Alema 43–51

Folasaga

O finauga, fouvale, ma taua na lamatia ai e na totoe o le nuu o sa Nifae. E ui i lea, e le na o sa Lamana foi na pogai ai taua. O tagata fouvale o sa Nifae na naunau foi mo le pule lea na oo atu ai i le tele o faafitauli matuia. Sa faatoilaloina e sa Nifae o latou fili e ala i le faatinoina o le faatuatua ia Iesu Keriso ma mulimuli i Ana perofeta atoa ai ma isi taitaiau amiotonu.

Ia faatusatusa uiga ma faamoemoega o Taitaiau Moronae i a Amalekia. Sa tusia e le perofeta o Mamona e uiga i le Taitaiau o Moronae e faapea: “Ana tusa ma Moronae tagata uma sa ola mai atali, faauta, po ua luluina e faavavau le pule a seoli; ioe, po ua leai lava se pule a le tiapolo i loto o le fanauga a tagata” (Alema 48:17). E pei lava o Moronae, e mafai foi e oe ia ona tumau ma le “mausali i le faatuatua ia Keriso” (Alema 48:13) e oo lava i tulaga faigata ma le tofotofoina.

Faamatalaga

Alema 43:2–3. “O Taua i le Va o Sa Nifae ma Sa Lamana”

I le vaega lenei i le tusi a Alema 43–62, na lapatai ai e Mamona le au faitau o le a ia “toe foi atu nei i le tala i taua” (Alema 43:3). O nisi tagata o loo taumanatunatu pe aisea ua tele ai tala i taua i totonu o le Tusi a Mamona. Sa tau mai e Peresitene Ezra Taft Benson (1899–1994) e faapea “mai le Tusi a Mamona tatou te aoao ai i le ala e ola ai soo o Keriso i taimi o taua” (i le Conference Report, Oke. 1986, 5; po o le Liahona, Ian. 1987, 6).

Talu ai na vaai Mamona i o tatou aso ma iloa o le a tatou ola i se taimi o “taua ma tala o taua” MFF 45:26; tagai foi Faaaliga 9), sa ia faaaofia ai le ala e ola amiotonu ai i nei taimi. E toatele tagata o le Au Paia o Aso e Gata Ai sa auai ma o le a i ai i taua faamiliteli. Ia saili mo aoaoga faavae o le talalelei ia sa faaaofia ai e Mamona i nei mataupu o taua. Sa faailoa mai e Mamona ia puapuaga e tele sa pogai mai i taua ma faamalamalama mai foi pe aisea e ono manaomia ai taua i le puipuiga o le ola ma le saolotoga. Sa faamatala mai uma e Mamona ma perofeta o ona po nei ia tulaga e oo i ai pe a faamaonia le fai o taua (tagai faamatalaga mo Alema 43:45–47 i le itulau 250 ma mo Alema 51:13 i le itulau 255).

Sa faamatala mai e Peresitene Gordon B. Hinckley (1910–2008) le faanoanoa faalelagi o mai faatasi ma ia mea e tutupu, e tusa foi pe tauamiotonuina ia taua: “Ou te manatu ‘ai o tutulu lo tatou Tama oi le Lagi a o silasila ifo i Lana fanau, o faamaimau o latou tofi a o gasolo seneturi i le faataumaoiina e le tasi o le isi” (i le Conference Report, Ape. 2003, 82; po o le Liahona, Me 2003, 79). Sa faaalia e sa Nifae ma le Taitaiau o Moronae ia uiga tonu e fai i taimi o taua ma le totomasaa (tagai faamatalaga mo le Alema 43:54; 44:1–2; 48:11, 22– 23 i le itulau 251).
I le taimi o le Taua Lona Lua a le Lalolagi, sa tuuina mai ai e le Au Peresitene Sili le faamatalaga lea o loo i lalo, e faamanino ai le tulaga o le Ekalesia i taua:

“E tatau i tagata o le Ekalesia ona tuuina atu tautua faamaoni i o latou malo ma le tautua lotonuu pe a valaauina ai. [E aofia ai le tautua faamiliteli] Ae o le Ekalesia lava ia, e tusa ai ma lea tulaga, e leai sona tiutetauave mo nei aiaiga, e leai foi se isi mea e faia e sili atu nai lo le uunaia o ona tagata ina ia tuuina atu lena lotonuu i o latou atunuu ma i faigamalo saoloto lea e saili e le lotonuu maualuga.

“… E i ai se matafaioi e manaomia mai tagatanuu uma po o le usiusitai i le atunuu. O loo faaleoina lenei matafaioi i le Mataupu Faavae o le Faatuatua lea e folafola mai ai:

“‘Matou te talitonu i le usiusitai i tupu, ma peresitene, ma faipule, ma faamasino, i le usiusitai ma faamamalu ma lagolagoina le tulafono.”’ …

“O le usiusitai i nei aoaoga faavae, e lagona ai pea e tagata o le Ekalesia lo latou tiute e o mai i le puipuiga o lo latou atunuu pe a i ai se valaau i le taua ua faia. …

“O lea, o le Ekalesia tetee i taua ma e tatau lava. … E le mafai ona ia faauigaina taua o se auala amiotonu e foia ai eseesega faavaomalo; o nei mea e tatau ma e mafai ona foia—e malilie i ai malo—e ala i le feutagaiga ma fetuunaiga filemu.

