Mataupu 41

3 Nifae 12–14

Folasaga

I Lana galuega faaletino na tuuina atu ai e Iesu le Lauga i luga o le Mauga e faamalosiau ai i Ona soo e taumafai i luma i le atoatoa ma se faamoemoega atoa o le loto. Mulimuli ane i Lona Toetu, na faaali Iesu i tagata o le Tusi a Mamona i le Itulagi i Sisifo ma na toe tuuina atu ai lenei lauga.

O tulaga faatonuina o le talalelei o loo maua i lenei lauga ua toe faamautinoa mai i o tatou taimi e ala i faaaliga i nei aso. Na matauina e Peresitene James E. Faust (1920–2007) o le Au Peresitene Sili e faapea: “O le savali maoae a le Faaola i totonu o le Lauga i luga o le Mauga o se laau talatala mumu lona taua ia i tatou uma: ‘Ae ia outou muai saili e fausia le malo o le Atua, ma faatuina lana amiotonu’ [Faaliliuga a Iosefa Samita, Mataio 6:38; tagai foi i le Mataio 6:33]. O lenei savali e moomia ona ati i totonu o o tatou loto ma agaga. A o tatou taliaina lenei savali, ua tatou fuafua ai po o le a le mea o le a tatou lagolagoina ma puipuia i lenei olaga” (i le Conference Report, Ape. 2004, 68; po o le Liahona, Me 2004, 67).

E ala i lou suesue i nei mataupu faavae paia i le Tusi a Mamona, o le a e maua se malamalamaaga o le a fesoasoani e te tumau faamaoni ai i luga o le auala i le atoatoa.

Faamatalaga

3 Nifae 12–14. O Se Faatulagaga mo o Tatou Olaga

• O le Lauga i luga o le Mauga e pei ona i ai i le Tusi Paia ma le Tusi a Mamona o le faatulagaga lea a le Alii mo le faaatoatoaina. O lenei lauga, na saunoa Peresitene Harold B. Lee (1899–1973) e faapea: “E le na o le afio mai o Keriso i le lalolagi ina ia togiola mo agasala a tagata ae ia faataatia se faataitaiga i luma o le lalolagi o tulaga faatonuina o le atoatoa o le tulafono a le Atua ma le usiusitai i le Tama. I lana Lauga i luga o le Mauga na tuu mai e le Matai ia i tatou se faaaliga o ona uiga, lea e atoatoa, atonu o le a mafai ona faapea ‘o se talaaga o le olaga, o faaupuga taitasi na ia tusia i lalo o mea na ia faia,’ ma i le faia ai o lea mea ua tuu mai ai ia i tatou se faatulagaga o o tatou lava olaga” (Decisions for Successful Living [1973], 55–56).

3 Nifae 12:1–2. Tuu Atu le Talitonu i Aposetolo

• Na amata e le Faaola Lana Lauga i sa Nifae e ala i le valaauina ia gauai i le taua o le mulimuli i aposetolo sa Nifae e toasefululua, o e na Ia valaauina ma tuuina atu i ai le mana ma le pule. O faaaliga o nei ona po ua faamamafaina ai foi le saogalemu ma faamanuiaga e oo mai pe a mulimuli i auauna filifilia a le Alii (tagai i le MFF 1:38; 21:6). Na faamalamalama e Elder Jeffrey R. Holland o le Korama a Aposetolo e Toasefululua le pogai e matua taua ai lo tatou mulimuli i le Au Peresitene Sili ma le Korama a Aposetolo e Toasefululua o nei aso:

  

  Jerry Thompson, © IRI

  “O le faavae o le tofi faaaposetolo ma le faaperofeta o le Ekalesia o le faamanuia lea i taimi uma, aemaise lava i taimi faigata po o tulaga matautia, o taimi atonu tatou te lagonaina ai le pei o ni tamaiti, o le fenumiai po o le le mautonu, atonu o sina fefe, o taimi o uiga le taupulea o tagata po o le le taupulea o le tiapolo o le a taumafai e faafenumiai po o le faasese po o le taitaisese. I le saunia mo taimi faapea pe a oo mai i o tatou vaitaimi, ua tofia le Au Peresitene Sili ma le Korama a le Toasefululua e le Atua ma outou lagolagoina e avea ma perofeta, tagatavaai ma tali faaaliga. …

  “… O se faavae faapea ia Keriso o le a avea pea ma puipuiga. … I aso faapea e pei ona tatou i ai nei—ma o le a tele pe itiiti ifo foi—o afa o le olaga ‘e le malo ai ia te oulua …’ [Helamana 5:12]” (i le Conference Report, Oke. 2004, 5; po o le Liahona, Nov. 2004, 7).

  3 Nifae 12:1–2

  Faatusatusa nei fuaiupu ma le Mataio 5:1–2. O le a le mea o loo faaopoopo i le tala a le Tusi a Mamona?

3 Nifae 12:3–12. O Le Lauga Fa’aamuia

• E amata le lauga a le Faaola ma folafolaga e faatatau i Lauga Fa’aamuia. E amata nei faamatalaga i le folafola atu “amuia outou …” (tagai i le 3 Nifae 12:1–11). Lauga Fa’aamuia o lona uiga “‘o le faamanuiaina,’ ‘ia fiafia,’ po o le ‘faamanuiaina’” (Mataio 5:3o se). O le lomifefiloi a Webster ua faamatalaina ai le upu “o se tulaga o le fiafiaga sili”(Lomifefiloi a le Kolisi a Merriam-Webster, 11 ed. [2004], 107). O na upu e faamatalaina ai taunuuga pe a faaaogaina e Au Paia aoaoga o lenei lauga.

  AAG Bible Dictionary i le Faaperetania e faamalamalama mai o le Lauga Fa’aamuia “e faamatalaina elemene patino ua faaaogaina e fausia ai le atiina ae ma uiga faaleagaga, ma o mea uma o le a i ai pe a i ai lena tagata i lona atoatoa. Na i lo le avea ma faamatalaga ua tuuaunoaina, o le Lauga Fa’aamuia e laugatasia ma tuputupu ae i o latou faatulagaga” (“Beatitudes,” 620). Ua faaopoopo mai le The Guide to the Scriptures “Ua faatulagaina ia Lauga Fa’aamuia i se auala e faaopoopo ai i le faaamuia e muamua atu.” (“Lauga Fa’aamuia”).

