3 Nifae 8–1

Folasaga

Ia mafaufau loloto i molimau na fofogaina mai e le Tama Faalelagi: “Faauta, o lo’u atalii pele, ou te fiafia ia te ia, ua ou faamamaluina lo’u igoa ia te ia. Ia outou — faalogologo ia te ia” (3 Nifae 11:7). Ia vaai faalemafaufau pe faapei sau tali atu pe ana faapea sa e i ai iina mo lenei faasilasilaga ma le afio ifo o Iesu Keriso—o le faatumutumuga o mea na tutupu i le Tusi a Mamona. Ia mafaufau pe faapei ou lagona ina ua e faalogo atu ua tautino mai le Alo, “Faauta , o Au o Iesu Keriso, o Le na molimau ai perofeta e sau i le lalolagi” (3 Nifae 11:10). Ia manatunatu i aafiaga i olaga o i latou o e na maua se molimau faaleagaga ma le faaletino o le moni o Iesu Keriso.

Sa faalogoina e lenei nuu le siufofoga o le Atua i nisi taimi. A o e faitauina le3 Nifae 8–11 ia saili mo mea na Ia aoao mai. Ia manatunatu i lou tomai e iloa ai le siufofoga o le Atua ma mulimuli i Ana savali mo oe.

Faamatalaga

3 Nifae 8:1. Faatinoina o Vavega i le Suafa o Iesu

Sa tusia e Nifae e faapea “ua leai se tasi tagata ua mafai ona faia se vavega i le suafa o Iesu, sei iloga ua faamamaina o ia i ana amioletonu uma lava” (3 Nifae 8:1; tagai foi MFF 121:36).

O le tala lenei sa faamatalaina e Elder Vaughn J. Featherstone a o galue ai i le Au Epikopo Pulefaamalumalu o loo faailoa mai ai le manaomia o le mama o e umia le perisitua i taimi uma:

“E le mafai e tagata ona ufiufia agasala. E le mafai ona outou ulagia le Atua ma umia le perisitua paia a le Alii ma faafoliga e faailoa atu o outou o ana auauna.

“Ou te iloa se alii maoae sa sii i ona lima lona atalii ua oti, ma faapea mai, ‘I le suafa o Iesu Keriso ma le mana ma le pule o le Perisitua Paia Mekisateko, ou te poloaiina ai oe ia e ola.’ Ma na pupula mai mata o le tamaitiiti na oti.

“Semanu e le mafai e lenei uso maoae ona ia faia lena mea pe ana faapea sa matamata o ia i sina mea faaponokalafi i nai po na muamua atu, ia pe na aafia foi i soo se ituaiga o na agasala. E tatau ona i ai i le perisitua se auala mama e faagaoioia ai” (i le Lipoti o le Konafesi, Ape. 1975, 100; po o le Liahona, Me 1975, 66).
Sa faamalamalama mai e Elder Jeffrey R. Holland o le Korama a Aposetolo e Toasefululua e ui lava o auaunaga uma faaleperisitua o le a tupu mai ai se mea faavavega, ae ua na o i latou o e agavaa e mafai ona faia vavega i le suafa o Keriso. O e umiaina le perisitua e tatau ona tausia i latou lava ia paia ma mama: “O lea, au uo e o le Perisitua Arona ma le Perisitua Mekisateko, e le faapea o tatalo uma e vave tali mai, e le o valaau uma foi faale-perisitua e mafai ona toe faafou pe toe faafoi mai ai le ola. O nisi taimi, e ese le finagalo o le Atua, ae peitai alii talavou, o le a outou aoaoina pe afai tou te le i iloa, a oo mai taimi taufaafefe, e oo lava i taimi matautia, o lou faatuatua ma lou perisitua o le a e iloa ai le mea silisili ma le mea sili e mafai ona e valaauina mai le lagi. O outou na taulelea o le Perisitua Arona, o le a le faaaogaina lou perisitua i le ala tonu e tasi e faaaogaina ai e se toeaina ua faauuina i le Perisitua Mekisateko, peitai o i latou uma o umia le perisitua e tatau ona avea ma se meafaigaluega i aao o le Atua, e tatau ia te outou, e faapei ona fai mai Iosua, ‘ina faapaiaina ia outou e outou’[Iosua 3:5]. Ua tatau ona outou sauniuni ma agavaa e galulue” (i le Conference Report, Oke. 2000, 51; po o le Liahona, Ian. 2001, 47).

3 Nifae 8:6–19. O Mala Faaletino ua Molimau ia Keriso

“O le matagi tetele ma le matautia … ua faatoa iloa se mea faapea i le nuu uma” ua tatala mai ai faafanoga faalenatura e le i tauina mai (3 Nifae 8:6–7). O nei mala faaletino o faailoga na i Amerika e molimauina ai le faasatauroga o Iesu Keriso i Ierusalema (tagai 1 Nifae 19:10–12; Helamana 14:20–21). O nisi o mala faaletino i o tatou aso ua faailoilo mai ai ua latalata le Afio Mai Faalua.