“Ae o le faitau aofai o le Ekalesia o tagatanuu ia po o e usiusitai i faigamalo lea e le oo i ai se malosiaga o le Ekalesia. …

“… O le mea lea, o tulafono faavae, o le usiusitai i nei mataupu faavae, pe a valaauina alii o le Ekalesia i auaunaga faafitafita i soo se atunuu lea e tatau ona latou tautua faamaoni ai, o lo latou tiute maualuga faaletagatanuu e tatau ai, o le tali atu i lena valaau. Pe a faalogo atu i lena valaau, ma usiusitai ia i latou o e pule ia te i latou, o le a latou faaumatia ai i latou e faasagatau mai ia te i latou, o le a le avea ai i latou ma fasioti tagata” (Heber J. Grant, J. Reuben Clark Jr., and David O. McKay, in Conference Report, Apr. 1942, 92–94; also cited in Boyd K. Packer, Conference Report, Apr. 1968, 34–35).

Alema 43:4–8. Ua Tofia Tagata Fouvale o Sa Nifae e Fai ma Taitaiau Sili i Autau a Sa Lamana

O tagata sa Soramā sa i ai muamua i le nuu o sa Nifaē. Ae peitai, ona o le faamaualuga, “na oo ai ina avea sa Sorama ma lo sa Lamana” (Alema 43:4). A o lei oo i lo latou fasiotiga, sa tonu le matatau o taitai o sa Nifae ina ne’i aufaatasi sa Sorama ma sa Lamana, ona lamatia ai lea o le nuu o sa Nifae (tagai Alema 31:4). Ina ia puipuia mai lenei fasiotiga tele, sa taitaia ai e Alema se misiona e toe faafoi mai sa Sorama, o le toatele o i latou ua leva ona latou lafoaia le faatuatua moni. E ui lava o nisi o sa Soramā sa toefuatai i le faatuatua, o le toatele sa feita ma amata ona feoai ma sa Lamana ma faaosoina i latou i le ita ia te i latou” ma sauniuni e sii taua (Alema 35:10–11). Sa tofia e taitai taua o sa Lamana ia tagata sili ona fasioti tagata o sa Soramā ma sa Amelekī e avea ma taitai au e pule i se taumafaiga e faatoilaloina ai sa Nifae.

“Sa valaaulia e sa Sorama … ia tagata e toatele o sa Lamana ina ia o atu e nofoia lo latou atunuu o se gaoioiga tele muamua lea e faasagatau ai ia sa Nifae (Alema 43:5). O lo latou faauluuluga o le taitaiau pule o sa Lamana, o Seraemina le sa Amaleki. O le au sa Amaleki o tagata fouvale o sa Nifae i na uluai aso, ma e pei lava o le tele o tagata fouvale ua sili atu le le fiafia i tagata sa Nifae ma ‘silimusa le amioleaga ma fasioti tagata nai lo sa Lamana’ ( Alema 43:6). Sa vaaia e Seraemina lenei mea lea ua tofia uma sa Amaleki i tulaga taitaiau pule i le autau e pei o ia po o isi sa Sorama saua e tutusa ma ia (Alema 43:6)” (Hugh Nibley, Since Cumorah, 2nd ed. [1988], 296).

Alema 43:13–14. Ua Toatele ma Faamalosia e Tetee Atu i o Latou Fili

O le aofai o e fouvale o sa Nifae ia ua avea ma sa Lamana ua tali tutusa ma le aofaiga o sa Nifae o e na tumau i le faamaoni (tagai Alema 43:14). O lenei aofaiga tele, ua tuufaatasia ma le autau a sa Lamana, ua tuua ai sa Nifae i se tulaga matuia faafuainumera (tagai Alema 43:51; tagai foi Mosaea 25:3; Alema 2:27, 35). E ui lava i lea, sa faalagolago i lo latou faatuatua, sa faatuatua sa Nifae o le a faamalolosia i latou i le taimi o latou taua e tetee atu i le malosi o le fili, e pei ona Ia faia i le autau a Kiteona (tagai Faamasino 7–9), Elisaia (tagai 2 Tupu 6:15–23), Tupu o Peniamina (tagai Upu a Mamona 1:14), ma Alema (tagai Alema 2:27–35).

Alema 43:15–54. Sa Faaaogaina e Taitaiau Moronae le Faatuatua ma le Fuafuaga Alualu Mamao e Puipuia ai sa Nifae

I le taimi a o avea o se taitaiau sili, sa faalagolago ai Moronae i lona malosi ma le mana o le Alii e puipuia ai sa Nifae. Alema 43 o se faataitaiga lea o le auala na tuufaatasia ai e Taitaiau Moronae lana faamasinoga lelei ma lona usiusitai i apoapoaiga a le Atua. Sa ia saunia fitafita taitasi i ofutau lelei faafitafita (tagai fuaiupu 19–21), ma sa ia saili atu i le fautuaga a le perofeta a o lei o atu i le taua (tagai fuaiupu 23–24).