  Na aoao e Peresitene Harold B. Lee o le Lauga Fa’aamuia e fai ma sui o le “pepa o tulafono e taiala ai se olaga atoatoa”: “E fa ni mea e mo i tatou lava,” ma le fa “e faatatau i agafesootai ma isi” (Decisions for Successful Living [1973], 57, 60). O le siata o loo i lalo e faaalia ai lena sootaga:

  Ma Ia Lava	Ma Isi
  Amuia e lotomaulalo.	Amuia e agamalu.
  Amuia i latou uma o e faanoanoa.	Amuia e alolofa atu.
  Amuia i latou uma o e fia aai ma fia inu i le amiotonu.	Amuia i latou uma o e faatupuina le filemu.
  Amuia i latou uma o e loto mama.	Amuia i latou uma o e sauaina ona o lo’u igoa.

3 Nifae 12:3. “Amuia e Loto Maualalo O e O mai Ia te Au”

• Na faamanino mai e Peresitene Harold B. Lee le uiga o le loto maulalo:

  “Na fetalai mai le Matai, ‘Amuia e loto maulalo: aua e o latou le malo o le lagi.’ ( Mataio 5:3.) O le loto maulalo, e moni, o lona uiga o i latou o e moomia le faaleagaga, o e lagona le faamativaina faaleagaga lea e latou te aapa atu ai ma se naunautaiga maoae mo se fesoasoani …

  “O i tatou taitoatasi, pe afai tatou te ausia le atoatoa, e tatau ona tatou fesili ifo ia i tatou lava lenei fesili, ‘Se a se mea o toe ou te lei faia?’ pe afai e amata ona tatou a’e agai i luga i le auala mo le atoatoa” (Stand Ye in Holy Places [1974], 210).

• O le fuaitau “o e o mai ia te au” (3 Nifae 12:3) e le o maua i le Feagaiga Fou vaega o le Lauga i luga o le Mauga, ae e na te faamaninoina aoaoga a le Faaola. O se faamanuiaina le avea ma e loto maulalo pe afai tatou te o mai ia Keriso. Na faamatalaina e le Faaola i le 3 Nifae 12:2 le auala tatou te amata ai ona o atu ia te Ia. O le faaupuga “o e o mai ia te au” e mafai i mataupu faavae ona faaaogaina i isi Lauga Fa’aamuia. Ina ia faamafanafanaina (fuaiupu 4), e fai mo latou tofi i le lalolagi (fuaiupu 5), e maoona i le Agaga Paia (fuaiupu 6), alofaina mai i latou (fuaiupu 7), po o le iloa atu le Atua (fuaiupu 8), e tatau ona tatou o mai ia Keriso.

  E pei ona taitaia e le Faaola Lana lauga e uiga i le o mai ia te Ia, na 19 taimi na Ia taua ai le papatisoga i le va o le 3 Nifae 11:21 ma le 12:2. Ina ia atoatoa “le o mai ia Keriso” e aofia ai le taliaina o sauniga o le faaolataga.

  Na faamatalaina e Peresitene Ezra Taft Benson (1899–1994) auala faaopoopo e mafai ona tatou o mai ai ia Keriso: “O mai ia Keriso e ala i le talai atu o le talalelei, ma le faaatoatoaina o le au paia, ma le togiolaina o e ua maliliu. A o tatou o mai ia Keriso, tatou te faamanuiaina o tatou lava olaga, ma olaga o o tatou aiga, ma fanau a lo tatou Tama o i le Lagi, o loo soifua ma ua maliliu” (i le Conference Report, Ape. 1988, 98; po o le Liahona, Iulai 1988, 85).

3 Nifae 12:4. “Amuia i Latou Uma O e Faanoanoa”

• Na faamalamalama e Elder Spencer J. Condie o le Fitugafulu le ala e mafai ona vaaia ai Lauga Fa’aamuia o se alualu i luma i le natura: “E mafai ona vaai i Lauga Fa’aamuia o ni taiala mo le amiotonu ma le faateleina o la’a, amata i le ‘loto maulalo o e o mai ia [Keriso]’ (3 Nifae 12:3). O le isi laasaga i le auala o le selesitila o le faanoanoa, aemaise i a tatou agasala, mo le ‘tiga i le atua e tupu ai le salamo e oo i le ola’ (2 Korinito 7:10)” (Your Agency, Handle with Care [1996], 8).

3 Nifae 12:5. “Amuia E Agamalu”

• Na faamalamalama e Peresitene Spencer W. Kimball (1895–1985), faapea o le agamalu e le o se vaivaiga:

  “Afai na agamalu ma faamaulalo ma lotomaualalo, o lea ina ia lotomaualalo ai e tatau i se tasi ona faia mea na faia e le Alii i le le faatagaina o le tiapolo, agai i luma ma le toa i galuega amiotonu, feagai ai ma le lototoa ma faafitauli uma, avea ai ma matai o ia lava ma tulaga ua siomia ai o ia ma le faatauanauina ia talia.

  “O le lotomaualalo e le faasausili, faalialiavale, pe faamaualuga. E le vaivai, femoumouai, pe gauai gofie. …

  “Lotomaualalo ma le agamalufautuaina tatau i le mama, e le o vaivaiga. Latou te fautuaina se faatumauina o le agalelei o le loto pulea ma le leai o se itagia ma se mausa. … E le o se fesiligia o le amiotonu. E le palaai pe fefe. …

  “E faapefea ona lotomaualalo se tasi? Ia te au, e tatau i se tasi ona manatua pea le e faalagolago i ai. O ai o loo faalagolago i ai? I le Alii. E faapefea ona faamanatu e se tasi o ia lava? E ala i tatalo moni, faaauau pea, agaga tapuai, faafetai” (The Teachings of Spencer W. Kimball, ed. Edward L. Kimball [1982], 232–33).

3 Nifae 12:6. “Fia Aai ma Fia Inu i le Amiotonu”

• A o galue ai i le Au Peresitene Aoao o le Aualofa, na faamalamalama e Sister Sheri L. Dew le fesootaiga i le va o le manao (fia ai ma fia inu) ma faatinoga, po o le tomai e galue ai e ausia taunuuga na manaomia: “O lo tatou agavaa e faalogo ai faaleagaga e fesootai ma lo tatou naunau e galulue ai. E masani lava ona saunoa Peresitene Hinckley faapea e na o le pau lava le auala ua ia iloa e faataunuuina ai se mea o lona tootuli lea i ona tulivae ma ole atu mo le fesoasoani ona tulai lea ma alu e galue. O le tuufaatasia o le faatuatua ma le galue malosi o le auala sili ona atoatoa lea e aoao ai le gagana a le Agaga. Na aoao mai le Faaola, ‘Amuia i latou uma o e fia aai mafia feinu i le amiotonu, aua e maoona i latou i le Agaga Paia’ (3 Ni. 12:6; faaopoopo le faamamafa). O le fia aai ma le fia feinu e leai se isi uiga e na o le galulue faaleagaga. O le tapuai i totonu o le malumalu, salamo ina ia faateleina le mama, faamagalo ma saili le faamagaloga, ma anapogi faamaoni ma tatalo e faateleina ai lo tatou malamalama i le Agaga. E aoga galuega faaleagagama o le ki lea i le aoaoina o le faafofoga i le siufofoga o le Alii” (“E Le o Tuua Na o i Tatou,” Liahona, Ian. 1999, 114).