Jerry Thompson, © IRI

Sa taua e Elder Dallin H. Oaks o le Korama a Aposetolo e Toasefululua le faatuputupulaia o mafuie tetele o se tasi o faailoga o le Afio Mai Faalua: “Ua siomia i tatou i nei faailoga o le Afio Mai Faalua, ma e foliga mai ua faateleina le saoasaoa ma le malosi. Mo se faataitaiga, o faamaumauga o mafuie i leThe World Almanac and Book of Facts, 2004 o loo faaalia ai ua faaluaina le tele o mafuie i le ta’i sefulu tausaga o le 1980 ma le 1990, nai lo le luasefulu tausaga na muamua atu ai (tagai itulau 189 –90). Ua faaalia ai foi le faateleina naua i nai uluai tausaga o lenei seneturi. E tali tutusa foi le faateleina o lologa tetele ma galulolo ma afa, o asiosio ma timu aisa i le lalolagi atoa i tausaga ua mavae atu (tagai itulau 188–89). O tulaga faateleina pe a faatusatusa i le 50 tausaga ua mavae e mafai ona le faaaogaina ona o suiga i auala ma mea e manatu e tatau ona lipotia, peitai, o le saoasaoa o mala faanatura i le silia ma le sefulu tausaga talu ai, e matautia” (i le Conference Report, Ape. 2004, 5–6; po o le Liahona, Me 2004, 7).

3 Nifae 8:23. Tolu Aso o le Pogisa

O le tolu aso o le pogisa o le faatusa lea o le maliu o Iesu Keriso, o Ia “o le malamalama ma le ola o le lalolagi” (3 Nifae 11:11). Sa faamamafa mai e Mamona o le tolu aso o le pogisa o “se faailoga” na tuuina mai o le maliu o le Faaola (tagai 1 Nifae 19:10; Helamana 14:27; 3 Nifae 8:23). Ina ua maea ona faamatalaina le faaleagaina na mafua mai i le “afa tele” (3 Nifae 8:5) lea na agi mo le tolu itula, na faamauina e Mamona le pogisa atoa o se tasi o faailoga lea ua faataunuuina nei (tagai 3 Nifae 10:14 ). Sa matuai pogisa tele ua faapea “ona le mafai ona i ai se malamalama” (3 Nifae 8:21). I lenei taimi o le pogisa, o le tino o Iesu Keriso, o le malamalama o le lalolagi, o loo taoto i le tuugamau. I le aso o Lona Toetu, ina ua maea ona faatoilaloina e Keriso le oti, sa toe oo mai ai le malamalama i tagata i Amerika, na faailoa mai ai le manumalo o Keriso i le oti ma le pouliuli (tagai 3 Nifae 10:9–11).

3 Nifae 8:24–25. O Le Teenaina o Perofeta e Oo mai ai Puapuaga

E pei lava o aso anamua, o le teenaina o perofeta o aso nei e taitai atu ai i puapuaga. Sa faatusatusa e Peresitene N. Eldon Tanner (1898–1982) o le Au Peresitene Sili ia puapuaga o le Au Paia i Amerika i le taimi o le faafanoga ina ua maliu le Faaola i le faafanoga i o tatou aso o i latou o e filifili e le mulimuli i perofeta o ona po nei:

“O nei aso o loo tetee pea tagata i savali a perofeta a le Atua. Pe le moni ea o loo i ai le uio ma le tagi aue i luga o le fogaeleele ona o le sii taua atu o isi tagata i isi tagata? Pe le o i ai ea ia i tatou nisi o loo tagitu’i i le faalogogatata o a latou fanau talavou ma mala ua oo ifo ia i latou ina ua latou liliuese mai le amiotonu ma pologa ai i taunuuga o lo latou tagofia o le tapaa, o le ava ma fualaau oona ma isi mea o loo faasa mai? Pe fia ea ni tagata o loo maua i le loto mafatia ona o le le ola i tulafono i totonu o nuu? E tatau ia i tatou ona faalogo i aoaoga e maua mai i talaaga o mea na tutupu ina nei faatamaia i tatou e pei o na augatupulaga i aso ua mavae.

“O le savali lenei na aumai e Keriso i tagata anamua o sa Nifae” (i le Conference Report, Apr. 1975, 53; po o le Liahona, Aok. 1975, 29).

3 Nifae 9:14. “O Mai ia te Au”

Sa folafola mai e Iesu Keriso: “Amuia i latou o e o mai ia te au” (3 Nifae 9:14).