“Sa taitaia e taitai sa Amalekia ma sa Sorama le faaoliolitau a sa Lamana, o le a matua aoga lo latou iloa i metotia faalilolilo faafitafita a sa Nifae e faatoilalo ai soo se taitaiau vagana ai Moronae. Mai lava i le amataga o lenei mea ona o le mamao o lana silasila na faoa ai lo latou uluai faamoemoega sa faufau i ai—i le nuu tuaoi o Seasona (Alema 43:22 ). Sa i ai o ia i lona tulaga autu o le puipuiga iina, ae ina ua toe foi mai avefeau mai le feutagaiga ma le perofeta na ia iloa ai ua fuafua e sa Lamana se osofaiga faafuasei i le nuu e faigata ona oo i ai ae aupito vaivai o Maneti, lea na latou faapea e le o faatalia mai ai i latou (Alema 43:24). Sa vave ona ave e Moronae lana autau autu i Maneti ma tuu ai tagata iina e sauniuni ai (Alema 43:25–26).

“Ina ua faailoa atu i ai e ana tagata matavao gaoioiga uma a sa Lamana, na mafai e Moronae ona faia se mailei mo le fili, na maua ai i latou e aunoa ma se puipuiga a o latou sopoia le vaitafe o Saitonu (Alema 43:28–35)” (Hugh Nibley, Since Cumorah, 297–98).

Sa faamoemoe le Taitaiau o Moronae i faamanuiaga a le Alii ona sa ia tuuina atu ana taumafaiga silisili. Atonu o ia le fitafita sa sili ona atamai i ona aso, ae sa ia faaali lona lotomaualalo e ala i le mulimuli i fautuaga a le perofeta. O iina na avea ai le Taitaiau o Moronae ma meafaigaluega maoae i le aao o le Atua.

Alema 43:18–22, 37–38. O a o Tatou Ofutau Malupuipuia o i ai i Aso Nei?

Sa saunia e Taitaiau Moronae ia ofutau malupuipuia mo lana autau, lea na i ai se eseesega taua i le taua e tetee ai i o latou fili (tagai Alema 43:37–38). Sa faamalamalama mai e Peresitene Harold B. Lee (1899–1973) le auala e tasi e mafai ai ona tatou faaaogaina nei fuaiupu i o tatou olaga i nei aso:

“Ua ia i tatou vaega e fa o le tino lea na fai mai ai le Aposetolo o Paulo pe na vaai i ai e aupito sili ona matautia i le mana o le pogisa. O sulugatiti, e faatusa i le mama, ma le ola mama. O le loto e faatusa i la tatou amio. O o tatou vae, o a tatou sini ia po o faamoemoega i le olaga ma le mea mulimuli o o tatou ulu, o o tatou mafaufauga.

“… E tatau ona fusia o tatou sulugatiti i le upumoni. O le a le upumoni? O le upumoni, sa fetalai mai ai le Alii, o le malamalama foi lea o mea e pei ona i ai nei, e pei ona sa i ai ma e pei ona o le a oo mai [MFF 93:24]. … ‘O o tatou sulugatiti e ao ona fusia i le upumoni,’ ua fetalai mai ai le perofeta.

“Ma le loto, o le a le ituaiga ufifatafata e tatau ona puipuia ai a tatou amio i le olaga? E tatau ona ufiufi o tatou loto i se ufifatafata o le amiotonu. Ia, ona ua aoaoina nei le upumoni ua i ai sa tatou fuataga e mafai ai ona tatou faamasinoina le va o le sao ma le sese ma lea o le a fuaina ai pea a tatou amio e lena mea ua tatou iloa e moni. O la tatou ufifatafata e ufiufi ai a tatou amio o le ufifatafata o le amiotonu.

“[Ae] o le a le mea tatou te puipuia ai o tatou vae, pe o a mea e fuaina ai o tatou faamoemoega po o a tatou sini i le olaga? … ‘Ma ia faaseevaeina o outou vae i le sauniga o le talalelei o le filemu.’ (Efeso 6:15). …

“Ma o le mea mulimuli o le puloutau o le faaolataga. … O le a le faaolataga? O le faaolataga o le faaolaina. Faaolaina mai le a? Faaolaina mai le oti ma faaolaina mai le agasala. …

“Ia, o lea o le Aposetolo o Paulo … ua i ai lana tagata ua faia ona ofutau o loo uuina i lona lima se talita ma i le isi ona lima se pelu, o meatau ia i na ona aso. O lena talita o le talita o le faatuatua ma o le pelu, o le pelu lea o le agaga o le Upu a le Atua. Ou te le mafai ona mafaufau i nisi meatau e sili atu ona mamana nai lo le faatuatua ma se iloa o tusitusiga paia ia e i ai i totonu le Afioga a le Atua. O le tasi ua faaofutauina ma o le isi ua matua saunia i na meatau ua saunia e alu atu e tetee atu i le fili” (Feet Shod with the Preparation of the Gospel of Peace, Brigham Young University Speeches of the Year [Nov. 9, 1954], 2–3, 6–7; tagai foi i le Efeso 6:13– 17; MFF 27:15–18).

Alema 43:23–25. O Le Usitai i le Perofeta e Aumai ai Faamanuiaga

O le manao o Taitaiau Moronae e saili ma mulimuli i le fautuaga a le perofeta sa i’u ai i le tele o manumalo. O taua o le olaga i le asō o le a manumalo ai e ala i le mulimuli i le perofeta.

