Lesona 9

“O Fanau o le Tofi Lea Mai le Alii”

Faamoemoega

Ina ia faamanatu atu i tagata o le vasega e faapea, pe a faafeiloaiina e matua faalelalolagi ia fanau a le Tama Faalelagi i totonu o o latou aiga, ua i ai faatasi ai ma le tiutetauave e alolofa ia i latou, faapelepele ia i latou, aoao ia i latou, ma taitai i latou i le ola e faavavau.

Sauniuniga

Ao e saunia oe lava e aoao atu, vaavaai mo auala e mulimuli ai i mataupu faavae o loo i lalo o le “O Ou Tiutetauave o se Faiaoga” itulau x–xiii i le tusi lesona lenei.
Mafaufau loloto i aoaoga ma mataupu faavae o loo otootoina atu i autu o loo matamata tetele atu le tusiga. Ia mafaufau i le gasologa o le vaiaso e uiga i ni auala e aoao atu ai nei aoaoga ma mataupu faavae. Saili le taitaiga a le Agaga i le filifilia o mea e tatau ona e faamamafaina e faafetaiaia ai manaoga o tagata o le vasega.
Ia logo mamao atu i nai tamaiti toaitiiti o le Peraimeri e o mai i le vasega i le amataga o le lesona ma usuina le “O A’u Se Atalii o le Atua” (Tusipese a Tamaiti, 2–3). Po o le sauni foi e usu faatasi ma tagata o le vasega le pese.
Ia logo mamao atu i se tagata se toatasi pe toalua o le vasega e sauni e talanoa puupuu e uiga i le olioli e aumaia e a la fanau i o laua olaga. Fautua atu e fetufaai mai mea na oo i le tagata lava ia o se vaega o a la tautalaga. Saili le taitaiga a le Agaga ao e filifili pe o ai e tatau ona faataunuuina lenei tofiga.

Faalautelega Fautuaina o le Lesona

Ua tuuina mai e le Tama Faalelagi Lana fanau agaga mo le tausiga a matua faalelalolagi.

Fai atu i tamaiti na tofiaina o le Peraimeri e usuina le “O A’u Se Atalii o le Atua” (tagai “Sauniuniga,” aitema 3). Fai atu i tamaiti e toe foi vave atu i a latou vasega o le Peraimeri pe a mavae le pese. Afai e te le’i fai atu i tamaiti o le Peraimeri e o mai i le vasega, valaaulia tagata o le vasega e usuina le pese faatasi ma oe.

O a mea moni o loo aoaoina i lenei pese?
O a mea e mafai ona tatou aoaoina mai i lenei pese e uiga i tiutetauave a matua? (Mafaufau e faatatau atu i upu o le tali: “Taitai au, faasino mai, le ala e ui ai,/ Aoao mai mea e ao na ou fai/ Ma te toe mafuta ai.”)

Na aoao mai Peresitene Gordon B. Hinckley, le Peresitene lona 15 o le Ekalesia: “Ia aua lava nei galo o nei fanau o atalii ma afafine o le Atua ma e ao ona outou vaavaaia e pei o a outou lava, o Ia na uluai avea ma matua ae tou te le’i avea ma matua ma e na te le’i aveesea Lana aia tatau faamatua po o le naunau i ana fanau iti nei. O lea, alolofa ia i latou, ia tausia faalelei i latou. Tama, ia taofiofi lo outou lotoita, nei ma tausaga uma o lumanai. Tina, ia taofiofi o outou leo; tuutuu i lalo [aua le leoleoa]. Ia tausia faalelei a outou fanau iti. Ia faaulufale mai i latou i o outou aiga, ma faafaileleina i latou ma alolofa i ai ma o outou loto atoa” (Liahona, Me 1998, 26).