3 Nifae 12:8. “Loto Mama”

• Na faamalamalama e Elder Joseph B. Wirthlin (1917–2008) o le Korama a Aposetolo e Toasefululua le uiga o le mama o le loto:

  “O le le faa’ole’ole o le avea lea ma mama i le loto, o se mama taua o i latou o le a faitaulia ma i latou o e mulimuli moni ia Keriso. …

  “Pe a tatou le faa’ole’ole, ua tatou faamaoni, moni, ma amiotonu. O uiga uma ia o le Atua ma o loo moomia e le Au Paia. O i latou o e faamaoni e lelei ma faamaoni i a latou saunoaga, e tuusa’o i a latou fegalegaleaiga, e le faa’ole’ole, ma e le gaoi, taufaasese, po o nisi faatinoga taufaavalea. O le faamaoni o le Atua lea; o le le faamaoni o le tiapolo, o le na pepelo mai lava i le amataga. O le amiotonu o lona uiga o le ola lea i se olaga e ogatasia ma tulafono, mataupu faavae, ma sauniga o le talalelei” (Finding Peace in Our Lives [1995], 181–82).

3 Nifae 12:9. O e Faatupuina Le Filemu

• Na molimauina e Elder Russell M. Nelson o le Korama a Aposetolo e Toasefululua le punaoa maoae mo le avea ma e faatupuina le filemu: “O le o mai ia Iesu Keriso o le ‘Alii o le Filemu’ [Isaia 9:6] o le ala lea i le filemu o le lalolagi ma le manatu alofa i tagata [tagai i le Luka 2:14]” (i le Conference Report, Oke. 2002, 41; po o le Liahona, Nov. 2002, 39).

• Na faamatalaina e Elder Bruce R. McConkie (1915–85) o le Korama a Aposetolo e Toasefululua le ala e avea ai ma e faatupuina le filemu: “O e faatupuina le filemu: I le faauigaga atoa, ua na o i latou o e talitonu ma faasalalau le atoatoaga o le talalelelei ua avea ma e faatupuina le filemu ma se faauigaga atoatoa o lenei Lauga Fa’aamuia. O le talalelei o le savali o le filemu i tagata uma. Fanau a le Atua: O i latou ua vaetamaina i le aiga o le Atua o se taunuuga o lo latou tuuto i le upu moni. O lena ala e avea ai i latou ma suli o le Atua ma soo-suli faatasi ma Keriso. (Rom. 8:14–18; Kal. 3:26–29; 4:1–7.)” (Doctrinal New Testament Commentary, 3 volu. [1971–73], 1:216).

3 Nifae 12:13. “Masima o le Lalolagi”

• O tala o le Tusi a Mamona ua ta’u mai ai o le “avea ma masima o le lalolagi” o se sini e tatau ona taulai i ai tagata o le Ekalesia (3 Nifae 12:13). I le sauniga ositaulaga faaMose, o le masima na avea o se faamanatu e tatau ona tatou manatua ma faatumauina a tatou feagaiga ma le Atua (tagai i le Numera 18:19; 2 Nofoaiga a Tupu 13:5). I se tulaga tutusa, e tatau ona fesoasoani le Au Paia e toefuatai ma faatumauina feagaiga o nei aso e gata ai. Mataupu Faavae ma Feagaiga 101:39–40 o loo taua ai le mea e tatau ona faia e se tasi ina ia tali atu ai o se “masima o le lalolagi.”

  Ina ia toe manatu i le “masima o le lalolagi” e na te tauaveina se faauigaga taua. A o o se tasi o le Au Peresitene o Fitugafulu, na faamalamalama e Elder Carlos E. Asay (1926–99) i e ua umia le perisitua e faapea:

  “‘Pe a valaauina tagata i la’u talalelei e faavavau, ma osi feagaiga i le feagaiga faavavau, ua ta’ua i latou o masima o le lalolagi ma le faaola o tagata;

  “‘Ua valaauina i latou e fai ma faaola o tagata’ (MFF 101:39–40; faaopoopo le faatusilima).

  “O le upu faaola (f-a-a-o-l-a) o lona faauigaga o le tofo, tofo faamalieloto, uiga mataina, ma uiga maoae. …

  “O se fomai tautaua na ia tau mai ia te au e le aveesea le tofo o loo i le masima i soo se tausaga. E aveesea le tofo i le faafefiloi ma le faatamaiaga. E faapena foi, e le motusia le mana o le perisitua i soo se tausaga; o ia, foi, e leiloa atu e ala i le faafefiloi ma le faatamaiaga. …

  “O le tofo ma le tulaga lelei e sola ese ai le tagata pe a ia faatamaia lona mafaufau i mafaufauga le mama, faatamaia lona fofoga e ala i le le tautala i le mea moni, ma faaaoga sese lona malosi i le faatinoina o amioga faatiapolo. …

  “Ou te tuuina atu nei taiala faigofie, aemaise i alii talavou, o se ala o le faatumauina o le tofo: Afai e le mama, aua le mafaufau i ai; afai e le moni, aua le tautala i ai; afai e le lelei, aua le faia (tagai i le Marcus Aurelius, ‘The Meditations of Marcus Aurelius,’ i le The Harvard Classics, Charles W. Eliot, ed., Niu Ioka: P. F. Collier ma le Atalii, 1909, i. 211)” (i le Conference Report, Ape. 1980, 60–61; po o le Ensign, Me 1980, 42–43).

3 Nifae 12:14–16. “Ia Pupula Atu Lo Outou Malamalama”

• Na faatatau e Elder Robert D. Hales o le Korama a Aposetolo e Toasefululua aafiaga patino i le faamamafaina o le taua o le avea ma malamalama i isi:

  “O lo’u ola ae i Long Island, i Niu Ioka, sa ou malamalama ai i le taua tele o le malamalama i tagata e faimalaga i le pogisa i le vasa. E ese le matautia pe a i ai se moli o le ava e le ola! E matua matautia se moli o le ava e le ola sona sulu!

  “O i tatou ua i ai le meaalofa o le Agaga Paia, e ao ona tatou faamaoni i ana uunaiga, ina ia mafai ai ona avea i tatou ma malamalama i isi.

  “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.’ [Mataio 5:15–16].

