Moronae 7

Folasaga

O i ua tatou faitau ai i le lauga maoae a Mamona e pei ona faamaumauina e lona atalii o Moronae. I luma atu o Moronae 7, o le galuega faatusipaia a Mamona na faapitoa lava i le faapupuuina o tusitusiga a isi perofeta. O i ua tatou faitau ai i le lauga maoae a Mamona na ia tuuina atu i se vaega amiotonu o tagata o le Ekalesia (tagai Moronae 7:2–3). Na aoaoina e Mamona le Au Paia na ola i se lalolagi ua mou atu le faaleagaga ina ia faalatalata atili i le Atua. O lenei aoaoga ua faamamafaina ai le manaomia o le uunaiga po o le faamoemoega sao o a tatou taga fai, pe faapefea ona iloatino le eseesega i le va o le lelei ma le leaga, ma le faia taua i le va o le faatuatua, faamoemoe, ma le alofa moni.

Faamatalaga

Moronae 7:2–3. “Le Malologa o le Atua”

E masani lava ona taua e tusitusiga paia le “malologa o le Atua.” Ina ua uma ona ia sii mai le Moronae 7:3, na tusia e Peresitene Iosefa F. Samita (1838–1918):

“O se fuaiupu taua tele lenei. O le malologa o loo taua iinei e le o le malologa faaletino, aua e leai se mea faapea o se malologa faaletino i le Ekalesia a Iesu Keriso. O le mau o loo faatatau i le malologa faaleagaga ma le filemu e fanau mai i se talitonuga maumaututu o le mea moni i mafaufau o tagata. Atonu e mafai ai loa ona tatou ulufale atu i le malologa o le Atua i le aso, e ala lea i le o mai i se malamalama o mea moni o le talalelei. … E le manaomia e tagata uma ona sailia lenei malologa, aua e toatele ua mauaina nei, ua faamalieina o latou mafaufau, ma ua faasaga atu o latou fofoga i le faataunuuina o latou valaauga paia faatasi ai ma se naunautaiga le vaaia i o latou loto ia tumau i le mea moni, ma ua savavali i le lotomaualalo ma le amiotonu i le ala ua faailogaina mo le Au Paia o e ua avea ma soo mautinoa o Iesu Keriso. …

“Ou te faafetai i lo tatou Tama ua ou mauaina se malamalamaaga o lenei mea moni, ua ou iloa o Iesu o le Keriso, e na o ia lava e maua ai le malologa ma le faaolataga. Ao soifua le Atua, o e faaseseina o i latou ia e mulimuli i tagata ma a latou filosofia; ae fiafia i latou o e ulufale atu i le malologa o soo filemu o Keriso, mauaina le faamoemoe atoa mai lenei taimi agai i luma seia latou malolo ma ia i le lagi” (Gospel Doctrine, lom. Lona 5 [1939], 126, 128).

Moronae 7:3–4

O le a le uiga ia avea ma se “soo agamalu” o Keriso ma ia “savali i le agamalu”? (tagai foi i le MFF 19:23).

Moronae 7:6–9. “Ma le Loto i ai”

Na aoao mai Elder Dallin H. Oaks o le Korama a Aposetolo e Toasefululua o tagata uma lava e maua avanoa e tele e tuuina atu ai le meaalofa o le auauna atu i o latou uso a tagata ma o latou faamoemoega mo le auauna atu e taua uma lava:

“E tele mau ua aoao mai e silafia e lo tatou Tama Faalelagi o tatou mafaufauga ma faamoemoega o o tatou loto. (Tagai MFF 6:16; Mosaea 24:12; Alema 18:32.) Na aoao mai le perofeta [Mamona] afai e fia togia a tatou galuega mo le lelei, e tatau ona faia mo le faamoemoega sao. …

“… Ua faamanino mai e mau, ina ia mama a’ia’i la tatou auaunaga i le Ekalesia ma o tatou tagata, e manaomia le mafaufau e le gata i le pe faapefea ona tatou auauna atu, ae pe aisea foi tatou te auauna atu ai.

“E auauna atu tagata i isi mo mafuaaga eseese, ma o nisi mafuaaga e sili atu i lo isi. … E tatau ona tatou taumafai e auauna atu mo mafuaaga e sili le maualuga ma lelei.

“… O se auala e faamalamalama ai, e aunoa ma le faafoliga ua atoatoa, o le a ou fautuaina atu mafuaaga e ono. O le a ou talanoaina nei mafuaaga e amata mai le sili ona maualalo e oo atu i mafuaaga e sili atu ona lelei mo auaunaga.

