Eteru 11–15

Folasaga

O le tala o le tusi a Eteru i le faatafunaga matautia o se nuu sa avea ma se nuu tele muamua e fesoasoani ia i tatou e iloa le taunuuga lemaalofia o le teenaina o perofeta ma taunuuga matautia o le agasala mamafa. O le faafeagai, ua tatou faitau foi i faatonuga loloto i le faatuatua ia Iesu Keriso. O le tuufaatasiga o aoaoga a perofeta o Eteru ma Moronae o loo faaalia ai o le faatuatua e taitaiina atu i le salamo, aumaia vavega, ma faaliliuina vaivaiga faaletagata i le malosi. O le mea e faanoanoa ai, na mumusu sa Iareto e usitai i aoaoga a Eteru ma na liliuese mai le mea moni semanu e laveaiina i latou. Ao e faitauina le Eteru, mataupu 11–15, fesili ifo ia te oe lava ia “O a lesona o i nei mataupu mo au ma le tupulaga o loo ou ola ai?”

Faamatalaga

Eteru 11. O Vaega Mulimuli o le Nuu o sa Iareto

E pei lava o sa Nifae, na masani lava ona aafia sa Iareto i le taamilosaga o le faamanuiaina, liliuese, faamasinoga, salamo, faamanuiaina, ma faapena lava. Mulimuli ane, e pei lava o sa Nifae, ua faasolo ina faateteleina le matautia o le loloto o le liliuese ma le amioleaga. (Tagai i ata “O Le Taamilosaga o le Amiotonu ma le Amioleaga” i le faaopoopoga, itulau 438.) Eteru 11 ua toe faamatalaina vaega mulimuli o le taamilosaga o le liliuese. Na latou teena, ulagia ma tauemuina perofeta. E ui lava na pasia e le Tupu o Sule se tulafono e puipuia ai perofeta ma faasalaina i latou e faasaua ia te i latou (tagai Eteru 7:23–26), o se tupu mulimuli ane na faia se poloaiga e faaumatia perofeta (tagai Eteru 11:5). Mulimuli ane, na matua faateleina le amioleaga ma o perofeta na “faanoanoa ma o ese i le nuu” (Eteru 11:13). (Tagai faamatalaga mo le Helamana 12:5–6 i le itulau 278).

Eteru 11:2–5, 13, 20–22. Na Latou Teena Upu a Perofeta

Na aoao mai le perofeta o Amosa o se tasi o tiutetauave o se perofeta o le lapatai lea o tagata i faafanoga ua lalata mai (tagai 2 Nifae 25:9; tagai foi Esekielu 33:7–10). Eteru 11 o loo manino lava le faaalia mai o taunuuga o le le usitai i lapataiga a perofeta. Mafaufau i le mea na saunoa ai Peresitene Henry B. Eyring o le Au Peresitene Sili e uiga i le tau o le teenaina o fautuaga faaperofeta ma le saogalemu e oo mai le usitai i perofeta:

“O le saili atu i le ala i le saogalemu e ala i fautuaga a perofeta e talafeagai lelei lea ia i latou e malolosi faatuatua. A saunoa se perofeta, o i latou e itiiti le faatuatua e mafai ona latou manatu ane ua latou faalogo i se tagata poto o loo tuuina mai se fautuaga. Ma afai o lana fautuaga e foliga mai e logoleleia ma i ai sona uiga, ma malilie i ai e tusa ai ma mea o loo latou mananao e fai, ona latou usitaia lea. Afai e leai ona latou manatu lea o se fautuaga sese po o lo latou vaai lea i o latou tulaga ma faatusatusa i ai so latou ’alofaga i le fautuaga. O i latou e leai se faatuatua e mafai ona latou manatu ua latou faalogo i ni tagata ua latou saili e faateleina le aafiaga mo ni lagona faapito. …

“O taimi uma lava i lo’u olaga ou te faatuai ai e filifili ina ia mulimuli i fautuaga musuia po o le fuafua faapea e i ai so’u tuusaunoaga, na ou iloa ai ua ou tuuina au lava i se tulaga pagatia. O taimi uma lava na ou faalogo ai i fautuaga a perofeta, ma lagonaina i se tatalo e faamautu ai, ma mulimuli i ai, na ou iloa ai lou agai atu i le saogalemu” (i le Conference Report, Ape. 1997, 32–33; po o le Liahona, Iulai 1997, 29).

