Inisitituti
Mataupu 42: 3 Nifae 15–17

Mataupu 42

3 Nifae 15–17

Folasaga

I le taimi o Mose na ma’a’a ua ma loto malo le fanauga o Isaraelu. O le iuga, na latou aveesea le avanoa e ola ai i le atoaga o le tulafono maualuga (tagai Mosaea 13:29–31). Nai lo lena, faatasi ma ni vaega o le tulafono maualuga na faatagaina i latou e ola ai, o le tulafono a Mose (o le tulafono maualalo) na faaopoopo i ai e fesoasoani ia i latou e o mai ia Keriso (tagai MFF 84:18–27). Ina ua mavae Lona Toetu, na aoao e Iesu Keriso le tulafono a Mose na Ia faataunuuina i sa Nifae (tagai 3 Nifae 12:17–18). Na ia aoao ua “mavae atu mea tuai” (3 Nifae 15:2–4)ma o Ia lava o le “tulafono ma le malamalama” e mulimuli ai (3 Nifae 15:9).

A o e faitau le 3 Nifae 15–17, matau le eseesega i le va o Iutaia e le talitonu ma sa Nifae e ofi gofie aoaoga. Faatusatusa upu moni na taofia e le Faaola mai ia i latou i Ierusalema ma se faaaliga mataina na tuuina atu i Amerika. Ia matau, o le malamalama i Ana aoaoga e moomia ai le faatuatua, mafaufau lotoloto, ma le tatalo. O le a e iloa le aoga maoae o le totogiina o le tau a o e faitau e uiga i le olioli e le mafaamatalaina, e oo i ai nei soo e sili atu le faamaoni ma aafiaga faavavega o a latou fanau talitonu.

Faamatalaga

3 Nifae 15:1–10. Na Tuuina Mai ma Faataunuuina e Iesu le Tulafono a Mose

  • Na aoao mai e uluai perofeta o le Tusi a Mamona le tulafono a Mose o le a faataunuuina lava. Na saunia uma e Nifae, Iakopo, ma Apinati o latou tagata ina ia talia le faamaeaina o le tulafono a Mose. Na faailoa mai e Elder Jeffrey R. Holland o le Korama a Aposetolo e Toasefululua le mafuaaga na mafai ai ona tuuese e sa Nifae tulafono tuai ae opogi tulafono fou:

    “E manino lava na sili atu ona malamalama le faapotopotoga a sa Nifae nai lo le nuu o sa Iuta, ona o le isi vaega o le faaeteete o perofeta sa Nifae e aoao le natura fesuiai o le tulafono. Na faapea mai Apinati, ‘O lenei foi, ua fai mai outou, e oo mai le olataga mai le tulafono a Mose o lenei; ou te fai atu ia te outou, e ao ina outou tausi i le tulafono a Mose i nei aso, ae ou te fai atu ia te outou e sau aso e le toe tatau ai ona tausi i le tulafono a Mose.’ [Mosaea 13:27.] I lena agaga e tasi na faamamafaina e Nifae, ‘O le mea lea ua matou tautala atu ai e uiga i le tulafono ina ia iloa e a matou fanau ua mate le tulafono; ina ua iloa foi ua mate le tulafono e mafai ona latou faamoemoe i lena ola e ia Keriso, ia latou iloa foi le iuga na foaiina mai ai le tulafono. Pe a uma foi ona faataunuuina le tulafono ia Keriso, ina ia le tatau ona latou faamaaa o latou loto ia te ia i le aso e tatau ona aveeseina ai le tulafono.’ [2 Nifae 25:27; faaopoopo le faatusilima]

    “O lena ituaiga o aoaoga—o se lapataiga e faasaga i se tasi e faama’a’a le loto ia Keriso i le le puipuia o le tulafono a Mose—atonu e mafai ona auauna atu (ma faaolaina) le toatele o e na soifua mai i le Lalolagi Tuai i na aso ma soifua ai i lenei lalolagi i le aso” (Christ and the New Covenant [1997], 156–57).