“[1] O nisi atonu e auauna atu ma se faamoemoega mo se taui faalelalolagi. …

“[2] O le isi mafuaaga mo le auauna atu— … ia maua ai se faauoga lelei. …

“[3] O nisi atonu e auauna atu ona o le fefe i le faasalaga. …

“[4] O nisi tagata atonu e auauna atu ona o se lagona o lana tiute pe ona o le faamaoni i uo po o aiga po o tu masani. …

“[5] O le tasi o mafuaaga maualuga atu mo le auauna atu o le faamoemoe i se taui faavavau. …

“[6] … O le mafuaaga sili atu ona maualuga o na mafuaaga uma. … Alofa Moni. …

“… E le lava le auauna atu i le Atua ma lo tatou mafaia atoa ma le malosi atoa. O Ia o Le silasila i totonu o tatou loto ma silafia o tatou mafaufau e manaomia le sili atu nai lo lenei. Ina ia tutu ma le le pona i luma o le Atua i le aso mulimuli, e tatau foi ona tatou auauna atu ia te ia ma o tatou loto atoa ma le mafaufau atoa.

“O le auaunaga ma le loto atoa ma le mafaufau atoa o se lui maualuga mo i tatou uma lava. O lea ituaiga auaunaga e tatau ona leai se faamoemoega e manatu faapito. E tatau ona uunaia tau lava o le alofa mama o Keriso” (i le Conference Report, Oke. 1984, 13–16; po o le Ensign, Nov. 1984, 12–15).
Na faasoa mai e Peresitene Marion G. Romney (1897–1988) o le Au Peresitene Sili le aafiaga patino lenei e faatatau i le taua o mafuaaga mama mo le faia o mea amiotonu:

“Tusa o le afa seneturi ua tuanai na ma malaga atu ai ma Sister Romney i se uarota faatoa amata lava ona fausia se falelotu. O le tele o le saofaga na manatu le epikopo e tatau ona ou tuuina atu na faateia tele ai au. Na ou manatu sa tatau ona itiiti ifo nai le faaluaina o le saofaga sa ia fautuaina ai au. Ae ui i lea, faatoa maea ona valaauina au i se tofiga sa fai si maualuga i le Ekalesia, ma sa le lelei lou [fai atu leai]. O le mea lea, na ou fai atu ai, ‘Ua lelei, o le a ou totogia, Epikopo, ae o le a ou totogia faavaega ona e le o i ai sau tupe.’ Ona ou amata lea ona totogi. Ma na ou totogi ma totogi seia oo lava i totogi mulimuli e tolu, ma, e tusa ai ma lau masani, sa ou faitauina le Tusi a Mamona, ma tau atu i le mau o faapea mai:

“‘… A foa’i e se tagata … se meaalofa … ma le muimui; o le mea lea e tauia ai ia te ia e peiseai ua taofia e ia le meaalofa; o lea e tauleagaina ai o ia i luma o le Atua.’ (Moronae 7:8.)

“O lenei mea na matua faateia ai lava au aua ua uma ona ou totogia tusa ma le afe tala. Ia, sa faaauau ona ou totogi vaega o totoe e tolu na ou folafola atu e totogi, ma na ou totogi atu foi nai nisi vaega faasili ina ia faamaonia atu ai i le Alii na ou faia lena mea faatasi ma le uiga sao” (“Mother Eve, a Worthy Exemplar,” Relief Society Magazine, Fep. 1968, 84–85).
Na aoao mai e Peresitene Henry B. Eyring o le Au Peresitene Sili o le tatalo ma le manatu i ai e aofia ai se naunautaiga e usitai i soo se faatonuga mai le Alii: “Na faaali mai e le taulealea o Iosefa Samita ia i tatou le auala e tatalo ai faapena. Na talitonu o ia i le folafolaga o loo i ai i le tusi a Iakopo. Na alu atu o ia i le togavao ma le faatuatua o le a tali mai lana tatalo. Na manao e fia iloa po o le fea ekalesia e auai atu i ai. Na lava lona usiusitai e saunia ai e faia soo se mea e poloaiina ai o ia. O lea sa ia tatalo ai, e tatau foi ona faapena i tatou, ae ua uma ona tautino atu o le a ia usiusitai” (i le Conference Report, Oke. 2003, 95; po o le Liahona, Nov. 2003, 90).

Moronae 7:12–19.
O Le Malamalama o Keriso

O loo maua i le Bible Dictionary le faamalamalamaga lenei:

“O le malamalama o Keriso e pei lava o upu o loo tuuina mai: faamalamalamaina, poto, ma se siitiaina, faaamiotonuina, faasao uunaiga e oo mai i tagata ona o Iesu Keriso. Mo se faataitaiga, O Keriso o ‘le malamalama moni e faamalamalamaina ai tagata uma e o mai i le lalolagi’ (MFF 93:2; Ioane 1:9). O le malamalama o Keriso e faatumulia ‘mea uma i le vavaloloa’ ma o le ala lea e mafai ai e Keriso ona i ai ‘i mea uma, ma e ala atu i mea uma, ma siomia mea uma.’ E ‘faaola i mea uma’ ma o le ‘tulafono lea e pulea mea uma.’ E faapea foi ‘o le malamalama e faapupulaina’ le malamalama o tagata (tagai MFF 88:6–13, 41). I lenei tulaga, o le malamalama o Keriso e fesootai atu i le mafaufau o le tagata ma ta’u atu ia te ia le lelei mai le leaga (tagai Moro. 7:12–19).

