Alema 52–63

Folasaga

Sa matauina e Persitene Ezra Taft Benson (1899–1994) e faapea,“Mai le Tusi a Mamona tatou te iloa ai le ala e ola ai soo o Keriso i taimi o taua” Liahona, Ian. 1987, 6). Sa faaaofia e Mamona le tele o tala o taua i totonu o le Tusi a Mamona mo se faamoemoega. O nei tala o loo aoao mai e uiga i le manaomia ona faasaoina le saolotoga ina ia faatumauina aia tatau faatapuaiga, o mea ua faaleagaina e pogai mai i ē taufaalata, o le tāua o ni nai talavou amiotonu, o le faamaoniga aiai mo taua, ma tomai e faasagatau ai i le leaga a o faalagolago i le mana o le Atua e oo mai.

Faamatalaga

Alema 52–53. Taua ma le Faamasaaina o le Toto

Alema 52–53 o se faamaoniga o le fetalaiga a le Faaola e faapea “o i latou uma o e tago i le pelu e oti i latou i le pelu” (Mataio 26:52). A o taitaia ai e tagata ua liliuese ma amioleaga o sa Nifae (Amorona ma isi), sa sailia e sa Lamana ina ia pueina ma puleaina ma le saua nuu o sa Nifae. O aai taitasi uma sa aea i se tulaga matuia lava, ae ui i lea: “Na latou le maua se aai e tasi, sei iloga ua tele lo latou toto ua faamaligiina” (Alema 52:4). Na musuā pea Taitaiau Moronae e tago i le pelu ma sa sili atu ona naunau e tuu i lalo mo le filemu (tagai Alema 52:37 ). Sa ia iloa e ui lava ina manumalo sa Nifae, ae sa maimau ai le fiaafe o ola i itu uma e lua.

O le a le tupu lava ni taua pe ana ola uma tagata i le talalelei a Iesu Keriso. O Ia o le Alii o le Filemu, ma o i latou o e mulimuli ia te Ia o avefeau o le filemu.

Alema 53:9. Amioletonu—O Le Mafuaaga Moni o Taua

Sa faamalamalama mai e se tasi o le autofātala’i le ala e mafai ai i nisi taimi ona faasino atu i manaoga i totonu ia tofotofoga e pei o ia na onosia e sa Nifae: “O lea o se faamanuiaga i sa Nifae ina ua maea mea uma ae oo atu sa Lamana i o latou faitotoa ‘e fagua i latou i lo latou manatua— ‘Amuia le tagata ua aoaiina e le Atua’ (Iopu 5:17). E tusa lava po o le a le amioleaga ma le feai ma le amio piopio o sa Lamana e ono oo i ai (ma o le mea lena sa latou oo i ai), po o le a lo latou toatele atu nai lo sa Nifae, ua toatele ma lalata mai i itu uma, pe latou te fai mea faalilolilo ma le poto leaga ma togafiti lilo ma faasalalau atu ma faataunuu a latou taupulepulega faatiapolo ma taufaamatau atu ma le saua ma fai a latou sauniuniga matautia mo taua uma, e le o i latou o faafitauli i a sa Nifae. Na pau le mea na taofia ai latou iina, ia faamanatu ia sa Nifae o latou lava faafitauli moni, o le savavali sa’o lea i luma o le Alii” (Hugh Nibley, Since Cumorah, 2nd ed. [1988], 339–40).

Alema 53:10–18. O Le Taua o Feagaiga

Sa faasoa mai e Elder M. Russell Ballard o le Korama a Aposetolo e Toasefululua le auala tatou te maua ai le mana e ala i le tausia o a tatou feagaiga: “O nisi taimi e faaosoosoina ai i tatou ina ia pulea o tatou olaga e tusa ma mea o loo i ai nai lo le feagaiga. E le o se mea e mafaia pea ona ola i le talalelei ma tu atu mo le upu moni ma molimau i le Toefuataiga. … Ae leai se mana faaleagaga i le ola faasamasamanoa. E maua le mana i le tausia o a tatou feagaiga” (i le Conference Report, Ape. 1999, 113; po o leLiahona,Iul. 1999, 86).
Sa faamalamalama mai e Peresitene Boyd K. Packer, o le Peresitene o le Korama a Aposetolo e Toasefululua e faapea o le tausia o feagaiga tatou te saogalemu ai:

“Ia tausi au feagaiga ona e saogalemu lea. A solia o le a e le saogalemu. …

“… Tatou te le o saoloto e soli a tatou feagaiga ma solaese ai i taunuuga” (i le Conference Report, Oke. 1990, 107–8; po o le Liahona, Ian. 1991, 89).

