Inisitituti
Mataupu 26: Alema 13–16

Mataupu 26

Alema 13–16

Folasaga

Sa e faaaogaina lou faitalia i le muai olaga e fai ai filifiliga amiotonu ma saunia ai mo le olaga faaletino (tagai Alema 13:3–5). Ona o se taunuuga o lou amiotonu i le muai olaga, ua saunia ai isi faamanuiaga ma avanoa mo oe i le olaga faaletino—e tusa ma tulaga o lou faatuatua/faamaoni faifai pea. Ia matau sa faamamafaina e Alema lo tatou manao ina ia faapaiaina i le olaga faaletino ma ia saunia mo le sini silisili o le ulu atu “i le malologa o le Alii” (Alema 13:12).

Ia manatua o le alofa tunoa o le Atua ma le faamasinoga tonu e sili atu nai lo le amioleaga o lenei lalolagi. I Amonaea o i latou na salamo ma taliaina aoaoga a Alema sa mauaina faamanuiaga a le Alii e ui lava o le toatele o i latou sa tuliesea pe faaumatia (tagai faamatalaga mo Alema 14:7–11 i le itulau 195). Sa aioi atu Amoleka ia Alema e faatoga atu i le Alii e faasaoina e amiotonu mai faatinoga a e amioleaga. Ae ui i lea, o le faamalamalamaga a Alema ia Amoleka, ua faamautu ai le aoaoga faavae o le faitalia ma faamanuiaga o loo faatalitali mo i latou o e ua puapuagatia mo le talalelei. O le a maua e e amioleaga le faamasinoga tonu a le Atua i lenei olaga po o le olaga a sau.

Faamatalaga

Alema 13:1–2. Tofia Faitaulaga “i le Tofiga o Lona Alo”

  • O se alii ua faauuinaSa faatatau ia Alema i faitaulaga ia na faauuina “i le tofiga o lona Alo” (Alema 13:1). O le faaupuga i le tofiga o lona Alo o se faasinoga i le Perisitua Mekisateko. I faaaliga o aso nei, sa tau mai ai e le Alii e faapea a o lei oo i aso o Mekisateko, sa taua le perisitua “o le Perisitua Paia, e tusa ma le faatulagaga o le Alo o le Atua. Ae ona o le faaaloalo po o le migao i le suafa” o le Atua, sa suia ai le igoa i le Perisitua Mekisateko (MFF107:3–4).

    Sa faamatala mai e Elder Bruce R. McConkie (1915–85) o le Korama a Aposetolo e Toasefululua le pogai e le tuueseesea ai e le Alema 13, e pei foi o le tele o isi itulau o le Tusi a Mamona ia ositaulaga o le Perisitua Arona ma faitaulaga sili o le Perisitua Mekisateko: “Sa tuu atu e perofeta o le Tusi a Mamona ia le igoa ositaulaga i tagata ia ua lauiloa i lenei tisipenisione o faitaulaga sili. O le mea lea, o i latou o ositaulaga o le Perisitua Mekisateko, ia po o lea na faamatalaina e Alema, ‘na tofia e le Alii le Atua o faitaulaga e tusa ma lana tofiga paia, e i ai lea i le tofiga o lona Alo.’ (Alema 13:1–20.)” (Mormon Doctrine, 2nd ed. [1966], 599).

Alema 13:3–5. “Valaauina ma Saunia” a o lei Faavaeina le Lalolagi

  • Sa aoao mai le Perofeta o Iosefa Samita (1805–44) e faapea o i latou ua faauuina i se valaauga i le olaga faaletino sa muai faauuina i lena valaauga i le muai olaga: “O tagata uma lava o loo i ai sona valaauga e talai atu i ē o nonofo ai i le lalolagi sa faauuina i lena lava faamoemoega i le Fono Tele i le lagi a o le i i ai lenei lalolagi. Ou te manatu sa faauuina au i lenei tofi i lena Fono Tele” (History of the Church, 6:364).

  • O i latou o e ua “valaauina ma saunia talu le faavaeina o le lalolagi” sa filifilia e le Atua i le muai olaga ona o lo latou “faatuatua tele ma galuega lelei” (Alema 13:3; tagai foi MFF138:55–56; Aperaamo 3:22–23).

    Sa aoao mai Peresitene Uilifoti Uitilafi(1807–98) e faapea o toeaiina uma o Isaraelu o loo umiaina le Perisitua Mekisateko sa muai faauuina, e faaopoopo atu i perofeta: “Sa tofiaina e le Alii ia Iosefa Samita a o lei fanau mai o ia e pei foi lava o Ieremia. … Ia ou te fai atu la e faatatau ia Iosefa Samita, sa ia mauaina lona tofiga a o lei faavaeina le lalolagi, ma ia sau ai i le atoaga o taimi o le Alii e faatuina lenei galuega i luga o le fogaeleele. Ma o le tulaga lava lea i le fiasefulu afe o toeaina o Isaraelu. O le Alii Silisiliese ua faaeeina i o outou luga le Perisitua Paia ma faia outou ma tufugaaao i Ona aao e fausia ai lenei malo. Pe o tatou mafaufau loloto ea i nei mea i le atoatoa e tatau ai?” (Discourses of Wilford Woodruff, ed. G. Homer Durham [1990], 281–82; tagai foi Aoaoga a Peresitene o le Ekalesia: Uilifoti Uitilafi [2004], 15).