“E le tatau ona fenumiaia le malamalama o Keriso ma le peresona o le Agaga Paia, aua o le malamalama o Keriso e le o se peresona ia. O lana uunaiga e muamua i luma ma e saunia se tasi e talia le Agaga Paia. O le a taitaia e le malamalama o Keriso le agaga faamaoni e ‘gauai i le leo’ e sailia le talalelei moni ma le Ekalesia moni ma iu ina maua le Agaga Paia (tagai MFF 84:46–48)” (“Light of Christ,” 725; tagai foi Guide to the Scriptures, “Light, Light of Christ”; Faamaoni i le Faatuatua: O se Tusitaiala o le Talalelei [2004], 101).
“O le lotofuatiaifo o se faailoga o le Malamalama o Keriso ua mafai ai e i tatou ona iloa le lelei mai le leaga” (Faamaoni i le Faatuatua, 96). O le “Agaga o Keriso” (Moronae 7:16) ma le “malamalama o Keriso” (fuaiupu 18–19) o fuaitau faaletusipaia e masani ona faaaogaina tutusa lava.

Na molimau mai Peresitene Boyd K. Packer, le Peresitene o le Korama a Aposetolo e Toasefululua, o lenei malamalama o se meaalofa o le a fesoasoani ia i tatou ia iloa le eseesega i le va o le lelei ma le leaga:

“E tusa lava pe o lenei malamalama i totonu, o le iloa lea o le sao ma le sese, ua taua o le Malamalama o Keriso, i le uiga po o le manatu, e mafai ona taitaiina i tatou e suia a tatou amioga—sei vagana ai ua tatou taofiofia pe le amanaiaina foi. …

“O alii, tamaitai ma tamaiti uma o soo se malo, talitonuga, po o lanu—o soo se tasi lava, e tusa lava po o fea latou te nonofo ai pe o a foi o latou talitonuga po o a foi mea latou te faia—o loo i totonu o i latou le Malamalama o Keriso e le fano lava” (“O Le Malamalama o Keriso,” Liahona, Ape. 2005, 8, 10).
Na faailoa mai e Peresitene Iosefa Filitia Samita (1876–1972) nisi o eseesega i le va o le Agaga Paia ma le Malamalama o Keriso:

“E le tatau ona feaveaiina le Agaga Paia ma le Agaga e faatumulia le atulaulau ma o loo i ai i mea uma. O le isi nei Agaga e le patino i le tagata lava ia ma e leai sona lapoa, po o se lautele; e sau mai le afioaga o le Tama ma le Alo ma e i ai i mea uma. E tatau ona tatou talanoa i le Agaga Paia o se peresona e pei o ‘ia [tagata]’ ao le isi nei Agaga e pei o ‘ia [le o se tagata],’ e ui lava pe a tatou talanoa i le mana po o le meaalofa o le Agaga Paia atonu tatou te fai sao atu lava ‘ia.’

“O le Agaga Paia, e pei ona aoaoina i tatou i faaaliga o ona po nei, o le sui auai lona tolu o le Aigaatua ma o se peresona o Agaga. O nei fuaitau e tutusa uma lava le faaaogaina: Agaga o le Atua, Agaga o le Alii, Agaga o le Upu Moni, Agaga Paia, Fesoasoani; e faatatau uma lava i le Agaga Paia. O fuaitau foi lava na e faaaogaina e faatatau i le Agaga o Iesu Keriso, e ta’ua foi o le Malamalama o le Upu Moni, Malamalama o Keriso, Agaga o le Atua, ma le Agaga o le Alii; ae peitai e mavaevae ma taitoatasi i latou. Ua tele lava lo tatou le mautonu ona tatou te le i faamalamalamaina manino lena mea i o tatou mafaufau” (Doctrines of Salvation, tuuf. Bruce R. McConkie, 3 vol. [1954–56], 1:49–50).
O musumusuga a le Atua e ala mai i le Malamalama o Keriso e le faatapulaaina na o tagata o lenei Ekalesia. O le Malamalama o Keriso ua uunaia ai le tele o taitai o le lalolagi.

“Na taua e le Au Peresitene Sili:

“‘O taitai faalelotu maoae o le lalolagi e pei o Moameta, Konefasio, ma i latou na Toefaatulagaina, e faapena foi le au faitofa manino e aofia ai Sokarate, Palato, ma isi, na latou mauaina se vaega o le malamalama o le Atua. Sa tuuina atu e le Atua ia i latou mea moni mama ina ia faamalamalamaina ai atunuu uma ma ia aumaia ai i se tulaga maualuga atu le malamalama o tagata taitoatasi. …

“‘Matou te talitonu ua tuuina mai e le Atua ma o le a saga tuuina mai pea lava e le Atua i tagata uma le malamalama ia tele ma ia lava e fesoasoani ai ia i latou a o agai atu i le faaolataga e faavavau’ (Savali a le Au Peresitene Sili e faatatau i le Alofa o le Atua i Tagata uma lava, 15 Fep. 1978)” (James E. Faust, i le Conference Report, Ape. 1980, 15; po o le Liahona, Mati 2002, 4).
Na faamalamalama mai e Elder Robert D. Hales o le Korama a Aposetolo e Toasefululua le faia i le va o le Malamalama o Keriso ma le meaalofa o le Agaga Paia:

“E tofu aumaia e i tatou taitoatasi i le lalolagi—le Malamalama o Keriso. …

“I le faaaogaina o le Malamalama o Keriso e iloatino ai ma filifili le mea tonu, e mafai ai ona taitaiina atu i tatou i se malamalama e sili atu: o le meaalofa o le Agaga Paia” (i le Conference Report, Ape. 2002, 80; po o le Liahona, Iulai 2002, 77).

