Alema 17–22

Folasaga

Ona o lo latou faatinoina o le alofa ma lo latou malamalama i le taua o se agaga, ua fai ai Amona ma ana soa ma faataitaiga mo auauna a le Alii i soo se mea. E ala i lo latou aafiaga o le a e vaai ai i le taua o sauniuniga faaletagata lava ia, o le mana o le faia o se faataitaiga amiotonu, ma le manaomia o le fausia o se sootaga anoa ma i latou o loo e tautuaina. Ma le isi, sa malamalama ia Amona ma ona uso o lo o i ai talitonuga malolosi ia i latou sa auauna i ai. Ia saili mo auala sa latou mauaina e faasoa atu ai upumoni o le talalelei e faatatau i le Agaga, alofa, ma le molimau. E ala i le faataitai i a latou faataitaiga, e mafai ai ona avea oe ma se auauna malosi tele i aao o le Alii e fesoasoani ai e aumai isi ia Keriso.

Faamatalaga

Alema 17:2. O i Latou o Ē Auauna Faatasi e Atiina Ae se Noataga Faaleuo

O i latou o e e galulue i le tovine a le Alii ua i ai se noataga o le alofa lea e sau mai le galulue faatasi ai i le “seleselega”. O lenei noataga e faalolotoina e aafiaga masani o le faatuatua ma le molimau. Sa faasoa mai e Elder L. Tom Perry o le Korama a Aposetolo e Toasefululua se faataitaiga patino ina ua toe feiloai i lana uluai soa faifeautalai ina ua mavae ni tausaga:

“Sa i ai se tulaga na ou oo i ai i nai tausaga ua mavae atu ina ua maua se telefoni mai lou atalii o Lee. Sa ia ta’uina mai o la’u soa muamua lava i le misiona o loo nonofo faatasi ma se aiga latou te tuaoi, ma o loo manao e fia talanoa mai ia te au. … E ese le manaia o le toe faatasi ina ua mavae le tele o tausaga e lei toe fevaaia’i.

“A o avea ma faifeautalai, sa tuuina mai ia i maua le avanoa e tatalaina ai se eria i Ohaio mo le galuega talai. Talu ai ona o lenei tofiga, sa faatagaina ai i maua ona talai faatasi mo le 10 masina. O ia sa aoaoina au ma o lau soa muamua foi lea. … Sa faigata ia te au ona tau tulituli o ia, ae a’o ma galulue faatasi sa matuai vavalalata lava i maua o se soa.

“E le’i muta ai le ma soa i lena tofiga e 10 masina. Na amata le Taua Lona Lua o le Lalolagi, ma ina ua ou foi atu i le fale, sa na o sina taimi lava na ou taufaamasani ai ae ave loa au i le vaegaau. O lo’u Aso Sa muamua i le tolauapiga a le vaegaau, sa ou auai atu ai i se sauniga a le AAG, sa ou vaai atu ai i se muliulu ou te masani ai. O la’u soa muamua faifeautalai. Na toetoe atoa le isi lua ma le afa tausaga na sosoo ai o ma faatasi.

“E ui lava i le eseese tele o tulaga sa i ai mo i maua i le auaunaga faamiliteli, ae sa ma taumafai pea e faaauau le faatinoga o auaunaga faafaifeautalai. I le tele o taimi ma te mafaia, ma te tatalo faatasi ai. Afai e mafai ai, e fai faatasi a ma suesuega o tusitusiga paia. …

“Sa vaetofiaina uma i maua e avea ma taitai vaega. Ma sa ma toe mauaina ai foi le avanoa e auauna ma aoao faatasi ai le talalelei viia a lo tatou Alii ma le Faaola. Sa sili le faamanuiaina o i maua i le vaegaau nai lo le taimi na ma faifeautalai faamisiona ai. Aisea? Aua o i maua o ni faifeautalai ua maea misiona ua i ai le poto masani.

“O lau asiasiga i lau soa faifeautalai muamua o le avanoa mulimuli foi lea sa ma faatasi ai ma ia. Sa mafatia o ia mai se faamai e leai se vaifofo ma sa maliu ai i ni nai masina mulimuli ane. O se tulaga matagofie tele le toe faaolaola o a ma misiona, ona faamatala lea e uiga i o ma olaga mulimuli ane ina ua maea le galuega faafaifeautalai. Ma te toe manatunatu i ā ma auaunaga i au epikopo, o fautua maualuga, ma au peresitene o siteki, ma sa ma talafaalialia i ā ma fanau ma fanau a fanau. A o ma nonofo ai ma maofa i le avanoa o le toe faatasia, sa le mafai ona tatalia le mafaufau i se tala o loo i le Mataupu e 17 o le Tusi a Alema” (i le Conference Report, Oke. 2001, 94–95; po o le Liahona, Ian. 2002, 89 90).

