Mataupu 36

Helamana 5–9

Folasaga

I lenei taimi taua i le talafaasolopito o sa Nifae, ua toatele atu ē amioleaga nai lo ē amiotonu. Ua faasolo ina matua piopio a latou tulafono lea ua laitiiti ai lo latou aafiaga mo le lelei. E pei lava o lona tama matua o Alema, sa tuuina atu e Nifae lona tofiga o se faamasino sili ma tuuto atu o ia lava atoatoa i le galuega a le Alii (tagai Alema 4:15–20). I lenei taimi o le pogisa faaleagaga, o le nuu “ua saunia i latou i le malaia” (Helamana 5:2). Sa galulue ma le filiga Nifae ma lona uso o Liae e faaitiitia le amioleaga ma toe faafoi mai le toatele i le Alii.

Faamatalaga

Helamana 5:2.“O Le Filifiliga a le Nuu”

• Ina ua mananao le nuu i se tupu i le 62 tausaga ua tuanai atu, sa apoapoai atu Mosaea o le faigamalo e tatau ona faia e “le filifiliga a le nuu” (Mosaea 29:26), sa tau atu e le o se mea taatele mo le itu toatele o le nuu le mananao i le amioletonu. O se faigamalo e ala i le filifiliga a le nuu e manaomia lea nai lo se malo tau tupu o loo ono taitaia ai e se tupu amioletonu i latou i le faafanoga. Ae ui i lea, i lenei taimi a o lumanai ai le afio ifo o le Faaola, o tagata sa Nifae na filifili le leaga sa sili ona toatele atu nai lo i latou na filifili le lelei” (Helamana 5:2). O lenei tulaga piopio ua faamaonia ai le moni o le lapataiga a Mosaea e faapea afai e ao ona tupu lenei mea, “o le aso lena e oo mai ai faamasinoga a le Atua ia te outou; ioe, o le aso lena na te asiasi mai ai ia te outou i le faafanoga tele” (Mosaea 29:27). Sa faataunuuina lenei lapataiga i le faafanoga a o lumanai ai le afio atu o le Faaola (tagai 3 Nifae 8–11).

  Sa folafola mai e le Alii lenei aoaoga faavae moni i o tatou foi aso: “Pe a pule e amioleaga o le a faanoanoa le nuu” (MFF 98:9).

Helamana 5:5–7. “Ia Manatua O Outou Igoa”

• Sa i ai se ala faapitoa ia Helamana e tuu atu ai lana talatuu i ona atalii—sa ia faaigoaina i laua i o latou tuaa tautupu ua mavae e fesoasoani ai i ona atalii ia manatua a latou galuega amiotonu. O le malamalamaaga o loo i lalo mai ia Elder Carlos E. Asay (1926–99) o le Au Peresitene o Fitugafulu e fesoasoani ai ia i tatou e talisapaia le uiga o lenei mea ia Nifae ma Liae:

  “E ui lava atonu e le maua uma e fanau a Atamu ni igoa e tulagaese, e toatele sa mauaina, ma sa faia ai se eseesega. Sa faia ai se eseesega i olaga o atalii o Helamana, o Nifae ma Liae. … [Tagai Helamana 5:5–7.]

  “Ua molimauina e faamaumauga na mamanuina e Nifae ma Liae o laua olaga e tusa ma o laua tuaa po o igoa o tagata ia na faaigoaina ai i laua ma aumai ai le mamalu i igoa na tuuina atu ia te i laua” (Family Pecan Trees: Planting a Legacy of Faith at Home [1992], 66–67).