Sa faamalamalama mai e Elder Jeffrey R. Holland le uiga o lenei valaaulia ma le auala e faaaoga ai i o tatou olaga: ‘“O mai, sa fetalai alofa mai ai [Keriso]. ‘Sau, ma mulimuli mai ia te au.’ Po o fea lava e te alu i ai, ia sau muamua ma vaai i le mea ou te fai, vaai i le mea ma le ala ou te faaalu ai lo’u taimi. Ia faaaoao ia te au, ta savavali faatasi, ta talanoa, ma ia e talitonu. Ia faalogo ia te au o tatalo. O le taui, o lou mauaina lea o tali i au lava tatalo. O le a aumaia e le Atua le malologa i o outou agaga. Sau, ma mulimuli mai ia te au” (i le Conference Report , Oke. 1997, 88; po o le Liahona, Ian. 1998, 76).

3 Nifae 9:19–20. O se Suiga i le Poloaiga e Ositaulaga

O le poloaiga e osia taulaga mu i manu na muai tuuina atu ia Atamu. O le faamoemoega o taulaga e osia i manu ina ia faasino atu mafaufau o tagata i le taulaga silisili a le Faaola. Sa aoaoina le au faatuatua o le a faamutaina taulaga e osia i manu pe a maea ona tuuina atu e le Alo o le Atua Lona toto e avea ma “taulaga sili ma le taulaga faaiu” (Alema 34:10). Sa faamalamalama mai e Amoleka o le mae’a ai o le Togiola a Iesu Keriso, o le a le toe manaomia ai taulaga e osia i manu: “Ona tatau ai lea ona gata i lea mea le faamaligiina o le toto. Ona faataunuuina ai lea o le tulafono a Mose; … e fai foi le Alo o le Atua ma lena taulaga sili e faaiu a’i taulaga, ioe, e le i’u ma e faavavau” (Alema 34:13–14). I le taimi lava na maea ai le taulaga a Iesu Keriso, na folafola mai ai e le siufofoga o le Atua i tagata o le Tusi a Mamona, “aua ou te le talia se tasi o a outou taulaga, po o a outou taulaga mu” (3 Nifae 9:19).
E ui lava o taulaga e osia i manu ma taulaga mu e “mavae atu” (3 Nifae 9:19), ae e lei faamutaina e le Alii le tulafono o le taulaga. I le faaaogaina o le 3 Nifae 9:20, sa faamalamalama mai ai e Elder D. Todd Christofferson o le Korama a Aposetolo e Toasefululua e faapea, i le asō o loo manaomia e le Alii se isi ituaiga o taulaga:

“Sa fetalai le Faaola Na te le toe taliaina ni taulaga mu i manu. O le meaalofa po o le taulaga o le a Na taliaina nei o ‘se loto momomo ma se agaga salamo’ [3 Nifae 9:20]. … E mafai ona e ofoina atu i le Alii le meaalofa o lou loto momomo po o le loto salamo, ma lou agaga nutimomoia po o le agaga usitai. O le mea moni lava, o le ofoina atu lea o oe lava— o le a lava le tulaga o e i ai ma pe o le a foi le ituaiga tagata ua avea ai oe.

“Pe o i ai se mea i lou olaga e le o mama, pe le o agavaa? Pe a mafai ona e lafoaia, o se meaalofa lena i le Faaola. Pe o i ai ea se mausa lelei po o se uiga tausaafia e le o maua i lou olaga? Pe afai e taliaina ma avea o se vaega o lau amio, ua e avatua se meaalofa i le Alii” (i le Conference Report, Ape. 2004, 10; po o le Liahona, Me 2004, 12).

3 Nifae 9:20. “Ua Latou Le Iloa Ai”

Sa faamalamalama mai e Peresitene Ezra Taft Benson (1899–1994) e toatele i latou o loo atiina ae faaleagaga ae e le o mafai ona iloa lo latou lava tuputupu ae malie: “O lea aso ma lea aso e faalatalata atu ai le [Au Paia o Aso e Gata Ai] i le Alii, ma lo latou le iloa moni o loo atiina ae e i latou se olaga faapei o le Atua. Ua ola filemu i latou i ni olaga lelei, ma auauna atu atoa ma le maelega. Ua pei i latou o sa Lamana, o e na fetalai ai le Alii ‘sa papatisoina i le afi ma le Agaga Paia, a ua latou le iloa.’(3 Ni. 9:20; faaopoopo le faatusilima)” (“O Le Liua Maoae o le Loto,” Liahona, Mat. 1990, 7).
Sa faaaogaina e Peresitene Boyd K. Packer, le Peresitene o le Korama a Aposetolo e Toasefululua, lenei lava mau e tasi e faailoa mai ai le popolega ona e le o iloaina ia meaalofa a le Agaga Paia e pei ona tatau ai. Sa ia faamalosia le Au Paia o Aso e Gata Ai e atiina ae meaalofa a le Agaga Paia ma tuuina mai ia fautuaga i auala e iloa ai le Agaga:

“Ua toatele naua i tatou e faapei o i latou ia na fetalai ai le Alii ‘[e o mai] ma le loto momomo ma le agaga salamo, … [ma] i le aso o lo latou liliu mai, sa papatisoina i latou i le afi ma le Agaga Paia, a ua latou le iloa ai’’ [3 Nifae 9:20; faaopoopo le faatusilima].

