Folasaga

O loo molimau mai le Tusi a Mamona ia Iesu Keriso ma aoao mai i tatou i le auala e avea ai ma Ona soo. Na faamautu mai e le Perofeta o Iosefa Samita (1805–44) e faapea “o le a latalata atu ai se tagata i le Atua e ala i le tausia o ona mataupu , nai lo se isi lava tusi” (History of the Church, 4:461; Book of Mormon introduction). A o e suesue i le Tusi a Mamona ma le agaga tatalo, o le a faaauau pea ona tuuina atu e le Agaga Paia le molimau i lou loto ma lou mafaufau e uiga i le matafaioi paia a le Faaola i le avea ai ma Togiola o tagata.

E tuuina atu e le Tusi a Mamona se uunaiga malosi i loto o i latou o e mauaina le tusi ma mafaufau loloto i ana savali. O Elder Parley P. Pratt (1807–57), o se tasi o uluai tagata liliu mai o le Toefuataiga ma na mulimuli ane avea ma se uso o le Korama a Aposetolo e Toasefululua, sa ia tuuina mai le faamatalaga o loo mulimuli mai e faatatau i le taimi muamua lava na ia faitau ai i le Tusi a Mamona:

“Sa ou tatalaina ma le naunautai, ma faitauina lona itulau autu. Ona ou faitauina ai lea o molimau a nisi o molimau e faatatau i le tulaga na maua ai ma faaliliuina. Na uma lena, ona ou amata faitau loa lea mai le amataga. Sa ou faitau i le aso atoa; na avea le ’ai ma se avega mamafa, lea na ou le manao ai i se meaai; sa fai foi le moe ma se avega mamafa pe a oo mai le po, ona sa sili atu ona ou manao e faitau nai lo le moe.

“A o ou faitau, na oo mai le agaga o le Alii i ou luga, ma na ou iloa ma malamalama ai e moni lava le tusi” (Autobiography of Parley P. Pratt, ed. Parley P. Pratt Jr. [1938], 37).

O perofeta o ona po nei o loo faaauau pea ona faamamafaina le manaomia e tagata uma o le Au Paia o Aso e Gata Ai ina ia faitau ma toe faitau i le Tusi a Mamona. Sa folafola mai e Peresitene Gordon B. Hinckley (1910–2008) e faapea, “Ou te folafola atu ia te outou afai o le a taitoatasi outou [ma faitau le Tusi a Mamona], e tusa lava pe ua faafia ona e faitauina le Tusi a Mamona, ae o le a oo mai i totonu o outou olaga ma totonu o o outou aiga se fuataga faaopoopo o le Agaga o le Alii, o se folafolaga mausali ina ia savavali i le usiusitai i Ana poloaiga, ma se molimau malosi atu e uiga i le moni o le i ai o le Alo o le Atua” (“O Se Molimau Moni ma Faamaoni,” Liahona, Aok. 2005, 6).

Sa faasoa mai e Peresitene Boyd K. Packer, o le Peresitene o le Korama a Aposetolo e Toasefululua le auala na ia iloa ai o le suesueina o le Tusi a Mamona e taitai atu ai i faaaliga patino:

“Na ou iloa ai [o le Tusi a Mamona] e manino ma taua. …

“Sa ou iloaina ai o soo se tasi, i soo se mea, e mafai ona faitauina le Tusi a Mamona ma maua ai musumusuga.

“O nisi manatu na oo mai ina ua uma le faitauga faalua, e oo lava i le faatolu ma foliga ai e “faatatau” i mea ma te fetaiai i aso uma o le olaga” (i le Conference Report, Ape. 2005, 6; po o le Liahona, Me 2005, 7).

O musumusuga, e pei ona molimau mai ai Peresitene Packer, o le a oo mai a o e faitauina pea mai le Tusi a Mamona.

O Le Faamoemoega o Lenei Tusi Lesona

O lenei tusi lesona e faaopoopo atu i lau faitauga ma suesuega o le Tusi a Mamona ma e le tatau ona suitulaga i ai se mea. O lenei tusi lesona o se tuufaatasiga o malamalamaaga faavaloaga ma apoapoaiga musuia e fesoasoani ai ia te oe a o e saili atu i taitaiga ina ia “faatatau tusi paia uma” ia te outou lava ia (1 Nifae 19:23). Ia iloiloina ou mausa e aoaoina ai ma iloa ai le auala sili e faaatoatoa ai e lenei tusi lesona lau faitauga patino ma suesuega o le Tusi a Mamona. O ni auala faigofie e suesue ai atonu e aofia ai (1) ia faasino atu i le tusi lesona a o e faitau, (2) faitauina o le tusi lesona pe a uma ona e faitauina ni mataupu i le Tusi a Mamona, po o le (3) toe iloiloina le tusi lesona ae e te lei faitauina ia mau e faamalosia ai lou malamalama i mataupu atofaina.

