Inisitituti
Mataupu 39: 3 Nifae 1–7

Mataupu 39

3 Nifae 1–7

Folasaga

Sa matauina e Peresitene Ezra Taft Benson (1899–1994) “o faamaumauga o le talafaasolopito o sa Nifae a o lumanai lava le afio atu o le Faaola ua faaali mai ai le tele o mea e tutusa ma o tatou lava aso a o tatou faatalitali i le afio faalua mai o le Faaola” (i le Conference Report, Ape. 1987, 3; po o leLiahona,Iul. 1987, 4). Ua na o i latou na i ai molimau maumaututu ma le liua atoatoa na mafai ona tumau ma le mausali a o lumanai ai le afio atu o le Faaola i Amerika. O le mea moni foi lea e tasi i o tatou aso. Ua na o i latou foi o e e i ai molimau maumaututu ma le liua atoatoa o le a mafai ona tumau ma le mausali a o lumanai ai le Afio Mai Faalua o le Alii. O se suesuega ma le totoa o le3 Nifae 1–7o le a fesoasoani ia te oe e malamalama ai i le auala o le a e maua ai le malosi tumau e te manaomia e ala i lau molimau ia Iesu Keriso ma le liua atoatoa i Lana talalelei e tumau ai ma le faamaoni i le Faaola i taimi o aso o tofotofoga o loo e ola ai.

Faamatalaga

Atonu ua faatonuina e faatusatusa le uumi o tusi i le Tusi a Mamona ma le taimi o loo aofia ai. Ia faasino i le siata“O Itulau o le Tusi a Mamona ma Periota o Taimi” i le itulau o aitema faaopoopo (itulau 435).

3 Nifae 1. O Le Faataunuuga o Valoaga

  • Sa tatalo ma le malosi Nifae i le Alii ina ua faamatauina e fili e fasioti i latou o e talitonu i faailoga na muai tauina atu e Samuelu le sa Lamana. I le tali i lana tatalo, sa tau atu ai e le Alii ia Nifae e aua le fefe, aua o faailoga o le soifua mai o le Keriso o le a faataunuuina i lena lava po. Sa faamaumauina ma le faaeteete i faamaumauga le faataunuuga o valoaga uma lava a Samuelu (tagai i le siata o loo i le faamatalaga mo Helamana 14 i le itulau 283).

3 Nifae 1:1. O Le Faatulagaga o le Kalena a sa Nifae

  • I le gasologa o le Tusi a Mamona, sa faaaogaina ai e sa Nifae ni mea e tutupu eseese se tolu o faasinoga mo le fuaina o taimi i a latou kalena:

    Tulaga e Faasino I Ai

    O Le Taimi e Faaaoga Ai

    O Poloka Tusitusiga Paia

    Mai le taimi na tuua ai e Liae ia Ierusalema

    600–92 T.L.M.

    1 Nifae 1–Mosaea 29

    Mai le taimi na suia ai le faigamalo mai tupu i faamasino

    92 T.L.M.–T.A. 1

    Mosaea 29–3 Nifae 1

    Mai le taimi o faailoga o le soifua mai o Iesu Keriso

    T.A. 1–421

    3 Nifae 1–Moronae 10

    Manatua: Sa tuuina mai le faailoga i le soifua mai o Iesu. Ae ui i lea, latou te le i amata faaaogaina o se tulaga e faasino i ai seia oo i le T.A. 9.

3 Nifae 1:29. E Tatau Ona Puipuia i Tatou Mai le Taitai Seseina

  • O le fuaiupu 29 o le 3 Nifae 1 o loo faaalia mai ai e na o le tasi lava le augatupulaga na tupu ai le liliuese. Ua tatou faitau i le tala faanoanoa o le fanau a matua faamaoni o e na taitaieseina e “pepelo ma … upu faaviivii, e faatasi ma le au faomea a Katianetona.”

    Sa aoao mai Peresitene Henry B. Eyring o le Au Peresitene Sili: “O tagata talavou o le Ekalesia … o loo taulimaina le lumanai i o latou lima. E tasi le augatupulaga o loo va ai pea le Ekalesia mai le leiloa atu. Pe afai e leiloa atu se augatupulaga atoa, o le mea o le a lē tupu lava, o le a leiloa atu le Ekalesia. Ae e oo lava i le leiloa atu o se tagata e toatasi i le talalelei a Iesu Keriso, e tapunia faitotoa mo augatupulaga o suli, sei vagana ai ua aapa atu foi le Alii e toe faafoi mai i latou” (“We Must Raise Our Sights” [Church Educational System conference on the Book of Mormon, Aug. 14, 2001], 1.