Na aoao mai Elder M. Russell Ballard o le Korama a Aposetolo e Toasefululua: “O tagata taitasi o fanau agaga ia a le Atua ma na mau faatasi ma le Tama Faalelagi ao le’i o mai i le lalolagi. Ua ia tuuina mai ana fanau agaga i matua faalelalolagi, o e e saunia tino faitino mo i latou e ala i le vavega o le fanau mai, ma tuuina atu i matua le avanoa ma le tiutetauave paia e alolofa, puipuia, aoao, ma aumaia i latou i le malamalama ma le mea moni ina ia i ai se aso, e ala i le togisala ma le toetu o Iesu Keriso, e toe foi atu ai i le afioaga o le Tama” (i le Conference Report, Aperila 1991, 104; po o le Ensign, Me 1991, 78).
E mafai faapefea e lenei iloa ma le malamalamaaga ona aafia ai le ala e tausia ai e matua a latou fanau?

Faitau le apoapoaiga lenei, na tuuina mai e Epikopo Robert D. Hales ao avea o ia o se Epikopo Pule Faamalumalu: “E tele auala ua avea ai matua faalelalolagi ma sui o le Tama Faalelagi i le tuuina atu o le tausiga, alofa, puipuiga, ma le aoaoina o fanau. Ua masani fanau ona vaai atu i uiga o lo latou Tama Faalelagi. A oo ina latou maua le alofa, faaaloalo, ma le faatuatuaina o o latou matua faaletino, e masani ona faatupuina ai, e aunoa ma lo latou iloa, ia lava lagona tutusa, e uiga i lo latou Tama Faalelagi” (Liahona, Ianuari 1994, 10).

Ia valaaulia tagata o le vasega e mafaufau loloto i le auala e mafai ai i uiga ma mea e faia e matua ona aafia lagona o le fanau agai i le Tama Faalelagi.

E tatau i matua ona saili ina ia faafetaiaia manaoga o tamaiti taitoatasi.

Ia faamatala atu faapea, e tofu tamaiti taitoatasi ma ona lava manaoga, o taleni, ma tulaga manaomia. E taua i matua le taumafai ia malamalama i tulaga lavatia o tamaiti taitoatasi ma tulaga manaomia o i latou taitasi.

E toatele fanau e matua eseese mai o latou matua. Atonu e eseese o latou uiga, ma atonu e eseese foi o latou malosiaga ma vaivaiga. O nei eseesega e mafai ona avea ma ni mea e fiu ai matua, atonu e faigata ia i laua ona taitai ma fesoasoani i fanau i tulaga sa le’i oo lava i ai i laua. Ae peitai e tatau ona manatua e matua ua tuuina atu e le Tama Faalelagi nei fanau faapitoa ia i laua ma o le a fesoasoani o Ia ia i laua ia iloa le auala e taitai ai tamaiti taitasi agai i le faataunuuina o lona faamoemoega paia. Na faapea mai Sister Michaelene P. Grassli, o le sa avea ma peresitene aoao o le Peraimeri:

“E manaomia ona tatou iloa po o ai moni a tatou fanau. E manaomia ona tatou iloa po o a mea e fiafia i ai i latou, o a mea latou te popole ai, ae o a mea latou te fai pe afai e faataunuuina ni o latou moomooga pito sili. E masani lava ona matagofie o latou moomooga pito sili. E mafai ona tatou tuu atu i tamaiti ia avea i latou ma i latou lava ae le faamoemoeina i latou ia pei lava o o latou matua. Ia tuu atu ia i latou ni aafiaga eseese ina ia mafai ona latou iloa mea latou te fiafia i ai e fai ma taleni—e tusa pe le tutusa o latou manaoga ma mea e te fiafia i ai” (”Aoao a Tatou Fanau,“ Liahona, Iulai 1994, 66).

Aisea e taua ai i matua ona malamalama i uiga taitoatasi ma tulaga manaomia o a latou fanau?
O a ni afaina e mafai ona oo mai pe a faamalosia e matua fanau i gaoioiga po o tulaga e le ogatasi ma taleni ma mea e fiafia i ai le fanau?
O a mea e mafai ona faia e matua e faafaileleina ai taleni ma malosiaga o tamaiti taitasi?