3 Nifae 15:2–8. O Le Tulafono a Mose ma le Tulafono Maualuga

  • Na fetalai mai Iesu e faapea “ua mavae atu mea tuai, a ua faafouina mea uma” (3 Nifae 15:3). Na faamalamalama e Elder Jeffrey R. Holland faapea: “E taua le malamalama o le tulafono a Mose na tuuina i ai, ma na aofia ai, le tele o vaega patino o le talalelei a Iesu Keriso, lea na i ai muamua. E lei fuafuaina e avea o se vaega e ese mai pe faaesea mai, ma e moni lava e le o se mea e faatautee i le, talalelei a Iesu Keriso. … O lona faamoemoega e le o le faaesea mai le tulafono maualuga. O faamoemoega uma lava o le aumai o tagata ia Keriso” (Christ and the New Covenant, 147). O lea e mafai ai ona fetalai mai Iesu, “Aua faauta, e lei uma ona faataunuuina le feagaiga na ou faia ma lo’u nuu; a o le tulafono na tuuina mai ia Mose, ua faaiuina ia te au” (3 Nifae 15:8).

    Mo nisi faamatalaga e faatatau i sa Nifae ma le tulafono a Mose, tagai faamatalaga mo Mosaea 13:27–35 (itulau 152).

3 Nifae 15:5–8. E Le’i Faataunuuina Uma le Feagaiga

  • Mo se talanoaga i le uiga o le fetalaiga a Iesu ina ua Ia faapea mai, “Ou te lei faaleaogaina le au perofeta” (3 Nifae 15:6), tagai faamatalaga mo 3 Nifae 12:17–20, 46–47 (itulau 305).

    O le a le uiga o le fetalaiga a Iesu ina ua Ia fetalai, “Aua faauta, e lei uma ona faataunuuina le feagaiga na ou faia ma lo’u nuu”? ( 3 Nifae 15:8). Na faia e Ieova se feagaiga ma Aperaamo i aso anamua. Na folafolaina atu ia Aperaamo (1) manuia e faavavau, (2) o se laueleele o le a avea ma malo selesitila, ma (3) le mana o le perisitua o le Atua. O nei folafolaga na tuuina atu foi i tupuaga a Aperaamo (tagai MFF 132:30–31) ma o le a faataunuuina i le lumanai.

3 Nifae 15:11–13. “O Le Nuu Lenei o lo Outou Tofi”

  • O ituaiga taitasi e sefululua a Isaraelu na tuuina atu i ai ni eria mo lo latou tofi i le nuu o Kanana. Faaopoopo i mea na latou maua i le Nuu Paia, na folafola atu foi i tupuaga o Iosefa se vaega o laueleele o Amerika o se vaega o lo latou tofi. Na fetalai atu le Faaola i soo sa Nifae e toasefululua o i latou ma o latou tagata o “ toe tagata o le aiga o Iosefa” (3 Nifae 15:12) ma “o le nuu lenei o lo outou tofi” (fuaiupu 13).

  • Na faamatala e Elder Orson F. Whitney (1855–1931) o le Korama a Aposetolo e Toasefululua nuu o le tofi e pei o nei: “O se tasi igoa mo Amerika, ua faataga mai e le Tusi a Mamona, o le Nuu o Iosefa, na faatatau i ai le Peteriaka o Iakopo i lana faamanuiaga i ona atalii e toasefululua (Ken. 49:22–26), ma e ala mai i le Perofeta o Mose i lana tatalo faaiu faamavae i ituaiga e toasefululua o Isaraelu (Teut. 33:13–15). O le faatatauga a Iakopo ia Iosefa o se ‘laau o ia e fua i tafatafa o le vaipuna, e sosolo ona la i luga o le pa, na faataunuuina i le malaga a Liae ma e na latou o mai faatasi mai Asia i Amerika i le vasa Pasefika. E le tau faaopoopoina fua, o se tasi o itu autu i nei konetineta i sisifo o o latou atumauga maualuluga, o Andes ma Rockies, na lelei le faamatalaina e se Peteriaka Eperu ‘o mauga o le vavau,’ o se mea e sefe faalenatura ‘mo mea taua o le fogaeleele’—auro, siliva, ma isi minerale—ma mo ‘mea taua o le lagi’—ua faailoaina mai e faamaumauga paia ma isi o le a oo mai” (“The Book of Mormon: Historical and Prophetic Phases,” Improvement Era, Sete. 1927, 944–45).