Sa faamamafa mai e Peresitene Spencer W. Kimball (1895–1985) le pogai tatou te manaomia ai ona mulimuli i perofeta: “Ia tatou faalogo atu ia i latou ua tatou lagolagoina o ni perofeta ma tagatavaai, faapea foi ma isi o le usoga e pei o loo faalagolago i ai lo tatou ola faavavau, aua o loo faalagolago i ai!” (i le Conference Report, Ape. 1978, 117; po o le Liahona, Oke. 1978, 77).

Alema 43:45–47. “E oo lava i le Faamasaaina o le Toto”

O le ola o le tagata e paia. O le aveesea o se ola o sē taumamaina ua “inosia i le silafaga a le Atua” (Alema 39:5). E ui i lea, e mafai e se tasi ona faamaonia le aveeseina o le ola o se isi, pe a puipuia o ia lava, aiga, saolotoga, tapuaiga, po o le atunuu. Sa fesoasoani mai Peresitene Gordon B. Hinckley e faamalamalama le mataupu o taua ma le faamasaaina o le toto:

“Ina ua vevela taua i le va o sa Nifae ma sa Lamana, o loo ta’ua mai i le tusi ‘sa faaosoina sa Nifae i le mea e sili ona lelei, aua na latou le tau mo … le fiapule, a ua latou tau mo o latou aiga ma lo latou saolotoga, ma a latou ava ma a latou fanau, ma a latou mea uma, ioe, atoa ma a latou sauniga i a latou tapuaiga ma la latou ekalesia.

“‘Na latou faapea ifo i o latou loto, ua faia e i latou le mea e tatau i lo latou Atua’

“Sa apoapoai atu le Alii ia te i latou, ‘Ia outou faamamaluina o outou aiga e oo lava i le faamasaaina o le toto’(Alema 43:47). …

“Ua manino mai nei tulaga ma isi tusitusiga, o le mea moni e i ai taimi ma tulaga e alagatatau ai i atunuu ona i ai o se matafaioi e tau ai mo le aiga, mo le saolotoga, ma faasagatau atu ai i pulega saua, o taufaamatau ma le pologa …

“… O i tatou o ni tagata saoloto alolofa, ua tautino atu e puipuia le saolotoga i soo se mea lava ua faoa ai. Ou te talitonu o le a le faamasinoina e le Atua alii ma tamaitai o i ai i le meliteli, ua i ai le matafaioi e avea ma sui o o latou malo e faataunuu mea ua faatonuina i latou faaletulafono ia faia. Atonu foi Na te ta’usalaina i tatou pe a tatou taumafai e faalavelave pe tausuai i le ala o i latou o loo aofia ai i se fetauaiga ma au a e amioleaga ma e pule saua” (i le Conference Report, Ape. 2003, 83–84; po o le Liahona, Me 2003, 80).

Jerry Thompson, © IRI

Alema 43:54; 44:1–2; 48:11, 22–23. O Moronae “E Le Fiafia i le Faamasaaina o le Toto”

O Taitaiau Moronae “e le fiafia i le faamasaaina o le toto” (Alema 48:11) e ui lava ua faamaoniaina o ia e aveese le ola o se isi tagata i le puipuia o lona atunuu. Sa ia tau ma le musua ma sa Lamana mo le tele o tausaga (tagai Alema 48:22). Ina o tau o ia, sa ia faatumauina le alofa mo tagata uma, e oo lava ia i latou i le itu tetee. O loo tusia i talafaamaumau sa taofia e Taitaiau Moronae le taua e sili atu ma le faatasi ina ia faasaoina le tele o le ola e mafai ona faasaoina (tagai Alema 43:54–44:1–2; 55:19 ). Sa aveesea ma le musua ma le faanoanoa ia ola “ua [auina atu] ai o latou uso ai lenei olaga … ae e lei saunia i latou e fetaiai ma lo latou Atua” (Alema 48:23). Sa talitonu ma le maumaututu Taitaiau Moronae o i latou o e tausia a latou feagaiga ma le Atua ma oo atu ai i le oti o le a “togiolaina e le Alii o Iesu Keriso” ma tuua lenei “lalolagi ma le olioli” (Alema 46:39).

O nisi o le au faitau atonu ua mafaufau pe faapefea i se tagata e popole i le tausiga o feagaiga a le Alii ona mafai ona aafia i mataupu faamiliteli. O lenei popolega atonu o le pogai lea na tusi ai e Mamona e faapea o Moronae “e le fiafia i le faamasaaina o le toto” ma sa aoao mai “ia aua foi nei sii se pelu, sei iloga i sē ita mai, sei iloga ina ia faasaoina o latou ola” (Alema 48:11, 14).

Alema 45 Faaopoopoga. “O Faamaumauga o le Nuu o Nifae”

O le faaopoopoga faatusilima i luma atu o le aotelega o le Alema 45 o se vaega o uluai faamaumauga muamua lava (mo se faamalamalamaga auiliili, tagaifaamatalaga mo le Tusi Muamua a Nifae: O Lana Nofoaiga ma le Galuega i le itulau 12). O le fuaitau “e aofia ai le tuufaatasiga o mataupu 45 i le 62” na faaopoopo atu i ai ina ua lomia le Tusi a Mamona i le faasologa o mataupu i le lomiga o le 1879.