Alema 17:2–3.

O a mea na faia e Amona ma ona uso e saunia ai e faasoa atu le talalelei i le mana ma le pule? O le a se mea e mafai ona e faia e faaaoga ai nei mataupu faavae?

Alema 17:2. Ua “Latou Suesueina Tusi Paia ma le Filiga”

Sa suesueina e atalii o Mosaea ia tusitusiga paia o se vaega e tatau ai mo a latou sauniuniga faafaifeautalai. E faapena foi, sa mauaina e Ailama Samita le fautuaga mai le Alii e sauniuni mo le galuega faafaifeautalai e ala i le saili muamua ia maua Lana upu (tagaiMFF11:21–22). O le tusitaulima a faifeautalai Talai La’u Talalelei o lo o faamamafa mai ai le taua o le saili atu i le Agaga Paia, mauaina o se naunauga malosi e aoao mai, ma faatinoina mea ua tatou aoaoina, o ni vaega autu o le suesue ma le mataalia i le talalelei:

“O au suesuega i le talalelei e sili atu ona aoga pe a aoaoina oe e le Agaga Paia. Ia amata lava au suesuega i le talalelei i le tatalo mo le Agaga Paia e fesoasoani ia te oe e aoao. O le a Ia aumaia le malamalama ma le faamautinoaga lea o le a faamanuiaina ai lou olaga ma mafai ai e oe ona faamanuiaina ai ia olaga o isi. O le a faateleina lou faatuatua ia Iesu Keriso. O le a tuputupu ae lou naunau e salamo ma faaleleia.

“O lenei ituaiga suesue e saunia ai oe mo le galuega, tuuina atu ai faamafanafanaga, foia ai faafitauli, ma maua ai e oe le malosi e tumau ai e oo i le iuga. O le manuia i suesuega i le talalelei e manaomia ai le naunau ma le faatinoga. ‘Aua o le saili ma le filiga e iloa e ia, e faamatalaina mea lilo a le Atua ia te i latou, i le mana o le Agaga Paia, e tusa i ona aso nei ma aso anamua’ (1 Nifae 10:19). E pei o Enosa, a o e matelaina mo upu o le ola e faavavau ma a o e faatagaina nei upu e‘[tuia] ai [lou] loto’ (Enosa 1:3), o le a tatala e le Agaga Paia lou mafaufau ma lou loto i le malamalama ma le iloa sili atu.

“O le aoaoina o le talalelei o se faagasologa foi o le mauaina o faaaliga (tagai Iakopo 4:8)”
E le gata i lea, ua fautuaina mai e leTalai La’u Talalelei le faaaogaina o api talaaga o tusitusiga paia o se tasi o auala e faateleina ai le malosiaga o lou suesue i tusitusiga paia. E ala i le faamaumauina o ou manatu ma aafiaga a o e suesue au tusitusiga paia, ua e tatala ai avanoa fou o le mauaina o faaaliga patino:

O se api talaaga o suesuega e [mafai] ona fesoasoani ia te oe ia malamalama, faamanino, ma manatua ai mea ia e te aoaoina. Sa aoao mai e Elder Richard G. Scott, ‘O le malamalama ua faamaumauina lelei, o le malamalama lea e mafai ona maua i taimi e manaomia ai. O faamatalaga taua faaleagaga e tatau ona teuina i se nofoaga paia, e mafai ona faaali atu ai i le Alii, lou faatauaina o ia mea. O lena ala, e faailoa mai ai, e mafai ona e mauaina le malamalama e sili atu’ (‘Ausia o le Malamalama Faaleagaga,’ Liahona, Ian. 19 94, 104). Ia toe iloilo lau api talaaga o suesuega e manatua ai aafiaga faaleagaga, tagai i malamalamaaga fou, ma ia iloa lou tuputupu ae.

“O lau api talaaga o suesuega atonu o se api lapoa e fai sona faavaa malo, se tamai api, po o se faila. Ia faamaumauina ma faatulagaina ou lagona ma aafiaga i se auala e fetaui lelei i le auala sa e aoaoina ai. Ia atiina ae sau lava faatulagaga e faigofie ai ona e maua faamatalaga autu i le lumanai. Ia faaaoga soo e iloilo ai, iloa, ma faaaoga ia mea ua e aoaoina. Ia faaaoga lau api talaaga o suesuega e tusi ai i lalo mea taua ma faamaumau ai uunaiga” (itulau x).

