Inisitituti
Mataupu 23: Alema 1–4

Mataupu 23

Alema 1–4

Folasaga

Na feagai Alema le Itiiti ma luitau ogaoga a o avea i le taimi e tasi o se faitaulaga sili o le Ekalesia ma le uluai faamasino sili sa filifilia a sa Nifae (tagai i le Alema 4:18). Na faamata’uina le Ekalesia ma le malo e tagata na saili e faaaoga le lotu ma polokiki e saili ai a latou lava mea. Na faaleagaina e Ne’oa le Ekalesia e ala i le faaaogaina o faitaulaga pepelo e faavaeina ai se gaoioiga faalelotu ma se galuega na faatosinaina ai le toatele (tagai i le Alema 1). O Amiliki, o se tagata foi na pei o Ne’oa, na sii taua atu i le faigamalo fou o faamasino na filifilia ina ua le maua lona manao e avea ma tupu (tagai i le Alema 2–3). Matau le ala na tatalo ai Alema, faaaoga le faatuatua i le Atua, ona galue lea e faatoilalo faafitauli taitasi na feagai ma ia. Mafaufau pe faapefea ona e mulimuli i le faataitaiga a Alema a o e feagai ma ou lava luitau patino.

Faamatalaga

Tusi a Alema

  • I le avea ai ma tagata na tuufaatasia le Tusi a Mamona, na feagai Mamona ma luitau faigata i le filifiliaina po o a mea e faaaofia i faamaumauga ua otootoina. O le mea sili lava na taitaia o ia e ni taiala se lua i ana filifiliga. Muamua, na tau atu e le Alii ia Mamona e “tusia mea ua poloaiina ai e le Atua” (3 Nifae 26:12). Lua, na silafia e Mamona o le a aumaia ana faamaumauga i aso e gata ai mo le faamoemoega o le faapotopotoina o Isaraelu ua faataapeapeina i feagaiga a le Alii (tagai i le Upu a Mamona 1:1–11; 3 Nifae 26:6–12; 29:1–9; 30:1–2). Ua tatou malamalama la, ina ua faia e Mamona ana filifiliga i le faasa’oina o faamaumauga, o nei mafuaaga e lua sa avea ma ona popolega sili.

    E aoga le faatusaina o va o tusi i le Tusi a Mamona ma periota o taimi na aofia ai. O le tele o mea na tusitusia i se vaitaimi puupuu o le talafaasolopito, ua lapataia ai le tagata faitau e faapea, o le taimi o le talafaasolopito o leTusi a Mamona ua i ai i le tusi a Alema ua talafeagai tonu lava ma tatau mo o tatou vaitaimi. Mo nisi faatusatusaga, tagai i le siata “O Itulau o le Tusi a Mamona ma Periota o Taimi” i le faaopoopoga (iutlau 435).

Alema 1:3–4. Na Aoao Mai e Ne’oa “E Tatau Ona Lauiloa se Faiaoga”

  • Na faaaogaina e Ne’oa le taufaasee ma aoaoga faavae sese e faatosina atu ai tagata [ia te ia] ma osofaia ai le ekalesia o le Atua. O ana aoaoga na lauiloa aua na latou faamagaloina agasala i le igoa o le ekalesia. Na ia uunaia le faia o le amioleaga, i le taumafai e tauamiotonuina e faapea “i le iuga e maua e tagata uma le ola faavavau” e tusa lava po o a latou amioga (Alema 1:4).

    Ata
    Ne’oa o loo aoaoina atu mea pepelo

    Jerry Thompson, © IRI

    Na fautuaina i tatou e Elder L. Tom Perry o le Korama a Aposetolo e Toasefululua, ia maua le lototele e teena ai Ne’oa o aso nei ma a latou savali lauiloa: “Sa logolelei i tagata upu a Ne’oa, a o lana mataupu, e ui sa lauiloa i le toatele, a e sa le sa’o. A o feagai i tatou ma filifiliga e tele i le olaga, o savali faigofie ma lauiloa a le lalolagi e masani lava e le o ni savali tonu ia e filifili mai ai, ma e manaomia le lototele e filifili ai le mea tonu” (i le Conference Report, Oke. 1993, 88–89; po o le Liahona, Ian. 1994, 77).

  • I le Alema 1:4 na aoao mai ai Ne’oa e “maua e tagata uma le ola faavavau.” O loo tau mai i le fuaiupu 16 o faitaulaga pepelo na “aoaoina mataupu faavae sese … ina ia mauoa ma faamamaluina.” O se tasi o aoaoga faavae sese e masani ona faalauiloaina e i latou ua tausalaina i le avea ai ma faitaulaga pepelo e faapea “e faaolaina tagata uma i le aso gataaga, ma e le aoga ona latou fefefe ma tetemu” (fuaiupu 4). O se faafitauli tele o faitaulaga pepelo o le leai o se aoaoga o le salamo, “Aua o i latou o lo le faatuatuaga o Ne’oa, ma ua le faamoemoe i le salamo i a latou agasala” (Alema 15:15).