“Manatu i lena tulaga: ‘A ua latou le iloa ai.’ E le o se mea e le masani ai se tagata e maua lena meaalofa ae na te le iloaina.

“… E tele naua nofoaga e o i ai, tele naua mea e fai i lenei lalolagi pisapisao. E mafai ona tele naua lo tatou pisi ma lē amanaiaina ai ia uunaiga a le Agaga” (i le Conference Report, Ape. 2000, 8; po o leLiahona,Me 2000, 9 10).

3 Nifae 10:5–6. “E Pei o se Moa Ona Ofaofatai i Lana Toloa’i”

O le faatusatusaga i le va o le faapotopotoina e le moa o lana toloai ma le faapotopotoina e le Alii o Lona nuu ua tuuina mai ai ni malamalamaaga malie. E popole se matuamoa i lana toloai ma o le a ositaulaga lona ola e puipui ai i latou. Pe a taufaamatau mai tulaga matautia, na te faapotopoto lana toloai i lalo o ona apaau mo le puipuiga. I se auala tutusa, e alofa le Alii i Lona nuu, le Aiga o Isaraelu. Sa Ia tuuina atu Lona ola mo Lona nuu ma saili e faapotopoto faatasi i latou ina ia mafai ona Ia puipui ma tausia i latou. Ae ui i lea, i le tele o tulaga, sa filifili ai Isaraelu e faagalo le Alii.

A o saunoa ai e uiga i le3 Nifae 10:5–6, sa molimau ai Peresitene Henry B. Eyring o le Au Peresitene Sili o le a fesoasoani le Faaola ia i latou o loo taumafai e o mai ia te Ia:

“Ua faatele ona Ia fetalai, Na te faapotopoto ia i tatou e faapei ona ofaofatai e le matuamoa o lana toloai i lalo o ona apaau. Fai mai a Ia, e tatau ona tatou filifili e o atu ia te Ia i le agamalu, ma se faatuatua tele ia te Ia ia salamo ma le ‘loto atoa’[3 Nifae 10:6].

“O se tasi ala e faia ai lena mea, o le faapotopoto ma le Au Paia i Lana Ekalesia. O i a outou fonotaga po o sauniga e tusa lava pe foliga e faigata. Afai e te naunau, o le a fesoasoani o Ia ina ia e maua le malosi e fai ai” (i le Conference Report, Ape. 2004, 16–17; po o le Liahona, Me 2004, 18).

3 Nifae 10:12. “O i Latou Na Talia Perofeta”

E masani lava ona oo mai le saogalemu pe a tatou mulimuli i perofeta. O tagata sa Nifae na “taliaina perofeta” sa faasaoina mai le faafanoga tele (3 Nifae 10:12). Sa aoao mai e Elder M. Russell Ballard o le Korama a Aposetolo e Toasefululua o i tatou, e pei foi o sa Nifae, e tatau ona mulimuli i lo tatou perofeta pe afai tatou te faamoemoe e maua le saogalemu, filemu, manuia, ma le fiafia: “E le o se mea faatauvaa, ou uso e ma tufafine, le i ai o se perofeta a le Atua faatasi ma i tatou. E maoae ma ofoofogia faamanuiaga e oo mai i o tatou olaga a o tatou faalogo atu i afioga a le Alii ua tuuina mai ia i tatou e ala mai ia te ia. … Afai tatou te faalogo i le fautuaga a le Alii na faailoa mai e ala i upu a le peresitene o le Ekalesia, o la tatou tali e tatau ona sao ma vave. O loo faaalia i le talafaasolopito e faapea e i ai se saogalemu, filemu, manuia, ma le fiafia i le tali atu i fautuaga faaperofeta” (i le Conference Report, Ape. 2001, 84; Liahona,Iul. 2001, 80).
Sa molimau mai Peresitene Boyd K. Packer e oo mai faamanuiaga ia i latou o e mulimuli i perofeta ma lapatai mai i taunuuga o le teenaina o i latou:

“I se tasi o taimi, sa taitaia ai e Karl G. Maeser se vaega o faifeautalai talavou i Atumauga maualuluga. Ina ua latou taunuu i le tumutumu, sa ia vaai i tua ma iloa atu ai se laina fasilaau ua tutu’i i le kiona e faailoga ai le auala saogalemu e tasi e savavali ai i le aisa matautia.

“Sa ia taofi le malaga ma faasino atu faifeau i fasilaau ma faapea atu, ‘Uso e, o le la e tulai mai le perisitua [a le Atua]. O i latou ua na o ni fasilaau taatele e pei o le toatele o i tatou, …ae peitai o le tulaga ua latou tutu ai ua taua ai i latou ia i tatou. Afai tatou te laa ese mai le auala ua latou faailogaina, o le a tatou malaia” (mai le Alma P. Burton, Karl G. Maeser, Mormon Educator [Salt Lake City: Deseret Book Co., 1953], p. 22).

“E ui lava e leai se tasi o i tatou e atoatoa, e agai pea i luma le Ekalesia, e taitaia e tagata faatauvaa.

“Sa folafola mai e le Alii:

“‘Afai foi e faalogo mai lo’u nuu i lou leo, ma le leo o au auauna ua ou tofia e taitaiina lou nuu, faauta, e moni ou te fai atu ia te outou, o le a le aveesea lava i latou mai lo latou nofoaga.

“‘A e afai latou te le faalogo i lou leo, po o le leo o nei tagata ua ou tofia, o le a le faamanuiaina i latou’ (MFF 124:45–46).

“Ou te molimau atu, uso e ma tuafafine, o taitai o le Ekalesia ua valaauina e le Atua i le pule tatau ai, ma ua lauiloa i le Ekalesia ua ia i latou le pule ma ua faauuina lelei i latou e taitai faauuina o le Ekalesia. Afai tatou te mulimuli ia i latou o le a faasaoina i tatou. Afai tatou te o ese mai ia i latou e mautinoa lava o le a tatou malaia” (mai le Conference Report, Ape. 1985, 45; po o le Liahona, Iul. 1985, 33 34).

3 Nifae 11:3. “Sa Latou Faalogo i se Leo”

Sa aoao mai e Elder Dallin H. Oaks e faapea o le “leo itiiti” lea e mafua ai ona “ mu o latou loto” (3 Nifae 11:3; faaopoopo le faatusilima) o se lagona sili atu nai lo se leo: “O le upu ‘mu’ i lenei mau o loo faailoa mai ai se lagona o le mafanafana ma le filemu” (“Aoao Atu ma le Aoaoina e le Agaga,” Liahona,Me 1999, 15). O lefilemu o lona uiga o le mafanafana, agamalu, ma le toafimalie.
E pei ona tatau ia sa Nifae ona “tatala o latou taliga” (3 Nifae 11:5) e faalogo ai i le siufofoga o le Atua, sa faamalamalama mai e Peresitene Boyd K. Packer lo tatou manaomia foi e gauai atu ina ia mafai ai ona tatou lagona le uunaiga malu a le Agaga:

“O le leo o le Agaga o loo faamatala mai i le mau, e le o se leo e ‘leotele’ pe ‘saua.’ E ‘le o se leo o le faititili, po o se … leo o se pisapisao tele.’ A e, ‘o se leo itiiti ma le malie lava ia, e peiseai o le musumusuga,’ ma e mafai ona ‘atia ai le agaga’ ma ‘mu ai [le loto].’ (3 Ni. 11:3; Hel. 5:30; MFF 85:6–7.) Ia manatua na iloa e Elia sa le i ai le siufofoga o le Alii i le matagi, po o le mafuie, po o le afi, ae o se ‘leo itiiti ma le filemu.’ (1 Tup. 19:12 .)

“E le gauai mai le Agaga ia i tatou e ala i le uio po o le luluina o i tatou i se lima mamafa. Nai lo lena, e musumusu mai. E pai filemu mai lea afai o loo tatou pisi i nisi mea, o le a le mafai lava ona tatou lagonaina. (E leitioa faaalia mai ia i tatou le Upu o le Poto, aua pe faapefea e le tagata onā po o lē ua aafia i vaisu ona lagonaina sea leo?)

“O nisi taimi o le a ia uunaia ai ia tau lava ia lava le mausali mo tatou e faalogo ai. A e o le tele lava o taimi, afai tatou te le faalogo i le lagona malū, o le a alu ese le Agaga” (“O le Lamepa a le Alii,” Liahona, Tes.1988, 35).

3 Nifae 11:5–7. “Faauta O Lou Atalii Pele”

Sa saunoa mai Peresitene Ezra Taft Benson e uiga i le aafiaga e le lau maua o le faalogo atu i le siufofoga o le Tama Faalelagi:

E toaitiiti lava tagata i le talafaasolopito atoa o le lalolagi na faalogo i le siufofoga moni o le Atua le Tama ua fetalai atu ia i latou. A o vaavaai atu tagata i le lagi, ‘ua latou iloa atu le Tagata ua afio ifo nai le lagi; ma ua ofu o ia i le ofu sinasina; ma ua afio ifo ma tu o ia i totonu ia te i latou’ [3 Nifae 11:8].

“O se tagata mamalu, toetu, o se tasi o le Aigaatua, o Lē Foafoa o lalolagi e le mafaitaulia tele, o le Atua o Aperaamo, Isaako, ma Iakopo, ua tulai ai i o latou lava luma!” (i le Conference Report, Ape. 1987, 4; po o leLiahona,Iul. 1987, 5).

3 Nifae 11:11. O Le Ipu Oona

Sa aoao mai e Peresitene James E. Faust (1920–2007) o le mulimuli i faataitaiga a le Faaola i taimi o faigata e fesoasoani ai ia i tatou e onosai i a tatou “ipu oona” patino: “E toatele tagata o le ekalesia, pe a latou inuina le ipu oona e oo mai ia i latou lava. I uluai fetalaiga a Iesu le Nasareta i tagata o le konetineta i sisifo, na ia fetalai atu ai ma le ootia e uiga i le ipu oona na tuuina atu e le Tama ia te Ia (tagai 3 Ni. 11:11). E tofu lava tagata uma ma se tulaga oona matuitui e inumia. O matua e i ai se tamaitiiti o le fanau e se ese mai lona ala, o le a la iloaina se faanoanoaga e le mafaamatalaina. O se fafine e agaleaga lona toalua pe leai se lagona alofa, e mafai ona nutimomoia lona loto i aso uma. O tagata o le ekalesia e le i faaipoipo atonu e pologa i le faanoanoa ma le le fiafia. Ae ui o lea, o le inuina o le ipu oona, e i ai se taimi e tatau ai ona taliaina e le tagata le tulaga ua i ai ma aapa atu i le Atua ma aapa atu foi e fesoasoani i isi tagata. Na saunoa mai Peresitene Harold B. Lee, ‘Aua e te faatagaina lou manatu alofa ia te oe lava po o le faanoanoa e taitaieseina oe mai le mea ua e iloa e sao.’ Ua faatuina e le Faaola le tapasa: e tatau ona tatou toe fananau i le agaga ma le loto” (“O Se Toe Fanau Faalua,” Liahona,Iuni 1998, 3 4).

3 Nifae 11:14–17. O Manua i Ona Lima ma Vae ma le Itu

Ina ua afio atu le Alii toetu i sa Nifae, sa Ia valaaulia i latou e fetagofi i manua i Ona lima ma vae ma le itu ina ia mafai ai ona latou molimauina Lona Toetu (tagai 3 Nifae 11:14). Sa aoao mai e Elder Jeffrey R. Holland o manua faaletino o Iesu Keriso o faailoga ia o Lana taulaga:

“E tusa lava po o le a le foliga faale-lelei o tatou aso, sa sili atu ona pogisa mo le Faaola o le lalolagi. Ina ia avea ma faamanatu o na aso, o lea ua filifili ai e Iesu, e tusa lava pe ua i ai se tino toetu, ae ia faatumauina lava mo le manuia o Ona soo, ia manua i Ona lima ma Ona vae faapea foi Lona itu—o faailoga, pe a outou manatu i ai, e oo mea tiga i e mama atoatoa ma e amiotonu; o faailoga, o tiga o lenei lalolagi e le o ni faailoga faapea e le alofa le Atua ia te outou; o faailoga, pe a outou oo i ai, e mavae atu faafitauli ona mafai lea ona outou maua le fiafia. Ia faamanatu atu i isi, o le Keriso lea na faamanuiaina, o le Kapeteni o o tatou agaga, peitai, o Ia lea o loo tauaveina ma’ila o lo tatou faamagaloga o manua o Lona alofa ma le lotomaualalo, o le tino ua momomo ona o le usitai ma le taulaga.

“O nei manua, o le ala aupito taua lea tatou te iloa ai o Ia pe a afio mai. Atonu o le a ia valaaulia i tatou ia tatou o atu, e faapei ona Ia valaaulia isi, ina ia vaai ma tagotago i na faailoga. Afai e le o se taimi a o lei afio mai, o lona uiga o le taimi lava e afio mai ai, o le a tatou manatua ai e faapei o Isaia, o i tatou lava na mafua ai ona ‘inosia ma tuulafoaiina se Atua … ; o se tagata faanoanoa, ua masani foi ma le tiga,’ ma ‘ua manua o ia ona o a tatou solitulafono, ua momomo o ia ona o a tatou amioleaga: o le aoaiga e filemu ai tatou sa i ona luga lea, o ona faalavalava foi ua malolo ai i tatou’(Isa. 53:3, 5)” (“Aoao Atu, Talai Atu, Faamaloloina,” Liahona, Ian. 2003, 22).

3 Nifae 11:16–21. Osana

“O le upu Osana o se faaliliuga o se upu Eperu faaopoopo o lona uiga ‘Ia, aumai le faaolataga.’ E manino lava sa aioi atu tagata i le Faaola ina ia aoaoina i latou i le ala o le faaolataga; o lea e le o se mea e ofo ai lona aoaoina loa o i latou i mataupu faavae autu ma sauniga o le talalelei” (Daniel H. Ludlow, A Companion to Your Study of the Book of Mormon [1976], 261–62).

3 Nifae 11:21–27. O Le Taua o le Papatisoga

Sa aliali mai na i ai ni finauga i tagata sa Nifae e faatatau i le auala e fai ai papatisoga. Sa faamanino mai e le Alii le auala e faatinoina ai le sauniga. Sa faamalamalama mai e Peresitene Boyd K. Packer le taua o le papatisoga ma lapatai mai e le tatau ona tatou suia lenei sauniga paia:

“O le papatisoga i le faatofuina mo le faamagaloina o agasala o le uluai sauniga lena. O le papatisoga e ao lava ona faia e ala i le faatofu, aua o le faatusa lea o le toetu mai nai le oti, mai le tuugamau, ma le faamamaina e manaomia mo le faaolataga mai le oti faaleagaga.

“… I le fuafuaga, o le papatisoga ua le na o se ulufale atu i le Ekalesia a Iesu Keriso. E amata ai se toe fanauina faaleagaga lea e le pine ae mafai ona taitai atu ai i le afioaga o le Atua.

“Afai tatou te malamalama moni lava i le mea ua faatusaina i ai le papatisoga, o le a le mafai lava ona tatou mafaufau faatauvaa i ai pe suia le faiga o lenei sauniga paia. … E ala i le faamanatuga tatou te faafouina ai le feagaiga” (Our Father’s Plan [1984], 39–40).

3 Nifae 11:28–30
Aloese i Finauga

Sa fesoasoani mai Peresitene Henry B. Eyring ia tatou malamalama o le Agaga o le Atua na te le taitaia tagata i finauga: “O le mea e i ai tagata ua latou mauaina lena Agaga, e mafai ona tatou faamoemoeina ai le lotogatasi. E tuuina mai e le Agaga le molimau o le moni i o tatou loto lea e maua ai le lotogatasi e i latou o e maua lena molimau. O le Agaga o le Atua e le mafai ona faatupuina se finauga (tagai 3 Nifae 11:29). O le Agaga o le Atua e le mafai ona faatupuina ni lagona o le eseesega i le va ma tagata lea e taitaiina atu ai i le faatuiese (tagai Joseph F. Smith,Gospel Doctrine, 5th ed. [1939], 131). O le Agaga o le Atua e maua ai le filemu patino ma se lagona o le tasi ma isi. O lea Agaga e faalotogatasi ai tagata. O se aiga lotogatasi, se Ekalesia lotogatasi, ma se lalolagi filemu e faalagolago lena i tagata ua lotogatasi” (i le Conference Report, Ape. 1998, 86; po o le Liahona, Iul.1998, 77).
Sa faasoa mai e Peresitene Thomas S. Monson se tala e faailoa ai faamanuiaga e oo mai le aloese i finauga. Ina ua maea ona faitauina le 3 Nifae 11:28–30, sa ia faapea mai:

“Ou te fia faaiuina i se tala i ni alii se toalua o e na avea ma ni au tagata totoa. O a la gaoioiga totoa e le i faataunuuina mo se atunuu atoa, ae o totonu o se vanu filemu ua lauiloa o Midway, i Iuta.

“E tele ni tausaga ua mavae a o le i auauna atu faatasi ia Roy Kohler ma Grant Remund i tofiga i le Ekalesia. O i laua o se uo lelei tele. O i laua o ni fai faatoaga ma ni fai lafumanu. Ona i ai lea o se le malamalama na tulai mai na mafua ai ona va i laua.

“Mulimuli ane, na matuai mai tigaina ia Roy Kohler i le kanesa ma e puupuu lava se taimi sa totoe e ola ai. Sa ma asiasi atu ma lou toalua o Frances ia Roy ma ou tuuina atu se faamanuiaga ia te ia. A o matou talatalanoa, sa faapea mai le Uso ia Kohler, “Ou te fia tau atu ia te oe se tasi o mea sili ona matagofie na ou oo i ai i lou olaga.’ Ona ia faamatala mai lea o lo laua le femalamalamaai ma Grant Remund ma le feeseeseaiga na tulai mai ai. Fai mai lana faamatalaga, ‘Ma te lei toe faauo.’