Alema 45:17–19. Sa Alu Ese Alema ma “E Lei Toe Faalogoina se Tala ia te Ia”

Sa faamalamalama mai e Elder Bruce R. McConkie (1915–85) o le Korama a Aposetolo e Toasefululua e faapea o le fuaitau “ua aveina ae o ia e le Agaga, po ua tanumia e le aao o le Atua” (Alema 45:19) ua ta’u mai ai sa faaliliuina Alema: “O Mose, Elia, ma Alema le itiiti, na faaliliuina uma. O le tala i le Feagaiga Tuai e faapea na maliu Mose ma na tanumia e le aao o le Alii i se tuugamau e le iloa, e sese lea. (Teu. 34:5–7.) E moni atonu na ‘tanumia [o ia] e le aao o le Atua,’ afai o lena faamatalaga o se gagana faa-faataoto o lona uiga la sa faaliliuina o ia. Ae i le tala o le Tusi a Mamona, o loo tusia ai o Alema ‘ua aveina ae o ia e le Agaga,’ ua faapea mai, ‘ua fai mai le tusi paia, na avea Mose e le Atua mona, ma ua matou taofi ua talia Alema e ia i le Agaga mona.’ (Alema 45:18–19.) E tatau ona manatuaina sa i ai ia sa Nifae papatusi apamemea, ma o ‘tusi paia’ na sa aumai ai le tala i le aveeseina atu o Mose e ala i le faaliliuina Ae o Elia, o le tala o lona aveina ae i ‘se nofoa afi faataavalevale … i le asiosio i le lagi,’ e mamalu tele lona alu ese atu i le Feagaiga Tuai. (2 Tupu 2.)” (Mormon Doctrine, 2nd ed. [1966], 805).

Alema 46–50. O Le Eseesega i le Va o le Taitaiga Amioleaga ma le Amiotonu

Sa faailoa manino mai e Mamona le eseesega iloga i le va o Amalekia ma Taitaiau Moronae (tagai Alema 48:7; 49:25–28). Sa manao Amalekia e “faaumatia le faavae o le saolotoga ua tuuina atu e le Atua” i sa Nifae, ma o Taitaiau Moronae sa manao e faasaoina (Alema 46:10).

O tagata amioleaga e pei o Amalekia o e tau mo latou lava i le pule atonu e manuia mo se vaitau e ala i tulaga a le lalolagi, ae latou te aumaia mea leaga ma le matautia i o latou lava luga ma e mulimuli ia i latou. I le eseesega, o taitai e pei o Taitaiau Moronae e musuia tagata i manaoga tautupu lea o le a matuai pulea ai mamanu a le tiapolo. O le siata lea o loo faatusatusa ai Moronae ma Amalekia:

Taitai Au Moronae	Amalekia
Na tofia e le “filifiliga a le nuu” ma faamasino sili e avea ma taitaiau sili o le autau (Alema 46:34; tagai foi i le43:16).	Sa maua le pule i le pepelo ma le faaoleole (tagai i leAlema 47:1–35; 48:7).
Toe faalototeleina tagata i le amiotonu ma aoao i latou ia faamaoni i le Atua ma a latou feagaiga (tagai i le Alema 46:12–21; 48:7).	Faaosoina ia tagata i le ita ma manatu sese (tagai i le Alema 48:1–3).
Olioli i le saolotoga ma le tuusaunoa o lona malo ma tagata (tagai Alema 48:11).	Saili e faaumatia le saolotoga o tagata (tagai Alema 46:10).
Sa alofa i ona uso ma ua “matua galue mo le manuia ma le saolotoga o lona nuu” (Alema 48:12).	“Ua le faapelepeleina e ia le toto o lona nuu” ma galue e fai lona lava manatu faapito (Alema 49:10).
O se tagata sa puleaina e mataupu faavae amiotonu o lē sa aoaoina sa Nifae ia aua nei sii le pelu, sei iloga e puipuia ai se aiga o se tasi, o se ola, po o le saolotoga (tagai Alema 48:10, 14).	O se tagata sa puleaina e tuinanau o lē sa aoaoina tagata ia faatoilaloina ma le faamalosi ma faia folafolaga ia faaumatia (tagai Alema 49:13, 26–27).
Sa saili atu ma le lotomaualalo i le fesoasoani a le Atua i le faasaoina o le ola (tagai Alema 48:16).	Fetuuina le Atua ma tauto e fasioti (tagai Alema 49:27).
Sa galue e faamutaina finauga ma feeseeseaiga (tagai Alema 51:16).	Sa galue e faatupuina finauga ma feeseeseaiga (tagai Alema 46:6, 10).

