Moronae 10

Folasaga

Na faaiu e Moronae ana tusitusiga i le talanoaina ma lana aufaitau o mataupu faavae taua e tolu. O mea muamua o loo taulai atu i le manaomia ona aoao ma ia i ai se molimau o upumoni o loo maua i lenei tusi paia. O le lona lua, o se poloaiga lea ia malamalama ma maua ia meaalofa faaleagaga o loo avanoa mo i tatou. Mulimuli, o loo ia aioi mai ia i tatou taitoatasi ina ia o mai ia Keriso ma ia faaatoatoaina ia te Ia.

A o e faamaeaina lenei suesuega o le Tusi a Mamona, vaavaai mo mataupu faavae nei: Ia e iloa mo oe lava le moni o le tusi e ala i le mulimuli i le folafolaga a Moronae (tagai Moronae 10:3–5). Aoao i meaalofa a le Agaga ma saili e atiina ae na meaalofa ua tuuina atu e le Alii ia te oe. O le mea mulmuli, saili ia faaalia e ala i au faatinoga o loo e taumafai i aso taitasi e te sau ia Keriso.

Manatua le mea na tautino mai e le Perofeta o Iosefa Samita (1805–44): “Sa ou ta’u atu i le usoga e faapea o le Tusi a Mamona o le tusi e aupito sili lea ona sa’o o soo se tusi i luga o le fogaeleele, ma o le maaauau o la tatou tapuaiga, ma o le a latalata atili atu se tagata i le Atua e ala i le ola ai i ona mataupu, nai lo se isi lava tusi” (History of the Church, 4:461; Folasaga i le Tusi a Mamona).

Faamatalaga

Moronae 10:3. “Pe a Outou Faitau Nei Mea”

Na saunoa Elder Gene R. Cook, a o avea ma se tasi o Fitugafulu, e uiga i le taua o le manatunatu loloto i le alofa o le Atua e avea o se auala e maua ai le faatuatua ma le lotomaualalo sili atu:

“O upu mulimuli e lima i le [Moronae 10:3] o loo aumaia ai se apoapoaiga taua e—‘mafaufau i ai i o outou loto.’ O le a le mea o loo muamua mai i le ‘i ai’—le mea e tatau ona tatou mafaufau i ai? O le ‘manatua le finagalo alofa o le Atua i le fanauga a tagata, e afua i le faiga o Atamu e oo lava i le aso tou te maua ai nei mea.’ E tatau ona tatou manatuaina le alofa, silasila mamao, lelei, ma le loto faamagalo o lo tatou Tama Faalelagi ia i tatou.

“O le a le mea e masani ona tupu pe a amata ona tatou mafaufau i le alofa o le Alii i le tagata? Ia i tatou lava ia? O le a le mea e tupu pe a tatou faitauina o tatou faamanuiaga, pe atonu o a tatou agasala foi e tatau ona tatou ole atu ai mo lana faamagaloga, ma iloa lana fesoasoani i o tatou olaga taitoatasi? Pe le moni ea e liliu atu o tatou loto i le Alii i le alofa ma le agaga faafetai? Pe faateleina ea lo tatou faatuatua ma le lotomaualalo? Ioe, ma o lena mea, i la’u lava faamasinoga, o le taua lea o le fuaiupu e 3—ma o le mulimuli ai i lea fautuaga e fesoasoani ia i tatou ia atili lotomaualalo ai, atili naunau, ma sauniuni mo le mauaina o faamatalaga ma le malamalama fou i se mafaufau matala” (“Moroni’s Promise,” Ensign, Ape. 1994, 12).