Moronae 7:17.
Musumusuga mai Punaoa e Le Tusa ai

O loo ia Satani le malosiaga e tuuina mai ai faaaliga sese ia i latou o loo taumafai e faamalosia pe tauanau faaaliga. O le fesootaiga mai ia Satani o le a taitaieseina i tatou mai ia Keriso i taimi uma lava. Na fautuaina i tatou e Peresitene Boyd K. Packer e uiga i nei savali faaleagaga sese:

“Ia e mataala ina nei faaseseina oe e musumusuga mai se ala e le tusa ai. E mafai ona tuuina atu ia te oe ni savali faaleagaga pepelo. O loo i ai ni agaga pepelo e pei foi ona i ai ni agelu pepelo. (Tagai Moro. 7:17.) Ia e faaeteete ina nei faaseseina oe, aua e mafai ona sau le tiapolo e tau faasese mai e pei o se agelu o le malamalama.

“O lo tatou itu faaleagaga ma lo tatou itu faalemafaufau e felatai lava lona sootaga e mafai ai ona sese i se lagona faalemafaufau faapea o se mea faaleagaga. O nisi taimi tatou te maua ai tagata ua faaseseina i le faapea o na musumusuga e faaleagaga mai le Atua, ae tainane o na musumusuga e mafua mai lagona pe tupu mai foi i le tiapolo.” (“O Le Lamepa a le Alii,” Liahona, Tes. 1988, 32–37).

Moronae 7:19–25. “Fetagofi atu i Mea Lelei Uma”

Na aoao mai Mamona o le faatuatua o le ki e fetagofi atu ai i mea lelei uma (tagai Moronae 7:25). I le faamalamalamaina pe faapefea ona fetagofi atu i mea lelei uma” i le faatuatua, na aoao mai i le savali a faiaoga asiasi a le Aualofa:

“O le atiina ae o se molimau patino o le maua lea o se faanaunauga ma le faia o filifiliga na e faateleina ai lo tatou faatuatua ma le faamoemoe. A o tatou naunau e ‘uumau i mea lelei uma,’ e manaomia e i tatou ona filifili taumafaiga na e faateleina ai lo tatou faatuatua:

“Tatou te fuafuaina ni taimi taua e fai ai tatalo.

“Tatou te manatua ma toe faafou e le aunoa a tatou feagaiga e ala i le taumamafa i le faamanatuga ma o i le malumalu.

“Tatou te faaaogaina tusitusiga paia e fai ma faafanua patino taiala e taitaiina i tatou i mea tatou te faia.

“Tatou te atiina ae ni faauoga ma tagata o e fesoasoani mai ia i tatou e faatupuina a tatou molimau.

“Tatou te avea galuega auauna atu ma mea tatou te faia i aso taitasi.”

(“Fetagofi atu i Mea Lelei Uma,” Liahona, Ape. 1991, 25).
A o galue ai i le au peresitene aoao o le Peraimeri, na saunoa mai Sister Michaelene P. Grassli pe afai tatou te faia mea lelei ua tatou faaogatasi i tatou ma le Atua: “E mafai ona tatou aoaoina o tatou lagona faaleagaga i lena auala e tasi ina ia mafai ona tatou iloa le finagalo o lo tatou Tama o i le lagi mo i tatou. Tatou te aoaoina lo tatou poto faaleagaga i le faia o mea lelei. Ua aoaoina i tatou ia ‘sailiili ma le filiga i le malamalama o Keriso, ina ia outou iloa le lelei mai le leaga; afai tou te fetagofi atu i mea lelei uma lava, ae le tauleagaina ai, e moni, e fai outou ma fanau a Keriso.’ (Moro. 7:19.)” (“Mulimuli ia te Ia,” Liahona, Ian. 1990, 96).

Moronae 7:22–32

E faapefea e mataupu faavae o loo talanoaina i nei fuaiupu ona fesoasoani ia i tatou ia “fetagofi atu i mea lelei uma”?