3 Nifae 15:17. “Leoleo Mamoe e Toatasi”

  • E masani lava ona faasuafa Iesu Keriso o le Leoleo Mamoe Lelei (tagai MFF 50:44; Ioane 10:7–18; Alema 5:38–60; Helamana 7:18). O le atalilo o le leoleo mamoe ma lona va feagai ai ma ana mamoe e aofia ai le agalelei patino ma le popole. Na saunoa se tasi o tagata iloilo i le agalelei patino e aofia ai i le galuega a le leoleo mamoe:

    Keriso o se Leoleo Mamoe Lelei

    “O le ao ma le po e i ai le leoleo mamoe faatasi ma ana mamoe. … Na moomia lenei ona o le natura o le laueleele, ma le i ai o le lamatia mai manu feai ma tagata gaoi. O se tasi o vaaiga matagofie e masani ai i Sasae o le taitaiina lea e le leoleo mamoe o ana mamoe i le vao. … E faalagolago o Ia i ana mamoe e mulimuli atu, ma latou te faamoemoe o le a ia le tuua lava i latou. …

    “… Talu ai e i ai o ia faatasi ma i latou i taimi uma, ma loloto lona fiafia ia i latou, o lea e latalata ai le leoleo mamoe i ana mamoe. … I se tasi o aso na feiloai atu ai se faifeautalai i le leoleo mamoe i se tasi o vaega aupito matautia o Lepanona, ma sa ia fesiligia o ia i ni fesili e uiga i ana mamoe, ma isi fesili pe na na te faitauina mamoe i po taitasi. I le tali atu e na te le faia, na fesili o ia pe faapefea ona ia iloa pe o i ai uma pe leai. Na ia tali atu faapea, ‘Le Matai e, afai e te ufiufia o’u mata i se ie, ma aumai ia te au soo se mamoe ma ou tuu atu o’u lima i ona mata, e mafai ona ou ta’u atu i se sekone pe o sa’u pe leai foi” (George M. Mackie, Bible Manners and Customs [n.d.], 33, 35).

  • Na saunoa Elder Neal A. Maxwell (1926–2004) o le Korama a Aposetolo e Toasefululua, e uiga i lenei tausiga faaletagata:

    “E taua ia Iesu lava ia Lona avea ai ma leoleo mamoe ma se faiaoga! …

    “… E silafia ma agalelei Iesu i tagata taitoatasi; Na te tagai ma le totoa i mea laiti e oo mai” (That Ye May Believe [1992], 204–5).

3 Nifae 16:1–3. Isi Mamoe

  • Fuaiupu 1–3 o le 3 Nifae 16 e faamanino mai o loo i ai “isi mamoe” e ese mai sa Nifae ma na fuafuaina e le Faaola e asia i latou. O loo tau mai ia i tatou i le 3 Nifae 17:4 o isi nei o isi mamoe o “ituaiga o Isaraelu ua leiloloa.” O le Leoleo Mamoe Lelei e na te vaaia uma Lana lafu, ma agalelei atu ia i latou e pei ona moomia ai.

3 Nifae 16:3–13. O Le Faapotopotoina o Isaraelu

3 Nifae 16:4–7. O Le a Aumaia e le Tusi a Mamona ia i Tatou le Malamalama ia Keriso

  • Na faamalamalama mai e Peresitene Boyd K. Packer, Peresitene o le Korama a Aposetolo e Toasefululua, le faamoemoega autu o le Tusi a Mamona o le fesoasoani ia tatou iloa o Iesu o le Keriso:

    “O le faamoemoega autu o le Tusi a Mamona, o lana molimau ia Iesu Keriso. Mai le silia ma le 6,000 fuaiupu o le Tusi a Mamona, e silia ma le afa e faatatau tonu lava ia te Ia.

    “O lea, ‘ua matou tautalatala ia Keriso, ua matou olioli ia Keriso, ua matou talai atu Keriso, ua matou vavalo atu foi ia Keriso, ua matou tusitusi e tusa ma a matou valoaga, ina ia iloa e a matou fanau le mea latou te faamoemoe ai mo le faamagaloina o a latou agasala” (2 Nifae 25:26)”.(i le Conference Report, Ape. 2005, 8; po o le Liahona, Me 2005, 8–9).

3 Nifae 16:4–13. O ai Nuu Ese?

  • O le tele o faatatauga i le Tusi a Mamona i le upu nuu ese ua faatatau i soo se tasi e le o se Iutaia. O se Iutaia o soo se tasi o e tupuga mai ia Iuta ma soo se tasi mai le nuu o Ierusalema—e pei o fanau a Liae. Na faamalamalama e Peresitene Iosefa Filitia Samita (1876–1972) e ala i lenei faauigaga o le toatele o Nuu Ese e leai se toto o Isaraelu: “I lenei Tisipenisione o le Atoaga o Taimi, na muai taunuu mai le talalelei i Nuu Ese ona oo atu lea i Iutaia. [Tagai i le MFF 19:27.] Peitai, o Nuu Ese o e na maua le talalelei ua i ai i vaega maoae, o Nuu Ese o e i ai le toto o Isaraelu i o latou neura” (Answers to Gospel Questions, tuuf. Joseph Fielding Smith Jr., 5 volu. [1957–66], 4:39).