Alema 46:12–15, 36. O Le Tagavai o le Saolotoga

© Clark Kelley Price

O le faaosoina o isi mo se taumafaiga amiotonu e manaomia ai le lototele. E masani lava ona aoao mai e Peresitene Ezra Taft Benson e faatatau i le taua o gaoioiga a Taitaiau Moronae i le sisiina ae o le tagavai o le saolotoga. Sa ia faamamafa mai pea lava pea le manaomia ona avea ma se tagatanuu mataalia e lagolagoina le saolotoga: “Ia faalelei lou nuu i lou toaga e fesoasoani atu i ai. Ia manatua i o outou tiute mo le lelei o nuu, ‘e na o le pau le mea e manaomia e manumalo ai le leaga, e mo tagata lelei e le faia se mea’ (Edmund Burke). …Fai se mea aoga e puipui ai lou saolotoga ma le faitalia ua tuuina mai e le Atua ia te oe” (i le Conference Report, Ape. 1988, 58; po o le Liahona, Iul. 1988, 50).

Sa toe aoao mai Peresitene Benson:

“I lena voluma o tusitusiga paia, o le Tusi a Mamona, ua tatou iloa ai le tauiviga tele ma le umi mo le saolotoga. Ua tatou iloa foi manatu faualuga o tagata ma lo latou naunautaiga faifai pea e tuuina atu lo latou saolotoga mo folafolaga a e folafola atu ni mea ia i latou. …

“… O Moronae, e pei o perofeta o loo tusia a latou upu i le Tusi a Mamona, sa saunoa e uiga ia Amerika o se nuu filifilia—o le nuu o le saolotoga. Sa ia taitaia tagata i taua o e na naunautai e tau e ‘faatumauina lo latou saolotoga.’

“Ma o loo ta’u mai e faamaumauga : ‘… e faapea na ia faia le tagavai o le saolotoga ina ia faatuina i luga o olo uma sa i ai i nuu uma, … ma faapea foi ona faatuina e Moronae le tagavai o le saolotoga i sa Nifae.’ [Alma 46:36.]

“O lo tatou manaoga lenei i le aso—ia faatuina le tagavai o le saolotoga i o tatou tagata i Amerika atoa.

“E ui lava o lenei mea na tupu pe ā ma se fitusefulu tausaga T.L.M., ae o le tauiviga sa faaauau lava i le afe tausaga lea o loo aofia ai i lenei faamaumauga paia o le Tusi a Mamona. O le mea moni, o le tauiviga mo le saolotoga o se mea o loo faaauau pea—o loo i ai ia i tatou i se lagona moni tele i le aso” (in Conference Report, Oct. 1962, 14–15).

Alema 46:23–27. O Le Valoaga i le Ofu o Iosefa

© 1994 Robert Barrett

O le ofu masae o Moronae—o le tagavai o le saolotoga—o se faamanatu o le toēga o le ofu o Iosefa le Aikupito. Sa folafola mai e Moronae o sa Nifae o toe tagata ia o fanauga a Iosefa ma o le a faaauau ona faasaoina pe a latou auauna atu i le Atua (tagai Alema 46:22–24). Sa saunoa Peresitene Iosefa Filitia Samita (1876–1972) i le tulaga faafaatusa ma faavaloaga e faatatau i le vaega o le ofu o Iosefa na faasaoina, lea ua faataunuuina i o tatou aso:

“Ua ta’u mai ia i tatou sa i ai se valoaga i le faatamaiaina o le ofu felanulanuai sa ofuina e Iosefa. Sa i ai se vaega o le ofu na faasaoina, ma sa valoia e Iakopo a o lei maliu o ia, e pei o le toe ie o le ofu o Iosefa na faasaoina e tatau foi i se vaega na totoe o le fanauga a Iosefa ona faasaoina [tagai Alema 46:24].

“O lena toega lea ua maua i sa Lamana e le pine ae tofo i faamanuiaga o le Talalelei. E tatau ona toe faatasia ma toe tagata ia ua faapotopotoina mai atunuu ma o le a faamanuiaina e le Alii e faavavau” (The Way to Perfection [1970], 121).

Alema 47:36. Fouvalega ma Finauga

O loo lapatai soo mai pea le Tusi a Mamona ia i latou e i ai i le Ekalesia, ona “fouvale” lea ma amata ai ona faamaaa o latou loto ma ua le pine ae “[faagalogalo] le Alii lo latou Atua” (Alema 47:36).

Sa lapatai mai Elder Neal A. Maxwell (1926–2004) o le Korama a Aposetolo e Toasefululua,o faafitauli lava ia e tasi o loo i ai i le asō pe a faitioina e tagata fouvale le Ekalesia ona o lo latou lava faamaualuga: “E i ai tagata fouvale ua latou tuua le Ekalesia, pe aloaia pe le aloaia foi, ae o ē e le mafai ona tuuaunoaina le Ekalesia. E masani lava o le naunau e faamalieina tagata o le lalolagi, latou te faitio pe faasausili i le Usoga. E le gata ua latou saili e taofiofi le atolaau ae o nisi taimi ua taumafai malosi e toso ese! E masani lava ua aoaoina i latou i mataupu faavae moni ia e tasi e pei foi o ē faamaoni, e tusa lava la pe ā, latou te agai lava i le itu o le fouvale (tagai Alema 47:36). Ua faamaaaina o latou mafaufau e le faamaualuga (tagai Tanielu 5:20)” (Men and Women of Christ[1991], 4
Sa faamatala mai e Elder Russell M. Nelson o le Korama a Aposetolo e Toasefululua ia taunuuga o finauga ma le fouvale:

“‘O le ua i ai le agaga o finauga e le mai ia te au lea [ua fetalai mai ai le Alii]’ … (3 Nifae 11:29–30). …

“I le lalolagi atoa, o le Au Paia a le Alii … ua latou iloa e tau i le malaia le ala o e ua faatuiese. O loo tuuina mai i le Tusi a Mamona lenei lapataiga:

“‘… ina ua fouvale i latou, ua le pine ona sili ona faamaaaina i latou ma le le salamo, ma ua sili ona faapaupau, ma amioleaga ma feai … ; ua gauai i le faapaie, ma le mataaitu uiga eseese uma; ioe, ua faagalogalo le Alii lo latou Atua.’ (Alema 47:36).