Ina ia fesoasoani i tagata o le vasega e faaaogaina le mataupu faavae lenei, fai atu ia i latou e lisi ni auala e mafai ai ona eseese fanau o le tasi i le isi ma mai o latou matua i le aiga e tasi. O le faia o lena mea, e mafai ona faatatau atu tagata o le vasega i o latou tulaga faamatua, pe o mea foi na oo ia i latou faatasi ma o latou lava matua ma uso ma tuagane. Tusi o latou manatu i luga o le laupapa. Ona talanoaina lea o taleni patino po o uiga ma amioga o loo i le lisi. Faatatau atu i taleni po o uiga o loo taua i le lisi e ala i le tuuina atu o fesili e pei o nei:

O a mea e mafai ona faia e matua e uunaia ai se tamaitiiti e faaauau ona atiaeina lenei taleni?
Afai e i ai i se tamaitiiti le uiga lenei, o a mea e ono faia e matua e aoao ai o ia e alofa ma agalelei?
O a auala e mafai ai e se tamaitiiti faatasi ma lenei taleni ona tuuina atu sona sao i le afiafi faaleaiga?

Ia faamatala atu faapea, o matua e malamalama i malosiaga ma uiga o tamaiti taitasi o le a mafai teisi ona puleaina lelei le la fanau. Ia valaaulia se tagata o le vasega e faitau le apoapoaiga lenei, na tuuina mai e Elder James E. Faust ao galue o ia i le Korama a Aposetolo e Toasefululua (itulau 55 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga):

“O se tasi o lu’itau sili ona fita i matua o le aoaiina tatau lea o le fanau. O le aoaoina o le tamaitiiti, e faalagolago lava i ona uiga. Aua e tofu lava le tamaitiiti ma ona uiga faapitoa. O le aoaoga e aoga i le isi e le aoga i le isi. Ou te le iloa po o ai e lava lona poto e faapea mai ai ua mamafa le aoaiga pe ua mama foi, sei vagana ai lava matua o le fanau lava ia, o e sili ona alolofa ia te i latou. O lena mea e manaomia ai le taitaiga ma le agaga tatalo o matua. O le aoaoga faavae lava o le aoaia o fanau, e tatau ona faia i le alofa nai lo le faasalaga” (Liahona, Ianuari 1991,34– 37).

O a ni tulaga ua e oo i ai ua fesoasoani ai ia te oe ia e malamalama o le aoaiga e tatau ona tuuina atu e tusa ai ma manaoga ma tulaga o tamaiti taitasi?

E tatau i tamaiti ona maua se Fegalegaleaiga alofa ma o latou matua.

Ia faamatala atu o le tasi o mea pito sili ona taua o le faia lea o se siosiomaga o le alofa, faauoga, ma le fiafia i le aiga. Ia fetufaai atu saunoaga nei:

Ao galue i le Korama a Aposetolo e Toasefululua, na saunoa Elder Gordon B. Hinckley: “E maeu le matagofie, e maeu le faamanuiaina o le tamaitiiti e lagona le felata’i ma ona matua. O lena mafanafana, o lena alofa o le a fuaina mai fua lelei i tausaga o mulimuli mai” (i le Conference Report, Oketopa 1978, 25; po o le Ensign, Novema 1978, 18).

Na faapea mai Elder Marlin K. Jensen o le Au Fitugafulu: “E pei lava o le tele o mea e faatauaina i le olaga, o o tatou manao mo faauoga e masani lava ona maua i le aiga. Afai ae lagona le fefaauoai o le fanau i totonu o le aiga, o le tasi i le isi, faapea ma le va ma matua, latou te le o atu faasulusulu ai i nisi e taliaina i latou i fafo atu o le aiga” (Liahona, Iulai 1999, 74–75).