Alema 53:16–21. O Le Faataitaiga a Autau a Taulelea

O le autau a taulelea, o e sa o atu i le taua e suitulaga i o latou tama, o alii talavou o le amiotonu. Sa latou loto e leoleo lo latou nuu (tagai Alema 56:5). Sa le i matatau i latou i le oti ma sa lototetele i le taua (tagai Alema 56:45–49, 56). Sa tauia e le Atua lo latou faatuatua i le malosi ofoofogia ma le puipuiga. E leai se tasi o i latou na oti i le taua (tagai Alema 57:25–26). E le o le tulaga lava lenei e tatau ona i ai i alii talavou amiotonu o loo i ai i le tautua faamiliteli. O nisi taimi e oo lava i e amiotonu “e oti i le Alii” (MFF 63:49). Ae i le tulaga o nei alii talavou, o le puipuiga paia na tuuina mai e faasaoina ai lo latou ola faaletino i taua. Sa latou faalauteleina le ituaiga tagata lea e tatau ona faataitai uma i ai atalii o le Atua ma tu ai o se molimau i le nuu o sa Nifae e faasaoina e le Atua i latou pe afai latou te faatuatua.

© Clark Kelley Price

Alema 53:20–21. Ia Fai ma Faataitaiga Lelei i le Tautua Faamiliteli

I nei ona po, ua tuuina mai e le Au Peresitene Sili le fautuaga o loo mulimuli mai i tagata o le Ekalesia o loo i ai i le tautua faamiliteli: “I o tatou alii talavou ua o atu i le militeli, e tusa lava po o ai o loo auauna i ai pe o fea foi, matou te fai atu ia ola mama, ia tausia poloaiga a le Alii, ia tatalo e le aunoa ia te Ia e faasaoina outou i le upumoni ma le amiotonu, ia ola e tusa ma a outou tatalo, ma po o le a lava le mea e tupu ia te outou o le a i ai le Alii ma outou, ma e leai se mea o le a tupu ia te outou o le a le avea ma mamalu ma viiga i le Atua ma i lo outou faaolataga ma le faaeaga. O iina o le a sau ai i o outou loto mai le ola ai i le olaga mama o loo outou tatalo ai, o se olioli lea o le a pasia ai ou malosiaga o lagona po o le malamalamaaga. O le a latalata pea le Alii ia te outou; o le a Ia faamafanafana ia te outou; o le a outou lagonaina Lona i ai i le ituaso o lo outou puapuaga tele; O le a Ia puipuia ma leoleo outou i le atoatoa lea e tusa ma Lona faamoemoega atamai-atoa. O lea, pe a maea le taua ma outou toe foi atu i o outou aiga, a o ola ai i olaga amiotonu, e maeu le tele o lo outou fiafia—pe o outou o ni tagata manumalo po o e na faatoilaloina—ae sa outou ola e pei ona poloaiina ai e le Alii. O le a outou toe foi atu ua matua pulea lelei i le amiotonu pe a maea mailei ma togafiti uma a Satani o le a tuua ai outou e aunoa ma le afaina. O lo outou faatuatua ma molimau o le a malolosi e le mafai ona solia. O le a vaavaai atu i luga ia te outou ma faaaloalo i ai e pei ona sao mai ai i ogaumu aasa mu o tofotofoga ma faaosoosoga ma o mai ai e aunoa ma le afaina. O o outou uso o le a taulai atu ia te outou mo fautuaga, fesoasoaniga ma taitaiga. O le a avea outou ma taula lea e mulimuli mai ai le autalavou o Siona o le a noanoamau ai lo latou faatuatua i tagata” (Heber J. Grant, J. Reuben Clark Jr., and David O. McKay, in Conference Report, Apr. 1942, 96).