  • Sa aoao mai e Peresitene Spencer W. Kimball (1895–1985) e faapea sa tuuina atu uma i alii ma tamaitai ia ni tofiga i le muai olaga: I le lalolagi ae tatou te lei o mai iinei, na tuuina atu ai i tamaitai faamaoni ni tofiga faapitoa a o alii na faamaoni sa muai faauuina i galuega faapitoa faaleperisitua. Talu ai ona tatou te le o manatuaina nei mea auiliili, e le faapea la o le a suia ai le moni ma le mamalu o mea na tatou autasi i ai. E faamasinoina lava outou i mea na ua leva ona faamoemoeina mai ia te outou e pei lava ona faamoemoeina mai ia i latou ua tatou lagolagoina e avea ma perofeta ma aposetolo!” (“O Tiute o Fafine Amiotonu,” Liahona, Mati 1980, 156).

  • Sa faamatala e Elder Neal A. Maxwell (1926–2004) o le Korama a Aposetolo e Toasefululua ia tiute o le fanau a le Atua i le olaga faaletino e ui lava i lo latou tulaga filifilia i le muai olaga: “O le muai olaga e le o se aoaoga faavae e nofonofovale ai. Mo i tatou taitoatasi, e i ai filifiliga e tatau ona fai, o feau e le uma ma le faigata e tatau ona fai, o puapuaga ma faigata e tatau ona oo i ai, o taimi e tatau ona faaalu lelei, o taleni ma meaalofa e tatau ona faaaoga lelei. Talu ai na filifilia i tatou ‘iina ma i lena taimi’ e le faapea la o le a tatou le manatu mamafa ai ‘iinei i le taimi nei.’ E tusa pe na muai faauuina alii, pe na muai tofiaina tamaitai, e tatau ia i latou na valaauina ma sauniaina ona faamaonia foi lo latou ‘filifilia, ma faamaoni.’ (Tagai Faaaliga 17:14; MFF 121:34–36.)” (i le Conference Report, Oke. 1985, 21; po o le Liahona, Ian. 1986, 12).

  • Sa faamatala mai e Peresitene Harold B. Lee (1899–1973) le puna o nisi o faamanuiaga tatou te maua i lenei olaga: “O nei taui uma e foliga mai na folafolaina, pe na muai faauuina, a o le i faia le lalolagi. E mautinoa lava o nei mataupu atonu sa mafua mai i le ituaiga o olaga sa tatou ola ai i lena lalolagi o le muai olaga o agaga. Atonu e fesiligia e nisi nei manatunatuga, ae i le taimi lava e tasi o le a latou taliaina ai e aunoa ma se fesiligia o le talitonuga, o le a faamasinoina i tatou taitoatasi pe a tatou tuua lenei lalolagi e tusa ma a tatou galuega sa faia iinei i le olaga faaletino. Pe le alaga tatau ea ona talitonu, o mea ia ua tatou maua iinei i lenei olaga sa tuuina mai ia i tatou taitoatasi e tusa ai ma taui o a tatou amioga ae tatou te lei o mai iinei?” (i le Conference Report, Oke. 1973, 7–8; po o le Ensign, Ian. 1974, 5).

Alema 13:4.Sa i ai le Faitalia i le Muai Olaga

  • Sa faapefea e i latou i le lalolagi o agaga ona “teena le Agaga o le Atua”? (Alema 13:4). Sa faamautu mai e Peresitene Iosefa Filitia Samita (1876–1972) le aoaoga faavae e faavavau o le faitalia a o ia taliina lenei fesili:

    “Sa tuuina atu e le Atua i ana fanau le filifiliga saoloto i le [muai olaga] lalolagi o agaga, lea na maua ai e agaga taitasi le avanoa, e pei lava ona maua e tagata iinei, i le filfiliina o le lelei ma le teenaina o le leaga, po o le faia o le leaga ma paupuaga ai i taunuuga o a latou agasala. Ona o lenei mea, na i ai nisi iina sa sili atu ona faatuatua nai lo isi i le tausiga o poloaiga a le Alii. …

    “O agaga o tagata e i ai a latou filifiliga saoloto. … E le tutusa uma agaga o tagata. Atonu sa i ai so latou amataga tutusa, ma ua tatou iloa sa ta’umamaina i latou uma i le amataga; ae o le aia tatau i le filifiliga saoloto lea sa tuuina atu ia i latou sa mafai ai e nisi ona sili atu i isi, ma o le mea lea, o le vaitau umi o le muai olaga, ia filiga atili, faatuatua atili atu, aua sa latou saoloto e galulue mo i latou lava, e mafaufau mo i latou lava, ia maua le upumoni pe fouvale foi i ai” (Doctrines of Salvation, comp. Bruce R. McConkie, 3 vols. [1954–56], 1:58–59).

