelea a latou galuega ua eleelea lava i latou; afai ua eleelea i latou e le mafai ona nonofo i le malo o le Atua’ (1 Nifae 15:33; faaopoopo le faatusilima). O loo tautino mai e Moronae, ‘O lē ua eleelea e eleelea pea o ia; o lē ua amiotonu, e amiotonu pea o ia’ (Mamona 9:14; faaopoopo le faatusilima; tagai foi Faaaliga 22:11–12; 2 Nifae 9:16; MFF 88:35). E faapena foi ona moni i e ‘manatu faapito’ pe ‘le usiusitai’ po o se isi lava uiga faaletagata e le ogatasi ma mea e manaomia e le Atua. I le ‘tofi’ o e amioleaga i le faamasinoga mulimuli, o loo faamatala ai e Alema afai e tausalaina i tatou i a tatou upu, o a tatou galuega, ma o tatou manatu, ‘e le maua foi i tatou ma le le pona; … ma i lenei tulaga matautia tele, tatou te le faamalosi e tepa ae i lo tatou Atua’ (Alema 12:14).

    “E mai i ia aoaoga tatou te faia ai se faaiuga o le Faamasinoga Mulimuli ua le na o se iloiloga o amioga lelei ma leaga [a se tagata] —ae o mea sa tatou faia. O le faailoaina mai o aafiaga faaiu o a tatou amioga ma mafaufauga —i tulaga ua avea ai i tatou. E le lava i soo se tasi le na o le faia o taga faaaliali. O poloaiga, o sauniga, ma feagaiga o le talalelei e le o se lisi o ni teugatupe moomia e faia i se teugatupe faalelagi. O le talalelei a Iesu Keriso o se fuafuaga ua ta’u mai ai ia te i tatou le ala e avea ai i tatou ma ē ua finagalo ai lo tatou Tama Faalelalgi” (i le Conference Report, Oke. 2000, 41; po o le Liahona, Ian. 2001, 40).

Alema 12:15–18. “O Le Oti Faalua, O le Oti Faaleagaga Lea”

Alema 12:21 Kerupi

Alema 12:24. “Olaga Faataitai”

  • O le faaupuga olaga faataitai po o aso faataitai o se fuaitau sa na o Alema lava na faaaogaina i le Tusi a Mamona (tagai Alema 42:4, 10, 13). Sa faamatala mai e Elder L. Tom Perry o le Korama a Aposetolo e Toasefululua lenei olaga faataitai: “O le faamoemoega autu o le olaga i le lalolagi, ina ia mafai e o tatou agaga ia sa ola a o lei i ai le lalolagi, ona tuufaatasi ma o tatou tino mo se vaitaimi o avanoa maoae i le olaga faaletino. O le tuufaatasia o ia mea e lua ua tatou maua ai le avanoa e tuputupu ae ai, atiina ae ma matutua ai faalemafaufau, lea e na o le tuufaatasia lava o le agaga ma le tino i se vaitaimi faapitoa e tofotofoina ai, lea e ta’u o se vaitaimi faataitai o o tatou olaga. O le taimi lea e aoao ma tofotofoina ai ina ia faamaonia ai i tatou lava ia agavaa mo avanoa e faavavau. O se vaega atoa lea o le fuafuaga paia a lo tatou Tama mo Ana fanau” (i le Conference Report, Ape. 1989, 16; po o le Liahona, Iul. 1989, 16 17).

Alema 12:32. O Poloaiga ina ua maea ona Iloa le Ala

  • Sa aoao mai e Peresitene Boyd K. Packer o le Korama a Aposetolo e Toasefululua, e faapea o le fuafuaga a le Atua e aumaia ai tali i fesili faigata. A o saunoa atu i faiaoga o le autalavou, sa ia fai mai:

    “O tagata talavou e manatunatu lava pe ‘aisea?’—Aisea ua poloaiina ai i tatou e fai nisi mea, ma pe aisea ua poloaiina ai i tatou e aua le faia isi mea? O se malamalamaaga i le fuafuaga o le fiafia, e oo lava i tulaga otootoina, e mafai lava ona tuu atu i o outou mafaufau se fesili ‘aisea.’ …

    “O le tele o fesili faigata ua feagai ma i tatou i le Ekalesia i le taimi nei, ma e mafai ona tatou lisiina—faapau pepe ma isi mea uma, o luitau uma pe o ai e umiaina le perisitua ma pe o ai foi e le umiaina—e le mafai ona taliina e aunoa ma sina malamalamaaga o le fuafuaga e avea o se vaaiga i tua atu.

    “O le upu lenei a Alema, ma o lau mau lea ou te fiafia i ai, ae ou te manatu ua leva, e ui lava ua ou suia nei ma toe sui foi: ‘na aumai ai e le Atua opoloaiga ia te i latou, ina ua uma ona ia faaali mai ia i latou le ala o le togiola’ (Alema 12:32; faaopoopo le faamamafa). …

    “… Afai o loo e taumafai e tuu atu i [tamaiti aoga] se fesili ‘pe aisea,’ ia mulimuli i lena faatulagaga: ‘Na aumai ai e le Atua o poloaiga ia te i latou, ina ua uma ona faaali ia te i latou le ala o le togiola’” (“The Great Plan of Happiness” [Church Educational System symposium on the Doctrine and Covenants, Aok. 10, 1993], 3.

Manatu e Mafaufau Loloto i ai

  • O le Alema 8:18 o loo faamaumauina ai sa “toe faataalise” atu Alema i Amonaea. I le Kenese 22:3 tatou te faitau ai ia Aperaamo lea sa “ala tulai i le taeao” e ave ia Isaako i luga o le mauga. E faapefea ona e faaaogaina nei fuaiupu ia te oe lava ia pe a e mauaina se uunaiga mai le Atua?

  • Faitau le Alema 10:6. O le a sou manatu i le uiga o le tala a Amoleka ina ua ia fai mai sa “atulasi ona valaauina” o ia ae “sa le faalogo”?

Galuega Fautuaina

  • Alema 9:8–14 ua faailoa mai ai le taua o le manatuaina. Ia fai se lisi puupuu o aafiaga faaleagaga taua sa faamanuiaina ai oe e maua. Atonu e mafai foi ona e talanoa i ou matua ma matua o matua ma fai se lisi faapena o aafiaga faaleagaga taua mai i o latou foi soifuaga. O a faamanuiaga e ono oo mai i le toe suesueina pea o nei lisi ma faaauau pea ona faaopoopo atu i ai?

  • Alema 11–12 o loo faamaumauina ai faamatalga auiliili e uiga i le Toetu. Ia tusi se pepa puupuu mai nei mataupu e uiga i mataupu faavae autu o le toetu ma le aafiaga o lou malamalamaaga i le Toetu ma le Faamasinoga ua i ai i lou olaga.

Lolomi