• Sa tuuina mai e Peresitene Siaosi Alapati Samita (1870–1951) se faataitaiga faaonapo nei o aafiaga loloto lea e aumai e se igoa lelei i luga o se tagata:

  “I se tasi aso … sa ou le iloa ai se mea i lou siosiomaga ma manatu ai ua ou alu atu i le isi itu [o le veli]. Sa ou iloaina o loo ou tu e u lou tua i se vaituloto tele ma le matagofie, e faasaga atu i se togavao tele lava o laau. …

  “Sa amata ona oa vailia, ma e lei leva ae ou mauaina se auala savali e ui atu i le togavao lea e foliga mai e seasea ona faaaogaina, ma lea e toetoe lava a le iloa atu i le vao. Sa ou mulimuli ai loa i lenei auala, ma ina ua maea ona ou savalia mo se taimi ma malaga ai mo se mamao tele lava i totonu o le togavao, sa ou vaaia se tamaloa o sau e agai mai ia te au. Sa amata ona ou iloaina o ia o se tagata tinoese, ma sa ou faanatinati e oo atu ia te ia, ona o lea ua ou iloaina o ia o lo’u tama matua. E silia ma le tolu selau pauna lona mamafa sa i ai i lenei olaga faaletino, ia e silafia ai o ia o se tagata tinoese. Ou te manatuaina lou fiafia e vaai ia te ia ao sau. Sa faaigoaina au i lona igoa ma sa ou mitamita ai lava i lea igoa.

  “Ina ua latalata mai lou tama matua ia te au, sa ia tu. O lona tu o se valaaulia lea mo au e tu foi. I lena taimi—ma i lenei taimi oute manao i tama ma teine ma tagata talavou ina ia aua lava nei galo—sa ia tilotilo mai ia te au ma le naunautai ma faapea mai:

  “‘Ou te fia iloa po o le a sau mea na fai i lo’u igoa.’

  “O mea uma lava sa ou faia ua tea ese atu ma au e pei lava o se ata ata faasolo i luga o se lau —o mea uma na ou faia. Sa vave lava ona oo mai ia te au se faasologa o mea na manatulia i le taimi lea o loo ou tutu ai iina. Ua tea atu lou olaga atoa mai ia te au. Sa ou ata ma tilotilo atu i lou tamamatua ma fai atu:

  “‘Ou te le i faia lava se mea i lou igoa e te ono maasiasi ai.’

  “Sa ia laa mai i luma ma opo atu ia te au, ma a o ia faia lea mea, sa oo ina ou toe malamalama i lou siosiomaga faalelalolagi. Sa matuai susu lou aluga e peiseai na sasaa i ai se vai i luga—sa susu i loimata o le loto faafetai ua mafai ona ou tali atu ma le le maasiasi.

  “Ou te mafaufau i lenei mea i le tele o taimi, ma ou te fia tauina atu ia te outou sa ou taumafai, e sili atu nai lo se isi taimi talu mai lena taimi, e tausia faalelei lena igoa. O lea la ou te manao e faapea atu i tama ma teine, i alii ma tamaitai talavou, i le autalavou o le Ekalesia ma le lalolagi atoa: Ia faamamaluina o outou tama ma tina. Ia faamamaluina o latou igoa o loo outou tauaveina, aua e i ai se aso o le a e maua ai le avanoa e lipoti atu ai ia te i latou (ma lo outou Tama o i le Lagi) mea sa outou faia i o latou igoa” (“Your Good Name,” Improvement Era, Mar. 1947, 139).

Helamana 5:9}. “E Leai Se Isi Ala Po o Se Tasi Mea E Mafai Ona Faaolaina Ai Tagata”

• Sa faaaogaina e Elder Richard G. Scott o le Korama a Aposetolo e Toasefululua le Helamana 5:9 e aoao ai ua na o le Togiola mamana e mafai ai le faaolataga:

  “O le salamo faamaoni e matua taua lava ina ia mafai ai e le Togiola ona faia lana galuega faavavega atoatoa i lou olaga. O lou malamalama i le Togiola, o le a e iloa ai o le Atua e le o se tagata fuā ua fiafia e faasala i latou o e sese a latou laa. O ia o se Tama atoatoa, alofa, malamalama, onosai, ma loto faamagalo. O se na te faatauanau, lapataia, faamalosia, sii ae ma faalototele. Ua Ia alofa tele ia i tatou uma sa Ia finagalo malie e tuuina mai Lona Alo atoatoa, o se na aunoa ma se agasala, usiusitai atoatoa, ma amiotonu aiai, ia oo ia te Ia le mafatia ma le tiga le mafaamatalaina, i le tuuina atu o Ia e taulaga mo i tatou uma [tagai Helamana 5:9]. O lena togiola e mafai ai ona tatou ola ai i se lalolagi ua pulea i le faamasinoga ina ia maopoopo le lalolagi. Peitai o lena faamasinoga ua faafoeina i le alofa e ala mai i le usiusitai i aoaoga a Iesu Keriso.

  “O ai se tasi o i tatou ua le manaomia le vavega o le salamo? Pe o lou olaga ua pisia itiiti, pe ua lavelavea tele foi, i mea sese, ua tutusa uma lava mataupu mo le toe faamamaina. O le umi ma le mamafa o le togafitiga, e faatatau tonu lava i le tele po o le laitiiti o le agasala ua e faia. E tatau ona avea le faamagaloga ma a tatou sini. Ona pau lava le ala e ausia ai lena sini o le salamo, aua ua tusia:

  “‘E leai se isi ala po o se tasi mea e mafai ona faaolaina ai tagata, ae na o le toto togiola o Iesu Keriso”’ (i le Conference Report, Ape. 1995, 101; po o le Liahona, Iul. 1995,84 85).

  Helamana 5:9–11

  Ia faatusatusa le faamatalaga a Elder Richard G. Scott e faatatau i le mana faaola o le Togiola i le aoaoga a Helamana i ona atalii.

Helamana 5:9–14.

Manatua

• Sa aoao mai e Peresitene Spencer W. Kimball (1895–1985) le taua tele o le sao o le manatuaina o mea i lo tatou faaleagaga: “Pe a e vaai i totonu o le lomifeifiloi mo le upu e aupito sili ona taua, e te iloa o le a lena upu? Atonu e mafai ona faapea o le upu manatua. Talu ai ona o outou uma ua osia ni feagaiga—ua outou iloa ai mea e tatau ona fai ma ua outou iloa foi le auala e fai ai—o lo tatou manaoga sili lava o le manatua. O le pogai lena e o ai tagata uma i sauniga faamanatuga i aso Sapati uma — ina ia tagofia le faamanatuga ma faafofoga atu i ositaulaga o tatalo ina ia latou ‘manatua pea o ia ma tausi i ana poloaiga ua tuuina mai ia te i latou.’ E le tatau ona galo i se tasi ona alu i le sauniga faamanatuga. O le manatua o le upu lea. O le manatua o le polokalama lea”

Helamana 5:12

O Se Faavae Malosi

• Sa faailoa mai ma le manino e Elder Bruce C. Hafen o le Fitugafulu le manaomia o ni faavae malolosi mo le saogalemu ma le ola i se taimi umi:

  

  E i ai se tasi sa faapea mai e le mafai ona e vaaia ma iloa le eseesega i le va o le noanoa o le apogaleveleve ma se filo o le uaea malosi tele —sei iloga e tuu se mea mamafa i luga o manoa. E faapena a tatou molimau, ma mo le toatele o i tatou, o aso o le tofotofoga mo a tatou molimau ua amataina. Atonu e le o le maliu o se tasi e pele. Atonu e lei talosagaina lava i tatou e tuuina atu se mea e matua pele ia i tatou, e ui lava atonu ua oo lelei mai taimi mo lea ituaiga tofotofoga ia i tatou i lea taimi ma lea taimi. O lo tatou popolega o loo i ai nei atonu o loo sau lava i se tulaga o faaosoosoga malolosi tele, lea e faaali mai ai ia i tatou o se taliaina ma le papau o le talalelei e le o i ai se mana e taulimaina ai le malosi atoatoa o le mana o le pogisa. Atonu o loo i ai se valaauga o se misiona i se nofoaga o faamai ma le le fiafia, ae ua tatou fuafuaina se misiona i se nofoaga o avanoa le faatapulaaina. Pe atonu foi ua tele naua fesili ona o le tapulaa o lo tatou malamalama ua le maua ai ni tali faigofie, ma i latou ua manatu e sili atu mea latou te iloa nai lo tatou ua faaonoono ai ia i tatou i le mea ua foliga mai o se faatosinaga mautinoa .

  “Pe a oo mai na taimi, e tatau ona sili atu a tatou molimau nai lo filo o apogaleveleve o se faatuatua ua vaivai. E manaomia ona avea e pei o manoa o le uaea, ua lava le malolosi e tetee atu ai i u fanafana a le o le a faafanoina i tatou. I o tatou aso o le popole ma faafitauli, e tatau ona tatou faavae ‘i luga o le papa o lo tatou Togiola, o le Keriso lea, o le Alo o le Atua, … pe a faaoo mai e le tiapolo ana matagi tetele, ioe, o ana u fanafana i le asiosio, … ma pe a pesi mai ia te oulua o ana afa, e le malo ai ia te oulua, … ona o le papa ua atiina ae ai oulua.’ (Helamana 5:12.)” (The Believing Heart, 2nd ed. [1990], 21–22).

Helamana 5:12

O Afa Tetele a Satani “O Le a Pesi Mai ia te Outou”

• Sa faamatala mai e Peresitene Spencer W. Kimball ia afā o ona po nei ua faaoo mai e Satani i luga o fanau a le Tama Faalelagi i aso nei:

  “O i tatou foi, ua feagai ma malosiaga malolosi faafanoina ua faaaogaina e le fili. O galu o le agasala, o le amioleaga, o le ola le mama, o le faatausuai, o le faasaua, o taufaa’ole’olega, o taupulepulega leaga, ma le le faamaoni ua taufaamatau mai ia i tatou uma. E o mai faatasi ma le mana tele ma le saosaoa ma o le a faaumatia ai i tatou pe afai tatou te le mataala.

  “Ae ua faailo mai se lapataiga mo i tatou. Mo lo tatou lava lelei ia tatou mataala ma ia faalogo ma sosola ese mai le leaga mo o tatou ola e faavavau. A aunoa ma le fesoasoani e le mafai ona tatou tutu e tetee atu i ai. E tatau ona tatou sosola atu i mea maualuluga po o le piimau i mea na e mafai ona taofia i tatou mai le tafia ese atu. O lena mea e tatau ona tatou piimau i ai mo le saogalemu o le talalelei a Iesu Keriso. O lo tatou puipuiga mai soo se malosiaga e mafai e le tiapolo ona faapotopotoina. Sa apoapoai atu se perofeta musuia o le Tusi a Mamona i lona nuu: ‘Ia manatua lava, e ao ina oulua atiina ae lo oulua faavae i luga o le papa o lo tatou Togiola, o le Keriso lea, o le Alo o le Atua. Pe a faaoo mai e le tiapolo ana matagi tetele, ioe, o ana u fanafana i le asiosio, ioe, pe a pesi mai ia te oulua lana uatoa uma lava ma ana afa, e le malo ai ia te oulua, e toso ifo ai oulua i le vanu o le puapuaga ma le auega e le gata’(Hel. 5:12)” (i le Conference Report, Oke.1978, 6; po o leLiahona,Mat. 1979, 6).

  Helamana 5:22–25

  Ia faatusatusa le Helamana 5:22–25 i le 2 Nifae 1:15 ma le Alema 34:15–16.

Helamana 5:35–41. Aminatapa ma se “Ao o le Pogisa”

• Ua tauina mai ia te i tatou i faamaumauga o Aminatapa “na tupu mai i sa Nifae, na ia lotu muamua i le ekalesia a le Atua, a ua vavae ese ia te i latou” (Helamana 5:35). O ona uiga faaalia, e pei ona faamaumauina i le Helamana 5:35, ua faaali mai ai o loo i ai pea ia te ia sina malamalama o le mea e tatau ona fai e se tasi ina ia salamo ma liliu atu ai i le Alii. Sa tuuina mai e Elder F. Burton Howard o le Fitugafulu le faamalamalamaga lenei:

  “Ina ia iloa le ala e toe foi mai ai, e pei ona iloa e Aminatapa, e ao i se tasi ona salamo ma tatalo seia tea ese le masalosalo ma le pogisa, ma mafai ai ona toe iloa mea taua. …

  “… E mafai lava ona e toe foi. E mafai e i latou ua le toe tatalo, ona toe tatalo. E mafai e i latou ua se, ona toe sue lo latou ala i le pogisa ma toe foi mai i lona aiga.

  “Ma a latou faia, o le a latou iloa ai e pei ona ou iloa, e sili atu ona popole le Alii i le tulaga o i ai nei le tagata, nai lo le mea sa i ai, ma le mea o i ai, nai lo le mea sa i ai” (i le Conference Report, Oke. 1986, 99–100; po o le Liahona, Ian. 1986, 80–81).

Helamana 5:50–52; 6:1–8. O Se Liua Maoae

• O le mana ma aafiaga o le talaiga a Nifae ma Liae i tagata o sa Lamana e maoae. Ao mulimulitai ai i le manuia o le la talaiga, ia matau ia aafiaga mo le taimi muamua o loo mulimuli mai, ia na tutupu i le talafaasolopito o le toatele o sa Lamana:

  1. O le toatele o tagata o sa Lamana sa liliu i le talalelei (tagai Helamana 5:50).

  2. Ua lafoaiina e sa Lamana a latou auupega ma lo latou ita ma uputuu sese (tagai Helamana 5:51).

  3. Sa latou faamatuu fua atu laueleele sa umia muamua e sa Nifae (tagai Helamana 5:52).

  4. Ua oo ina sili atu le amiotonu o le toatele o sa Lamana nai lo sa Nifae (tagai Helamana 6:1).

  5. Ua amata ona talai atu e sa Lamana le talalelei i sa Nifae (tagai Helamana 6:4).

  6. Ua i ai le filemu i le nuu uma lava (tagai Helamana 6:7).

  7. Ua tatala e sa Lamana ma sa Nifae ia femalagaiga ma fefaatauaiga saoloto o le tasi i le isi (tagai Helamana 6:8).

Helamana 6:17. Mafuli Loto i Oa

• Sa aoao mai e Peresitene Henry B. Eyring o le Au Peresitene Sili o mea faalelalolagi o se faafitauli lea i musumusuga ma le faaleagaga: “Ua faagaloina le Atua ona o le faamaualuga. O sina uluola ma le filemu, pe na o sina suiga laitiiti foi i le filemu ma le faauluolaina, e mafai ona aumaia ai ia i tatou nei lagona o le manatu ifo o le tagata ua na o ia lava. E mafai ona vave ona tatou lagonaina o loo tatou pulea o tatou olaga, o suiga mo le lelei o ni taunuuga ia o a tatou lava taumafaiga, ae le o se Atua o le o loo fesootai mai ia i tatou i se leo malu ma le itiiti o le Agaga. Ma e le pine, ona o lo tatou faamaualuga, ua tatou le toe sailia ai le leo malu o le Agaga. Ua vave ona tatou manatu faapea tatou te le manaomiaina” (i le Conference Report, Oke. 2001, 16; po o leLiahona, Ian. 2002, 17).

  Helamana 6:21, 26–31

  O le a le faamoemoe o Lusifelo ma ana au? E faapefea e lena mea ona faaosofia i tatou e tumau latalata i lo tatou Tama oi le Lagi?

Helamana 6:18–40. O Leaga o Pulega Faalilolilo

• O le mataupu e 6 o le Helaman o loo aumai ai ni malamalamaaga i pulega faalilolilo, e aofia ai auala latou te galulue ai, o mea e faaosofiaina i latou, ma le auala latou te maua ai le pule:

  1. O o latou faamoemoega e lua o le maua o le oloa ma le pule; ona latou vivii ai lea i na mea (tagai Helamana 6:17; Eteru 8:22; Mose 5:31).

  2. O pulega faalilolilo e manaomia ai le amioleaga masani lea e ola ai (tagai Helamana 6:21, 31, 38).

  3. O pulega faalilolilo e faia faalilolilo, o le solia e mafua ai le fasioti tagata (tagai Helamana 5:22; 6:22; Mose 5:29, 50).

  4. O pulega faalilolilo e aofia ai osiga feagagiga e tusa ai ma a latou lava faiga (tagai Helamana 6:22; Mose 5:30–31).

  5. Latou te faaaogaina le fasioti tagata, o misa, o le taufaamatau o misa, ma vete, mulilua, faitaaga, ma le pepelo faaviivii e maua ai le oloa ma le pule (tagaiHelamana 2:4–5; 6:17, 23).

  6. O pulega faalilolilo e faafoeina i tulafono e feteenai ma tulafono a le atunuu (tagaiHelamana 6:23).

  7. O Satani o le tagata fai mea leaga ma le pogai sili (tagai Helamana 6:26–30).

  8. O tagata auai e i ai a latou lava faamasinoga faaletulafono mo latou lava tagata—e le tusa ai ma tulafono a le nuu ae e faatatau i a latou lava tulafono (tagai Helamana 6:23–24).

  9. Latou te saili e ave le pule faalemalo i le vave e mafai ai (tagaiHelamana 2:5; 6:39).

  10. O tagata auai e saili e aveesea mai le saolotoga mai i isi ae saili e faatumauina le saolotoga mo i latou lava (tagai Eteru 8:25; Mose 5:28–33).

  11. O pulega faalilolilo e mafua ai le faafanoga i atunuu (tagai Alema 37:21, 26, 29; Helamana 2:13; Eteru 8:21–22).

  12. O pulega faalilolilo e inosia i le silafaga a le Atua (tagai 3 Nifae 9:9; Eteru 8:18).

Helamana 8:14–15. “O Le Gata Apamemea”

• I le avea ai ma se molimau e tetee atu i le amioleaga ma o se molimau a Keriso, sa ta’ua ai e Nifae se mea na tupu i le Feagaiga Tuai lea na fetuuina ai le fanauga a Isaraelu i “gata feai ua felelei” (1 Nifae 17:41; Numera 21:6–9). O le faafitauli muamua lava i le fanauga a Isaraelu o le upu leaga i le Atua ma Ana perofeta (tagai Numera 21:5 ), e pei lava ona faia e faamasino amio piopio i aso o Nifae. O le siitiaina i luga o le gata apamemea e Mose o se faatusa (o se faailoga suitulaga) o le faasatauroga o Keriso. Pe a vaavaai tagata i luga i le gata apamemea, sa faamaloloina i latou.

  O le faaaogaina e Nifae o lenei tala ua faamamafa mai ai e “tatau ona tatou faamoemoe atu i le Alo o le Atua ma le faatuatua” ma ola ai (Helamana 8:15; tagai foi Ioane 3:14–15 ). E auala mai i le taulaga togiola a Keriso, ua faatoilaloina ai gata uogo a Satani mo i latou uma o e salamo. Ona ia faamanatu atu lea i tagata o perofeta uma lava ua molimau mai i le Keriso (tagai Helamana 8:16–23).

• Sa faamanino atili mai e Elder Neal A. Maxwell (1926–2004) o le Korama a Aposetolo e Toasefululua le faatusaina o le gata apamemea lea na toe ta’ua i le Tusi a Mamona:

  “O loo aofia ai le manatu faaetetee faalelagi ma le faatusa moni. A aunoa ma lenei faamaopoopoga manaomia, e le mafai e le vaega o mea na tutupu o gata feai o le Feagaiga Tuai ona aumai ia i tatou se atoaga o malamalamaaga faaleagaga ia e manino lava le mafai ona ‘aoga e aoaoina ai i tatou.’ (1 Nifae 19:23.) O le faamamafa faa-faatusa i lenei vaega o loo i luga o mea uma e lua o le manaomiaina ma le faigofie o le ala a le Alii o Iesu. I se tulaga faafeagai, i taimi o Mose e toatele e na fano lava. O le folafolaga mo le lumanai o loo tuuina atu i lalo: ‘E pei foi ona ola i latou uma o e na tetepa ae i le gata, e faapea lava i latou uma o e faamoemoe atu i le Alo o le Atua ma le faatuatua ma le agaga salamo e ola ai i latou i lena ola e faavavau.’ (Helamana 8:15. Tagai foi 1 Nifae 17:41; Alema 37:46.)

  “O lenei la, ua tatou maua nei ia faatatauga ua faamaoniaina ma faalauteleina, e faafetai ai i mea taua ma le manino ua tuuina mai ia te i tatou i ‘nei faamaumauga mulimuli.’