Auala o Loo Faatulaga Ai le Tusi Lesona Lenei

O le tusi lesona mo tagata o le vasega o loo i ai mataupu e 56 e tauaofa’i uma ai le Tusi a Mamona atoa lava. E tofu lava le mataupu ma vaega e lima: Folasaga, Faamatalaga, fesili mo suesuega (o loo i totonu o tamai pusa), Manatu e Mafaufau Loloto i ai, ma Galuega Fautuaina.

Folasaga

O sina folasaga puupuu i le amataga o mataupu taitasi e faataatia ai le tala i le mataupu, faailoa mai ai autu, ma faailoa mai ai nai mataupu faavae ma aoaoga faavae o loo maua i poloka mau.

Faamatalaga

O le vaega o faamatalaga e faamanino mai ai mataupu faavae ma aoaoga faavae o loo maua i poloka mau. O se faitauga ma le faaeteete o le faamatalaga e mafai ai e oe ona faailoa atili ma faamanino ia savali musuia a perofeta o le Tusi a Mamona. O le a e iloa ai le auala o loo faatatau ai e perofeta i o tatou aso ia upumoni i tusitusiga paia i tuutuuga faaonapo nei ma tulaga taatele faalelalolagi.

O loo sii mai pea lava foi e le faamatalaga ia [upusii] mai lomiga talafeagai a le Ekalesia, e aofia ai Faamaoni i le Faatuatua: O Se Tusi Taiala o le Talalelei (2004), Mo Le Malosi o le Autalavou: Faataunuuina o Lo Tatou Tiute i le Atua (2001), Taiala i Tusitusiga Paia (o loo maua i luga o le initoneti i lewww.scriptures.lds.org), ma leTopical Guide ma leBible Dictionary.

Fesili mo Suesuega

I le vaega o le faamatalaga atoa lava o le a e maua ai fesili mo suesuega i pusa vali e pei o le pusa lea e i lalo ifo. O nei fesili o le a fesoasoani ia te oe e suesue ma malamalama ai i fuaiupu faapitoa.

Mosaea 18:21–29

O le a le mea na aoao atu e Alema i lona nuu latou te faia ina ia “savavali ai ma le sa’o i luma o le Atua”? (fuaiupu 29).

Manatu e Mafaufau Loloto i ai

O le vaega o Manatu e Mafaufau Loloto i ai o le a fesoasoani ai ia te oe ia manatunatu loloto ai i nisi o mea mai lau faitauga. Sa faamautu mai e Elder Russell M. Nelson o le Korama a Aposetolo eToasefululua e faapea o le mafaufau loloto i tusitusiga paia o le a aumai ai taunuuga taua: “A o e mafaufau loloto ma tatalo e uiga i mataupu faavae ma aoaoga faavae, o le a fetalai atu le Agaga Paia i lou mafaufau ma lou loto. O mea o loo ta’ua i tusitusiga paia, o le a maua ai se malamalamaaga fou ma mataupu faavae e faatatau i lou tulaga o le a faamauina ai i lou loto” (i le Conference Report, Oke. 2000, 19; po o le Liahona, Ian. 2001, 21). Atonu e te manao e fai sau api talaaga o mau po o se tamai api e ese mai ai e faamaumau ai tali i nisi o fesili ma lagona mai lau faitauga.

Galuega Fautuaina

I le faaiuga o mataupu uma o loo i ai ni galuega faaopoopo ia e faamalosia ai le faaaogaaga patino o upumoni mai tusitusiga paia. O nisi o nei galuega atonu e faaaofia mai ai e lou faiaoga i le taimi o le vasega pe afai ua lesitalaina oe i le mataupu faalelotu o le Tusi a Mamona i vasega o le inisitituti. Faamolemole ia matau mai o ia galuega, o fautuaga ma e tatau ona fetuunai e tusa ma o o outou manaoga taitoatasi ma le taitaiga mai le Agaga Paia.

Faamatalaga mo i Latou e i ai Manaoga Faapitoa

O loo i ai isi faatulagaga e ese mai ai i lenei tusi lesona a tagata o le vasega atonu o loo maua i luga o le www.ldsces.org. Afai e i ai se faafaigata i lou faaaogaina o lenei tusi lesona ona o ni manaoga faapitoa, faamolemole faafesootai lou faiaoga mo punaoa faaopoopo.

Mau Tauloto

O lenei tusi lesona o loo i ai se aikona o mau tauloto , lea ua faailogaina ai itulau o mau tauloto. I le taimi o le seminare, e talosagaina ai tamaiti o le vasega ina ia faamasani i mau e100 ua faailoaina mai o ni mau taua o aoaoga faavae. O taimi uma lava e lisiina mai ai se fuaiupu se tasi o mau tauloto e 100 o le a e vaaia ai le faatusa ua iloa ai.