Քրիստոսը կենդանացնում է Հայրոսի դստերը, Դան Բըր

Դաս 14․ Դասարանի նախապատրաստական նյութ

Ճանաչել Փրկչի հրաշքները

Երբ մենք խոսում ենք Հիսուս Քրիստոսի հրաշքների մասին, մենք հակված ենք կենտրոնանալ Նոր Կտակարանի ոգեշնչող պատմությունների վրա: Թեև շատ բան կարող ենք և պետք է սովորենք սուրբ գրությունների այս պատմություններից, դուք նկատե՞լ եք այն հրաշքները, որոնք Տերը գործում է մեր օրերում և ձեր կյանքում: Երբ ուսումնասիրեք, ձգտեք խորացնել ձեր հավատքը Տիրոջ զորության, նաև ձեր և ուրիշների համար հրաշքներ գործելու պատրաստակամության հանդեպ:

Բաժին 1

Փրկչի կատարած հրաշքներից ի՞նչ կարող եմ սովորել Նրա մասին

Իր մահկանացու ծառայության ընթացքում Հիսուս Քրիստոսը «քայլեց Պաղեստինի ճանապարհներով՝ բուժելով հիվանդներին, տեսողություն շնորհելով կույրերին, կենդանացնելով մահացածներին» («Կենդանի Քրիստոսը. Առաքյալների վկայությունը», ChurchofJesusChrist.org): Այս հրաշքները «Աստծո զորությամբ առաջացած արտասովոր իրադարձություններ» էին և «Հիսուս Քրիստոսի ավետարանի մի մասն են» (Սուրբ գրքերի ուղեցույց, «Հրաշք», scriptures.ChurchofJesusChrist.org): Դրանք հրեաների համար մեկ ապացույց էին, որ Հիսուսը խոստացված Մեսիան էր (տես Մատթեոս 11.4–5, Հովհաննես 20.30–31):

Տասներկու Առաքյալների Քվորումից երեց Ռոնալդ Ա. Ռասբանդը նկատել է. «[Հիսուս Քրիստոսի] Քավությունը, որն իր գագաթնակետին հասավ Իր Հարությամբ՝ երեք օր վարձու գերեզմանում մնալուց հետո, հանդիսանում է մարդկության պատմության ամենամեծ հրաշքը» («Ահա, Ես հրաշքների Աստված եմ», Լիահոնա, մայիս 2021, 109)

հարություն առած Քրիստոսը

Երեց Ռասբանդը նաև բացատրել է, որ մինչ Հիսուսի հրաշքները վկայում են Նրա աստվածության մասին, դրանք նաև «հիշեցնում են մեզ Նրա զորության, մեր հանդեպ Նրա սիրո մասին, երկնքից մեր մահկանացու փորձառությանը հասնելու և Նրա ցանկության մասին՝ ուսուցանելու այն, ինչն ամենաարժեքավորն է» («Ահա, «Ես հրաշքների աստված եմ», 111):

Մտածեք, թե ինչ կարող ենք սովորել Փրկչի մասին, երբ Նա բժշկում էր անդամալույծ մարդուն: Չորս մարդ ձեռքերի վրա տանում էին այդ մարդուն այն տունը, որտեղ Հիսուսն ուսուցանում էր: Երբ նրանք գտան այդ տունը, այնքան շատ մարդ կար այնտեղ, որ չկարողացան ներս մտնել. նրանք քանդեցին տան ծածկը և անդամալույծին իջեցրին Հիսուսի մոտ (տես Մարկոս 2.1–4):

Հիսուսը բժշկում է մարդուն

պատկերակ, ուսումնասիրել

Ուսումնասիրեք դասին նախապատրաստվելիս

Կարդացեք Մարկոս 2.5-12 և մտածեք, թե ինչ եք սովորում Փրկչի և Նրա բժշկող զորության մասին այս փորձառությունից:

Ուշադրություն դարձրեք, որ Փրկչի հրաշքը վերաբերում էր և՛ ֆիզիկական, և՛ հոգևոր կարիքներին: Ե՛վ մարմինը, և՛ հոգին բժշկելու Փրկչի կարողության վերաբերյալ Առաջին Նախագահության նախագահ Դալլին Հ․ Օուքսը ուսուցանել է.

