A o latalata i le faaiuga o Lana galuega i sa Nifae, na faamalamalama e le Faaola le mea o loo aofia i Lana talalelei. O lenei poloka mau i le 3 Nifae 27–30 e i ai foi le tele o faamatalaga i tagata na faaliliuina (o soo sa Nifae e toatolu) nai lo se isi lava mea o tusitusiga paia. O le suesueina o le mataupu 28, o le a sili atu ai lou malamalama i le mafuaaga na filifilia ai e le Alii ia liuaina nisi o Ana auauna faaletino. O le mea mulimuli, na faaiuina i le 3 Nifae le faamatala ai e Mamona le matafaioi o le Tusi a Mamona i le faapotopotoina i aso e gata ai o Isaraelu ma le Alii (e auala atu ia Mamona) i le lapataia o Nuu Ese i aso e gata ai ia salamo ma liliu atu ia te Ia. O se avanoa lelei lenei e toe tautino atu ai le faaaogaina o le Tusi a Mamona i lou olaga ma le valaaulia o isi e o mai i le Faaola.
Faamatalaga
3 Nifae 27:3–8. “Fetalai Mai i le Igoa e Matou te Faaigoaina ai Lenei Ekalesia”
Pe a avea i tatou ma tagata o le Ekalesia a Iesu Keriso o le Au Paia o Aso e Gata Ai, tatou te ave i o tatou luga Lona suafa aua o Lana Ekalesia lenei. I le saunoaga a Peresitene Gordon B. Hinckley (1910–2008) i le uluai konafesi a o avea ma Peresitene o le Ekalesia, na ia saunoa ai i le mafutaga paia a le Ekalesia, o lona igoa, ma ona tiutetauave e aumai faatasi ai:
“O lenei ekalesia e le o se ekalesia a le ua avea ma ona Peresitene. O lona faaao o le Alii o Iesu Keriso, o lona suafa ua tauaveina e i tatou taitoatasi i o tatou lava luga. O lo o tatou galulue faatasi ai i lenei galuega sili. Ua tatou i ai iinei e lagolagoina lo tatou Tama i Lana galuega ma Lona mamalu, ‘o le aumaia lea o le tino ola pea ma le ola e faavavau o le tagata’ (Mose 1:39). O lau galuega e taua tele i le tulaga o lou lava tiutetauave e pei foi o la’u galuega i lo’u tulaga. E leai se valaauga i lenei Ekalesia e faatauvaa pe itiiti foi lona taui. O i tatou uma taitoatasi e tusa ma o tatou tiute, na fetalai mai le Alii:
“O lea ia faamaoni ai; ia tumau i le tofiga ua ou tofia ai oe; ia fesoasoani i e vaivai, ia sii ae lima o lo o tautau i lalo, ma faamalosia tulivae ua vaivai’ (tagai MFF 81:5).
“‘O lou faia foi o nei mea, ua e faia ai mea sili ona lelei i ou uso a tagata, ma ua faateleina ai le mamalu o lou Alii’ (MFF 81:4)” (i le Conference Report, Ape. 1995, 94; po o le Liahona, Iulai 1995, 78).
Na faamatalaina e Elder James E. Talmage (1862–1933) o le Korama a Aposetolo e Toasefululua ia mafuaaga na faaaogaina e le Alii e tali atu ai i fesili i le igoa e tatau ona faaigoaina ai Lana Ekalesia: “O le a e manatua ina ua maea ona faatuina e Keriso lana Ekalesia i muai tagata o lenei konetineta, ina ua ia afio mai o se Tagata toetu ia i latou, ina ua maea ona ia filifilia ma faauuina alii e toasefululua e taitaia mataupu a le Ekalesia, na i ai ni nai feteenaiga i le igoa e faaigoa ai le Ekalesia, ma le Toasefululua, i le manatuaina o le folafolaga agalelei a le Alii pe a latou valaau atu ia te ia, i le lotogatasi ma le faamoemoega, o le a mautinoa lava lo latou faalogoina, anapogi ma tatalo, ma na ia afio ifo ai ia i latou i lo latou fonotaga o le aufono i lona tino faaletino ma fesili atu ia i latou i le mea latou te fai. Na latou faapea atu, ‘Alii e, matou te mananao pe mafai ona e fetalai mai ia i matou i le igoa e faaigoaina ai lenei Ekalesia.’ Na ia tali, e pei ona ta’ua ai i le gagana i ona po nei, e faapea: Aisea e tatau ai ona i ai se fesili i se tulaga e faigofie e pei o lena? O ai e ana le ekalesia? O se ekalesia a Mose? Afai o lea, ua tatau ai, ona faaigoa i le igoa o Mose; pe afai o se ekalesia a se tagata, ona faaigoaina lea i lona igoa, ae afai o la’u Ekalesia, e pei ona outou fai mai, ma o lea lava, ona faaigoaina lea i lo’u igoa” (i le Conference Report, Ape. 1922, 70).
