Lesona 6

Faamalolosia o Faaipoipoga e Ala i le Faatuatua ma le Tatalo

Faamoemoega

Ina ia fesoasoani i tagata o le vasega ia malamalama ma galulue ia maua faamanuiaga e oo mai pe a faaaogaina e ulugalii le faatuatua ia Iesu Keriso ma tatalo faatasi.

Sauniuniga

Iloilo mataupu faavae o loo i lalo o le “O Ou Tiutetauave o se Faiaoga” itulau x–xiii i le tusi lesona lenei. Vaavaai mo auala e faaaoga ai mataupu faavae nei i au sauniuniga e aoao atu.
Mafaufau loloto i aoaoga ma mataupu faavae o loo otootoina atu i autu o loo matamata tetele atu le tusiga. Ia mafaufau i le gasologa o le vaiaso e uiga i ni auala e aoao atu ai nei aoaoga ma mataupu faavae. Saili le taitaiga a le Agaga i le filifilia o mea e tatau ona e faamamafaina e faafetaiaia ai manaoga o tagata o le vasega.

Faalautelega Fautuaina o le Lesona

E tatau i tane ma ava ona galulue faatasi ina ia faateleina lo la faatuatua ia Iesu Keriso.

Ia fetufaai atu le tala lenei na faamatalaina e Peresitene James E. Faust o le Au Peresitene Sili:

“O Elder Orin Voorheis … o se alii talavou lapoa, aulelei, ma amio solia, o le sa auauna atu i le Misiona a Atenitina Buenos Aires i Saute. I se tasi po, pe tusa lea ua 11 masina o lana misiona, sa osofaia ai e ni tagata leaga ua faaauupegaina ia Elder Voorheis ma lana soa. I se faiga le taupulea ma matautia, sa fanaina ai e se tasi o i latou ia Elder Voorheis i le ulu… .

“O Elder Voorheis e toetoe lava a pe atoa le tino ma e le o mafai ona tautala, ae e i ai sona agaga matagofie ma e mafai ona tali mai i fesili i le gaoioi o ona lima. O loo ia laeiina pea lana pine faifeautalai. E le o fesiligia e ona matua, ‘Aisea ua tupu ai lenei mea i si a ma tama pele, o le sa auauna atu i le valaau a le Matai?’ E leai se tasi e i ai sana tali mautinoa i ai seiloga ua matuai paia ia faamoemoega o loo i ai. E tatau ona tatou savavali i le faatuatua” (Liahona, Ianuari 2000, 70– 73).

Faitau faatasi ma tagata o le vasega le Eperu 11:1 ma le Alema 32:21. Ia faamatala atu faapea, o le Faaliliuga a Iosefa Samita o le Eperu 11:1, o loo faapea mai “o le faatuatua o le mautinoa lea o mea o loo faamoemoe i ai.”

E tusa ai ma nei fuaiupu, o le a le uiga o le faatuatua?
O a nisi o tulaga e manaomia ai ulugalii ina ia “savavali i le faatuatua,” e pei ona sa saunoa ai Peresitene Faust?

Mafaufau e fai atu i tagata o le vasega e fetufaai mai ni faataitaiga i o latou olaga. O tali e ono aofia ai le le lelei o le soifua maloloina, o le leai o se fanau, o le faasolosolo ina matutua, o fanau e le atoatoa le malosi, o le maliu o se pele, o faafitauli i mea tautupe, o fanau faalogogata, ma faalavelave faafuasei. Ia faamatala atu faapea, e mafai ona oo mai luitau i o tatou olaga e tusa lava pe tatou te taumafai e ola amiotonu.

