Moronae 8–9

Folasaga

I se aso pe a toatele soo o Keriso e lafoaia le amiotonu ae saili atu i mea a le lalolagi, o le a le mea ua faamoemoeina mai tagata o le Ekalesia? Na faamalamalama mai e Peresitene Ezra Taft Benson (1899–1994): “I le tusi mulimuli a Mamona na auina atu i lona atalii o Moronae o loo i le Tusi a Mamona, na tuuina atu ai e Mamona se lapataiga ua aoga foi mo i tatou i ona po nei. Sa vaai uma lenei tama ma lona atalii i le pau o le nuu Kerisiano atoa ona o lo latou le auauna atu i le Atua o le laueleele, o Iesu Keriso lea. Ua tusia e Mamona e faapea, ‘O lenei, lou atalii pele e, e ui i lo latou loto maaa sei ta galulue ma le filiga; aua afai ta te tuu le galue, e tausalaina ai i taua; aua ua ia te i taua le galuega e faia ao ta i ai i lenei faleapitaga omea, ina ia manumalo i le ita i le amiotonu uma lava, ma faamalolo ai o taua agaga i le malo o le Atua’ (Moronae 9:6). Ua ia te oe foi ma au lea lava galuega e fai i le taimi nei—o le manumalo lea i le ita ma faamalolo o tatou agaga i le malo o le Atua” (i le Conference Report, Oke. 1987, 104; po o le Liahona, Ian. 1988, 81).

A o taufaaiuiu le Tusi a Mamona, ua ia folafola mai le mana o le Togiola ma faaalia le faatuatua o Mamona i le faavae o le amiotonu, e ui lava ua vave le pauu atu o sa Nifae i le loloto o le amioleaga. O tusi a Mamona i lona atalii o Moronae ua faaalia ai taunuuga lemaalofia o le agasala ma pe faapefea ona taitaiina atu e le “le lagonaina” tagata i le amioleaga e lemafaamatalaina. Mataupu 8–9 o le Moronae o loo ofoina mai se vaaiga taua i le taua o le ola e tusa ai ma mataupu faavae muamua ma sauniga o le talalelei.

Faamatalaga

Moronae 8:1–8. Ua Faasa le Papatisoina o Tamaiti Laiti

Moronae 8 o loo i ai se tusi na maua e Moronae mai lona tama, o Mamona, ua taliina ai le fesili pe manaomia e tamaiti laiti le papatisoga. Vaai lelei o le punaoa mo tali a Mamona i lenei fesili faaleaoaoga faavae na tuu sao mai lava ia te ia i se faaaliga mai le Alii (tagai Moronae 8:7). O le sauniga o le papatisoga e “mo le faamagaloina o agasala” (MFF 49:13). Ae o tamaiti laiti e leai ni agasala. O le mea moni, e le mafai e i latou ona fai se agasala, e le mafai foi ona faaosoosoina i latou e Satani, e pei ona faamalamalama mai e le Mataupu Faavae ma Feagaiga:

“Na togiolaina tamaiti mai le faavaeina o le lalolagi i lo’u Atalii e Toatasi na ou Fanaua;

“O le mea lea, ua le mafai ai ona agasala i latou, aua e lei tuuina atu le mana ia Satani e faaosooso ai i tamaiti, vagana ona ua amata ona tatau ia te au ona sueina a latou amio i ou luma” (MFF 29:46–47).

Ua faatulagaina e le Alii le tausaga ua tatau ona amata ai ona tali atu—i le valu o tausaga (tagai JST, Kenese17:11; MFF 68:25). O i latou e papatisoina tamaiti laiti ina ia aveesea le agasala muamua, po o le fetuu o Atamu, e pei ona ta’ua ai e nisi, ua faia lena mea e aunoa ma se malamalama sao i le Atua ma Lana fuafuaga (tagai Moronae 8:8).

Moronae 8:3

E faapefea e lenei fuaiupu ona faaalia le alofa o se tama amiotonu mo lona atalii? E faapefea ona tuuina mai e lenei fuaiupu se faataitaiga mo se faia e totonugalemu ia Keriso?