  • Na aoaoina e Elder Dallin H. Oaks o le Korama a Aposetolo e Toasefululua, ia faiaoga o le talalelei e vaai atu i le Faaola ma ia fesoasoani i o latou tamaiti aoga ia faia foi o lea: “O le tulimatai atu i manaoga o [tagata o le vasega’] o le a le faanenefu ai le iloa atu o le Matai e le faiaoga o le talalelei, e ala lea i lona pupunia o le ala po o le faaluafesasia o le lesona mo lona lava lelei po o lona lava fiafia. O le mea lea, e le tatau ai i se faiaoga o le talalelei ona fiafia i faitaulaga pepelo, ‘ua tala’i atu e tagata ma latou faatuina i latou lava e fai ma malamalama i le lalolagi ina ia maua le oloa, atoa ma le viiga o le lalolagi’ (2 Nifae 26:29). O se faiaoga o le talalelei na te le aoao atu ‘ina ia viia i latou’ (Alema 1:3) pe ‘ona o le manao i le oa ma le fia viia’ (Alema 1:16). E mulimuli o ia i le faataitaiga ofoofogia a le Tusi a Mamona ‘ua sili le talai i le faalogologo, ua le sili foi le aoao atu i le aoaoina e ia’ (Alema 1:26). O le a taufai taulai atu e le aunoa i la’ua uma i le Matai” (i le Conference Report, Oke. 1999, 102; po o le Liahona, Ian. 2000, 96).

Alema 1:5–6, 16. Faitaulaga Pepelo

  • Na faamalosia e Ne’oa faitaulaga pepelo ma viiga faaletagata e maua ai ‘oa ma le mamalu. O le faataitaiga a Ne’oa ua faaali mai ai e tatau ona tatou masalomia i latou o e saili viiga faaletagata po o oa mai i a latou talaiga. Na faamalamalama mai e Nifae i se taimi na muamua atu le uiga o le faitaulaga pepelo: “O le faitaulaga pepelo o mea ua latou talai atu i tagata ma latou faatulaga i latou lava mo se malamalama i le lalolagi, ina ia latou maua le faateleina o oa, atoa ma le viiga o le lalolagi; a ua latou le saili mo le manuia o Siona. Faauta, ua faasaina lenei mea e le Atua” (2 Nifae 26:29–30).

  • Na faauigaina foi e Elder David A. Bednar o le Korama a Aposetolo e Toasefululua, ia faitaulaga pepelo mo faiaoga i le Ekalesia: “Soo se mea lava e te faia pe ou te faia foi i le avea ai ma faiaoga e faia ai ma le iloa ma faatosina atu ma le mautinoa le mafaufau ia te oe lava—i savali tatou te tuuina atu, i metotia tatou te faaaogaina, po o o tatou uiga patino—o se ituaiga faitaulaga pepelo lea e taofia le mataalia o aoaoga o le Agaga Paia. ‘E talai atu ea i le Agaga o le upu moni po o se isi ala? Afai foi ua faia i se isi ala e le mai le Atua ia’ (MFF 50:17–18)” (“Saili le Aoao Atu e ala i le Faatuatua” [o se faasauga ma Elder David A. Bednar, Fep. 3, 2006, 4, www.ldsces.org).

Alema 1:7–9. O Kiteona “Na avea ma se Tufugaaao o le Atua”

  • Fai mai le tala o Kiteona “na avea ma tufugaaao o le Atua” (Alema 1:8). I le avea ai ma se tasi o tagata sa nofo i le nuu o Nifae, na ia teena le taitaiga amioleaga a le Tupu o Noa (tagai i le Mosaea 19:4). Mulimuli ane, na avea Kiteona ma “taitai au a le tupu” i le nofoaiga a Limae ma sa ia faia se sao taua i le faasaoina o tagata ma fesoasoani ia i latou e sosola atu i Saraemila (tagai i le Mosaea 20:17; 22:3–9). O le taimi lava na taunuu ai i Saraemila, sa ia ausia tulaga faatauaina maualuga sa faatulagaina ia avea ai ma se faiaoga i le Ekalesia (tagai i le Mosaea 23:14). Ina ua feagai ma aoaoga sese a Ne’oa, sa apoapoaiina e Kiteona ia Ne’oa i “afioga a le Atua” (Alema 1:7). O se taunuuga, na fasiotia ai Kiteona ona o le puipuia o le faatuatua. O lenei taitai au, faiaoga, ma o lē na maliufasia sa matua faaaloalogia e tagata, o lea na latou faaigoaina ai se vanu ma se aai e faamamaluina ai o ia (tagai i le Alema 2:20; 6:7).

Alema 1: 13–15. O Le a le Oti Maasiasi?

  • Sa fasiotia Ne’oa ona o lona fasiotia o Kiteona. Fai mai le mau “ua tigaina o ia i le oti maasiasi” (Alema 1:15), o lona uiga “sa matuai faalumaina; faitioina; tauvalea” (Noah Webster’s First Edition of an American Dictionary of the English Language, 1828 [1967]).

Alema 1:17–18. Faasalaina i le Oti

  • O le tulafono a le Atua o le “O se na te faamaligiina le toto o le tagata, e faamaligiina lona lava toto e le tagata” (Kenese 9:6). I le 1889 na saunia ai e le Au Peresitene Sili ma le Korama a Aposetolo e Toasefululua se folafolaga e faatatau i le tulaga o le Ekalesia i faasalaga i le oti:

    “Matou te faia ma le agaga maualalo lenei folafolaga, e faapea.:

    “E vaai le Ekalesia lenei ma le inoino tele i le faamaligi o le toto o tagata. Ua tatou avea le fasiotia o tagata soifua, sei vagana ai ua tusa ai ma le tulafono a le malo, o se solitulafono matuai ogaoga e tatau ona faasalaina i le faamaligiina o le toto o le tagata solitulafono, pe a maea se faamasinoga faalauaitele i luma o se fale faamasino faaletulafono a le atunuu. …

    “O faaaliga a le Atua i lenei Ekalesia ua avea ai le maliu ma faasalaga mo le solitulafono o le fasioti tagata, ma o se mea tatau le aveina atu o e solitulafono e faatatau i le ola ma meatotino e faamasinoina i le tulafono a le atunuu” (“Official Declaration,” Millennial Star, Ian. 20, 1890, 33–34).

Alema 1:19–20, 25. Onosaia o Sauaga

  • O i latou o e mulimuli i aoaoga a Iesu Keriso e feagai i taimi uma ma sauaga. Na apoapoai mai Peresitene Harold B. Lee (1899–1973) ia i latou o e ua sauaina ina ia aua nei faatagaina o latou tofotofoga e taofia ai lo latou alualu i luma faaleagaga pe taofia ai lo latou naunautai i le amiotonu:

    “O le sauaina mo le amiotonu i se mafuaaga maoae lea o loo lamatia ai le upu moni ma le amio mama ma le faamamaluina, o se uiga faaleatua. … O le tulaga matautia sili e ono oo mai i sauaga e le mai sauaga lava ia, ae e mai aafiaga e ono i ai i le tagata ua sauaina o lē e ono faavaivai i lo latou naunau mo le amiotonu o o latou faamoemoega. O le tele o lena sauaga e oo mai ona o le le lava o le malamalama, ona ua lilifa atu tagata e tetee atu i mea latou te lei malamalama i ai. O nisi o ia mea e oo mai mai tagata ua faamoemoe i le tiapolo. Ae po o le a lava le pogai, e foliga mai ua matuai taatele sauaga e faatatau ia i latou o loo galulue i se faapogai amiotonu. …

    “… Afai e te tu mausali mo le mea sao e tusa lava po o a taufaifaiga a tagata pe oo lava i sauaga faaletino, o le a faapaleina oe i le paia o le olioli e faavavau. O ai na iloa pe toe manaomia i o tatou aso nisi o le au paia e oo lava i aposetolo, e pei o aso anamua, e foai atu o latou soifua i le puipuiga o le upu moni? Afai e oo mai lena taimi, ia alofa le Atua ia latou le toilalo lava!” (Decisions for Successful Living [1973], 61–62).

Alema 1:26. “Na Tuua e Faitaulaga a Latou Galuega Ina ia Ta’u Atu le Afioga a le Atua”

  • I le Alema 1, matau le faatusaga e Mamona o le va o le faamaualuga o Ne’oa ma faitaulaga lotomaualalo mai le ekalesia a le Atua. Na ofuina e Ne’oa ni “teuga tautele,” na talai atu “mo le manao i oloa,” ma na faafefeteina i le faamaualuga o lona loto, i le talitonu o ia ua sili atu i isi (tagai i le Alema 1:5–6, 16). I le isi itu, o faitaulaga moni latou te lei laeiina ni teuga tautele, sa aoao atu ona o se manao ia vaai atu ua agai i luma isi e aunoa ma se toe totogiina i tupe, sa galulue i o latou lava lima e tausi ai i latou lava, ma sa lei manatu ua sili atu i latou nai lo o latou tagata faalogologo (tagai i le Alema 1:26–27; tagai foi i leMosaea 18:24; 27:5). I le Tusi a Mamona atoa na i ai ni vaega eseese o tagata liliuese na faaaogaina aoaoga po o faatulagaga a Ne’oa (tagai i leAlema 1:16; 16:1–12). O lenei faatulagaga na faaeaina ai o latou taitai faaleagaga i le faia o se tulaga na faavasegaina ai faitaulaga aupito lelei ma tulaga masani i tagata. O nei tagata na tofia e i latou lava e faapea ua lelei, sa masani ona latou faatigainaina tagata e le’i aoaoina ma faasalaina tagata matitiva (tagai i le Mosaea 11:3–6; 23:39; 24:8–9; Alema 31:23–32:5). I le faatusatusaga, ua aoao mai le Alema 1:26 o le auala a le Alii o le valaauina lea o ni taitai perisitua e galulue i le talaiga ae le totogia.

Alema 1:26–31. Na Faatulagaina Mataupu a le Ekalesia

  • Na faamalamalama mai e Peresitene James E. Faust (1920–2007) o le Au Peresitene Sili, o le faavaeina o le Ekalesia a le Alii e sili atu mea e manaomia ai nai lo le faatinoina o papatisoga:

    “Matou te faailoa atu o le faagasologa o le faavaeina o le ekalesia a le Alii e aofia ai le anoanoai o mea nai lo le papatisoina o tagata. I le mataupu muamua a Alema i le Tusi a Mamona, tatou te maua ai se faasologa aoga o mea na tutupu o loo faailoaina ai le ala ua faavaeina ai le ekalesia a le Alii. …

    “Ia tatou matauina lenei faagasologa:

    “Muamua, e aoaoina mataupu faavae [tagai i le Alema 1:26].

    “Lua, na faatauaina e tagata o le ekalesia ia isi tagata e pei lava o i latou (tagai i le fuaiupu 26).

    “Tolu, na latou galulue uma; na latou galulue ma ausia mea na latou mauaina (tagai i le fuaiupu 26).

    “Fa, na latou foai atu a latou mea i e le tagolima; ua latou auauna le tasi i le isi (tagai i le fuaiupu 27).

    “Lima, ua latou pulea o latou lava manaoga ae i le taimi lava foi lea, o loo taulima lelei ai o latou foi manaoga (tagai i le fuaiupu 27). …

    “Na tupu lenei suiga maoae, e le faapea ona sa foai atu i tagata ni mea, ae ona sa aoaoina i latou ma na amata ona fesoasoani ia i latou lava ma agalelei ia i latou o e na iti o latou manuia. Ana latou le foai atu i latou lava i le ala a le Alii, e le amata ona faaleleia o latou tulaga.

    “O lenei faagasologa o le faavaeina o le Ekalesia e mafai ona faaaoga i soo se atunuu lava” (i le Conference Report, Oke. 1979, 133–34; po o le Ensign, Nov. 1979, 91).

Alema 1:27. Laei ma Foliga Vaaia

  • Ua faafia ona lapatai mai le Tusi a Mamona e faatatau i agasala o le faamaualuga ma le faavasegaina o tagata e tusa ma mea ua latou maua, lea e faaalia pe a amata ona oofu tagata i “teuga tautele” (Alema 1:6). Ua uma ona fautuaina tagata o le Ekalesia a le Alii ia aloese mai le soona faia o lavalava po o teuga. E tatau foi ona latou aloese mai le matele i teuga taugata (tagai i le MFF 42:40). E ui i lea, e tatau i soo o Keriso ona “teua i latou ma le onomea” (Alema 1:27).

    Ata
    O le autalavou matutua i laei talafeagai

    O loo ta’u mai i le tamaitusi o le Mo Le Malosi o le Autalavoue faapea: “A fai faalelei au teuga [tumama, ma teu faalelei lou ulu ma ‘oti faalelei pe afai o se tama, ma sele le ‘ava] ma fai faalelei ou ofu e tausaafia ai, ua e valaaulia le mafutaga mai a le Agaga. … E ao ona tumama e le aunoa, ma aloese foi mai le faainaelo po o le manatu faasamasamanoa i ofu, o teuga, ma amioga. Ia fesili ifo ia te oe lava, ‘Faamata ou te maua le lagona toafimalie lelei i o’u foliga vaaia pe a na fai o loo ou i ai i le afioaga o le Alii?’” ([2001], 15–16).

Alema 2:4–6. O Le Filifiliga a le Nuu

  • O taumafaiga a Amiliki e aveese aia tatau ma avanoa o tagata mo tapuaiga faalelotu na faatoilaloina e ala i le filifiliga a le nuu. Mafaufau i le taunuuga pe ana le palota tagata amiotonu o sa Nifae i aso o Amiliki. I malo faatemokarasi i o tatou aso, ua i ai i tagata uma o le Au Paia o Aso e Gata Ai se tiute paia e palota ai ma faatosinaina lona nuu mo le lelei e ala i le faatumauina ona i ai o ni taitai ma ni tulafono faamaoni, atamai, lelei, ma faamamaluina (tagai i le MFF 98:10).

  • Na faamalosiau mai Elder M. Russell Ballard o le Korama a Aposetolo e Toasefululua, ia sii ae o tatou leo e faasagatau atu i faiga amioleaga i o tatou aso: “E moomia ona tatou manatuaina le saunoaga a Edmund Burke: ‘E na o le pau le mea e moomia e le tiapolo ina ia manumalo ai o le leai lea o se mea e faia e tagata lelei.’ E tatau ona sii ae o tatou leo faatasi ma isi tagatanuu popole i le lalolagi atoa i le tetee atu i nei faiga ua fotu mai. E moomia ona tatou tau atu ia i latou o e o loo lagolagoina nei ala o faasalalauga mataga ua lava nei mea ua i ai. E moomia ona tatou lagolagoina ia polokalama ma oloa e lelei ma musuia. O le auai faatasi ma tuaoi ma uo o e tutusa o tatou atugaluga, e mafai ai ona tatou auina atu se savali manino ia i latou o loo nafa ai. E maua o latou tuatusi i le Initoneti faapea a latou paaga o loo latou faifai mea faatasi. O tusi ma i-meli e sili atu lona aafiaga nai lo le mea ua silafia e le toatele o tagata” (i le Conference Report, Oke. 2003, 17; po o le Liahona, Nov. 2003, 18).

Alema 2:28–31. Na Faamalolosia Alema ma sa Nifae e le Atua

  • I se taimi na muamua atu sa folafola mai e le Alii ia sa Nifae o le a Ia fesoasoani ia i latou mai ia sa Lamana pe afai latou te amiotonu (tagai i le 2 Nifae 5:25). Na iu lava, i le taimi sa sili ona pagatia ai, na valaau atu sa Nifae i le Atua ma na “faamalolosia i latou i aao o le Atua” (Alema 2:28). A o i ai i lea lava taua e tasi, na “faamalosia” e le Atua ia Alema i le malosi e faatoilalo ai ona fili, i le tali atu i lona faatuatua (tagai i le Alema 2:30–31).

Alema 3:4. Na Faailogaina e sa Amiliki o Latou Tino

  • O sa Amiliki na “faailogaina i latou lava i faailoga mumu i o latou muaulu” ina ia iloa ai i latou mai sa Nifae (Alema 3:4, 18). I o tatou taimi, na apoapoai mai Peresitene Gordon B. Hinckley (1910–2008) i alii ma tamaitai talavou ia latou tausia o latou tino i le paia e ala lea i le le faailogaina o i latou lava i pe’a:

    “Ia ua o’o mai nei i sitaili o le tataina o pe’a i tino. Ou te le malamalama pe aisea, o le a manao ai se alii talavou—po o se tamaitai talavou, mo lena mea—o se faiga e tiga e faamataga ai fua le pa’u i ata lanueseese o tagata, o manu, ma isi faailoga. Ae le faapena ia pe’a, e tumau lona faiga, sei vagana ua i ai se isi auala taugata ma le tiga e aveese ai. Tama, ia lapatai o outou atalii mai le tataina o ni pe’a. Atonu latou te teena lau tautalaga i le taimi nei, ae o le a o’o mai le taimi latou te faafetai atu ai ia te oe. O se pe’a o se tusitusiga lea i luga o le malumalu o le tino.

    “E faapena foi le tatui o le tino mo ni mama se tele i taliga, o le isu, e o’o lava i le laulaufaiva. Mata e mafai ona latou manatu ua matagofie lenei mea? … Ua tautino atu e le Au Peresitene Sili ma le Korama a le Toasefululua matou te le fautuaina le taina o ni pe’a, faapea foi ‘le tatui o le tino sei vagana togafitiga faafomai.’ Peitai, matou te le aia ‘i le tuiina o se pu se tasi o taliga o tamaitai mo se pea tautaliga’—se tasi” (i le Conference Report, Oke. 2000, 70–71; po o le Liahona, Ian. 2001, 67).

Alema 3:5. Na Suia e sa Amiliki o Latou Foliga Vaaia ina ia Mulimuli ai i sa Lamana

  • Na suia e sa Amiliki o latou foliga vaaia ina ia pei ai o sa Lamana. E toatele le Au Paia o Aso e Gata Ai i le aso ua latou lagona le malosi o le faatosinaga e mulimuli atu i le faiga o sitaili o laei o le lalolagi. O le soona fai o sitaili i laei ma foliga vaaia ua avea ma mea ua iloagofie ai tagata le usiusitai mai i soo o Iesu Keriso. O i latou o e mulimuli i nei faiga faalelalolagi ua “le usiusitai i le perofeta ae ua mulimuli atu i sitaili a le lalolagi” (tagai i le “Questions and Answers,” New Era, Mat. 2006, 14; Mo Le Malosi o le Autalavou, 14–16).

  • Na aoao mai e Elder M. Russell Ballard ia alii talavou o e o loo umia le perisitua paia e faapea, o sitaili faalelalolagi i laei ma foliga vaaia o le a tuliesea ai le Agaga o le Alii:

    “O loo i ai se lala o se faalapotopotoga latou te faafiafiaina a latou keni ma a latou amioga faasolitulafono i musika, o ituaiga o lavalava, gagana, uiga faaalia, ma amioga. E toatele outou ua matauina uo faatosina, ua latou faia sitaili o se ‘tifiga’ ma faapea e ‘manaia,’ ae iu ina tosina atu ai i le lala o lea faalapotopotoga ona ua uiga faatasi ma vaega fai keni. …

    “… Ou te le talitonu, e mafai e oe ma a’u ona tutu atu mo le upumoni ma le amiotonu, a o ofuina se isi mea e le tatau ai i se tasi e umia le perisitua a le Atua” (i le Conference Report, Oke. 1997, 51–53; po o le Liahona, Ian. 1998, 43–44).

Alema 3:26–27. “E Maua e Tagata Uma Taitoatasi Le Taui Mai Le Na Loto O Ia e Usiusitai i ai”

  • O le fuaitau “e maua e tagata uma taitoatasi le taui mai le na loto o ia ina usiusitai i ai” o loo valaaulia ai i se ala faafaatusa le tagata faitau e mafaufau ia te ia lava o se tagata faigaluega o lana filifiliga e iloa ai po o ai lona pule po o le Atua po o Satani (tagai i le Alema 3:27). I lenei tulaga, o le upu loto ua faatatau i le lilifa atu po o le faalagolago atu i le tasi itu po o le isi. O lea la, o i latou o e lilifa atu pe faalagolago atu ia Satani o le a vave ona iloa ua faafaigaluegaina i latou e ia ma maua ai le “malaia e faavavau” (Alema 3:26).

    I le iuga, o filifiliga o le olaga o le a faaalia ai po o ai na filifilia e lena tagata e avea ma pule ia te ia e faavavau. Na aoao mai e Peresitene Boyd K. Packer, o le Peresitene o le Korama a Aposetolo e Toasefululua, lenei upu moni ina ua ia folafola mai: “O o tatou olaga ua fausia lea i faitau afe o filifiliga e fai i aso uma. A mavae le tele o tausaga o le a faaputu faatasi ai nei filifiliga laiti ma faaalia manino mai ai le mea tatou te faatauaina” (i le Conference Report, Oke. 1980, 29; po o le Liahona, Ape. 1981, 41).

Alema 4:9–12. “O Se Maagao Tele”

  • A faamaualuluga tagata o le Ekalesia, e avea a latou faataitaiga le lelei ma maagao ia i latou e le i auai i le Ekalesia (tagai Alema 4:9–12; 39:11). Na faamatalaina e Peresitene Gordon B. Hinckley le tala i se alii talavou na feagai ma ni mea le lelei e aoao ai e uiga i le talalelei ona o le auala na faia ai o ia e tagata o le Ekalesia:

    “E le auai o ia i le Ekalesia. Sa toaaga o ia ma ona matua i se tasi tapuaiga.

    “Sa ia fai mai a o tuputupu a’e o ia sa i ai nisi o ana uo o le AAG sa faatauemu ia te ia, latou te faaesea o ia ma taufaalili ia te ia.

    “Na oo ai ina inoino i lenei Ekalesia ma ona tagata. E leai se mea lelei na ia iloa atu ia i latou.

    “Ona le toe faigaluega lea o lona tama ma sa latou siitia ese ai. I le nofoaga fou, sa mafai ai i le 17 o tausaga ona aoga i le kolisi. O iina, mo le uluai taimi, sa ia lagonaina ai le mafanafana o uo, o se tasi o i latou sa igoa ia Lisati, sa fai atu ia te ia ina ia auai i se kalapu o loo ia peresitene ai. Na ia tusia:

    “‘O le taimi muamua lenei i lo’u olaga ua manao ai se tasi matou te mafuta. Sa ou le iloa sa’u taga a fai, ae sa ou auai ma le faafetai. … O se lagona sa ou fiafia i ai, o le lagona o le i ai o se uo. Sa ou tatalo mo se uo faapea i lo’u olaga atoa. Ma ina ua mavae tausaga e 17 sa faatalitali ai, sa tali mai le Atua i lena tatalo.’

    “I le 19 o tausaga sa ia iloaina ai la te faleie faatasi ma Lisati i le taimi o le latou galuega i le taumafanafana. Sa ia matauina le faitauina e Lisati o se tusi i po uma. Sa ia fesili i ai po o le a lana mea o loo faitau. Sa ta’u atu ia te ia o loo ia faitauina le Tusi a Mamona. Fai mai o ia:

    “‘Sa vave lava ona ou suia le mataupu ma ou moe loa. Mai mea uma lava, o le tusi lena na faaleagaina ai lo’u olaga i lo’u laitiiti. Sa ou taumafai e faagalo, ae ina ua mavae se vaiaso sa le mafai ona ou moe. Aisea na te faitauina ai i po uma? Sa le pine ae ua le mafai ona ou tatalia ia fesili e leai ni tali i totonu o lo’u ulu. I se tasi la po sa ou fesili atu ai ia te ia po o le a se mea taua o i ai i totonu? … Sa amata ona ia faitauina i le mea sa ia gata ai. Sa ia faitau e uiga ia Iesu, ma lona faaali atu i Amerika. Sa ou te’i. Ou te lei manatu e talitonu Mamona ia Iesu.’ …

    “I se isi faatasiga mulimuli ane sa faimalaga atu ai lenei alii talavou ma lana uo. Sa tuu atu e Lisati ia te ia se Tusi a Mamona ma fai atu i ai na te faitauina leotele. Sa ia faia, ma e lei umi ae pa’i atu le musumusuga a le Agaga Paia ia te ia.

    “Ua mavae atu aso ma ua faatupulaia lona faatuatua. Sa malie o ia e papatiso. …

    “O le iuga lena o le tala, ae e tele ni faaupuga o loo i ai i lena tala. O le isi, o tulaga maasiasi sa faia ia te ia e ana uo talavou Mamona.

    “O le isi, o le tulaga na faia ia te ia e lana uo fou na maua, o Lisati. Sa matuai faafeagai lava mai lona aafiaga muamua. Na o’o atu ai i lona liuaina ma le papatisoga e ui sa foliga mai e le taunuu” (i le Conference Report, Ape. 2006, 62–63; po o le Liahona, Me 2006, 59–60).

Alema 4:14. Faatumauina se Faamagaloga o Agasala

  • E le gata ina aoao mai e le Tusi a Mamona e ala i le Togiola a Iesu Keriso, e mafai foi ona e maua ai le faamagaloga o agasala, ae o loo aoao mai foi e tatau ona faatumauina se faamagaloga o au agasala (tagai i le Alema 4:14; ma le Mosaea 4:11). Na aoao mai e Peresitene Marion G. Romney (1897–1988) o le Au Peresitene Sili, o le faamaoni i a tatou feagaiga ma le agalelei i isi o le a mafai ona faatumauina ai le faamagaloga o a tatou agasala: “E i ai ea se masalosaloga o le faatumauina o le faamagaloina o a tatou agasala e faalagolago i le tausia lea e le tasi o le isi? Afai tatou te talitonu i nei aoaoga, pe afai tatou te tautino atu e mulimuli i le Faaola ma ana perofeta, pe afai tatou te mananao ina ia faamaoni ia tatou feagaiga ma maua le Agaga o le Alii i o tatou olaga, ona tatau lea ona tatou faia mea ua fetalai mai ma na faia foi e le Faaola” (i le Conference Report, Oke. 1980, 136; po o le Liahona, Ape. 1981, 177).

Alema 4:19. Tuuina Atu o Molimau Mama

  • Ina ia toe maua mai tagata, na silafia e Alema “ona ua aoga tele le talaiga o le upu i le taitaiina o le nuu e fai mea tonu; —e moni, sa sili ona aoga i manatu o le nuu nai lo le pelu, po o se tasi mea ua oo atu ia te i latou” (Alema 31:5). Na faamamafaina mai e Peresitene Gordon B. Hinckley le manaomia ona faafofoga le lalolagi i molimau mama:

    “Tou te silafia na tuua e Alema le nofoa faamasino ina ia maua ai sona taimi ma se malosi mo se galuega sili atu: [Alema 4:19]

    “O le pogai lava lea e tasi, o loo manaomia ai e le lalolagi i aso nei le mana o le molimau paia. Ua ia manaomia le talalelei a Iesu Keriso, ma afai e ao i le lalolagi ona faalogo i lena talalelei, e tatau ona i ai ni avefeau latou te aoaoina atu” (“Galuega Auauna Atu Faafaifeautalai,” Liahona, Mat. 1988, 2).

  • Na fautuaina e Elder M. Russell Ballard ia le Au Paia o Aso e Gata Ai ia faasoa atu ni molimau mama atoatoa:

    “O le molimau e faigofie ona faaupu,—molimau moni lava, e tuuina mai i le Agaga ma faamaonia e le Agaga Paia—e suia ai olaga. E suia ai le auala e te mafaufau ai ma mea e te fai. E suia ai mea e te tautala ai. E aafia ai faamuamua uma lava e te faatuina, ma faaiuga uma foi e te faia. …

    “O lo’u aafiaga i le Ekalesia ua oo ai ina ou popole ona o le tele naua o molimau a o tatou tagata, o loo tumau lava i le ‘Ou te faafetai’ ma le ‘Ou te alofa,’ ae e toaitiiti o loo mafai ona faapea mai ma le lotomaualalo, ae manino ma faamaoni, ‘Ou te iloa.’ O le taunuuga, o nisi taimi e le maua i a tatou sauniga le faavae o ‘oa faaleagaga o le molimau lea e faaosofia ai le agaga, ma maua ai le aafiaga ‘anoa lelei i olaga o i latou e faafofoga i ai.

    “Ua tatau ona saga taulai atu a tatou sauniga molimau i le Faaola, o aoaoga faavae o le talalelei, o faamanuiaga o le Toefuataiga, ma aoaoga a tusitusiga paia. Ua tatau ona sui a tatou tala faaleaiga, o faamatalaga o ni malaga, ma lauga i molimau mama atoatoa. …

    “… O le tuuina atu o se molimau, o le ‘molimau atu lea e ala i le mana o le Agaga paia; ia tuuina atu se tautinoga paia o le upumoni e faavae i le malamalama po o le talitonuga patino’ (Guide to the Scriptures, “Tautino Atu”). O le tautinoga manino o le upumoni, e maua ai se eseesega i olaga o tagata. O le mea lena e suia ai le loto. O le mea lena e mafai e le Agaga Paia ona faamaonia i loto o fanau a le Atua.

    “E ui ina mafai ona tele mea e mafai ona tatou molimau ai, o ni tagata o le Ekalesia, ae e i ai lava upu moni faavae e tatau ona aoao atu ai e le tasi le isi ma fetufaai ma i latou e le auai i lo tatou faatuatuaga. Molimau atu o le Atua o lo tatou Tama, ma o Iesu o le Keriso. O le autu o le ata o le faaolataga o le Togiola a le Faaola. Na toefuatai mai e Iosefa Samita le atoaga o le talalelei faavavau a Iesu Keriso, ma o le Tusi a Mamona o le faamaoniga lea e moni la tatou molimau” (i le Conference Report, Oke. 2004, 42–43; po o le Liahona, Nov. 2004, 40–42).

  • Na ofoina mai e Peresitene Howard W. Hunter (1907–1995) se lapataiga e faatatau i faalogoga i molimau:

    “Sei ou tuuina atu se upu o le lapataiga i lenei mataupu. … Ou te popole pe a foliga mai o lagona ootia malolosi po o le maligi faasoloatoa o loimata ua tusa lea ma le i ai o le Agaga [i se molimau]. E moni lava e mafai e le Agaga o le Alii ona aumaia ni lagona ootia malolosi, e aofia ai loimata, ae o lena faailoaina i le itu i fafo e le tatau ona fenumiaia ma le afio ai o le Agaga lava ia.

    “Ua ou vaai i le toatele o ou uso i le tele o tausaga ma na matou fefaasoaai faatasi i nisi o aafiaga faaleagaga e seāseā tutupu ma e le mafaamatalaina. O na aafiaga na eseese uma lava, e taitasi ma faapitoa i lona lava uiga, ma o na taimi paia e i ai po o le leai foi se loimata maligi e o mai faatasi ai. E seasea ona i ai, ae o nisi taimi e o mai faatasi ai ma se lagona filemu atoa” (“Eternal Investments” [o se faasauga ma Peresitene Howard W. Hunter, Fep. 10, 1989], 3, www.ldsces.org).

Manatu e Mafaufau Loloto i ai

  • Aisea e te manatu ai ua lapatai mai pea lava pea le Tusi a Mamona ia aloese mai le faia o “teuga taugata” (Alema 1:6, 27, 32) ma le taulai atu i mea o le lalolagi? O a nisi o sitaili, teuga, po o tifiga o loo i ai nei e tatau ona aloese ai tagata o le Au Paia o Aso e Gata Ai?

  • E mafai faapefea ona e faaaogaina lou leo e puipuia ai tulaga faatonuina, aia tatau, ma avanoa o le Ekalesia i le aso?

Galuega Fautuaina

  • Faitau le Alema 1–4, faailoga fuaiupu uma o loo faatatau i oa, laei taugata, ma mea le aoga o le lalolagi. Matau le aafiaga na i ai i le faaalia o oa i le amiotonu o tagata o le Ekalesia. Tusi se lauga e tolu pe lima minute i mataupu faavae lea e mafai ona mulimuli ai tagata o le Ekalesia, e taofia ai i latou mai le oo i ni taunuuga le lelei faaleagaga ona o mea o le lalolagi.

  • Faatusatusa le Alema 1:3–6, 16–20 i le Alema 31:12–29 ma fai se lisi o mea e tutusa ai. Aisea na manaia ai i le toatele o tagata ia aoaoga a Ne’oa ma le talitonuga a le tagata sa Sorama na liliuese?

  • I le vevesi o le taua, na tagi atu ai Alema i le Atua mo se fesoasoani (tagai Alema 2:30). I le tali mai i le faatuatua o Alema, na “faamalosia” o ia e le Atua i le malosi e mafai ai ona faatoilaloina ona fili (Alema 2:31). Saili ia le itiiti ifo ma le lua nisi aafiaga i le Tusi a Mamona lea na faamalosia ai e le Atua isi tagata. Mafaufau i se taimi na faamalosia ai oe e le Alii, ma tusi lena aafiaga i lau api o talaaga, pe afai e te lei tusia e uiga i ai.

Lolomi