Նախագահ Դալլին Հ․ Օուքս

Ամենամեծ հրաշքը կույրերի տեսողությունը վերականգնելը, հիվանդությունը բուժելը կամ նույնիսկ մահացածներին հարություն տալը չէ:

… Նույնիսկ ավելի մեծ հրաշք է Աստծո որդու կամ դստեր կողմից սրտի հզոր փոփոխությունը (տես Մոսիա 5.2): Սրտի փոփոխությունը, ներառյալ՝ նոր վերաբերմունքը, առաջնահերթություններն ու ցանկությունները, ավելի մեծ և կարևոր են, քան մարմնի հետ կապված ցանկացած հրաշք: (“Miracles,” Ensign, June 2001, 17)

սրտի փոփոխության ներկայացում

պատկերակ, գրել

Գրի առեք ձեր մտքերը

Կարդացեք կամ դիտեք հետևյալ հրաշքներից մեկը կամ մի քանիսը, որոնք Փրկիչը կատարեց Իր մահկանացու ծառայության ընթացքում, կամ ընտրեք ձեր օրինակը՝ կարդալու կամ դիտելու համար: Երբ ուսումնասիրում եք, խորհեք և գրանցեք ձեր մտքերը՝ ի պատասխան հետևյալ հարցերի.

1. Ի՞նչ կարող ենք սովորել Տիրոջ մասին այս հրաշքից:

2. Ի՞նչ իմաստ կարող եք քաղել այս հրաշքից ձեր կյանքի համար:

Հիսուս Քրիստոսի հրաշքները

• Կարդացեք Հովհաննես 2.1–11-ը կամ դիտեք «Jesus Turns Water into Wine» տեսանյութը (2:26):

• Կարդացեք Մարկոս 4.35–41-ը կամ դիտեք «Calming the Tempest» տեսանյութը (2:17):

• Կարդացեք Ղուկաս 7.11–16-ը կամ դիտեք «The Widow of Nain» տեսանյութը (2:22):

• Կարդացեք Մատթեոս 14.13–21-ը կամ դիտեք «The Feeding of the 5,000» տեսանյութը (2:52):

• Կարդացեք Հովհաննես 9.1–7-ը կամ դիտեք «Jesus Heals a Man Born Blind» տեսանյութը (7:47):

Բաժին 2

Իմ հավատքը և Տիրոջ կամքը ինչպե՞ս են ազդում հրաշքների վրա

Փրկչի մահկանացու ծառայության սկզբում բորոտությամբ տառապող մի մարդ մոտեցավ Հիսուսին՝ բժշկվելու: Ինչպես օգտագործված է ավետարանում, բորոտություն բառը կարող է վերաբերել մի շարք մաշկային հիվանդությունների, որոնք կարող են վնասել մաշկը, նյարդերը, աչքերն ու ոսկորները: Առանց բժշկական միջամտության, այն կարող է հանգեցնել նյարդերի վնասման, կուրության, մարմնի փոփոխությունների և ցավոտ մահվան: Փրկչի օրոք մարդը, որը մոտեցավ Փրկչին, համարվում էր «անմաքուր» և ապրում էր իր ընտանիքից ու հասարակությունից առանձին (տես Ղևտացոց 13.45–46):

Կամենում եմ՝ սրբուիր, Քայլ Վինսենթի

պատկերակ, ուսումնասիրել

Ուսումնասիրեք դասին նախապատրաստվելիս

Կարդացեք Մարկոս 1.40-42-ը՝ փնտրելով, թե այդ մարդն ինչպես հավատք դրսևորեց առ Տերը, երբ հրաշք էր փնտրում:

Յոթանասունից երեց Խորխե Ֆ. Զեբալոսը նկատել է.