  “O vaega atoa lava o mea na tutupu e agai atu i le manaomia e vaai atu ia Iesu Keriso lo tatou Alii, e tutusa foi lava o se mea faigofie e manaomia ae e le mafai ona fetuunaia. Ma e faigofie lava ma taua i soo se tupulaga!” (Plain and Precious Things [1983], 22).

  Helamana 8:16–25

  Mai le Helamana 8 ma leMataupu Faavae ma Feagaiga 6:9; 11:9; 15:6; 16:6, o le a se savali a perofeta uma? E faapefea ona e tali atu i le savali?

Helamana 9:36–41. O Le Atamai Atoatoa o le Atua

• I le vaai atu i le silafia e Nifae o mea lilo ma natia, sa i ai i latou na mananao e talai atu o ia o le Atua. E malamalama lelei lenei mea e tusa ai ma le faailoaga faalelalolagi atoa o uiga o le Atua. Sa aoao mai e Elder Neal A. Maxwell o le atamai atoatoa o se tasi o uiga o le Atua:

  “Sa fetalai atu le Alii i se faaaliga mo Ioane Uitimera lea na i ai i lona loto, lea na o le Alii lava ma Ionae Uitimera na iloaina, sa molimauina ai le atamai atoatoa o le Atua e tusa ma manaoga o lena tagata e toatasi. (MFF 15:3.)

  Sa saunoa atu Paulo i le au paia i Korinito, ‘I le ma lea, ua silafia e le Alii manatunatu o e popoto, ua faatauvaa ia.’ ’ (1 Korinito 3:20.) I le taimi a o le i oo i le lolo sa silafia ai e le Atua e le gata i le amioleaga o tagata i le lalolagi, ae sa ia silafia foi ‘o manatu uma sa mafaufau’ ai loto o tagata. (Kenese 6:5.) Na te silafia ‘mea uma e tutupu i o outou manatu.’ (Esekielu 11:5.) Sa fetalai Iesu lava ia ae tatou te lei tatalo, ‘Ua silafia e lo outou Tama mea ua outou matitiva ai.’ (Mataio 6:8.) E moni lava, e pei ona fai mai ai Nifae, ‘O le Atua … ua silafia e ia mea uma, ua leai se mea ua le silafia e ia.’ (2 Nifae 9:20.)

  “O lea o le atamai atoatoa o se tasi o uiga o le Atua soifua. E pei ona tatou faitau ai i le Helamana 9:41, ‘Aua ana le se Atua o ia, po ua le mafai o ia ona iloa mea uma.’ ‘Ma lenei, faauta, ua e maua se molimau; aua afai ua ou tau atu ia te oe mea e leai se tagata na te iloa, e te lei maua ea la se molimau?’ (MFF 6:24.)” (Things As They Really Are [1978], 22).

Manatu e Mafaufau Loloto i ai

• Sa faaaogaina e Helamana ia faataitaiga a o latou uluai tama, o Liae ma Nifae,e faamalosia ai ona atalii o Nifae ma Liae. O ai o lou aiga o loo uunaia oe mo le lelei? O le a se mea e uiga ia te i latou ua uunaia ai oe?

• O a ni lagona ua e tuuina atu i isi e uiga i igoa o lou aiga e tusa ma le olaga o loo ola ai nei?

• O a nisi o faavae o loo e fausiaina ai lou olaga i luga? E te manaomia ea ona faia ni fetuunaiga? O le a le faavae e sili ona taua ia te oe?

• O a ni faafitauli i le faaleagaga i le taimi o Nifae e tutusa ma faafitauli o loo e feagai ai i le aso?

Galuega Fautuaina

• 

  © 1999 Robert Casey

  Ia toe suesue le talafaasolopito o lou aiga ma iloa po o ai le uluai tupulaga o lou aiga na muamua liliu mai. Ia talanoa i tagata o lou aiga ma ao mai ia tala o lo latou faatuatua ma le liua mo lau lava talafaasolopito faaletagata.

• Ia fai se talanoaga ma se uo po o se tagata o le aiga e uiga i auala e ono sili atu ai ona tausia poloaiga, ola i mataupu faavae o le talalelei, ma latalata ai i lou Tama oi le Lagi i se lalolagi ua faatuputupulaia le faatumuina i le amioleaga.