Moronae 8:8. “O Le Tulafono o le Peritomeina ua Mavae atu”

Na folafola mai e le Atua ia Aperaamo, “Ma o le a ou faatuina se feagaiga o le peritomeina ma outou, ma o le a avea ma au feagaiga i le va o au ma oe, ma au fanau pe a mavae atu oe, ia latou tupulaga; ina ia mafai ai ona e iloa faavavau o tamaiti e le tali atu mo i latou lava seia aulia lo latou valu tausaga” (JST, Kenese 17:11). Na toe folafola atu e le Atua ia Aperaamo o le peritomeina o “se faailoga o la tatou feagaiga ma outou” (Kenese 17:11). Ae ui i lea, o le agaga o le liliuese, na taitaia tagata anamua e talitonu o le peritomeina na manaomia ia faapaiaina ai tama tane laiti.

O le tulafono o le peritomeina e lei fuafuaina e oo i le faavavau. Na faaalia afioga a le Faaola ia Mamona: “O Au foi ua mavae atu ai le tulafono o le peritomeina” (Moronae 8:8). Ua faamalamalama mai e le Mataupu Faavae ma Feagaiga pe aisea ua mavae atu ai le tulafono o le peritomeina (tagai MFF 74:2–7).

Moronae 8:9–15. O Le Papatisoina o Tamaiti “Ua Fai Mea Paia ma Ulaga i luma o le Atua”

Na matua teena e Mamona le papatisoina o tamaiti. Na ia folafola mai “ua fai mea paia ma ulaga i luma o le Atua lo outou papatisoina o tamaiti” (Moronae 8:9). Na aoao mai le Perofeta o Iosefa Samita (1805–44) o le papatisoina o tamaiti ua teena ai le uiga o le Atua ma le mana faaola o le Togiola a Iesu Keriso: “O le aoaoga faavae o le papatisoina o tamaiti, po o le faatulutuluina o i latou, a le o lena e tatau ona lopala i latou i seoli, o se aoaoga faavae e le moni, e le lagolagoina e le Faatulagaga Paia, ma e le tusa ai ma le uiga o le Atua. E faaolaina uma tamaiti i le toto o Iesu Keriso, ma o le taimi lava e tuua ai e tamaiti lenei lalolagi, e aveina atu loa i latou i le fatafata o Aperaamo” (History of the Church, 4:554).

Moronae 8:22–24. “O i Latou o E ua aunoa ma le Tulafono”

E toatele tagata e ola ma maliliu ae le iloa lava le tulafono a Keriso. O na tagata o le a aoaoina i le talalelei i le lalolagi o agaga. O iina o le a latou maua ai le avanoa e faaaoga ai le faatuatua ma salamo ia latou agasala. O sauniga e manaomia ona faia e e o ola i le lalolagi e sui mo i latou, ma e mafai ona fai mo latou faamanuiaga o le faaolataga.

© 1985 Robert Barrett

O i latou e le mafai ona malamalama i le talalelei e le o faitaulia e tali atu mo i latou lava. O i latou, e pei o tamaiti, e “ola ia Keriso” (Moronae 8:12; tagai foi MFF 29:49–50).

Na faamalamalama mai e Peresitene Iosefa Filitia Samita (1876–1972): “E faaolaina i latou e aunoa ma le papatisoga ma o le a o atu i le malo selesitila o le Atua, o iina, matou te talitonu, ia toefuataiina ai lo latou malosiaga po le le atoatoa e tusa ai ma le alofa mutimutivale o le Tama ma le faamasinoga tonu” (Answers to Gospel Questions, tuuf. Iosefa Filitia Samita Jr., 5 vol. [1957–66], 3:21).

Moronae 8:25–26. “Agamalu ma le Lotomaualalo”

Na faamatalaina e Mamona se fesootaiga i le va o le faatuatua ia Keriso, salamo, papatisoga, le meaalofa o le Agaga Paia, ma le faamagaloina o agasala. Na ia aoao mai o le faamagaloina o agasala e oo mai ai le agamalu ma le lotomaualalo, po o le faamaualalo.