Moronae 7:29–31. Agelu Auauna

Na faamalamalama mai e Elder Jeffrey R. Holland o le Korama a Aposetolo e Toasefululua o le Tusi a Mamona ua faaalia le moni o agelu:

“Ua faamautinoaina au o se tasi autu loloto o le Tusi a Mamona o le matafaioi ma le i ai pea ma le totonugalemu o le faatinoga a agelu i le tala o le talalelei. …

“O se tasi o mea o le a sili atu ona taua i o tatou olaga i le umi atu o lo tatou ola o le i ai moni lea o agelu, la latou galuega ma la latou auaunaga. Ou te le o faatatau i i na o le agelu o Moronae ae faatatau foi i na agelu auauna e sili atu le patino o loo faatasi ma tatou ma siomia ai tatou, ua faauuina e fesoasoani ia i tatou ma latou te faia tonu lava lena mea (tagai i le 3 Ni. 7:18; Moro. 7:29–32, 37; MFF 107:20). …

“Ou te talitonu e manaomia lo tatou lauga ma talitonu ma molimau e uiga i galuega a agelu e sili atu nai lo le mea o tatou faia i nisi o taimi. O se tasi lena o auala sili a le Atua o molimau mai le veli, ma e leai se isi tusitusiga i lenei lalolagi o loo aoao mai ai lena mataupu faavae i se auala e matua manino ma matua maoae nai lo le Tusi a Mamona” (“For a Wise Purpose,” Ensign, Ian. 1996, 16–17).
Na aoao mai e Elder Bruce C. Hafen o le Fitugafulu o agelu o loo faaauau pea ona auauna atu i le fanauga a tagata:

“O le galuega a nei agelu lē mavaaia o loo fai i ni tulaga musuia o fesootaiga i le va o le lagi ma le lalolagi, o loo faaalia manino mai ai le popole o le Atua mo i tatou ma faaeeina mai ai le faamaoniga lata mai ma le lagolagoina faaleagaga ia i latou o loo matua manaomia le fesoasoani. …

“O afea e o mai ai agelu? Afai tatou te saili ia agavaa, o loo latalata mai i latou ia i tatou pe a tatou matua manaomia i latou” (“When Do the Angels Come?” Ensign, Ape. 1992, 12, 16).

Moronae 7:29–31

O le a tonu lava le misiona a agelu auauna?

Moronae 7:32–39. Faatuatua Ia Iesu Keriso

Na fautuaina i tatou e Elder Richard G. Scott o le Korama a Aposetolo e Toasefululua i le uiga o le mauaina o le faatuatua ia Iesu Keriso:

“O le mauaina o le faatuatua mausali ia Iesu Keriso, o le faasusuluina lea o lou olaga i le malamalama pupula silisili. E le tuua na o oe e tauivi ma lui e le mafai ona e foia pe e te pulea, aua ua Ia fetalai mai, ‘Afai tou te faatuatua ia te au e ia te outou le mana e fai mea uma e tatau ia te au’ (Moronae 7:33; faaopoopo le faatusilima).

“Afai ua vaivai lou loto, mafatia i le agasala, ma’i, nofo toatasi, pe ua e manaomia se fesoasoani ma se lagolago malosi, ou te molimau atu ma le faamaoni, o le a e maua le fesoasoani pe a e mulimuli i tulafono faaleagaga ua faavae ai. O Ia o lou Tama. O oe o sona atalii/afafine. E alofa o Ia ia te oe. Ua ou mautinoa o le a Ia faamanuia mai ia te oe” (i le Conference Report, Oke. 1991, 118; po o le Liahona, Ian. 1992, 100).

Moronae 7:40–44. Faamoemoe

Na saunoa mai Mamona e uiga i se faamoemoe lena e oo mai pe fanau mai i le faatuatua ia Keriso (tagai Moronae 7:40, 42). O le faamoemoe, e totonugalemu i le soifua ma le misiona a le Alii o Iesu Keriso, e i ai le mana e siitia ai i tatou i luga atu soo se faigata lava atonu tatou te feagai. Na aoao mai Peresitene James E. Faust (1920–2007) o le Au Peresitene Sili o le faamoemoe e aumaia le filemu i se olaga puapuagatia:

“E tele naua punaoa o le faamoemoe e sili atu nai lo lo tatou atamai, o lo tatou aoaoina, o lo tatou malosi, o lo tatou gafatia. O se tasi o ia faamoemoe o le meaalofa lea o le Agaga Paia. O le ofoofogia o le faamanuiaga a lenei sui o le Aigaatua, ua mafai ai ona tatou ‘iloa le moni o mea uma’ [Moronae 10:5].

“O le faamoemoe o le taula lea o o tatou agaga. Ou te le iloa lava se tagata na te moomiaina le faamoemoe—pe laitiiti pe matua, malosi pe vaivai, mauoa pe mativa. E pei ona apoapoai mai le Tusi a Mamona, ‘O lea, ai se faatuatua i le Atua e mafai e ia ona faamoemoe ma le mautinoa i se lalolagi e sili ona lelei, ioe, o se tofi i le itu taumatau o le Atua, o lea faamoemoe e mai le faatuatua, e fai ai foi ma taula i agaga o tagata, e faamaoni ma faamausali ai i latou e alualu i luma ma le le aunoa i galuega lelei, e ala mai ai foi le viiga i le Atua.’ [Eteru 12:4; faaopoopo le faatusilima]. …