Na faamalamalama mai e Elder Robert D. Hales o le Korama a Aposetolo e Toasefululua le sootaga o le ave i o tatou luga o le suafa o Keriso ma le tulafono o le usiusitai ma le mauaina o faamanuiaga o le mafutaga ma le Agaga Paia:
“Pe a papatisoina i tatou, tatou te tauaveina i o tatou luga le suafa paia o Iesu Keriso. O le tauaveina i o tatou luga o Lona suafa o se tasi lea o aafiaga aupito i taua ua tatou maua i le olaga. Peitai, o nisi taimi tatou te o’o atu ai i lena aafiaga e aunoa ma se malamalama atoatoa i ai.
“E toafia nisi o a tatou fanau—e toafia nisi o i tatou—ua malamalama moni ina ua papatisoina i tatou, e le gata ua tatou tauaveina i o tatou luga le suafa o Keriso ae faapea foi le tulafono o le usiusitai?
“O vaiaso taitasi i le sauniga faamanatuga tatou te folafola atu ai e manatua le taulaga togiola a lo tatou Faaola a’o tatou faafouina a tatou feagaiga o le papatisoga.Tatou te folafola atu e faia e faapei ona faia e le Faaola—ia usiusitai i le Tama ma tausi i Ana poloaiga. O faamanuiaga tatou te maua mai ai o le i ai pea Lona Agaga e faatasi ma i tatou” (i le Conference Report, Oke. 2000, 6; po o le Liahona, Nov. 2001, 8).
3 Nifae 27:13–22. “O Le Talalelei Lenei Ou te Tuuina Atu ia te Outou”
Na aoao mai e Elder Neal A. Maxwell (1926–2004) o le Korama a Aposetolo e Toasefululua le faigofie ma manino o le talalelei ua avea ma mafuaaga tele e faigata ai i nisi o tagata ona taliaina le talalelei:
“O loo i ai i le Tusi a Mamona se faamatalaga na fetalai mai ai le Alii, ‘Faauta ua ou tuuina atu ia te outou la’u talalelei,’ ona ia faamatalaina lea o lana talalelei. (Tagai 3 Nifae 27:13 –18.) O se tala faigofie o se lalolagi na auina mai ai le Faaola o lē atonu e talia pe le talia e tagata, ae ui o lea, o ia lava o le Mesia.
“O lena tala faigofie o le mea tonu lava, e moni lava, e le mafai ona taliaina e le lalolagi, ma e matua faigofie lava atonu e i ai nisi e faamanualia i totonu i taimi e ala i le faigofie ma le manino o le talalelei. …
“… O loo i ai i latou atonu e latou te faasoaina atu nisi o o tatou talitonuga ma tulaga faatauaina, ae mo lē ua avea le toefuataiga o le talalelei ma pa pupuni, e le mafai ona latou a’ea. Ae i le toatele o tagata, o le mea ua tatou talai atu o le ‘valea’ lea” (For the Power Is in Them [1970], 47–48).
Na faamatalaina e le Faaola lava Ia Lana talalelei o le faatuatua, salamo, papatisoga, ma le Agaga Paia (tagai 3 Nifae 27:19–20) ma le tumau seia oo i le iuga (tagai fuaiupu 16). Na Ia ta’ua foi o le talalelei, o Ia lea ua afio mai i le lalolagi e faia le finagalo o le Tama ma ia “siitia i luga o le satauro” (fuaiupu 13–14).
3 Nifae 27:24–26. O Le a Faamasinoina e le Alii le Lalolagi mai i Tusi
“O tusi ua tusia atoa ma tusi e tusia atali e faamasinoina ai lenei nuu, aua e iloa ai e tagata a latou lava galuega.
Na faamatala e Peresitene Iosefa F. Samita (1838–1918) ia matafaioi o le a faia e faamaumauga tusitusia i le Faamasinoga:
“O le a faia foi e le Alii ia faamaumauga ma o le a faamasinoina ai le lalolagi. Ma o outou alii i le umiaina o le Perisitua paia—outou aposetolo, peresitene, epikopo, ma faitaulaga sili i Siona—o le a valaauina e fai ma faamasino i tagata. O lea, ua tatau ai ona outou faataatia tulaga faatonuina mo i latou ia latou mauaina, ma vaai ia latou ola e tusa ai ma le agaga o le talalelei, faia o latou tiute, ma tausia poloaiga a le Alii. E te faia se faamaumauga o a latou galuega. O le a e faamaumauina pe a latou papatiso, pe a faamauina i latou, ma pe a latou maua le Agaga Paia e ala i le faaee atu o lima. O le a e faamaumauina pe a latou o mai i Siona, i le avea ai o i latou ma tagata o le Ekalesia. O le a e faamaumauina pe na latou auai atu i o latou tiute o ni ositaulaga, aoao po o tiakono, avea ai ma toeaina, fitugafulu po o faitaulaga sili. O le a e tusia a latou galuega, e pei ona fetalai mai ai le Alii. O le a e faamaumauina a latou sefuluai … ; ae matou te faamasinoina tagata, muamua i le tatau ia i latou ona faia o latou tiute. I le faia o lena mea, o i latou o loo taiulu e tatau ona fai ma faataitaiga” (Gospel Doctrine, 5th ed. [1939], 157).