Na faamatalaina e Elder Francisco J. Viñas o le Fitugafulu nisi o uiga o se tasi e agamalu ma lotomaualalo: “O le tagata na te maua le agamalu ma le lotomaualalo, ma fiafia i le mafutaga ma le Agaga Paia, o le a le manao lava o ia e faatausuai pe faatiga i isi. E fai faalelei e ia ma le alofa ma le faaaloalo lona toalua ma lana fanau, ma o le a lelei foi ana fegalegaleaiga ma tagata uma latou te mafuta. A tuu foi i tofiga faaleautaitai i le Ekalesia, o le a ia faaaogaina mataupu faavae lava nei e pei ona faia i le aiga, ma faaalia ai e leai se eseesega o lona tagata pe a i ai i lona aiga ma ana fegalegaleaiga ma tagata o le Ekalesia” (i le Conference Report, Ape. 2004, 40; po o le Liahona, Me 2004, 38–40).

Moronae 8:28–29. “Le Toe Finau le Agaga ma i Latou”

Na faamalamalama mai e Elder Bruce R. McConkie (1915–85) o le Korama a Aposetolo e Toasefululua o alii ma tamaitai o le a le maua le mafutaga ma le Agaga Paia pe afai latou te teena le sulu ma le malamalama o le talalelei: “E toatele e filifili e savavali i auala o le lalolagi ma faasagatau atu i musumusuga a le Agaga. E mafai lava ona emo i le mafaufau o se tasi le manatu lea o le Agaga o le a aveeseina lana uunaiga ma o le a le toe iloa pe popole tagata i soo se mea e sao ma siitia ai i luga. ‘Ua fetalai mai le Alii o Au, aua e le uunaiina pea le tagata e lou Agaga.’ (MFF 1:33.)” (A New Witness for the Articles of Faith [1985], 260).

Moronae 9:3–5. Ita

Na tusia e Mamona o sa Nifae o le a “gatete ma ita” (Moronae 9:4) e faasagatau ia te ia pe afai e lauga atu ma le manino ia te i latou le afioga a le Atua. O lea ituaiga o tali e tutusa lelei ma faataitaiga faaletusipaia a i latou na faamaaa o latou loto i mataupu faavae o le amiotonu. Na teena Eteru e sa Iareto ma saili e fasioti ia te ia (tagai Eteru 13:22). O tagata nuu o Ierusalema na saili e fasioti Liae (tagai 1 Nifae 1:19–20). O e amioletonu i Amonaea na matuai feita lava ma na latou susunuina e talitonu ma a latou tusi paia uma lava (tagai Alema 14). O lenei tali i le afioga a le Atua e faaalia ai le maualuga o le tulaga o le amioleaga lena e masani lava ona muamua atu i le faatafunaga o aai po o nuu.
E toatele tagata i o tatou aso e talitonu ua pagatia i latou ona o lo latou lava ita. Na faamalamalama mai e Elder Lynn G. Robbins o le Fitugafulu e mafai ona tatou filifili pe tali atu i le ita pe leai:

“O se vaega taufaasese o lana [Satani] fuafuaga o le faaeseeseina ai lea o le ita mai le faitalia, ia faatalitonu ai i tatou o i tatou o nisi ua aafia i se lagona lea e le mafai ona tatou puleaina. Tatou te faalogoina, ‘Ua tau le maua se toa.’ O le tau le maua o se toa o se tasi o filifiliga malie o upu ua avea ma fuaitau ua faaaoga soo. O le ‘tau le maua o se mea’ e faatatau lea i le ‘lei faamoemoe i ai,’ ‘faafuaseia,’ ‘tupu fua,’ ‘le iloaina,’—atonu o le le popole i ai , ae ‘le fitoitonu i ai.’