  • A o avea ai ma agaga i le muai olaga, sa tatou atiina ae uiga lelei e faaali ai o tatou agavaa. Sa matau e le Atua lo tatou alualu i luma ma tuuina mai ia i tatou ia tiutetauave e tusa ma lo tatou faatuatua. Sa aoao mai Peresitene Iosefa Filitia Samita: “I le taimi o tausaga sa tatou i ai i le muai olaga e le gata ona atiina ae ai o tatou uiga eseese ma faaalia ai o tatou agavaa ma tomai, pe leai foi, ae sa tatou i ai foi i le mea sa mafai ona matauina ai lea alualu i luma. E talafeagai le talitonu sa i ai se faatulagaga o le Ekalesia iina. Sa soifua tagata faalelagi i se sosaiete sa faatulagaina atoatoa. Sa iloa e tagata taitoatasi lona tulaga. O le perisitua, e aunoa ma le fesiligia, sa faaeeina atu ma sa filifilia taitai e faia sauniga. O sauniga e fitoitonu i lena muai olaga sa manaomia ma sa faaalia le alofa o le Atua. I lalo o nei tulaga o le masani o lo tatou Tama ia iloatino ma filifili i latou o e e sili ona agavaa ma iloiloina ia taleni o tagata taitoatasi. E le gata na Ia silafia mea e mafai e tatou taitoatasi ona fai, ae faapea foi mea o le amafai e tatou taitoatasi ona fai pe a tofotofoina ma pe a tuuina mai ia te i tatou ia tiutetauave. Ia, pe a oo mai le taimi tatou te nofoia ai le fogaeleele faaletino, ua saunia mea uma ma ua filifilia ma faauuina auauna a le Alii i a latou misiona faamamaluina” (The Way to Perfection [1970], 50–51).

Alema 13:9.“E Avea i Latou ma Faitaulaga Sili e Faavavau”

  • Ona o le Perisitua Mekisateko e “leai se amataga o ona aso po o se gataaga o ona tausaga” (Alema 13:9; MFF 84:17; tagai foi Eperu 7:3), o i latou e mauaina le perisitua i le lalolagi e faaauau pea ona faatinoina pe a mavae le oti. O le mea lea, o e e umia le Perisitua Mekisateko e maliliu i le amiotonu “e avea ma faitaulaga sili e faavavau” (Alema 13:9).

    Sa toe faamatala e Peresitene Harold B. Lee se aafiaga, sa faamanino mai ai e faapea o tofi uma o le perisitua e umia e se tagata i lenei olaga o le a i ai se aafiaga i le isi lalolagi :

    “Sa ou toe faatulagaina le au peresitene o le Siteki a Ensign. Sa matou tofia le epikopo o se tasi o uarota e avea ma peresitene o le siteki. …

    “E ono vaiaso talu ona lagolagoina i latou, ae maliu faafuasei le peresitene o le siteki.

    “Ona amata lea ona ou maua le anoano o tusi. O gafea o le lalolagi na e maua ai le musumusuga e valaau se tagata o le a tuu e le Alii e oti i totonu o le ono vaiaso? Sa latou valaaulia au e lauga i ona toe sauniga, ma o nisi sa foliga mai sa mananao ou te taumafai e faamatala atu pe aisea na ou tofiaina ai se tagata o le a toe faafoi atu e le Alii ia te Ia i le ono vaiaso e sosoo ai.

    “Sa nofo Peresitene Iosefa Filitia Samita i luga o le tulaga ma faafofoga mai i lo’u taumafai e faamalie nei tagata, ma sa ia faapea mai ia te au, ‘Aua nei faalavelave lena mea ia te oe. Afai na e valaauina se tagata i se tofiga i lenei ekalesia ae oti i le aso e sosoo ai, o lena tofiga o le a i ai se sootaga i le mea o le a valaauina ai o ia e fai pe a ia tuua lenei olaga.’

    “Ou te talitonu i lena mea. Ou te talitonu o Persitene uma o lenei ekalesia, o aposetolo uma o lenei ekalesia, o epikopo uma, o peresitene uma o siteki, tulaga pulefaamalumalu uma, o le a i ai se sootaga i le mea o le a valaau ai se tasi e fai pe a ia tuua lenei lalolagi” (i le Conference Report, Oke. 1972, 129–30; po o le Liahona, Set. 1973, 25 26).

Alema 13:10–13. E Toatele na Valaauina ma Muai Faauuina

  • Sa aoao e Alema e faapea e toatele na valaauina i le muai olaga ona o lo latou “faatuatua tele” (Alema 13:10). Sa ia aioi atu i ona uso ina ia toe faatinoina le faatuatua ma ia “fua mai i fua” e maua ai o latou faamanuiaga (Alema 13:13).

    Sa faamanino mai e Peresitene Harold B. Lee e faapea e ui lava e toatele na valaauina ma muai faauuina i le muai olaga ona o lo latou lototetele, e tatau ona latou faatinoina le faatuatua ma galuega lelei i le taimi o le olaga faaletino e iloa ai faamanuiaga atoatoa o o latou valaauga (tagai MFF 121:34):

    “Atonu e valaauina ma filifilia e le Atua ia tagata i le lalolagi o agaga po o i lo latou muai olaga e fai se galuega patino, ae pe o le a latou taliaina lena valaauga iinei ma faalauteleina e ala i auaunaga faamaoni ma galuega lelei a o i ai i le olaga faaletino, o se mataupu lea i la latou aia tatau ma avanoa e faatino ai la latou filifiliga saoloto e filifili ai le lelei po o le leaga.

    “… Ou te popole i le toatele o i tatou o ē ona o lo latou faatuatua i le lalolagi o agaga sa ‘valaauina’ ai e fai se galuega maoae iinei, ae e pei lava o tagata lē magafagafa lelei ma faamaimau mea, ua latou faatinoina la latou filifiliga saoloto i le ola ai i olaga soona fai ma le faaloloto ma ua maimau ai lo latou tofi ma o latou faamanuiaga pe ana faapea e faamaonia lo latou faamaoni i o latou valaauga. O le mea lea na fetalai mai ai le Alii, ‘e toatele ua valaauina ae toaitiiti ua filifilia’” (Decisions for Successful Living [1973], 169).

Alema 13:11–12. Faapaiaina

  • Sa aoao e Alema e faapea e toatele na faamamaina e ala i le “toto o le tamai Mamoe” ma na “faapaiaina e le Agaga Paia” (Alema 13:11–12; tagai foi Moronae 10:32–33). Pe a uma ona faapaiaina, latou te “le mafai ona vaai i le agasala, sei iloga ua inoino i ai” (Alema 13:12; tagai foi 2 Nifae 4:31). E ui i lea, e tusa lava pe ua maea ona faapaiaina se tagata ma lagonaina ua faamamaina e le Agaga Paia, o le a faaauau pea ona faaosoosoina o ia i le olaga faaletino atoa. Sa lapatai mai faaaliga o aso nei, “O le mea lea ia mataala ai le ekalesia, ma tatalo pea, ina nei pauu i latou i tofotofoga; ioe, ia mataala foi i latou o e ua faapaiaina” (MFF 20:33–34).

    Sa faauigaina e Peresitene Polika Iaga(1801–77) le faapaiaina e faapea:

    “O le a ou tuu la’u lava faauigaga o le upu faapaiaina, ma fai atu e aofia ai le faatoilaloina o agasala uma ma aumai uma e noatia i tulafono a Keriso. Ua tuuina e le Atua i totonu ia i tatou se agaga mama; pe a afio na o lenei agaga, e aunoa ma le faalavelaveina, ma manumalo ai i la le tino, ma pulea ma taitai ma taulimaina … , ou te tauina lenei mea o le faamanuiaga o le faapaiaina. Pe o le a faaumatiaina atoatoa ea le agasala? Leai, o le a le mafai, ona e lei mamanuina i le tomai o le lagi.

    “Aua lava ne’i manatu tatou te saoloto i la le tino mai faaosoosoga i le agasala. O nisi e manatu latou te mafai i la le tino ona faapaiaina le tino ma le agaga ma mama aiai ai, lea o le a latou le toe lagonaina ai aafiaga o le mana o le fili o le upumoni. Afai o le a faigofie mo se tagata ona oo atu i lenei mamalu o le atoatoa i la le tino, o le a le mafai ai ona ia oti, pe tumau ai foi i se lalolagi ua muai pulea e le agasala. Ua oo mai le agasala i le lalolagi, ma le oti ona o le agasala. [Rom. 5:12.] Ou te manatu tatou te lagonaina atili pe itiiti foi aafiaga o le agasala i le umi tatou te ola ai, ma mulimuli ane ai e tatau ona ui atu i faigata o le oti” (in Daniel H. Ludlow, A Companion to Your Study of the Book of Mormon [1976], 2:248–49).

Alema 13:13–19. Mekisateko, o le Faitaulaga Sili Maoae

  • E maoae se tulaga faaaloalogia o le faitaulaga sili o Mekisateko e le Au Paia o Aso e Gata Ai. Sa faamauina e Alema le taua o Mekisateko ina ua ia fai mai “a ua leai se sili”(Alema13:19). O ai lenei perofeta maoae? O Mekisateko sa soifua mai pe tusa ma le 2000 T.L.M. ma o le faitaulaga sili ma le tupu o Salema (Ierusalema; tagai Kenese 14:18). O ia o se perisitua pulefaamalumalu i ona aso ma le na totogi i ai e Aperaamo ia sefuluai (tagai Kenese 14:20). A o tamaitiiti Mekisateko, “sa mata’u o ia i le Atua, ma taofia gutu o leona, ma tineia le sasao o le afi” (JST, Genesis 14:26). E ui lava e latiiti sina taimi na taua ai o ia i le Tusi Paia, o faaaliga o ona po nei ua faamautu ai o ia o se tagata o le faatuatua maoae. Ona o le amiotonu o Mekisateko, o lana galuega sa fai ma faataimuaga o le galuega a Iesu Keriso ma o lea la na avea ai ma igoa o le perisitua maualuga (tagai Eperu 7:15; MFF 107:2–4).

Alema 13:16.“O Le Malologa o le Alii”

  • O Keriso o loo sapaia se tamai mamoeAlema 13:6, 12–13, 16, 29 o lo o taua ai le “malologa o le Alii” (tagai foi MFF 84:24). Sa taua e Peresitene Iosefa F. Samita (1838–1918) le uiga o lenei fuaitau ina ua ia fai mai: “O le a le uiga o le ulufale atu i le malologa o le Alii? Sa ia saunoa lava mo ia, o le uiga e faapea e auala atu i le alofa o le Atua ua ou tuuina atu ai au ia te Ia, ina ia mafai ai la ona ou lagonaina le malologa ia Keriso, ina ia le mafai ai ona toe faalavelaveina ai e matagi uma lava o mataupu, i le pepelo o tagata, i togafiti leaga ua saunia e faasese ai; ma ua atiina ae au i le malamalama ma le molimau ia Iesu Keriso, ina ia leai se mana na te taitaieseina au mai le auala sao ma le vaapiapi e tau atu i le afioaga o le Atua, e olioli ai i le faaeaga i Lona malo mamalu; e amata mai i lenei taimi e oo atu i le iuga ou te olioli ai i lena malologa seia ou malolo faatasi ma Ia i lagi” (Aoaoga a Peresitene o le Ekalesia: Iosefa F. Samita [1998], 426).

Alema 13:20. O Le a le Uiga o le “Faauigaese” o Tusitusiga Paia?

  • Ua faauigaina e le gagana fefiloi ia le faauigaese o le, “Ia mimilo. … Ia liliuese; o le liliu mai le mea moni po o le mimilo ese mai lona uiga moni … ; taitai seseina” (Noah Webster’s First Edition of an American Dictionary of the English Language, 1828 [1967]). O le mea lea, o i latou o e ua faauigaeseina ia tusitusiga paia ua suia pe liliu le uiga moni ina ia fetaui ma o latou lava manatu faaletagata po o faaliliuga. O i latou o e e faaseseina ia tusitusiga paia e faatupu ai ia finauga ua uunaia e Satani. (tagai Alema 12:1–6; 14:6–7). O le taunuuga o i latou o e e faauigaeseina ia tusitusiga paia o lo latou lava faafanoga (tagai Alema 13:20).

Alema 13:22–26. O Le Moni o Agelu

  • O loo molimau mai le Tusi a Mamona i le moni ma faamoemoega o agelu (tagai Alema 13:22–26; 32:23; 3 Nifae 17:24; Moronae 7:29–31; MFF 20:10). I le ta’ua ai o le moni o agelu, sa saunoa mai Elder Jeffrey R. Holland o le Korama a Aposetolo e Toasefululua:

    “Ua ou talitonu o le tasi o autu loloto o le Tusi a Mamona o le matafaioi ma le auai soo ma le totonugalemu o agelu i tala o le talalelei. …

    “O se tasi o mea o le a avea ma mea e sili atu ona taua i o tatou olaga i le umi lava tatou te ola ai o le moni lea o agelu, o a latou galuega ma a latou auaunaga. Ua le na o le agelu o Moronae ou te faasino i ai, ae faapena foi i agelu e i ai ni galuega sili atu ona patino ia e i ai ma i tatou ma siomia i tatou, ua faamamanaina e fesoasoani ia i tatou ma ē faia tonu lava na mea (tagai 3 Ni. 7:18; Moro. 7:29–32, 37; MFF 107:20). …

    O Le Afio ae o Keriso i le Lagi

    Harry Anderson, © IRI

    “Ou te talitonu e ao ona tatou talanoa e uiga i agelu ma talitonu i ai ma molimau atu i ā latou galuega e sili atu nai lo nisi taimi tatou te talanoa ma molimau ai. Latou te faia se tasi o metotia maoae a le Atua o le molimau mai le veli, ma e leai se faamaumauga i lenei lalolagi atoa o matuai aoaoina manino ma le mamana lena aoaoga faavae nai lo le Tusi a Mamona” (“For a Wise Purpose,” Ensign, Jan. 1996, 16–17).

Alema 13:28.O Le A Le Tofotofoina Outou E “Sili I Mea E Mafai Ona Outou Onosai Ai”

  • Sa aoao mai e Peresitene Polika Iaga e uiga i le taua faifai pea ua tatou faasagatau ai ia Satani ma le agasala: “O alii ma tamaitai, o e e naunau e maua ia nofoa o le malo selesitila, o le a iloa e tatau ona latou tau [ma le fili o le amiotonu uma] i aso uma” (Discourses of Brigham Young, sel. John A. Widtsoe [1954], 392). O i tatou taitoatasi e tatau ona filifili ma le mataalia e aloese ma ia tetee atu i tofotofoga.

    Sa aoao mai Alema e tatau ona tatou “mataala ma tatalo e le aunoa” ina ia aloese mai le tofotofoina “e sili i mea e mafai ona outou onosai ai” (Alema 13:28). Sa folafola mai foi e le Aposetolo o Paulo e faapea “ua faamaoni le Atua, o le na te le tuuina atu outou i le tofotofoga e sili i se mea ua outou lavatia, ae saunia foi faatasi ma le tofotofoga se mea e sao ai, ina ia outou lava oono” (1 Korinito 10:13). E ala i le mulimuli i le fautuaga a Alema i le Alema 13:28, o le a mafai ai pea e i tatou ona tetee atu i tofotofoga.

Alema 14:7–11. O Le Maliu Fasia o e Amiotonu

  • O le mana o le perisitua sa ia umia ma lona faatuatua, sa i ai ia Alema le agavaa e faasaoina ai fafine faatuatua ma tamaiti o Amonaea mai lo latou oti matautia. Ae ui i lea, e lei faatagaina e le Alii o ia e faia lena mea (tagai Alema 14:11). Sa faamanino atu e Alema ia Amoleka e faapea o le a taliaina e le Alii e amiotonu ua maliu fasia ia te Ia lava e fai ma molimau o galuega leaga a i latou o e faaoosala. (tagai Alema 14:11; 60:13).

    A o avea ai ma Fitugafulu, sa faamautu mai ai e Elder Ronald E. Poelman e faapea, e i ai taimi, e faatagaina ai e le Alii ē amiotonu e puapuagatia pe a faatinoina e isi lo latou faitalia i le amioletonu: “O mea faigata i olaga o e usiusitai ma faamaoni, atonu o se iuga o se ma’i, o se manua i se faalavelave, o le le amanaiaina, po o faatosinaga a le fili. Ina ia puipuia le filifiliga saoloto, e i ai foi taimi e faatagaina ai e le Alii ē amiotonu e puapuagatia i taunuuga o amioga leaga e faia e isi (tagai 1 Nifae 18:16)” (i le Conference Report, Ape. 1989, 29; po o leLiahona, Iul. 1989, 28).

  • E mautinoa lava tatou te faanoanoa pe a manatu i le oti o e amiotonu sa puapuagatia i lima o e amioleaga. Ae tatou te olioli i le iloa ai o lo latou taui i le lalolagi o agaga(tagai Alema 40:12) faapea foi ma lo latou taunuuga i le malo selesitila (tagai MFF 76:50–70). Sa faamanatu mai e le Mataupu Faavae ma Feagaiga 42:46 ia i tatou: “O e ua oti ia te au, o le a le tofo i le oti, aua e suamalie ia i latou.” O le uiga o lenei mea e le faapea e leai se tiga i le oti o e amiotonu, ae ona o taui e faavavau mo latou e maoae tele lea e le faatusalia ai o latou tiga.

    Sa faamalamalama mai e Peresitene Iosefa F. Samita e faapea: “E moni ou te vaivai tele ma ou te tagi i le oti o au uo ma aiga. Atonu e maligi ou loimata pe a ou vaaia le faanoanoa o isi. E i ai le tiga alofa i lou agaga mo le fanau a tagata. Ou te tagi ma i latou pe a latou fetagisi; ou te olioli ma i latou pe a latou olioli; ae e leai se mea e ala ai ona ou faavauvau, pe faanoanoa ai ona o le oo mai o le oti i le lalolagi. … O le matau uma ona o lenei oti ua uma ona soloiesea mai le Au Paia o Aso e Gata ai. Ua leai so latou mata’u i le oti faaletino, ona ua latou iloa e pei ona oo mai i o latou luga le oti ona o le agasala a Atamu, o lea la e ala i le amiotonu o Iesu Keriso e oo mai ai le ola ia i latou, ma e ui ina oti i latou, ae o le a toe ola mai. O le mauaina o lenei malamalama, latou te maua ai le olioli e oo i le oti, aua latou te iloa e tatau ona latou toe ola mai ma toe feiloai ai i tala atu o le tuugamau” (in Conference Report, Oct. 1899, 70).

  • Pe a puapuagatia ē amiotonu ma ta’umamaina, o nisi o le a faitio pe le toe faatuatua. Sa tuuina mai e Peresitene Spencer W. Kimball le fautuaga lenei pe a tatou molimauina puapuaga:

    “Afai tatou te vaavaai i le olaga faaletino o le soifuaga atoa lava lea, o tiga, faanoanoaga, toilalo, ma le puupuu o le soifua o le a avea ma mala. Ae afai tatou te vaavaai i le olaga o se mea e faavavau e aapa mamao atu i tua i le muai olaga ma oo atu ai i le lumanai pe a mavae le oti, ona mafai lea ona tuu uma mea na tutupu i se vaaiga tatau.

    Pe le o i ai ea le atamai i lona tuuina mai o tofotofoga ia i tatou ina ia mafai ai ona tatou tutu maualuga atu o na faaosoosoga, o tiutetauave e mafai ona tatou ausia, o galuega e faamalolosia ai o tatou musele, o faanoanoaga e tofotofoina ai o tatou agaga? Pe tatou te le o oo ea i tofotofoga e tofotofoina ai lo tatou malosi, o mai ina ia mafai ai ona tatou aoao ai i le onosai, o le oti ina ia mafai ai ona tatou ola pea ma faamamaluina?

    “Afai e faamaloloina uma e mamai ia o loo tatou tatalo ai, afai e puipuia uma e amiotonu ma faaumatia uma e amioleaga, o le a le faaleaogina le polokalama atoa lava a le Tama ma o le a faamutaina le muai aoaoga faavae o le talalelei, o le filfiliga saoloto. O le a leai se tagata e tatau ona ola i le faatuatua.

    “Afai o le olioli ma le filemu ma taui e le faatuai ona tuuina atu i e e faia le lelei, o le a leai se leaga—o le a faia uma e tagata le lelei ae e le faapea o le sa’o o le faia o le lelei. O le a leai se tofotofoga o le malosi, leai se atinaega o uiga, leai se tuputupu ae o le mana, leai se filifiliga saoloto, ua na o pulega faasatani.

    “Afai e taliina i le taimi nei ia tatalo uma e tusa ma o tatou manaoga manatu faapito ma lo tatou malamalama tapulaa, ona laitiiti lea pe leai foi se puapuaga, faanoanoa, lē fiafia, po o le oti foi, ma pe a na leai foi nei mea, o le a leai foi se olioli, manuia, toetu, po o le ola e faavavau ma le faaleatua” (Faith Precedes the Miracle [1973], 97).

Alema 14:25–28. O Le Faasaoina o Alema ma Amoleka

  • Sa faaaogaina e Elder Richard G. Scott o le Korama a Aposetolo e Toasefululua le tala ia Alema ma Amoleka e faailoa mai ai e laveaiina e le Alii i tatou mai o tatou mafatiaga, ae seiloga lava e uma ona tatou faamaonia lo tatou faatuatua e ala i le faia o Lona finagalo:

    “O le fesoasaoni mai le Alii e mulimuli i taimi uma i le tulafono e faavavau. O lou malamalama lelei i lena tulafono o le faigofie foi lena ona maua o le fesoasoani a le Alii …

    “… Ua tatou maua i faataitaiga a Alema ma Amoleka ni faamalamalamaga. A o malaga atu e faia mea lelei i le nuu o Amonaea, sa pueina faatagataotaua i laua. Sa faalagolago Amoleka i lana soa poto masani o Alema, o le na taitaia o ia ia ona maua le faalagolago malosi i le Alii. Ina ua ia vaai atu i le susunuina o fafine ma fanau i le afi, sa faapea atu Amoleka, ‘Atonu latou te susunuina foi i taua.’ Sa tali atu Alema, ‘Ia faia le finagalo o le Alii’— o se mataupu taua. ‘Peitai … e lei uma la ta’ua galuega; o le mea lea latou te le susunuina ai i ta’ua’[Alema 14:12–13; faaopoopo le faatusilima].

    “Sa oo ina fasia, ma tuu feanu i ai, ma faalaina, fesiligia, ma faapuapuagatia i laua e le faamasino sili ma isi i aso e tele i upu tauemu ma taufaamatau. E ui ina sa faatonuina i laua e tautatala mai, ae sa la onosai lava, sa noanoatia ma le le lavalava, ae sa filemu ma faatalitali ma le onosai i le Alii e musuia i la’ua i le mea e fai. Ona ‘oo mai lea o le mana o le Atua i luga o Alema ma Amoleka, ona la tutulai ai lea.’ Ona alaga atu lea o Alema i le Atua e faapea, ‘Ia e foai mai ia te i maua le mana e tusa ma lo maua faatuatua ua i ai ia Keriso, e oo lava i le laveaiina o i maua. Ona la motusi ai lea o maea sa saisaitia ai i laua’ [Alema 14:26; faaopoopo le faatusilima; tagai fuaiupu 15–26]. Sa oo ina luluina le laueleele; sa vaeluaina aupa o le falepuipui. O i latou uma foi na tatu’ia Alema ma Amoleka sa faaumatia, ma sa faasaolotoina i laua. …

    “… O le a tuuina atu e le Alii le malologa faatasi ma le mana paia pe afai e te sailia le laveaiga i le lotomaualalo ma le faatuatua ia Iesu Keriso” (i le Conference Report, Ape. 1994, 7–8; po o le Liahona, Iul. 1994, 8–9).

Alema 15:2–3. Seseroma

  • O le suia o Seseroma ua faailoa mai ai le alofa o le Atua mo Ana fanau taitoatasi ma faaalia ai Lona naunautaiga e faamagalo i latou e osifeagaiga e mulimuli i Lona Alo. O Seseroma o se loia taufaaoleole i le nuu o Amonaea sa faaaogaina lona tulaga e tuuaia ai ia Alema ma Amoleka ma faaleagaina mea sa lelei. (tagai Alema 10:13, 31; 11:21). Peitai, sa faaalia le taufaasese o Seseroma, ma ua amata ona “tetemu o ia i le iloa o ana agasala” (Alema 12:1, 7). Sa suia o ia mai se tagata faatuiese i se tagata sailiili faamaoni (tagai Alema 12:8). Ina ua taunuu ia Alema ma Amoleka i le nuu o Saitoma, sa laua maua ai ia Seseroma o mafatia i le “atuatuvale tele o lona manatu ona o lana amioleaga” (Alema 15:3). Ae ona o sē ua talitonu ma le salamo, sa faamaloloina ai Seseroma e tusa ma lona faatuatua ia Keriso, sa papatisoina, ma avea ma se failauga mamana e amata mai i lena aso (tagai Alema 15:6–12). O tausaga e mulimuli ane ai sa auauna ai Seseroma i se misiona faatasi ma Alema ma Amoleka i le au sa Soramā (tagai Alema 31:6).

Alema 15:3–5. O Agasala Ua Tigaina ai le Manatu o Seseroma

  • A o salamo ma saili atu mo le faamagaloga, sa tigaina ai le agaga ma le manatu o Seseroma ma “iu ina ma’i tele ai o ia” (Alema 15:3). Sa saunoa Peresitene Boyd K. Packer, o le Peresitene o le Korama a Aposetolo e Toasefululua i le tulaga moni o gasegase faaleagaga lea e mafai ona mafua ai se puapuaga tele:

    “O loo i ai se isi vaega o i tatou e le faitino, ae pei lava lona moni o tatou tino faaletino. O lea la veaga o i tatou e taua o le mafaufau, lagona, o le atamai, o o tatou uiga ma isi lava mau mea. E seasea ona faamatalaina faapea e faaleagaga.

    “Ae o loo i ai seagagai le tagata; o le le amanaiaina o lea agaga o le le amanaiaina foi lena o tulaga moni faaletino. O loo i ai foi tulaga faaletonu faaleagaga, ma o gasegase faaleagaga e mafai ona mafua ai se puapuaga tele lava.

    “O le tino ma le agaga o le tagata ua fusia faatasi. E masani lava i le tele o taimi, pe a i ai ni faaletonu faapea, e matuai faigata lava ona iloa le eseesega o ia faaletonu” (i le Conference Report, Oke. 1977, 89; po o le Liahona, Mat. 1978, 93).

Alema 16:2–3, 9–10. Sa Faataunuuina Uma Upu a Alema

  • Sa faatoga atu Alema ma “atuatuvale tele” mai “totonu” o lona loto mo le nuu o Amonaea ina ia salamo (Alema 13:27). I le avea ai ma o latou perofeta, sa lapatai atu Alema ia i latou ina ia salamo po o le a matuai faaumatia i latou “ai le fogaeleele” (Alema 9:12). Ua folafola mai e le Alii e faataunuuina upu uma lava a ana perofeta (tagai MFF 1:37–38 ). O le Alema 16:2–3, 9–10o loo faamaonia ai le faataunuuga o upu a Alema i le faamaumauina lea o le faatafunaga o i latou na teenaina perofeta ma fasiotia ē le sala.

Manatu e Mafaufau Loloto i ai

  • Sa faapefea ona faailoa atu e alii i le muai olaga ua latou agavaa e muai faauuina e maua le Perisitua Mekisateko? (tagai Alema 13:3–5).

  • Aisea e faatagaina ai e le Alii i nisi taimi e amiotonu e puapuagatia i lima o e amioleaga? (tagai Alema 14:9–11).

  • O le a se mea e fesoasoani ai ia te oe e aoao mai le suiga o Seseroma mai se loia tau faa’ole’ole i se failauga mamana?

Galuega Fautuaina

  • Aisea na fai mai ai Alema i le mea lenei e faatatau ia Mekisateko: “O lenei, e toatele e na muamua ia te ia, ma ua toatele talu o ia, a ua leai se sili; o le mea lea ua sili ona taua ai o ia e i latou”? (Alema 13:19). Ia tali le fesili lenei e ala i le toe suesueina o fuaiupu o loo i lalo e iloa ai le pogai na viia ai e Alema le taua o le misiona a Mekisateko: Alema 13:14–19; Kenese 14:18–20; JST, Genesis 14:25–40; JST, Hebrews 7:3; Mataupu Faavae ma Feagaiga 107:2–4.

  • Ia faaaogaina mau mai le Alema 14 ma mea mai le faamatalaga mo le Alema 14:7–11 (itulau 195), ia tusi se tala puupuu e tali ai fesili o loo i lalo: Aisea e tutupu ai faalavelave i tagata amiotonu? E faapefea e le alofa tunoa o le Atua ma faamasinoga tonu ona aafia ai faalavelave faaletino?