Alema 17:. O Faamanuiaga o le Tatalo ma le Anapogi

Sa faailoa mai e Elder M. Russell Ballard o le Korama a Aposetolo e Toasefululua le mana o le anapogi ma le tatalo i le galuega a le Alii i le tala lea: “I nai tausaga ua mavae atu, sa valaauina ai se tagata liliu mai faamaoni, le Uso ia George McLaughlin e pulefaamalumalu i se paranesi laitiiti e 20 tagata i Farmingdale, Maine. O ia o se tagata lotomaulalo, e ave loli i se tiliva susu mo le tausiga o le aiga. O lana anapogi ma le tatalo faamaoni, na aoaoina ai o ia e le Agaga i le mea na moomia ona fai e ia ma tagata o lana paranesi ina ia fesoasoani ai ia alu i luma le Ekalesia i lo latou eria. O lona faatuatua tele, tatalo e le aunoa, ma le mana o faataitaiga, na ia aoaoina ai ona tagata i le auala e faasoa atu ai le talalelei. O se tala ofoofogia, o se tasi o tala maoae faafaifeautalai o lenei tisipenisione. I totonu o le tausaga e tasi, e 450 papatisoga liliu mai i totonu o le paranesi. O le tausaga na sosoo ai na i ai se faaopoopoga e 200 o tagata liliu mai” (i le Conference Report, Ape. 2003, 39; po o le Liahona, Me 2003, 38–39).

Alema 17:9. Tatalo ma Anapogi mo i Latou e le o maua le Upumoni

Sa fautuaina e Peresitene Gordon B. Hinckley (1910–2008) ia tagata uma o le ekalesia ina ia galulue ma tatalo mo avanoa e talai atu ai le talalelei: “Ia faatupuina le silafia i loto o tagata uma o le ekalesia, lona lava agavaa e aumaia isi i se malamalama o le upumoni. Ia galueaiina e ia. Ia tatalo o ia ma le naunautai mo lea tulaga” (“Saili Tamai Mamoe, Fafaga Mamoe,” Liahona, Iul. 1999, 120).
Sa apoapoai mai Elder M. Russell Ballard ia i tatou ina ia tatalo mo le taitaiga i le faia o le galuega a le Alii: “I totonu o fale o loo fefaasoaai ai le talalelei tatou te tatalo ai mo le taitaiga mo i tatou lava, ma e tatou te tatalo mo le soifua manuia faaletino ma le faaleagaga o isi. Tatou te tatalo mo tagata o loo aoaoina e faifeautalai, mo a tatou uo, ma mo i latou e le auai i lo tatou faatuatuaga. I fale e fefaasoaai ai le talalelei i le taimi o Alema e ‘potopoto soo faatasi [tagata] i le anapogi ma le tatalo faatauanau ia faaolaina agaga o e ua le iloa le Atua’ (Alema 6:6)” (i le Lipoti ole Konafesi, Ape. 2006, 88; po o le Liahona, Me 2006, 85).

Alema 17:11, 21–29

O le a le poloaiga ma le folafolaga na tuuina atu e le Alii i atalii o Mosaea?

Alema 17:11“Faaali Atu Fa’aa’oa’oga Lelei”

Sa aoao Amona ma ona uso e ola i le filemu ma Sa Lamana ae latou te lei faasoa atu le talalelei ia te i latou. Sa fautua mai e Elder M. Russell Ballard ni mea taua se tolu e mafai ona tatou faia e avea ai ma ni tuaoi lelei atu i e e le auai i lo tatou faatuatuaga:

“Muamua, ia iloa ou tuaoi. Aoao e uiga i o latou aiga, o a latou galuega, o o latou manatu. Ia faatasitasi ma i latou, pe afai latou te mananao i ai, ae aua le faia ma le faamalosi faapea ma soo se faanaunauga lilo. O le faauo atu e le tatau ona faia ona o se isi mafuaaga; ae ia tau lava o le faauo atu i ai. …

“… Ia tatou totoina ni sootaga anoa o le faatuatuaina ma le femalamalamaai mai tagata e eseese tulaga ma talitonuga.

“Lona lua,ou te talitonu o se mea lelei pe afai tatou te aveese ni nai upu po o faaupuga mai la tatou gagana: e le o ni tagata o le ekalesia ma le e le o ni Mamona. O ia faaupuga e mafai ona taufaatauvaa pe faamaasiasi ai foi. Ia te au lava ia, ou te le manatu ia te au lava ia ‘e le o se Katoliko’ pe ‘e le o se Iutaia.’ O au o se Kerisiano. O au o se tagata o le Ekalesia a Iesu Keriso ole Au Paia o Aso e Gata Ai. O le mea lena ou te manao ia iloa ai au—po o ai a o le a foi au, e pei ona tetee atu i le faailoa o a’u o se tagata e ese mai ai. Ia tatou avatu lena faaaloalo ia i latou o e o loo nonofo faatasi ma i tatou. Afai e manaomia se faaupuga e tauaofai ai, ona fetaui lelei lea o le upu ‘tuaoi’ i le tele lava o tulaga.

“Ma le lona tolu, afai e le fiafia ia tuaoi ona o nisi feeseeseaiga ma le Ekalesia a Iesu Keriso o le Au Paia o Aso e Gata Ai po o nisi tulafono tatou te lagolagoina mo le lelei, faamolemole aua nei fautuaina atu ia i latou— e tusa lava po o se auala malie—e faapea e tatau ona latou mafaufau e siitia atu i se isi nofoaga. E le mafai ona ou malamalama pe mafai faapefea e se tagata o la tatou Ekalesia ona mafaufau i se mea faapea! O o tatou augatuaa paionia na tuliesea mai lea nofoaga i lea nofoaga e ni tuaoi e le malamalama ma lē faapalepale. Sa latou oo i ni faigata ma ni sauaga sili atu ona sa latou manatu, galulue, ma talitonu e ese mai i isi. Afai e leai se isi mea e aoao mai e lo tatou talafaasolopito ia i tatou, e tatau ona aoao i tatou e faaaloalogia ia aia tatau a tagata uma ina ia ola ma le filemu faatasi ma isi” (i le Lipoti o le Konasfesi, Oke. 2001, 45; po o le Liahona, Ian. 2002, –42).
Sa faailoa mai e Elder L. Tom Perry le auala e mafai ai e a tatou faataitaiga ona taitai atu isi e latalata atili i le Alii:

“O se faifeautalai e sefuluiva tausaga le matua … o le a ia le faagaloina lava lona aso muamua i le misiona, ona sa aoaoina ai o ia i se lesona maoae e uiga i le faaaogaina o ana taleni e aoao ai le talalelei.

“O ia ma lana soa sinia sa tofia e tatala se nuu fou e fai si mamao mai le laumua o le misiona. Ina ua la taunuu atu i lenei nuu fou ma savalia le aualatele, sa la pasia ai se lotu ma se faifeau o loo tutu ai i le faitotoa i luma. Ina ua la oo mai i le falesa, sa alu i totonu le faifeau ma valaau i lana aulotu atoa e mulimuli mai ia te ia i fafo i luga o le aualatele. O iina sa latou mulimuli ai i faifeautalai ma amata ona tauvalaau atu ia i laua i igoa; ona amata lea ona latou faamisa ma tauai i laua i maa.

“Sa fiafia lava le faifeautalai talavou i lenei aafiaga—sa ia manatu, o lona aso muamua i le misiona ae o lea ua tauai o ia i maa. Ia, sa faafuasei ona tau se maa lapoa i le ogatotonu tonu o lona papatua, ma sa suia ai loa ona lagona i le ita. A o lei ulufale o ia i le misiona sa avea o ia ma se faatea lelei i le peisipolo; ma i lona ita tele sa ia faliu mai ai, ma piki i luga le maa muamua sa mafai ona ia maua, ma faatafa i lana tu o lana faate’a lauiloa, ma ua toetoe lava o le a mamulu atu le maa lea i tagata ae faafuasei loa ona ia toe manatuaina le pogai ua i ai iina. E le i auina atu o ia mai le mea mamao i Pasila e tauai maa i tagata; sa alu atu iina e aoao i latou i le talalelei. Ae o le a la sana mea a fai i le maa lea e i lona lima? Afai na te faapauina i lalo, o le a latou manatu o se faailoga o le vaivai ma atonu e faaauau ai ona tauai i laua i maa. Ae e le mafai foi ona ia togia le maa i tagata. Ona ia iloa atu lea o se pou telefoni e le mamao ese lava. O le auala lena e laveaiina ai mai le maasiasi! Sa ia tufaatafa loa i tua ma liai faasasa’o atu le maa i le pou telefoni, ma sa tau tonu lava i le ogatotonu.

“Sa solomuli teisi i tua tagata o le potopotoga. Sa faafuasei ona latou iloa atonu o le maa lea na semanu e tau tonu lava i le va o mata o se isi o i latou. Sa suia o latou lagona; nai lo le tauai o maa i faifeautalai, ua latou amata ona tauaia le pou telefoni. Ina ua maea lenei faalavelave, o taimi uma lava e savalia ai e le faifeautalai le aualatele lea e luiina ai lava o ia i se tauvaga tauaiga- maa. O le tauvaga tauaiga-maa sa taitai atu ai i talanoaga o le talalelei, lea na taitai atu ai i le liua, ma iu ai ina faatuina se paranesi o le Ekalesia i lena nuu” (“Prophecies, Visions, and Dreams,” i le 1979 Devotional Speeches of the Year [1980], 3).

Alema 18:3–9. O Auaunaga e Faamaluluina ai Loto

Sa faamanino mai e Peresitene Henry B. Eyring o le Au Peresitene Sili le auala e mafai ai e auaunaga faaletino ona faamaluluina se loto ma oo atu ai i se vavega:

“Ina ua aumaia e isi auauna le faamaoniga o le mea na faia e Amona, sa faapea mai le Tupu o Lamonae ‘Po o i fea lenei tagata?’ Sa latou fai atu, ‘Oi, o loo i ai o ia i le fale o manu. O loo ia faia mea iti uma e auauna ai ia te oe’ Alema 18:8–9

“E le o se mea tulaga ese ea lena? Sa valaauina o ia e aoao atu mataupu faavae o le faaolataga, ae na i ai o ia i le fale o manu. Tou te le manatu ea sa tatau ona ia tatalo ma anapogi ma toe faaleleia lana fuafuaga o le talaiga? E leai, sa i ai o ia i le fale o manu.

“Sa soifua ae le Tupu o Lamonae ma se talitonuga e faapea o lo o i ai se Atua ae pe o a lava mea a le tupu na fai na sa’o. Sa aoaoina faapitoa o ia i aoaoga faavae sese atonu na le mafai ai ona ia iloaina lagona o le tausalaina. Tou te manatuaina na mea ina ua ia faalogo i le mea na i ai Amona, sa oo ifo ia te ia se lagona o le tausalaina, o le popole ua ia faia se mea sese i le fasiotiga o auauna (tagai Alema 18:5)? …

“E masani lava ona ou taulai muamua atu i le fememeai na oo ia Lamonae i ana aoaoga faavae, e aunoa ma le iloaina o le vavega. O le vavega lea o se manaoga faaleagaga na tupu i totonu o se tagata, ina ia mafai ai ona aoaoina o ia i le talalelei a Iesu Keriso. Sa nutimomoia lona loto. Sa ia lagona le tausalaina. Ma na mafai ona oo mai ona o mea faaletino sa faia e Amona. …

“… Ia aua, aua lava nei manatu faatauvaa i le taua faaleagaga o le faia faalelei o mea faaletino mo i latou o lo o e auauna atu i ai.

“… Ia avea outou ma a latou auauna, ma o le a outou alolofa ia i latou. Ma o le a latou lagonaina lo outou alofa. Ma o le mea e sili ona taua, o le a latou lagonaina le alofa o le Atua” (“O Le A Suia e Le Tusi a Mamona Lou Olaga,” Liahona, Fep. 2004, 17–18).

Alema 18:10

O le a sau mea e fai e te tali atu ai e faapei o Amona i lenei tulaga? E faapefea ona fesootai le Alema 17:25 ma le 18:3 i le 18:10?

Alema 18:24. Ua Amata ona Tautala Atu Alema ma le Lototoa

E toatele tagata o le Ekalesia e lagona le popole e uiga i le auala e amata ai talanoaga faaletalalelei. O le auala a Amona o le fesili lea ia Lamonae e uiga i lona talitonuga i le Atua. O isi ua iloaina o se mea fua ia i latou le faigofie ona talanoa e uiga i o latou “olaga faale-Ekalesia” ma a latou uo. Sa tuuina mai e Elder M. Russell Ballard ia fautuaga aoga e uiga i le amataina o talanoaga faaletalalelei ma a tatou uo:

Jerry Thompson, © IRI

“O le atiina ae o se fale e fefaasoaai ai le talalelei e le faapea o le a tatou tuuina atu se taimi tele e feiloai ma faamasani ai i ni uo o e faasoa atu i ai le talalelei. O nei uo e o mai lava i latou i o tatou olaga, ma afai tatou te faailoa atu lo tatou auai i le Ekalesia mai lava i le amataga, e mafai ona faigofie ona tatou aumaia talanoaga o le talalelei i ni fegalegaleaiga ae itiiti se afaina o le le malamalama e i ai. O uo ma e masani o le a taliaina o se vaega lenei o oe, ma o le a tuusaoloto i latou e fesili. …

“Na fesiligia se tuafafine i Farani po o le a le mea lilo lea ua ia manuia ai. Sa fai mai o ia, ‘Na o na faasoa atu lava o lo’u olioli. Sa ou taulimaina tagata uma lava e pei ua uma ona avea i latou ma se tagata o le Ekalesia. Afai ou te tu i autafa o se laina ma faia se talanoaga, ou te faasoaina atu i ai le tele o lo’u fiafia i au sauniga faale-Ekalesia i le Aso Sa. Ina ua fesiligia e ana uo faigaluega, “O a au mea na fai i le faaiuga o lenei vaiaso?” Ou te le faamisia le po o le Aso Toonai i le taeao o le Aso Gafua. Ou te faamatala i ai sa ou alu i le lotu, o mea na talanoaina ai, ma o’u aafiaga faatasi ma le Au Paia. Ou te talanoa i le auala ou te ola ai, ma mafaufau ma lagona”’ (i le Conference Report, Ape. 2006, 89; po o leLiahona, Me 2006, 86).

Alema 18:24–28. Fausiaina i Luga o Talitonuga Tutusa

A o avea ma se tasi o Fitugafulu, sa saunoa ai Elder Loren C. Dunn (1930–2001) i le taua o le faaalia o le faaaloalo mo talitonuga o isi ma le fausiaina i luga o talitonuga tutusa: “O loo tatou ola i taimi o taua, faatuiese, eseesega o manatu, tu’ua’i atu, tu’ua’i mai, ma le le lotogatasi. E tatau ia i tatou, atonu ua sili atu nai lo nisi lava taimi ua mavae, ona tatou aapa ifo i totonu ia i tatou ma avane uiga o le fefaaaloaloai, e tuu faatasi ma le alofa ma le faamagalo atu, e tosina ai mea tatou te faia i le tasi ma le isi; ina ia mafai ona eseese o tatou manatu e aunoa ma le oo atu i finauga; ma tuu ifo i lalo o tatou leo ma atiina ae i talitonuga tutusa ma le mautinoa a mavae atu faafitauli, tatou te nonofo faatasi pea o le tasi ma le isi” (i le Conference Report, Ape. 1991, 109; po o le Ensign, Me 1991, 82).
O le fesili muamua lava na fai e Amona ina ua amata ona ia aoaoina le Tupu o Lamonae o le, “Po ua e talitonu ea ua i ai se Atua?” (Alema 18:24). Ina ua iloa e Amona e talitonu Lamonae i se Agaga Sili, sa ia molimau atu, “O le Atua lea” (Alema 18:28). O le mea moni, o le Atua e le o se “agaga sili.” Ae na silasila ia Amona i tala atu o lena mea ma taulai atu i ai nai o laua talitonuga tutusa i se Tagata Silisili ma aoao mai ai i lena mataupu. Na faaaogaina e Amona le talitonuga faavae o Lamonae i se Foafoa ma faaopoopo i ai upumoni e faavavau lea o le a “faamalamalamaina ai lona manatu” (Alema 19:6).

Sa faamalamalama mai e Peresitene Gordon B. Hinckley le auala e tatau ai foi ona tatou fausia i luga o mea lelei ua leva ona i ai i isi: “Tatou te fai atu i le agaga o le alofa, aumai uma a outou mea e lelei ma mea moni sa outou maua mai i soo se punavai ma o mai sei vaai pe mafai ona matou faaopoopo atu i ai. Ou te tuuina atu lenei valaaulia i alii ma tamaitai i soo se mea o i ai” (i le Conference Report, Oke. 2002, 87; po o leLiahona, Nov. 2002, 81).

Alema 18:36–39; 22:7–14. Aoaoina Atu o le Ata o le Faaolataga

Ina ua aoaoina e Amona ia Lamonae, “sa ia amata i le foafoaga o le lalolagi,” ona ia aoao atu lea e faatatau i le pau o le tagata” (Alema 18:36); mulimuli ai, sa ia “faamatala ia i latou [o le tupu ma ana auauna] le ala o le togiola,” aemaise lava “o le afio mai o Keriso” (Alema 18:39). E faapena foi, o Arona sa ia aoao atu foi nei muai mataupu faavae taua o le ata o le faaolataga i le tamā o Lamoni (tagai Alema 22:12–14). E ala i le aoaoina o le moni o le Foafoaga, o le Pau, ma le Togiola, e mafai ona malamalama ai se tasi i lona tulaga i le olaga nei ma ona gafatia i le ola e favaavau.

Sa faaigoaina e Elder Bruce R. McConkie (1915–85) o le Korama a Aposetolo e Toasefululua nei mataupu faavae mautu—o le Foafoaga, o le Pau, ma le Togiola— o “poutu e tolu o le ola e faavavau” ma o “mea maoae silisili ua tutupu i le faavavau atoa.” Sa ia faamalamalama mai:

“Pe a mafai ona tatou mauaina se malamalamaaga o na mea, ona mafai lea ona taoto le faasologa o mea o le faavavau i ona tulaga tonu, ma o le a tatou i ai i se tulaga e galueaiina ai lo tatou lava faaolataga. …

“… O nei [poutu] e tolu o faavae ia o loo taoto ai i luga mea uma lava. A aunoa ma se tasi o nei mea, o mea uma lava o le a maimau lo latou faamoemoega ma le uiga ma o fuafuaga ma mamanu a le Atua o le a le aoga” (“The Three Pillars of Eternity,” in Brigham Young University 1981 Firesides and Devotional Speeches [1981], 27).
Sa faamalamalama mai e Elder Russell M. Nelson o le Korama a Aposetolo e Toasefululua le auala e taua ai nei itutino taitasi o le fuafuaga: “O le fuafuaga e manaomia ai le Foafoaga, ma e manaomia ai foi le Pa’u ma le Togiola. O itutino faavae ia o le fuafuaga. O le foafoaina o le paneta faaparataiso e mai le Atua. O le ola faaletino ma le oti na oo mai i le lalolagi talu le Pau o Atamu. O le tino ola pea ma le mafai ona ola e faavavau, na saunia e le Togiola a Iesu Keriso. O le Foafoaga, o le Pa’u, ma le Togiola sa fuafuaina a o le i taitai ona amataina le galuega o le Foafoaga” (i le Conference Report, Ape. 2000, 105; po o le Liahona, Iul. 2000, 102).

Alema 18:41–43; 22:15–18. O lo Tatou Faalagolago ia Keriso

Sa fesoasoani atu Amona ma Arona ia Lamonae ma lona tama ia malamalama i le taua o lo la mauaina o le togiola a Keriso i o la olaga. O le malamalama i lo tatou faalagolago ia Keriso e taitai atu ai i le liua. Na amata ona nofouta ia Lamonae ma lona tama i o la tulaga o le pau ma lo la manaomiaina o se fesoasoani. Sa la iloaina ua na o le pau lo laua faamoemoe mo le togiolaina o le Togiola lea na faia e Keriso.

Walter Rane, Faaaloaloga a le Falemataaga o Talafaasolopito ma Faatufugaga a le Ekalesia

Alema 18:42. O Liua Tetele, Ua Na o Le Pau Lea o Le Avanoa

Tagai i le faamatalaga a Peresitene Ezra Taft Benson i lalo o lefaamatalaga mo Mosaea 27:25 (tagai itulau 166).

Alema 20:30. “O se Nuu ua Sili Atu le Faamaaaina ma Sili Atu le Ua-Malolo”

Ua faailoa mai i faamaumauga o Amona ma ana soa sa talai atu ia i latou i se ‘nuu ua sili ona maaa o latou loto ma ua sili ona malolo o latou ua” (Alema 20:30). O lo latou aafiaga e tutusa lelei ma aafiaga o le tele o e na taumafai e aoao atu i latou o e atonu e le fiafia i ai, po o i latou o e faasagatau i le talalelei. Sa faamalamalama mai e Peresitene Henry B. Eyring le pogai e tatau ai ona tatou taumafai ai pea e aapa atu i agaga uma:

“Aisea e tatau ai ona ou tautala atu e uiga i le talalelei i soo se tasi e foliga mai ua faamalieina? O le a se tulaga matautia o i ai mo i latou po o au pe a ou le faia pe le tautala atu foi i ai i se mea?

Ia, atonu e faigata ona vaaia tulaga matautia, ae e moni lava, mo i latou ma mo i tatou foi. Mo se faataitaiga, i se taimi i le lalolagi o le a oo mai, o tagata uma o le a e feiloai i ai o le a iloaina mea ua e iloaina i le taimi nei. O le a latou iloa na o le pau lava le ala e ola faavavau ai faatasi ma o tatou aiga i le afioaga a lo tatou Tama Faalelagi ma Lona Alo o Iesu Keriso, o le filifili lea e ulu atu i le faitotoa e ala i le papatisoga i lima o i latou ua i ai le pule mai le Atua. O le a latou iloa ai, na pau lava le ala e mafai ai ona faavavau faatasi aiga o le talia lea ma tausi ia feagaiga paia o loo tuuina mai totonu o malumalu o le Atua i lenei lalolagi. Ma o le a latou iloaina na outou iloa. Ma o le latou manatuaina pe na outou ofoina atu ia i latou le mea na ofoina atu e se isi ia te outou” (i le Conference Report, Oke.1998, 41; po o leLiahona, Ian. 1999, 33).

Alema 22:15–18

O le a le mea na naunau le tama o Lamonae e lafoai ina ia iloa ai le Atua ? E faapefea e se naunautaiga faapea ona fesoasoani ia i tatou e latalata atili ai i le Atua? (tagai foi Ominae 1:26).

Alema 22:18. “Ou Te Lafoaiina Au Agasala Uma Ina Ia Ou Iloa Ai Lau Afio”

E pei o le tama o Lamonae, e tatau ona tatou naunau e ositaulaga mea uma ina ia toe fanau ai i la le Atua. I leLectures on Faith ua tatou aoao ai i le taua o le taulaga i lo tatou alualu i luma e faavavau: “Ia tatou iloa, o se tapuaiga latou te le faatulafonoina le taulagaina o mea uma, ua le lava le mana e faatupu ai le faatuatua lea e tatau ai mo le ola ma le faaolataga; aua, e mai lava i le amataga o le tagata, o le faatuatua lea e manaomia e olioli ai i le ola ma le faaolataga o le a le mafai lava ona maua e aunoa ma le taulagaina o mea uma faalelalolagi. Na auala mai i lea taulaga, ma na o le pau foi lea o le taulaga, na faauuina e le Atua ina ia olioli ai tagata i le ola e faavavau; ma e auala mai i le taulagaina o mea uma faalelalolagi, e iloatino ai e tagata o loo latou faia mea e fia silasila i ai le Atua. Pe afai e ofoina atu e se tagata i se taulaga mea uma ua ia te ia ona o le upumoni, e oo lava i lona ola, ma talitonu i luma o le Atua ua tofia o ia e osia lenei taulaga aua ua ia saili e faia lona finagalo, ua ia iloaina foi, ma le mautinoa, e taliaina ma o le a taliaina lava e le Atua lana taulaga ma lana foai, ma o le a le mafai lava ona le tali mai pe a saili atu ia te ia. O ia la tulaga, e mafai ai ona ia maua le faatuatua e tatau ai mo ia e pipiimau ai i le ola e faavavau” ([1985], 69).
A o auauna ai o se Fitugafulu, sa aoao mai e Elder Alexander B. Morrison e faatatau i taulaga e tatau ona tatou faia e o mai ai ia Keriso:

“O le tauaveina o Lona suafa i o tatou luga o lona uiga, o se naunautaiga e fai soo se mea lava Na te manaomia mai ia i tatou.

“Na fai mai se tasi, o le tau o se olaga Kerisiano, e tutusa lava i aso nei e pei ona i ai: ua na o le tuuina atu o a tatou mea uma ua maua, ma ia le taofia lava se mea ma ia lafoai a [tatou] agasala uma ina ia iloa ai o [Ia]’ (Alema 22:18). Pe a tatou le ola ai e tusa ma tulaga faatonuina a le Alii, ona o lo tatou faatamala, faapalapala, po o le amioleaga; pe a tatou amioleaga pe saua, manatu faapito, tuinanau pe le magafagafa; i se isi itu, ua tatou toe faasatauroina foi o Ia. Pe a tatou taumafai pea lava pea e faia le mea silisili, pe a tatou tausi ma auauna atu i isi,pe a tatou faatoilaloina le manatu faapito i le alofa, pe a tatou faamuamua le ola sololelei o isi nai lo i tatou lava, pe a tatou fesuiai i a tatou avega, ma ‘faanoanoa faatasi ma e faanoanoa,’ pe a tatou ‘faamafanafana i e ua tatau i ai le faamafanafanaga ma laulaututu e fai ma molimau a le Atua i aso uma, ma mea uma, atoa ma nuu uma’ (Mosaea 18:8–9), ona tatou faamamaluina ai lea o Ia, ma maua mai ai Lona mana ma avea atili ai e faapei o Ia, ua tuputupu ae ma ‘faateleina le malamalama,’ pe afai tatou te tumau pea, ‘seia oo mai le aso atoatoa ona lelei’(D&C 50:24)” (i le Conference Report, Oke. 1999, 33; po o le Liahona, Ian. 2000, 31 32).

Manatu e Mafaufau Loloto i ai

Sa faapefea ona saunia e Amona le loto o Lamonae e talia le talalelei? O le a se mea e mafai ona e faia e saunia ai se loto o se tasi e talia ia upumoni o le talalelei?
O a mea ua tatou aoaoina mai i faataitaiga a Arona ma ona uso ina ua teenaina i latou “ma puapuaga uiga eseese”? (Alema 20:29).

Galuega Fautuaina

Ina ua latalata atu Amona ma ona uso i le nuu o Nifae, na faatonuina i latou e le Alii (1) ina ia faatuina Lana upu, (2) ) ia onosai i tiga ma puapuaga, ma le (3) ia faaali atu faaaoaoga lelei, ma sa folafola atu ia i latou o le a Ia faamanuiaina i latou (tagai Alema 17:11). Ia tusia nei ulutala e tolu i se fasi pepa. A o e suesueina leAlema 17–22, ia lisi ni faataitaiga i lalo o ulutala taitasi o loo faailoa mai ai lo latou usiusitai i faatonuga a le Alii. Ia tusi foi pe na faapefea e nei faataitaiga ua e lisiina ona fesoasoani e aumaia sa Lamana i se malamalama o le upumoni.
Ia fai se lisi o aoaoga faavae e fesootai i le galuega faafaifeautalai (tagai Alema 17–22). Ia faailoa ma le agaga tatalo ia auala patino e mafai ai ona e faaaogaina nei aoaoga faavae i lou olaga.