    Na faamatala foi e Elder Bruce R. McConkie (1915–85) o le Korama a Aposetolo e Toasefululua le mea lenei: “E oo mai lava i lenei taimi ua tatou iloa o sa Iutaia o se malo o Iuta ma le avea ai ma o latou laina o tupuaga, o nei mea uma e leai se faatatauga i le tuufaatasia o ituaiga. Ma ua matou faapea atu, i totonu o le faaaogaina o lenei faauigaga, o isi uma tagata o Nuu Ese, e aofia ai ē na totoe na leiloloa ma faataapeapeina i le malo o Isaraelu ia o loo i o latou neura le toto taua o lē o lona suafa o Isaraelu o loo faasolo ai. O lea o Iosefa Samita, o le ituaiga o Efaraima, o le matai ma le taitaiga o Iaraelu lava ia, o le Nuu Ese i ona aao na oo mai ai le Tusi a Mamona, ma tagata o le Ekalesia a Iesu Keriso o le Au Paia o Aso e Gata Ai, o e ua i ai le talalelei ma o e tupuaga mai ia Isaraelu e ala i le toto, o Nuu Ese o e tauave le olataga i sa Lamana ma Iutaia” (The Millennial Messiah [1982], 233).

3 Nifae 17:1–3. “Mafaufau i Mea ua Uma ona Ou Fai Atu Ai”

  • O nisi o tamaiti aoga o le talalelei e mafai ona lagona o le faitauina po o le faalogo i afioga a perofeta ua lava lena. O le Faaola, peitai, na ia taitaia sa Nifae ia le na o le faalogo i Ana afioga ae ia “o i o outou aiga, ma mafaufau i mea ua uma ona ou fai atu ai” (3 Nifae 17:3). O lenei, na Ia aoao, e mafai ona fesoasoani ia i latou e malamalama ma sauni o latou “manatu mo le aso a taeao” e toe afio mai ai o Ia (fuaiupu 3). E ogatasi lenei mea ma isi faaupuga o tusitusiga paia ua poloaiina i tatou e mafaufau i mea tatou te faitau i ai, vaai, ma faalogo. Na lisiina e Moronae le mafaufau o se tasi o tulaga taua i le mauaina o se molimau o le Tusi a Mamona (tagai Moronae 10:3). Na tau atu e Nifae i ona tagata faitau, “Ua fiafia lo’u agaga i mea a le Atua; e mafaufau pea lo’u loto i mea ua ou vaaia ma faalogoina” (2 Nifae 4:16).

  • Na faamatalaina e Peresitene Marion G. Romney (1897–1988) o le Au Peresitene Sili le mana o le mafaufau:

    “A o ou faitau i tusitusiga paia, sa tuuina mai ia te au se lui, ina ua ou tau ane i upu e pei o le manatunatu loloto, ia o loo faaaogaina soo i le Tusi a Mamona. O loo tau mai e le lomifefiloi, o le uiga o nei upu manatunatu loloto ‘o le fuafua lea faalemafaufau, mafaufau loloto e uiga i se mea.’ …

    “O le mafaufau i lou lava manatu, o se ituaiga lea o tatalo. Sa avea lava ma se ala e oo atu ai i le Agaga o le Alii i le tele o taimi. O loo faamatala mai e Nifae se tasi o ia taimi:

    Na ia tusia “Aua ua oo ina ua uma ona ou fia iloa mea na vaaia e lou tama, ma ua ou talitonu e mafai e le Atua ona faailoa mai ai ia te au, ina o nofonofo foi au ma ua mafaufau i lou loto, sa aveeseina au i le Agaga o le Atua, ioe, i le mauga maualuga lava. …’ (1 Ni.11:1. faaopoopo le faatusilima.)

    “Ona sosoo ai lea ma le faamatalaga a Nifae e uiga i le faaaliga tele na tuuina mai ia te ia e le Agaga o le Alii, ona sa talitonu o ia i upu a lona tama perofeta, ma sa i ai le agaga naunautai tele e fia iloa atili ma o le mea lea na manatunatu loloto ai o ia ma tatalo e tusa ai ma ia mea” (i le Conference Report, Ape. 1973, 117–18; po o le Liahona, Tesema 1973, 35).