Na taulai patino atu Elder John M. Madsen o le Fitugafulu i le upu e tatau i le aoaoga a le Alii ia avea e pei o Ia. Na faamatala e Elder Madsen afioga a le Alii e sili atu nai lo se valaaulia, ae o se tulaga moomia mo a tatou feagaiga:
“Ina ia tatou mauaina o Ia ma iloa o Ia, o i tatou uma o tagata e tatau, ona faia e pei ona naunau i ai Moronae, ‘o mai ia Keriso, ina ia faaatoatoaina outou e ia’ (Moronae 10:32; faaopoopo le faatusilima). I nisi upu, e tatau ona tatou o mai ia Keriso ma taumafai e ‘avea’ e pei o Ia (tagai Dallin H. Oaks, i le Conference Report, Oke. 2000, 40–44; po o leEnsign, Nov. 2000, 32–34).
“Na fetalai mai le Alii toetu: ‘Pe faapefea la outou amio e tatau ai? E moni, ou te fai atu ia te outou e pei lava o a’u nei” (3 Nifae 27:27). O le uiga o le upu e tatau ai, e pei ona faaaogaina ai i Lana fesili ‘Pe faapefea la outou amio e tatau ai?’ e taua mo le malamalama i Lana tali, ‘E pei lava o Au nei.’ O le upu e tatau ai o lona uiga ‘e taua ona i ai’ po o le ‘e ao ina tauaveina pe noatia o se tiute po o se matafaioi’ (Noah Webster’s First Edition of an American Dictionary of the English Language, 7th ed. [1993], ‘e tatau ai’; tagai foi i le Luka 24:26), o loo faapea mai ai—o loo faamaonia mai e tusitusiga paia, o aso anamua ma ona po nei,—e ‘taua ona i ai,’ ma ua ‘noatia,’ i tatou i le feagaiga, ‘ia avea,’ e pei ona Ia tautino mai, ‘e pei lava o Au nei’ (3 Nifae 27:27; tagai foi 3 Nifae 12:48; Mataio 5:48; 1 Ioane 3:2; Moronae 7:48)” (i le Conference Report, Ape. 2002, 93; po o le Liahona, Iulai 2002, 88).
Na mauaina patino e le Perofeta o Iosefa Samita (1805–44) ma Oliva Kaotui faaaliga e ala i le Urima ma le Tumema e faatatau i tulaga ma faamanuiaga talu mai lena taimi o le talosaga a Ioane a o i ai i la le tino. O lenei faamatalaga na aumai i le “tusi taai” tusia ma nanaina e Ioane lava, ae na iu lava ina leiloa. Ia Aperila 1829, o fesili patino a Iosefa ma Oliva i lenei fuaitau o le Tusi a Mamona na afua ai se faaaliga na faamaumauina i le Mataupu Faavae ma Feagaiga vaega e 7.
O faauigaga ua i ai e fesoasoani e faamanino mataupu faavae o le faaliliuina, liuaina, ma le toetu. Matau le eseesega o le faaliliuina o le tagata soifua ma le tulaga o le liuaina:
O tagata soifua ua faaliliuina. “O tagata ua suia ina ia latou le oo ai i le tiga o le oti seia oo i lo latou toetu i le tino ola pea” (Guide to the Scriptures, “Translated Beings”).
“E toatele ua faapea o le aoaoga faavae o le faaliliuina o se aoaoga faavae na ave sa’o atu ai le tagata i le afioaga o le Atua, ma i le atoatoaga e faavavau, ae o se manatu sese lena. O lo latou nofoaga e nonofo ai o le faatulagaga faaterasitila, ma se nofoaga na saunia mo na tagata na Ia faasaoina e avea ma agelu e auauna atu i le tele o paneta, ma o i latou e lei ulufale atu i le atoatoa maoae e pei o i latou o e ua toetutu mai le oti” (Joseph Smith, History of the Church, 4:210).
Liuaina. “O le tulaga o tagata o e suia i foliga vaaia ma le natura le tumau—o lona uiga, e siitia i se tulaga maualuga—ina ia mafai ona latou tatalia le afioaga ma le mamalu o tamalii faalelagi” (Guide to the Scriptures, “Transfiguration”).
Toetu.“O le toe tuufaatasia o le agaga o le tino ma le tino faaletino pe a mavae le maliu. A mavae le toetu, o le a le toe tuueseesea le agaga ma le tino, ma o le a le toe oti le tagata” (Guide to the Scriptures, “Resurrection”).
Na tusia e Elder Jeffrey R. Holland o le Korama a Aposetolo e Toasefululua e uiga i le matafaioi a le Tusi a Mamona i le faataunuuina o feagaiga a le Atua mo Isaraelu:
“Na faaiuina e Mamona ana faamatalaga i lena vaitau mataina [o le asiasiga a le Faaola ia sa Nifae] … e ala i le molimau atu pe a oo mai se faamaumauga o le asiasiga a [Iesu Keriso] i Nuu Ese (le Tusi a Mamona), ona mafai lea ona iloa e i latou uma, o feagaiga ma folafolaga ia Isaraelu i aso amuli ua ‘amata ona faataunuuina.’ …
“O feagaiga a le Atua o le a tausia e lona nuu uma o le feagaiga. O le a leai se tasi e mafai ona ‘liliuina le aao taumatau a le Atua i le agavale’ i lenei tulaga. Ma o le valaau i Nuu Ese, lea na lomia ai le asiasiga a Keriso ia sa Nifae i le Tusi a Mamona, o le tautinoga laualuga lea o aso e gata ai, e mo i latou ia latou maua foi na feagaiga ma folafolaga e tasi” (Christ and the New Covenant [1997], 308).
I le 3 Nifae 29 o upu o le tetee ma le tauemu ua faaaogaina i le Tusi a Mamona e lapataia ai e faitau i aso e gata ai ina ia aua nei mafaufau mama i feagaiga a le Alii ma Isaraelu. O le tetee o lona uiga “o le teeenaina ma le faasausili” ma le tauemu o le “faailoa atu lea o le amusia po o le le taliaina e ala i le faamaasiasi” (Noah Webster’s First Edition of an American Dictionary of the English Language, 1828 [1967]). O le faaaogaina o na faaupuga ua fautuaina mai i le taimi o le oo mai o le Tusi a Mamona o le a faaleoina le le lava o le malamalama, talitonuga, ma le migao o le moni o le Afio Mai Faalua ma le galuega a le Alii i le faapotopotoina o Isaraelu (aemaise lava le ituaiga o Iuta).
I le faaiuga o le asiasiga a le Faaola i le au sa Nifae, na toe foi Mamona i le autu taua o aoaoga a le Alii i tagata—e faapea, i aso mulimuli o le a teena e Nuu Ese aoaoga a le Alii ma faatupulaia vave i le amioleaga e oo atu i lo latou faatafunaga (tagai 3 Nifae 16:10; 21:14–21). O tusitusiga i le 3 Nifae e foliga mai na i ai le uunaiga ia Mamona. I lana molimau mulimuli, na toe asia e Mamona aoaoga ma valoaga a le Faaola e tausalaina le amioleaga ma faapiopio, ma mea faataumaoi ma faafoliga o aso amuli. I fuaiupu mulimuli o le 3 Nifae, na tuuina mai ai e Mamona le vaifofo mo nei tulaga lamatia—o mai ia Iesu Keriso ma i ai le faatuatua ia Ia, salamo i au agasala, ia papatisoina, ma faatumuina i le Agaga Paia “ina ia faatasia outou ma lou nuu o e oi le aiga o Isaraelu” (3 Nifae 30:2).
Manatu e Mafaufau Loloto i ai
Aisea e taua ai mo le Ekalesia a Iesu Keriso ona faaigoa i le suafa o le Faaola?
E mafai faapefea ona e ave atoa i ou luga le suafa o le Faaola?
O a auala e eseese ai le faaliliuina ma leliua? O a auala e tutusa ai? E faapefea ona eseese le faaliliuina ma le liua mai le toetu?
Na faailoa mai e Mamona ni auala amioleaga. O faapefea ona alia’e mai nei mea i le lalolagi i le aso?
Galuega Fautuaina
Fai se lisi o uiga o le Faaola e te mafaufau e sili ona taua. Fai se iloiloga patino o lou lava olaga ma mafaufau i nei uiga ma faatulaga se fuafuaga e sili ona faataunuuina ai Lana poloaiga ia avea “e pei o a’u nei” (3 Nifae 27:27).
Faitau3 Nifae 27:5 ma le tatalo o le faamanatuga (Moronae 4:3; 5:2). Faailoa mai mataupu faavae na ta’ua o le a fesoasoani ia te oe e malamalama ai i le uiga o le ave i ou luga le suafa o Keriso.