  • Sa fautuaina e Peresitene Gordon B. Hinckley (1910–2008) le autalavou o o tatou aso i le auala e aloese ai mai le taitaieseina mai le upumoni:

    “Mo o tatou tupulaga talavou, le autalavou viia o lenei augatupulaga, ou te faapea atu, ia faamaoni. Ia tumau i le faatuatua. Ia tumau i le mea e te iloa e sao.

    “Tou te feagai ma tofotofoga matautia. E oo atu ia tofotofoga ia te outou mai fale faafiafia o loo fai ai faafiafiaga moomia, e maua i le Initoneti, o tifaga, o le televise, o tusi taugofie, ma isi auala —e maaleale, e faaosofia ai lagona feusuai, ma faigata ai ona teena. Atonu ua tauau lava ina lofituina uunaiga mai tupulaga. Ae peitai, au uo talavou pele, e le tatau lava ona outou gauai atu i ai. E tatau ona outou malolosi. E tatau ona outou tulimatai atu i mea e aupito sili ona taua ia te outou i le lumanai, ae aua le faamatuu atu i tofotofoga faatosina o le taimi nei. …

    “… O outou o le augatupulaga silisili nai lo se isi. Ua sili atu lo outou silafia o le talalelei. Ua sili atu lo outou faamaoni i o outou tiute. Ua outou malolosi atu e fetaiai ma tofotofoga o loo aga atu i lo outou ala. Ia outou ola i o outou tulaga faatonuina. Ia tatalo mo se taitaiga ma se puipuiga mai le Alii. Na te le tuulafoaiina lava outou. Na te faamafanafana ia te outou. Na te lagolagoina outou. Na te faamanuia outou ma faatamaoaigaina ma faia ia matagofie ma suamalie o outou taui. Ma o le a e iloaina o au faataitaiga o le a tosina mai ai isi ma o le a latou maua foi le lototele mai lou malosiaga” (i le Conference Report, Oke. 2003, 86–88; po o le Liahona, Nov. 2003, 83–84).

3 Nifae 2:1–2. Ua Amata Ona Latou Le Talitonu i Faailoga na Tuuina Atu

  • Ina ua faatoa maea ona tuuina atu le faailoga o le soifua mai o Keriso, sa auina atu e Satani ia mea pepelo e faamaaaina ai loto o tagata (tagai 3 Nifae 1:22). E ui e lei i ai se aafiaga vave, ae e lei umi lava ae toatele tagata ua amata ona “maaa i latou i o latou loto, ma tauaso i o latou manatu, ma ua amata ona le talitonu i mea uma na latou faalogoina ma vaaia” (3 Nifae 2:1).

    Sa aoao mai e Elder Neal A. Maxwell (1926–2004) o le Korama a Aposetolo e Toasefululua e mafai foi ona faamanualia i tatou faaletino i osofaiga a Satani i o tatou talitonuga: “E vavave tele le gaoioi a Satani e oo lava i tagata ua i ai aafiaga faaleagaga faapitoa, ua ia saili atu i tagata ua vaai i faailoga‘ ina ia le talitonu i mea uma na latou faalogoina ma vaaia.’ (3 Nifae 2:1–2.) E i ai i le fili se avanoa lelei atu na te tauanauina ai i tatou i mea ua tatou talitonu i ai e faavalea pe afai tatou te popole i vaaiga faavalea i luma o o tatou uso a tagata” (Things As They Really Are [1978], 41).

    Ata
    O le fetu i le soifua mai o Keriso

    Jerry Thompson, © IRI

    O le a le lesona e tatau ona aoaoina e e talitonu e faatatau i faailoga ma le faaolataga? (tagai MFF 63:8–12). O faailoga e tafe mai le faatuatua ma o ona fua na. E faamalosia e faailoga ē faamaoni ma fausiaina le faatuatua i tulaga e taliaina ai faaleagaga. E ui i lea, o le faamoemoega sili lava o faailoga, e le o le fausiaina o le faatuatua ae o le tauia o le faatuatua (tagai MFF 68:9–11). E le faamalosia e faailoga le faatuatua i soo se tasi. Ae o le mea e faanoanoa ai, e taatele le vaaia i tusitusiga paia ma i le lalolagi i le taimi nei, o faailoga ofoofogia silisili ma faamaoniga o le mana o le Atua, e le amanaiaina pe ua faauiga sese e i latou e leai se faatuatua.

3 Nifae 2:1–4. Aisea e vaaia ai e ē amioleaga faailoga i nisi taimi?

  • I tusitusiga paia e mafai ona tatou vaaia ai nisi o mafuaaga i le pogai o le a faaali atu ai e le Alii i nisi taimi ia faailoga i e amioleaga:

    Ina ia faamaonia ai ia perofeta. O le faailoga na tuuina atu e Nifae, le atalii o Helamana, i le nuu e faatatau i le maliu o le faamasino sili na faaalia ai e sao lava Nifae (tagai Mosaea 20:21).