“‘O ia ua mafua ai ona ou ita.’ O se tasi lea o fuaitau tatou te faalogoina e atagia mai ai foi le leai o se puleaina po o se faitalia. O se talafatu lenei e tatau ona tuueseina. E leai se tasi na te faaitaina i tatou. E le faatupuina e isi tagata lo tatou ita. E leai se tulaga faamalosi o aafia ai. O le ita o se filifiliga i le lotofuatiaifo, o se faaiuga; o le mea lea, e mafai ona tatou faia se filifiliga e aua le ita. O tatou lava e filifilia!

Ia i latou o e faapea mai, ‘E le mafai ona ou tatalia,’ o le tali i ai a le tusitala o William Wilbanks ‘E sese.’

“‘O le maemaea, … oono po o le ita o le loto ae le faaalia, o le talanoa e uiga i ai, avaavau ma le ee o faiga uma ia e o faatasi ma le ita. ‘Tatou te filifili le vaega ua faamaonia e aoga tele mo i tatou i le taimi ua tuanai. O e matauina ea e seasea ona tatou ita pe a faapopoleina i tatou e o tatou pule, ae ese lo tatou vave ita pe a faatiga i tatou e a tatou uo po o aiga?’ (‘The New Obscenity,’ Reader’s Digest, Tes. 1988, 24; faaopoopo le faatusilima)” (i le Conference Report, Ape. 1998, 105; po o le Liahona, Me 1998, 90).

Moronae 9:5. Ua Leai se Alofa

O se tasi o taunuuga matautia o le ita ma le amioleaga o le le maua lea o le Agaga. Pe afai e tupu lenei mea, ua manino le aoao mai o le Tusi a Mamona ua leai se malosiaga o se tasi e alofa ai i isi. O le mea lenei na tupu i sa Nifae amioleaga. O lenei leai o se alofa e taitai atu ai i mea e pei o le tatala o faaipoipoga, saua, ma le tuua o aiga, o mea uma ua avea ma faafitauli lautele i o tatou aso.

Na faamalamalama mai e Elder David E. Sorensen o le Au Peresitene o Fitugafulu le ala e tupu ai le leai o se alofa i o tatou aiga: “O le tele lava o tu ma agaifanua taatele i nei ona po, ua manatu mama ai i uiga faaleatua o le loto faamagalo ma le agalelei, ae ua uunaia le taufaifai, lotoita, ma faitioga matuia. Afai tatou te le faaeteete, e mafai foi ona tosina atu i ai i tatou i nei mausa i totonu lava o o tatou fale ma aiga, ona le pine lea ae tatou faitioina o tatou taitoalua, o a tatou fanau, po o tagata o o tatou aiga lautele. Ia aua lava nei o tatou faatiga ia i latou e sili lo tatou alolofa i ai i lo tatou faitioina lea ma le manatu faapito. O totonu o o tatou aiga, o nai feupuaiga laiti ma nai faitioga iti, afai tatou te tuufauina, e mafai ona faataumaoia ai a tatou sootaga ma oo atu ai ina va, seia oo lava ina sauaina ma tatala faaipoipoga. Nai lo lena, … e tatau lava ona tatou ‘matua faanatinati’ e faaitiitia feupuaiga, faaitiitia le taufaifai, aua le faitio, ma aveese le matau’a ma le ita. E le tatau ona tatou mafaufau e faatino nai lagona malolosi matautia—ia aua lava nei faia i se aso” (i le Conference Report, Ape. 2003, 10; po o le Liahona Me 2003, 10–12).

Moronae 9:6

O le a le mea na fai mai Mamona o le taunuuga pe afai o le a le toe “galulue” i laua ma Moronae? O le a le mea ua aoao mai e lena mea ia i tatou e uiga i le tumau i taimi o faigata?

Moronae 9:9. O Le Legavia ma le Mama e “Sili ona Pele ma Taua i Mea Uma Lava”

Na taua e Mamona o le legavia ma le mama e “sili ona pele ma taua ai mea uma lava” (Moronae 9:9). Na aoao mai Peresitene Gordon B. Hinckley (1910–2008) i le taua o le faatumauina o le legavia:

“Ma o lenei ua na o se upu i le faafitauli lea e pito taatele ma sili ona faigata ona taulimaina e outou alii ma tamaitai talavou o faafitauli uma. O le vafealoai lea o le tasi ma le isi. O loo feagai outou ma se malosi pito maoae o lagona faaletagata. Na o le loto lava e fia ola e mafai ona manumalo ai.

“Ua faia i tatou e le Alii ia lalelei le tasi i le isi mo se faamoemoega maoae. Ae o lenei lava lalelei e avea ma ’alu o se pauta sei vagana ua pulea lelei. E matagofie tele pe a taulimaina i le ala sa’o. E matautia pe a le puleaina lelei. …

“Au uo talavou pele e, i le itu tau le feusuai ua outou iloa lava le mea sao. Ua outou iloa le taimi tou te savavali ai i fanua matautia, lea e faigofie lava ona tautevateva ma se’e atu ai i totonu o le lua o le solitulafono. Ou te aioi atu ia te outou ia faaeteete, ia tutu saogalemu agai mai i tua ma le tofe o le agasala lea e faigofie ona pau atu i ai. Ia tausia outou lava ia mama mai le pogisa ma le atuatuvale leaga o le solitulafono faalefeusuai. Ia savavali i le la susulu o lena filemu lea e sau mai le usiusitai i poloaiga a le Alii.

“Afai e i ai se tasi ua ova atu le laa ma le laina, o se ua solitulafono, o i ai ea se faamoemoe mo oe? Ioe, o loo i ai. A i ai le salamo moni, o le a i ai le faamagaloga. O lena taumafaiga e amata i le tatalo. Na fetalai mai le Alii, ‘O le ua salamo i ana agasala, e faamagaloina o ia, ma o au le Alii, ou te le toe manatua lava’ (MFF 58:42). Ia fetufaai lau avega ma ou matua pe afai e mafai, ma ia tau atu i lau epikopo, o le o loo tu sauni e fesoasoani mai ia te oe” (“O Le Fautuaga ma le Tatalo a se Perofeta mo le Autalavou,” Liahona, Ape. 2001, 38–39).
Afai na avea oe ma se tasi ua aafia fua i sauaga taufeusuaiga, ia e mautinoa e te lei solia le tulafono o le legavia. Na faamalamalama mai e Elder Richard G. Scott o le Korama a Aposetolo e Toasefululua:

“Ou te matua tautino atu pe a e mafatia i ni amioga saua, tau faasese, po o le mataifale o se tasi, e le pau ia te oe le leaga ma e le tatau ona ia te oe se lagona tausalaina. Atonu o le a tuua oe ua e ma’ila’ila i le faatautala o lena tagata ia te oe, peitai o na ma’ila’ila o le a le tumau. I le fuafuaga e faavavau, i le taimi e tatau ai a le Alii, o le a faasa’oina ai na manua pe a e faia lau vaega. …

“Afai ua sauaina oe i le taimi nei po o se taimi foi ua tuanai, saili nei loa se fesoasoani. …

“Talanoa lē faalauaiteleina i lou epikopo. O lona valaauga e mafai ai ona avea o ia ma auupega a le Alii mo oe. E mafai ona ia tuuina atu se faavae faaleaoaoga faavae e taiala ai oe i le faamalologa. O se malamalama ma le faatinoga o le tulafono e faavavau o le a e maua ai se faamalologa o loo e manaomia. O loo ia te ia se aia tatau e musuia ai o ia e le Alii mo oe. E mafai ona ia faaaoga le perisitua e faamanuia ai oe” (i le Conference Report, Ape. 1992, 44; po o le Liahona, Iulai 1992, 38).

Moronae 9:18–20. “Le Toe Lagona”

Na faamatala e Mamona i lona atalii o Moronae le tulaga faaleagaga faanoanoa o lona nuu. Na ia faamanatu atu ia Moronae ua “aunoa i latou ma le manatu lelei, ma ua le toe lagona i o latou loto fuatiaifo” (Moronae 9:20). Na faamalamalama mai e Elder Neal A. Maxwell (1926–2004) o le Korama a Aposetolo e Toasefululua le le faamanuiaina o le tali atu i uunaiga a le Agaga Paia ma le toilalo i le tausia o poloaiga a le Atua e mafai ona taitai atu ai i tatou i lenei tulaga:

“O lo tatou malosiaga e lagona ai e puleaina o tatou uiga i le tele o auala, ma e ala mai le faagaoioia pe a uunaia i tatou e o tatou lagona ia fai mea lelei, tatou te faagaseina ai lena malosiaga e lagona ai. O le lagona alofa maoae o Iesu i manaoga o e na faatasi ma ia na mafai ai e ia ona tali atu i faatinoga.