O a mea e te manatuaina mai i lou laitiiti na fesoasoani e te lagonaina ai na alofaina oe? O a auala ua aafia ai oe i nei lagona o le alofa i lou olaga atoa?
O a mea e mafai ona faia e matua i o latou aiga e fesoasoani ai i fanau ia iloa e alolofa matua ia i latou?

Ia faamatala atu faapea, a o taumafai matua e faia ni Fegalegaleaiga alofa ma a latou fanau, e taua le faia o fesootaiga lelei. Na apoapoai mai Elder M. Russell Ballard: “E leai se mea e sili ona taua i le Fegalegaleaiga i le va o tagata o le aiga nai lo se fesootaiga malamalama ma faamaoni. Aemaise lava i matua o loo taumafai e aoao atu aoaoga ma faatulagaga o le talalelei i a latou fanau. O le malosi e fefautuaai ai ma o tatou talavou— ma atonu e sili atu lona taua, o le faalogo lelei lea i o latou popolega—o le faavae lea e fausia ai Fegalegaleaiga faamanuiaina. O le mea e masani ona vaaia i o tatou mata ma mea tatou te lagonaina i le loto o le a sili atu ona fesootai nai lo mea tatou te faalogoina pe tautala i ai” (Liahona, Iulai 1999, 103).

O a mea e mafaia ona fai e matua e fesootai lelei ai ma a latou fanau? (E ono aofia ai i tali mea na o loo lisiina i lalo.)
1. Ia aua nei fiu i le avea ma se tagata e faalogo. Ao talafeagai ai, toe fai atu mea o loo e malamalama ai mai mea o loo fai mai ai le fanau. O le a faaali atu ai ia i latou o loo e faalogo moni lava ma o le a fesoasoani ia te oe ia mautinoa ua e malamalama.
2. Faaalu ni taimi e talanoa ma faalogo ai i le fanau e tusa lava pe laiti tele i latou—e tusa lava pe le’i mafai ona tautatala i latou.
3. Ia amanaiaina o latou manatu.
4. Faia ni talanoaga i taimi o taumafataga.
5. Faaalu ni taimi e talatalanoa taitoatasi ai ma i latou.
Ina ia faamamafa atu faapea e tatau i matua ona faaalu ni taimi na o i latou ma tamaiti taitoatasi o le la fanau, ia fetufaai atu le apoapoaiga lenei mai ia Elder Robert D. Hales o le Korama a Aposetolo e Toasefululua: “Ia faaalu taimi eseese ma [lau] fanau, ma tuu atu ia i latou e filifilia le gaoioiga ma le mataupu o le talanoaga. Ia aveese nisi lava mea e faalavelave mai” (Liahona, Iulai 1999, 38).

Mo nisi manatu i mataupu faavae o fesootaiga lelei, tagai i itulau 25–29 i le lesona 5.

O le faasaunoa ma le faatautala i tamaiti o se agasala lea i le Atua.

Faitau faatasi ma tagata o le vasega le Mataio 18:6. Ia faamatala atu faapea, e le tatau i matua ona saua pe faasaunoa i a latou fanau i soo se mea.

O a nisi ituaiga o le faasaunoa po o le faia faatautala o fanau? (Mafaufau e lisi tali a tagata o le vasega i luga o le laupapa. E ono aofia ai tali na o loo i le lisi lenei.)
1. Ita leaga ma le faamisa
2. O le avaavau
3. O le taufaamata’u
4. O faiga saua faaletino
5. Soo se fesootaiga e le tusa ai i tulaga feusua’i po o le tautagotago
6. O faamatalaga e faamamasagia ai
7. O le taofiofi o lagona
8. O le faamatamataina i ata, o mea malie, gagana, mekasini, po o mea i le Initoneti e le talafeagai.
9. O le faailoaina atu o fanau i elemene e le talafeagai ai
10. O le tuulafoai, e aofia ai le le lelei o togafitiga faafomai ma le itiiti o le vaavaaiga po o le puleaina lelei
O a ni auala o loo faatamaia ai fanau i mea nei?

A mavae le talanoaina o lenei fesili, ia faamatala atu o nisi taimi o tagata matutua na le lelei le auala na tausia ai i latou ao laiti, ona latou tuuina atu ai foi lea i tamaiti ala leaga lava ia e tasi, e aunoa ma le iloaina e matuai leaga lava lea amioga. O nisi taimi e lagona ai e i latou e le mafai ona suia e i latou lava la latou amioga. Ia faamamafa atu faapea, o tagata o e na faasaunoa e mafai ona suia la latou amio ao sailia e i latou ma le lotomaualalo le fesoasoani a le Alii ma le taitaiga.

O i latou o e mananao e fesoasoani ia malamalama ma suia la latou amio faasaunoa e mafai ona liliu atu i o latou epikopo. O le a mafai e ia ona fautuaina i latou. E mafai foi e ia ona fautua atu e saili i ni tagata fautua faapolofesa i Auaunaga Faaleaiga a le AAG po o risosi ma fesoasoaniga i le alalafaga e ogatasi ma tulaga faatonuina o le Ekalesia.

Faitau faatasi ma le vasega le Mataupu Faavae ma Fegaiga 121:41–44.

O a auala e fesootai ai lenei mau ma le ala e puleaina ai pe aoaoina ai e matua a latou fanau?

Ao galue o se Fesoasoani Muamua i le Au Peresitene Sili, na aoao mai Peresitene Gordon B. Hinckley:

“E le manaomia e fanau le sasa. Latou te manaomia le alofa ma le uunaiga. Latou te manaomia tama o e e mafai ona latou vaavaai atu i ai ma le faaaloalo ae le o le fefe. Ae sili ai lava, latou te manaomia faataitaiga… .

“O la’u aioi atu …o se aioiga ia laveai le fanau. Ua toatele na’ua i latou o savavali ma le tiga ma le fefe, i le faaesea ma le atuatuvale. E manaomia e fanau le susulu o le la. Latou te manaomia le fiafia. Latou te manaomia le alofa ma le tausiga. Latou te manaomia le agalelei ma le faafouina ma le alofa. O fale o aiga uma lava, e tusa pe o le a le tau, e mafai ona maua ai se siosiomaga o le alofa lea e avea ma siosiomaga o le faaolataga” (i le Conference Report, Oketopa 1994, 74–75; po o le Ensign, Novema 1994, 54).

Na aoao mai Peresitene Polika Iaga, le Peresitene lona 2 o le Ekalesia:

“Aoao lau fanau i le alofa ma le matau i le Alii; ia iloa o latou uiga ma amioga, ma taulimaina i latou e fuafua i ai, ia aua nei faatagaina oe lava e faasa’oina i latou i le vevela o lou ita; aoao i latou ia alolofa ia te oe ae le o le fefefe ia te oe” (Discourses of Brigham Young, filfilia e John A. Widtsoe [1954], 207).

E aumaia e tamaiti le olioli tele i olaga o o latou matua.

Ia faamatala atu e taua i matua ona manatua o latou tiutetauave paia ma le taualoa, ae peitai e taua foi lo la taulai atu i le olioli e aumaia e a la fanau i o laua olaga. Ao galue i le Korama a Aposetolo e Toasefululua, na maitauina e Elder James E. Faust “e ui ina e itiiti lava ni lu’itau faaletagata e sili atu i le avea ma ni matua lelei, ae e itiiti foi ni avanoa e maua ai le olioli e sili atu” (Liahona, Ianuari 1991, 34–37; tagai foi i le itulau 54 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga).

Ia valaaulia tagata o le vasega e talanoa puupuu e uiga i le olioli e aumaia e a latou fanau i o latou olaga (tagai “Sauniuniga,” nu. 4). Afai e lava le taimi, ia mafaufau e fetufaai atu ou lagona e uiga i le olioli ua aumaia e lau fanau i lou olaga.