    Ia tuua e amioleaga e aunoa ma se ‘alofaga. O e amioleaga e tali atu i latou atoatoa mo a latou amioga pe a maea. Ua tuuina mai e le Alii, “O le saili foi faailoga o le a vaai i faailoga, ae e le faaolaina ai” (MFF 63:7).

    Faaalia le sa’o o upu a perofeta. Talu ai ona e saili ē amioleaga ia faamaonia e sese perofeta, o le a faaali ai e le Alii i nisi taimi ia faailoga e le masalomia (tagai Helamana 9:2– 4).

    Tausalaina o e amioleaga. Pe a vaai e amioleaga i faailoga, e ala mai i le toasa o le Alii ma i lo latou tausalaga (tagai MFF 63:11). Na tuuina mai e le Faaola, “O le tupulaga leaga ma le mulilulua ua latou sailia mai se faailoga” (Mataio 12:39).

3 Nifae 3–4. O Sauniuniga Faaletino ma Faaleagaga

  • E faigofie lava ona vaaia uunaiga a Satani i upu a Kitianae (3 Nifae 3:1–10) a o ia faaaogaina upu faaviivii (fuaiupu 2), ma taufaavalea (fuaiupu 5), ma faia folafolaga pepelo (fuaiupu 7–8) e ausia ai ona faamoemoega amioleaga. Ae faapei foi folafolaga a Kitianae o folafolaga a le tiapolo, na pau le mea na te ofoina mai o le nofopologa ma se folafolaga e faasoa mai ni meatotino e le o ni ana mea e faasoa mai (tagai fuaiupu 7).

    Sa faavave ona liliu atu Lakoneu i lona nuu. Sa ia iloa e manaomia ona latou saunia faaletino ma faaleagaga mo osofaiga taufaamatau a le au faomea a Kitianae. Sa tuu atu i lona nuu e fau ni olo malolosi (fuaiupu 14) ma faapotopoto mai a latou manu ma aiga (fuaiupu 13) i se nofoaga se tasi—o le nuu o Saraemila (fuaiupu 22–23). Sa ia tuu atu ia i latou e fau ia auupega ma ofutau (fuaiupu 26) ma faaputuputu se sapalai o meaai mo le fitu tausaga (3 Nifae 4:4). Sa faatonuina e Lakoneu lona nuu ina ia tuua laueleele toafa “tuufua” ina ia le mafai e le au faomea ona fao faamalosi meaai (fuaiupu 3–4).

    A o le mea e sili ona taua, sa saunia faaleagaga e Lakoneu lona nuu. Sa ia faamanatu atu ia i latou le saogalemu o le salamo (3 Nifae 3:15). Sa salamo ma tatalo malosi lona nuu i le Alii (fuaiupu 25; 4:8). O lea na saunia ai i latou lava ma le atamai i le faaletino ma le faaleagaga mo osofaiga o loo taufaamatau mai a o latou fili.

  • Ua talosagaina i tatou ia saunia faaletino ma faaleagaga i o tatou aso mo mala o loo taufaamatau mai. Sa aoao mai e Elder Dallin H. Oaks o le Korama a Aposetolo e Toasefululua mea e ao ona tatou faia e saunia ai mo mea e tutupu muamua a o lumanai le afio mai o le Faaola:

    “E faapefea pe afai o taeao le aso o Lona afio mai? Afai sa tatou iloa o le a tatou feiloai ma le Alii taeao—e ala i lo tatou oti faafuasei po o Lona afio faafuasei mai—o le a sa tatou mea e faia i le aso? O a ni mea o le a tatou ta’uta’u atu? O a ni mea o tatou faia o le a tatou tuua? O a ni o tatou toatuga o le a faaleleia? O a ni faamagaloga tatou te tuuina atu? O a ni molimau o le a tatou faia?

    “Afai o le a tatou faia na mea i lena taimi, aisea e le fai ai nei loa? Aisea e le sailia ai le filemu a o mafai ona maua? Afai ua lata ina uma a tatou lamepa o sauniuniga, ia tatou amata nei loa ona toe utu.

    “E ao ina tatou taufai faia sauniuniga faaletino ma le faaleagaga, mo mea ua valoia i le taimi o le Afio Mai Faalua. Ma o le sauniuniga lava e tau le amanaiaina, o lea e tau le iloa ma sili atu ona faigata —o le faaleagaga. …

    “Pe o tatou mulimuli ea i le poloaiga a le Alii ‘Ia outou tumau ai i mea paia ma aua le liliu ese, seia oo mai le aao o le Alii; aua faauta, e faataalise atu lava’? (MFF 87:8). O a na ‘nofoaga paia’? E mautinoa lava e aofia ai le malumalu ma ona feagaiga e tausia ma le faamaoni. E aofia ai se aiga, o i ai fanau e faatauaina ma matua e faaaloalogia. O nofoaga paia e aofia ai o tatou valaauga na tofia ai e taitai o le perisitua, e aofia ai misiona ma valaauga e faataunuuina ma le faamaoni i paranesi, uarota , ma siteki” (i le Conference Report, Ape. 2004, 7–8; po o le Liahona, Me 2004, 8–10).