Eteru 11:7–8. O Mala Faanatura e Mafai ona Taitaiina atu ai i le Salamo

Ua tatou faitau e amata ona salamo tagata mai a latou agasala ona o taunuuga o taua, oge, faamai oti, ma faatafunaga. Na fesoasoani mai Peresitene Iosefa F. Samita (1838–1918) ia tatou malamalama e i ai taimi e faaaoga ai e le Alii mala faanatura e aumaia ai le salamo i olaga o Ana fanau:

“O Au Paia o Aso e Gata Ai, e ui lava e tetete i latou lava ona o a latou lava amioleaga ma agasala, e talitonu o faamasinoga maoae e oo mai i le lalolagi ona o agasala; e talitonu moni lava i latou i fuaitau o Tusitusiga Paia, e faapea o mala o le a oo mai i nuu uma e avea ma faailoga o le afio mai o Keriso i le faamasinoga. E talitonu i latou e pule le Atua e ala mai le afi, le mafuie, le galulolo, le mauga mu, ma le afa. E iloa e i latou o Ia o le Matai ma le Pule o le natura ma ona tulafono, ma e faaalia saoloto lava lona aao i mea uma. Tatou te talitonu o ana faamasinoga e sasaaina mai ina ia aumaia le tagata i le manatuaina o lona mana ma ona faamoemoega, ina ia latou salamo ia latou agasala ma saunia i latou lava mo le afio mai faalua o Keriso e nofotupu i le amiotonu i le lalolagi. …

“Tatou te talitonu o nei mala matuia, faanatura e asiasia ai tagata e le Alii mo le lelei o ana fanau, ia faavave ai lo latou talitonuga i isi, ma aumaia ai i fafo o latou uiga lelei, ina ia latou alolofa ma auauna atu ia te ia” (Gospel Doctrine, lom. lona 5 [1939], 00[55]; mo nisi faamatalaga faaopoopo e uiga i le Alii i le faaaogaina o elemene o le natura e fetalai atu ai i tagata e le mananao e salamo, tagai Helamana 12:3; MFF 43:21–25; 88:88–91).

Eteru 12:4. “O se Taula i Agaga o Tagata”

Na aoao mai Peresitene Gordon B. Hinckley (1910–2008) e uiga i le manaomia ona avea Iesu Keriso ma totonugalemu o o tatou olaga: “O loo tatou ola i se lalolagi e le o mautinoa. O nisi, o le a tele mea e ausia. O nisi, o le le fiafia. O nisi foi, o le tele lava o le fiafia, ma le olioli, o le soifua maloloina, ma le ola tauagafau. O nisi, atonu e mamai, ma fetaia’i ma le faanoanoa. Tatou te le ma iloa. Ae tasi le mea tatou te iloa. E pei o le fetu o le pole i matu, tusa lava pe o a mea e tutupu i le lumanai, ae o loo i ai le Faaola o le lalolagi, le Alo o le Atua, e mautu ma mautinoa o le taula lea o o tatou ola tino ola pea. O Ia o le papa o lo tatou faaolataga, o lo tatou malosi, o lo tatou fesoasoani, o le autu foi o lo tatou faatuatuaga” (i le Conference Report, Ape. 2002, 107; po o le Liahona, Iulai 2002, 102).

Eteru 12:4

O le a le faia o loo e vaaia i le va o le Eteru 12:4; Mamona 5:18; ma le Helamana 5:12? O anafea na avea ai lou faatuatua e pei o se taula i lou agaga?

Eteru 12:6
“O Le Tofotofoina o Lou Faatuatua”