Երեց Ջորջ Ֆ. Զեբալոս

Բորոտը ոչ մի բան չպահանջեց, թեև նրա ցանկությունները կարող էին արդար լինել. նա պարզապես պատրաստ էր ընդունել Տիրոջ կամքը։ («Եթե լինեք պատասխանատու», Լիահոնա, մայիս 2015, 125)

Երբ մենք իսկապես ցանկանում ենք ընդունել Տիրոջ կամքը, մենք պետք է նաև հավատք ունենանք չբուժվելու համար: Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Երեց Դեյվիդ Ա. Բեդնար

Արդարակեցությունն ու հավատքն, անշուշտ, գործիքներ են՝ բժշկելու հիվանդներին, խուլերին, և կաղերին, եթե այդ բժշկումն իրագործում է Աստծո նպատակները և համապատասխան է Նրա կամքին: Այսպիսով, նույնիսկ, եթե մենք ամուր հավատք ունենանք, … ոչ բոլոր հիվանդներն ու հաշմանդամները կբժշկվեն: Եթե բոլոր հակադրությունները կրճատվեին, եթե բոլոր տկարությունները հեռացվեին, ապա Հոր ծրագրի հիմնական նպատակները ձախողված կլինեին: (Դեյվիդ Ա. Բեդնար, «Ընդունեք Տիրոջ կամքը և ժամանակը», Ensign, օգոստոս 2016, 34)

Երբ խորհեք այն հրաշքների մասին, որոնք կարող եք ցանկանալ ձեր կյանքում, նկատի ունեցեք Տասներկու Առաքյալների Քվորումից երեց Ռոնալդ Ա. Ռասբանդի հետևյալ խորհուրդը.

Երեց Ռոնալդ Ա. Ռասբանդ

Հրաշքները կարող են լինել աղոթքի պատասխանը: Միշտ չէ, որ դրանք այն են, ինչ մենք խնդրում կամ ակնկալում ենք, բայց երբ մենք ապավինենք Տիրոջը, Նա կլսի մեզ և ճիշտ ձևով ամեն ինչ կանի: Նա կհամապատասխանեցնի հրաշքը այն պահի հետ, որը մեզ անհրաժեշտ է:

․․․Կան ժամանակներ, երբ մենք հրաշքի հույս ունենք՝ սիրելի մարդուն բուժելու, անարդար արարքը հետ շրջելու կամ դառնացած ու հիասթափված հոգու սիրտը մեղմելու համար: Երևույթներին նայելով մահկանացու աչքերով՝ մենք ցանկանում ենք, որ Տերը միջամտի, շտկի կատարվածը: Հավատքի միջոցով հրաշքը տեղի կունենա, թեև պարտադիր չէ, որ լինի մեր ժամանակացույցով կամ մեզ ցանկալի որոշմամբ: Արդյո՞ք դա նշանակում է, որ մենք պակաս հավատարիմ ենք, կամ արժանի չենք նրա միջամտությանը: Ոչ: Տերը սիրում է մեզ: («Ահա, ես հրաշքների Աստված եմ», Լիահոնա, մայիս 2021, 111)

Կինը աղոթում է մյուսների հետ

պատկերակ, խորհել

Խորհեք դասին նախապատրաստվելիս

Հրաշք փնտրելիս ինչպե՞ս կարող եմ հավատք զարգացնել՝ վստահելով Տիրոջ կամքին և ժամանակին:

Բաժին 3

Ինչպե՞ս կարող եմ ավելի լավ ճանաչել Տիրոջ հրաշքները իմ կյանքում

Նախագահ Օուքսը նկատել է. «Ամեն օր շատ հրաշքներ են տեղի ունենում մեր Եկեղեցու աշխատանքում և մեր անդամների կյանքում»: (“Miracles,” Ensign, June 2001, 17): Երբեմն մենք կարող ենք հրաշքներ տեսնել ուրիշների կյանքում, բայց չենք կարողանում տեսնել դրանք մեր կյանքում:

Երեց Ռասբանդը նաև ուսուցանել է.