3 Nifae 4:10. O Le Faatuatua i le Atua e Faatoilaloina ai le Fefe

  • Sa saunia e sa Nifae i latou lava faaletino ma faaleagaga e fetaiai ma le au faomea a Kitianae. I se faatinoga mulimuli o le faamaualalo i le Alii, lea sa faauigasese e o latou fili, sa latou pauu ai i le eleele ma tagi atu i le Alii. Ona latou tutu lea i luga ma faafetaiai ma o latou fili ma le faatuatua i le Atua. (Tagai 3 Nifae 4:8–10.) Tatou te mafai foi ona tutu atu i luga i o tatou fili ma suia lo tatou fefe i le faatuatua i le Atua.

    Sa tusia e Elder M. Russell Ballard o le Korama a Aposetolo e Toasefululua e faatatau i le faatuatua lea e manaomia e feagai ai ma luitau o o tatou aso: “O le saunia o i tatou lava ma o tatou aiga mo luitau o tausaga a sau, o le a manaomia ai ona tatou suitulagaina le fefe i le faatuatua. E ao ona mafai ona tatou faatoilalo le fefe i fili e osofai mai ma tau faamatau mai ia i tatou. Na fetalai mai le Alii, ‘Aua le matatau, le lafu mamoe itiiti e; ia faia mea lelei; ia tuu i le lalolagi ma seoli e autasia oulua, aua afai ua faavaeina oulua i luga o la’u papa, latou te le mafai ona manumalo (MFF 6:34)” (i le Conference Report, Oke. 1989, 43; po o le Liahona, Ian. 1990, 36).

3 Nifae 5:1–3. O Le Faatuatua e Taitai Atu ai i le Salamo ma Galuega Lelei Uma

  • A o avea o se tasi o Fitugafulu, sa faamalamalama mai e Elder John H. Groberg le sootaga i le va o le faatuatua ma le salamo:

    “Afai tatou te mafaufau loloto, tatou te iloa o le muai mataupu—o le faatuatua i le Alii o Iesu Keriso—ua faavae ai isi mea uma; o lona uiga, e manaomia le faatuatua ia Keriso e salamo pe papatisoina pe faia ai isi sauniga uma o le talalelei. O Iesu ua mafai ona maua ai le salamo faaolaina ma faatauaina ai le papatisoga. A tatou faatuatua ia te Ia, o le a tatou salamo ma papatisoina.

    “Afai tatou te le salamo pe le mananao e papatisoina pe le naunau foi e tausia ana poloaiga, ua pogai lena mea ona e le lava lo tatou faatuatua ia te Ia. O lea la, o le salamo, papatisoga, ma isi mataupu faavae uma ma sauniga e le matua tuueseesea, a o ni faaopoopoga moni ia o lo tatou faatuatua ia Keriso. A aunoa ma le faatuatua ia te Ia, o le a itiiti se mea taua e faavavau tatou te faia. O le faatuatua ia te Ia, e uai atu ai o tatou olaga i le faia o mea taua e faavavau” (i le Conference Report, Oke. 1993, 35; po o le Liahona, Ian. 1994, 31).

3 Nifae 5:13. “ O Se Soo o Iesu Keriso”

  • Sa faamatalaina e Mamona ia lava o se soo o Keriso. Sa faamalamalama mai e Peresitene Iosefa Filitia Samita (1876–1972) le natura o le valaauga o Mamona: “A o i ai i mea uma lava o loo tautalagia ai sa Nifae e toasefululua o ni soo, e tumau pea le mea moni e faapea sa faaeeina atu ia te i latou le pule paia e avea ai ma molimau faapitoa mo Keriso i o latou tagata. O le mea lea, o i latou moni lava o aposetolo i le ituaiga o sa Nifae, e ui lava o lo latou taitaiga, e pei ona faaalia ia Nifae, e le pine ae noatia i le pule ma le taitaiga a Peteru ma le toasefululua filifilia i Palesitina: (Answers to Gospel Questions, comp. Joseph Fielding Smith Jr., 5 vols. [1957–66], 1:122).

    Ona o le valaauga patino o Mamona o se Aposetolo, o le upusoo e mafai foi ona i ai se faauigaga lautele atu. O se soo foi o “sē mulimuli ia Iesu Keriso o loo ola e tusa ma aoaoga a Keriso (MFF 41:5)” (Guide to the Scriptures, “Disciple”).

    Sa faamalamalama atili mai e Elder L. Tom Perry o le Korama a Aposetolo e Toasefululua:

    “O mea nei na tusia e uiga i le avea ma soo:

    ‘“O le upu soo e sau mai le faa-Latina [o lona uiga] o se tagata aoao. O se soo o Keriso o se tasi lea o loo aoao ia faapei o Keriso—o loo aoao ina ia mafaufau, ia lagona, ia galue e [pei] o ia. Ina ia avea ma soo moni, ina ia faataunuuina lena aoaoga, o le taumafaiga sili lea ona faigata ua iloa e le tagata. E leai se isi aoaiga e faatusalia … i ona tulaga manaomia po o taui. E aofia ai le liua atoatoa o se tagata mai le tulaga o se tagata o le lalolagi i le avea ma [se] au paia, o se tasi e alofa i le Alii ma auauna atu i le Alii ma lona loto atoa, mafaufau atoa, manatu atoa, ma le malosi atoa’ (Chauncey C. Riddle, ‘ Becoming a Disciple,’Ensign,Sept. 1974, 81)” (i le Conference Report, Oke. 2000, 77; po o leLiahona,Ian. 2001, 73).

    E le gata i le saunoa ai e uiga i le avea ma soo, atonu o loo faia i i e Mamona se faamatalaga e uiga i lana pule ua le na o se soo ae o se Aposetolo foi a le Alii o Iesu Keriso.

3 Nifae 5:22–26. O Le Uiga o le Faapotopotoina i Aso e Gata Ai

  • Sa faamalamalama mai e Elder Dallin H. Oaks le uiga ma le faamoemoega o le faapotopotoina:

    “O se tasi faailoga o taimi, o le faapotopotoina o le au faatuatua (tagai MFF 133:4). I le popofou o lenei augatupulaga mulimuli, sa aofia ai nuu eseese i le Iunaite Setete i le faapotopotoina o Siona: i Katelani, i Misuri, i Navu, ma tumutumu o mauga. O taimi uma lava, o potopotoga uma nei e faia i mea e fausia ai malumalu.

    Ata
    Taavaletoso a Paionia

    Faaaloaloga a le LDS Church Archives

    “Faatasi ai ma le faatutuina o siteki ma le fausiaina o malumalu i le tele o atunuu, ma le aofaiga tele o le au faatuatua, o le poloaiga i le taimi nei, ua le potopoto i se nuu e tasi ae ia potopoto i siteki o o tatou lava laueleele. O iina o le a mafai ai ona olioli le au faatuatua i faamanuiaga atoatoa o le faavavau i se Maota o le Alii. O iina, i o latou lava laueleele, e mafai ai ona latou usiusitai i le poloaiga a le Alii e faalautele tuaoi o Lona nuu ma faamalolosia ona siteki (tagai MFF 101:21; 133:9, 14). O lenei tulaga, o le a avea ai siteki o Siona ma ‘olo ma sulufaiga mai le afa, ma le ita pe a liligi ifo e le faafeifiloia i le lalolagi atoa’ (MFF 115:6)” (i le Conference Report, Ape. 2004, 6; po o le Liahona, Me 2004, 8).

3 Nifae 6:12. O Le Manuia ma le Filemu e Mafai Ona Taitai Atu i le Faamaualuga

  • I tausaga a o lumanai lava le asiasiga patino a le Faaola i tagata sa Nifae, sa olioli tagata i se vaitaimi puupuu o le manuia. Ae paga, o lenei manuia faaletino na taitai atu ai i le “faamaualuga ma ua mitamita ona o le tele o a latou oloa” (3 Nifae 6:10).

    Sa lapatai mai Peresitene Henry B. Eyring e uiga i luitau i o tatou aso: “O sina manuia ma le filemu, pei na o sina suiga laitiiti foi i le filemu ma le faauluolaina, e mafai ona aumaia ai ia i tatou nei lagona o le manatu ifo o le tagata ua na o ia lava. E mafai ona tatou vave lagonaina ua tatou pulea o tatou olaga, o suiga mo le lelei o ni taunuuga ia o a tatou lava taumafaiga, ae le o taumafaiga a se Atua o lē o loo fesootai mai i se leo malu ma le itiiti o le Agaga. O le faamaualuga e faatupuina ai se pisapisao i totonu ia i tatou lea e faigata ai ona lagona le leo malu o le Agaga. Ma e le pine, ona o lo tatou faamaualuga, tatou te le toe faalogo atu mo le leo malu o le Agaga. Ua vave ai ona tatou manatu faapea tatou te le manaomiaina” (i le Conference Report, Oke. 2001, 16; po o le Liahona, Ian. 2002, 17).