O le tofotofoina o le faatuatua e le masani ona oo mai na o foliga o le fili. Na aoao mai Elder Richard G. Scott o le Korama a Aposetolo e Toasefululua o nisi taimi “o le tofotofoina o lo [tatou] faatuatua” ua na o se mataupu lava o le faaaogaina o lo tatou faatuatua: “E mafai ona e aoao ia sili atu le faaaogaina o le faatuatua i le faaaogaina o lenei mataupu faavae na aoao mai e Moronae: ‘O le faatuatua o le mea lea ua faamoemoe i ai ae e le o vaaia; o lea aua le fefinauai ai ona ua le vaaia e outou, aua e le maua e outou se mau seia uma le tofotofoina o lo outou faatuatua’ [Eteru 12:6; faaopoopo le faatusilima]. O le mea lea soo se taimi lava e te tofotofoina ai lou faatuatua—o le galue lena ma le agavaa i se musumusuga —o le a e maua ai se molimau faamaonia a le Agaga. O na lagona o le a faamalosia ai lou faatuatua. A o e toe faia lena mamanu o le a saga faamalosia ai lou faatuatua.” (i le Conference Report, Ape. 2003, 79; po o le Liahona, Me 2003, 76).
Na tusia e Elder Jeffrey R. Holland o le Korama a Aposetolo e Toasefululua le tele o ituaiga o faatuatua tatou te aafia ai ma uluai uiga mo le faaalia o na faatuatua: “O le faatuatua sauniuni e maua mai lea i aafiaga o le taimi ua tuanai—e ala i le iloaina, lena e saunia se faavae mo le talitonuga. Ae o le faatuatua laveai e tatau ona faaaogaina soo agai i aafiaga i le lumanai—o le le iloaina, lena e saunia se avanoa mo vavega. Faatuatua maoae, faatuatua e gaoioi ai mauga, faatuatua e pei o le uso o Iareto, e muamua i le vavega ma le poto. E tatau ona talitonu o ia a o lei fetalai le Atua. E tatau ona gaoioi o ia a o lei maua le malosiaga e faamaea ai lena gaoioiga. E tatau ona tuuto o ia i le aafiaga atoa lava ao lei iloaina le vaega muamua. O le faatuatua o le ioe atoatoa lava—ma e muamua i luma—i soo se vaega lava atonu e finagalo mai ai le Atua i le lumanai o lata mai po o le mamao atu foi” (Christ and the New Covenant [1997], 18–19).
Na faaalia mai e Peresitene Gordon B. Hinckley lenei mataupu faavae o le mauaina o le molimau “pe a uma le tofotofoina” o le faatuatua:

“Sei ou faamatalaina atu se tala i se fafine i Sao Paulo, i Pasila. Sa faigaluega o ia ma alu i le aoga ina ia lava mea e tausi ai lona aiga. Ou te faaaogaina ana lava upu e faamatala ai lana tala. Sa fai mai o ia:

“‘O le iunivesite sa ou aoga ai, e i ai se tulafono e faasa ai tamaiti aoga sa nofo aitalafu ona sue i suega. O le mafuaaga lea, a maua lou totogi e muamua lava ona ou aveeseina le tupe mo le sefuluai ma taulaga, ma o le tupe e totoe sa faasoasoa e totogi ai le aoga ma isi tupe faaalu.

“‘Ou te manatuaina se taimi sa ou … feagai ai ma faigata o mea tau tupe. O se Aso Tofi, ina ua maua mai lou totogi. Ina ua ou tago e faavasega lau paketi faalemasina, sa ou vaaia o le a le lava se tupe e totogi [uma] ai lau sefuluai ma lau aoga. Sa tatau ona ou filifili i mea e lua. O suega e tailua masina ma fai, o le a amata i le vaiaso e sosoo ai, ma afai ou te le sue ai o lona uiga, e le aoga atoa le tausaga o le aoga. Sa ou matua mafatia lava. … Sa tiga lou loto. O se faaiuga tiga lea ua taatia nei i ou luma, ma sa ou le iloa pe o le a le mea tonu e fai. Sa ou mafaufau loloto i faaiuga e lua: pe totogi le sefuluai po o le faamata’uina o le avanoa e ono le maua ai togi manaomia e faamaonia ai lou nofo i le aoga.

“‘O lenei lagona sa mafatia ai lou agaga ma sa i ai pea ia te au seia oo i le Aso Toonai. O iina na ou manatua ai, ina ua ou papatiso, sa ou ioe ai ou te ola i le tulafono o le sefuluai. Sa ou tauaveina i ou luga se matafaioi, mai lou Tama Faalelagi, ae le o faifeautalai. O le taimi lena, sa amata ai ona mou atu le mafatia, ae avanoa ai le nofoaga mo se lagona malie o le toafilemu ma le naunautai. …

“‘O le po lena ina ua ou tatalo, sa ou ole atu ai i le Alii e faamagalo mai au i lo’u le mautonu. I le Aso Sa, a o lei amataina le sauniga faamanatuga, sa ou faafesootaia le Epikopo, ma sa ou totogi lau sefuluai ma taulaga ma lou fiafia tele. O se aso faapitoa lena. Sa na ona ou lagonaina lava o le fiafia ma le toafilemu ia te au lava ia ma le Tama Faalelagi.

“‘O le aso na sosoo ai ao ou i ai i lou ofisa; sa ou taumafai e sue se auala e mafai ai ona fai au suega ia e amata i le Aso Lulu e sosoo ai. O le faatele ona ou mafaufau i ai, o le mamao ese foi lena o le le maua o se faaiuga. …

“‘O le a uma le taimi faigaluega ae sau lou pule e aumai faatonuga mulimuli o le aso. Ina ua maea, sa tago i lana ato ma faatofa mai. … E le i umi, ae tu ma tilotilo mai ia te au ma fesili mai, “O a mai lau aoga?” Sa ou tei ma sa ou le talitonu i le mea lea na ou faalogo i ai. Na pau lava le mea sa mafai ona ou tali atu ai ma le gatete o le, “O loo lelei mea uma!” Sa tilotilo mai ma le agalelei ia te au ona toe faatofa mai foi lea. …

“‘E le i leva ae ulufale mai le failautusi i le potu ma faapea mai, o au o se tagata laki tele! Ina ua ou fesili pe aisea ae sa na ona tali mai lava: “Faatoa uma nei ona fai mai le pule e amata atu i le aso, ona totogi atoa e le kamupani lau aoga uma ma au tusi. Ae e te lei alu, sau i lo’u ofisa e ta’u mai le totogi, ina ia oo atu taeao ua mafai ona ou avatua le siaki.”

“‘Ina ua alu o ia, sa ou tagi ma le lagona lotomaualalo ma ou tootuli ifo i le mea tonu sa ou i ai, ma faafetai atu i le Alii mo Lona agalelei. Sa ou … fai atu i le Tama Faalelagi, Na te le tau aumaia lenei faamanuiaga ua tele naua mo au. Sa na o le totogi lava o le masina e tasi, ma o le sefuluai sa ou totogiina i le Aso Sa, e laitiiti tele pe a faatusatusa i le aofaiga o le tupe ua ou maua! I le taimi o lena tatalo, sa ou manatua ai upu o loo tusia i le Malaki: “Ia outou tofotofo mai ia te au i lenei mea, ua fetalai mai ai Ieova o au, pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele” (Malaki 3:10). E oo mai i lena taimi, ou te lei lagonaina lava le maoae o le folafolaga o loo i ai i lena mau, ma o lenei poloaiga o se molimau moni o le alofa e aumaia e lo tatou Tama Faalelagi i Lana fanau i lenei lalolagi’” (i le Conference Report, Ape. 2002, 85–86; po o le Liahona, Iulai 2002, 80–82).

Eteru 12:8–22. Faatuatua ma Vavega

Eteru 12:8–22 ua faatumulia i faataitaiga o “mea ofoofogia ma le taua na faia i le faatuatua” (aotelega o le mataupu mo le Eteru 12). Ua faamalamalamaina mai e le Lectures on Faith o le faatuatua o le mataupu faavae o le mana e fai ai vavega:

“O le faatuatua e le gata o le mataupu faavae o le gaoioiga, ae o le mana foi, i tagata atamamai uma, po o i le lagi po o le lalolagi. …

“… O le faatuatua na fai ai lalolagi. Na fetalai le Atua, na faalogo le gaogaosa, na faatulagaina lalolagi ona o le faatuatua na i ai ia te Ia. E faapena foi la i le tagata; e tautala o ia i le faatuatua i le suafa o le Atua, ona tumau ai lea o le la, e usitai le masina, e gaoioi le mauga, e pauu falepuipui, na tapunia gutu o leona, aveesea le feitagai i le loto o le tagata, aveesea lona saua, tuu atu i autau lo latou malosi, avatu i le tao lona matautia, ma le oti i lana pule; ma o nei mea na mafai ona o le faatuatua na ia te Ia” ([1985], 3, 5).

Eteru 12:27.
Vaivaiga, Lotomaualalo, ma le Alofa Tunoa

Ua oo mai le vaivaiga i alii ma tamaitai ona o le Pau o Atamu. O le tino faaletino ma le mafaufau ua gauai atu i faamai ma le pala. Ua aafia i tatou i faaosoosoga ma tauiviga. Ua oo ia i tatou taitoatasi aafiaga o vaivaiga patino. Ae ui i lea, ua aoao manino mai le Alii ao tatou o mai ia te Ia i le lotomaualalo ma le faatuatua, o le a Ia fesoasoani ia i tatou e faaliliu vaivaiga e avea ma malosiaga. Ua lava Lona alofa tunoa e mafai ai lenei faaliliuga e ala lea i le siitiaina o i tatou i luga atu o o tatou lava malosiaga faanatura. I se tulaga patino lava ia, ua tatou iloaina mai aafiaga le ala ua manumalo ai le mana o le Togiola i taunuuga o le Pau.

Na saunoa Elder Neal A. Maxwell (1926–2004) o le Korama a Aposetolo e Toasefululua i le auala e fesoasoani ai le Alii ia i tatou e manumalo i o tatou vaivaiga. “Pe a tatou faitau i tusitusiga paia i le ‘vaivai’ o le tagata, o lenei faaupuga e aofia ai tagata lautele ae peitai o le vaivai e manaomia le fanau mai ma le tagata i le tulaga masani o le tagata soifua lena e le motusia ai le faalavelave pea o le tino faaletino i le agaga (tagai Eteru 12:28–29). O le vaivaiga la e aofia ai, e ui i lea, o tatou vaivaiga faapitoa, patino, na e tatau ona tatou manumalo ai (tagai MFF 66:3; Iakopo 4:7). O loo i ai se auala i le olaga e faaalia ai nei vaivaiga” (Lord, Increase Our Faith [1994], 84).

Ma le isi foi, na faamalamalama mai e Elder Maxwell pe faapefea e le iloaina o o tatou vaivaiga ona avea ma se tasi o auala ua filifilia e le Alii e faateleina ai lo tatou aoaoina:

“O le mea moni, pe afai ua tele naua lo tatou le onosai i taimi a le Atua o Le silafia mea uma, ua tatou fai atu tatou te iloa le mea sili. E uiga ese, a ea—o i tatou o e tuu uati i o tatou tapulima ua tatou saili e faatonu o Ia o Le pulea uati tetele ma kalena o le lalolagi uma.

“Talu ai e finagalo le Atua tatou te foi atu i le aiga pe a maea ona avea faapei o Ia ma Lona Alo, o se vaega o lenei faagasologa tau i le atiina ae, o mea e manaomia, e aofia ai le faaali mai ia i tatou o o tatou vaivaiga. Ona o lea, afai ua ia te i tatou le faamoemoe maualuga, o le a tatou faamaualalo, aua o Lana fesoasoani o le a mafai ai ona avea na vaivaiga ma malosiaga (tagai Eteru 12:27).

“E le o se mea faigofie, peitai, pe a alia’e se vaivaiga o se tasi, aua o loo faaalia lava i tulaga faifai pea o le olaga. Ae ui i lea, o se vaega lenei o le o mai ia Keriso, ma e taua, e tiga, o se vaega lava o le fuafuaga o le fiafia. ” (i le Conference Report, Oke. 1998, 79; po o le Liahona, Ian. 1999, 72).

Ua molimau mai tusitusiga paia e mafai e Iesu Keriso ona laveaiina i tatou mai o tatou le atoatoa e faapea foi a tatou agasala:
1. “O lea ua tele ai lava lou fiafia i le mitamita i mea ua ou vaivai ai, ina ia tumau i ou luga le mana o Keriso” (2 Korinito 12:9).
2. “O le mea lea ia tatou faalatalata atu ai ma le faamalosi i le nofoalii o le alofa tunoa, ina ia alofaina ai i tatou, ia maua ai foi le alofa tunoa e fesoasoani mai i ona aso e tatau ai” (Eperu 4:16).
3. “Ua faailoa mai ia te i matou e le Alii le Atua lo matou vaivai, ina ia matou iloa o lona alofa tunoa … ua matou maua ai le mana e fai ai nei mea” (Iakopo 4:7).
4. “Ua tusa au nei ma le leai; o lo’u malosi foi ua ou vaivai ai; o le mea lea ou te le mitamita ai ia te au lava, ae peitai, ou te mitamita i lo’u Atua, aua o Lona malosi ou te mafaia ai mea uma” (Alema 26:12).
5. “Ma ia teena e outou le amioletonu uma, ma alolofa atu i le Atua ma o outou loto atoa, ma o outou manatu, ma lo outou malosi uma, ona lava ai lea lona alofa tunoa mo outou, ina ia atoatoa ai outou ia Keriso i lona alofa tunoa;” (Moronae 10:32).
Na aoao mai Moronae e le gata ia tatou faaaoga le faatuatua i le Alii, ae tatau foi ona tatou faalotomaualaloina i tatou lava ia.

O le tusi o le Faamaoni i le Faatuatua o loo faamalamalama mai ai le uiga o le lotomaualalo moni: “O le iloa lea ma le agaga faafetai o lou faalagolago i le Alii—o le malamalama lea o loo ia te oe se tulaga manaomia faifai pea o Lana fesoasoani. O le lotomaualalo o le iloa lea o au taleni ma tomai o ni meaalofa mai le Atua. E le o se faailoga o le vaivai, palaai, po o le fefe; o se faailoga o lou iloa o le mea e taoto ai lou malosiaga atoa” (Faamaoni i le Faatuatua: O se Tusitaiala o le Talalelei [2004], 100).
I le Guide to the Scriptures tatou te faitau ai o le alofa tunoa o le “mana fesoasoani lea mai le Atua e mafai ai ona maua e alii ma tamaitai faamanuiaga i lenei olaga ma maua ai le ola faavavau ma le faaeaina pe a uma ona latou faaaogaina le faatuatua, salamo, ma tuuina atu la latou taumafaiga sili e tausia ai poloaiga. O lea ituaiga fesoasoani mamana po o le malosi e tuuina mai e ala mai le alofa mutimutivale ma le agalelei o le Atua” (“Grace”).
Na tuuina mai e Peresitene Thomas S. Monson nei upu faalaeiau: “Afai e i ai se tasi e lagona faapea e vaivai tele e le mafai ona suia le agai i luma ma le agai i lalo o lona olaga, pe o i ai foi nisi latou te lei faia ni faaiuga o le a faia mea e sili atu, ona o le fefe ua sili ona tele, o le fefe lea i le toilalo, e leai lava se isi faamautinoaga e sili atu ona mafanafana nai lo le fetalaiga a le Alii: ‘Ua lava lou alofa tunoa,’ na ia fetalai mai ai, ‘i tagata uma o e faamaualaloina i latou lava i ou luma; aua afai latou te faamaualaloina i latou lava i ou luma, ma faatuatua ia te au, ona ou faia lea o mea vaivai ma mea malolosi ia te i latou’” (i le Conference Report, Ape. 2000, 61–62; po o le Liahona, Iulai 2000, 58).

Eteru 12:32

E tusa ai ma le Eteru 12:32; Moronae 7:40–41; ma le Mataupu Faavae ma Feagaiga 138:14, o le a le mea e tatau ona totonugalemu ai o tatou faamoemoega? E faapefea ona e faia lenei mea ia sili atu?

Eteru 12:33–37. O Lenei Alofa O Le Alofa Moni

Na faaalia e le Faaola le alofa moni sili ona atoatoa po o le alofa faataulagaina ina ua Ia tuuina mai Lona soifua ma togiolaina i tatou taitoatasi. E tatau ona tatou tatalo ina ia “faatumuina i tatou i lenei alofa” ina ia mafai ai ona tatou maua le ola faavavau (Moronae 7:48). Na faamalamalamaina mai e Elder Marvin J. Ashton (1915–94) o le Korama a Aposetolo e Toasefululua le uiga o le mauaina o le alofa moni:

“O le alofa moni, atonu, i le tele lava o tulaga ua malamalama sese ai nisi i lea upu. Ua masani ona tatou faatusatusa le alofa moni ma le asiasi atu i e mamai, avatu o se meaai i e o manaomia le fesoasoani, pe o le fetufaai foi o a tatou mea ua faasili ma i latou o e le tagolima. A o le mea moni lava, o le alofa moni o se mea e matua sili atu.