Faitau faatasi ma tagata o le vasega le Moronae 7:32–33. Ia faamamafa atu faapea, e tatau ona faaautu lo tatou faatuatua ia Iesu Keriso. Na faamatalaina e Elder Richard G. Scott o le Korama a Aposetolo e Toasefululua e faapea, pe a tatou faatuatua ia Iesu Keriso, ona faamalolosia lea o i tatou e feagai ma luitau:

“O le a tuuina atu e le Alii le malologa faatasi ma le mana paia, pe afai e te sailia le laveaiga ma le lotomaualalo ma le faatuatua ia Iesu Keriso. … E leai se tagata e mafai ona fesoasoani ia te oe e aunoa ma lou faatuatua ma lou taumafai e fai lau vaega. O se laasaga tatau ai lena o lou alualu i luma. Aua e te saili mo se olaga e aunoa ma mafatiaga, tiga, toatuga, lui, po o le faanoanoa, aua o mea ia ua faaaoga e le Tama alofa e faateleina ai lo tatou alualu i luma ma le malamalama faaletagata lava ia. E pei ona tele ona faamaonia mai i tusitusiga paia, o le a e maua le fesoasoani pe a e faatuatua ia Iesu Keriso. E te faaali atu lena faatuatua i lou naunau lea e faalagolago i Ana folafolaga ua tuuina mai e auala mai i Ana perofeta, ma Ana tusitusiga paia” (Liahona, Iulai 1994, 8–11).

Ia faamatala atu faapea, e tatau i tane ma ava ona galulue faatasi e faaautu o latou olaga i le Faaola. Na faapea mai Elder Jeffrey R. Holland o le Korama a Aposetolo e Toasefululua:

“Pe e te manao ea ia maua le alofa mama o Keriso, le saogalemu, ma le puipuiga … i le mafutaga faaleulugalii ma le ola e faavavau? Ia avea ma se soo moni o Iesu. Ia avea ma se Au Paia o Aso e Gata Ai e faamaoni, e naunautai i upu ma mea e faia. Ia talitonu o le faatuatua e i ai i mea uma lava e te faia i le alofa faaleulugalii, aua e tatau ona i ai… . O Iesu Keriso, o le Malamalama o le Lalolagi, e na o le pau lea o le lamepa e mafai ona e iloa atu ai ma le manuia le ala o le alofa ma le fiafia mo oe ma lau manamea”(”How Do I Love Thee?“ [lauga i se faigalotu i le Iunivesite a Polika Iaga, 15 Fepuari 2000], 6).

E mafai faapefea e le faateleina o le faatuatua i le Faaola ona fesoasoani i ulugalii e taufai fefaamalosiai ai le la mafutaga? (E ono aofia ai i tali mea na o loo i lalo.)
1. O le a faateleina le avea faapei o Keriso i la’ua i le auala la te fetausia’i ai. E faatupuina atili lo la alofa, fesoasoani, toafilemu, onosai ma le naunautai e faalogo le tasi i le isi.
2. E faatupuina atili le lotomaualalo ma naunautai e salamo ma mulimuli i aoaoga a le Faaola. O le naunautai atili o i laua e salamo ma avea faapei o le Faaola, o le a faateleina ai le nofo fealofani o i laua
O a auala e mafai ai e ulugalii ona galulue faatasi ina ia faatupulaiaina le faatuatua i le Faaola? (Ia valaaulia tagata o le vasega e fetufaai atu mea na oo ia i laua ua faatupulaiaina ai lo la faatuatua i le Faaola. E faaopoopo atu i le fesili atu mo tali a tagata o le vasega, mafaufau e fetufaai atu mataupu faavae o loo lisiina i lalo.)
1. Usitai i tulafono ma sauniga o le talalelei. (Fetufaai atu le saunoaga lenei a Epikopo Robert D. Hales ao avea o ia o se Epikopo Pulefaamalumalu: “O le usiusitai i tulafono ma sauniga o le talalelei e taua tele e maua ai le faatuatua i le Alii o Iesu Keriso” (Liahona, Iulai 1990, 50–54).
2. Suesue faatasi i tusitusiga paia. (Faitau faatasi ma le vasega le Helamana 15:7–8.)
3. Faalagolago i le Alii. (Faitau faatasi ma le vasega le Faataoto 3:5–6. Ia faamatala atu, ao feagai ulugalii ma luitau, e mafai ona la sailia le fesoasoani a le Alii ma le maelega sili, ma avea lo la faatuatua ma se vaega sili atu o o laua olaga i aso taitasi.)