Alema 53:20–21. “Ia Faamaoni i Aso Uma”

Sa talanoaina e Elder Dallin H. Oaks o le Korama a Aposetolo e Toasefululua le uiga o le faamaoni i aso uma:

“O lena upu faamaoni e aofia ai le tautinoga, amiosao, onosai, ma le lototele. Ua faamanatu mai ai ia i tatou le faamatalaga a le Tusi a Mamona o le autau talavou e 2,000:

“[Alema 53:20–21.]

“I le agaga o lena faamatalaga ou te faapea atu ai i a tatou faifeautalai ua maea mai misiona—o alii ma tamaitai ua osifeagaiga e auauna atu i le Alii ma e o loo auauna atu ia te Ia i le galuega tele o le folafolaina o le talalelei ma le faaatoatoaina o le Au Paia— o outou faamaoni ea i le faatuatua? O ia te outou ea le faatuatua ma le tautinoga faifai pea e faaali mai aoaoga faavae o le talalelei i o outou olaga, i taimi uma? Ua outou auauna ma le lelei, ae pe o outou maua ea le lototele, e pei o le au paionia ma tumau ai i le faamaoni i le faatuatua ma tumau seia oo i le iuga?” (i le Conference Report, Oke, 1997, 101– 2; po o le Liahona, Nov. 1997, 73; faaopoopo le faatusilima).

Alema 56:45–48. “Matou Te Le Masalosalo Lava Na Iloa E O Matou Tina”

Sa faamalamalama mai e Elder Neal A. Maxwell (1926–2004) o le Korama a Aposetolo e Toasefululua e faapea na o le pau le mea e mafai ona tuuina atu e matua o mea ia ua leva ona i ai ia i latou lava:

“Pe a faataunuuina ma le lelei ia galuega a matua o le aoao atu ma fesoasoani atu ma pe a o i ai fanau e talisapaia lelei ma talia savali, ona tatou fetaiai lea ma na tulaga ofoofogia e pei o le tasi lea na aofia ai alii talavou i le Tusi a Mamona o e na aoaoina lelei e o latou tina[Alema 56:47–48]. …

“O le faalagolago o nei alii talavou i o latou tina e faamomoiloto ma loloto, ae sa tatau i tina ona iloa muamua ‘le mea lea’ i se auala na matauina totoa ma faalogo ai alii talavou ia i latou (e pei foi lava ona masani ai tamaiti ona matauina matua), e ‘lei masalosalo’ lava na iloa e o latou tina ‘e’ moni” (That My Family Should Partake [1974], 58–59).
A o saunoa ai i le manaomia e tina ona faaeteete atili, na faamatala ai e Tuafafine Julie B. Beck, o le peresitene aoao o le Aualofa ia tamaitai o le feagaiga latou te iloa pe o ai i latou:

“I le Tusi a Mamona ua tatou faitau ai e uiga i taulelea maoae e 2000, o e sa matua matautia lo latou lotototoa, lototetele, ma le malolosi. ‘Ioe, o tagata faamaoni ma le faautauta i latou, aua ua aoaoina i latou e tausi i poloaiga a le Atua, ma savavali ma le amio sao i ona luma’(Alema 53:21). Sa tuuina atu e nei taulelea faamaoni le faamalo i o latou tina. Sa latou fai mai, ‘Na iloa e o matou tina’(Alema 56:48). …

“O tiutetauave o tina i le taimi nei, e le’i manaomia ai lava le matua mataalia muamua. E sili atu i lo se isi lava taimi i le talafaasolopito o le lalolagi, ua tatou manaomia ni tina ua iloa. … A iloa e tina pe o ai i latou ma pe o ai le Atua, ma ua osifeagaiga ma Ia, o le a latou maua le mana tele ma le uunaiga mo le lelei o a latou fanau” (i le Conference Report, Oke. 2007, 80; po o le Liahona, Nov. 2007, 76).