“Oka se fevaevaea’i o le malosi o le fouvale! O nai mea iti e mafai ona oo atu ai i taunuuga tetele. E tusa lava po o a tofiga po o tulaga e i ai, e leai se tasi e sao mai iuga leaga o finauga. …

“E faafailele e finauga le fevaevaea’i” (i le Conference Report, Ape. 1989, 86–88; po o le Liahona, Iul. 1989, 86, 87).

Alema 48:1–10. Ia Fai se Tonu mo Mataupu Faavae Kerisiano

O nisi taimi e tatau ona tutu ai soo o Keriso e pei ona tutu le nuu o Moronae e puipuia lo “latou saolotoga, ma o latou fanua, ma a latou ava, ma a latou fanau, ma lo latou filemu” (Alema 48:10). Sa naunau lava Moronae e fesoasoani i lona nuu e “faatumauina le galuega ua ta’ua e ē ita ia te i latou, o le galuega a le au Kerisiano” (Alema 48:10).

Faatasi ai ma galu o le amioleaga i le lalolagi i le aso, ua fautua mai Peresitene Gordon B. Hinckley e faapea “e i ai taimi e ao ai ona tatou tutu atu mo le mea tonu ma le amiosa’o, mo le saolotoga ma le amiosolia e pei lava ona faamalosia ai e Moronae lona nuu e puipuia a latou ava, a latou fanau, ma le pogai o le saolotoga (tagai Alema 48:10)” (i le Conference Report, Oke. 2001, 88; po o le Liahona, Ian. 2002, 72).

Alema 48:19. “Ua Le Itiiti Le Aoga”

O le a le uiga o le faamatalaga lea o Helamana “ua le itiiti le aoga”? Sa aoao mai Peresitene Howard W. Hunter (1907–95) e faapea o auaunaga uma lava amiotonu e tutusa lelei le taliaina e le Atua e ui lava o le a le auauna uma tagata i ni valaauga lauiloa:

“E ui lava e lei amanaiaina tele Helamana pe lauiloa e pei o Moronae, ae sa aoga o ia, o lona uiga, sa loto fesoasoani o ia pe sa aoga e pei o Moronae. …

“O le a le avea i tatou uma e pei o Moronae, e viia e a tatou uo i le aso atoa i aso uma. O le toatele o i tatou o ni tagata o le a le lauiloa tele i a tatou mea e fai, e o mai ma o ma faia a tatou galuega e aunoa ma le amanaiaina e tagata. Mo i latou o e atonu e lagonaina le tuuatoatasi po o le fefe pe le mata’ina foi, ou te fai atu, ‘ua le itiiti [lou] aoga’ nai lo le toatele o au uo mata’ina. O oe foi o se vaega o le autau a le Atua.

“Ia mafaufau, mo se faataitaiga, i galuega maeaea a se tina po o se tama o loo faia ma le leleoa i totonu o se aiga agavaa o le Au Paia o Aso e Gata ai. Mafaufau i faiaoga o Aoaoga Faavae o le Talalelei ma taitai pese o le Peraimeri ma Taitai Sikauti ma faiaoga asiasi o le Aualofa o loo auauna atu ma faamanuiaina ai le faitau miliona o tagata ae o le a le faamamaluina lava o latou igoa faalauaitele pe faailoa foi i faasalalauga a le malo.

“E fiasefulu afe tagata le mavaaia o loo mafai ai ona tatou maua avanoa ma le fiafia i aso uma. E pei ona tau mai e tusitusiga paia, ‘ua le itiiti le aoga’ o i latou nai lo i latou o loo i luga o itulau i luma o nusipepa o latou olaga.

“O le logologoa o le talafaasolopito ma le gauai atu i ai i le taimi lava lea e tasi e masani lava ona taulai i le tasi nai lo le toatele” (“No Less Serviceable,” Ensign, Apr. 1992, 64).

Alema 49–50. O Olo o Nuu o Sa Nifae

O musumusuga a Moronae ma lana silasila mamao i le faamalolosia o nuu sa faamaonia ai o le vaega lea na suia ai i le taua. E afe ma afe o sa Nifae na faasaoina ona o nuu sa saunia. E mafai ona faaaogaina lenei lesona e faamalolosia ai o tatou lava olaga i manatu ma galuega amiotonu ina ia mafai ai ona tetee atu i osofaiga leaga po o “u fanafana mu a le ita mai” (1 Nifae 15:24; tagai foi Helamana 5:12). Sa folafola mai e le Alii afai tatou te saili atu ma le lotomaualalo ia te Ia, o le a Ia faailoa mai ia te i tatou o tatou vaivaiga ma o le “faia mea vaivai ma mea malolosi”(Eteru 12:27). O le siata o loo mulimuli mai o loo lisi atu ai ni faataitaiga o auala e mafai ai ona faaaoga olo a sa Nifae ia te i tatou:

O Auala Na Faamalolosia ai Sa Nifae	O Auala E Mafai ona Faamalolosia ai i Tatou
Sa faamalosia olo vaivai (tagai Alema 48:9).	E tatau ona faamalosia itu vaivai i o tatou olaga.
Sa saunia sa Nifae mo le fili i se auala e lei iloa muamua lava (tagai Alema 49:8).	E tatau ona tatou saunia nai lo se isi lava taimi muamua e tetee atu i togafiti a le tiapolo.
Sa fausia e sa Nifae o latou aai vaivai i olo (tagai Alema 49:14).	Afai tatou te o mai ia Keriso, e mafai ona Ia faia mea vaivai ma mea malolosi ia te i tatou (tagai Eteru 12:27).
Ua i ai i sa Nifae le manumalo atoa i o latou fili (tagai Alema 49:23).	Afai tatou te faamaoni ma faalagolago i le Alii, o le a Ia tuuina mai ia te i tatou le manumalo atoa i o tatou fili.
Ina ua maea nisi o manumalo o sa Nifae, latou te lei faamutaina ai a latou sauniuniga (Alema 50:1).	Pe a tatou faatoilaloina ma le manuia se faaosoosoga po o se tofotofoga, e le tatau ona tuuina i lalo la tatou puipuiga, ae ia tumau ma leoleo ma tatalo pea ina ia le faatoilaloina (tagai Alema 13:28).
Sa fausia e sa Nifae olo malu ina ia mafai ai ona latou iloa mamao atu le fili (tagai Alema 50:4).	A o tatou faalagolago i perofeta o leoleo ia o ona po nei i luga o olo ma vaavaai mamao atu, o le a sili atu ona tatou saunia lelei mo le lumanai.

Alema 51:13. Faaauupegaina e Leoleo ai lo Latou Nuu

I le avea ai ma tagatanuu ua noatia i tatou i tulafono e pulea ai lo tatou atunuu. Sa tuuina mai e Elder Russell M. Nelson fautuaga ia o loo mulimuli mai pe a feagai ma tiute o le faia o auupega e puipuia ai lo tatou atunuu:

“E uso moni lava tagata aua o le Atua foi o lo tatou Tama moni. Ae ui i lena, ua tumu tusitusiga paia i tala o finauga ma le fetaua’i. O loo matua tausalaina ai taua o finauga, ae aloaia matafaioi a tagatanuu e puipuia o latou aiga ma o latou saolotoga [tagai Alema 43:45–47; 46:11–12, 19–20; 48:11–16]. … O le a toatele tagata o lenei Ekalesia e tofia i le tautua faamiliteli i le tele o atunuu. ‘Tatou te talitonu ua faatuina malo e le Atua mo le lelei o tagata; ma o loo ia faia tagata e tali atu mo a latou faiga e uiga i ia malo, i le faia o tulafono atoa ma le faaaogaina mo le lelei ma le saogalemu o tagata uma’ [MFF 134:1 ].

“I le taimi o le Taua Lona Lua a le Lalolagi, ina ua faamalosi tagata o le Ekalesia e tau i itu tetee, sa faamautinoa mai e le Au Peresitene Sili e faapea, ‘ua i ai i le malo le tiutetauave mo le puleaina faalemalo o ona tagatanuu po o mataupu, mo le soifua sololelei faaupu fai, ma le faataunuuina o tulafono faaupu fai , faalenuu ma fafo atu. … Peitai, o le Ekalesia lava ia, e leai sana matafaioi i nei tulafono po o aiaiga, [e ese] mai nai le uunaia o ona tagata ina ia tuuina atu atoatoa … lo latou faamaoni i o latou atunuu’ [in James R. Clark, comp., Messages of the First Presidency of The Church of Jesus Christ of Latter-day Saints, 6 vols. (1965–75), 6:155–56]” (i le Conference Report, Oke. 2002, 42; po o leLiahona, Nov. 2002, 40 ).

Manatu e Mafaufau Loloto i ai

O a mea o le a e faaaofia i totonu o se lisi o ni olo faaleagaga e silisili le taua e manaomia ona e saogalemu ai mai le fili o loo saili atu i lou faafanoga?
O a ni auala e mafai ai e fitafita o le Au Paia o Aso e Gata Ai ona tautua e pei o Taitaiau Moronae i taimi o taua?
O a ni aafiaga e mafai ona faia e se taitai faamaoni i se atunuu, malo, nuu, po o aiga?

Galuega Fautuaina

E talu ai o le a le silisili ese i tatou uma e pei o Moronae, ia faamatala le auaunaga taua o loo tuuina mai e tina ma tama. E le gata i lea, ia faamatala le taua o se faiaoga o le Aoga Sa, se taitai pese a le Peraimeri, se Taitai Sikauti, se faiaoga asiasi a le Aualofa, po o se valaauga o le Ekalesia e te filifilia.
Ia tusi i lalo nisi o vaega vaivai o lou olaga ma au fuafuaga e “faamalosia” ai i latou e tetee atu ai i vaivaiga.