“I le isi pito o le fua faaleagaga o loo i ai tagata e pei o uso faalogotata o Nifae; na taua e Nifae le faateleina o lo latou le lagonaina o mea faaleagaga: ‘Ua tautala atu [le Atua] ia te outou i le leo itiiti ma le filemu, a ua le toe lagona e outou, ua le mafafai outou ona lagona ana fetalaiga’ [1 Nifae 17:45].

“Pe afai ua lofituina tele i tatou i sese, o le a mamae foi lo tatou talia o mea faaleagaga i le tino. E mafai ona tupu lenei mea i nuu atoa lava. I lana auega i lona atalii o Moronae, na ta’ua ai e Mamona le tulaga pau o le nuu o sa Nifae. O faailoga e aofia ai se amioleaga ua matua loloto lava lea na faamatalaina ai le nuu o Mamona e ia ua ‘le toe lagona’ [Moronae 9:20]. Na tagitu’i le Aposetolo o Paulo i le faataumaoi o le amioleaga o tagata o le Ekalesia i Efeso ona ua latou atiina ae lena lē lagonaina o se mea i lo latou talitonu ua latou ‘le toe lagona’ [Efeso 4:19]. O se lalolagi ua lolovai i tulaga tau feusuaiga ua matua le mafai ai lava ona lagona manaoga o ona tagata o loo mafatia aua, nai lo le atiina ae o le alofa e vaai agai i fafo, na te liliuina le tagata i le manatu faapito ia te ia lava. O le tetee atu i uunaiga a le leo itiiti ma le filemu o le Atua o lona uiga foi e i ai o tatou taliga ae le mafai ona faalogo, e le gata i uunaiga a le Atua, ae faapena foi talosaga a tagata” (A Time to Choose [1972], 59–60).
Na lapataia i tatou e Peresitene Boyd K. Packer, le Peresitene o le Korama a Aposetolo e Toasefululua, e uiga i se masani faateleina o ona po nei, lena e taitai atu foi i le le mauaina o le Agaga:

“Ua faateleina le pisapisao o le lalolagi. O lavalava ma teuga ma amioga ua sili atu le le pulea ma sili atu le faainaelo ma palapala. O musika malomaloa, ma o latou faaupuga mataga ua pasae mai i fafo o latou leo i mea faaleotele pese a o fe’emo’emoa’i mai moli felanulanua’i e iloa gofie ai lava le mea o loo i ai fualaau faasaina. O ia tu ma amioga eseese ua taliaina e le lautele ma ua faatosinaina a tatou autalavou. …

“O lenei taaiga i leo leotetele malomaloa, agai i le tele o le fefinauai, le taofiofia, le faamamalu ma le le faatulagaina, e le o se mea tupu fua pe o ni uiga taumamaina pe le afaina foi.

“O le faatonuga muamua lava e tuuina atu e se taitaiau e fuafuaina se osofaiga, o le taofia lea o fesootaiga a i latou ua ia faamoemoe e faatoilaloina.

“O le le faaaloalo o le faamoemoega tonu lea o le fili e ala i le faaleagaina o fesootaiga faaeteete gata o faaaliga i le mafaufau ma le agaga” (i le Conference Report, Oke. 1991, 28; po o le Liahona, Ian. 1992, 24).