Faaiuga

Ia faamamafa atu faapea, o fanau o meaalofa ia mai le Tama Faalelagi. E pei ona sa faapea mai le Faisalamo, “O fanau o le tofi lea mai le Alii”(Salamo 127:3). Pe a faafeiloaiina e matua faalelalolagi fanau a le Tama Faalelagi i o latou aiga, ua tuuina faatasi mai ai ma le tiutetauave e alolofa ia i latou, faapelepele ia i latou, aoao ia i latou, ma taitai atu i latou i le ola e faavavau.

Ia faatatau atu i itulau 39–43 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga. Ia uunaia tagata o le vasega e iloilo aoaoga faavae ma mataupu faavae o loo i le lesona lenei e ala i le (1) mulimuli i se fautuaga e tasi pe sili atu foi o loo i le “Auala Mo Le Faatinoga” ma le (2) faitauina o le tala ”O Fanau Faapelepele, o se Meaalofa Mai le Atua,” na saunia e Peresitene Thomas S. Monson. Faamatala atu e mafai ona matua aoga tele i ulugalii le faitauina ma talanoaina faatasi tala o loo i le taiala suesue.

Ia uunaia tagata o le vasega e aumai a latou taiala suesue i le vasega mo le lesona o le a sosoo ai.

O Isi Mea e Maua ai le Fesoasoani

O saunoaga e ta’ua ai manaoga o i latou o e e le o i ai i tulaga masani faaleaiga

Ina ia tuuina atu tulaga o tagata o le vasega o e e le o i ai i tulaga masani faaleaiga, faitau se saunoaga e tasi pe sili atu foi o saunoaga nei:

Na faamalamalamaina e Elder Boyd K. Packer o le Korama a Aposetolo e Toasefululua: “Soo se tagata o lå ona o tulaga o le natura po o tulaga e oo i ai na te le maua ai faamanuiaga o le faaipoipoga ma le avea ma matua, po o se tasi foi ua tatau ona galue na o ia i le tausia o tamaiti ma galue e lagolagoina ai i latou, o le a leai se faamanuiaga e aveesea mai ia te ia i le faavavau– - pe afai latou te tausia poloaiga. E pei lava ona sa folafola mai e Peresitene Lorenisio Senoa [o le Peresitene lona 5 o le Ekalesia], ‘o lena mea ua mautinoa ma o se mea lelei’” (Liahona, Ianuari 1994, 24–27).

Na saunoa mai Peresitene Harold B. Lee, le Peresitene lona 11 o le Ekalesia: “[O tamaitai] ua latou le maua faamanuiaga e avea ai ma ava po o tina i le ola nei—ae faapea ifo i o latou loto, ana ou maua le avanoa semanu ou te faia, po o le semanu ou te tuuina atu ae le mafai aua ua le ia te au—o le a faamanuia lava outou e le Alii, ma o le lalolagi o le a sau o le a maua ai e i latou o e ua i ai le naunau i o latou loto mo mea tonu ma mea ua latou le maua, pe afai e le o latou e mafua ai” (Liahona, Iulai 1972, 6).

Na faamalamalama mai e Elder Gene R. Cook o le Fitugafulu: “O nisi taimi e i ai i se aiga se matua e nofo toatasi ona o le maliu po o le tetea. O nisi taimi e na o le toatasi le matua e auai i le Ekalesia. O nisi taimi e i ai le isi e toaga mai ae le toaga mai le isi. E tutusa uma lava, e mafai e se matua e toatasi e uunaia faaleagaga ona tausia ma le manuia se aiga i le Alii. O nisi o alii ma tamaitai pito sili ona lelei ua ou iloa e o mai mai aiga faapena. Ia faamanuia pea lava pea e le Alii i na tina ma tama lelei o e e manatu e tatau ona latou tausia ‘e i latou lava’ ma aumaia a latou fanau i lalo o le taitaiga a le Alii” (Raising Up a Family to the Lord [1993], xv).