“O le alofa moni e le o se mea e te foai atua; o se mea e te ausia ma avea ma vaega o oe. Ma a totoina loa uiga alofa moni i lou loto, e le toe tusa lava oe ma le mea sa e i ai. Ona avea lea o le mafaufau e [faamaina isi tagata], ma mea e inoino i ai.

“Atonu o le alofa moni maoae o le a maua pe a tatou feagaleleia’i, pe a tatou le faamasino atu pe faailoga tagata, pe a tatou taumafai e mafaufau i mea sili e uiga i le tasi ma le isi, pe gugu foi e aua le faia se tala. O le alofa moni o le talia lea o uiga ese o se tasi, vaivaiga ma pona; ma onosai i le isi tagata ua ia tuu i tatou i lalo; pe o le tetee atu foi i le lagona o le faaonoono pe a le taulimaina e le isi tagata se mea i se ala atonu sa tatou faamoemoeina. O le alofa moni o le musu lea e faaaoga vaivaiga o le isi tagata, ma naunau e faamagalo atu i le tasi ua faatiga mai ia i tatou. O le alofa moni o le faamoemoeina lea o mea sili e le tasi mai le isi” (i le Conference Report, Ape. 1992, 24; po o le Liahona, Iulai 1992, 20–23).

Eteru 12:41. Tumau

Ina ua mavae se tausaga o aumau Elder Jeffrey R. Holland i Chile, na ia faasoa mai lenei vaaiga e uiga i le upu tumau: O le “‘tumau ia te au’ o se manatu ua malamalama ma lava lona mamalu matagofie i le gagana Peretania i le Tusi Paia o le King James, ae o le tumau o se upu e le o toe faaaogaina tele. O lea sa ou mauaina ai se lagona talisapaia sili atu mo lenei apoapoaiga mai le Alii ina ua faailoa atu ia te au le faaliliuga o lenei faaupuga i se isi gagana. I le faa-Sipaniolo o lena lava faaupuga e tasi e taua o le permaneced en mi. E pei o le veape i le gagana Peretania o le tumau, permanecer o lona uiga ‘ia tumau ai, ia nofo ai,’ ae oo lava i tagata [e le ni Sipaniolo] e pei o au e mafai lava ona lagonaina le uiga tutusa ma le upu ‘permanence.’ O le uiga o lenei mea, o le ‘tumau—ae ia tumau e faavavau’” (i le Conference Report, Ape. 2004, 32; po o le Liahona, Me 2004, 32).

Eteru 13:1–12. Ierusalema Fou

Eteru 13:1–12 o loo faamatalaina Eteru o se tagatavaai maoae. Na faaalia e le Alii le tele o mea ofoofogia ia Eteru, e aofia ai le faatuina o se Ierusalema Fou a o lei oo i le Afio Mai Faalua. Tusi mea na ta’ua e Eteru e uiga i le Ierusalema Fou:
1. O le a avea ma “afioaga paia o le Atua” (Eteru 13:3).
2. O le a fausia i le konetineta o Amerika mo e o totoe o le fanauga a Iosefa (tagai fuaiupu 4–6).
3. O le a avea ma aai paia e pei o le Ierusalema na fausia mo le Atua (tagai fuaiupu 8–9).
4. O le a faatuina seia faaselesitilaina le lalolagi (tagai fuaiupu 8).
5. O le a avea ma aai mo e mama ma amiotonu (tagai fuaiupu 10).
Na tusia e Peresitene Iosefa Filitia Samita (1876–1972) nei mea e uiga i le Ierusalema Fou:

“O le manatu taatele i le lalolagi e faapea o lenei [Ierusalema Fou] o le aai o Ierusalema, le aai tuai o Iutaia lena o le a faafouina i le taimi o le toefaafouga, ae e le sa’o. Ua tatou faitau i le Tusi a Eteru na faaalia e le Alii ia te ia le tele o mea lava ia na vaaia e Ioane. O Eteru, e pei ona o le a iloa e tagata o le Ekalesia, o le perofeta mulimuli lea o perofeta i sa Iareto, ma na faaalia e le Alii ia te ia le tele o mea e uiga i le talafaasolopito o Iutaia ma lo latou aai o Ierusalema na i ai i le taimi o le galuega talai a lo tatou Faaola. I lana faaaliga, i le tele lava o itu e tutusa ma lena na tuuina atu ia Ioane, na vaai Eteru i le aai tuai o Ierusalema ma e faapena foi le aai fou lena e lei fausia, ma na ia tusia e uiga i na aai e pei ona faamatalaina i tusitusiga a Moronae:

“[Eteru 13:2–11.] …

“I le aso o le toefaafouga, pe a faafouina mea uma, o le a i ai ni aai tetele se tolu o le a paia. O le tasi o le Ierusalema tuai lena o le a toe fausia e tusa ai ma le valoaga a Esekielu. O le tasi o le aai o Siona, po o Enoka, lena na aveina mai le lalolagi ina ua liua Enoka ma o le a toefuataiina mai; ma o le aai o Siona, po o le Ierusalema Fou, o le a fausia e le fanauga a Iosefa i lenei konetineta o Amerika” (Answers to Gospel Questions, tuuf. Iosefa Filitia Samita Jr., 5 vol. [1957–66], 2:103–4).

Eteru 13:1–12

O a uiga o le Ierusalema Fou o loo lisiina i nei fuaiupu? E faapefea ona tatou atiina ae lelei nei lava uiga?

Eteru 13:15–31. Korianetuma

Na faaaluina ma le faamaoni e Korianetuma se taimi tele i le aoaoina i le “faiga o taua uma ma le atamai uma o le lalolagi” (Eteru 13:16), ae peitai na ia teena le savali e tasi a Eteru, semanu o le a aumaia ia te ia le filemu i se auala e le mafai e ona tomai i mea tau taua ona aumaia.

Tusi le folafolaga a le perofeta o Eteru ia Korianetuma i le Eteru 13:20–21 e faapea foi lona faataunuuina (tagai Eteru 15:1–3, 26–32; Ominae 1:20–22).

Robert Barret, © 1986 IRI

Eteru 14–15. O Le Taua Mulimuli a Sa Iareto

Na faatagaina e Korianetuma ma Sesa i latou uma na mulimuli ia i laua ia fasiotia e aunoa ma le faaiuina o le finauga. E faigata ona tatou faavasegaina le matautia o le taua mulimuli a sa Iareto lena na oo lava i fafine ma tamaiti na faaauupegaina ma auina atu i le taua (tagai Eteru 15:15). O lenei mea, e ui i lea, ua tuuina mai se ata manino lava o le mea e tupu i tagata pe a alu ese le Agaga o le Alii ma ua le toe tauivi ma i latou (tagai fuaiupu 19).

Robert Barret, © 1986 IRI

Manatu e Mafaufau Loloto i ai

O a auala na mafai ai e le mana fesoasoani o le Togiola ona faaliliuina ou vaivaiga e avea ma malosiaga?
O a auala ua avea ai le tusi a Eteru e avea ma se lapataiga i atunuu o le lalolagi i aso nei?
O le ita ma le inoino na avea ma pogai autu o le faatafunaga o sa Iareto. O a matafaioi o loo e vaaia o loo fai e le ita ma le inoino i le lalolagi i aso nei? E faapefea ona e faafoeina lenei mea i lou lava lalolagi o uunaiga?
O faapefea ona tofotofoina lou faatuatua po o au sini faaleagaga? Na faapefea e nei tofotofoga o lou faatuatua ona aumaia ia te oe se faaopoopoga o lau “molimau” ia Iesu Keriso po o lou malamalama i mea moni faavavau?

Galuega Fautuaina

Faailoa mai se sese patino po o se le atoatoa na oo mai ia te oe e ala mai se vaivaiga faaletino. I le faaaogaina o le Eteru 12:27 i le avea ai ma ou taiala, otooto mai se faafitauli lena e mafai ona liua e avea o se malosiaga.
Manatunatu loloto i le apoapoaiga mai ia Moronae ina ia tatou “saili lenei Iesu ua tusia e le au perofeta ma le au aposetolo ina ia i ai ma nonofo tumau ia te outou e faavavau … le alofa tunoa o le Atua le Tama, atoa ma le Alii o Iesu Keriso, ma le Agaga Paia” (Eteru 12:41). Tusi se pepa puupuu e otooto ai po o le a le mea e mafai ona e faia ina ia “saili ai Iesu” ma ia maua “le alofa tunoa o le Atua le Tama.”