“O tagata uma lava i lenei olaga e i ai o latou luitau ma faigata. O se vaega lena o lo tatou suesueina i la le tino nei. O le mafuaaga o nisi o nei faigata e le mafai ona malamalama gofie i ai sei vagana ai o le faatuatua ma le faamoemoe aua e masani lava ona i ai se mafuaaga tele lea tatou te le malamalama i ai. O le filemu e maua mai le faamoemoe” (i le Conference Report, Oke. 1999, 73; po o le Liahona, Ian. 2000, 70).
Na aoao mai Elder Joseph B. Wirthlin (1917–2008) o le Korama a Aposetolo e Toasefululua e mafai ona tatou maua le faamoemoe, ona o loo avanoa pea mo i tatou le fesoasoani mamana: “Afai foi e agai mai matagi o puapuaga, o lo tatou Tama na te taulaina i tatou i lo tatou faamoemoe. Ua folafola mai le Alii, ‘Ou te le tuua outou o matuaoti,’ [Ioane 14:18] ma o le a Ia ‘faapaia [o tatou] puapuaga e fai mo [tatou] manuia.’ [2 Nifae 2:2.] Afai foi pe a foliga lofituina i tatou i tofotofoga po o faigata, e mafai ona tatou maua mai le malosi ma le faamoemoe mai le folafolaga faamaoni a le Alii: ‘Aua nei fefefe, aua foi nei matatau outou … ; aua e le o la outou taua lenei, a o le Atua’ [2 Nofoaiga a Tupu 20:15]” (i le Conference Report, Oke. 1998, 33; po o le Liahona, Ian. 1999, 28).

Moronae 7:43–44. “Agamalu, ma Loto Maualalo”

Na faamatala mai e Epikopo H. David Burton o le Au Epikopo Pulefaamalumalu ia uiga mama ma le gasologa o le mauaina o le agamalu: “O le agamalu e taua i le faateleina ona avea e pei o Keriso. A aunoa ma lea uiga e le mafai e se tasi ona atiina ae isi uiga taua. Na faailoa mai e Mamona, ‘E le talia e le Atua se tasi, na o e agamalu ma loto maualalo’ (Moronae 7:44). O le mauaina o le agamalu o se faagasologa. Ua poloaiina i tatou ina ia ‘ave [le] satauro i aso fai soo’ (Luka 9:23). O lo tatou siiina o le satauro e le tatau ona avea ma se mea e fai faavaitaimi. O le tele o le agamalu e le faaliliuina faapea o le tele o le vaivai, ae o le ‘faailoga lea o le tagata ua i ai uiga o le agalelei ma le filemu. E atagia ai le malosi, toamalie, ma se lagona lelei atoatoa o le tagata ia te ia lava ma le lotopulea’ (Neal A. Maxwell, “Meekly Drenched in Destiny,” i le Brigham Young University 1982–83 Fireside and Devotional Speeches [1983], 2). O le tele o le agamalu o le a mafai ai ona aoaoina i tatou e le Agaga” (i le Conference Report, Oke. 2004, 104–5; po o le Liahona, Nov. 2004, 99).

Moronae 7:44. Faatuatua, Faamoemoe, ma le Alofa Moni

Na faamalamalama mai e Elder M. Russell Ballard o le Korama a Aposetolo e Toasefululua le faia i le va o mea moni o le faatuatua, faamoemoe, ma le alofa moni:

“Na aoao mai le Aposetolo o Paulo e tolu faavae paia na te faatuina se faavae, lea e mafai ona tatou atiina ae ai se tulaga o o tatou olaga. O le faatuatua, faamoemoe ma le alofa. (Tagai 1 Korinito 13:13.) E aumaia faatasi e nei mea ia i tatou se faavae lagolago e pei o vae o se nofoa maualuga vaetolu. E taua mataupu faavae taitasi, ae i ai foi se tiute lagolago taua o na mataupu taitasi. E le mafai ona atoa le isi e aunoa ma isi mea e lua. E fesoasoani le faamoemoe e faatupuina le faatuatua. E faapena foi, o le faatuatua moni e fanau mai ai le faamoemoe. A amata loa ona leai so tatou faamoemoe, ona tatou vaivai foi lea i lo tatou fuafaatatau o le faatuatua. O le galulue faatasi o le mataupu o le faatuatua ma le faamoemoe, e tatau ona o faatasi ma le alofa, o le mea pito sili lena o mea uma. E tusa ai ma le tala a Mamona, ‘o le alofa moni o le alofa mama lea o Keriso, e tumau ia e faavavau’ (Moronae 7:47). O le faaalia atoatoa lea o lo tatou faatuatua ma le faamoemoe.