Moronae 10:4–5
Mauaina o se Molimau o le Tusi a Mamona

Na faasoa mai e Peresitene Boyd K. Packer, le Peresitene o le Korama a Aposetolo e Toasefululua, le faagasologa na ia ui ai mo le mauaina o se molimau faaleagaga o le Tusi a Mamona:

“O le taimi muamua lava na ou faitauina ai le Tusi a Mamona mai le amataga e oo i le faaiuga, sa ou faitauina le folafolaga afai ou te “ole atu i le Atua, le Tama Faavavau, i le suafa o Iesu Keriso, pe moni [mea sa ou faitauina]; ma afai [o le a ou] ole atu ai ma le loto faamaoni, ma le manatu tonu i ai, ma le faatuatua ia Keriso, [o le a] ia faaalia le tonu ia te [a’u], i le mana o le Agaga Paia” (Moronae 10:4). Sa ou taumafai e mulimuli i na faatonuga e pei ona ou malamalama i ai.

“Afai sa ou faamoemoeina se faaaliga mamana e vave oo mai e avea o se aafiaga lofituina, e le’i tupu. Ae ui i lea, sa lelei ou lagona, ma sa amata ona ou talitonu. …

“Sa ou aoaoina ai e soo se tasi lava, i soo se mea, e mafai ona faitauina le Tusi a Mamona ma maua ai musumusuga. …

“O le mea ua ou iloa, e le faafuasei ona oo mai se molimau ia i tatou. Ae, e tuputupu a’e. …

“Aua e te toatamai pe afai sa e faitauina ma toe faitauina ae le maua lava se molimau mamana. Atonu o le a e pei lava o soo o loo ta’ua i le Tusi a Mamona o e sa tumu i le mana o le Atua i le mamalu tele ‘a ua latou le iloa ai’ (3 Nifae 9:20).

“Ia fai le mea sili e te mafaia” (i le Conference Report, Apr. 2005, 5–7; po o le Liahona, Me 2005, 6–9).
Na tuuina mai e Elder Bruce R. McConkie (1915–85) o le Korama a Aposetolo e Toasefululua se isi malamalamaaga i le auala e maua ai se molimau o le Tusi a Mamona e ala i le mafaufau i se fesili a o faitauina:

“E i ai se isi suega e faigofie atu e mafai e i latou uma o loo saili ia iloa le upumoni ona su’eina. E manaomia ai i tatou e faitau, mafaufau, ma tatalo—e faia uma i le agaga o le faatuatua ma se mafaufau mataala. Ina ia tatou mataalia la i faafitauli e oo mai—a o tatou faitau, mafaufau, ma tatalo—e ao ona tatou fesili ifo faaafe ia i tatou lava, ‘Faamata e mafai e soo se tagata ona tusia lenei tusi?’

“Ma e matuai faamaonia lava o nisi taimi i le va o le taimi muamua ma le faaafe ona fai o lenei fesili, o le a iloa ai e tagata uma e sailia ma le faamaoni le upumoni, i le mana o le Agaga e moni le Tusi a Mamona, ma o le mafaufau ma le finagalo lava lea ma le siufofoga o le Alii i le lalolagi atoa i o tatou aso” (i le Conference Report, Oke. 1983, 106; po o le Liahona, Ian. 1984, 73–74).
Na tuuina mai e Peresitene Gordon B. Hinckley (1910–2008) le lu’i lenei ma le folafolaga i le aufaitau o le Tusi a Mamona:

“Ou te ofoina atu se lu’i i tagata o le Ekalesia i le lalolagi atoa ma a tatou uo i soo se mea ina ia faitau ma toe faitau le Tusi a Mamona. …

© Busath.com

“Ou te folafola atu ia te outou e aunoa ma le faatuai, afai o le a tausia e outou taitoatasi lenei polokalama faigofie, e tusa lava pe ua faafia ona e faitauina le Tusi a Mamona, ae o le a oo mai i totonu o o outou aiga se fuafaatatau faaopoopo o le Agaga o le Alii, o se folafolaga mausali ina ia savavali ma le usiusitai i Ana poloaiga, ma se molimau malosi atu e uiga i le moni o le i ai o le Alo o le Atua.” (“O se Molimau Moni ma Faamaoni,” Liahona, Aok. 2005, 6).

Moronae 10:4
. “Ma Le Manatu Tonu I Ai”

Sa saunoa Elder Dallin H. Oaks o le Korama a Aposetolo e Toasefululua e uiga i le folafolaga a Moronae i le i ai o le “manatu tonu i ai”: “E lei folafola mai e Moronae se faaalia mai o le Agaga Paia ia i latou o e saili ia iloa le moni o le Tusi a Mamona ona o ni manatu le faavaea po o ni mafuaaga faalepoto salalau, tusa lava pe latou te ‘ole atu ma se loto faamaoni.’ O le folafolaga a Moronae e mo i latou o e ua tautino atu i o latou loto e faatino le faaaliga pe a maua. O tatalo e faavae i se isi lava mafuaaga, e leai se folafolaga aua e le o faia ‘ma le manatu tonu i ai’” (Pure in Heart [1988], 19–20).

Moronae 10:8–18. Meaalofa o le Agaga

Na faamatala e Elder Bruce R. McConkie ia faamoemoega ma mafuaaga mo le mauaina o meaalofa faaleagaga:

“[O le faamoemoega o meaalofa faaleagaga] o le faamalamalamaina lea, faamalosiau, ma siitia e faatuatua ina ia latou fai ma tofi le filemu i lenei olaga ma taitai agai atu i le ola faavavau i le lalolagi a sau. O le i ai o nei meaalofa o se faamaoniga o le paia o le galuega a le Alii; o le mea e le maua ai nei meaalofa, e le i ai le Ekalesia ma le malo o le Atua. O le folafolaga e le mavae atu nei meaalofa a o tumau le lalolagi, vagana le le faatuatua (Moro. 10:19), ae peitai pe a oo mai le aso atoatoa ma maua e le au paia le faaeaga, o le a le toe manaomia loa. E pei ona faaalia e Paulo, ‘Pe a oo mai le atoatoa, ona faaleaogaina lea o le mea faaleatoa.’ (1 Kor. 13.)

“O tagata faatuatua e faamoemoeina ina ia saili i meaalofa a le Agaga ma o latou loto atoa. E tatau ona latou ‘naunau i meaalofa sili’ (1 Kor. 12:31; MFF. 46:8), ia ‘naunau foi i mea faaleagaga’ (1 Kor. 14:1), ‘ia ole atu i le Atua, o le foai tele mai.’ (MFF. 46:7; Mat. 7:7–8.) I nisi o le a foaiina atu i ai se meaalofa e tasi; o isi, o le tasi; ma ‘Ina ia foaiina atu i nisi na meaalofa uma, ina ia i ai se fai ma ulu, e manuia ai le au paia uma.’ (MFF. 46:29.)” (Mormon Doctrine, 2nd ed. [1966], 314).
Na fautuaina mai e Elder Marvin J. Ashton (1915–94) o le Korama a Aposetolo e Toasefululua nisi meaalofa faaopoopo a le Agaga “e le masani ona iloagofie pe taua foi ae e matua taua lava. Atonu o loo i ai faatasi ma ni au meaalofa—meaalofa e le matua iloagofie ae ui i lea e moni ma taua tele.

“Sei o tatou iloiloina la nisi o nei meaalofa e le lauiloa: o le meaalofa o le ole atu; o le meaalofa o le faalogologo; o le meaalofa o le faalogo ma faaaoga le leo itiiti ma le filemu; o le meaalofa o le mafai ona tagi; o le meaalofa o le aloese i finauga; o le meaalofa o le lotogatasi; o le meaalofa o le aloese i le tautu i upu; o le meaalofa o le saili o le mea sao; o le meaalofa o le le tuuai fua; o le meaalofa o le vaai i le Atua mo le taitaiga; o le meaalofa o le avea ma soo; o le meaalofa o le manatu alofa i isi; o le meaalofa o le mafai ona mafaufau; o le meaalofa o le faia o tatalo; o le meaalofa o le tuuina atu o se molimau malosi; ma le meaalofa o le maua o le Agaga Paia.” (i le Conference Report, Oke. 1987, 23; po o le Liahona, Ian. 1988, 19).
Na tuuina mai e Peresitene Boyd K. Packer le fautuaga e uiga i le mauaina o meaalofa faaleagaga:

“E tatau ona ou faamamafaina atu o le upu ‘meaalofa’ e matua taua tele, aua o se meaalofa atonu e le tauanauina nei faamutaina lona avea ma meaalofa. Faatoa taliaina lava pe a ofoina atu.

“E pei lava ona avea meaalofa faaleagaga o ni meaalofa, o tulaga atonu tatou te taliaina ai i latou ua faatulagaina e ia o le ofoina mai ia i tatou. O meaalofa faaleagaga e le mafai ona faamalosia, aua o se meaalofa. E le mafai lava, ou te toe fai atu, ona faamalosia, pe aumaia, pe ‘totogiina’ i le faapea tatou te faia se faailo i le totogiina ma faamoemoe ia otometi ona momoli mai i la tatou lava faatulagaga.

“E i ai nisi e saili na meaalofa i le faatauanau malosi ma o gaoioiga taitasi e aveesea mamao atu ai na meaalofa mai ia i latou. Ma i lena faatauanau ma le naunautaiga ua latou tuuina i latou lava i se tulaga faaleagaga matautia. Nai lo lena e tatau ona tatou ola agavaa mo meaalofa ma o le a oo mai e tusa ai ma le finagalo o le Alii.

“Na fai e Polika Iaga se saunoaga i ona taimi e mautinoa lava le aoga ia i tatou:

“‘E leai se masalosalo, afai e ola le tagata e tusa ai ma faaaliga ua tuuina i tagata o le Atua, atonu e mafai ona ia maua le Agaga o le Alii e faaalia ia te ia Lona finagalo, e taitaia ona tiute i ana gaoioiga faaletino ma le faaleagaga. Ae ui i lea ua faamalieina au, i lenei tulaga, ua tatou ola e sili atu le maualalo i o tatou avanoa.’ (Discourses of Brigham Young, i. 32.)

“O meaalofa faaleagaga e maua i le Ekalesia ma o lo latou i ai o se tasi o molimau maoae ma le tumau o le upu moni o le talalelei. E le tuuina i le faitalia i le Ekalesia. Na aoao mai Moronae afai e leai na meaalofa ona ‘pagatia lea o le tulaga o le tagata.’ …

“E tatau ona tatou saili ia agavaa ia maua nei meaalofa e tusa ai ma le ala ua faasino mai e le Alii.

“O lenei, ou te toe fai atu—e tatau ona tatou saili mo meaalofa faaleagaga i le ala a le Alii” (“Gifts of the Spirit” [saunoaga e lei lolomiina i se faeasaite a siteki e 6, Brigham Young University, Ian. 4, 1987], 5–6).

Moronae 10:17–18. E faapefea ona Tatou Faaaogaina Meaalofa a le Agaga?