  • E tele ni taimi i le talafaasolopito o le Tusi a Mamona e oo atu ai tagata i le faataamilosaga o le amiotonu, manuia, mauoa, faamaualuga, amioleaga, faatafunaga, faamaualalo, ma toe amiotonu ai foi. Mo nisi faamatalaga ma se ata o loo faaali ai le faataamilosaga o le faamaualuga, ia faasino i le “O Le Taamilosaga o le Amiotonu ma le Amioleaga” i le lisi o aitema faaopoopo (itulau 438).

3 Nifae 6:12–13. Tatou te Fuafua Lo Tatou Tali Atu i Tulaga o I Ai

  • O loo ta’u mai i faamaumauga e faapea “ua faafefeteina nisi i le faamaualuga, ae matua loto maualalo nisi” (3 Nifae 6:13). O i tatou taitoatasi e tatau ona iloa po o fea le ala o le a tatou liliu i ai. Sa aoao mai e Elder Marvin J. Ashton (1915–94) o le Korama a Aposetolo e Toasefululua lenei mataupu faavae: “O se tasi o avanoa ua tuu mai e le Atua ia i tatou, o le aia tatau lea e filifili ai po o a a tatou amioga o le a faia i soo se tulaga e oo mai. E mafai ona tatou tuu atu mea e tutupu ua siomia ai i tatou e iloa ai mea tatou te faia, po o lo tatou pulea lea o o tatou lava olaga i le faaaogaina o mataupu faavae o le amioatua o ni taiala. O le amioatua o le aoaoina lea o le talalelei a Iesu Keriso ma faatinoina i a tatou amioga. O le a leai lava se mea e aoga moni ia i tatou sei vagana ua tatou faatinoina i o tatou olaga” (i le Conference Report, Oke. 1982, 91; po o leLiahona, Ian. 1983, 123).

3 Nifae 6:15–18. E Faaosoosoina e Satani i Latou ia Agasala ma lē Loto i le Atua

  • O Satani, o le na fouvale i le Atua i lo tatou muai olaga (tagai Mose 4:3; MFF 29:36; 76:25), ua saili na te faatupuina le fouvale i le Au Paia a le Atua. O le matautia o le auai ai ma le loto i agasala e mafua mai ona o le leo ua tatou filifili e mulimuli i ai. Sa lapatai mai le Tupu o Peniamina:

    “O lenei foi, ou te fai atu ia te outou, ou uso e, ona ua uma ona outou iloa ma aoaoina i nei mea uma, afai tou te solitulafono ma outou o ese ai mea ua fetalaia mai. …

    “Ou te fai atu ia te outou, o le tagata e fai lenei mea, e matua fouvale o ia i le Atua. O le mea lea ua ia fia usiusitai atu ai i le agaga leaga, ma ua avea ai o ia ma le ita i le amiotonu uma; o lea ua leai ai se mea i le Atua e afio ai ia te ia, aua e le afio o ia i malumalu ua le paia” (Mosaea 2:36–37).

  • I le fesootai ai ma lenei mea, sa matauina e Elder Neal A. Maxwell e faapea: “E mautinoa lava e tatau ona sili atu lo tatou le mautonu i nei fouvalega nai lo fouvalega a ia pe a manatu atu i nisi taimi tatou te lolo atu ai ma le faasamasamanoa ia [Satani] o lē e lei mafai ona puleaina ona lava manatu i le muai olaga, o ia pulega leaga ua ia taumafai e pulea ai o tatou lava manatu iinei. E masani lava ona tatou faatagaina le fili e faia i se auala le tuusa’o nei mea na tatou teena o ia e faia tuusa’o i le muai olaga” (We Will Prove Them Herewith [1982], 45).

  • Sa faamalamalama atili mai e Elder M. Russell Ballard le tulaga matautia o le usitai i faaosoosoga a Satani:

    “I le muai olaga a e tatou te le i tuua le afioaga o le Tama Faalelagi, sa Ia lapataia ma tima’i i tatou e uiga i aafiaga fou o le a tatou maua i le olaga faaletino. Sa tatou iloa o le a tatou maua se tino faaletino o aano ma ivi. Ona e lei avea muamua i tatou ma ni tagata faaletino, sa tatou le i oo ai i ni tofotofoga o le olaga faaletino. Ae sa silafia e le Tama Faalelagi ma malamalama i ai. Ua ia poloaiina i tatou ia pulea o tatou agaga. O tatou agaga e tatau ona puleaina faaosoosoga faaletino na o le a faafeagai ma o tatou tino i le lalolagi faaletino. O le mana faaleagaga e manumalo ai i faatosinaga a Satani e oo mai ia i tatou e ala i le tausia o poloaiga a lo tatou Alii o Iesu Keriso …