E faamanuiaina tane ma ava pe a latou tatalo faatasi.

O a faamanuiaga e mafai ona oo mai pe a tootutuli faatasi e le aunoa se tane ma le ava i le tatalo? (Ia uunaia tagata o le vasega e fetufaai atu mea na oo ia i laua e talafeagai ma lenei fesili. E faaopoopo atu i ai, ia faitau le upu sii lenei ma se faataitaiga se tasi po o faataitaiga uma e lua nei.)

Ao galue i le Korama a Aposetolo e Toasefululua, na apoapoai mai Elder Gordon B. Hinckley:

“E matua leai lava se isi faiga ou te iloa e i ai sona aoga tele i outou olaga nai lo le tulaga o le tootutuli ifo faatasi i le tatalo i le taeao ma le afiafi o aso taitasi. O le tele o mea faatauvaa e foliga mai e lamatia ai faaipoipoga uma e matua aveesea lava, pe afai e tootuli ifo i le tatalo i luma o le Alii, ia oulua taufai faafetai atu ia te ia, o le tane ma le ava, ma ia oulua tatalo ma ole atu faatasi mo ana faamanuiaga i o outou olaga, i o outou aiga, i e pele ia te outou, ma o outou moomooga.

“O le a avea loa le Atua ma a outou aumea, ma o a outou talanoaga ma ia i aso taitasi o le a maua ai le toafilemu i o outou loto ma se olioliga i o outou olaga lea e le mafai ona maua mai i se isi lava mea. O a outou faatasiga o le tane ma le ava o le a faapea lava ona faaleleia atili i le faagasologa i luma o tausaga; o le a faapea foi ona faamalosia ma le alofa. O o outou agaga talisapaiaina e le tasi o le isi po o le tane i le ava o le a matua faatupulaia lava”(Liahona, Oketopa 1971, 24–26).

Na faapea mai se tasi tane, o tatalo a lana ava na fesoasoani e uunaia ai o ia e avea o se tane ma se tama lelei. Pe a tootuli o ia i tafatafa o lana ava i le tatalo, ma uuina lona lima, e faalogo o ia o ole atu i le Tama Faalelagi e uiga i popolega o loo i lona loto. E faatupulaiaina lona alofa mo ia aua e iloa e ia e mama lona loto ma o loo naunautai ana uunaiga. E iloa ai e ia pe a talanoa lana ava i lona Tama Faalelagi, e leai lava se isi mea e manao i ai o ia nai lo le auauna atu ia te Ia ma le amiotonu.

O se tasi aiga, na tigaina le tane i se ma’i na le atoatoa ai lona malosi mo se vaitaimi umi. I afiafi taitasi ao le’i o atu o ia ma lana ava e momoe, sa faafetai atu i laua i le Tama Faalelagi mo o la faamanuiaga ma saili Lana taitaiga i le tausiaina o la la’ua fanau e toafa i se tupe maua itiiti. I tausaga mulimuli ane, ina ua mafai ona toe foi atu le tane e galue, na fesiligia ai i laua pe na faapefea ona mafaia e i laua ona ola i vaitaimi faigata. Na molimau i laua o le galulue faatasi ma le tatalo faatasi na mafaia ai. O a la tatalo faatauanau na taliina i faamanuiaga e tele, e aofia ai le faamoemoe na la mauaina e ala i le mafanafana o aafiaga a le Agaga.
E mafai faapefea ona fesoasoani le tatalo faatasi o le tane ma le ava e foia ai faafitauli i le la mafutaga? (Ao talanoaina e tagata o le vasega lenei fesili, ia faamatala atu faapea, pe afai e oo i tane ma ava le fefinauai, o nisi taimi e taofia ai le tatalo faatasi o i latou. Ae peitai, o le tatalo faatasi o se auupega malosi lea e faatoilaloina ai luitau faapena.)