“‘Ma,’ sa faaauau ai le tala a Roy, ‘e lei leva talu ona ou aoina le vao mago ma teu i le fale e teu ai vao mo le taumalulu, ae oo i se tasi po, ona o le tele o le vao mago, na mafua ai ona tupu se afi, ma mu uma ai le vao mago, o le lotoa, ma mea uma sa i ai. Sa ou le mautonu,’ o le tala lea a Roy. ‘Sa ou matua le iloa po o le a sa’u mea a fai. Sa matuai pogisa le po, sei vagana ai nai motumotu o le afi sa ola. Ona ou vaaia lea o loo agai mai ia te au i le auala, mai le nofoaga o Grand Remund, ia moli o ni palau ma masini mamafa. A o agai mai i totonu o lo matou auala le “au laveai” ma feiloai mai ia te au ma ou loimata, sa faapea mai Grant, “Roy, e fai si tele o lau lapisi o le a faamama. O lea ua matou o mai ma lau fanau tama, tatou o loa e amata ona faamama.”’ Sa amata loa ona latou galulue. Sa le toe vaaia e faavavau le maagao natia lea na eseese ai i laua mo se taimi puupuu. Sa latou galulue i le po atoa e oo i le aso na sosoo ai, faatasi ai ma isi mai le nuu na auai atu i ai.

“Na maliu ia Roy Kohler, ma ua matua foi ia Grant Remund. Sa auauna atu faatasi o la ataliii i se au epikopo o le uarota lava e tasi. Ou te matuai faamemelo lava i le faauoga a nei aiga lelei e toalua” (i le Conference Report, Ape. 2002, 22; po o le Liahona, Iul. 2002, 22 ).

3 Nifae 11:28–40. Ua Fetalai Iesu i Ana Aoaoga Faavae

O le fuaitau “o a’u mataupu” e faavalu ona maua i fuaiupu 28–40 o le 3 Nifae 11 . Sa faamatalaina e le Alii Ana mataupu, o mataupu o le salamo ma le papatisoga. I se gagana tutusa i le 2 Nifae 31, na faaalu ai e Nifae se taimi tele i le faamatalaina o le mea ua ia ta’ua “o mataupu a Keriso.” Sa faaaofia ai e Nifae le faatuatua, salamo, papatisoga, o le Agaga Paia, suesueina o tusitusiga paia, ma le tumau seia oo i le iuga i lana lisi o mataupu a Keriso. Mulimuli ane i Lana asiasiga i tagata o le Tusi a Mamona, sa toe ta’u atu foi e le Alii nei lava aoaoga faavae e tasi (tagai 3 Nifae 27) ma faaigoaina i na aoaoga “o la’u talalelei.” O nei aoaoga faavae ua faamanatu mai ai ia i tatou le Mataupu Faavae o le Faatuatua1:4: “Matou te talitonu o muai mataupu faavae ma sauniga o le Talalelei e faapea: muamua, o le Faatuatua i le Alii o Iesu Keriso; lona lua, o le Salamo; lona tolu, o le Papatisoina i le faatofuina mo le faamagaloina o agasala; lona fa, o le Faaee atu o lima e maua ai le mea foaifua o le Agaga Paia.”

Manatu e Mafaufau Loloto i ai

Aisea na avea ai le pouliuli atoa ma se faailoga tatau ma le faatusa o le maliu o le Faaola?
Na faapefea ona taumafai le Alii e aumai mai oe i Lana lafu?
E faapefea e se tagata ona maua “se loto momomo” ma “se agaga salamo”?(3 Nifae 9:20).
O le a le eseesega i le va o le “agaga o finauga” (3 Nifae 11:29) ma se talanoaga e foia ai se feeseeseaiga? E mafai faapefea e tagata ona feeseeseai e aunoa ma le fefinauai?

Galuega Fautuaina

Ua na o i latou lava na talia ia perofeta sa faasaoina mai faafanoga o le afio mai o le Alii. Ia fai se lisi o faatonuga sa saunoa i ai le perofeta ma uso o le Korama a Aposetolo e Toasefululua i se sauniga o le konafesi aoao faatoa mavae atu. Ia fuafua le auala o le a e faatinoina ai na mea i lou olaga.
Sa valoia maoti mai uma e Nifae ma Samuelu le sa Lamana e uiga i le faatafunaga lea o le a oo i Amerika i le taimi lava e maliu ai Iesu Keriso i Ierusalema. Ia faatusatusa le valoaga o loo i le 2 Nifae 26:3–9 ma le Helamana 14:20–27faatasi ai ma lo latou faataunuuga o loo i le 3 Nifae 8:5–23.
E toaitiiti lava tagata i le talafaasolopito o le lalolagi na faalogo i le siufofoga moni o le Atua le Tama ua fetalai atu ia i latou. Ia fai se siata e faatusatusa ai afioga a le Tama Faalelagi ina ua Ia fetalai atu i le papatisoga o Iesu Keriso (tagai Mataio 3:17; Mareko 1:11; Luka 3:22); i luga o le Mauga o Liua (tagai Mataio 17:5; Mareko 9:7; Luka 9:35); i le au sa Nifae (3 Nifae 11:7); ma i le Perofeta o Iosefa Samita (Talafaasolopito o—Iosefa Samita 2:17). Ia faamatala le taua o fetalaiga taitasi nei.