Alema 57:19–21. “Mausali ma le Le Matatau”

Sa talanoaina e Peresitene Gordon B. Hinckley (1910–2008) le taua o le tumau mausali ma le le matatau:

“‘E atagia mai lenei Ekalesia i mea uma e te mafaufau i ai, i mea uma e te tautala ai, ma mea uma e te faia,’sa tau atu ai e Peresitene Hinckley i le autalavou. ‘Ia faamaoni i le Ekalesia ma le malo o le Atua’ …

“Sa tau atu e Peresitene Hinckley i le autalavou e faapea o i latou o loo ‘i ai iina o ni ataliii o Helamana i se lalolagi ua tumu i faatosinaga faataumaoi. … Ae afai e tuu lou faatuatua i le Silisiliese ma mulimuli i aoaoga a lenei Ekalesia ma pipiimau i ai e ui lava i ou tiga, o le a faasaoina ma faamanuiaina outou ma faateleina ma faafiafiaina.’

“A o saunoa ai e uiga i le lalolagi o loo latou ola ai, sa tau atu e Peresitene Hinckley i le autalavou, ‘O loo outou i ai i le lotolotoi o Papelonia. O loo sau le fili ma le faafanoga tele. Ia tutu maualuga atu ai, o outou o tofi tautupu. Ia tutu i luga atu o le lalolagi’” (“Prophet Grateful for Gospel, Testimony,” Church News, Sept. 21, 1996, 4).

Alema 58. O Le Aia Tatau e Tau ai mo le Saolotoga

Mo se malamalamaaga i le tau mo le saolotoga e oo lava i le faamaligiina o le toto, tagai i le faamatalaga mo Alema 43:45–47 i le itulau 250

Alema 58:10–11. Sa Fetalai mai le Alii “Ua Filemu ai o Matou Agaga”

A o avea o se tasi o Fitugafulu, sa faamalamalama ai e Elder Dennis E. Simmons e faapea o le filemu o le Atua e le faalagolago i tulaga o mea i fafo:

“E tusa pe lepetia le lalolagi atoa o vagaia i tatou, o le a tuuina mai e le Fesoasoani sa folafola mai lona manuia o se iuga o le avea ma soo moni… Ae mafai ona tatou maua Lona manuia e faatasi ma i tatou, e tusa pe o a mea faigata o le lalolagi. O Lona manuia o le manuia lena, o le toafimalie lena, o le mafanafana lena e fetalai mai i o tatou loto ma mafaufau e le Fesoasoani, o le Agaga Paia lea, ao tatou taumafai e mulimuli ia te Ia ma tausiaAna poloaiga. …

“E pei ona sa iloa e Helamana i le lotolotoi o taua sa ‘fetalai mai e Ia, le filemu i o matou agaga’ (Alema 58:11) … , e mafai foi e e uma e saili ma le faamaoni, ona maua lena lava filemu e tasi na fetalai mai ia i latou. O lena filemu e sau mai le mautinoa e fetalai mai ai le leo itiiti, ma le filemu” (mai le Conference Report, Ape. 1997, 41–42; po o Liahona, Iulai 1997, 36).

Alema 58:10–11

O le a le tali o le tatalo o le faatuatua a sa Nifae? E faapefea e nei tali ona faaaogaina i o tatou tauiviga mo le laveaiga?

Alema 58:34–37. “Matou Te Le Fia Muimui”

Sa fesoasoani mai Elder Neal A. Maxwell ia i tatou ia malamalama atili i se mafuaaga o le muimui: “I se aso fiafia o i luma atu, ‘O e na muimui foi latou te aoao ia popoto’(Isaia 29:24 ; 2 Nifae 27:35). Ua fautuaina mai i lenei mea e faapea o le leiloa faitau ma malamalama i aoaoga faavae o se mafuaaga iloga lea o le muimui o tagata o le Ekalesia” (“A Choice Seer,” in Brigham Young University 1985–86 Devotional and Fireside Speeches [1986], 115).

Alema 59:9. Ua Faigofie ona Tausia se Aai mai le Faatoilaloina

Sa tusia e Mamona e faapea e sili atu ona faigofie le tausia o se aai mai le faatoilaloina nai lo le toe maua mai (Alema 59:9). E pei lava o aai, e faapena foi i tagata. E matua sili atu lava ona faigata ma lamatia le toe faafoiina mai o se tasi o le ua pau atu nai lo le fesoasoani e tausia i latou mai le pauu atu. I upu a Peresitene Ezra Taft Benson (1899–1994), “E sili atu le saunia ma le puipuia, nai lo le toe faaleleia ma le salamo” ( The Teachings of Ezra Taft Benson [1988], 285).

Minerva K. Teichert, faaaloaloga a le BYU Museum of Art

Alma 59:11–12. Ua A’ea Aai Ona o le Amioleaga

O le faatoilaloina o le aai o Nifaea ua faailoa mai ai le faiā malosi i le va o le amioleaga o sa Nifae ma lo latou le gafatiaina ona faatoilaloina o latou fili i le “mana o le Atua” (tagai Mosaea 9:16; 10:10–11; Alema 60:16). O taitai o autau a sa Nifae o tagata e masani ona “maua le agaga o faaaliga ma perofetaga” (3 Nifae 3:19). O nei taitaiau amiotonu sa saofagā i le toilalo o sa Nifae e le o le [toilalo] ia sa Lamana ae i le amioleaga o sa Nifae. I le eseesega, o sa Nifae faatuatua e masani lava ona mafai ona latou puipuia i latou lava ma toe maua mai aai na aeaina, e masani lava e toaitiiti ni ola e maimau ai (tagai Alema 52:19; 56:53–56; 57:7–12 ; 58:25–28; 62:22–26). Ua aoao soo mai pea lava e le Alii e faapea a o tatou feagai ai ma faigata ma faafitauli toatuga, afai tatou te amiotonu ma faalagolago ia te Ia, e mafai lava ona tatou maua pea le mautinoa o le a i ai o Ia ma i tatou ma o Lana galuega o le a silisili atu ona manumalo (tagai MFF 6:34; 10:69; 33:13).

Alma 60:10–14. O Le Fasia o e Amiotonu

Sa tusia e Moronae e faapea e faatagaina e le Alii le fasia o e amiotonu ina ia “oo lana faamasinoga i e amioleaga; o le mea lea e le aoga ai ona outou manatu ua malaia e amiotonu ona ua fasia i latou. A e faauta, ua latou ulu atu i le malologa o le Alii lo latou Atua” (Alema 60:13).

E le i leva ona amata le Taua a le Lalolagi Lona Lua ae tuuina mai e le Au Peresitene Sili o le Ekalesia e faapea: “I lenei taua matautia lea ua tupu nei, e faitau afe o tatou alii talavou amiotonu i vaega uma o le laolagi ma i le tele o atunuu ua noatia i se valaau o le tautua faamiliteli o o latou lava atunuu. O nisi o i latou nei, sa auauna atu, ua maea ona toe valaauina i o latou aiga faalelagi; o isi o le a toeitiiti lava mautinoa le valaauina e mulimuli atu i ai. Ae peitai ‘faauta,’ e pei ona fai mai Moronae, o e amiotonu o i latou na o e na auauna atu ma na fasia ‘e ulu atu i le malologa o le Alii lo latou Atua’ [Alema 60:13], ma o i latou foi na na fetalai ai le Alii ‘o i latou o e ua oti ia te au, o le a le tofo i le oti, aua e suamalie ia i latou’(MFF 42:46 ). O lo latou faaolataga ma le faaeaga i le lalolagi a sau o le a mautinoa. O lea i la latou galuega o le faafanoga o le a latou taiaina ai o latou uso ae o le a le molia ai i latou. O lena agasala, e pei ona fai mai ai Moronae o anamua, lea e i le tausalaga o i latou o e ‘nonofo i o latou nofoaga o le pule i le tautulemoe o le mafaufau,’o na taitai i le lalolagi o e o i ai i se popolevale o le ita ma le tuinanau mo le pule ma pulega amioletonu o o latou uso a tagata, ma ua faatinoina ia malosiaga e faavavau ia latou te le mafai ona malamalama i ai ma le mafai ona puleaina. O le Atua, i Lana lava taimi e tatau ai, o le a faamasinoina i latou” (Heber J. Grant, J. Reuben Clark Jr., and David O. McKay, in Conference Report, Apr. 1942, 95–96).

Alema 60:19–36. O Le Tusi a Moronae ia Paorana

Sa mafai ona filifili ia Paorana e le fiafia i tusi na avatu e Moronae, ae na te lei filifili faapena. Sa faamatala mai e Elder David A. Bednar o le Korama a Aposetolo e Toasefululua le mea moni e faapea o i tatou, e pei foi o Paorana, e mafai ona filifili e le ita:

A tatou talitonu pe faapea foi ua tatou le fiafia, o le uiga masani lava ua tatou lagona le tiga, ua soona fai, ua faalumaina, pe ua le faaaloalogia foi. Ma o le mea moni lava, o mea faavasivasi, faamaasiasi, e le faavaea, ma limalala’u, e tulai mai i a tatou fegalegaleaiga ma isi tagata, e ono tupu ai lo tatou le fiafia. Peitai,e matua le mafaia lava e se isi tagata ona faatiga ia te oe, pe faatiga foi ia te au. Ioe, o le talitonu na faatiga i tatou e se isi tagata, e matua lē sa’o lava. O le le fiafia, o se filifiliga lea tatou te faia; e le o se tulaga e faatupu pe fai faamalosi e se tagata po o se isi mea i o tatou luga. …

“E ala i le mana faamalosiau o le Togiola a Iesu Keriso, e mafai ai e oe ma au ona faamanuiaina e aloese ma manumalo i le lototiga. ‘Ua tele le filemu o e naunau i lau tulafono: e leai foi se mea e tausuai ai i latou’ (Salamo 119:165). …

“… E pei ona faamatala mai e Elder Neal A. Maxwell, o le Ekalesia e le o se ‘nofoaga faapea e malolo ai ma fai uma ai mea tatou te manaomia’ (i le Conference Report, Ape. 1982, 57; po o le Liahona, Iul. 1982, 65). Ae, o le Ekalesia o se fale e aoao ai, ma o se mafutaga faaleaoaoaga tatou te maua ai le poto masani pe a tatou faataitai e le tasi i le isi, i le faiga faifai pea o le ‘faaatoatoaina o le Au Paia.’

“Sa faamalamalama lelei mai foi e Elder Maxwell e faapea i lea falesuesue e aoao ai o nei aso e gata ai, lea ua lauiloa o le Ekalesia toefuataiina, o tagata o le ekalesia o ‘mataupu na e fai i ai suesuega’ (tagai ‘Jesus, the Perfect Mentor,’ Ensign, Feb. 2001, 13) lea e tatau ai mo le tuputupu ae ma le atiina ae. …

“E le mafai ona ta taofia faamoemoega ma amioga a isi tagata. Peitai, tatou te fuafuaina pe faapefea ona tatou tali atu. Faamolemole ia manatua, o oe ma au o sui ua faamanuiaina i le faitalia e tatau ai, ma e mafai ona ta filifili e aua nei faatausuai” (i le Conference Report, Oke. 2006, 95–97; po o leLiahona, Nov. 2006, 90–91).

Alema 60:23. Ia Faamama Totonu o le Ipu

E laitiiti lava sina avanoa na tuua ai e Presitene Ezra Taft Benson mo le masalosalo e faapea o nei lapataiga e faatatau ia i tatou. Sa ia folafola mai: “E le o lelei mea uma i Siona. E pei ona lapatai mai Moronae, e tatau ona faamama totonu o le ipu (tagai Alema 60:23), e amata muamua ia i tatou lava, ona sosoo ai lea ma o tatou aiga, ae mulimuli i le Ekalesia” (mai le Conference Report, Ape. 1986, 3, po o Liahona, Iulai 1986, 3).

Alema 60:23

Atonu e te manao e faailoga lenei fuaiupu. Ona fesili lea ia te oe lava pe o a mea e tatau ona e faia e faamama ai totonu o lau ipu.

Alema 61. O Le Tali Atu i Faitioga e le Faamaoniaina

Sa faamalamalama e Elder Neal A. Maxwell le auala e mafai ona tutupu ai ni eseesega e oo lava i tagata faamaoni o le Ekalesia: I se Ekalesia ua atoatoa ua faatumulia i tagata e le atoatoa, e i ai tuaoi ua i ai ni nai feeseeseaiga i ni taimi. O se faataitaiga e ono lausilafia sa tupu i tagata Isaraelu Amerika o anamua. E faalua ona tusi atu Moronae ia Paorana e faitio i ai i le tuulafoaiina ona o le le taunuu atu o le toe faatoateleina [o autau] sa matuai manaomia lava. Sa faaaogaina e Moronae se gagana mamafa, ua tuaiina ai le kovana o le malo, o Paorana, i le nofo ai i lona nofoalii ma le ‘tautulemoe o le mafaufau.’ ( Alma 60:7.) E lei faatuai Paorana ma faia se tali e matuai agaalofa i se tagata o lona lava atunuu, e faamalamalama ai le pogai ua le mafai ai ona ia faia le mea na manao i ai Moronae. E ui lava na faitioina, ae e lei ita Paorana; ae sa ia viia lava Moronae mo le ‘lototele.’ (Alema 61:9.) I le tuuina atu ai o le tuuto tele ma le tupito a soo, o talanoaga e pei o ā auala sili e tulei ai le galuega a le Alii ua faatapulaaina i eseesega po o a auala e faaaogaina mai lea taimi i lea taimi. E pei lava i lenei vaega, o nisi taimi e tutupu ai ni faitioga ia e mulimuli ane faaalia e le faamaoniaina” (All These Things Shall Give Thee Experience [1979], 119).

Alema 62:41. O Aafiaga o Mafatiaga

Sa faamalamalama mai e Elder Dallin H. Oaks e faapea tatou te filifilia le auala o le a tatou aafia ai i mafatiaga:

“E mautinoa lava o nei mafatiaga maoae e le faapea e leai ni nai faamoemoega po o ni aafiaga e faavavau. E mafai ona liliu atu ai o tatou loto i le Atua. … E tusa foi lava pe faatupuina e mafatiaga ni faigata faaletino, e mafai foi ona avea ma auala e taitai atu ai alii ma tamaitai i faamanuiaga e faavavau.

“O ia fua tetele o mafatiaga e pei o faalavelave faalenatura ma taua e foliga mai e le mafai ona vavaeeseina mai i aafiaga faaletino. E le mafai ona tatou taofia atoa i latou, ae e mafai ona tatou iloa se auala o le a tatou tali atu ai i ia mafatiaga. Mo se faataitaiga, o mafatiaga o taua ma le tautua faamiliteli, lea ua avea ma faatafunaga faaleagaga o isi, ae o faama’itega faaleagaga o isi. Ua faamatalaina mai e le Tusi a Mamona le eseesega:

‘“Ae peitai faauta, ona o le taua o sa Nifae ma sa Lamana, ua faamaaaina nisi e toatele ona o le taua ina matua umi, ma ua faamaluluina nisi e toatele ona o latou puapuaga, ua iu ina latou faamaualaloina i latou i luma o le Atua, ua iu ina matua faamaualalo lava’(Alema 62:41).

“Sa ou faitau i se eseesega e talitutusa faapea ina ua maea le afa faataumaoi lea na faatamaia ai le faitau afe o fale i Florida i nai tausaga ua mavae atu. Sa ta’ua i se talafou ni tagata eseese se toalua o e na puapuagatia i le faalavelave lava lea e tasi ma mauaina faamanuiaga lava e tasi: sa faaleagaina uma o laua fale, ae o tagata taitasi o o laua aiga sa faasaoina mai le oti po o manuaga. O le tasi sa faapea mai o lenei faalavelave ua faatamaia ai lona faatuatua; sa ia fesili foi, pe faapefea ona faatagaina e le Atua lenei mea e tupu? O le isi sa faapea mai o le aafiaga ua faamalosia ai lona faatuatua. Sa agalelei le Atua ia te ia, sa ia fai mai ai. E ui lava ua leai le fale o le aiga ma meatotino ua maimau, ae ua faasaoina o latou ola ma e mafai ona toe fausia ia fale. Mo le tasi, o le afa o le ipu malamalama e le o i ai se mea. Mo le isi, o le afa o le ipu malamalama o loo tumu. O le meaalofa o le filifiliga mama e faamalosia ai i tatou taitoatasi e filifili auala o le a tatou galulue ai pe a tatou puapuagatia i mafatiaga” (“Adversity,” Ensign, July 1998, 7–8).

Alema 63:4–10. O Le Malaga i le Laueleele i le Itu i Matu

“I [se] vaega o le Au Paia i le Vasa i Saute, sa matauina e Peresitene [Spencer W.] Kimball: ‘sa lipotia e Peresitene Iosefa F. Samita, o le peresitene o le Ekalesia, “O outou uso e ma tuafafine mai Niu Sila, ou te manao ia outou iloa o outou e o mai mai tagata o Hakota.” Mo le Au Paia i Niu Sila, o le mea lena. Ua fetalai le perofeta a le Alii. … E talafeagai le faaiu ai e faapea o Hakota ma ana paaga sa i ai i motu pe a ma le seneturi e sefuluiva, pe tusa mai le 55 T.L.M. i le 1854 a o lei amata ona oo atu le talalelei ia i latou. Ua leiloloa ia i latou mea uma faigofie ma le taua ia na aumai e le Faaola i le lalolagi, ona e foliga mai sa latou i ai i motu a o soifua mai le Keriso i Ierusalema.’ (Temple View Area Conference Report, February 1976, p. 3.)” (Joseph Fielding McConkie and Robert L. Millet, Doctrinal Commentary on the Book of Mormon,4 vols. [1987–91] 3:329).

Minerva K. Teichert, faaaloaloga a le BYU Museum of Art

Sa faamaonia mai e Peresitene Tavita O. MaKei (1873–1970) le mea na tupu i nisi o tagata o Hakota ina ua ia tuuina mai le folafolaga lenei i le tatalo o le faapaiaga o le Malumalu o Niu Sila: “Matou te faailoa atu le agaga faafetai i nei motu lauusiusi ia na taitai mai ai e Lau Afio ia fanau o le Tama ia Liae, ma ua mafai ai ona latou uluola” (“Dedicatory Prayer Delivered by Pres. David O. McKay at New Zealand Temple,” Church News, May 10, 1958, 2).

Manatu e Mafaufau Loloto i ai

O le a se mea e mafai ona e faia e faamamaluina ai, lagolagoina, ma puipuia lou atunuu?
O a lesona e mafai ona tatou aoaoina mai i tusi uma a Moronae ma Paorana ia e mafai ona fesoasoani ai ia i tatou i o tatou olaga? (tagai Alema 60–61).
O le a le faia i le va o le amiotonu ma le saolotoga?
A maea ona faitau leAlema 52–63, o a ni aoaoga faavae silisili e faatatau i taua ia e mafai ona e aoao atu i se isi tagata?

Galuega Fautuaina

Ia faamauina i lau api o talaaga ia auala e mafai ona e faaaogaina ai metotia faalepuipuiga a Moronae i au lava aua faaletagata lava ia mo le amiotonu.
Atonu e te manao e tusia ia malamalamaaga na maua e uiga i auala e puipuia ai oe mai fili o lou faatuatua.
Ia tusi se otootoga o se lesona o le afiafi faaleaiga mai se tasi pe sili atu o mataupu o loo lisi atu i lalo:
1. O le faaaogaina o auala ua saunia e le Alii (tagai Alema 60:21)
2. Faamamaina o totonu o le ipu (tagai Alema 60:23)
3. Saili le viiga o le Atua ae le o mamalu o le lalolagi (tagaiAlema 60:36)
4. Aua le amanaiaina mea faatiga (tagai Alema 61:9)