    “ O le a saili Satani e tofotofoina i tatou i nisi taimi i auala ia na te faaaogaina ai o tatou vaivaiga sili, pe lepetia ai o tatou malosiaga. Peitai o ana folafolaga o le fiafia o ni ‘ole’olega pepelo e le tumau. O ana togafiti leaga o le faaosoosoina lea o i tatou i le agasala, aua ua ia iloa a tatou agasala o le a tatou vavaeesea i tatou lava mai lo tatou Tama Faalelagi ma le Faaola o Iesu Keriso. O le a amata ona tatou o ese mai faamanuiaga folafolaina a le Tama Faalelagi, e agai atu i le faanoanoa ma le tiga lea e pagatia ai Satani ma ana au. O le agasala tatou te tuuina ai i tatou lava i le mana o Satani.

    “O lenei, au uo talavou pele e, ou te malamalama i tauiviga o feagai ma outou i aso taitasi i le tausiga o poloaiga a le Alii. Ua faateleina le aasa o le taua mo o outou agaga. Ua malosi le fili ma atamai. E ui i lea, ua i totonu i o outou tino faaletino le agaga malosi o se atalii po o se afafine o le Atua. Aua e alofa o Ia ia te outou ma finagalo tou te toe foi mai ia te Ia, ua tuu atu ai e lo tatou Tama o i le Lagi se loto faamaoni lena e tau atua i lou agaga pe a e tausia poloaiga a le Alii, ma pe a e le tausia foi. Afai o le a uai tele atu lou mafaufau i lou itu faaleagaga, lea e faavavau, ona uai atu ai lea i lou itu faaletino, lea e le tumau, o le a mafai e le aunoa ona e teena faaosoosoga a Satani ma manumalo i ana taumafaiga e faatoilalo oe i lona mana” (i le Conference Report, Ape. 1993, 5–6; po o le Liahona, Iul. 1993, 6–7).

3 Nifae 7:15–26. O Le Faatuatua o Nifae ma E na Mulimuli ia Te Ia

  • O se tasi o tulaga lelei e ese mai le tala faaanoanoa o le liliuese o sa Nifae mai lo latou amiotonu o le faatuatua le mafaagaeetia lea o Nifae ma lona nuu. O la latou faataitaiga ua aumai ai se mamanu e fesoasoani ai ia i tatou e faatumauina lo tatou amiotonu i taimi o le amioleaga. Ua tatou faitau i le molimau mausali a Nifae, na fanau mai i aafiaga patino (tagai 3 Nifae 7:15), lea na ia aoao mai ma le faamalosi i le “salamo ma le faamagaloina o agasala i le faatuatua i le Alii o Iesu Keriso” (fuaiupu 16). Sa ia auauna atu foi ma le mana ma le pule aua ua faapea ona “tele lona faatuatua i le Alii o Iesu Keriso” (fuaiupu 18), ma o i latou na tali atu i lana molimau sa asiasia i latou lava “i le mana o le Agaga o le Atua” (fuaiupu 21). O i latou na talitonu sa faamaloloina (tagai fuaiupu 22), na salamo, sa papatisoina, ma “maua le faamagaloga o a latou agasala” (tagaifuaiupu 24–25).

3 Nifae 7:21–26. Liuaina Atoa

  • Sa saunoa mai Elder Richard G. Scott o le Korama a Aposetolo e Toasefululua e uiga i le eseesega i le va o i latou o e ua liua atoa ma i latou e lei liua lava. Sa ia aoao atili mai le manaomia faifai pea mo se faataamilosaga o le liua, lea e fausia ai le mausali i soo moni o Keriso:

    “Ua tatou matauina le auala o loo faia ai pea e nisi o tagata mea tonu i le olaga. … Pe afai e faia ni filifiliga faigata, ua latou foliga mai e fai pea lava pea mea sao, e ui lava sa i ai ni mea faatosina e ono filifili i ai. Tatou te iloa ua noatia i latou i faaosoosoga, ae latou te foliga mai e le lolo i ai i na faaosoosoga. E tutusa foi lava ma lenei, ua tatou matauina foi isi e le lototoa i filifiliga latou te faia. I se siosiomaga faaleagaga malosi tele, ua tonu ia i latou ia lelei atu. … Ae e le pine foi ae toe foi lava e fai le mea e tasi lea na tonu e lafoaia. …

    “O nisi taimi o le upu liua ua faaaoga e faamatala ai se tagata faamaoni ua filifili e papatisoina. Ae ui i lea … o le liua e sili atu lava nai lo lena. … Sa faamalamalama mai e Peresitene Marion G. Romney le liua:

    ‘“O le liua o lona uiga o le liliu mai le tasi talitonuga po o amioga i le isi. O le liua o se suiga mama ma le faaleagaga. O le liua e le na o le pei e taliaina i le mafaufau o Iesu ma ana aoaoga ae o se faatuatua faaosofia ia te Ia ma lana talalelei. O se faatuatua e galueaiina ai se suiga, o se suiga moni i le malamalama o se tasi i le uiga o le olaga ma i lana tautua faamaoni i le Atua i mea e fiafia ai, i mafaufauga, ma le amio. I se tasi ua liua atoatoa moni, o le manao mo mea e le tusa ai ma le talalelei a Iesu Keriso ua lafoaia moni lava. Ma o lea ua suitulaga ai le alofa o le Atua, faatasi ai ma se naunautaiga puleaina ma le mausali e tausia ana poloaiga’[in Conference Report, Guatemala Area Conference 1977, 8]. …

    “I se faaupuga faigofie, o le liua moni o le fua lea o le faatuatua, salamo, ma le tumau i le usiusitai. O le faatuatua e sau mai le faalogo i le afioga a le Atua [tagai i le Roma 10:17] ma tali atu i ai. O le a e mauaina mai le Agaga Paia se molimau faamautinoa o mea ua e taliaina i le faatuatua e ala i lou faia ma le naunautai [tagai i le Eteru 12:6]. O le a taitaia oe ia e salamo i agasala sa mafua mai i mea sese sa faia, po o mea sa’o foi sa lei faia. O se taunuuga la, o lou tulaga e gafatia ai ona e usitai e le aunoa o le a faamalosia. O lenei faataamilosaga o le faatuatua, salamo, ma le usiusitai e le aunoa o le a taitai atu ai oe i le liua sili atu faatasi ma ona faamanuiaga” (i le Conference Report, Ape. 2002, 26–28; po o le Liahona, Me 2002, 26–27).

Manatu e Mafaufau Loloto i ai

  • O le a le uiga o le avea ma se soo o Keriso? (tagai 3 Nifae 5:13). O le a se mea o le a fesoasoani ia te oe e avea ai o se soo e sili atu le tuuto a Iesu Keriso?

  • O le faavasegaina o sa Nifae o loo suesueina i le 3 Nifae 6:14. O le a se mea na faia e lenei faavasegaga i le Ekalesia? O le a le mea na fai mai ai Mamona o le pogai moni o lenei agasala? (tagai fuaiupu 15). O le a le mea e masani lava ona tupu pe a amata ona talitonu tagata e sili atu latou nai lo isi? E faapefea e lenei vaega o le talafaasolopito o le Tusi a Mamona ona faamaoniaina le Faataoto 16:18?

  • Ua aoaoina i tatou i le taua o faatinoga e o faatasi ma talitonuga ma le taua o le tumau i le faatuatua. O nei mataupu o loo i ai uma faataitaiga lelei ma le leaga o nei manatu. O a ni faataitaiga na e iloaina? O a ni mea tatou te aoaoina mai nei faataitaiga? O fea o nei faataitaiga e i ai ni uiga fitoitonu lelei a o e taumafai e tumau i le faatuatua?

Galuega Fautuaina

  • Ua tatou aoao i le taua o molimau ma le liua o tagata taitoatasi i le3 Nifae 1–7. Ia vaevae se laupepa i ni koluma se lua ma tuu ia ulutala nei e lua i le pito i luga o koluma taitasi:

    1. O amioga, o talitonuga, ma faatinoga ia e taitai atu ai i molimau ma le liua o tagata taitoatasi

    2. O amioga, o talitonuga, ma faatinoga ia e faaumatia ai molimau ma le liua o tagata taitoatasi

    Ona toe iloilo lea o le 3 Nifae 1–7 ma lisi i le koluma talafeagai ia aoaoga, o mea na tutupu, aoaoga faavae, ma mataupu faavae ua e iloaina. Ia tusi se faamalamalamaga puupuu o mea ua e aoaoina mai lenei gaoioiga ma aoao atu i se lesona i le afiafi faaleaiga.

  • Sa aoao mai Peresitene Ezra Taft Benson o le tele o mea na tutupu a o lumanai ai le asiasiga muamua a le Faaola i tagata o le Tusi a Mamona e tutusa lava ma mea ia e tutupu a o lumanai Lona Afio Mai Faalua. Ia fai se lisi o mea na tutupu, o aoaoga, o mataupu faavae, ma aoaoga faavae mai le Helamana 14 e oo atu i le 3 Nifae 7 ia e te talitonu e tutusa ai ma “aso amuli.”

  • Ia tauloto le 3 Nifae 5:13. A o e faaleoina nei upu, ia mafaufau i auala e mafai ai ona e folafola atu afioga a le Faaola i isi. Atonu e te manao e amata lau folafolaga o le faatuatua i le fuaitau, “ Ou te talitonu e …”

Lolomi