  “Tatou te le ma iloa pe o ai o faalagolago mai ia i tatou. Ma, e pei ona fetalai mai o le Faaola, tatou te ‘le iloa pe le liliu mai i latou ma le salamo, ma o mai ia te au ma le loto atoa, ma ou faamaloloina i latou; e fai foi outou ma ala e aumai ai le olataga ia te i latou’ [3 Nifae 18:32]” (i le Conference Report, Ape. 2002, 82; po o le Liahona, Iulai 2002, 79).

3 Nifae 12:17–20, 46–47. Na Faataunuuina e Iesu Keriso le Tulafono a Mose

• E oo atu i le taimi o le galuega faaletino a le Faaola, na avea tulafono a Mose o se faavae faalelotu ma agafesootai a Isaraelu mo le silia ma le afe tausaga. Na ia sa Nifae faamaumauga tusitusia o le tulafono i papatusi apamemea, ma na aoaoina ma taulai i ai perofeta sa Nifae i tulafono. Ina ua asiasi atu le Faaola i sa Nifae, na Ia aoaoina i latou o le tulafono na faataunuuina atoa ia te Ia. Peitai, e le tatau ona mafaufau i latou i le tulafono a Mose na “faaleaogaina” po o le “mavae atu” (3 Nifae 12:17–18). E faapefea ona “faataunuuina” e le Faaola ae le i “faaleaogaina” le tulafono a Mose? Na aofia uma i le tulafono a Mose le faaletino ma tulaga o sauniga.

  Otulaga faaletino e aofia ai na poloaiga e pei o le “Aua e te fasioti tagata” ma le “Aua e te mulilua.” Na aoao e Iesu Keriso sa Nifae e le na o le aloese mai le fasioti tagata ma le mulilua, ae o le ita ma le manao lasi—o le loto e taitaia atu i le fasioti tagata ma le mulilua (tagai i le 3 Nifae 12:21–30). E ui lava na faataunuu e le talalelei a Iesu Keriso le tulafono i le tulaga na faateleina ai tulaga faaletino o le tulafono a Mose i le avea ai ma tulafono maualuga; e aofia ai matafaioi faaletino o le tulafono a Mose ma tuu i latou i le tulaga e faalautele ai mataupu faavae o le talalelei e moomia ai le suia o le loto.

  O le tulaga o sauniga o le tulafono a Mose e aofia ai poloaiga e uiga i le taulagaina o manu ma taulaga mu—lea na taua e Apinati “taulaga” ma “sauniga” (Mosaea 13:30). Na malamalama perofeta sa Nifae o nei vaega o le tulafono a Mose na aoga mo le fesoasoani i tagata e taulai atu i le taulaga togiola a Iesu Keriso (tagai i le 2 Nifae 25:24; Iakopo 4:5; Mosaea 16:14–15). O le mea lea, ina ua maea le misiona faaletino a le Faaola, o nei sauniga taulai ua le toe taulai atu i se gaoioiga o le lumanai—na tupu le gaoioiga, ma na faataunuuina sauniga i le tulaga na faaiuina ai. O lea na aoao e le Faaola sa Nifae o taulaga i manu ma taulaga mu o le a “mavae atu,” ma o tagata e mulimuli ia te Ia e tatau ona tuuina atu le “taulaga” o se “loto momomo ma le agaga salamo” (3 Nifae 9:19–20). I le tulaga o sauniga e taulai atu ai i le Togiola, na faavaeina e le Faaola le faamanatuga, o se sauniga o le manatuaina, o le toe tepa i tua i le taulaga togiola a le Faaola (tagai i le 3 Nifae 18:1–11).

• Na tauina mai e Elder Bruce R. McConkie e faapea: “Na afio mai Iesu e toefuatai le talalelei i lona atoaga lea na fiafia ai tagata ao le i oo i aso o Mose, ao le i oo i le taimi o le faatulagaga itiiti. E moni lava e lei afio mai o ia e faaleagaina le mea na ia faaalia ia Mose nai lo se polofesa o le kolisi e na te faaleagaina le faatulagaga o matematika e ala i le faailoaina o mataupu faavae o lala taua i ana tamaiti aoga. Na afio mai Iesu e faatuina i luga o le faavae na faavaeina e Mose. E ala lea i le toefuataiina o le talalelei na ia faataunuuina le moomia mo le usiusitai i vaega ma tulaga o le talalelei sauniuni. Na le toe moomia e se tasi le savali i le malamalama o le masina, aua ua oso ae le la i lona maoae uma” (Doctrinal New Testament Commentary, 1:219–20; tagai foi i le Stephen E. Robinson, “The Law after Christ,” Ensign, Sete. 1983, 68–73).

3 Nifae 12:19. “ O Le Loto Momomo ma le Agaga Salamo”

• Na molimauina e Elder Richard G. Scott o le Korama a Aposetolo e Toasefululua le taua o le mauaina o le loto momomo ma le agaga salamo: “Ou te molimau atu ‘e oo mai le togiola talu le Mesia Paia; … ia te i latou uma o e o i ai le loto momomo ma le agaga salamo; ae leai se tasi e mafai ona faaatoatoaina ai uiga o le tulafono’ [2 Nifae 2:6–7; faaopoopo le faatusilima]. O lenei tulaga manaomia moni o le ‘loto momomo ma le agaga salamo’ ua faamatala mai ai le manaomia ona gauai ifo, lotomaualalo (lea e mafai ona aoaoina), ma naunau e usiusitai.” (i le Conference Report, Ape. 1997, 77; po o le Liahona, Iulai 1997, 66).

3 Nifae 12:22. “Ai se Ita i Lona Uso”

• O le tala a le Feagaiga Fou i aoaoga a le Faaola o le, “Ai se ita fua i lona uso, e nofo sala o ia i le faamasinoga” (Mataio 5:22). O aoaoga a le Faaola i lenei mataupu i le Tusi a Mamona e tutusa sei vagana ai le fuaitau “e aunoa ma se mafuaaga” ua lafoaiina. E faailoa mai i lenei mea e sili le lafoai o le ita. E tatau ona matau o tusitusiga na muai lauiloa mo le Mataio 5:22 e le o i ai le fuaitau “e aunoa ma se mafuaaga” (tagai i le Daniel K. Judd ma le Allen W. Stoddard, “Adding and Taking Away ‘Without a Cause’ in Matthew 5:22,” i le How the New Testament Came to Be, ed. Kent P. Jackson and Frank F. Judd Jr. [Sidney B. Sperry symposium, 2006], 161).

3 Nifae 12:27–29. Aloese mai le Manao Lasi

• Na faatusaina e Elder Richard G. Scott ia taunuuga ma le faaosofia o le alofa ma le manao lasi: “O le alofa, e pei ona faamalamalama mai e le Alii, e siitia, puipuia, ava, ma faatamaoaiga ai se tasi. E faagaeetia ai se tasi e taulagaina o ia mo le isi. E faatupuina e Satani le alofa pepelo, o lena alofa o le manao lasi lea. E faatupuina e lena manao lasi tuinanau patino faaletino. O se tasi na te faia lenei mea tau faa’ole’ole, e itiiti sona popole i le tiga ma le puapuaga e tupu ai i le isi tagata. A o natia na puapuaga i upu tau faasese, o lona faamoemoega tonu lava, o le faamalieina lea o ona lava tuinanau” (i le Conference Report, Ape. 1991, 43–44; po o le Liahona, Iulai 1991, 37).

3 Nifae 12:30. “Ave Ai O Outou Satauro”

• Na faamalamalama e Elder Neal A. Maxwell (1926–2004) o le Korama a Aposetolo e Toasefululua le fuaitau “ave ai o outou satauro”:

  “O le tauaveina i aso uma o le satauro o lona uiga o le tetee atu i manao lasi o le tino i aso uma.

  “E ala i le faataitai i le Matai, o le onosaia tofotofoga ae ‘na te lei gauai atu i ai,’ o i tatou, foi, e mafai ona ola i se lalolagi e tumu i faaosoosoga ‘e pei [ona] masani ai le tagata’ (1 Korinito 10:13). E moni lava na silafia e Iesu le anoano o faaosoosoga na oo atu ia te Ia, ae Na te lei faataitaia ma toe faaaogaina i latou. Nai lo lena, na teena e Ia i le taimi lava lena. Afai tatou te faafiafiaina le faaosoosoga, e vave ona latou faafiafiaina i tatou! O le teenaina o nei malo e le manaomia i faasitepu o le mafaufau, o se tasi lea o auala o le ‘le gauai atu i ai.’ E ui lava, o nei malo o ni sauai, afai e faaulufale mai, e mafai ona avea ma se mafatiaga maoae” (i le Conference Report, Ape. 1987, 88; po o le Ensign, Me 1987, 71).

3 Nifae 12:31–32. “Ai Se Fai Mana Ava Le Ua Faate’aina Ua Mulilua Foi O Ia”

• Na faamatala e Elder Bruce R. McConkie le tagata na fetalai i ai le Faaola ma le ala e aoga ai ia i tatou i aso nei:

  “O lenei tulafono faasaina na taitaia ai le tete’aga e lei tuuina atu i le au Faresaio, po o le faalauaitele faalelalolagi, ae ua na o soo, ‘i le fale,’ i se taimi mulimuli ane e pei ona faamalamalamaina e Mareko. Na faailoa e Iesu tulaga e faaitiitia ai. E le mafai e tagata uma ona ola i lena tulaga faatauaina maualuga; na faatatau ua na o i latou o e ‘na tuuina atu i ai. ’

  “… Atonu na faamalosia i isi taimi ma i isi tagata, ae e le o fusia ai le Ekalesia i le aso. I lenei taimi e faatagaina tete’aga i le Ekalesia mo le tele o mafuaaga e ese mai le agasala o feusuaiga, ma ua faatagaina tagata ua tete’a e toe faaipoipo ma olioli i faamanuiaga uma o le talalelei” (Doctrinal New Testament Commentary, 1:548–49).

• E faaalia ai o se tasi o faamoemoega o afioga a le Faaola e le o le faasalaina o i latou o e faaipoipo atu i e ua tete’a, ae ia aoao tagata e aua le liliu atu i tete’aga e foia ai ni manua itiiti e oo mai i faaipoipoga. I le talanoa e uiga i tete’aga, na aoao e Peresitene Gordon B. Hinckley (1910–2008) e faapea:

  “E moni, e le manuia ma lelei faaipoipoga uma. O tausaga ua leva na ou ‘oti mai ai upu nei mai se tautalaga na tusia e Jenkins Lloyd Jones:

  “‘E foliga mai ua i ai se manatu le tonu i le toatele o a tatou tupulaga talavou, o e u’ulima ma kisikisi i fale tifaga i fafo, o le faaipoipoga o se fale manaia ua si’omia i ni fugala’au e fua mai i taimi uma, e sau i ai se tane talavou aulelei pea, i se ava talavou lalelei tumau. A o’o ina magumagu fugala’au ma saputu mai pili, ua tau le ofi fale faamasino e fai ai tete’aga. …

  “‘Soo se tasi e manatu e tumau pea le lelei, o le a ia faama’umau le tele o le taimi e tamo’e solo ai ma taufono ua i ai sē ua gaoia ana mea’ (“Big Rock Candy Mountains,” Deseret News, 12 Iuni 1973, i. A4). …

  “… O se tasi o mea e sili ona leaga, ma ou te manatu o se mea ua taatele, o le tatala o faaipoipoga. Ua avea lava ma malaia tele. Ua ta’u mai i le lomiga talu ai o le World Almanac i le Iunaite Setete i le sefululua masina e faai’u ia Mati o le 1990, e tusa ma le 2,423,000 ulugalii na faaipoipo. I lena lava vaitaimi e tasi, e 1,177,000 ulugalii na tatala faaipoipoga. (Tagai i le The World Almanac and Book of Facts 1991 [New York: World Almanac, 1990], i. 834.)

  “O lona uiga i le Iunaite Setete, e tusa e tasi le ulugalii e tete’a i ulugalii e toalua. …

  “O le tele lava o taimi o le manatu faapito o le faavae lea o … faafitauli. …

  

  © 1986 Derek Smith

  “E toatele tagata faaipoipo e o mai mai aiga sa fai faapelepele ma fai faavalea ai i latou, ma ua latou manatu ai e tatau ona tonu mea uma i taimi uma, ma o le soifuaga o se olaga lea o fiafiaga, ma e tatau ona faamalie tuinanau o le tagata e aunoa ma le mafaufau pe sa’o pe sese. Ua leaga lava i’uga o mafaufauga papa’u ma lē tonu faapenei! …

  “… O le vaifofo o le tele o faigata o faaipoipoga, e le maua i le tete’a. E maua i le salamo. E le maua i le nonofo eseese. E maua i le faamaoni e taitaia ai le tagata e tula’i ma le lototoa ma fai ona tiute. E maua i le faaaoga o le Tulafono Faaauro. …

  “E tatau ona i ai se naunau e lē matauina vaivaiga laiti, a e faamagalo, ma faagalo.

  “E tatau ona i ai le pulea o le laulaufaiva. O le ita o se mea leaga tele e lepetia ma tuliesea ai le alofa.

  “E tatau ona i ai le loto pulea e taofia ai le saua. …

  “Atonu e i ai ni taimi e tatau ai le tete’a. Ou te le faapea atu e leai se taimi ua le tatau ai. A e ou te le poi e fai atu, o lenei mala ua ia i tatou, e foliga mai ua sosolo i soo se mea, ua le mai le Atua, a e o se galuega a le fili o le amiotonu ma le filemu ma le upu moni” (i le Conference Report, Ape. 1991, 94–98; po o le Liahona, Iulai 1991, 78–80).

3 Nifae 12:48. “Ou te Loto Ina Ia Atoatoa Ona Lelei La Outou Amio”

• E le mafai ona atoatoa i lenei olaga. Peitai, na faamalamalama e Peresitene James E. Faust e tatau ona tatou saili mo le atoatoa i le taimi nei ina ia mafai ona ausia le isi olaga: “O le atoatoa o se sini o le faavavau. E le mafai ona tatou atoatoa i la le tino, ae o le taumafai ina ia maua, o se poloaiga, lea e mafai ona tatou tausia e ala i le Togiola” (i le Conference Report, Ape. 1999, 22; po o le Liahona, Iulai 1999, 22).

• Na faamalamalama foi e Peresitene Spencer W. Kimball le moomia ona gauai atu mo le atoatoa: “‘O lenei, ia atoatoa ona lelei o la outou amio, e pei o lo outou Tama o i le lagi e atoatoa ona lelei o ia.’ ( Mataio 5:48.) I le taimi lenei, o se sini e mafai ona ausia. E le faaeaina i tatou, tatou te le taunuu i lo tatou taunuuga, sei vagana ua tatou atoatoa, ma o le taimi lenei i le lalolagi e amata ai ona agai atu mo le atoatoa. E itiiti lou onosai i tagata o e faapea mai, ‘Oi, e leai se tagata e atoatoa,’ o le fautuaga o le; ‘aisea la e taumafai ai?’ E moni lava e leai se tasi e atoatoa, ae ua tatou maua nisi ua latalata atu i le atoatoa nai lo isi” (Teachings of Spencer W. Kimball, 165).

3 Nifae13:1–8, 16–18. Aua Le Faia Faaaliali Galuega Amiotonu

• O nei fuaiupu i le 3 Nifae ua aoao mai e uiga i le aloese mai le tuuina atu o tupe i nofoaga lautele i e matitiva po o le tatalo ma anapogi i nofoaga lautele ina ia vaai mai ai isi. Ua faamalosiau mai le Alii ia tatou faataitaia le amiotonu i nofoaga lilo. Na faamalamalama e Peresitene Thomas S. Monson le taua o auaunaga le leoa:

  “Lata mai nei lava na ou faalatalata atu ai i le laulau a le failautusi a se falemai tele ona sa ou fia iloa le numera o le potu o se tagata ma’i ou te fia asiasi i ai. O lenei falemai o loo toe sosooina nisi ona vaega e pei lava o le tele o isi falemai. I tua tonu o le laulau sa nofo ai le failautusi o loo i ai se maatusi matagofie o loo tusia ai upu faafetai ia i latou na foai ua mafai ai ona faateleina le falemai. O igoa o e na foai le tai selau afe tala o loo tusia i se tusi ua togitogia i se tusi apamemea o loo tautau i le maatusi i se filifili feilafi.

  “Ua lauiloa igoa o i latou o e na foai. O suafa o kapeteni o fefaatauaiga, o pule o gaosiga o oloa, o polofesa o aoaoga—ua i ai uma iina. Sa ou lagona le faafetai ona o lo latou foai alofa. Sa ou vaaia loa se tusi apamemea—e le o i ai se igoa. Na o le tasi lava le upu o loo tusia ai ‘E le iloa.’ Sa ou ataata ma mafaufau po o ai lava lenei tagata ua le maua lona igoa. E moni, ua ia maua le olioli filemu e le o iloa e se isi tagata. …

  “I le taumalulu o le tausaga ua tea [1981], sa i ai se faaletonu i se vaalele ma na pau ifo ai i le vaitafe o Potomac. Sa tele ni vaaiga lototoa na vaaia i lea aso, a e sa sili ona maoae se mea na vaaia e se alii ave vaalele laveai na fesoasoani i le faalavelave. Sa tuutuu ifo le maea laveai i se tagata o loo ola. A e nai lo lona taupe i le maea ia ola, na tuuina atu e lenei alii lea maea i se tasi tagata. Sa toe tuutuu ifo le maea, ma laveaiina ai foi le isi tagata. E toalima i latou na laveaiina mai le vai ua aisā. Mai lea toalima, e lei maua lea tagata toa. E lei iloa lona igoa, ‘ua ia tuua le lalolagi ma lona mamalu’ (Stephen Spender, ‘I think continually of those—’ i le Masterpieces of Religious Verse, ed. James Dalton Morrison [New York: Harper and Brothers Publishers], i. 291.) …

  “Ia avea lenei upu moni [auauna atu] e taiala ai o tatou olaga. Tatou tepa a’e i luga a o tatou agai atu i luma i le galuega a lo tatou Atua ma o tatou uso a tagata. Tau ina ia tatou manatua Kalilaia, ina ia mafai ai ona tatou faalogo i se siuleo o aoaoga a le Faaola e faapea: ‘Ia outou ne’i avatu ni a outou meaalofa i luma o tagata ina ia iloa ai e i latou’ (Mataio 6:1). ‘Aua nei iloa e lou lima tauagavale le mea ua faia e lou lima taumatau’ (Mataio 6:3). Ma o a tatou galuega lelei: ‘Ia oe nei e ta’u atu i se tasi’ (Mataio 8:4). O le a mama ai o tatou loto, pupula ai o tatou olaga, ma tamaoaiga ai o tatou agaga.

  “O galuega alofa uma e tuuina atu faalilolilo, atonu e le iloa e tagata—a e peitai o le mea alofa ma le na ia foai atu, o loo silafia e le Atua” (i le Conference Report, Ape. 1983, 73–74, 76; po o le Liahona, Iulai 1983, 87–91).

3 Nifae 13:7. “Aua Nei Tautu i a Outou Upu”

• Tautu i upu o lona uiga o le “meanoa; le aoga; leai se taua, faatauaina po o le taua” (O le Muai Lomiga o le Lomifefiloi a Noah Webster o le Lomifefiloi Faaamerika o le Gagana Peretania, 1828 [1967]). O a tatou tatalo e tautu pe a fai ona o se masani, ma sina manatu itiiti i ai po o le leai foi.

  “Na lapatai mai le perofeta o Mamona afai e iai se isi e ‘tatalo ma le le loto faamaoni i ai … e le aoga lava ia te ia, aua e le talia e le Atua se ua faapena’ (Moronae 7:9). Ina ia i ai se uiga o au tatalo, e tatau ona e tatalo ma le faamaoni ma le ‘malosi uma o le loto’ (Moronae 7:48). … Ia tuuina atu manatunatuga moni i lau amio ma upu e te faaaogaina” (Faamaoni i le Faatuatua: O se Tusitaiala o le Talalelei [2004], 167).

• Na lapataia e Elder Joseph B. Wirthlin e faatatau i le tautu i tatalo: “E leai se uiga o a tatou tatalo pe afai e saga fai pea lava faalausosoo upu talitutusa ma auala lava e tasi ua avea ai e pei o se tauloto ae le o se fesootaiga. O le mea lena na faamalamalama mai e le Faaola o le ‘tautu i upu’ (tagai Mata. 6:7)” (“Faaleleia Atili o a Tatou Tatalo,” Liahona, Aok. 2004, 16; tagai foi i le Alema 34:27–28).

3 Nifae 13:9–13

O a mataupu faavae mo tatalo anoa o loo aoao mai e le Faaola i nei fuaiupu?

3 Nifae 13:9–13. O Le Tatalo a le Alii

• E mafai ona tatou faaaogaina mataupu faavae i le tatalo a le Alii o se faataitaiga mo lo tatou auaunaga i le malo. Na aoao e Peresitene Henry B. Eyring o le Au Peresitene Sili e faapea:

  “E amata le tatalo i le migao i lo tatou Tama Faalelagi. Ona ta’ua lea e le Alii o le malo ma lona oo mai. O le auauna e i ai se molimau o le Ekalesia moni lenei a Iesu Keriso, na te lagona le olioli i lona alualu i luma ma se faanaunauga na te faia mea uma na te mafaia mo le galueaiina o le malo.

  

  Paul Mann, © 1999 IRI

  “O le Faaola lava Ia na faaa’oa’o maia le tulaga o loo ta’ua i isi upu nei e sosoo ai o le tatalo: ‘Ia faia lou finagalo i le lalolagi, e pei ona faia i le lagi’ (Luka 11:2). O Lana tatalo lena i le taimi ogaoga o lana taulaga o le Togiola mo tagata uma ma le lalolagi atoa (tagai Mataio 26:42). O le auauna faamaoni, e tatalo tusa lava po o sina galuega aupito itiiti ina ia faia e pei ona finagalo ai le Atua. E tele sona eseesega pe a galue ma tatalo mo Lona viiga ae le mo i tatou lava.

  “Ona tuu mai lea e le Faaola o lenei tulaga o le mama atoatoa faaletagata: ‘Ia e faamagalo ia te i matou i a matou agasala; auā foi matou te faamagalo atu ia i latou uma o e agaleaga mai ia te i matou. “Aua foi e te taitaiina i matou i le tofotofoga, a ia e laveai ia i matou ai le leaga’ (Luka 11:4). O le faamalosiauga tatou te avatu ia i latou o loo tatou leoleoina, e maua mai i le Faaola. O i tatou ma i latou foi, e tatau ona faamagalo atu ina ia mafai ai ona faamagalo i tatou e Ia (tagai Mataio 6:14). O i tatou faapea foi ma i latou, e na ona mafai ona tatou faamoemoe e tumau le mama, faatasi ai ma Lana puipuiga ma le suiga i o tatou loto, e mafai ai ona faia e Lana Togiola. Tatou te manaomia lena suiga e maua ai pea le mafutaga faifai pea ma le Agaga Paia. …

  “E mafai ona e maua le tulaga mautinoa i le galuega a le Alii. O le a fesoasoani le Faaola ia te oe e faia mea na ia tofia oe e fai, pe avea ma tagata faigaluega a le Ekalesia mo se taimi po o le avea foi o se matua e faavavau. E mafai ona e tatalo mo se fesoasoani e lava e faia ai le galuega, ma le iloa o le a oo mai lava” (i le Conference Report, Ape. 2000, 83; po o le Liahona, Iulai 2000, 80–81).

3 Nifae 13:19–24. “Aua Tou te Tolo’a’i Oa mo Outou i le Lalolagi”

• Na faatatau e Peresitene Ezra Taft Benson ia natura le tumau o oa o le lalolagi:

  “O loo faapea lava ona tatou mafuli atu i le tele o taimi i le fiafia i mea e pala. O mea ma oa o le lalolagi ua saunia mo le tausia o i tatou, e pei lava ona i ai, o se nofoaga tatou te nonofo ai a o tatou i ai iinei i se tulaga faaleaoaoga. Ua faapea lava ona i ai ia i tatou le avanoa e faatulaga ai i auro, ario, fale, oloa, fanua, lafu manu, ma isi mea totino faalelalolagi i o latou tulaga tatau.

  “Ioe, o se nofoaga lenei e le tumau. Ua tatou i ai iinei ina ia faapea ona tatou aoaoina ma ia iloa le uluai lesona agai i le faaeaga—usiusitai i le fuafuaga o le talalelei a le Alii” (i le Conference Report, Ape. 1971, 17; po o le Liahona, Aperila 1972, 11).

• Na tuuina mai e Elder Dallin H. Oaks o le Korama a Aposetolo e Toasefululua ni faapupulaga e faatatau i oa e mafai ona tatou faaputuina mo i tatou lava: “Na a’oa’o mai le Faaola e le tatau ona tatou tolo’a’i ‘oa o le lalolagi, a e tatau ona tatou tolo’a’i ‘oa i le lagi (tagai Mataio 6:19–21). E tusa ai ma le malamalama o le autu moni o le fuafuaga tele o le fiafia, ou te talitonu o ‘oa moni lava o le lalolagi ma le lagi, o a tatou fanau ia, ma fanau a a tatou fanau” (i le Conference Report, Oke. 1993, 100; po o le Liahona, Ian. 1994, 85).

3 Nifae 13:34. “Aua le Popole i le Aso a Taeao”

• Ua faamanino mai e le Tusi a Mamona le uiga o le Mataio 6:25–32 e ala lea i le faailoa mai na fetalai Iesu i soo sa Nifae e toasefululua mo lenei vaega o le lauga (tagai 3 Nifae 13:25–34). Ina ua maea ona tuuina atu e Iesu lenei tiute ia i latou, ona ia liliu lea ma toe fetalai atu i tagata (tagai 3 Nifae 14:1). E fesoasoani le matau na faia pea e Iesu le liliu atu i luma ma tua i nei potopotoga e lua o tagata a o faia Lana lauga.

3 Nifae 14:1–2. Faamasinoina

• Na faamanino e Elder Dallin H. Oaks le uiga o fuaiupu 1–2 i le 3 Nifae 14 e ala lea i le faamalamalamaina o le eseesega i le va o le faamasinoga tonu ma le faamasinoga le tonu. Ona ia otooto lea o na mataupu faavae o le amiotonu:

  “Na ou le mautonu o nisi mau o loo faatonuina i tatou ia aua le faamasino atu a o isi o loo ta’u mai e tatau ona tatou faamasino ma ua ta’u mai ai foi le ala e faia ai. Ae ina ua ou suesueina nei fuaiupu ua ou talitonu ai o nei faatonuga eseese e ogatusa lava, pe a tatou iloiloina ma se vaaiga o le faavavau. O le autu, o le malamalama lea e lua ituaiga o faamasinoga: o le faamasinoga mulimuli, lea o loo faasa i tatou ona faia, ma le faamasinoga i le va, lea ua faatonuina i tatou e fai, ae e faavae i mataupu faavae amiotonu. …

  “Muamua, o se faamasinoga amiotonu e tatau, i le faauigaga, faia i le va. …

  “Lua, o se faamasinoga amiotonu e taiala e le Agaga o le Alii, e le faia i le ita, tauimasui, loto palapala, po o le mea e manao i ai le tagata. …

  “Tolu, ina ia amiotonu, o se faamasinoga i le va e tatau ona faia i la tatou lava vaavaaiga. …

  “Fa, e tatau ona tatou, pe a mafai, ona aloese mai le faamasinoina seia tatou maua faamatalaga sao” (“‘Judge Not’ and Judging,” Ensign, Auk. 1999, 7, 9–10).

3 Nifae 14:7–8. Ole Atu e ala i le Tatalo

• Na faasoa mai e Peresitene James E. Faust lana molimau i le meaalofa ma le avanoa ua ia i tatou taitoatasi e mafai ona tatou fesootai ai i le Tama Faalelagi e ala i le tatalo: “O le mafai ona fesootai ma lo tatou Foafoa e ala i lo tatou Faaola, o se tasi lea o avanoa e sili ma faamanuiaga i o tatou olaga. … E leai se pule faalelalolagi e mafai ona tuueseeseina i tatou mai le mafai ona tatou talanoa sao atu i lo tatou Foafoa. E le mafai ona i ai se faaletonu faaenisinia pe faaeletonika pe a tatou tatalo. E le faatuaoia le aofaiga o taimi pe o le a foi le uumi e mafai ai ona tatou fesootai ma ia i soo se taimi ma soo se nofoaga. E leai se aofaiga faatapulaa o mea e moomia tatou te moomoo e tatalo i ai i tatalo taitasi. E le moomia ona tatou uia ni failautusi pe faia se taimi faatulagaina e ausia ai le palealii o le alofa tunoa. E mafai ona fesootai atu ia te ia i soo se taimi ma soo se nofoaga” (i le Conference Report, Ape. 2002, 67; po o le Liahona, Iulai 2003, 2).

3 Nifae 14:12. O Le Tulafono Fa’aauro

• Na ta’ua e Elder Russell M. Nelson le Tulafono Fa’aauro ma saunoa ai:

  “Sa aoao e [Iesu] le Tulafono Faaauro, e faapea, ‘O mea uma foi tou te loto i ai ia faia e tagata ia te outou, ia faapea lava ona outou faia ia te i latou’ [Mataio 7:12]. E toetoe lava o soo se ituaiga lotu o loo maua ai lenei mataupu faavae. O isi e pei o Confucius ma Aristotle, sa aoaoina atu foi lenei mataupu. Tasi o le mea, o le talalelei e lei amataina i le soifua mai o le Pepe i Peteleema. E faavavau. Sa tala’ia i le amataga ia Atamu ma Eva. E i ai vaega o le talalelei sa faasaoina i le tele o tu ma aganuu. E oo lava i manatu faanuupo, ae sa faatamaoaigaina lava i fasi vaega o upumoni mai tisipenisione na muamua atu.

  “Soo se mea lava e maua ai, ma pe faapefea foi ona faaalia, e aofia ai lava i le Tulafono Faaauro le faailo tatau o le malo o le Atua. E faasa ai le aia fua o le tasi i aia tatau a le isi. Ua noatia tutusa ai malo, o faalapotopotoga, ma tagata taitoatasi. Faatasi ai ma le agaalofa ma le faapalepale, ua suia ai le tauimasui atu o le ‘mata i le mata, ma le nifo foi i le nifo’ [Mataio 5:38]. Afai tatou te mananao e tausisia pea le ola ai i lena mataupu faavae tuai e leai se aoga, o lona uiga ua tatou tauaso uma ma lē nifoa” (i le Conference Report, Oke. 2002, 41–42; po o le Liahona, Nov. 2002, 39).

3 Nifae 14:15–20

O a mea o aoao mai ai i tatou e faatusa o i ai i nei fuaiupu e uiga ia i latou e fai mai o perofeta?

3 Nifae 14:15. “Faaeteete i Perofeta Pepelo”

• Na lapatai mai Elder M. Russell Ballard o le Korama a Aposetolo e Toasefululua e uiga ia i latou o e aoao ma faasalalauina mataupu sese: “O lea la, ia tatou nofouta i perofeta pepelo, e le gata i alii ma tamaitai, o e na tofiaina i latou lava e faailoa atu ia aoaoga o le Ekalesia ma taumafai e faasalalau atu a latou talalelei pepelo ma faatosina mai ai i latou o e mulimuli i ai e ala lea i le lagolagoina o faatasiga tetele, o tusi, ma tusi o talaaga o olaga o loo aofia ai ia faamatalaga e luitau ai ia aoaoga faavae o le Ekalesia. Ia nofouta ia i latou o e tautatala ma faasalalau e tetee i perofeta moni a le Atua ma talaiina atu ma le malosi i isi ma le le fefe ae le amanaia ai le tulaga lelei e faavavau o i latou o loo latou faaseseina… Ua latou ‘faatuina i latou lava e fai ma malamalama i le lalolagi ina ia latou maua le oloa atoa ma viiga o le lalolagi; a ua latou le saili le manuia o Siona’(2 Nifae 26:29)” (i le Conference Report, Oke. 1999, 78; po o le Liahona, Ian. 2000, 74).

Manatu e Mafaufau Loloto i ai

• O le a le eseesega o le faia o se mea lelei ma le naunautai ma le faia ma le musuā o le galuega lava lea e tasi?

• Iloilo au mafuaaga e filifili ai pe o e faia pe leai foi le sailia “muamua o le malo o le Atua” (3 Nifae 13:33).

Galuega Fautuaina

• Toe faaupuina le tele o Lauga Fa’aamuia e mafai ona e manatua. Ona siaki lea i le 3 Nifae 12:3–12 e vaai pe na faapefea mai lau taumafaiga.

• O lea le mea e moomia ona e faia ina ia e faafitia ai mafaufauga ma manaoga le amiotonu? Tusi lau fuafuaga pe faapefea ona e ausia.