  • O le mafaufau i mea a le Atua e fesoasoani e taofia i tatou mai le faamalieina o i tatou lava i le faalatalata atu ia te Ia. Na faamalamalama mai e Elder Neal A. Maxwell ia aafiaga le lelei o le le teufatuina e le aunoa o le talalelei i o tatou olaga: “O tagata tapuai o le Rameutoma ua latou avatu le faamanu faapenei, ua le toe ta’uta’ua lo latou Atua ‘seia oo ina latou toe faapotopoto faatasi’ i le tulaga paia. (Alema 31:23.) Matau le eseesega i le auala na faatonuina ai e Iesu e na mulimuli ia te Ia i lenei itulagi: [3 Nifae 17:3.] Tagai i le auala e taulai atu ai le Matai i le aiga—i le mafaufau, tatalo, saunia faatasi! E le tatau ona tatou maofa ai, pe afai tatou te faatulaga la tatou tapuaiga ma tuu le faamuamua maualuga i le malo, ina ia agai ai o tatou loto ma mafaufau i isi mea” (Wherefore, Ye Must Press Forward [1977], 30–31).

3 Nifae 17:4. E le o Leiloa i le Tama ia Isaraelu na Faataapeapeina

  • E ui lava o loo leiloa ituaiga o Isaraelu na faataapeapeina i le iloa o le tagata, ae e le o leiloa i latou i le Atua. Na te silafia le mea o loo i ai i latou, “aua ua silafia e ia le mea na ia taitaiina ai i latou” (3 Nifae 17:4). O Lona malamalamaaga ia i latou ma le asiasiga a le Faaola i ituaiga ua leiloa o Isaraelu ua fautuaina mai ai o le a i ai se aso e tatou te maua ai isi tala o asiasiga a Iesu i Ana mamoe.

    Na matauina e Elder Neal A. Maxwell: “E i ai tusi ua leiloa o le a o mai faatasi ma ‘oa o le a oo mai. E sili atu i le luasefulu ia tusi ua ta’u mai i tusitusiga paia. Atonu o le tusi sili ona ofoofogia ma tele, o le tala faamaumau lea a ituaiga o Isaraelu ua leiloa (tagai 2 Nifae 29:13). Semanu tatou te le iloa lena molimau lona tolu o Keriso o le a oo mai pe ana leai le tusi matagofie o le Tusi a Mamona, o le molimau lona lua mo Keriso! O le a atoa ai i lena tala faamaumau paia lona tolu. Ona taunuu ai lea o le fetalaiga a le Leoleo Mamoe Atoatoa e faapea, ‘Ona tuu faatasi ai lea o la’u upu’ (fuaiupu 14). Ona ‘tasi ai lea o le lafu ma le leoleo mamoe e tasi’ (1 Nifae 22:25) i le tuufaatasiga o tisipenisione uma Kerisiano o le talafaasolopito o tagata (tagai MFF 128:18)” (i le Conference Report, Oke. 1986, 70; po o le Liahona, Ian. 1987, 56).

3 Nifae 17:5–10. Na Faamalolo ma Faamanuia e Iesu Tagata

  • Na lagona e Iesu se faamautinoaga o le alofa maoae mo tagata, o Ona uso ma tuafafine, o loo faaalia i le 3 Nifae 17:5–10. Na Ia tau atu e aumai ia te Ia tagata mamai, ma na Ia faamalolo ia i latou uma. Na taulai atu Elder Jeffrey R. Holland i le mana o lenei taimi faaleagaga: “Valaau atu mo e pipili ma tauaso, pe setu, pe manu’a, pe lepela, pe mamae, pe tutuli pe ‘puapuagatia i se tasi mea,’ Na fetalai atu Keriso ia aumai i latou ina ia mafai ona ia faamaloloina. … O le lagonaina i lona silafia faaleatua o le manao o nei tagata e fia vaai i se vavega na ia faatinoina mo ona uso ma tuafafine i Ierusalema, ma le vave ona ia silafia ua lava lo latou faatuatua e faamalolo ai i latou, na tali atu ai Keriso i manaoga taitasi o le motu o tagata, ‘na ia faamaloloina foi i latou taitoatasi ina ua aumaia i latou ia te ia.’ I le tali atu i le sasaaina mai o le alofa ma le alofa tunoa, na punonou ai tagata uma na faamaloloina ma e ua malolo, ‘i ona vae, ma ifo atu ia te ia; o i latou uma foi o e na mafai ona o mai … ua latou feasogi i ona vae, ua iu ina mulumuluina ona aao i o latou loimata.’ [3 Nifae 17:5–7, 9–10.]” (Christ and the New Covenant, 268–69).

