Faatonuga Faalauaitele

Pe Faapefea Ona Faaaogaina le vasega po o le kosi O le Faaipoipoga ma Fegalegaleaiga Faaleaiga?

Ua fuafuaina lenei vasega e fesoasoani ai i tagata o le Ekalesia ina ia faamalolosia faaipoipoga ma aiga ma maua ai le olioli i a latou Fegalegaleaiga faaleaiga. O le au epikopo po o le au peresitene o le paranesi ua i ai le tiutetauave o le vaaia lea ua lelei ona faataunuuina le vasega.

Talu ai e eseese manaoga o tagata o le Ekalesia ma e eseese tulaga faaleaiga e o mai ai, o lea ua vaevaeina ai le vasega i vaega e lua. O le Vaega A, “O le Faamalolosia o Faaipoipoga,” e fesoasoani faapitoa lava i ulugalii faaipoipo faapea tagata o loo sauniuni e faaipoipoina. O le Vaega E, “O Tiutetauave o Matua i le Faamalolosia o Aiga,” e fesoasoani ai i matua ma matua matutua i a latou taumafaiga e “tausia [fanau] i aoaiga ma apoapoaiga a le Alii” (Efeso 6:4). O tagata o le Ekalesia o loo auai i le vasega e tatau ona malamalama e ia i latou le filifiliga e auai e tusa ai ma o latou lava tulaga manaomia. Mo se faataitaiga, o se ulugalii faaipoipo e aunoa ma se fanau atonu e mananao e auai i le vaega A ae le o le vaega E. E mafai e se matua nofo toatasi ona filifili e auai i na o lesona o loo i le vaega E.

E mafai ona fetuutuunai e taitai o uarota ma paranesi lo latou faaaogaina o le vasega e tusa ai ma uunaiga a le Agaga ma manaoga o tagata taitoatasi. E tatau ona latou mafaufau i manatu nei:

E mafai ona faatulagaina e au epikopo ma au peresitene o paranesi le vasega e avea o se vasega o le Aoga Sa. E mafai e taitai ona valaaulia ni tagata patino o le uarota po o le paranesi e auai atu i ai.
E mafai ona faaaoga e le au taitai o vaega o faitaulaga sili, o le au peresitene o korama a toeaina, ma le au peresitene o le Aualofa ia lesona taitasi mo Aso Sa muamua o masina taitasi. Pe a talafeagai ai, e mafai ona latou faaaogaina ia lesona mo faeasaite ma avanoa e aoao atu ai i afiafi o vaiaso po o aso Toonai.
E mafai ona faaaoga e le au epikopo po o le au peresitene o le paranesi ia lesona taitasi i vasega tuufaatasi a le Perisitua Mekisateko ma le Aualofa i Aso Sa lona lima. E mafai foi ona latou faaaogaina lesona i faeasaite mo alii ma tamaitai talavou.
E mafai ona faaaogaina e fautua o Perisitua Arona ma Tamaitai Talavou le tusi lesona o se risosi i afiafi o Mutuale. E mafai ona latou faaaogaina le tusi lesona e aoao faatasi ai alii ma tamaitai talavou po o le tuueseese foi o faalapotopotoga taitasi.
E mafai ona suesue e tagata taitoasi ma ulugalii ia le aoaoga e i latou lava.

O ai e tatau ona mauaina mea e faaaogaina mo le vasega?

O tagata uma o le uarota po o le paranesi o loo lisiina i lalo e tatau ona mauaina le kopi e tasi o le Tusi Lesona a le Faiaoga O le Faaipoipoga ma Fegalegaleaiga Faaleaiga ma le kopi e tasi o le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga.

O le epikopo po o le peresitene o le paranesi
Taitai vaega o faitaulaga sili
Peresitene o le korama a toeaina
Peresitene o Alii Talavou
Peresitene o le Aualofa
Peresitene o Tamaitai Talavou
Faiaoga o le vasega O le Faaipoipoga ma Fegalegaleaiga Faaleaiga

E tatau ona tofu tagata uma o le vasega ma se kopi o le taiala suesue.