Moronae 9:25. “O Le Faamoemoe o Lona Mamalu”

Na faamalamalama mai e Elder Neal A. Maxwell o le faamoemoe na tautala i ai Mamona e fesootai ma le faatuatua i le Alii o Iesu Keriso:

“O lo tatou faaaogaina i aso uma o le upu faamoemoe e aofia ai le auala tatou te ‘faamoemoe’ ai e taunuu i se taunuuga patino i se taimi patino. Tatou te ‘faamoemoe’ o le a faaleleia le tamaoaiga o le lalolagi. Tatou te ‘faamoemoe’ e asiasi mai se e pele ia i tatou. O ia mea e iloa ai o tatou faamoemoega faamaoni ae vave.

“O mea tatou te le fiafia ai e masani ona mafua mai i otaota o o tatou faamoemoega mo na o sina taimi puupuu ua le taulau. Peitai, o le a ou tautala i le taua o le manaomia o le faamoemoe maualuga.

“O le faamoemoe maualuga e ese mai lea. E faalagolago ia Iesu ma faamanuiaga o Lana Togiola sili, o faamanuiaga ua maua ai le Toetu i lona tulaga aoao ma le avanoa taua ua tatou maua e mafai ai ona salamo ina ia tatou saoloto, ma mafai ai le mea ua ta’ua i tusitusiga paia ‘o se faamoemoe atoatoa lelei’ (2 Nifae 31:20).

“Ua faamaonia mai e Moronae: ‘Po o le a le mea tou te faamoemoe i ai? Faauta ou te fai atu ia te outou ia ia te outou le faamoemoe ona o le togiola a Keriso’ (Moronae 7:40–41; tagai foi Alema 27:28). O le mea lea, o le faamoemoega moni, e le fesootai ma mea e le tumau, ae o mea e tumau pea ma faavavau!” (i le Conference Report, Oke. 1998, 77; po o le Liahona, Ian. 1999, 70).

Moronae 9:26. O Le Alofa Tunoa o le Atua le Tama ma le Alii o Iesu Keriso

Na iloa e Mamona o loo feagai Moronae ma luitau mamafa ona o le amioleaga o sa Nifae. Ae ui i lea, na iloa e Mamona o le a mafai ona tumau Moronae ona o le fesoasoani a le alofa tunoa mamana. Faamaoni i le Faatuatua ua faamalamalama mai ai o le alofa tunoa e maua ai le onosai e faaauau ai i tauiviga o aso taitasi o le olaga:

“O le upu alofa tunoa, e pei ona faaaogaina i totonu o tusitusiga paia e faasino tonu lava i le fesoasoani faalelagi ma le malosi tatou te maua e ala i le Togiola a le Alii o Iesu Keriso. …

“E le gata i le manaomia o le alofa tunoa mo lou faaolataga tupito, e te manaomia foi lenei mana faaola i aso uma o lou olaga. A e faalatalata atili atu i lou Tama Faalelagi i le maelega, faamaualalo, ma le agamalu, o le a Ia faagaeetia ma faamalosia oe e ala i Lona alofa tunoa” (Faamaoni i le Faatuatua: O se Tusitaiala o le Talalelei [2004], 18–20).

Manatu e Mafaufau Loloto i ai

O a faaupuga malolosi na faaaoga e Mamona e faaleaogaina ai le faia o papatisoga o tamaiti? (tagai Moronae 8). Aisea na malosi ai lona lagona?
Afai e faatusatusa amioleaga a sa Lamana ma sa Nifae, aisea na le faaumatia ai foi sa Lamana? (tagai Moronae 8:27–29).
O a laasaga faifai malie na ta’ua e Mamona i mataupu e 8–9 na taitai atu ai sa Nifae i le malaia mulimuli ane i o latou olaga? E faapefea ona tatou aloese mai le liliuese ma le amioleaga i o tatou lava olaga?

Galuega Fautuaina

Tusi se palakalafa e faamatala ai mafuaaga faaleaoaoga faavae e le manaomia ai e tamaiti le papatisoga (tagai Moronae 8:4–23).
Saunia se lauga po o se lesona i le autu “Pe faapefea ona tatou tumau i le amiotonu a o loo siomia i tatou e le amioleaga.” Faaaoga mataupu ma aoaoga faavae mai le Moronae 8–9.