3 Nifae 17:11–24. “Vaai ia i O Outou Tamaiti”

  • Ao avea o ia o se peresitene aoao i le Peraimeri, na ta’ua ai e Sister Michaelene P. Grassli le mana o tamaiti mo aafiaga faaleagaga:

    “O se mea e taua e faapea … sa tuuina atu ai na o tamaiti lava e le Faaola, ni aoaoga e sili ona taua, ona faamatalaina lea o o latou laulaufaiva ina ia mafai ai ona latou aoaoina le motu o tagata. (Tagai 3 Ni. 26:14.)

    O Keriso ma tamaiti sa Nifae

    ©1995 Del Parson

    “Pe ofo ai la se tasi ina ua mavae le asiasi atu o le Faaola i tagata sa Nifae, sa latou ola i le filemu ma le amiotonu i tausaga e luaselau? Ona o aoaoga ofoofogia, faamanuiaga, ma le uai atu ia i latou ma a latou fanau, sa tumau ai le amiotonu i fanau a latou fanau i le tele o augatupulaga.

    “Aua tatou te manatu faatauvaa i le mana ma le malosi o tamaiti o aso nei e tumau ai i le amiotonu. E leai se vaega o tagata i le Ekalesia e sili atu le faigofie ona malamalama i upu moni” (“Faauta i o Outou Tamaiti,” Liahona, Ian. 1993, 116–117).

  • Na i ai se aafiaga e tali tutusa i tagata o le Ekalesia i Chile ina ua asiasi i ai Peresitene Spencer W. Kimball (1895–1985) ia i latou: “O se tasi o faailoaga maoae o le alofa i tamaiti na ou vaaia na tupu a o o’u peresitene i le siteki o Chile. Na asiasi i ai Peresitene Spencer W. Kimball i Chile mo se konafesi o le eria. Na potopoto faatasi tagata o le Ekalesia mai atunuu e fa i se fale matamata na i ai pe tusa ma le sefululima afe o tagata. Na ma fesili atu ia Peresitene Kimball po o le a le mea ua ia finagalo e fia faia pe a maea le konafesi. Ma loimata, na ia saunoa faapea, ‘Ou te fia vaai i tamaiti.’ Na faasalalauina e se tasi o taitai perisitua i le mea faaleotele leo e fia faatalofa Persitene Kimball pe faamanuia i tamaiti uma o loo i le fale matamata. Na maofa tagata—ma na i ai se filemu maoae. Na faafeiloai taitasi e Peresitene Kimball e tusa ma le lua afe tamaiti, tutulu a o ia luluina o latou lima pe sogi atu ia i latou i o latou ulu ma faamanuia i latou. Na matua migao ma fetagisi foi tamaiti ma vaai atu ia te ia. Na ia faapea mai Na te le i lagonaina lava lenei ituaiga agaga i lona olaga. O se taimi maoae tele i o matou olaga uma o tagata o le Ekalesia iina” (Janet Peterson and Eduardo Ayala, “Friend to Friend,” Friend, Mat. 1996, 6–7).

Manatu e Mafaufau i ai

  • O le a lou manatu i le uiga o le fetalaiga a le Faaola, “Faauta, o a’u o le tulafono ma le malamalama”? (3 Nifae 15:9).

  • Aisea e te manatu ai na tau atu e Iesu Keriso i tagata ia latou mafaufau i mea na Ia aoao atu ia i latou ma ole atu i le Tama Faalelagi mo se malamalamaaga? Aisea na taua ai lenei faagasologa i le saunia o i latou mo le isi Ana asiasiga?

  • O a mea ua e faatauaina i lou malamalama i feagaiga i le Tusi a Mamona?

Galuega Fautuaina

  • Faasoa i se uo po o se tagata o le aiga le faamalamalamaga o le tauina mai “o isi mamoe” i le Ioane 10:16mau tauloto e faatatau i le.

  • Talanoa ma se uo pe faape’i le avea ma se tasi o e na molimauina vavega ofoofogia ma mea na tutupu na faamatalaina i le 3 Nifae 15–17.