Na faamatalaina e Peresitene Thomas S. Monson o le Au Peresitene Sili le aso na faamauina ai o ia ma lana ava, o Frances, i le Malumalu o Sate Leki. O Benjamin Bowring, o le alii na faia le sauniga, na tuuina atu ia i laua le apoapoaiga lenei: “E te lua finagalo malilie pe a ou tuuina atu ia te oulua se auala e mautinoa ai ia aua nei goto le la o i ai pea se eseesega e ia te oulua? Ia oulua tootutuli i po taitasi i tafatafa o lo oulua moega [ma tatalo]. O le tasi po, ia oulua tootutuli ma fai leo tele e oe le uso Monson le tatalo. Ao le tasi po, ia oulua tootutuli ma fai leo tele e oe le tuafafine Monson le tatalo. Ou te tautino atu ia te oulua a lua faia lena mea, soo se eseesega sa tupu mai ia te oulua i le aso, o le a mou atu a o oulua tatalo faatasi. Aua e le mafai ona oulua tatalo faatasi ma taofi i ni lagona le lelei o le tasi i le isi.” (Liahona, Ianuari 1989, 72–76).

Na faapea mai Elder David B. Haight o le Korama a Aposetolo e Toasefululua: “Afai o i ai i le tane ma le ava ni eseesega matuia i le lua ulugalii, e tatau ona oulua tootutuli ma le faamaualalo ma ole atu i le Atua lo tatou Tama, i le loto faamaoni ma le mautinoa, ina ia aveesea le pogisa i lo oulua va, ma ia maua e oulua le malamalama, e iloa ai o oulua sese ma ia salamo ai, ma faamagalo le tasi i le tasi, ma ia toe talia e le tasi ia le isi e pei ona lua faia i le amataga. Ou te matua molimau atu ia te outou o loo soifua le Atua ma o le a ia tali mai ia outou talosaga ma le lotomaualalo” (Liahona, Iulai 1984, 16–19).

Fai atu i tagata o le vasega o e ua faaipoipo e iloilo lemu a latou taumafaiga e tatalo faatasi ma o latou taitoalua. Faamamafa atu o aiga o loo i ai se matua e na o ia, o tatalo faatauanau a le tagata lava ia e aumaia ai faamanuiaga a le Atua i le aiga.

Faaiuga

Ia faamamafa atu faapea, afai e galulue faatasi le tane ma le ava i le faatuatua ia Iesu Keriso ma tatalo, e maua e i laua le fiafia sili, le lotogatasi, ma le malosi e feagai ai ma o la’ua luitau.

Ia molimau atu i upumoni sa talanoaina i le gasologa o le lesona e pei ona uunaia ai e le Agaga.

Ia faatatau atu i itulau 23–26 i le Taiala Suesue a le Tagata o le Vasega O Faaipoipoga ma Fegalegaleaiga Faaleaiga. Ia uunaia tagata o le vasega e iloilo aoaoga faavae ma mataupu faavae o loo i le lesona lenei e ala i le (1) mulimuli i se fautuaga e tasi pe sili atu foi o loo i le “Auala Mo Le Faatinoga” ma le (2) faitauina o le tala o le “Mauaina o le Olioli i le Olaga” na saunia e Elder Richard G. Scott. Faamatala atu e mafai ona matua aoga tele i ulugalii le faitauina ma talanoaina faatasi tala o loo i le taiala suesue.

Ia faamanatu atu i tagata o le vasega e aumai a latou taiala suesue i le vasega mo le lesona o loo sosoo ai.