Na talanoaina e Elder Gene R. Cook le malosiaga o le mauaina ma le faaaogaina o meaalofa faaleagaga e tuuina atu i tagata taitoatasi: “O se tasi o gasologa sili e te aafia ai i le olaga o le mauaina lea o oe lava ia, ia maua na meaalofa ma malosiaga na tuuina atu e le Atua ia te oe. Ua Ia tuuina atu ia te oe taleni maoae, o le vaega sili ona laitiiti o lena meaalofa o lena faatoa amata ona e faaaogaina. Faalagolago i le Alii ia fesoasoani ia te oe i le tatalaina o le faitotoa i na meaalofa. O nisi o i tatou ua foafoaina ni tapulaa faalemafaufau i o outou manatu. O loo i ai moni lava se atamai maoae o loo lokaina i totonu o i tatou taitoatasi. Aua lava nei faatagaina se tasi e faatalitonu oe i se isi lava mea” (“Trust in the Lord,” i le Hope [1988], 90–91).
Na faasoa mai e Elder Parley P. Pratt (1807–57) o le Korama a Aposetolo e Toasefululua nisi o aafiaga o le mauaina o meaalofa o le Agaga i o tatou olaga: “O le meaalofa o le Agaga Paia e faatulagaina ia lava i nei vaega uma lava po o uiga. Na te faavaveina malosiaga uma lava faalemafaufau, faateleina, faalauteleina, faafefeteina, ma faamamaina lagona uma faanatura ma alofaaga, ma faatulaga i latou, e ala i le meaalofa o le atamai, i o latou aoga faaletulafono. Na te musuia, atiina ae, totoina, ma faamatuaina le alofa sili ona mama, fiafiaga, tofo, lagona faaleaiga, ma lagona alofa o lo tatou natura. Na te musuia le mama, agaalofa, agalelei, agamalu, agavaivai, ma le alofa moni. Na te atiina ae le lalelei i le tagata, tulaga ma foliga. Na te vaaia le soifua maloloina, ma le malosi, le ola, ma lagona faalevafealoai. Na te faatupuina vaega uma o le faaletino ma le faalemafaufau o le tagata. Na te faamalosia ma tuuina atu le malosiaga i neura. A faapuupuu, o le meaalofa, e pei ona sa i ai, le gao i ivi, olioli i le loto, sulu i mata, ma le ola i le tagata atoa” (Key to the Science of Theology [1979], 61).

Moronae 10:20–21. Faatuatua, Faamoemoe, ma le Alofa

Na talanoaina e Elder Joseph B. Wirthlin (1917–2008) o le Korama a Aposetolo e Toasefululua le atiina ae o le faatuatua, faamoemoe, ma le alofa i le avea ai o se gasologa mai lea laasaga i lea laasaga:

“Pe a tatou tausia poloaiga a le Alii, e mafai ona mafuta ma i tatou le faatuatua, faamoemoe, ma le alofa. O nei uiga lelei ‘e totoina ai i [o tatou] agaga e pei o le sau mai le lagi’ [MFF 121:45], ma ia tatou saunia i tatou lava e tutu atu ma le mautinoa i luma o le Alii ma le Faaola, o Iesu Keriso, ‘e le pona lava, e leai foi sona leaga’ [1 Peteru 1:19]. …

“O uiga lelei, matagofie, ma le tauleleia nei tatou te sailia. Ua tatou masani uma i aoaoga a Paulo ‘e le uma le alofa’ [1 Korinito13:8]. E moni, tatou te manaomia le malosi faaleagaga tumau i o tatou olaga. Na tusia e Moronae le faaaliga ‘o le faatuatua, faamoemoe ma le alofa e taitai mai ai [tatou] i le [Alii]—o le punavai o le amiotonu uma’ [Eteru 12:28].

“O le Ekalesia a Iesu Keriso o le Au Paia o Aso e Gata ai, o le Ekalesia toefuataiina a le Alii i le lalolagi i ona po nei, e taitaiina atu ai i tatou i le Faaola ma fesoasoani ai ia te i tatou e atiina ae, faafailele, ma faamalolosia nei uiga paia. ” (i le Conference Report, Oke. 1998, 32; po o le Liahona, Ian. 1999, 29).

Moronae 10:22. “E oo mai le Faatoilaloina o le Manatu ona o le Amioletonu”

Na faasoa mai e Peresitene Ezra Taft Benson (1899–1994) lenei vaaiga e tusa ai ma le manaomia o le faia o le lelei ina ia aloese mai le faavaivai: “Tatou te faitau i le Tusi a Mamona e faapea ‘e oo mai le faatoilaloina o le manatu ona o le amioletonu.’ (Moro. 10:22.) ‘Pe a ou faia mea lelei, ou te faalogoina se lagona lelei,’ le tala a Aperaamo Linikone, ‘ae a ou faia mea leaga, ou te faalogoina se lagona leaga.’ O le agasala e tosoina i lalo le tagata i le lotovaivai ma le atuatuvale. E tusa pe o fiafia se tagata i se fiafiaga le tumau i le faia o le agasala, o lona taunuuga lava o le le fiafia. ‘O le amioleaga e le o le fiafia lea.’ (Alema 41:10.) O le agasala e le tusa ai ma le finagalo o le Atua, ma o se mea e faanoanoa ai le agaga. O le mea lea, e lelei i le tagata ona suesue ifo ia te ia lava ia iloa o loo ogatasi tulafono uma e tausia, e aumaia ai se faamanuiaga faapitoa. O tulafono uma e solia, e aumaia ai se mala faapitoa. O i latou o lutia i le atuatuvale, e tatau ona o mai i le Alii, aua o Lana amo e avegofie ma mama ia. (tagai Mata. 11:28–30.)” (“Aua le Faavaivai,” Liahona, Oke. 1986, 2).

Moronae 10:27. “Tou te Iloa Au i le Nofoa Faamasino o le Atua”

Sa i ai ni nai perofeta na musuia e molimau i e faitau i le Tusi a Mamona o le a latou iloa i tatou i le Aso Faamasino, o le a molimau ai le Alii ia i tatou i le moni o a latou upu. O isi i le Tusi a Mamona na faia foi ia lava saunoaga e aofia ai Nifae (tagai 2 Nifae 33:10–14), Iakopo (tagai Iakopo 6:12–13), ma Mamona (tagai Mamona 3:20–22).

Moronae 10:7–8, 18–19, 26, 30

O le toe faia o se auala taua lea o le aoao atu o loo faaaogaina i tusitusiga paia. O le a le mea o loo faatonuina ai tatou e Moronae i lona faia soo o le upu apoapoai?

Moronae 10:31–32. “O Mai ia Keriso, ina ia Faaatoatoaina Outou e Ia.

A o auauna atu o se tasi o Fitugafulu, na faamatalaina e Elder William R. Bradford le mafuaaga e tatau ai ona tatou mulimuli i le fautuaga mulimuli a Moronae:

Dale Kilbourn, © IRI

“E i ai le olioli tele ma le fiafia i le taumafai e ola amiotonu. I se faaupuga faigofie, o le fuafuaga a le Atua mo Lana fanau o lo latou o mai lea i lenei lalolagi ma faia mea uma latou te mafaia ina ia aoao ai le ola usiusitai i tulafono. Afai e uma ona faia mea uma latou te mafaia, o le galuega togiola a le Faaola o Iesu Keriso e lava lea e faia ai mea uma latou te lei mafai ona faia mo i latou lava. …

“O le tauivi ia ola amiotonu o le taumafai lea ia faia mea uma tatou te mafaia i le usiusitai. O le taumafai e faia mea uma nei e oo mai ai le filemu ma le mafanafana i totonu, ma o le faia o mea uma tatou te mafaia, o le a faataunuuina ai le fuafuaga a lo tatou Atua e i tatou. E leai se isi faalogoga i le agaga o le tagata e mafai ona aumaia le olioli ma le fiafia nai lo le iloaina lea o loo e faia mea uma e te mafaia ina ia amiotonu ai” (i le Conference Report, Oke. 1999, 110; po o le Liahona, Ian. 2000, 103–104).
I le faaiuga o le konafesi aoao, na taua e Peresitene Gordon B. Hinckley lo tatou manaomia ona o mai i le Faaola e ala i le ola ai i se auala ia faamanuia ai isi: “Ou te tatalo o le a avea mea na outou faafofoga ma silasila i ai e maua ai se eseesega i o outou olaga. Ou te tatalo ina ia taitasi i tatou ma agalelei teisi atu, ia mafaufau atu i isi, ia faaaloalo teisi atu foi. Ou te tatalo ina ia tatou pulea a tatou upu ma tala ma ia le faatagaina le ita e faasau ai upu o le a tatou toe salamo ai i se taimi mulimuli ane. Ou te tatalo ina ia tatou maua le malosi ma le naunau e liliu atu le isi alafau, ia savavali i maila faaopoopo e sii ae tulivae ua vaivai o i latou o e ua mafatia” (i le Conference Report, Oke. 2003, 109; po o le Liahona, Nov. 2003, 103).

Moronae 10:32–33

Na taua e Moronae nisi mea e tatau ona tatou faia ina ia “paia, ma le le pona.” O a na mea, ma e faapefea ona e faaaogaina i lou olaga?

Moronae 10:32–33. “I le Alofa Tunoa o le Atua”

Na faamalamalama mai e Elder M. Russell Ballard o le Korama a Aposetolo e Toasefululua o galuega lelei e tatau ona o faatasi ma le alofa tunoa o Keriso: “E le na o le Togiola le iu a Iesu Keriso e mafai ai e tagata ona manumalo i taunuuga o filifiliga leaga. … Po o le a lava lo tatou galulue malosi, po o le a lava le tele o lo tatou usitai, po o le a lava le tele o mea lelei tatou te faia i lenei olaga, e le taitai lava ona lava pe ana leai Iesu Keriso ma Lona alofa tunoa. E le mafai lava ona tatou maua le malo o le Atua pe tuua na o tatou—e tusa lava po o a mea tatou te faia. O le itu e faanoanoa ai, o loo i ai nisi i le Ekalesia ua matua pisi lava i le faia o galuega lelei ua galo ai ia i latou o na galuega—po o le a lava le lelei—e le aoga vagana ua o faatasi ma se faalagolago atoa lava ia Keriso” (“Building Bridges of Understanding,” Ensign, Iuni 1998, 65).

Moronae 10:34. O se Tasi Molimau ia Iesu Keriso

I le itulau autu o le Tusi a Mamona o loo taua ai o le tasi faamoemoega o le Tusi a Mamona ina ia mautinoa ai e “tagata Iutaia ma Nuu Ese o Iesu o le Keriso.” I le avea ai ma molimau tupito i lenei mataupu, mafaufau i lenei mea moni: I le aofaiga o fuaiupu e 6,607 o loo i le Tusi a Mamona, e faa 3,925 ona ta’ua le suafa o Iesu Keriso. O lona uiga o nisi suafa o Keriso o loo taua i fuaiupu taitasi e 1.7 (tagai Susan Ward Easton, “Names of Christ in the Book of Mormon,” Ensign, Iulai 1978, 60–61).

Manatu e Mafaufau Loloto i ai

O a meaalofa a le Agaga e te manatu e sili ona e manaomia i lenei taimi i lou olaga? O le a le mea e mafai ona e faia e atiina ae ai pe maua ai nei meaalofa ua folafola mai e lou Tama Faalelagi?
O a auala ua fesoasoani ai le Moronae 10 ia te oe ia malamalama ai i le uiga o le “o mai ia Keriso”? (Moronae 10:30).
O a auala ua aumaia ai oe e le faitauina o le Tusi a Mamona ia “latalata atili i le Atua”? (Book of Mormon introduction). Fai se lisi o ni fuaitau na sili ona taua ia te oe.
O le a le faiā i le va o le alofa tunoa o Keriso ma la tatou sini o le faaatoatoaina?

Galuega Fautuaina

Fuafua se taimi ma se kalena ia suesue ai le Tusi a Mamona i aso uma a le o le faasolo i autu po o le faasolo sao lava.
Toe faitau lou faamanuiaga faapeteriaka. Ona talanoa lea ia i latou e masani lelei ia te oe, e pei o lou aiga, ma faailoa mai meaalofa faaleagaga e mafai ona latou vaaia ua tuuina mai e le Tama Faalelagi ia te oe. Fai ni fuafuaga pe faapefea ona atiina ae na meaalofa ma isi e te manaomia. (Faaaliga: O lou faamanuiaga faapeteriaka e patino lava ia te oe ma e paia ma e masani lava ona le faasoaina atu i uo.)