“O le galulue faatasi, o le a fesoasoani ai nei mataupu faavae faavavau e tolu, tatou te maua ai se vaaiga mamao faavavau lautele tatou te manaomia, e faafeagai ai ma lui faigata o le olaga, e aofia ai tofotofoga valoia o aso mulimuli. O le faatuatua moni e faatupuina ai le faamoemoe mo le lumanai; e mafai ona tatou tepa i luma atu o i tatou lava ma mea o popole ai i le taimi nei. O le faamalosia i le faamoemoe, e uunaiina ai i tatou e faatino le alofa mama o Keriso, e ala atu i mea tatou te faia i aso taitasi o le usiusitai ma galuega auauna atu faa-Kerisiano ” (i le Conference Report, Oke. 1992, 44; po o le Liahona, Ian. 1993, 41).
Na faamalamalama mai e Elder Neal A. Maxwell (1926–2004) o le Korama a Aposetolo e Toasefululua le auala na matua faalagolago ai ia Iesu Keriso uiga o le faatuatua, faamoemoe, ma le alofa moni:

“E le o se mea e ofo ai, le i ai o se sootaga malosi o le lio o le faatuatua, faamoemoe, ma le alofa mama, ua aumai ai i tatou ia Keriso: o le faatuatua ua faavae i le Alii o Iesu Keriso, o le faamoemoe ua faavae i Lana togiola, a o le alofa , o le ‘alofa mama o Keriso’ (tagai Eteru 12:28; Moronae 7:47). O ia uiga taitasi tatou te agavaa ai mo le malo selesitila (tagai Moronae 10:20–21; Eteru 12:34). Peitai, ae tatou te le i mauaina ia uiga taitasi, e ao ina muamua ona tatou lotomaualalo ma agamalu (tagai Moronae 7:39, 41).

“Ua fesootai pea le faatuatua ma le faamoemoe, ma atonu e le mailoa i taimi uma lo la eseesega tonu, ma lo la faasologa. E ui e le o se malamalama atoatoa foi, a e o taunuuga faaolaina o le faamoemoe e ‘mautinoa’ e moni (Eteru 12:4; tagai foi i le Roma 8:24; Eperu 11:1; Alema 32:21). I le faanumeraina o talitonuga toefuataia e uiga i le Atua, e sili atu le lautele o le faamoemoe nai lo le faatuatua. A faalauteleina le faatuatua, ua faapea foi ona lautele atu le faamoemoe” (i le Conference Report, Oke. 1994, 45; po o le Liahona, Ian. 1995, 41).

Moronae 7:44–48
Alofa Moni: O Le Alofa Mama o Keriso

O nisi e vaai i le alofa moni o se mea e mafai ona tatou mauaina e i tatou lava e ala atu ia tatou lava taumafaiga fuafuaina ma gaoioiga faapitoa. Ae ui i lea, o le mauaina o le alofa o Keriso, e manaomia ai le fesoasoani ma faamanuiaga a lo tatou Tama Faalelagi. Na uunaia i tatou e le perofeta o Mamona ia saili le alofa moni ma ia “tatalo atu i le Tama ma le malosi uma o le loto”; ma o lona alofa e “foaiina mai ia te i latou uma o e ua fai ma soo faamaoni o lona Alo o Iesu Keriso” (Moronae 7:48).

Na faamalamalama mai e Elder Robert J. Whetten o le Fitugafulu: “E faapei foi o le faatuatua, o le alofa faa-Keriso o se meaalofa a le Agaga, lea e tuuina mai i luga o mataupu faavae o le amiotonu faaletagata ma e tusa ai ma le maualuga o lo tatou usiusitai i le tulafono lea e autu ai. E faapei foi o le faatuatua, e tatau ona faaaogaina le alofa ina ia tupu” (i le Conference Report, Ape. 1999, 37; po o le Liahona, Me 1999, 34).
Na faamatala mai e Elder Dallin H. Oaks le alofa moni ma le mea e tatau ona fai e se tasi ina ia maua ai: “O le alofa moni, o le alofa mama lea o Keriso’ (Moronae 7:47), e le o se amioga ae o se tuutuuga po o se tulaga o le faatinoina. E atiina ae le alofa mama i faatinoga faifai pea e taunuu ai i le liua. O le alofa mama o se mea lea e mafai ona avea ai se tasi. O le mea lea, e pei ona tautino mai e Moronae, ‘Seiloga ua i ai le alofa i tagata, o le a le mafai ona maua e i latou’ le nofoaga ua saunia mo i latou i le maota o le Tama (Eteru 12:34; faaopoopo le faatusilima)” (i le Conference Report, Oke. 2000, 43; po o le Liahona, Ian. 2001, 42).
Na aoao mai e Elder Jeffrey R. Holland mafuaaga e avea ai le alofa moni o se faamanuiaga i o tatou olaga:

“O le faauigaga sili o le ‘alofa mama o Keriso,’ po o le a lava, e le o le mea o loo tatou taumafai i ai i le avea ai ma kerisiano ae matuai toilalo lava i le faataitaia i isi ae peitai o le faamanuiaina atoa lava o Keriso i le faataitaia mai ia i tatou. O le alofa moni sa’o lava na vaaia i le na o le tasi le taimi. O loo faaalia i le atoatoa ma le mama i le alofa manumalo, faaiu ma le togiola a Keriso mo i tatou. O le alofa lena o Keriso mo i tatou ‘e onosai, ma e agalelei, ma e le losilosi.’ O lona alofa lena mo i tatou e le ‘faafefeteina … , le faaitaita gofie, le mafaufau i le leaga.’ O le alofa lena o Keriso mo i tatou e ‘talia mea uma, talitonu i mea uma, faamoemoe i mea uma, onosai i mea uma.’ E pei ona faataitaia e Keriso e ‘le uma le alofa.’ O le alofa moni lena—lona alofa mama mo i tatou—a aunoa ma lena o le a leai i tatou, leai se faamoemoe, mai alii ma tamaitai uma lava e sili le faanoanoa. E moni lava, o i latou e maua ua faatumuina i faamanuiaga o lona alofa i le aso mulimuli—o le Togiola, o le Toetu, ola faavavau, folafolaga faavavau—e mautinoa lava o le a lelei ia i latou.

“O lenei mea e le faaitiitia ai le poloaiga i soo se itu e tatau ona tatou taumafai ia maua lenei ituaiga alofa mo le tasi. … E tatau ona tatou taumafai ia sili atu le tumau ma manumalo, sili atu le onosai ma le agalelei, faaitiitia le manaonao ma le faafefeteina ia tatou faia ma isi. E faapei ona soifua Keriso, e tatau foi ona tatou ola, e faapei ona alofa Keriso e tatau foi ona tatou alolofa. Ae peitai o le alofa ‘mama o Keriso’ na saunoa i ai Mamona e faapitoa lava o lena alofa o le alofa o—Keriso. Faatasi ai ma lena meaalofa paia, lena faaeega faaola, ua ia i tatou mea uma; a aunoa ma lena ua leai i tatou ma e iu lava ina leai, vagana i le iuga ‘o tiapolo [ma] agelu a tiapolo.’ [2 Nifae 9:9.]

“O le olaga e i ai lana vaega o le fefe ma le toilalo. O nisi taimi ua le lelei mea uma. O nisi taimi ua faatoilaloina i tatou e tagata, po o le tamaoaiga po o pisinisi po o malo ua faatoilaloina i tatou. Ae peitai e tasi le mea i taimi po o le faavavau e le faatoilaloina i tatou—o le alofa mama o Keriso. …

“O le mea lea, o le vavega o le alofa moni o Keriso e faaolaina ma suia i tatou. O lona alofa togiola e laveaiina i tatou mai le oti ma seoli e faapena foi mai amioga faalelalolagi, faaletino, ma le faatiapolo. O lena alofa faaola e faaliliuina foi le agaga, siitiaina ai ia i luga atu o tulaga faatauaina ua pa’ū i se mea e sili atu le aloaia, sili atu le paia. O le mea lea, e tatau ona tatou ‘piimau i le alofa moni’—alofa mama o Keriso mo i tatou ma la tatou taumafaiga malosi agai i le alofa mama o ia ma isi uma lava—aua a aunoa ma lena alofa ua leai i tatou, ma ua le aoga la tatou fuafuaga mo le fiafia e faavavau. A aunoa ma le alofa faaola o Keriso i o tatou olaga, o isi uiga uma lava—e oo lava i uiga mama ma faataitaiga o galuega lelei—e le lava mo le faaolataga ma le olioli” (Christ and the New Covenant [1997], 336–37).

Moronae 7:48. Tatalo “ma le Malosi Uma o le Loto”

Moronae 7:48 o loo aoao mai ai le ala e oo mai ai le alofa moni i se tagata e tatalo e le aunoa “ma le malosi uma o le loto,” o lona uiga ua manao i ai e sili atu i se isi lava mea. O lenei naunau i le tatalo o le a aumaia taunuuga pe a tatalo atu mo nisi foi mataupu. Na aoao mai Peresitene Spencer W. Kimball (1895–1985) o le naunautai ia tatou tatalo o le a aafia ai o tatou aiga: “I totonu o lio o tatou aiga, o le a aoaoina ai a tatou fanau ina ia iloa ona talanoa atu i lo latou Tama Faalelagi e ala lea i le faalogologo i o latou matua a o tatalo. O le a le pine ona latou iloa le loto momomo ma le faamaoni i tatalo o loo tatou faia. Pe afai e faavavevave a tatou tatalo, ma le manatunatu lelei i ai, o le a latou iloa lava foi lena tulaga. E sili ona tatou tatalo i o tatou aiga ma tatalo taitoatasi e pei ona aioi mai ai Mamona, ‘o le mea lea, ou uso pele e, ia outou tatalo atu ai i le Tama ma le malosi uma o le loto.’ (Moro. 7:48.)” (“Tatalo e le Aunoa,” Liahona, Oke. 1981, 2).

Manatu e Mafaufau Loloto i ai

O a uiga o ta’ua i le Moronae 7 e fesoasoani ia i tatou ia iloa ai po o le a le mea e lelei ae po o le a foi le mea e leaga?
Aisea ua “sili ai ona maoae” le alofa moni i isi meaalofa uma?(Moronae 7:46).
O le a le eseesega ua faia e ou uiga ma faamoemoega pe a tuuina atu le auaunaga i isi?

Galuega Fautuaina

E tusa ai ma uiga ua lisiina i le Moronae 7:45 ma le talosaga a Mamona i le Moronae 7:48, tusi se palakalafa puupuu i le mea e mafai ona e faia ina ia faateleina ai le alofa moni i lou olaga.