Երեց Ռոնալդ Ա. Ռասբանդ

Ձեզանից շատերն ականատես են եղել ավելի շատ հրաշքների, քան գիտակցում են: Դրանք կարող են փոքր թվալ այն բանի համեմատ, որ Հիսուսը մեռելներին հարություն էր տալիս: Բայց մեծությունը չէ, որ հրաշքը հրաշք է դարձնում, այլ այն, որ այդ հրաշքը Աստծուց է եկել: («Ահա, ես հրաշքների Աստված եմ», Լիահոնա, մայիս 2021, 110)

պատկերակ, գրել

Գրի առեք ձեր մտքերը

Մի քանի րոպե հատկացրեք՝ գրանցելու այն հրաշքները, որոնց ականատեսն եք եղել կամ այժմ տեսնում եք: Սկսեք աղոթքով և խնդրեք Տիրոջը, որ բացի ձեր աչքերը՝ տեսնելու այն հրաշքները, որոնք տեղի են ունեցել:

Ցանկանո՞ւմ եք ավելին իմանալ (Ոչ պարտադիր)

Որո՞նք են Փրկչի հրաշքների մի քանի այլ օրինակներ:

• Բուժեց հարյուրապետի ծառային (ուսումնասիրեք Ղուկաս 7.1–10-ը)

• Ոգիներին դուրս քշեց մարդուց և ուղարկեց խոզերի մեջ (ուսումնասիրեք Մարկոս 5.1–19-ը)

• Ղազարոսին մեռելներից հարություն տվեց (ուսումնասիրեք Հովհաննես 11.1–44-ը կամ դիտեք «Lazarus Is Raised from the Dead» [7:51] տեսանյութը)

• Բուժեց քահանայապետի ծառայի ականջը (ուսումնասիրեք Ղուկաս 22.47–51-ը)

Հրաշք փնտրելիս ինչպե՞ս կարող եմ հավատք զարգացնել՝ վստահելու Տիրոջ կամքին:

Նախագահ Օուքսի ելույթում՝ «Բժշկել հիվանդներին» (Լիահոնա, մայիս 2010, 47–50), և երեց Բեդնարի ելույթում՝ «Ընդունենք Տիրոջ կամքն ու ժամանակացույցը» (Ensign, Aug. 2016, 29–35), դուք կարող եք սովորել ուրիշների օրինակներից, երբ կարդում եք այն մարդկանց պատմությունները, որոնք հավատք են դրսևորել հրաշքներ փնտրելիս:

Որտեղի՞ց կարող եմ ավելին իմանալ հրաշքների մասին, որոնք տեղի են ունենում մեր օրերում:

Երեց Դոնալդ Լ. Հոլսթրոմ

Յոթանասունից երեց Դոնալդ Լ. Հոլսթրոմը կիսվել է հրաշքով բժշկության մասին պատմությամբ «Մի՞թե հրաշքների օրը դադարել է» (Լիահոնա, նոյեմբեր 2017, 88-90)։

Քույր Սիդնի Ս. Ռեյնոլդս

Իր՝ «Հրաշքների Աստվածը» (Ensign, May 2001, 12–13) ելույթում քույր Սիդնեյ Ս. Ռեյնոլդսը՝ Երեխաների միության գերագույն նախագահության նախկին խորհրդականը, կիսվել է մեր կյանքում «ավելի փոքր» հրաշքների օրինակներով:

«A Wartime Miracle» (3:21) տեսանյութում նախագահ Թոմաս Ս. Մոնսոնը պատմել է, թե ինչպես է հրաշք կատարվել քահանայության զորությամբ: